13. குலதூ³ஸகஸிக்கா²பத³வண்ணனா

431. தேரஸமே கீடாகி³ரீதி தஸ்ஸ நிக³மஸ்ஸ நாமம். தஞ்ஹி ஸந்தா⁴ய பரதோ ‘‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’’ந்தி வுத்தம். தேன பன யோக³தோ ஸோ ஜனபதோ³பி ‘‘கீடாகி³ரி’’இச்சேவ ஸங்க்²யம் க³தோதி ஆஹ ‘‘ஏவம்னாமகே ஜனபதே³’’தி. ஆவாஸே நியுத்தா ஆவாஸிகா, நிப³த்³த⁴வாஸினோ. தே அகதம் ஸேனாஸனம் கரோந்தி, ஜிண்ணம் படிஸங்க²ரோந்தி, கதே இஸ்ஸரா ஹோந்தி. தேனாஹ ‘‘ஸோ யேஸம் ஆயத்தோ…பே… தே ஆவாஸிகா’’தி. நிவாஸோ நிவாஸமத்தம் ஏதேஸம் அத்தீ²தி நேவாஸிகாதி ஆஹ ‘‘யே பன கேவல’’ந்திஆதி³. தேதி அஸ்ஸஜிபுனப்³ப³ஸுகா. ச² ஜனாதி பண்டு³கோ லோஹிதகோ மேத்தியோ பூ⁴மஜகோ அஸ்ஸஜி புனப்³ப³ஸுகோதி இமே ச² ஜனா. ஸம்மாதி ஆலபனவசனமேதம். ஆயமுக²பூ⁴தாதி ஆயஸ்ஸ முக²பூ⁴தா. து⁴ரட்டா²னேதி ஸாவத்தி²யா அவிதூ³ரே டா²னே. வஸ்ஸானே ஹேமந்தே சாதி த்³வீஸு உதூஸு வஸ்ஸனதோ ‘‘த்³வீஹி மேகே⁴ஹீ’’தி வுத்தம். தி³யட்³ட⁴பி⁴க்கு²ஸஹஸ்ஸதோ க³ணாசரியானம் ச²ன்னம் ஜனானம் அதி⁴கத்தா ‘‘ஸமதி⁴க’’ந்தி வுத்தம், ஸாதி⁴கந்தி அத்தோ². ம-காரோ பத³ஸந்தி⁴வஸேன ஆக³தோ. அகதவத்து²ந்தி அகதபுப்³ப³ம் அபி⁴னவவத்து²ம்.

கணிகாராத³யோ புப்ப²ருக்கா², ஜாதிஸுமனாத³யோ புப்ப²க³ச்சா². கோட்டனந்தி ஸயம் சி²ந்த³னம். கோட்டாபனந்தி ‘‘இமம் சி²ந்த³ பி⁴ந்தா³’’தி அஞ்ஞேஹி சே²தா³பனம். ஆளியா ப³ந்த⁴னந்தி யதா² க³ச்ச²மூலே உத³கம் ஸந்திட்ட²தி, ததா² ஸமந்ததோ ப³ந்த⁴னம். உத³கஸ்ஸாதி அகப்பியஉத³கஸ்ஸ. கப்பியஉத³கஸிஞ்சனந்தி இமினாவ ஸிஞ்சாபனம்பி ஸங்க³ஹிதந்தி த³ட்ட²ப்³ப³ம். நனு ‘‘உத³கஸ்ஸ ஸேசனம் ஸேசாபன’’ந்தி இமினாவ ஸாமஞ்ஞதோ கப்பியாகப்பியஉத³கஸிஞ்சனாதி³ம் ஸக்கா ஸங்க³ஹேதும், தஸ்மா கப்பியஉத³கஸிஞ்சனாதி³ கஸ்மா விஸும் வுத்தந்தி? ‘‘ஆராமாதி³அத்த²ம் ரோபிதே அகப்பியவோஹாரேஸுபி கப்பியஉத³கஸிஞ்சனாதி³ வட்டதீ’’தி வக்க²மானத்தா இதா⁴பி விபா⁴க³ம் கத்வா கப்பியஉத³கஸிஞ்சனாதி³ விஸும் த³ஸ்ஸிதம். ஹத்த²முக²பாத³தோ⁴வனன்ஹானோத³கஸிஞ்சனந்தி இமினாபி பகாரந்தரேன கப்பியஉத³கஸிஞ்சனமேவ த³ஸ்ஸேதி. ‘‘அகப்பியவோஹாரோ’’தி கோட்டனக²ணனாதி³வஸேன ஸயம் கரணஸ்ஸபி கத²ம் ஸங்க³ஹோதி? அகப்பியந்தி வோஹரீயதீதி அகப்பியவோஹாரோதி அகப்பியபூ⁴தம் கரணகாராபனாதி³ ஸப்³ப³மேவ ஸங்க³ஹிதம், ந பன அகப்பியவசனமத்தந்தி த³ட்ட²ப்³ப³ம். கப்பியவோஹாரேபி ஏஸேவ நயோ. ஸுக்க²மாதிகாய உஜுகரணந்தி இமினா புராணபண்ணாதி³ஹரணம்பி ஸங்க³ஹிதந்தி த³ட்ட²ப்³ப³ம். குதா³லாதீ³னி பூ⁴மியம் ட²பேத்வா டா²னதோ ஹத்தே²ன க³ஹேத்வா டா²னமேவ பாகடதரந்தி ‘‘ஓபா⁴ஸோ’’தி வுத்தம்.

மஹாபச்சரிவாத³ம்ஹி பதிட்ட²பேதுகாமோ பச்சா² வத³தி. வனத்தா²யாதி இத³ம் கேசி ‘‘வதத்தா²யா’’தி பட²ந்தி, தேஸம் வதிஅத்தா²யாதி அத்தோ². அகப்பியவோஹாரேபி ஏகச்சம் வட்டதீதி த³ஸ்ஸேதும் ‘‘ந கேவலஞ்ச ஸேஸ’’ந்திஆதி³மாஹ. யம் கிஞ்சி மாதிகந்தி ஸுக்க²மாதிகம் வா அஸுக்க²மாதிகம் வா. ‘‘கப்பியஉத³கம் ஸிஞ்சிது’’ந்தி இமினா ‘‘கப்பியஉத³கம் ஸிஞ்சதா²தி வத்தும்பி வட்டதீ’’தி த³ஸ்ஸேதி. ஸயம் ரோபேதும்பி வட்டதீதி இமினா ‘‘ரோபேஹீதி வத்தும் வட்டதீ’’திபி ஸித்³த⁴ம். அஞ்ஞத்தா²ய வா கரோந்தஸ்ஸாதி வத்து²பூஜாதி³அத்த²ம் கரோந்தஸ்ஸ. கஸ்மா ந அனாபத்தீதி வத்து²பூஜனத்தா²ய க³ந்த²னாதீ³ஸு கஸ்மா ந அனாபத்தி. அனாபத்தியேவாதி படிவசனம் த³த்வா இதா³னி தமேவ அனாபத்திபா⁴வம் த³ஸ்ஸேதும் ‘‘யதா²ஹீ’’திஆதி³ வுத்தம். தத்தா²தி ஆராமாதி³அத்தா²ய ருக்க²ரோபனே. ததா² வத்து²பூஜனத்தா²யபி அனாபத்தியேவாதி ரதனத்தயபூஜனத்தா²யபி கப்பியவோஹாரேன பரியாயாதீ³ஹி ச க³ந்தா²பனே அனாபத்தியேவாதி அத்தோ².

‘‘ததா² வத்து²பூஜனத்தா²யா’’தி ஹி ஸாமஞ்ஞதோ வுத்தேபி ‘‘யதா² ஹி தத்த² கப்பியவோஹாரேன பரியாயாதீ³ஹி சா’’தி வுத்தத்தா கப்பியவோஹாராதீ³ஹி க³ந்தா²பனே ஏவ அனாபத்தி விஞ்ஞாயதி, ந ஸயம் க³ந்த²னே, தேனேவ பரோ ஸயம் க³ந்த²னம்பி கஸ்மா ந வட்டதீதி சோதே³ந்தோ ‘‘நனு சா’’திஆதி³மாஹ. யதா² ஆராமாதி³அத்த²ம் கப்பியபத²வியம் ஸயம் ரோபேதும்பி வட்டதி, ததா² வத்து²பூஜனத்தா²ய ஸயம் க³ந்த²னேபி கஸ்மா ந வட்டதீதி சோத³கஸ்ஸ அதி⁴ப்பாயோ. வுத்தந்திஆதி³ ஆசரியஸ்ஸ பரிஹாரோ. அத² ‘‘ந பன மஹாஅட்ட²கதா²ய’’ந்தி கஸ்மா வத³தி. மஹாபச்சரிஆதீ³ஸு வுத்தம்பி ஹி பமாணமேவாதி நாயம் விரோதோ⁴, மஹாஅட்ட²கதா²யம் அவுத்தம்பி தத்தே²வ வுத்தேன ஸம்ஸந்தி³த்வா பமாணமேவாதி பதிட்டா²பேதும் வுத்தத்தா. தம் கத²ந்தி மஞ்ஞேய்யாஸீதி ஸம்ப³ந்தோ⁴. மஹாஅட்ட²கதா²யஞ்ச கப்பியஉத³கஸேசனம் வுத்தம், தம் கத²ந்தி ஏத்தா²யமதி⁴ப்பாயோ. கிஞ்சாபி மஹாஅட்ட²கதா²யம் ஆராமாதி³அத்தா²ய கப்பியபத²வியம் ஸயம் ரோபனம் ந வுத்தம், கப்பியஉத³கஸ்ஸ பன ஸயம் ஸிஞ்சனம் வுத்தமேவ, தஸ்மா யதா² ஆராமாதி³அத்தா²ய கப்பியஉத³கம் ஸயம் ஸிஞ்சிதும்பி வட்டதி, ததா² வத்து²பூஜனத்தா²ய ஸயம் க³ந்த²னம்பி கஸ்மா ந வட்டதீதி. தம்பி ந விருஜ்ஜ²தீதி யதே³தம் ஆராமாதி³அத்தா²ய ஸயம் ரோபனம் கப்பியஉத³கஸிஞ்சனஞ்ச வுத்தம், தம்பி ந விருஜ்ஜ²தி. கத²ம் தம் ந விருஜ்ஜ²தீதி ஆஹ ‘‘தத்ரஹீ’’திஆதி³. ஏதம் வுத்தந்தி மாலாவச்ச²ம் ரோபேந்திபி ரோபாபேந்திபி ஸிஞ்சந்திபி ஸிஞ்சாபேந்திபீதி ஏதம் வுத்தம். அஞ்ஞத்ர பன பரியாயோ அத்தீ²தி ‘‘மாலாவச்ச²ம் ரோபேந்திபி ரோபாபேந்திபி ஸிஞ்சந்திபி ஸிஞ்சாபேந்திபீ’’தி குலஸங்க³ஹத்தா²ய ரோபனஸிஞ்சனம் ஸந்தா⁴ய வுத்தத்தா ததோ அஞ்ஞத்ர ஆராமாதி³அத்தா²ய மாலாவச்ச²ரோபனே பரியாயோ அத்தி². தத்த² பரியாயம் இத⁴ ச பரியாயாபா⁴வம் ஞத்வாதி தத்த² ‘‘மாலாவச்ச²ம் ரோபேந்தீ’’திஆதீ³ஸு ‘‘மாலாவச்ச²’’ந்தி விஸேஸவசனஸப்³பா⁴வதோ பரியாயம், இத⁴ ‘‘க³ந்தே²ந்தீ’’திஆதீ³ஸு ததா²வித⁴விஸேஸவசனாபா⁴வதோ பரியாயாபா⁴வஞ்ச ஞத்வா.

நனு ச யதா² ‘‘க³ந்தே²ந்தீ’’தி ஸாமஞ்ஞதோ வுத்தத்தா பரியாயோ ந லப்³ப⁴தீதி யஸ்ஸ கஸ்ஸசி அத்தா²ய ஸயம் க³ந்த²னம் ந வட்டதி, ஏவம் ‘‘க³ந்தா²பேந்தீ’’தி ஸாமஞ்ஞதோ வுத்தத்தா பரியாயேன க³ந்தா²பனம்பி ந வட்டதீதி ஆபஜ்ஜதி. ஏவஞ்ச ஸதி பரதோ ‘‘ஏவம் ஜான, ஏவம் கதே ஸோபே⁴ய்ய, யதா² ஏதானி புப்பா²னி ந விகிரியந்தி, ததா² கரோஹீதிஆதி³னா கப்பியவசனேன காரேதும் வட்டதீ’’தி இத³ம் விருஜ்ஜ²தீதி? ந விருஜ்ஜ²தி, பரியாயேன ஹி காராபனம் க³ந்தா²பனமேவ ந ஹோதி, தஸ்மா யதா²வுத்தனயேன பரியாயதோ காராபனம் வட்டதி. ஸப்³ப³ம் வுத்தனயேனேவ வேதி³தப்³ப³ந்தி ஹேட்டா² வுத்தம் வினிச்ச²யமேவ ஸங்கே²பதோ நிக³மேதி. ஹரணாதீ³ஸு கஸ்மா அனாபத்தீதி வத்து²பூஜனத்தா²ய ஹரணாதீ³ஸு கஸ்மா அனாபத்தி. குலித்தி²ஆதீ³னம் அத்தா²ய ஹரணதோதி குலித்தி²ஆதீ³னம் ஹரணஸ்ஸ தத்த² வுத்தத்தாதி அதி⁴ப்பாயோ. தேனேவாஹ ‘‘ஹரணாதி⁴காரே ஹீ’’திஆதி³. மாலந்தி புப்ப²தா³மம். மஞ்ஜரீ வியாதி குஸுமமஞ்ஜரீ விய. ஹாரஸதி³ஸந்தி முத்தாஹாரஸதி³ஸம்.

பாசித்தியஞ்சேவ து³க்கடஞ்சாதி பத²வீக²ணனபச்சயா பாசித்தியம், குலஸங்க³ஹபச்சயா து³க்கடம். அகப்பியவோஹாரேனாதி ‘‘இத³ம் க²ண, இத³ம் ரோபேஹீ’’திஆதி³அகப்பியவோஹாரேன. து³க்கடமேவாதி குலஸங்க³ஹபச்சயா து³க்கடம். உப⁴யத்தா²தி கப்பியாகப்பியபத²வியம். ஸப்³ப³த்தா²தி குலஸங்க³ஹபரிபோ⁴க³ஆராமாதி³அத்தா²ய ரோபிதே. து³க்கடம்பீதி ந கேவலம் பாசித்தியமேவ. கப்பியேனாதி கப்பியேன உத³கேன. தேஸம்யேவ த்³வின்னந்தி குலதூ³ஸனபரிபோ⁴கா³னம். து³க்கடந்தி குலஸங்க³ஹத்தா²ய ஸயம் ஸிஞ்சனே கப்பியவோஹாரேன அகப்பியவோஹாரேன வா ஸிஞ்சாபனே ச து³க்கடம், பரிபோ⁴க³த்தா²ய பன ஸயம் ஸிஞ்சனே அகப்பியவோஹாரேன ஸிஞ்சாபனே ச து³க்கடம். ஆபத்திப³ஹுலதா வேதி³தப்³பா³தி ஏத்த² ஸயம் ஸிஞ்சனே தா⁴ராபச்சே²த³க³ணனாய ஆபத்திக³ணனா வேதி³தப்³பா³. ஸிஞ்சாபனே பன புனப்புனம் ஆணாபேந்தஸ்ஸ வாசாய வாசாய ஆபத்தி, ஸகிம் ஆணத்தஸ்ஸ ப³ஹூனம் ஸிஞ்சனேபி ஏகாவ.

து³க்கடபாசித்தியானீதி குலஸங்க³ஹபச்சயா து³க்கடம், பூ⁴தகா³மபாதப்³யதாய பாசித்தியம். அஞ்ஞத்தா²தி வத்து²பூஜாதி³அத்தா²ய ஓசினனே. ஸகிம் ஆணத்தோதி அகப்பியவோஹாரேன ஆணத்தோ. பாசித்தியமேவாதி அகப்பியவசனேன ஆணத்தத்தா பாசித்தியம். கப்பியவசனேன பன வத்து²பூஜாதி³அத்தா²ய ஓசினாபேந்தஸ்ஸ அனாபத்தியேவ.

க³ந்த²னேன நிப்³ப³த்தம் க³ந்திமம். ஏஸ நயோ ஸேஸேஸுபி. ந வட்டதீதி குலஸங்க³ஹத்தா²ய வத்து²பூஜாதி³அத்தா²ய வா வுத்தனயேன கரோந்தஸ்ஸ ச காராபேந்தஸ்ஸ ச து³க்கடந்தி அத்தோ². புரிமனயேனேவாதி ‘‘பி⁴க்கு²ஸ்ஸ வா’’திஆதி³னா வுத்தனயேன. த⁴ம்மாஸனவிதானே ப³த்³த⁴கண்டகேஸு புப்பா²னி விஜ்ஜி²த்வா ட²பேந்தீதி ஸம்ப³ந்தோ⁴. உபரூபரி விஜ்ஜி²த்வா ச²த்தஸதி³ஸம் கத்வா ஆவுணனதோ ‘‘ச²த்தாதிச²த்தம் வியா’’தி வுத்தம். ‘‘கத³லிக்க²ந்த⁴ம்ஹீ’’திஆதி³னா வுத்தம் ஸப்³ப³மேவ ஸந்தா⁴ய ‘‘தம் அதிஓளாரிகமேவா’’தி வுத்தம், ஸயம் கரோந்தஸ்ஸ அகப்பியவசனேனேவ காராபேந்தஸ்ஸ ச து³க்கடமேவாதி அத்தோ². புப்ப²விஜ்ஜ²னத்த²ந்தி வுத்தத்தா புப்பா²னி விஜ்ஜி²தும்யேவ கண்டகம் ப³ந்தி⁴தும் ந வட்டதி, புப்ப²தா³மாதி³ப³ந்த⁴னத்த²ம் பன வட்டதி. கண்டகம்பி ப³ந்தி⁴தும் ந வட்டதீதி ச இத³ம் அட்ட²கதா²சரியப்பமாணேன க³ஹேதப்³ப³ம். பவேஸேதும் ந வட்டதீதி வுத்தத்தா புப்ப²ச்சி²த்³தே³ அபவேஸேத்வா உபரூபரி ட²பேதும் வட்டதி. ஜாலமயம் விதானம் ஜாலவிதானம். நாக³த³ந்தகம்பி ஸச்சி²த்³த³கம்யேவ க³ஹேதப்³ப³ம். புப்ப²படிச்ச²கம் த³ண்டா³தீ³ஹி கதபுப்பா²தா⁴ரணம், தம்பி ஸச்சி²த்³த³மேவ இத⁴ வுத்தம். அஸோகபிண்டி³யாதி அஸோகபுப்ப²மஞ்ஜரிகாய. ‘‘த⁴ம்மரஜ்ஜு நாம சேதியம் வா போ³தி⁴ம் வா புப்ப²பவேஸனத்த²ம் ஆவிஜ்ஜி²த்வா ப³த்³த⁴ரஜ்ஜூ’’தி மஹாக³ண்டி²பதே³ மஜ்ஜி²மக³ண்டி²பதே³ ச வுத்தம், தஸ்மா ததா²ப³த்³தா⁴ய ரஜ்ஜுயா சேதியஸ்ஸ ச அந்தரே புப்பா²னி பவேஸேதும் வட்டதீதி விஞ்ஞாயதி. க³ண்டி²பதே³ பன ‘‘த⁴ம்மரஜ்ஜுந்தி ஸிதி²லம் வட்டிகம் ரஜ்ஜும் கத்வா போ³தி⁴ம் வா சேதியம் வா பரிக்கி²பித்வா த⁴ம்மாஸனே வா லம்பி³த்வா தத்த² புப்பா²னி பவேஸேந்தீ’’தி வுத்தம், தஸ்மா ஸிதி²லவட்டிகாய ரஜ்ஜுயா அந்தரேபி புப்பா²னி பவேஸேதும் வட்டதீதி விஞ்ஞாயதி, வீமம்ஸித்வா யுத்ததரம் க³ஹேதப்³ப³ம். உப⁴யத்தா²பி பனேத்த² நேவத்தி² விரோதோ⁴தி அம்ஹாகம் க²ந்தி.

மத்த²கதா³மந்தி த⁴ம்மாஸனாதி³மத்த²கே லம்ப³கதா³மம். புப்பே²ஹி வேடே²ந்தீதி புப்ப²தா³மேன வேடே²ந்தி. தேஸம்யேவாதி உப்பலாதீ³னம்யேவ. வாகேன வா த³ண்ட³கேன வாதி விஸும் அச்சி²ன்னேன புப்ப²ஸஹிதேனேவ வாகேன வா த³ண்ட³கேன வா. க²ந்தே⁴ ட²பிதகாஸாவஸ்ஸாதி க²ந்தே⁴ ட²பிதஸங்கா⁴டிம் ஸந்தா⁴ய வுத்தம். தஞ்ஹி ததா² ப³ந்தி⁴தும் ஸக்கா ப⁴வேய்ய. இமினாவ அஞ்ஞம்பி தாதி³ஸம் காஸாவம் வா வத்த²ம் வா வுத்தனயேன ப³ந்தி⁴த்வா தத்த² புப்பா²னி பக்கி²பிதும் வட்டதீதி ஸித்³த⁴ம். அம்ஸப⁴ண்டி³கம் பஸிப்³ப³கே பக்கி²த்தஸதி³ஸத்தா வேடி²மம் நாம ந ஜாதம், தஸ்மா ஸிதி²லப³ந்த⁴ஸ்ஸ அந்தரந்தரா பக்கி²பிதும் வட்டதீதி வத³ந்தி.

புப்ப²படே ச த³ட்ட²ப்³ப³ந்தி புப்ப²படம் கரோந்தஸ்ஸ தீ³க⁴தோ புப்ப²தா³மஸ்ஸ ஹரணபச்சாஹரணவஸேன பூரணம் ஸந்தா⁴ய வுத்தம். திரியதோ ஹரணம் பன வாயிமம் நாம ஹோதி, ந பூரிமம். புரிமட்டா²னம் அதிக்காமேதீதி ஏத்த² ‘‘அபு²ஸாபேத்வாபி அதிக்காமேந்தஸ்ஸ ஆபத்தியேவா’’தி தீஸுபி க³ண்டி²பதே³ஸு வுத்தம். ‘‘புரிமட்டா²னம் அதிக்காமேதீ’’தி அவிஸேஸேன வுத்தத்தா தம் யுத்தம். கேசி பன ‘‘அஞ்ஞமஞ்ஞம் அபு²ஸாபேத்வா அனேகக்க²த்தும் பரிக்கி²பிதும் வட்டதீ’’தி வத³ந்தீதி வுத்தம், தத்த² காரணம் ந தி³ஸ்ஸதி. ப³ந்தி⁴தும் வட்டதீதி புப்ப²ரஹிதாய ஸுத்தகோடியா வாககோடியா வா ப³ந்தி⁴தும் வட்டதி. ஏகவாரம் ஹரித்வா வா பரிக்கி²பித்வா வாதி இத³ம் புப்³பே³ வுத்தசேதியாதி³பரிக்கே²பம் புப்ப²படகரணஞ்ச ஸந்தா⁴ய வுத்தம், தஸ்மா சேதியம் வா போ³தி⁴ம் வா பரிக்கி²பந்தேன ஏகவாரம் பரிக்கி²பித்வா புரிமட்டா²னம் ஸம்பத்தே அஞ்ஞஸ்ஸ தா³தப்³ப³ம், தேனபி ஏகவாரம் பரிக்கி²பித்வா ததே²வ காதப்³ப³ம். புப்ப²படம் கரோந்தேன ச ஏகவாரம் ஹரித்வா அஞ்ஞஸ்ஸ தா³தப்³ப³ம், தேனபி ததே²வ காதப்³ப³ம். ஸசேபி த்³வேயேவ பி⁴க்கூ² உபோ⁴ஸு பஸ்ஸேஸு ட²த்வா பரியாயேன ஹரந்தி, வட்டதியேவாதி வத³ந்தி.

பூரிதந்தி தீ³க⁴தோ பஸாரணவஸேன பூரிதம். வாயிதும் ந லப⁴தீதி தீ³க⁴தோ பஸாரிதே திரியதோ ஹரணம் வாயனம் நாம ஹோதீதி ஏகவாரம்பி புப்ப²கு³ணம் திரியதோ ஹரிதும் ந வட்டதி. புப்பா²னி ட²பேந்தேனாதி அக³ந்தி²தானி பாகதிகபுப்பா²னி ட²பேந்தேன. புப்ப²தா³மம் பன பூஜனத்தா²ய பூ⁴மியம் ட²பேந்தேன பு²ஸாபேத்வா வா அபு²ஸாபேத்வா வா தி³கு³ணம் கத்வா ட²பேதும் ந வட்டதீதி வத³ந்தி. க⁴டிகதா³மஓலம்ப³கோதி அந்தே க⁴டிகாகாரயுத்தோ யமகதா³மஓலம்ப³கோ. ஏகேகம் பன தா³மம் நிக்க²ந்தஸுத்தகோடியாவ ப³ந்தி⁴த்வா ஓலம்பி³தும் வட்டதி, புப்ப²தா³மத்³வயம் ஸங்க⁴டிதுகாமேனபி நிக்க²ந்தஸுத்தகோடியாவ ஸுத்தகோடிம் ஸங்க⁴டிதும் வட்டதி. அட்³ட⁴சந்தா³காரேன மாலாகு³ணபரிக்கே²போதி அட்³ட⁴சந்தா³காரேன மாலாகு³ணஸ்ஸ புனப்புனம் ஹரணபச்சாஹரணவஸேன பூரேத்வா பரிக்கி²பனம். தேனேவ தம் பூரிமே பவிட்ட²ம், தஸ்மா ஏதம்பி அட்³ட⁴சந்தா³காரம் புனப்புனம் ஹரணபச்சாஹரணவஸேன பூரிதம் ந வட்டதி. ஏகவாரம் பன அட்³ட⁴சந்தா³காரேன மாலாகு³ணம் ஹரிதும் வட்டதீதி வத³ந்தி. புப்ப²தா³மகரணந்தி ஏத்த² ஸுத்தகோடியம் க³ஹேத்வாபி ஏகதோ காதும் ந வட்டதீதி வத³ந்தி. கே³ண்டு³கக²ரபத்ததா³மானம் படிக்கி²த்தத்தா சேலாதீ³ஹி கததா³மம்பி ந வட்டதி அகப்பியானுலோமத்தாதி வத³ந்தி.

‘‘லாஸியனாடகம் நாடேந்தீ’’தி வத்வா தமேவ பரியாயந்தரேன த³ஸ்ஸேதும் ‘‘ரேசகம் தே³ந்தீ’’தி வுத்தம், அபி⁴னயம் த³ஸ்ஸேந்தீதி அத்தோ², அத்தனோ அதி⁴ப்பாயம் பகாஸேத்வா ‘‘ஏவம் நச்சிதப்³ப³’’ந்தி பட²மம் உட்ட²ஹித்வா நச்சனாகாரம் த³ஸ்ஸேந்தீதி வுத்தம் ஹோதி. கேசி பன ‘‘முகே² அங்கு³லியோ பக்கி²பித்வா ஸத்³த³ம் கரோந்தா சக்கமிவ அத்தானம் ப⁴மயமானா ரேசகம் தே³ந்தி நாமா’’தி வத³ந்தி. ஏகேகாய பந்தியா அட்ட² அட்ட² பதா³னி அஸ்ஸாதி அட்ட²பத³ம். ‘‘அட்டா²பத³’’ந்திபி பட²ந்தி. த³ஸபதே³பி ஏஸேவ நயோ. பதா³னீதி ச ஸாரிஆதீ³னம் பதிட்டா²னட்டா²னானி. த³ஸபத³ம் நாம த்³வீஹி பந்தீஹி வீஸதியா பதே³ஹி கீளனஜூதம். ஆகாஸேயேவ கீளந்தீதி ‘‘அயம் ஸாரீ அஸுகபத³ம் மயா நீதா, அயம் அஸுகபத³’’ந்தி கேவலம் முகே²னேவ வத³ந்தா ஆகாஸேயேவ ஜூதம் கீளந்தி. ஜூதப²லகேதி ஜூதமண்ட³லே. பாஸககீளாய கீளந்தீதி பாஸகம் வுச்சதி ச²ஸு பஸ்ஸேஸு ஏகேகம் யாவ ச²க்கம் த³ஸ்ஸேத்வா கதகீளனம், தம் வட்³டே⁴த்வா யதா²லத்³த⁴ஏககாதி³வஸேன ஸாரியோ அபனேந்தா உபனேந்தா ச கீளந்தி. க⁴டேன கீளா க⁴டிகாதி ஏகே.

மஞ்ஜட்டி²யா வாதி மஞ்ஜட்டி²ருக்க²ஸாரம் க³ஹேத்வா பக்ககஸாவம் ஸந்தா⁴ய வத³தி. ஸலாகஹத்த²ந்தி தாலஹீராதீ³னம் கலாபஸ்ஸேதம் அதி⁴வசனம். ப³ஹூஸு ஸலாகாஸு விஸேஸரஹிதம் ஏகம் ஸலாகம் க³ஹேத்வா தாஸு பக்கி²பித்வா புன தம்யேவ உத்³த⁴ரந்தா ஸலாகஹத்தே²ன கீளந்தீதி கேசி. பண்ணேன வம்ஸாகாரேன கதா நாளிகா பண்ணனாளிகா. தேனேவாஹ ‘‘தம் த⁴மந்தா’’தி. புச்ச²ந்தஸ்ஸ முகா²க³தம் அக்க²ரம் க³ஹேத்வா நட்ட²முட்டி²லாபா⁴லாபா⁴தி³ஜானனகீளா அக்க²ரிகாதிபி வத³ந்தி. ஹத்தி²ஸ்மிந்தி நிமித்தத்தே² பு⁴ம்மம், ஹத்தி²னிமித்தஸிப்பேதி அத்தோ². அஸ்ஸஸ்மிந்திஆதீ³ஸுபி ஏஸேவ நயோ. ‘‘உஸ்ஸேளேந்தி அப்போ²டேந்தீ’’தி த்³வின்னம் பதா³னம் அத்தோ² பாகடோயேவாதி ந வுத்தோ. தத்த² உஸ்ஸேளேந்தீதி முகே²ன உஸ்ஸேளனஸத்³த³ம் பமுஞ்சந்தி, மஹந்தம் கத்வா அப்³யத்தஸத்³த³ம் பவத்தேந்தீதி அத்தோ². ‘‘அஜானம் ஸஞ்ஞம் தே³ந்தா அஜபாலகா விய முகே²ன வாதம் நிச்சா²ரேந்தா ஸுகு²மம் அப்³யத்தனாத³ம் பவத்தேந்தீ’’திபி வத³ந்தி. அப்போ²டேந்தீதி பு⁴ஜஹத்த²ஸங்க⁴ட்டனஸத்³த³ம் பவத்தேந்தி, வாமஹத்த²ம் உரே ட²பேத்வா த³க்கி²ணேன பாணினா தத்த² தாளனேன ஸத்³த³ம் கரோந்தீதி அத்தோ². முக²டி³ண்டி³மந்தி முக²பே⁴ரியா ஏதம் அதி⁴வசனம்.

432. பஸாதா³வஹேனாதி பஸாத³ஜனனகேன. அபி⁴க்கமனம் அபி⁴க்கந்தந்தி ஆஹ ‘‘க³மனேனா’’தி. படிக்கமனம் படிக்கந்தம். நிவத்தனேனாதி நிவத்திமத்தம் த³ஸ்ஸேதி. நிவத்தேத்வா பன க³மனம் க³மனமேவ. அபி⁴முக²ம் லோகிதம் ஆலோகிதந்தி ஆஹ ‘‘புரதோ த³ஸ்ஸனேனா’’தி. இதோ சிதோ ச த³ஸ்ஸனேனாதி அனுதி³ஸாபேக்க²னம் த³ஸ்ஸேதி. யம்தி³ஸாபி⁴முகோ² க³ச்ச²தி திட்ட²தி நிஸீத³தி, தத³பி⁴முக²ம் பேக்க²னம் ஆலோகிதம், தத³னுக³ததி³ஸாலோகனம் ‘‘விலோகித’’ந்தி ஹி வுச்சதி. அஞ்ஞானிபி ஹேட்டா² உபரி பச்ச²தோ பேக்க²னவஸேன ஓலோகிதஉல்லோகிதாபலோகிதானி நாம ஹோந்தி. தானி பன ந ஸமணஸாருப்பானி அப்பஸாதா³வஹானி, தேனேவேத்த² ஆலோகிதவிலோகிதானேவ க³ஹிதானி. தேஸந்தி ஸமாஸே கு³ணீபூ⁴தானிபி பப்³பா³னி பராமஸதி. ‘‘பப்³ப³ஸங்கோசனேனா’’தி ஹி வுத்தத்தா பப்³பா³னி தத்த² கு³ணீபூ⁴தானி ஸங்கோசனஸ்ஸ பதா⁴னத்தா. ஸதிஸம்பஜஞ்ஞேஹீதி ஸாத்த²கதாதி³பரிக்³கா³ஹிகாய ஸதியா ததா²பவத்தஸம்பஜஞ்ஞேன ச ஸமந்ததோ பகாரேஹி, பகட்ட²ம் வா ஸவிஸேஸம் ஜானாதீதி ஸம்பஜானோ, தஸ்ஸ பா⁴வோ ஸம்பஜஞ்ஞம். ததா²பவத்தஞாணஸ்ஸேதம் அதி⁴வசனம். அபி⁴ஸங்க²தத்தாதி ஸம்மா பவத்திதத்தா. ஹேட்டா²கி²த்தசக்கூ²தி க²ந்த⁴ம் அனாமேத்வாவ அதோ⁴கி²த்தசக்கு². க²ந்த⁴ம் நாமேத்வா ஹி ஹேட்டா²வலோகனம் ந ஸமணஸாருப்பம். ‘‘ஓக்கி²த்தசக்கூ²’’தி ச இமினா யுக³மத்தத³ஸ்ஸிதா வுத்தா.

போ³ந்தோ³தி லோலோ மந்த³தா⁴துகோதி அத்தோ². ப⁴குடிம் கத்வாதி ப⁴முகபே⁴த³ம் கத்வா. ஸாக²ல்யேன யுத்தாதி ‘‘தத்த² கதமம் ஸாக²ல்யம்? யா ஸா வாசா நேலா கண்ணஸுகா²’’திஆதி³னா (த⁴. ஸ. 1350) நயேன வுத்தஸாக²ல்யேன ஸமன்னாக³தா, முது³வசனாதி அத்தோ². நேலாதி ஏலம் வுச்சதி தோ³ஸோ, நாஸ்ஸா ஏலந்தி நேலா, நித்³தோ³ஸாதி அத்தோ². கண்ணஸுகா²தி ப்³யஞ்ஜனமது⁴ரதாய கண்ணானம் ஸுகா², ஸூசினா விஜ்ஜ²னம் விய கண்ணஸூலம் ந ஜனேதி. தா³னனிப³த்³தா⁴னீதி நிப³த்³த⁴தா³னானி.

‘‘ஸாரிபுத்தமோக்³க³ல்லானே ஆமந்தேஸீ’’தி வத்வா ‘‘க³ச்ச²த² தும்ஹே ஸாரிபுத்தா’’தி வசனதோ ‘‘ஸாரிபுத்தா’’தி இத³ம் ஏகஸேஸனயேன வுத்தந்தி அயமத்தோ² பாகடோயேவாதி ந வுத்தோ. ‘‘ஸாரிபுத்தா’’தி ஹி இத³ம் ஏகஸேஸனயேன வுத்தம் விரூபேகஸேஸஸ்ஸபி இச்சி²தத்தா, தேனேவேத்த² ப³ஹுவசனனித்³தே³ஸோ கதோதி. ஸத்³த⁴ஸ்ஸ பஸன்னஸ்ஸாதி ரதனத்தயஸ்ஸ ஸத்³தா⁴ய ஸமன்னாக³தஸ்ஸ ததோயேவ ச பஸன்னஸ்ஸ, கம்மப²லஸத்³தா⁴ய வா ஸமன்னாக³தத்தா ஸத்³த⁴ஸ்ஸ ரதனத்தயப்பஸாத³ப³ஹுலதாய பஸன்னஸ்ஸ.

433. ஆபத்திம் ரோபேதப்³பா³தி குலதூ³ஸககம்மேன ஆபன்னாபத்திம் ரோபேதப்³பா³. தஸ்மிம் விஹாரேதி ப³ஹிகா³மே விஹாரம் ஸந்தா⁴ய வுத்தம். அந்தோகா³மே விஹாரோ பன ‘‘தஸ்மிம் கா³மே ந வஸிதப்³ப³’’ந்தி இமினாவ ஸங்க³ஹிதோ கா³மக்³க³ஹணேனேவ க³ஹிதத்தா. ‘‘தஸ்மிம் விஹாரே’’தி வசனதோ தஸ்ஸ கா³மஸ்ஸ ஸாமந்தா அஞ்ஞஸ்மிம் விஹாரே வஸிதும் வட்டதி. ஸாமந்தகா³மே பிண்டா³ய ந சரிதப்³ப³ந்தி தஸ்மிம் விஹாரே வாஸஸ்ஸ படிக்கி²த்தத்தா யதி³ தத்த² வஸதி, தேன ஸாமந்தகா³மேபி பிண்டா³ய ந சரிதப்³ப³ந்தி அதி⁴ப்பாயோ. தஸ்மிம் கா³மே பிண்டா³ய ந சரிதப்³ப³ந்தி யஸ்மிம் கா³மே குலதூ³ஸககம்மம் கதம், தஸ்மிம் கா³மே ந சரிதப்³ப³ம். யஸ்மிஞ்ஹி கா³மே வா நிக³மே வா குலதூ³ஸககம்மம் கதம், யஸ்மிஞ்ச விஹாரே வஸதி, நேவ தஸ்மிம் கா³மே வா நிக³மே வா சரிதும் லப்³ப⁴தி, ந விஹாரே வஸிதும். ஸாமந்தவிஹாரே வஸந்தேன பன ஸாமந்தகா³மே சரிதும் வட்டதி தத்த² வாஸஸ்ஸ அப்படிக்கி²த்தத்தா.

435. அட்டா²ரஸ வத்தானீதி ‘‘ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந ஸாமணேரோ உபட்டா²பேதப்³போ³, ந பி⁴க்கு²னோவாத³கஸம்முதி ஸாதி³தப்³பா³, ஸம்மதேன பி⁴க்கு²னியோ ந ஓவதி³தப்³பா³, யாய ஆபத்தியா ஸங்கே⁴ன பப்³பா³ஜனீயகம்மம் கதம் ஹோதி, ந ஸா ஆபத்தி ஆபஜ்ஜிதப்³பா³ அஞ்ஞா வா தாதி³ஸிகா ததோ வா பாபிட்ட²தரா, கம்மம் ந க³ரஹிதப்³ப³ம், கம்மிகா ந க³ரஹிதப்³பா³, ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³, ந ஸவசனீயம் காதப்³ப³ம், ந அனுவாதோ³ ட²பேதப்³போ³, ந ஓகாஸோ காரேதப்³போ³, ந சோதே³தப்³போ³, ந ஸாரேதப்³போ³, ந பி⁴க்கூ²ஹி ஸம்பயோஜேதப்³ப³’’ந்தி ஏவமாக³தானி அட்டா²ரஸ வத்தானி.

அஸ்ஸஜிபுனப்³ப³ஸுகப்பதா⁴னா அஸ்ஸஜிபுனப்³ப³ஸுகாதி வுத்தா ஸஹசரணஞாயேன. அனுலோமபடிபத³ம் அப்படிபஜ்ஜனதாயாதி யதா²பஞ்ஞத்தஸம்மாவத்தஸங்கா²தம் அனுலோமபடிபத³ம் அப்படிபஜ்ஜனதாய, யேன வத்தேன சிண்ணேன ஸங்கோ⁴ அனுலோமிகோ ஹோதி, தஸ்மிம் அவத்தனதோதி வுத்தம் ஹோதி. ந பன்னலோமா ஹோந்தீதி பதிதலோமா ந ஹோந்தி, அனுகூலவுத்தினோ ந ஹோந்தீதி அத்தோ². நித்த²ரணமக்³க³ம் ந படிபஜ்ஜந்தீதி அனுலோமவத்தஸங்கா²தம் நித்த²ரணூபாயம் ந படிபஜ்ஜந்தி, யேன வத்தேன சிண்ணேன ஸாபத்திகபா⁴வதோ நித்திண்ணா ஹோந்தி, தஸ்மிம் நித்த²ரணகவத்தஸ்மிம் ந வத்தந்தி, ஆபத்திவுட்டா²னத்த²ம் துரிததுரிதா ச²ந்த³ஜாதா ந ஹோந்தீதி வுத்தம் ஹோதி. த³ஸஹி அக்கோஸவத்தூ²ஹீதி ஜாதினாமகோ³த்தகம்மஸிப்பஆபா³த⁴லிங்க³கிலேஸஆபத்திஹீனஸங்கா²தேஹித³ஸஹி அக்கோஸகாரணேஹி. ச²ந்த³கா³மிதா பாபேந்தீதிஆதீ³ஸு ய-காரோ ‘‘ஸயம் அபி⁴ஞ்ஞா’’திஆதீ³ஸு விய லுத்தனித்³தி³ட்டோ²தி ஆஹ ‘‘ச²ந்த³கா³மிதாயபி பாபேந்தீ’’திஆதி³. தேஸந்தி அஸ்ஸஜிபுனப்³ப³ஸுகானம் க³ணபாமோக்கா²னம்.

436-437. நிக³மஸ்ஸ அபாகடத்தா தம் த³ஸ்ஸேதும் ‘‘தத்தா²’’திஆதி³மாஹ. பரஸந்தகம் தே³தி, து³க்கடமேவாதி விஸ்ஸாஸக்³கா³ஹேன பரஸந்தகம் க³ஹேத்வா தே³ந்தம் ஸந்தா⁴ய வுத்தம். தஞ்ச கோ² வத்து²பூஜனத்தா²யாதி மாதாபிதூனம்பி தே³ந்தேன வத்து²பூஜனத்தா²ய ஏவ தா³தப்³ப³ந்தி த³ஸ்ஸேதி. ‘‘மண்ட³னத்தா²ய பன ஸிவலிங்கா³தி³பூஜனத்தா²யாதி ஏத்தகமேவ வுத்தத்தா இமம் விக்கிணித்வா ஜீவிகம்பி கப்பேஸ்ஸந்தீதி மாதுஆதீ³னம் தா³தும் வட்டதீ’’தி வத³ந்தி. கஸ்ஸசிபீதி ஞாதகஸ்ஸ அஞ்ஞாதகஸ்ஸ வா கஸ்ஸசிபி. ஞாதிஸாமணேரேஹேவாதி அனுச்ச²விகத்தா வுத்தம். ஸம்பத்தானம் ஸாமணேரானம் உபட்³ட⁴பா⁴க³ம் தா³தும் வட்டதீதி ஸங்கி⁴கஸ்ஸ லாப⁴ஸ்ஸ உபசாரஸீமக³தானம் ஸாமணேரானம்பி ஸந்தகத்தா தேஸம்பி உபட்³ட⁴பா⁴கோ³ லப்³ப⁴தேவாதி கத்வா வுத்தம். சூளகந்தி உபட்³ட⁴பா⁴க³தோபி உபட்³ட⁴ம். சதுத்த²பா⁴க³ஸ்ஸேதம் அதி⁴வசனம்.

‘‘ஸாமணேரா…பே… ட²பேந்தீ’’தி இத³ம் வஸ்ஸக்³கே³ன அபா⁴ஜியம் ஸந்தா⁴ய வுத்தம். தத்த² தத்தா²தி மக்³கே³ வா சேதியங்க³ணே வா. தா³பேதும் ந லப⁴ந்தீதி ஸாமணேரேஹி தா³பேதும் அனனுச்ச²விகத்தா வுத்தம். ந ஹி தம் புப்ப²தா³னம் நாம ஸியா. யதி³ ஹி ததா² ஆக³தானம் தேஸம் தா³னம் புப்ப²தா³னம் ப⁴வேய்ய, ஸாமணேரேஹிபி தா³தும் ந லப்³பே⁴ய்ய. ஸயமேவாதி ஸாமணேரா ஸயமேவ. யாகு³ப⁴த்தாதீ³னி ஆதா³யாதி இத³ம் பி⁴க்கூ²னம் அத்தா²ய யாகு³ப⁴த்தாதி³ஸம்பாத³னம் ஸந்தா⁴ய வுத்தத்தா ‘‘ந வட்டதீ’’தி அவிஸேஸேன வுத்தம்.

வுத்தனயேனேவாதி மாதாபிதூனம் தாவ ஹரித்வாபி ஹராபேத்வாபி பக்கோஸித்வாபி பக்கோஸாபேத்வாபி தா³தும் வட்டதி, ஸேஸஞாதகானம் பக்கோஸாபேத்வாவ. மாதாபிதூனஞ்ச ஹராபேந்தேன ஞாதிஸாமணேரேஹேவ ஹராபேதப்³ப³ம், இதரே பன யதி³ ஸயமேவ இச்ச²ந்தி, வட்டதீதி இமம் புப்பே² வுத்தனயம் ப²லேபி அதிதி³ஸதி, தஸ்மா ப²லம்பி மாதாபிதூனம் ஹரணஹராபனாதி³னா தா³தும் வட்டதி, ஸேஸஞாதீனம் பக்கோஸாபேத்வாவ. இதா³னி ‘‘யோ ஹரித்வா வா ஹராபேத்வா வா…பே… இஸ்ஸரவதாய த³த³தோ து²ல்லச்சய’’ந்தி இமம் புப்பே² வுத்தனயம் ப²லேபி ஸங்கி²பித்வா த³ஸ்ஸேந்தோ ‘‘குலஸங்க³ஹத்தா²ய பனா’’திஆதி³மாஹ. கீ²ணபரிப்³ப³யானந்தி ஆக³ந்துகே ஸந்தா⁴ய வுத்தம். ப²லபரிச்சே²தே³ன வாதி ‘‘ஏத்தகானி ப²லானி தா³தப்³பா³னீ’’தி ஏவம் ப²லபரிச்சே²தே³ன வா. ருக்க²பரிச்சே²தே³ன வாதி ‘‘இமேஹி ருக்கே²ஹி தா³தப்³பா³னீ’’தி ஏவம் ருக்க²பரிச்சே²தே³ன வா. பரிச்சி²ன்னேஸுபி ருக்கே²ஸு ‘‘இத⁴ ப²லானி ஸுந்த³ரானி, இதோ க³ண்ஹதா²’’தி வத³ந்தேன குலஸங்க³ஹோ கதோ நாம ஹோதீதி ஆஹ ‘‘ஏவம் பன ந வத்தப்³ப³’’ந்தி.

ருக்க²ச்ச²ல்லீதி ருக்க²த்தசோ. தேஸம் தேஸம் கி³ஹீனம் கா³மந்தரதே³ஸந்தராதீ³ஸு ஸாஸனபடிஸாஸனஹரணம் ஜங்க⁴பேஸனிகம். தேனாஹ ‘‘கி³ஹீனம் தூ³தேய்யம் ஸாஸனஹரணகம்ம’’ந்தி. தூ³தஸ்ஸ கம்மம் தூ³தேய்யம். பட²மம் ஸாஸனம் அக்³க³ஹேத்வாபி…பே… பதே³ பதே³ து³க்கடந்தி இத³ம் தஸ்ஸ ஸாஸனம் ஆரோசேஸ்ஸாமீதி இமினா அதி⁴ப்பாயேன க³மனம் ஸந்தா⁴ய வுத்தம், தஸ்ஸ பன ஸாஸனம் படிக்கி²பித்வா ஸயமேவ காருஞ்ஞே டி²தோ க³ந்த்வா அத்தனோ பதிரூபம் ஸாஸனம் ஆரோசேதி, அனாபத்தி. புப்³பே³ வுத்தப்பகாரந்தி ‘‘மம வசனேன ப⁴க³வதோ பாதே³ வந்த³தா²’’திஆதி³னா வுத்தப்பகாரம் ஸிக்கா²பதே³ பட²மம் வுத்தம். பக்கமதாயஸ்மாதி இத³ம் பப்³பா³ஜனீயகம்மவஸேன வுத்தம். புன பக்கமதாயஸ்மாதி இத³ம் பன பப்³பா³ஜனீயகம்மகதஸ்ஸ வத்தவஸேன வுத்தம். பட²மஸங்க⁴பே⁴த³ஸதி³ஸானேவாதி ஏத்த² அங்கே³ஸுபி யதா² தத்த² பரக்கமனம், ஏவம் இத⁴ ச²ந்தா³தீ³ஹி பாபனம் த³ட்ட²ப்³ப³ம். ஸேஸம் தாதி³ஸமேவாதி.

குலதூ³ஸகஸிக்கா²பத³வண்ணனா நிட்டி²தா.

நிக³மனவண்ணனா

442. பட²மம் ஆபத்தி ஆபஜ்ஜனம் ஏதேஸந்தி பட²மாபத்திகா. தத்தகானி அஹானீதி படிச்சா²தி³ததி³வஸதோ பட்டா²ய யாவ ஆரோசிததி³வஸோ, தாவ தி³வஸபக்க²மாஸஸம்வச்ச²ரவஸேன யத்தகோ காலோ அதிக்கந்தோ, தத்தகம் காலந்தி அத்தோ². அகாமேன அவஸேனாதி ஏத்த² அப்படிகம்மகதாய ஆபத்தியா ஸக்³க³மோக்கா²வரணபா⁴வதோ அனிச்ச²ந்தேனபி பரிவஸிதப்³ப³ந்தி அதி⁴ப்பாயோ. அவ்ஹாதப்³போ³தி அப்³பா⁴னகம்மவஸேன பக்கோஸிதப்³போ³. தே ச பி⁴க்கூ² கா³ரய்ஹாதி ஏத்த² யே ஊனபா⁴வம் ஞத்வா அப்³பே⁴ந்தி, தே பி⁴க்கூ² ச க³ரஹிதப்³பா³ ஸாதிஸாரா ஸதோ³ஸா, து³க்கடம் ஆபஜ்ஜந்தீதி அயமத்தோ² பாகடோயேவாதி ந வுத்தோ. ஸாமீசீதி வத்தம்.

இதி ஸமந்தபாஸாதி³காய வினயட்ட²கதா²ய ஸாரத்த²தீ³பனியம்

தேரஸகவண்ணனா நிட்டி²தா.