12. து³ப்³ப³சஸிக்கா²பத³வண்ணனா

424. த்³வாத³ஸமே வம்ப⁴னவசனந்தி க³ரஹவசனம். அபஸாதே³துகாமோதி கி²பிதுகாமோ, தஜ்ஜேதுகாமோ வா, க⁴ட்டேதுகாமோதி வுத்தம் ஹோதி. ஸடஸத்³தோ³ பதிதஸத்³தே³ன ஸமானத்தோ². விஸேஸனஸ்ஸ ச பரனிபாதம் கத்வா திணகட்ட²பண்ணஸடந்தி வுத்தந்தி ஆஹ ‘‘தத்த² தத்த² பதிதம் திணகட்ட²பண்ண’’ந்தி. கேனாபீதி வாதஸதி³ஸேன நதீ³ஸதி³ஸேன ச கேனாபி.

425-426. வத்தும் அஸக்குணேய்யோதி கிஸ்மிஞ்சி வுச்சமானே அஸஹனதோ ஓவதி³தும் அஸக்குணேய்யோ. து³க்க²ம் வசோ ஏதஸ்மிம் விப்படிகூலக்³கா³ஹே விபச்சனீகவாதே³ அனாத³ரே புக்³க³லேதி து³ப்³ப³சோ. தேனாஹ ‘‘து³க்கே²ன கிச்சே²ன வதி³தப்³போ³’’திஆதி³. து³ப்³ப³சபா⁴வகரணீயேஹீதி து³ப்³ப³சபா⁴வகாரகேஹி. கத்துஅத்தே² அனீயஸத்³தோ³ த³ட்ட²ப்³போ³. தேனேவாஹ ‘‘யே த⁴ம்மா து³ப்³ப³சம் புக்³க³லம் கரோந்தீ’’திஆதி³. பாபிகா இச்சா² ஏதஸ்ஸாதி பாபிச்சோ², தஸ்ஸ பா⁴வோ பாபிச்ச²தா, அஸந்தகு³ணஸம்பா⁴வனதா படிக்³க³ஹணே ச அமத்தஞ்ஞுதா பாபிச்ச²தாதி வேதி³தப்³பா³. அத்துக்கம்ஸகா ச தே பரவம்ப⁴கா சாதி அத்துக்கம்ஸகபரவம்ப⁴கா. யே அத்தானம் உக்கம்ஸந்தி உக்கி²பந்தி உச்சே டா²னே ட²பேந்தி, பரஞ்ச வம்பே⁴ந்தி க³ரஹந்தி நீசே டா²னே ட²பேந்தி, தேஸமேதம் அதி⁴வசனம். தேஸம் பா⁴வோ அத்துக்கம்ஸகபரவம்ப⁴கதா. குஜ்ஜ²னஸீலோ கோத⁴னோ, தஸ்ஸ பா⁴வோ கோத⁴னதா. குஜ்ஜ²னலக்க²ணஸ்ஸ கோத⁴ஸ்ஸேதம் அதி⁴வசனம்.

புப்³ப³காலே கோதோ⁴, அபரகாலே உபனாஹோதி ஆஹ ‘‘கோத⁴ஹேது உபனாஹிதா’’தி. தத்த² உபனஹனஸீலோ, உபனாஹோ வா ஏதஸ்ஸ அத்தீ²தி உபனாஹீ, தஸ்ஸ பா⁴வோ உபனாஹிதா. புனப்புனம் சித்தபரியோனத்³த⁴லக்க²ணஸ்ஸ கோத⁴ஸ்ஸேவேதம் அதி⁴வசனம். ஸகிஞ்ஹி உப்பன்னோ கோதோ⁴ கோதோ⁴யேவ, ததுத்தரி உபனாஹோ. அபி⁴ஸங்கோ³தி து³ம்மோசனீயோ ப³லவஉபனாஹோ. ஸோ அஸ்ஸ அத்தீ²தி அபி⁴ஸங்கீ³, தஸ்ஸ பா⁴வோ அபி⁴ஸங்கி³தா. து³ம்மோசனீயஸ்ஸ ப³லவஉபனாஹஸ்ஸேதம் அதி⁴வசனம். சோத³கம் படிப்ப²ரணதாதி சோத³கஸ்ஸ படிவிருத்³தே⁴ன பச்சனீகேன ஹுத்வா அவட்டா²னம். சோத³கம் அபஸாத³னதாதி ‘‘கிம் நு கோ² துய்ஹம் பா³லஸ்ஸ அப்³யத்தஸ்ஸ ப⁴ணிதேன, த்வம்பி நாம ப⁴ணிதப்³ப³ம் மஞ்ஞிஸ்ஸஸீ’’தி ஏவம் சோத³கஸ்ஸ க⁴ட்டனா. சோத³கஸ்ஸ பச்சாரோபனதாதி ‘‘த்வம்பி கோ²ஸி இத்த²ன்னாமம் ஆபத்திம் ஆபன்னோ, தம் தாவ படிகரோஹீ’’தி ஏவம் சோத³கஸ்ஸ உபரி படிஆரோபனதா.

அஞ்ஞேன அஞ்ஞம் படிசரணதாதி அஞ்ஞேன காரணேன, வசனேன வா அஞ்ஞஸ்ஸ காரணஸ்ஸ, வசனஸ்ஸ வா படிச்சா²த³னவஸேன சரணதா. படிச்சா²த³னத்தோ² ஏவ வா சரஸத்³தோ³ அனேகத்த²த்தா தா⁴தூனந்தி படிச்சா²த³னதாதி அத்தோ². தாய ஸமன்னாக³தோ ஹி புக்³க³லோ யம் சோத³கேன தோ³ஸவிபா⁴வனகாரணம், வசனம் வா வுத்தம், தம் ததோ அஞ்ஞேனேவ சோத³னாய அமூலிகபா⁴வதீ³பனேன காரணேன, தத³த்த²போ³த⁴கேன வசனேன வா படிச்சா²தே³தி. ‘‘ஆபத்திம் ஆபன்னோஸீ’’தி வுத்தே ‘‘கோ ஆபன்னோ, கிம் ஆபன்னோ, கிஸ்மிம் ஆபன்னோ, கம் ப⁴ணத², கிம் ப⁴ணதா²’’தி வா வத்வா ‘‘ஏவரூபம் கிஞ்சி தயா தி³ட்ட²’’ந்தி வுத்தே ‘‘ந ஸுணாமீ’’தி ஸோதம் வா உபனாமேத்வா விக்கே²பம் கரோந்தோபி அஞ்ஞேனஞ்ஞம் படிச்சா²தே³தி. ‘‘இத்த²ன்னாமம் ஆபத்திம் ஆபன்னோஸீ’’தி புட்டே² ‘‘பாடலிபுத்தம் க³தோம்ஹீ’’தி வத்வா புன ‘‘ந தவ பாடலிபுத்தக³மனம் புச்சா²ம, ஆபத்திம் புச்சா²மா’’தி வுத்தே ததோ ‘‘ராஜக³ஹம் க³தோம்ஹீ’’தி வத்வா ‘‘ராஜக³ஹம் வா யாஹி ப்³ராஹ்மணக³ஹம் வா, ஆபத்திம் ஆபன்னோஸீ’’தி வுத்தே ‘‘தத்த² மே ஸூகரமம்ஸம் லத்³த⁴’’ந்திஆதீ³னி வத்வா ப³ஹித்³தா⁴ கதா²விக்கி²பனம்பி அத்த²தோ அஞ்ஞேனஞ்ஞம் படிசரணமேவாதி விஸும் ந க³ஹிதம்.

அபதா³னேனாதி அத்தனோ சரியாய. அபதீ³யந்தி ஹி தோ³ஸா ஏதேன த³க்கீ²யந்தி, லுயந்தி சி²ஜ்ஜந்தீதி வா அபதா³னம், ஸத்தானம் ஸம்மா மிச்சா² வா வத்தப்பயோகோ³. ந ஸம்பாயனதாதி ‘‘ஆவுஸோ, த்வம் குஹிம் வஸஸி, கம் நிஸ்ஸாய வஸஸீ’’தி வா ‘‘யம் த்வம் வதே³ஸி ‘மயா ஏஸ ஆபத்திம் ஆபஜ்ஜந்தோ தி³ட்டோ²’தி, த்வம் தஸ்மிம் ஸமயே கிம் கரோஸி, அயம் கிம் கரோதி, கத்த² ச த்வம் அஹோஸி, கத்த² அய’’ந்தி வா ஆதி³னா நயேன சரியம் புட்டே²ன ஸம்பாதே³த்வா அகத²னம்.

மக்கி²பளாஸிதாதி ஏத்த² பரகு³ணமக்க²னலக்க²ணோ மக்கோ², ஸோ ஏதஸ்ஸ அத்தீ²தி மக்கீ². தாதி³ஸோ புக்³க³லோ அகா³ரியோ அனகா³ரியோ வா ஸமானோ பரேஸம் ஸுகதகரணம் வினாஸேதி. அகா³ரியோபி ஹி கேனசி அனுகம்பகேன த³லித்³தோ³ ஸமானோ உச்சட்டா²னே ட²பிதோ, அபரேன ஸமயேன ‘‘கிம் தயா மய்ஹம் கத’’ந்தி தஸ்ஸ ஸுகதகரணம் வினாஸேதி. அனகா³ரியோபி ஸாமணேரகாலதோ பபு⁴தி ஆசரியேன வா உபஜ்ஜா²யேன வா சதூஹி பச்சயேஹி உத்³தே³ஸபரிபுச்சா²தீ³ஹி ச அனுக்³க³ஹேத்வா த⁴ம்மகதா²னயபகரணகோஸல்லாதீ³னி ஸிக்கா²பிதோ, அபரேன ஸமயேன ராஜராஜமஹாமத்தாதீ³ஹி ஸக்கதோ க³ருகதோ ஆசரியுபஜ்ஜா²யேஸு அசித்தீகதோ சரமானோ ‘‘அயம் அம்ஹேஹி த³ஹரகாலே ஏவ அனுக்³க³ஹிதோ ஸம்வத்³தி⁴தோ ச, அத² ச பனிதா³னி நிஸ்ஸினேஹோ ஜாதோ’’தி வுச்சமானோ ‘‘கிம் மய்ஹம் தும்ஹேஹி கத’’ந்தி தேஸம் ஸுகதகரணம் வினாஸேதி.

‘‘ப³ஹுஸ்ஸுதேபி புக்³க³லே அஜ்ஜோ²த்த²ரித்வா ஈதி³ஸஸ்ஸ சேவ ப³ஹுஸ்ஸுதஸ்ஸ அனியதா க³தி, தவ வா மம வா கோ விஸேஸோ’’திஆதி³னா நயேன உப்பஜ்ஜமானோ யுக³க்³கா³ஹலக்க²ணோ பளாஸோ. ஸோ பரகு³ணேஹி அத்தனோ கு³ணானம் ஸமகரணரஸோ. ததா² ஹேஸ பரேஸம் கு³ணே ட³ம்ஸித்வா விய அத்தனோ கு³ணேஹி ஸமே கரோதீதி பளாஸோதி வுச்சதி, ஸோ ஏதஸ்ஸ அத்தீ²தி பளாஸீ. மக்கீ² ச பளாஸீ ச மக்கி²பளாஸினோ, தேஸம் பா⁴வோ மக்கி²பளாஸிதா. அத்த²தோ பன மக்கோ² சேவ பளாஸோ ச.

இஸ்ஸதி பரஸம்பத்திம் ந ஸஹதீதி இஸ்ஸுகீ. மச்ச²ராயதி அத்தனோ ஸம்பத்திம் நிகூ³ஹதி, பரேஸம் ஸாதா⁴ரணபா⁴வம் ந ஸஹதி, மச்சே²ரம் வா ஏதஸ்ஸ அத்தீ²தி மச்ச²ரீ. ஸட²யதி ந ஸம்மா பா⁴ஸதீதி ஸடோ², அத்தனோ அவிஜ்ஜமானகு³ணப்பகாஸனலக்க²ணேன ஸாடே²ய்யேன ஸமன்னாக³தோ கேராடிகபுக்³க³லோ. கேராடிகோ ச ஆனந்த³மச்சோ² விய ஹோதி. ஆனந்த³மச்சோ² நாம கிர மச்சா²னம் நங்கு³ட்ட²ம் த³ஸ்ஸேதி, ஸப்பானம் ஸீஸம் ‘‘தும்ஹேஹி ஸதி³ஸோ அஹ’’ந்தி ஜானாபேதும், ஏவமேவ கேராடிகோ புக்³க³லோ யம் யம் ஸுத்தந்திகம் வா ஆபி⁴த⁴ம்மிகம் வா உபஸங்கமதி, தம் தம் ஏவம் வத³தி ‘‘அஹம் தும்ஹாகம் அந்தேவாஸீ, தும்ஹே மய்ஹம் அனுகம்பகா, நாஹம் தும்ஹே முஞ்சாமீ’’தி ‘‘ஏவமேதே ‘ஸகா³ரவோ அயம் அம்ஹேஸு ஸப்பதிஸ்ஸோ’தி மஞ்ஞிஸ்ஸந்தீ’’தி. ஸாடே²ய்யேன ஹி ஸமன்னாக³தஸ்ஸ புக்³க³லஸ்ஸ அஸந்தகு³ணஸம்பா⁴வனேன சித்தானுரூபகிரியாவிஹரதோ ‘‘ஏவம்சித்தோ ஏவம்கிரியோ’’தி து³விஞ்ஞேய்யத்தா குச்சி²ம் வா பிட்டி²ம் வா ஜானிதும் ந ஸக்கா. யதோ ஸோ –

‘‘வாமேன ஸூகரோ ஹோதி, த³க்கி²ணேன அஜாமிகோ³;

ஸரேன நேலகோ ஹோதி, விஸாணேன ஜரக்³க³வோ’’தி. (தீ³. நி. அட்ட². 2.296; விப⁴. அட்ட². 894; மஹானி. அட்ட². 166) –

ஏவம் வுத்தயக்க²ஸூகரஸதி³ஸோ ஹோதி. கதபாபபடிச்சா²த³னலக்க²ணா மாயா, ஸா அஸ்ஸ அத்தீ²தி மாயாவீ.

த²ம்ப⁴ஸமங்கி³தாய த²த்³தோ⁴. வாதப⁴ரிதப⁴ஸ்தாஸதி³ஸத²த்³த⁴பா⁴வபக்³க³ஹிதஸிரஅனிவாதவுத்திகாரகரோதி த²ம்போ⁴. யேன ஸமன்னாக³தோ புக்³க³லோ கி³லிதனங்க³லஸதி³ஸோ விய அஜக³ரோ, வாதப⁴ரிதப⁴ஸ்தா விய ச த²த்³தோ⁴ ஹுத்வா க³ருட்டா²னியே தி³ஸ்வா ஓனமிதும்பி ந இச்ச²தி, பரியந்தேனேவ சரதி. அப்³பு⁴ன்னதிலக்க²ணோ அதிமானோ, ஸோ ஏதஸ்ஸ அத்தீ²தி அதிமானீ.

ஸம் அத்தனோ தி³ட்டி²ம் பராமஸதி ஸபா⁴வம் அதிக்கமித்வா பரதோ ஆமஸதீதி ஸந்தி³ட்டி²பராமாஸீ. ஆதா⁴னம் க³ண்ஹாதீதி ஆதா⁴னக்³கா³ஹீ. ‘‘ஆதா⁴ன’’ந்தி த³ள்ஹம் வுச்சதி, த³ள்ஹக்³கா³ஹீதி அத்தோ². யுத்தம் காரணம் தி³ஸ்வாவ லத்³தி⁴ம் படினிஸ்ஸஜ்ஜதீதி படினிஸ்ஸக்³கீ³, து³க்கே²ன கிச்சே²ன கஸிரேன ப³ஹும்பி காரணம் த³ஸ்ஸேத்வா ந ஸக்கா படினிஸ்ஸக்³கி³ம் காதுந்தி து³ப்படினிஸ்ஸக்³கீ³, யோ அத்தனோ தி³ட்டி²ம் ‘‘இத³மேவ ஸச்ச’’ந்தி த³ள்ஹம் க³ண்ஹித்வா அபி பு³த்³தா⁴தீ³ஹி காரணம் த³ஸ்ஸேத்வா வுச்சமானோ ந படினிஸ்ஸஜ்ஜதி, தஸ்ஸேதம் அதி⁴வசனம். தாதி³ஸோ ஹி புக்³க³லோ யம் யதே³வ த⁴ம்மம் வா அத⁴ம்மம் வா ஸுணாதி, தம் ஸப்³ப³ம் ‘‘ஏவம் அம்ஹாகம் ஆசரியேஹி கதி²தம், ஏவம் அம்ஹேஹி ஸுத’’ந்தி கும்மோவ அங்கா³னி ஸகே கபாலே அந்தோயேவ ஸமோத³ஹதி. யதா² ஹி கச்ச²போ அத்தனோ பாதா³தி³கே அங்கே³ கேனசி க⁴ட்டிதே ஸப்³பா³னி அங்கா³னி அத்தனோ கபாலேயேவ ஸமோத³ஹதி, ந ப³ஹி நீஹரதி, ஏவமயம்பி ‘‘ந ஸுந்த³ரோ தவ கா³ஹோ, ச²ட்³டே³ஹி ந’’ந்தி வுத்தோ தம் ந விஸ்ஸஜ்ஜேதி, அந்தோயேவ அத்தனோ ஹத³யே ஏவ ட²பேத்வா விசரதி. யதா² கும்பீ⁴லா க³ஹிதம் ந படினிஸ்ஸஜ்ஜந்தி, ஏவம் கும்பீ⁴லக்³கா³ஹம் க³ண்ஹாதி, ந விஸ்ஸஜ்ஜேதி. மக்கி²பளாஸிதாதி³யுக³ளத்தயேன த³ஸ்ஸிதே மக்க²பளாஸாத³யோ ச² த⁴ம்மே விஸும் விஸும் க³ஹேத்வா ‘‘ஏகூனவீஸதி த⁴ம்மா’’தி வுத்தம். அனுமானஸுத்தட்ட²கதா²யம் (ம. நி. அட்ட². 1.181) பன மக்க²பளாஸாத³யோபி யுக³ளவஸேன ஏகம் கத்வா ‘‘ஸோளஸ த⁴ம்மா’’தி வுத்தம்.

பகாரேஹி ஆவஹனம் பத³க்கி²ணம், ததோ பத³க்கி²ணதோ க³ஹணஸீலோ பத³க்கி²ணக்³கா³ஹீ, ந பத³க்கி²ணக்³கா³ஹீ அப்பத³க்கி²ணக்³கா³ஹீ. யோ வுச்சமானோ ‘‘தும்ஹே மம் கஸ்மா வத³த², அஹம் அத்தனோ கப்பியாகப்பியம் ஸாவஜ்ஜானவஜ்ஜம் அத்தா²னத்த²ம் ஜானாமீ’’தி வத³தி, அயம் அனுஸாஸனிம் பத³க்கி²ணதோ ந க³ண்ஹாதி, வாமதோவ க³ண்ஹாதி, தஸ்மா ‘‘அப்பத³க்கி²ணக்³கா³ஹீ’’தி வுச்சதி, தேனாஹ ‘‘யதா²னுஸிட்ட²’’ந்திஆதி³.

உத்³தே³ஸேதி பாதிமோக்கு²த்³தே³ஸே. அத² ஸப்³பா³னேவ ஸிக்கா²பதா³னி கத²ம் பாதிமோக்கு²த்³தே³ஸபரியாபன்னானீதி ஆஹ ‘‘யஸ்ஸ ஸியா ஆபத்தி, ஸோ ஆவிகரேய்யாதி ஏவம் ஸங்க³ஹிதத்தா’’தி. ‘‘யஸ்ஸ ஸியா ஆபத்தீ’’தி ஹி இமினா ஸப்³பா³பி ஆபத்தியோ நிதா³னுத்³தே³ஸே ஸங்க³ஹிதாயேவ ஹோந்தி. பஞ்சஹி ஸஹத⁴ம்மிகேஹி ஸிக்கி²தப்³ப³த்தாதி லப்³ப⁴மானவஸேன வுத்தம். ஸஹத⁴ம்மிகேன ஸஹகாரணேனாதிபி அத்தோ² த³ட்ட²ப்³போ³. ‘‘வசனாயா’’தி நிஸ்ஸக்கே ஸம்பதா³னவசனந்தி ஆஹ ‘‘ததோ மம வசனதோ’’தி. அங்கா³னி சேத்த² பட²மஸங்க⁴பே⁴த³ஸதி³ஸானி. அயம் பன விஸேஸோ – யதா² தத்த² பே⁴தா³ய பரக்கமனம், ஏவம் இத⁴ அவசனீயகரணதா த³ட்ட²ப்³பா³.

து³ப்³ப³சஸிக்கா²பத³வண்ணனா நிட்டி²தா.