த⁴ம்முத்³தே³ஸவாரோ

பட²மசித்தவண்ணனா

365. க²ணத்தயஸ்ஸ அகுஸலேஸு அஸம்ப⁴வதோ ஸமவாயகாலஹேதுஸமூஹத்தோ² ஸமய-ஸத்³தோ³. லோபா⁴பி⁴பூ⁴தாய ஏவ இட்டா²ரம்மணஸ்மிம் இதரத்ர ச இட்டா²காரக்³க³ஹணவஸேன ஸோமனஸ்ஸஸஹக³தபா⁴வோதி ஏவமாதி³ம் ஸந்தா⁴ய ‘‘யதா²னுரூப’’ந்தி வுத்தம். ‘‘கிலேஸாதுரதாய அனாரோக்³யட்டே²ன கிலேஸவஜ்ஜஸப்³பா⁴வதோ ஸாவஜ்ஜட்டே²ன அவிஜ்ஜாஸம்பூ⁴ததாய அகோஸல்யஸம்பூ⁴தட்டே²ன அகுஸல’’ந்தி ச ‘‘ஸாவஜ்ஜது³க்க²விபாகலக்க²ணம், அனத்த²ஜனனரஸம், ஸம்கிலேஸபச்சுபட்டா²னம், அயோனிஸோமனஸிகாரபத³ட்டா²னம், கா³ரய்ஹபா⁴வதோ வா ஸாவஜ்ஜலக்க²ணம், ஸம்கிலேஸபா⁴வரஸம், அனிட்ட²விபாகபச்சுபட்டா²னம், யதா²வுத்தபத³ட்டா²னமேவா’’தி ச ஏவமாதி³னா வுத்தனயேன அனுக³ந்தப்³ப³தாய வுத்தம் ‘‘வுத்தனயம் அனுக³ந்த்வா’’தி.

க³தம் க³மனம் பவத்தீதி கத்வா வுத்தம் ‘‘க³தமத்தம் க³திமத்தம் க³ஹணமத்த’’ந்தி. தி³ட்டி²யா ஹி க³தி பவத்தி ஏவாதி. ஆஸன்னகாரணத்தாதி பத³ட்டா²னதாய, யோனிஸோமனஸிகாரோ விய ஹி குஸலஸ்ஸ அயோனிஸோமனஸிகாரோ அகுஸலஸ்ஸ அச்சாஸன்னஹேது. ததா² ஹி ஸதிபி அஸத்³த⁴ம்மஸவனாதி³காரணே அயோனிஸோ அனாவஜ்ஜிதே அவவத்தா²பிதே ச நத்தி² அகுஸலப்பவத்தி. ததா² ச வக்க²தி அட்ட²கதா²யம் ‘‘அயோனிஸோ அகுஸல’’ந்தி. ஏதேன ஏகந்தகாரணதா ச வுத்தத்தா² ஹோதி. படிஸங்கா² ஸீதாதி³க²மனம் அப்பமாத³விஹாரோதி வுத்தம் ‘‘அப்பமஜ்ஜனம் க²மன’’ந்தி. தேன ஸதிஸம்வரோதி இத⁴ க²ந்திஸம்வரோ வுத்தோதி அதி⁴ப்பாயோ இந்த்³ரியஸம்வரஸ்ஸ வுத்தத்தா. பஹானஸம்வரோதி வீரியஸம்வரோ. ஸோ ஹி ‘‘உப்பன்னம் காமவிதக்கம் நாதி⁴வாஸேதி பஜஹதீ’’திஆதி³னா (ம. நி. 1.26; அ. நி. 4.14; 6.58) வுத்தோதி.

ஸம்மாபடிபத்தியா படிபக்க²பா⁴வேன க³ஹேதப்³ப³தாகாரோ மோஹோ ஸம்மாபடிபத்திபடிபக்க²பா⁴வக்³க³ஹணாகாரோ. தேன ஹி நிவுதா ந ஸம்மா படிபஜ்ஜந்தி. அபி⁴ஜ்ஜா²ய விஸேஸயோகோ³ கம்மபத²ப்பத்தி.

அனுபபரிக்கா² மோஹோ. ஸோ சேத்த² தி³ட்டி²ரஹிதோ வேதி³தப்³போ³. தி³ட்டி²ஸஹிதஸ்ஸ பன தி³ட்டி²யா அனுவிதா⁴யகத்தா தக்³க³ஹணேனேவ க³ஹணந்தி. அவத்து²ஸ்மிந்தி அஸத்³த³ஹனீயே வத்து²ஸ்மிம். ஸானுனயோ அதி⁴மோக்கோ²தி மோஹதி³ட்டீ²னம் ஸத்³தா⁴பதிரூபதமாஹ. அஹிரிகானோத்தப்பமோஹாதீ³ஹி பமஜ்ஜனதோ அஹிரிகாதீ³ஹி காரணேஹி. ஆரக்க²ரஹிதசித்தேதி சித்தஸ்ஸ ஸதிவிரஹதம்யேவ த³ஸ்ஸேதி. ஆரக்க²பச்சுபட்டா²னா ஹி ஸதீதி. ஏதேன ‘‘அஸ்ஸத்³தி⁴யசித்தே அந்த⁴பா³லசித்தே’’தி பத³த்³வயம் வுத்தத்த²ம் ஹோதி. உபனாஹாதீ³தி ஆதி³-ஸத்³தே³ன ராகா³த³யோ ஸங்க³ய்ஹந்தி. ராகா³தீ³னம் பரியுட்டா²னாதி³ஸபா⁴வதாய ‘‘அவிஸேஸேனா’’தி வுத்தம் விஸேஸஸ்ஸ ஏகச்சஸ்ஸ அஸம்ப⁴வதோ. இதா⁴தி, இமஸ்மிம் சித்தே. நிப்பா²தே³தப்³பே³ பயோஜனே பு⁴ம்மம் ‘‘சம்மஸ்மிம் தீ³பினம் ஹந்தீ’’தி (வஜிர. டீ. 17-18 வேரஞ்ஜகண்ட³வண்ணனா) விய ஆரம்மணம் வா அவூபஸமோ ப²லூபசாரேன ‘‘ஸேம்ஹோ கு³ளோ’’தி விய.

த⁴ம்முத்³தே³ஸவாரகதா²வண்ணனா நிட்டி²தா.

நித்³தே³ஸவாரகதா²வண்ணனா

390. ஸபா⁴வபடிச்சா²த³வஸேன பகதிஅத்தாதி³அஸந்தக்³க³ஹணஸ்ஸ நிஸ்ஸயத்தா நிமித்தத்தா அஸந்தம் பு³ஜ்ஜ²தி, நிச்சாதி³விஸமக்³க³ஹணஸ்ஸ ஸஞ்ஞாதி³விபரியேஸஸ்ஸ நிஸ்ஸயத்தா அஸமம் பு³ஜ்ஜ²தீதி மோஹோ வுத்தோ நிமித்தஸ்ஸ கத்துபா⁴வேன உபசாரிதத்தா, அயஞ்ச அத்தோ² தி³ட்டி²ஸஹிதமோஹவஸேன த³ட்ட²ப்³போ³. ஏத்த² ச பகதீதி காபிலானம் பதா⁴னம்.

ததியசித்தவண்ணனா

400. அபண்ணகபத³ம் விய அவிரஜ்ஜ²னகபத³ம்பி கதா³சி நியதபா⁴வம் தீ³பேய்யாதி அனியததம் தீ³பேதும் ‘‘உப்பத்திஅரஹங்கா³னீ’’தி வுத்தம் மானஸ்ஸ அனியதத்தா. யதி³ ஹி மானோ நியதோ ஸியா, காமராக³ஸ்ஸ மானரஹிதா பவத்தி ந ஸியா, ததா² ப⁴வராக³ஸ்ஸ. ஏவம் ஸதி பட்டா²னே சதுக்க²த்தும் காமராகே³ன யோஜனா ந ஸியா, திக்க²த்தும்யேவ ஸியா, ப⁴வராக³மூலிகா ச ந ஸியா, ஏவஞ்ச ஸம்யோஜனானம் ஸம்யோஜனேஹி அட்ட²விதே⁴ன யோஜனா ஸியா, ந த³ஸவிதா⁴ த³ஸ்ஸிதாதி யதா²வுத்தாஹி யோஜனாஹி மானஸ்ஸ அனியதபா⁴வோ பகாஸிதோ. அத² வா மானேன ஸத்³தி⁴ம் பஞ்ச ஹோந்தி யதா²வுத்தானி அபண்ணகங்கா³னி, கிம் பன ஹோந்தீதி அபேக்கா²யம் யேவாபனகாதி விதி³தோவாயமத்தோ². யேவாபனகானஞ்ஹி பஞ்சபா⁴வோ இத⁴ விதீ⁴யதி, ந அபண்ணகங்கா³னந்தி ஸோ யதா² ஹோதி, ததா² யோஜேதப்³ப³ம். கிலேஸது³கே படிச்சவாராதீ³ஸு ‘‘கிலேஸம் த⁴ம்மம் படிச்ச கிலேஸோ த⁴ம்மோ உப்பஜ்ஜதி ஹேதுபச்சயா’’திஆதீ³ஸு ‘‘லோப⁴ம் படிச்ச மோஹோ மானோ தி²னம் உத்³த⁴ச்சம் அஹிரிகம் அனோத்தப்பம். லோப⁴ம் படிச்ச மோஹோ மானோ உத்³த⁴ச்சம் அஹிரிகம் அனோத்தப்பம். லோப⁴ம் படிச்ச மோஹோ தி²னம் உத்³த⁴ச்சம் அஹிரிகம் அனோத்தப்பம். லோப⁴ம் படிச்ச மோஹோ உத்³த⁴ச்சம் அஹிரிகம் அனோத்தப்ப’’ந்தி விப⁴த்தத்தா ‘‘ததா² கிலேஸது³கேபீ’’தி வுத்தம். தி³ட்டி²விப்பயுத்தஸஸங்கா²ரிகாஸங்கா²ரிகசித்தவஸேன ஹி அயம் பாட²பே⁴தோ³தி.

‘‘காமராகோ³ சதுதா⁴ ஏகதோ உப்பஜ்ஜதி, படிகோ⁴ திதா⁴, மானோ ஏகதா⁴, ததா² விசிகிச்சா² ப⁴வராகோ³தி உத்³தி³ஸித்வா காமராகோ³ மானஸம்யோஜனஅவிஜ்ஜாஸம்யோஜனேஹி சேவ அவிஜ்ஜாஸம்யோஜனமத்தேனேவ ச ஸத்³தி⁴ம் மானோ ப⁴வராகா³விஜ்ஜாஸம்யோஜனேஹி ஸத்³தி⁴ம் ப⁴வராகோ³ அவிஜ்ஜாஸம்யோஜனேன ஸத்³தி⁴’’ந்தி அட்ட²கதா²கண்ட³வண்ணனாயம் (த⁴. ஸ. அட்ட². 1485) வக்க²மானத்தா ‘‘இத⁴ ச வக்க²தீ’’திஆதி³ வுத்தம். தத்தே²வ ‘‘லோபோ⁴ ச²தா⁴ ஏகதோ உப்பஜ்ஜதி, படிகோ⁴ த்³வேதா⁴, ததா² மோஹோ’’தி உத்³தி³ஸித்வா ‘‘லோபோ⁴ அஸங்கா²ரிகோ தி³ட்டி²விப்பயுத்தோ மோஹஉத்³த⁴ச்சஅஹிரிகானோத்தப்பேஹி, ஸஸங்கா²ரிகோ மோஹதி²னஉத்³த⁴ச்சஅஹிரிகானோத்தப்பேஹி, அஸங்கா²ரிகோ ஏவ மோஹமானஉத்³த⁴ச்சஅஹிரிகஅனோத்தப்பேஹி, ஸஸங்கா²ரிகோ ஏவ ச மோஹமானதி²னஉத்³த⁴ச்சஅஹிரிகஅனோத்தப்பேஹீ’’தி வக்க²மானத்தா ‘‘ததா²த³ஸவிதா⁴ கிலேஸான’’ந்தி வுத்தம். ‘‘அஹ’’ந்தி க³ஹணதாய அவம்கத்வா க³ஹணம்பி ‘‘ஸம்பக்³க³ஹோ’’தி வுத்தம்.

சதுத்த²சித்தவண்ணனா

402. உஸ்ஸாஹம் ஜனேந்தாதி ஏத்த² சித்தபயோக³ஸங்கா²தோ ஸங்கா²ரோ ஏவ உஸ்ஸாஹோ, ந வீரியுஸ்ஸாஹோதி.

நவமசித்தவண்ணனா

413. விஸப்பனானிட்ட²ரூபஸமுட்டா²னம் யேன குபிதஸ்ஸ ஸகலஸரீரம் கம்பதி, குபிதாகாரோ பஞ்ஞாயதி. ஏதேன ஸம்பத்திஅத்தோ² ரஸோ த³ஸ்ஸிதோ ஹோதி, பவத்திஆகாரவஸேன வா விஸப்பனரஸோ. ததா² ஹி யஸ்ஸ குப்பதி, தஸ்ஸ அமித்தஸ்ஸ ஸம்பத்தி யேபு⁴ய்யேன படிகு⁴ப்பத்திஹேது ஹோதீதி. ஏதேன கிச்சத்தோ² ரஸோ வுத்தோ ஹோதீதி.

418. வசனத்த²மேவ வசனபரியாயமேவ.

ஏகாத³ஸமசித்தவண்ணனா

424. நிச்ச²யாபா⁴வாதி அதி⁴மோக்கா²பா⁴வா. அஸண்ட²ஹனதோதி ஸந்தானவஸேன ஏகஸ்மிம் ஆரம்மணே அனவட்டா²னதோ.

த்³வாத³ஸமசித்தவண்ணனா

429. ஸஹஜாதாதி⁴பதி நத்தி² ‘‘ச²ந்த³வதோ சே விசிகிச்சா² உப்பஜ்ஜதி, ஸா மய்ஹம் உப்பஜ்ஜேய்யா’’திஆதி³ப்பவத்தியா அபா⁴வா. அனுத்³த⁴டத்தா படிஸித்³த⁴தா, யதா²த⁴ம்மஸாஸனே அவசனம்பி அபா⁴வம் தீ³பேதி.

அவசனதோதி அ-காரஸ்ஸ தத³ஞ்ஞவசனதம் த³ஸ்ஸேதி. ஏதேன ச த³ஸ்ஸனேன பஹாதப்³பே³ஸு அபா⁴வவசனேன காரணஸித்³தி⁴யா ப²லஸித்³தீ⁴தி தத்த² அபா⁴வஸ்ஸ காரணமேவ தாவ த³ஸ்ஸேதும் ‘‘படிஸந்தி⁴அனாகட்³ட⁴னதோ’’தி வுத்தம். தேன தம்ஸபா⁴வதா தஸ்ஸ சித்துப்பாத³ஸ்ஸ வுத்தா ஹோதி. ததோ ச ‘‘ப³லவம் படிஸந்தி⁴ம் ஆகட்³ட⁴தி, து³ப்³ப³லம் நாகட்³ட⁴தீ’’தி இத³ம் படிஸந்தி⁴தா³னஸபா⁴வேஸு. யஸ்ஸ பன படிஸந்தி⁴தா³னஸபா⁴வோ ஏவ நத்தி², ந தஸ்ஸ ப³லவபா⁴வோ படிஸந்தி⁴ஆகட்³ட⁴னே காரணந்தி அயமத்தோ² த³ஸ்ஸிதோ ஹோதி. அனாகட்³ட⁴னம் ஸாதே⁴தி ‘‘யதி³ ஹி ஆகட்³டே⁴ய்யா’’திஆதி³னா. யஸ்மா ச நாக³தம், தஸ்மா நாகட்³ட⁴தீதி அதி⁴ப்பாயோ. ‘‘யஸ்மா பன தம் படிஸந்தி⁴தா³னம் நத்தி², தஸ்மா நாக³த’’ந்தி வுத்தத்தா ‘‘அனாகட்³ட⁴னதோ அனாக³மனம் ஸாதே⁴து’’ந்தி வுத்தம்.

அபாயக³மனீயஸ்ஸாதி அபாயம் க³மேதீதி அபாயக³மனீயம், தம்ஸபா⁴வந்தி அத்தோ². படிஸந்தி⁴ஆகட்³ட⁴னே ஸதி உத்³த⁴ச்சஸஹக³தம் ஏகந்தேன அபாயக³மனீயம் ஸியா. தேன வுத்தம் அட்ட²கதா²யம் (த⁴. ஸ. அட்ட². 429) ‘‘இதரஸ்ஸாபி ஏத்தே²வ படிஸந்தி⁴தா³னம் ப⁴வேய்யா’’தி. ந ஹி அகுஸலபடிஸந்தி⁴ ஸுக³தியம் ஸம்ப⁴வதீதி. ‘‘சதூஹி அபாயேஹி ச விப்பமுத்தோ (கு². பா. 6.11; ஸு. நி. 234) அவினிபாதத⁴ம்மோ’’தி (ஸ. நி. 2.41; 5.998, 1004) வசனதோ அபாயக³மனீயஞ்ச த³ஸ்ஸனேன பஹாதப்³ப³ம். தேனாஹ ‘‘அபாயக³மனீயஸ்ஸ த³ஸ்ஸனேன பஹாதப்³ப³த்தா’’தி. ந சேதம் த³ஸ்ஸனேன பஹாதப்³ப³ம், ந ஸோ தஸ்ஸ அபாயக³மனீயோ ராகோ³ தோ³ஸோ மோஹோ ததே³கட்டா² ச கிலேஸாதி ஏதேன ஸங்க³ஹோதி ஸக்கா வத்தும் நியோக³தோ பா⁴வனாய பஹாதப்³ப³பா⁴வேன வுத்தத்தா. வுத்தஞ்ஹேதம் ‘‘கதமே த⁴ம்மா பா⁴வனாய பஹாதப்³பா³, உத்³த⁴ச்சஸஹக³தோ சித்துப்பாதோ³’’தி (த⁴. ஸ. 1406).

‘‘குஸலாகுஸலம் கம்மம் விபாகானம் க²ந்தா⁴னம் கடத்தா ச ரூபானம் கம்மபச்சயேன பச்சயோ’’தி (பட்டா². 1.1.427) வுத்தகம்மபச்சயபா⁴வோ நானாக்க²ணிககம்மபச்சயபா⁴வோ. ஸோ ச யதி³ உத்³த⁴ச்சஸஹக³தம் படிஸந்தி⁴ம் ஆகட்³டே⁴ய்ய, தஸ்ஸாபி ஸியா. ததா² ச ஸதி உத்³த⁴ச்சஸஹக³தம் த³ஸ்ஸனேன பஹாதப்³ப³ம் ஸியா த³ஸ்ஸனேன பஹாதப்³பா³னம்யேவ நானாக்க²ணிககம்மபச்சயபா⁴வஸ்ஸ வுத்தத்தா. ந சேதம் த³ஸ்ஸேனேன பஹாதப்³ப³ந்தி ஸப்³ப³ம் புப்³பே³ விய ஆவத்ததி.

ஸஹஜாதமேவ விப⁴த்தந்தி யதா² த³ஸ்ஸனேன பஹாதப்³ப³விப⁴ங்கே³ ‘‘த³ஸ்ஸனேன பஹாதப்³போ³ த⁴ம்மோ நேவ த³ஸ்ஸனேன ந பா⁴வனாய பஹாதப்³ப³ஸ்ஸ த⁴ம்மஸ்ஸ கம்மபச்சயேன பச்சயோ’’தி (பட்டா². 2.8.86) ஸஹஜாதம் நானாக்க²ணிகந்தி உத்³தி³ஸித்வா ‘‘ஸஹஜாதா த³ஸ்ஸனேன பஹாதப்³பா³ சேதனா சித்தஸமுட்டா²னானம் ரூபானம் கம்மபச்சயேன பச்சயோ, நானாக்க²ணிகா த³ஸ்ஸனேன பஹாதப்³பா³ சேதனா விபாகானம் க²ந்தா⁴னம் கடத்தா ச ரூபானம் கம்மபச்சயேன பச்சயோ’’தி விப⁴த்தம், ஏவம் அவிப⁴ஜித்வா ‘‘பா⁴வனாய பஹாதப்³பா³ சேதனா சித்தஸமுட்டா²னானம் ரூபானம் கம்மபச்சயேன பச்சயோ’’தி (பட்டா². 2.8.89) ஏத்தகமேவ வுத்தம், ந வுத்தம் ‘‘நானாக்க²ணிகா சேதனா விபாகானம் க²ந்தா⁴னம் கடத்தா ச ரூபானம் கம்மபச்சயேன பச்சயோ’’தி. தேன ந பா⁴வனாய பஹாதப்³ப³ஸ்ஸ நானாக்க²ணிககம்மபச்சயபா⁴வோதி விஞ்ஞாயதி. பச்சனீயேபி யதா²ஸம்ப⁴வம் ஸங்கா³ஹகபச்சயானம் வஸேன பச்சயுத்³தா⁴ரே கரியமானே. இதரத்த² சாதி த³ஸ்ஸனேனபஹாதப்³ப³பதே³. தத்த² ஹி ‘‘த³ஸ்ஸனேன பஹாதப்³போ³ த⁴ம்மோ நேவ த³ஸ்ஸனேன ந பா⁴வனாய பஹாதப்³ப³ஸ்ஸ த⁴ம்மஸ்ஸ ஆரம்மணபச்சயேன பச்சயோ, ஸஹஜாதஉபனிஸ்ஸயபச்சா²ஜாதகம்மபச்சயேன பச்சயோ’’தி (பட்டா². 2.8.71) கம்மபச்சயோபி வுத்தோதி.

தத³பா⁴வாதி நானாக்க²ணிககம்மபச்சயத்தாபா⁴வா. ந ச நானாக்க²ணிககம்மபச்சயம் வினா படிஸந்தி⁴ஆகட்³ட⁴னம் அத்தீ²தி ‘‘படிஸந்தி⁴அனாகட்³ட⁴னதோ தத்த² அனாக³தா’’தி வுத்தம். ஏத்தா²தி ‘‘ட²பேத்வா உத்³த⁴ச்சஸஹக³தம் ஸேஸானி ஏகாத³ஸேவ படிஸந்தி⁴ம் ஆகட்³ட⁴ந்தீ’’தி ஏத்த². பவத்திவிபாகஸ்ஸாதி பவத்தியம் விபாகோ பவத்திஏகதே³ஸதாய பவத்திபூ⁴தோ வா விபாகோ ஏதஸ்ஸாதி பவத்திவிபாகம், கம்மம், தஸ்ஸ. அத² வா பவத்தியம் விபாகோ பவத்திவிபாகோ. இமஸ்மிம் பன அத்தே² நானாக்க²ணிககம்மபச்சயோ ஏதஸ்ஸாதி நானா…பே… யோ, தப்³பா⁴வோ…பே… தாதி ஏவம் பத³ச்சே²தோ³ த³ட்ட²ப்³போ³. ந ஸக்கா நிவாரேதும் நானாக்க²ணிககம்மபச்சயம் வினா விபாகஸ்ஸ அனுப்பஜ்ஜனதோ.

இதா³னி பவத்திவிபாகானம் நானாக்க²ணிககம்மபச்சயலாபி⁴தாய ஆஹச்சபா⁴ஸிததம் த³ஸ்ஸேதும் ‘‘வுத்தஞ்சா’’திஆதி³மாஹ. விபாகதா³னம் படிஸந்தி⁴விபாகத⁴ம்மதாதி மஞ்ஞமானோ ‘‘யதி³ பா⁴வனா’’திஆதி³மாஹ. இதரோ விபாகதா³னாபா⁴வேபி ஸித்³தோ⁴ விபாகத⁴ம்மபா⁴வோ தாதி³ஸானம் அஞ்ஞேஸம்பி லப்³ப⁴மானத்தாதி ஆஹ ‘‘அபி⁴ஞ்ஞாசித்தாதீ³ன’’ந்தி. ஆதி³-ஸத்³தே³ன அத்தனோ காலமதிக்கந்தம் தி³ட்ட²த⁴ம்மவேத³னீயம் உபபஜ்ஜவேத³னீயஞ்ச ஸங்க³ண்ஹாதி. வுத்தம் ஸியாதி இத³ம் ஸஹாயபச்சயலாப⁴தோ புது²ஜ்ஜனஸந்தானவுத்தினோ உத்³த⁴ச்சஸஹக³தஸ்ஸ விபாகுப்பாத³னம், தத³பா⁴வா ஸேக்க²ஸந்ததியம் தஸ்ஸ விபாகானுப்பாத³னஞ்ச யுத்தம் ஸியாதி வுத்தம். தேனேவாஹ ‘‘இத³ம் பன டா²னம் ஸுட்டு² விசாரேதப்³ப³’’ந்திஆதி³. ததா² ச வக்க²தி ‘‘புது²ஜ்ஜனேஸு உப்பஜ்ஜமானானம் ஸகப⁴ண்டே³ ச²ந்த³ராகா³தீ³னம் உத்³த⁴ச்சஸஹக³தசித்துப்பாத³ஸ்ஸ ச ஸம்யோஜனத்தயததே³கட்ட²கிலேஸானம் அனுபச்சி²ன்னதாய அபரிக்கீ²ணஸஹாயானம் விபாகுப்பாத³னம் ந ஸக்கா படிக்கி²பிதுந்தி உத்³த⁴ச்சஸஹக³தத⁴ம்மானம் விபாகோ விப⁴ங்கே³ வுத்தோ’’தி. தஸ்ஸ தாதி³ஸஸ்ஸேவ ஸதி ஸஹாயே விபாகுப்பாத³னவசனம், அஸதி விபாகானுப்பாத³னவசனம் விருஜ்ஜ²தீதி ச பவத்திவிபாகதா³யிகம் வா உத்³த⁴ச்சஸஹக³தஸ்ஸ மனஸி கத்வா ‘‘வுத்தம் ஸியா’’தி வுத்தம். ‘‘பவத்திவிபாகஞ்ஹி ஸந்தா⁴ய ‘தேஸம் விபாகே ஞாண’ந்தி படிஸம்பி⁴தா³விப⁴ங்கே³ (விப⁴. 725-726) வுத்த’’ந்தி ஏகே வண்ணயந்தி. ஏவம் உத்³த⁴ச்சசேதனாபி ந ஹோதி, ஸாபி விஞ்ஞாணபச்சயபா⁴வே அபனேதப்³பா³தி இத³ம்பி படிஸந்தி⁴விஞ்ஞாணமேவ ஸந்தா⁴ய வுத்தந்தி.

அகுஸலபத³வண்ணனா நிட்டி²தா.