10. பட²மஸங்க⁴பே⁴த³ஸிக்கா²பத³வண்ணனா

410. த³ஸமே யே து³ப்³ப³லா ஹோந்தி அப்பதா²மா, ந ஸக்கோந்தி அரஞ்ஞகாதீ³னி ஸேவந்தா து³க்க²ஸ்ஸந்தம் காதும், தே ஸந்தா⁴யாஹ ‘‘ப³ஹூனம் குலபுத்தானம் மக்³க³ந்தராயாய ஸம்வத்தந்தீ’’தி. அதி⁴வாஸனக²ந்திஸம்பன்னோதி ‘‘க²மோ ஹோதி ஸீதஸ்ஸா’’திஆதி³னா வுத்தஸீதுண்ஹாதி³ஸஹனலக்க²ணாய க²ந்தியா ஸமன்னாக³தோ. ப்³யஞ்ஜனபத³மேவ பரமம் அஸ்ஸாதி பத³பரமோ. யஸ்ஸ ஹி புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, அயம் ‘‘பத³பரமோ’’தி வுச்சதி. அபி⁴ஸம்பு⁴ணித்வாதி நிப்பா²தே³த்வா. நாபி⁴ஸம்பு⁴ணாதீதி ந ஸம்பாதே³தி, அரஞ்ஞவாஸம் ஸம்பாதே³தும் ந ஸக்கோதீதி வுத்தம் ஹோதி. த⁴ம்மதோ அபேதம் உத்³த⁴ம்மம். அஸப்³ப³ஞ்ஞூ அஸ்ஸாதி தேஸம் அனுரூபஸ்ஸ அஜானனதோ அஸப்³ப³ஞ்ஞூ ப⁴வேய்ய. ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³’’ந்தி (மஹாவ. 204) வசனதோ ‘‘சத்தாரோ பன…பே… படிக்கி²த்தமேவா’’தி வுத்தம். இத³மேவ வசனம் ஸந்தா⁴ய பாளியம்பி ‘‘அட்ட² மாஸே கோ² மயா தே³வத³த்த ருக்க²மூலஸேனாஸனம் அனுஞ்ஞாத’’ந்தி வுத்தம்.

தீஹி கோடீஹீதி தீஹி ஆகாரேஹி, தீஹி காரணேஹீதி அத்தோ². தது³ப⁴யவிமுத்தபரிஸங்கிதந்தி தி³ட்ட²ம் ஸுதந்தி இத³ம் உப⁴யம் அனிஸ்ஸாய ‘‘கிம் நு கோ² இத³ம் பி⁴க்கு²ம் உத்³தி³ஸ்ஸ வதி⁴த்வா ஸம்பாதி³த’’ந்தி கேவலமேவ பரிஸங்கிதம். மச்ச²ப³ந்த⁴னம் ஜாலம், வாகு³ரா மிக³ப³ந்த⁴னீ. கப்பதீதி யதி³ தேஸம் வசனேன ஆஸங்கா உபச்சி²ன்னா ஹோதி, வட்டதி. பவத்தமம்ஸந்தி விக்காயிகமம்ஸம். மங்க³லாதீ³னந்தி ஆதி³-ஸத்³தே³ன ஆஹுனபாஹுனாதி³கே ஸங்க³ண்ஹாதி. பி⁴க்கூ²னம்யேவ அத்தா²யாதி ஏத்த² அட்டா²னப்பயுத்தோ ஏவ-ஸத்³தோ³, பி⁴க்கூ²னம் அத்தா²ய அகதமேவாதி ஸம்ப³ந்தி⁴தப்³ப³ம். தஸ்மா ‘‘பி⁴க்கூ²னஞ்ச த³ஸ்ஸாம, மங்க³லாதீ³னஞ்ச அத்தா²ய ப⁴விஸ்ஸதீ’’தி மிஸ்ஸேத்வா கதம்பி ந வட்டதீதி வேதி³தப்³ப³ம். கேசி பன ‘‘பி⁴க்கூ²னம்யேவாதி அவதா⁴ரணேன பி⁴க்கூ²னஞ்ச அஞ்ஞேஸஞ்ச அத்தா²ய கதம் வட்டதீ’’தி வத³ந்தி, தம் ந ஸுந்த³ரம். யத்த² ச நிப்³பே³மதிகோ ஹோதீதி பி⁴க்கூ²னம் அத்தா²ய கதேபி ஸப்³பே³ன ஸப்³ப³ம் பரிஸங்கிதாபா⁴வமாஹ. தமேவத்த²ம் ஆவிகாதும் ‘‘ஸசே பனா’’திஆதி³ வுத்தம். இதரேஸம் வட்டதீதி அஜானந்தானம் வட்டதி, ஜானதோ ஏவேத்த² ஆபத்தி ஹோதீதி. தேயேவாதி யே உத்³தி³ஸ்ஸ கதம், தேயேவ. உத்³தி³ஸகதமம்ஸபரிபோ⁴க³தோ அகப்பியமம்ஸபரிபோ⁴க³ஸ்ஸ விஸேஸம் த³ஸ்ஸேதும் ‘‘அகப்பியமம்ஸம் பனா’’திஆதி³ வுத்தம். புரிமஸ்மிம் ஸசித்தகா ஆபத்தி, இதரஸ்மிம் அசித்தகா. தேனாஹ ‘‘அகப்பியமம்ஸம் அஜானித்வா பு⁴ஞ்ஜந்தஸ்ஸபி ஆபத்தியேவா’’தி. ‘‘பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹேத்வா புச்சி²த்வா பரிபு⁴ஞ்ஜிதப்³ப³’’ந்தி வசனதோ அகப்பியமம்ஸம் அஜானித்வா க³ண்ஹந்தஸ்ஸ படிக்³க³ஹணேன அனாபத்தி ஸியா. அஜானித்வாபி பு⁴ஞ்ஜந்தஸ்ஸேவ ஹி ஆபத்தி வுத்தா. வத்தந்தி வத³ந்தீதி இமினா ஆபத்தி நத்தீ²தி த³ஸ்ஸேதி.

ஸல்லேகா² வுத்தி ஏதேஸந்தி ஸல்லேக²வுத்தினோ. பா³ஹுலிகோதி ஏகஸ்ஸ ல-காரஸ்ஸ லோபம் கத்வா வுத்தம். கப்பந்தி ஆயுகப்பம். ஸங்க⁴பே⁴த³கோ ஹி ஏகம் கப்பம் அஸீதிபா⁴கே³ கத்வா ததோ ஏகபா⁴க³மத்தம் காலம் நிரயே திட்டே²ய்யாதி ஆயுகப்பம் ஸந்தா⁴ய ‘‘கப்பம் நிரயம்ஹி பச்சதீ’’தி வுத்தம். கப்பட்ட²கதா²யம் (விப⁴. அட்ட². 809) பன ‘‘ஸண்ட²ஹந்தே ஹி கப்பே கப்பவேமஜ்ஜே² வா ஸங்க⁴பே⁴த³ம் கத்வா கப்பவினாஸேயேவ முச்சதி. ஸசேபி ஹி ஸ்வே கப்போ வினஸ்ஸிஸ்ஸதீதி அஜ்ஜ ஸங்க⁴பே⁴த³ம் கரோதி, ஸ்வேவ முச்சதி, ஏகதி³வஸமேவ நிரயே பச்சதீ’’தி வுத்தம். தத்தா²பி கப்பவினாஸேயேவாதி ஆயுகப்பவினாஸேயேவாதி அத்தே² ஸதி நத்தி² விரோதோ⁴. ஸண்ட²ஹந்தேதி இத³ம்பி ‘‘ஸ்வே வினஸ்ஸிஸ்ஸதீ’’தி விய அபூ⁴தபரிகப்பனவஸேன வுத்தம். ‘‘ஏகதி³வஸமேவ நிரயே பச்சதீ’’தி ஏத்தா²பி ததோ பரம் கப்பாபா⁴வே ஆயுகப்பஸ்ஸபி அபா⁴வதோதி அவிரோத⁴தோ அத்த²யோஜனா த³ட்ட²ப்³பா³. ப்³ரஹ்மம் புஞ்ஞந்தி ஸேட்ட²ம் புஞ்ஞம். கப்பம் ஸக்³க³ம்ஹி மோத³தீதி ஏத்தா²பி ஆயுகப்பமேவ.

411. லத்³தி⁴னானாஸம்வாஸகேனாதி பா⁴வப்பதா⁴னோயம் நித்³தே³ஸோ, லத்³தி⁴னானாஸம்வாஸகபா⁴வேனாதி அத்தோ². கம்மனானாஸம்வாஸகேனாதி ஏத்தா²பி ஏஸேவ நயோ. அஞ்ஞதா² நானாஸம்வாஸகேன ஸஹிதஸ்ஸ ஸமானஸம்வாஸகஸ்ஸபி ஸங்க⁴ஸ்ஸ அஸமானஸம்வாஸகத்தம் ஆபஜ்ஜேய்ய. தத்த² லத்³தி⁴னானாஸம்வாஸகோ நாம உக்கி²த்தானுவத்தகோ. ஸோ ஹி அத்தனோ லத்³தி⁴யா நானாஸம்வாஸகோ ஜாதோதி ‘‘லத்³தி⁴னானாஸம்வாஸகோ’’தி வுச்சதி. கம்மனானாஸம்வாஸகோ நாம உக்கே²பனீயகம்மகதோ. ஸோ ஹி உக்கே²பனீயகம்மவஸேன நானாஸம்வாஸகோ ஹோதீதி ‘‘கம்மனானாஸம்வாஸகோ’’தி வுச்சதி. விரஹிதோதி விமுத்தோ. காயஸாமக்³கீ³தா³னம் தேஸு தேஸு ஸங்க⁴கம்மேஸு ஹத்த²பாஸூபக³மனவஸேன வேதி³தப்³ப³ம்.

‘‘பே⁴தா³ய பரக்கமேய்யா’’தி விஸும் வுத்தத்தா பே⁴த³னஸம்வத்தனிகஸ்ஸ அதி⁴கரணஸ்ஸ ஸமாதா³ய பக்³க³ண்ஹதோ புப்³பே³பி பக்க²பரியேஸனாதி³வஸேன ஸங்க⁴பே⁴தா³ய பரக்கமந்தஸ்ஸ ஸமனுபா⁴ஸனகம்மம் காதப்³ப³ந்தி வேதி³தப்³ப³ம். இமானி வத்தூ²னீதி அட்டா²ரஸ பே⁴த³கரவத்தூ²னி. கம்மேனாதி அபலோகனாதீ³ஸு சதூஸு கம்மேஸு அஞ்ஞதரேன கம்மேன. உத்³தே³ஸேனாதி பஞ்சஸு பாதிமோக்கு²த்³தே³ஸேஸு அஞ்ஞதரேன உத்³தே³ஸேன. வோஹாரேனாதி தாஹி தாஹி உபபத்தீஹி ‘‘அத⁴ம்மம் த⁴ம்மோ’’திஆதி³அட்டா²ரஸபே⁴த³கரவத்து²தீ³பகேன வோஹாரேன. அனுஸ்ஸாவனாயாதி ‘‘நனு தும்ஹே ஜானாத² மய்ஹம் உச்சாகுலா பப்³ப³ஜிதபா⁴வம் ப³ஹுஸ்ஸுதபா⁴வஞ்ச, மாதி³ஸோ நாம உத்³த⁴ம்மம் உப்³பி³னயம் ஸத்து²ஸாஸனம் கா³ஹேய்யாதி சித்தம்பி உப்பாதே³தும் தும்ஹாகம் யுத்தம், கிம் மய்ஹம் அவீசி நீலுப்பலவனம் விய ஸீதலோ, கிமஹம் அபாயதோ ந பா⁴யாமீ’’திஆதி³னா நயேன கண்ணமூலே வசீபே⁴த³ம் கத்வா அனுஸ்ஸாவனேன. ஸலாகக்³கா³ஹேனாதி ஏவம் அனுஸ்ஸாவேத்வா தேஸம் சித்தம் உபத்த²ம்பே⁴த்வா அனிவத்தித⁴ம்மே கத்வா ‘‘க³ண்ஹத² இமம் ஸலாக’’ந்தி ஸலாகக்³கா³ஹேன. பஞ்சஹி காரணேஹி ஸங்க⁴பே⁴தோ³ ஹோதீதி ஏத்த² கம்மமேவ உத்³தே³ஸோ வா ஸங்க⁴பே⁴தே³ பதா⁴னகாரணந்தி வேதி³தப்³ப³ம். வோஹாரானுஸ்ஸாவனஸலாகக்³கா³ஹா பன புப்³ப³பா⁴கா³. அட்டா²ரஸவத்து²தீ³பனவஸஏன ஹி வோஹரந்தேன தத்த² ருசிஜனனத்த²ம் அனுஸ்ஸாவேத்வா ஸலாகாய க³ஹிதாயபி அபி⁴ன்னோவ ஹோதி ஸங்கோ⁴. யதா³ பன ஏவம் சத்தாரோ வா அதிரேகா வா ஸலாகம் க³ஹேத்வா ஆவேணிககம்மம் வா உத்³தே³ஸம் வா கரோந்தி, ததா³ ஸங்கோ⁴ பி⁴ன்னோ நாம ஹோதி. அப்³பு⁴ஸ்ஸிதந்தி அப்³பு⁴க்³க³தம். அச்சே²ய்யாதி விஹரேய்ய, பவத்தேய்யாதி அத்தோ².

‘‘லஜ்ஜீ ரக்கி²ஸ்ஸதீ’’தி வசனதோ ஆபத்திப⁴யேன ஆரோசனம் லஜ்ஜீனம்யேவ பா⁴ரோதி ஆஹ ‘‘லஜ்ஜீஹி பி⁴க்கூ²ஹீ’’தி. அலஜ்ஜிஸ்ஸபி அனாரோசேந்தஸ்ஸ ஆபத்தியேவ ‘‘யே பஸ்ஸந்தி, யே ஸுணந்தீ’’தி வசனதோ. ஸமாக³ச்ச²தூதி ஏகீ ப⁴வது. ஏகீபா⁴வோ ச ஸமானலத்³தி⁴வஸேன ஹோதீதி ஆஹ ‘‘ஏகலத்³தி⁴கோ ஹோதூ’’தி. ஸம்பத்தியாதி ஸீலாதி³ஸம்பத்தியா. படினிஸ்ஸஜ்ஜந்தஸ்ஸ அனாபத்திபா⁴வதோ ‘‘ஸோத்தி²பா⁴வோ தஸ்ஸ பி⁴க்கு²னோ’’தி வுத்தம். அப்படினிஸ்ஸஜ்ஜதோ து³க்கடந்தி விஸும் விஸும் வத³ந்தானம் க³ணனாய து³க்கடம். பஹோந்தேனாதி க³ந்தும் ஸமத்தே²ன அகி³லானேன. ஸங்க⁴பே⁴த³ஸ்ஸ க³ருகபா⁴வதோ அவஸ்ஸம் கத்தப்³ப³தாத³ஸ்ஸனத்த²ம் ‘‘தூ³ரேபி பா⁴ரோயேவா’’தி வுத்தம், ஆபத்தி பன அத்³த⁴யோஜனப்³ப⁴ந்தரே க³ந்தும் ஸமத்த²ஸ்ஸ அகி³லானஸ்ஸேவ வேதி³தப்³பா³.

416. அஸமனுபா⁴ஸந்தஸ்ஸாதி கம்மகாரகே கத்துனித்³தே³ஸோதி ஆஹ ‘‘அஸமனுபா⁴ஸியமானஸ்ஸா’’தி. ததியகம்மவாசாய படினிஸ்ஸஜ்ஜந்தோ ஞத்தியா து³க்கடம் த்³வீஹி கம்மவாசாஹி து²ல்லச்சயே ச ஆபஜ்ஜதியேவாதி ஆஹ ‘‘படினிஸ்ஸஜ்ஜந்தஸ்ஸ ஸங்கா⁴தி³ஸேஸேன அனாபத்தீ’’தி. அஸ்ஸாதி தே³வத³த்தஸ்ஸ. கதேன ப⁴விதப்³ப³ந்தி ஸமனுபா⁴ஸனகம்மேன கதேன ப⁴விதப்³ப³ம். அத்தனோ ருசிமத்தேன வதே³ய்யாதிஆதி³கம்மிகத்தா அப்படினிஸ்ஸஜ்ஜந்தஸ்ஸபி அனாபத்தீதி அதி⁴ப்பாயேன வதே³ய்ய. அபஞ்ஞத்தே ஸிக்கா²பதே³ ஸமனுபா⁴ஸனகம்மஸ்ஸேவ அபா⁴வதோ ‘‘ந ஹி பஞ்ஞத்தம் ஸிக்கா²பத³ம் வீதிக்கமந்தஸ்ஸா’’தி வுத்தம். ஸிக்கா²பத³ம் பஞ்ஞபேந்தேனேவ ஹி ஸமனுபா⁴ஸனகம்மம் அனுஞ்ஞாதம். உத்³தி³ஸ்ஸ அனுஞ்ஞாததோதி ‘‘அனுஜானாமி, பி⁴க்க²வே, ரோமந்த²கஸ்ஸ ரோமந்த²ன’’ந்திஆதி³ம் (சூளவ. 273) உத்³தி³ஸ்ஸ அனுஞ்ஞாதம் ஸந்தா⁴ய வத³ந்தி. அனாபத்தியந்தி அனாபத்திவாரே. ஆபத்திம் ரோபேதப்³போ³தி அனிஸ்ஸஜ்ஜனபச்சயா ஆபன்னபாசித்தியாபத்திம் உக்கே²பனீயகம்மகரணத்த²ம் ஆரோபேதப்³போ³தி அத்தோ².

ஆபத்தியேவ ந ஜாதாதி ஸங்கா⁴தி³ஸேஸாபத்தி ந ஜாதாயேவாதி அத்தோ². ஸா பனேஸாதி ஸா பன ஏஸா அனாபத்தி. திவங்கி³கந்தி காயவாசாசித்தவஸேன திவங்கி³கம், காயவாசாசித்ததோ ஸமுட்டா²தீதி வுத்தம் ஹோதி. ‘‘நப்படினிஸ்ஸஜ்ஜாமீ’’தி ஸஞ்ஞாய அபா⁴வேன முச்சனதோ ஸஞ்ஞாவிமோக்க²ம். ஸசித்தகந்தி ‘‘நப்படினிஸ்ஸஜ்ஜாமீ’’தி ஜானனசித்தேன ஸசித்தகம். பே⁴தா³ய பரக்கமனம், த⁴ம்மகம்மேன ஸமனுபா⁴ஸனம், கம்மவாசாபரியோஸானம், அப்படினிஸ்ஸஜ்ஜனந்தி இமானேத்த² சத்தாரி அங்கா³னி.

பட²மஸங்க⁴பே⁴த³ஸிக்கா²பத³வண்ணனா நிட்டி²தா.