1. அதீதாதி³ஏகச்சகதா²வண்ணனா

299. யே கதூபசிதா குஸலாகுஸலா த⁴ம்மா விபாகதா³னாய அகதோகாஸா, கதோகாஸா ச யே ‘‘ஓகாஸகதுப்பன்னா’’தி வுச்சந்தி. யே ச விப்பகதவிபாகா, தே ஸப்³பே³பி ‘‘அவிபக்கவிபாகா’’தி வேதி³தப்³பா³. தேஸம் விபாகதா³னஸாமத்தி²யம் அனபக³தந்தி அதி⁴ப்பாயேன பரவாதீ³ அத்தி²தம் இச்ச²தி. யே பன பரவாதீ³ ஸப்³பே³ன ஸப்³ப³ம் விபக்கவிபாகா குஸலாகுஸலா த⁴ம்மா, தேஸம் அபக³தந்தி நத்தி²தம் இச்ச²தி. தேனாஹ ‘‘அத்தீ²தி ஏகச்சம் அத்தி² ஏகச்சம் நத்தீ²’’திஆதி³. ஏவம் இச்ச²ந்தஸ்ஸ பன பரவாதி³னோ யதா² அவிபாகேஸுபி ஏகச்சம் நத்தீ²தி ஆபஜ்ஜதி, ஏவம் விபக்கவிபாகேஸு அவிபக்கவிபாகேஸு ச ஆபஜ்ஜதேவாதி த³ஸ்ஸேதும் ‘‘அவிபக்கவிபாகா த⁴ம்மா ஏகச்சே’’திஆதி³னா பாளி பவத்தா. தேன வுத்தம் ‘‘திண்ணம் ராஸீனம் வஸேனா’’திஆதி³. வோஹாரவஸேனாதி ப²லஸ்ஸ அனுபரமவோஹாரவஸேன, ஹேதுகிச்சம் பன அனுபரதம் அனுபச்சி²ன்னம் அத்தீ²தி லத்³தி⁴யம் டி²தத்தா சோதே³தப்³போ³வ. அவிச்சே²த³வஸேன பவத்தமானஞ்ஹி ப²லஸ்ஸ பப³ந்த⁴வோஹாரம் பரவாதீ³ வோஹாரதோ அத்தீ²தி இச்ச²தி, ஹேது பனஸ்ஸ கம்மம் பரமத்த²தோ ச கம்மூபசயவாதி³பா⁴வதோ பத்திஅப்பத்திஸபா⁴வதாத³யோ விய சித்தவிப்பயுத்தோ கம்மூபசயோ நாம ஏகோ ஸங்கா²ரத⁴ம்மோ அவிபன்னோ, ஸோபி தஸ்ஸேவ வேவசனந்தி பரவாதீ³. யம் ஸந்தா⁴யாஹ –

‘‘நப்பசயந்தி கம்மானி, அபி கப்பஸஹஸ்ஸதோ;

பத்வா பச்சயஸாமக்³கி³ம், காலே பச்சந்தி பாணின’’ந்தி.

யஞ்ச ஸந்தா⁴ய பரதோ பரிபோ⁴க³மயபுஞ்ஞகதா²ய ‘‘பரிபோ⁴க³மயம் பன சித்தவிப்பயுத்தம் உப்பஜ்ஜதீதி லத்³தி⁴யா படிஜானாதீ’’தி வக்க²தி.

ஏகச்சம்அத்தீ²திகதா²வண்ணனா நிட்டி²தா.