9. து³தியது³ட்ட²தோ³ஸஸிக்கா²பத³வண்ணனா

391. நவமே தி³ஸ்வாதி அஜிகாய விப்படிபஜ்ஜந்தம் ச²க³லகம் தி³ஸ்வா. மேத்தியம் பி⁴க்கு²னிந்தி தஸ்ஸா பி⁴க்கு²னிகாலம் க³ஹேத்வா பூ⁴தபுப்³ப³வோஹாரேன வோஹரந்தி. வேளுவனேயேவாதி தே²ரஸ்ஸ பி⁴க்கா²சாரவேலம் அக்³க³ஹேத்வா தேஹி வுத்தப⁴த்துத்³தே³ஸவேலம்யேவ ஸந்தா⁴ய வுத்தம். கச்சி நோதி கச்சி நு. ஏதமத்த²ம் ஆரோசேஸுந்தி அஞ்ஞபா⁴கி³யஸ்ஸ அதி⁴கரணஸ்ஸ கஞ்சிதே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸிதபா⁴வம் ஆரோசேஸும்.

அஞ்ஞபா⁴க³ஸ்ஸாதி அஞ்ஞகோட்டா²ஸஸ்ஸ, தே²ரஸ்ஸ மனுஸ்ஸஜாதிபி⁴க்கு²பா⁴வதோ அஞ்ஞஸ்ஸ திரச்சா²னஜாதிச²க³லகபா⁴வஸங்கா²தஸ்ஸ கோட்டா²ஸஸ்ஸாதி வுத்தம் ஹோதி. இத³ந்தி ஸாமஞ்ஞதோ நபும்ஸகனித்³தே³ஸேன ச²க³லகம் நித்³தி³ஸதி, இத³ம் ச²க³லகஜாதந்தி அத்தோ², அயம் ச²க³லகோதி வுத்தம் ஹோதி. அதி⁴கரணஸத்³தா³பேக்கோ² வா நபும்ஸகனித்³தே³ஸோ, இத³ம் ச²க³லகஸங்கா²தம் அதி⁴கரணந்தி வுத்தம் ஹோதி. அஞ்ஞபா⁴கோ³தி யதா²வுத்ததிரச்சா²னஜாதிச²க³லகபா⁴வஸங்கா²தோ அஞ்ஞபா⁴கோ³, அஞ்ஞகோட்டா²ஸோதி அத்தோ². அஸ்ஸாதி ச²க³லகஸ்ஸ. ‘‘அஞ்ஞபா⁴க³ஸம்ப³ந்தீ⁴ அஞ்ஞபா⁴கி³ய’’ந்தி பட²மவிக்³க³ஹஸ்ஸ அத்தோ², ‘‘அஞ்ஞபா⁴க³வந்தம் அஞ்ஞபா⁴கி³ய’’ந்தி து³தியவிக்³க³ஹஸ்ஸ. த்³வீஹிபி விக்³க³ஹேஹி அஞ்ஞபா⁴கி³யந்தி ச²க³லகோவ வுத்தோ. திரச்சா²னஜாதிச²க³லகபா⁴வஞ்ச ட²பேத்வா பரமத்த²தோ விஸும் ச²க³லகே அஸதிபி ‘‘படிமாய ஸரீர’’ந்திஆதீ³ஸு விய அபே⁴தே³பி பே⁴த³கப்பனாய பவத்தலோகவோஹாரவஸேன ‘‘அஞ்ஞபா⁴க³ஸ்ஸ இத³ம், அஞ்ஞபா⁴கோ³ வா அஸ்ஸ அத்தீ²’’தி வுத்தம்.

இதா³னி த்³வீஹிபி விக்³க³ஹேஹி வுத்தமத்த²ம் வித்தா²ரேத்வா த³ஸ்ஸேந்தோ ‘‘யோ ஹி ஸோ’’திஆதி³மாஹ. ஸோதி ஸோ ச²க³லகோ. தஸ்ஸ ‘‘ஹோதீ’’தி இமினா ஸம்ப³ந்தோ⁴. ததோதி ததோ மனுஸ்ஸஜாதிதோ பி⁴க்கு²பா⁴வதோ ச. ஸோ வா அஞ்ஞபா⁴கோ³தி யதா²வுத்ததிரச்சா²னஜாதிச²க³லகபா⁴வஸங்கா²தோ அஞ்ஞபா⁴கோ³. அஸ்ஸாதி ச²க³லகஸ்ஸ. ஸோ ச²க³லகோ அஞ்ஞபா⁴கி³யஸங்கா²தம் லப⁴தீதி யோஜேதப்³ப³ம். ‘‘அதி⁴கரணந்தி ஆதா⁴ரோ, வத்து² அதி⁴ட்டா²ன’’ந்தி ஹேட்டா² வுத்தமத்த²ம் ஸரூபதோ த³ஸ்ஸேதும் ‘‘யஸ்மா சா’’திஆதி³மாஹ. தேஸந்தி மேத்தியபூ⁴மஜகானம். இமந்தி ச²க³லகம். நாமகரணஸஞ்ஞாயாதி நாமகரணஸங்கா²தாய ஸஞ்ஞாய ஸோ ச²க³லகோ அதி⁴கரணந்தி வேதி³தப்³போ³தி யோஜேதப்³ப³ம். தஞ்ஹி ஸந்தா⁴யாதி ‘‘அவஸ்ஸம் தும்ஹேஹி லேஸோ ஓட்³டி³தோ, கிம் வத³த², கிம் பஸ்ஸித்தா²’’தி அனுயுத்தேஹி தேஹி பி⁴க்கூ²ஹி ‘‘ச²க³லகஸ்ஸ விப்படிபத்திம் தி³ஸ்வா த³ப்³ப³ஸ்ஸ நாமம் தஸ்ஸ கரிம்ஹா’’தி வுத்தத்தா தஸ்ஸ நாமகரணஸஞ்ஞாய அதி⁴ட்டா²னபூ⁴தம் தம் ச²க³லகம் ஸந்தா⁴ய. தே பி⁴க்கூ²தி தே அனுயுஞ்ஜகா பி⁴க்கூ². ஆபத்திலேஸம்பி புக்³க³லஸ்மிம்யேவ ஆரோபேத்வா வுத்தத்தா ‘‘புக்³க³லானம்யேவ லேஸா’’தி வுத்தம். பத³பா⁴ஜனே பன…பே… வேதி³தப்³ப³ந்தி இமினா நாமகரணஸஞ்ஞாய ஆதா⁴ரபூ⁴தஸ்ஸ ச²க³லகஸங்கா²தஸ்ஸ அதி⁴கரணஸ்ஸ அவசனே காரணம் வுத்தம்.

393. ‘‘அஞ்ஞபா⁴கி³யஸ்ஸ அதி⁴கரணஸ்ஸா’’தி ஏத்த² பாளிஆக³தஅதி⁴கரணஸத்³த³பதிரூபகம் அஞ்ஞம் அதி⁴கரணஸத்³த³ம் பாளிஆக³ததத³ஞ்ஞஸாதா⁴ரணதாய உப⁴யபத³த்த²ம் உத்³த⁴ரித்வா ‘‘அதி⁴கரணம் நாம சத்தாரி அதி⁴கரணானீ’’தி வுத்தம். அத்து²த்³தா⁴ரவஸேன ஹி அத்த²ம் த³ஸ்ஸேந்தேன பாளியம் ஆக³தஸத்³த³பதிரூபகோ அஞ்ஞோ ஸத்³தோ³ உப⁴யபத³த்தோ² உத்³த⁴ரிதப்³போ³, ந ச அஞ்ஞம் உத்³த⁴ரித்வா அஞ்ஞஸ்ஸ அத்தோ² வத்தப்³போ³, தஸ்மா பாளிஆக³தஅதி⁴கரணஸத்³த³பதிரூபகோ அஞ்ஞோயேவ உப⁴யபத³த்த²ஸாதா⁴ரணோ அதி⁴கரணஸத்³தோ³ உத்³த⁴டோதி த³ட்ட²ப்³ப³ம். தேனேவாஹ ‘‘அதி⁴கரணந்தி வசனஸாமஞ்ஞதோ அத்து²த்³தா⁴ரவஸேன பவத்தானி சத்தாரி அதி⁴கரணானீ’’தி. யா ச ஸா அவஸானே…பே… சோத³னா வுத்தாதி பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதி, ஸங்கா⁴தி³ஸேஸே ஸங்கா⁴தி³ஸேஸதி³ட்டீ² ஹோதி, தஞ்சே பாராஜிகேன சோதே³தீதிஆதி³சோத³னம் ஸந்தா⁴ய வத³தி.

மேது²னவீதிக்கமாபத்தியோ வத்து²தோ ஸபா⁴கா³, இதராஸம் பன அதி³ன்னாதா³னாதி³ஆபத்தீனம் ஸமானேபி பாராஜிகாபத்திபா⁴வே வத்து²தோ விஸபா⁴கா³தி ஆஹ ‘‘ஸபா⁴க³விஸபா⁴க³வத்து²தோ’’தி. ஸபா⁴வஸரிக்கா²ஸரிக்க²தோதி ஸபா⁴வேன ஸதி³ஸாஸதி³ஸபா⁴வதோ. பட²மபாராஜிகஞ்ஹி பட²மபாராஜிகாபத்தியா மேது²னராகே³ன ஸபா⁴வதோ ஸதி³ஸம், தோ³ஸஸம்பயுத்தமனுஸ்ஸவிக்³க³ஹேன அஸதி³ஸம். நனு ச ‘‘ஆபத்தாதி⁴கரணம் ஆபத்தாதி⁴கரணஸ்ஸ ஸியா தப்³பா⁴கி³யம், ஸியா அஞ்ஞபா⁴கி³ய’’ந்தி வுத்தத்தா உத்³தே³ஸானுக்கமேன தப்³பா⁴கி³யதம் அனித்³தி³ஸித்வா அஞ்ஞபா⁴கி³யதா பட²மம் கஸ்மா நித்³தி³ட்டா²தி ஆஹ ‘‘ஆதி³தோ பட்டா²யா’’திஆதி³. வுத்தனயேனேவாதி ‘‘ஸபா⁴க³விஸபா⁴க³வத்து²தோ’’திஆதி³னா வுத்தனயேன.

‘‘ஸங்க⁴கம்மானி நிஸ்ஸாய உப்பன்ன’’ந்தி வுத்தத்தா ஸங்க⁴கம்மதோ கிச்சாதி⁴கரணம் விஸும் விய தி³ஸ்ஸதீதி ஆஹ ‘‘கிம் பனா’’திஆதி³. ‘‘கிச்சமேவ கிச்சாதி⁴கரண’’ந்தி வுத்தத்தா ‘‘ஸங்க⁴கம்மானமேவேதம் அதி⁴வசன’’ந்தி வுத்தம். யதி³ ஏவம் ‘‘ஸங்க⁴கம்மானி நிஸ்ஸாய உப்பன்ன’’ந்தி கஸ்மா வுத்தந்தி ஆஹ ‘‘ஏவம் ஸந்தேபீ’’திஆதி³. தஸ்ஸ தஸ்ஸ ஸங்க⁴கம்மஸ்ஸ ப⁴க³வதா வுத்தம் இதிகத்தப்³ப³தாலக்க²ணம்யேவ ததோ ஸங்க⁴கம்மஸ்ஸ நிப்ப²ஜ்ஜனதோ ப²லூபசாரேன ஸங்க⁴கம்மந்தி வத்தப்³ப³தம் அரஹதீதி ஆஹ ‘‘யம் கம்மலக்க²ணம் மனஸி கரோதி, தம் நிஸ்ஸாய உப்பஜ்ஜனதோ’’தி. பரிவாஸாதி³ஸங்க⁴கம்மம் நிஸ்ஸாய மானத்தாதீ³னம் உப்பஜ்ஜனதோ உக்கே²பனீயகம்மஸீமாஸம்முதிகம்மாதீ³னி இஸ்ஸாய ஓஸாரணஸீமாஸமூஹனனாதி³கம்மானம் உப்பஜ்ஜனதோ ச ‘‘புரிமம் புரிமம் ஸங்க⁴கம்ம’’ந்திஆதி³ வுத்தம்.

395-400. ஸவத்து²கம் கத்வாதி புக்³க³லாதி⁴ட்டா²னம் கத்வா. தீ³கா⁴தி³னோதி தீ³க⁴ரஸ்ஸகாளஓதா³தாதி³னோ. தி³ட்டா²தி³னோதி தி³ட்ட²ஸுதாதி³னோ. லோஹபத்தஸதி³ஸோதி அயோபத்தஸதி³ஸோ. அங்கா³னி பட²மது³ட்ட²தோ³ஸே வுத்தஸதி³ஸானி, இத⁴ பன கஞ்சிதே³ஸம் லேஸமத்தம் உபாதி³யனா அதி⁴கா.

து³தியது³ட்ட²தோ³ஸஸிக்கா²பத³வண்ணனா நிட்டி²தா.