9. அபரினிப்ப²ன்னகதா²வண்ணனா

917-918. அனிச்சாதி³கோ பா⁴வோதி அனிச்சஸங்கா²ரபடிச்சஸமுப்பன்னதாதி³கோ பா⁴வோ த⁴ம்மோ பகதி ஏதஸ்ஸாதி அத்தோ². து³க்க²ஞ்ஞேவ பரினிப்ப²ன்னந்தி ‘‘து³க்க²ஸச்சம் ஸந்தா⁴ய புச்சா² கதா, ந து³க்க²தாமத்த’’ந்தி அயமத்தோ² விஞ்ஞாயதி ‘‘ந கேவலஞ்ஹி பட²மஸச்சமேவ து³க்க²’’ந்தி வசனேன. ததா² ஸதி பரவாதி³னா சக்கா²யதனாதீ³னம் அஞ்ஞேஸஞ்ச தம்ஸரிக்க²கானம் த⁴ம்மானம் பரினிப்ப²ன்னதா நானுஜானிதப்³பா³ ஸியா. கஸ்மா? தேஸம்பி ஹி து³க்க²ஸச்சேன ஸங்க³ஹோ, ந இதரஸச்சேஹி. யஞ்ஹி ஸமுத³யஸச்சதோ நிப்³ப³த்தம், தம் நிப்பரியாயதோ து³க்க²ஸச்சம், இதரம் ஸங்கா²ரது³க்க²தாய து³க்க²ந்தி இமமத்த²ம் த³ஸ்ஸேந்தோ ‘‘ந கேவலஞ்ஹீ’’திஆதி³மாஹ. தத்த² ந ஹி அனுபாதி³ன்னானீதி இமினா சக்கா²யதனாதீ³னம் ஸமுத³யஸச்சேன ஸங்க³ஹாபா⁴வமாஹ. லோகுத்தரானீதி இமினா நிரோத⁴மக்³க³ஸச்சேஹி. யதி³ ஏவமேத்த² யுத்தி வத்தப்³பா³, கிமேத்த² வத்தப்³ப³ம்? ஸபா⁴வோ ஹேஸ பரவாதி³வாத³ஸ்ஸ, யதி³த³ம் புப்³பே³னாபரமஸம்ஸந்த³னம். ததா² ஹி ஸோ விஞ்ஞூஹி படிக்கி²த்தோ. ததா² சேவ தம் அம்ஹேஹி தத்த² தத்த² விபா⁴விதம். ஏதந்தி ‘‘ரூபம் அபரினிப்ப²ன்னம், து³க்க²ஞ்ஞேவ பரினிப்ப²ன்ன’’ந்தி யதே³தம் தயா வுத்தம், ஏதம் நோ வத ரே வத்தப்³பே³. கஸ்மா? ரூபஸ்ஸ ச து³க்க²த்தா. ரூபஞ்ஹி அனிச்சம் து³க்கா²தி⁴ட்டா²னஞ்ச. தேன வுத்தம் ‘‘யத³னிச்சம் தம் து³க்க²ம். ஸம்கி²த்தேன பஞ்சுபாதா³னக்க²ந்தா⁴ து³க்கா²’’தி ச.

அபரினிப்ப²ன்னகதா²வண்ணனா நிட்டி²தா.

தேவீஸதிமவக்³க³வண்ணனா நிட்டி²தா.

கதா²வத்து²பகரண-அனுடீகா ஸமத்தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ