ஏகுத்தரிகனயம்

ஏககவாரவண்ணனா

321. ஏகுத்தரிகனயே பன அஜானந்தேன வீதிக்கந்தாதி பண்ணத்திம் வா வத்து²ம் வா அஜானந்தேன வீதிக்கந்தா பத²வீக²ணனஸஹஸேய்யாதி³கா, ஸாபி பச்சா² ஆபன்னபா⁴வம் ஞத்வா படிகம்மம் அகரோந்தஸ்ஸ அந்தராயிகாவ ஹோதி.

பாரிவாஸிகாதீ³ஹி பச்சா² ஆபன்னாதி வத்தபே⁴தே³ஸு து³க்கடானி ஸந்தா⁴ய வுத்தம். தஸ்மிம் க²ணே ஆபஜ்ஜிதப்³ப³அந்தராபத்தியோ ஸந்தா⁴யாதி கேசி வத³ந்தி, தஸ்ஸ புப்³பா³பத்தீனம்அந்தராபத்தி-பதே³னேவ வக்க²மானத்தா புரிமமேவ யுத்ததரம். மூலவிஸுத்³தி⁴யா அந்தராபத்தீதி மூலாயபடிகஸ்ஸனாதீ³னி அகத்வா ஸப்³ப³பட²மம் தி³ன்னபரிவாஸமானத்தவிஸுத்³தி⁴யா சரணகாலே ஆபன்னஅந்தராபத்திஸங்கா²தஸங்கா⁴தி³ஸேஸோ. அக்³க⁴விஸுத்³தி⁴யாதி அந்தராபத்திம் ஆபன்னஸ்ஸ மூலாய படிகஸ்ஸித்வா ஓதா⁴னஸமோதா⁴னவஸேன ஓது⁴னித்வா புரிமாபத்தியா ஸமோதா⁴ய தத³க்³க⁴வஸேன புன தி³ன்னபரிவாஸாதி³ஸுத்³தி⁴யா சரணகாலே புன ஆபன்னா அந்தராபத்தி.

ஸஉஸ்ஸாஹேனேவாதி புனபி தம் ஆபத்திம் ஆபஜ்ஜிதுகாமதாசித்தேன, ஏவம் தே³ஸிதாபி ஆபத்தி ந வுட்டா²தீதி அதி⁴ப்பாயோ. து⁴ரனிக்கே²பம் அகத்வா ஆபஜ்ஜனே ஸிகா²ப்பத்ததோ³ஸம் த³ஸ்ஸேந்தோ ஆஹ ‘‘அட்ட²மே வத்து²ஸ்மிம் பி⁴க்கு²னியா பாராஜிகமேவா’’தி. ந கேவலஞ்ச பி⁴க்கு²னியா ஏவ, பி⁴க்கூ²னம்பி து⁴ரனிக்கே²பம் அகத்வா தோ²கம் தோ²கம் ஸப்பிஆதி³கம் தே²ய்யாய க³ண்ஹந்தானம் பாத³க்³க⁴னகே புண்ணே பாராஜிகமேவ. கேசி பன ‘‘அட்ட²மே வத்து²ஸ்மிம் பி⁴க்கு²னியா பாராஜிகமேவ ஹோதீதி வுத்தத்தா அட்ட²வத்து²கமேவேதம் ஸந்தா⁴ய வுத்த’’ந்தி வத³ந்தி.

த⁴ம்மிகஸ்ஸ படிஸ்ஸவஸ்ஸாதி ‘‘இத⁴ வஸ்ஸம் வஸிஸ்ஸாமீ’’திஆதி³னா கி³ஹீனம் ஸம்முகா² கதஸ்ஸ த⁴ம்மிகஸ்ஸ படிஸ்ஸவஸ்ஸ, அத⁴ம்மிகஸ்ஸ பன ‘‘அஸுகம் பஹரிஸ்ஸாமீ’’திஆதி³கஸ்ஸ படிஸ்ஸவஸ்ஸ அஸச்சாபனேன ஆபத்தி நத்தி².

ததா² சோதி³தோதி அத⁴ம்மேன சோதி³தோ, ஸயம் ஸச்சே, அகுப்பே ச அட்ட²த்வா படிச்சா²தே³ந்தோபி அத⁴ம்மசுதி³தகோ ஏவ. பஞ்சானந்தரியனியதமிச்சா²தி³ட்டி²யேவ மிச்ச²த்தனியதா நாம. சத்தாரோ மக்³கா³ ஸம்மத்தனியதா நாம.

ஏககவாரவண்ணனா நிட்டி²தா.

து³கவாரவண்ணனா

322. து³கேஸு ஸயமேவ ஸபுக்³க³லோதி ஆஹ ‘‘முது³பிட்டி²கஸ்ஸா’’திஆதி³. ஆதி³-ஸத்³தே³ன அங்க³ஜாதச்சே²த³அத்தகா⁴தாதி³ஆபத்தியோ ஸங்க³ஹிதா.

ப⁴ண்டா³கா³ரிகசித்தகம்மானி வாதி க³ஹட்டா²னம் ப⁴ண்ட³படிஸாமனம், இத்தி²புரிஸாதி³படிபா⁴னசித்தகம்மானி வா. ‘‘சீவராதீ³னி அதே³ந்தோ ஆபஜ்ஜதீ’’தி இத³ம் ‘‘உபஜ்ஜா²யேன, பி⁴க்க²வே, ஸத்³தி⁴விஹாரிகோ ஸங்க³ஹேதப்³போ³ அனுக்³க³ஹேதப்³போ³…பே… பத்தோ தா³தப்³போ³’’திஆதி³ (மஹாவ. 67) வசனதோ அனாத³ரியேன ஆமிஸஸங்க³ஹம் அகரோந்தஸ்ஸ து³க்கடம், பி⁴க்கு²னியா பாசித்தியஞ்ச ஸந்தா⁴ய வுத்தம். நிஸ்ஸட்ட²சீவராதீ³னம் அதா³னஆபத்திபி ஏத்தே²வ ஸங்க³ஹிதா.

பாளியம் தே³ஸேந்தோதி ஸபா⁴கா³பத்திம், அதே³ஸனாகா³மினிஆதி³ஞ்ச தே³ஸேந்தோ. நிதா³னுத்³தே³ஸே ஆபத்திம் அனாவிகரோந்தோ, ந தே³ஸேந்தோ ச ஆபஜ்ஜதி நாம. ஓவாத³ம் அக³ண்ஹந்தோதி பி⁴க்கூ²ஹி பி⁴க்கு²னிஓவாத³த்தா²ய வுத்தம் வசனம் அக³ண்ஹந்தோ பா³லகி³லானக³மியவிவஜ்ஜிதோ. அத்தனோ பரிபோ⁴க³த்த²ம் தி³ன்னம் அஞ்ஞஸ்ஸ தா³னே, ஸங்கா⁴டிம் அபாருபித்வா ஸந்தருத்தரேன கா³மப்பவேஸனாதீ³ஸு ச ஆபத்தியோபி அபரிபோ⁴கே³ன ஆபஜ்ஜிதப்³பா³பத்தியோவ. பமாணந்தி ஸங்க⁴பே⁴தா³னந்தரியனிப்ப²த்தியா லக்க²ணம். பா³லஸ்ஸாதி நிஸ்ஸயக்³க³ஹணவிதி⁴ம் அஜானந்தஸ்ஸ லஜ்ஜிபா³லஸ்ஸேவ. லஜ்ஜிஸ்ஸாதி ப்³யத்தஸ்ஸ நிஸ்ஸயதா³யகஸபா⁴க³தம் பரிவீமம்ஸந்தஸ்ஸ. வினயே ஆக³தா அத்தா² வேனயிகாதி ஆஹ ‘‘த்³வே அத்தா² வினயஸித்³தா⁴’’தி.

பாளியம் அப்பத்தோ நிஸ்ஸாரணந்தி ஏத்த² பப்³பா³ஜனீயகம்மம் விஹாரதோ நிஸ்ஸாரணத்தா நிஸ்ஸாரணந்தி அதி⁴ப்பேதம், தஞ்ச யஸ்மா குலதூ³ஸகம் அகரோந்தோ புக்³க³லோ ஆபத்திப³ஹுலோபி ஆவேணிகலக்க²ணேன அப்பத்தோ நாம ஹோதி, தஸ்மா அப்பத்தோ நிஸ்ஸாரணம். யஸ்மா பன ஆபத்தாதி³ப³ஹுலஸ்ஸாபி ‘‘ஆகங்க²மானோ ஸங்கோ⁴ பப்³பா³ஜனீயகம்மம் கரேய்யா’’தி (சூளவ. 27) வுத்தம், தஸ்மா ஸுனிஸ்ஸாரிதோ, ஸப்³ப³தா² பன ஸுத்³தோ⁴ நிராபத்திகோ து³ன்னிஸ்ஸாரிதோதி த³ட்ட²ப்³போ³.

அப்பத்தோ ஓஸாரணந்திஆதீ³ஸு உபஸம்பதா³கம்மம் ஏத்த² ஓஸாரணம் அதி⁴ப்பேதம், தஞ்ச ஹத்த²ச்சி²ன்னாதி³கோ ஏகச்சோ படிக்கி²த்தத்தா அப்பத்தோபி ஸோஸாரிதோ, பண்ட³காதி³கோ தோ³ஸாரிதோதி அத்தோ².

து³கவாரவண்ணனா நிட்டி²தா.

திகவாரவண்ணனா

323. திகேஸு லோஹிதுப்பாதா³பத்திந்தி பாராஜிகாபத்திம். ஆவுஸோவாதே³னாதி ‘‘ஆவுஸோ’’தி ஆலபனேன. ஆபத்திந்தி து³க்கடாபத்திம். ஸேஸா ரத்திஞ்சேவ தி³வா சாதி ஏத்த² அருணுக்³க³மனே ஆபஜ்ஜிதப்³பா³ பட²மகதி²னாதீ³ (பாரா. 459) ஸப்³பா³ ஆபத்தியோபி ரத்திந்தி³வானம் வேமஜ்ஜே²யேவ ஆபஜ்ஜிதப்³ப³த்தா ததியகோட்டா²ஸஞ்ஞேவ பவிட்டா²தி த³ட்ட²ப்³பா³. அத² வா உத்³த⁴ஸ்தே அருணே ஆபஜ்ஜிதப்³ப³த்தா தி³வா ஆபஜ்ஜிதப்³பே³ஸு ஏவ பவிட்டா²தி த³ட்ட²ப்³பா³, அத்த²ங்க³தே ஸூரியே பி⁴க்கு²னியோ ஓவாத³னாபத்தியோ, பன ரத்தந்த⁴காரே புரிஸேன ஸத்³தி⁴ம் ஸந்திட்ட²னாபத்தி ச ரத்தியஞ்ஞேவ ஆபஜ்ஜிதப்³பா³.

புரேப⁴த்தம் குலானி உபஸங்கமனஅனதிரித்தபோ⁴ஜனாதீ³னி தி³வா ஏவ ஆபஜ்ஜிதப்³பா³னி. கேசி பன ‘‘போ⁴ஜனபடிஸம்யுத்தானி ஸேகி²யானி, க³ணபோ⁴ஜனாதீ³னி ச தி³வா ஏவ ஆபஜ்ஜிதப்³பா³னீ’’தி வத³ந்தி. தஸ்மா ஈதி³ஸா ஆபத்தியோ முஞ்சித்வா ஸேஸாவ ததியகோட்டா²ஸம் ப⁴ஜந்தீதி வேதி³தப்³ப³ம்.

ந ஊனத³ஸவஸ்ஸோதி த³ஸவஸ்ஸஸ்ஸ பா³லஸ்ஸேவ பஞ்ஞத்தஸிக்கா²பத³த்தா வுத்தம். ஸத்³தி⁴விஹாரிகஅந்தேவாஸிகேஸு அஸம்மாவத்தனாபத்திம், அலஜ்ஜீனம் நிஸ்ஸயதா³னாதி³ம்பி த³ஸவஸ்ஸோவ ஆபஜ்ஜதி, வுட்டா²பினிம் த்³வே வஸ்ஸானி அனனுப³ந்தா⁴தி³ம்பி ஊனத³ஸவஸ்ஸா ஆபஜ்ஜந்தி. அப்³யாகதசித்தோதி ஸுபந்தஸ்ஸ ப⁴வங்க³சித்தம் ஸந்தா⁴ய வுத்தம்.

அப்பவாரேந்தோதி அனாத³ரியேன அப்பவாரேந்தோ கேனசி பச்சயேன அப்பவாரேத்வா காளபக்க²சாதுத்³த³ஸே ஸங்கே⁴ பவாரேந்தே தத்த² அனாத³ரியேன அப்பவாரேந்தோ தமேவ ஆபத்திம் காளேபி ஆபஜ்ஜதீதி ஜுண்ஹே ஏவாதி நியமோ ந தி³ஸ்ஸதி, பச்சி²மவஸ்ஸம்வுத்தோ² பன பச்சி²மகத்திகபுண்ணமியமேவ பவாரேதும் லப்³ப⁴தீதி தத்த² அப்பவாரணாபச்சயா ஆபத்திம் ஆபஜ்ஜமானோ ஏவ ஜுண்ஹே ஆபஜ்ஜதீதி நியமேதப்³போ³தி த³ட்ட²ப்³ப³ம். ஜுண்ஹே கப்பதீதி ஏத்தா²பி ஏஸேவ நயோ.

‘‘அபச்சுத்³த⁴ரித்வா ஹேமந்தே ஆபஜ்ஜதீ’’தி இமினா ‘‘வஸ்ஸானம் சாதுமாஸம் அதி⁴ட்டா²து’’ந்தி நியமவசனேனேவ அபச்சுத்³த⁴ரந்தஸ்ஸ து³க்கடந்தி த³ஸ்ஸேதி. வஸ்ஸானுபக³மனஅகரணீயேன பக்கமாத³யோபி வஸ்ஸே ஏவ ஆபஜ்ஜதி. வத்தி²கம்மாதி³ம்பி கி³லானோ ஏவ. அதோ⁴தபாதே³ஹி அக்கமனாதீ³னிபி அந்தோ ஏவ ஆபஜ்ஜதி. பி⁴க்கு²னியா அனாபுச்சா² ஆராமப்பவேஸனாதி³ ச அந்தோஸீமாயமேவ. நிஸ்ஸயபடிபன்னஸ்ஸ அனாபுச்சா²தி³ஸாபக்கமனாதி³ ச ப³ஹிஸீமாயமேவ. பாதிமோக்கு²த்³தே³ஸே ஸந்தியா ஆபத்தியா அனாவிகரணாபத்திஸமனுபா⁴ஸனஊனவீஸதிவஸ்ஸூபஸம்பாத³னாதி³ஸப்³ப³அத⁴ம்மகம்மாபத்தியோபி ஸங்கே⁴ ஏவ. அத⁴ம்மேன க³ணுபோஸதா²தீ³ஸுபி க³ணாதி³மஜ்ஜே² ஏவ. அலஜ்ஜிஸ்ஸ ஸந்திகே நிஸ்ஸயக்³க³ஹணாதி³பி புக்³க³லஸ்ஸ ஸந்திகே ஏவ ஆபஜ்ஜதி.

தீணி அத⁴ம்மிகானி அமூள்ஹவினயஸ்ஸ தா³னானீதி யோ உம்மத்தகோபி வீதிக்கமகாலே, அனும்மத்தோ ஸஞ்சிச்சேவ ஆபத்திம் ஆபஜ்ஜித்வா பி⁴க்கூ²ஹி பச்சா² சோதி³தோ ஸரமானோ ஏவ ‘‘ந ஸராமீ’’தி வத³தி, யோ ச ‘‘ஸுபினம் விய ஸராமீ’’தி வா முஸா வத³தி, யோ ச உம்மத்தககாலே கதம் ஸப்³ப³ம்பி ஸப்³பே³ஸம் வட்டதீதி வத³தி, இமேஸம் திண்ணம் தி³ன்னானி தீணி அமூள்ஹவினயஸ்ஸ தா³னானி அத⁴ம்மிகானி.

அபகதத்தோதி வினயே அபகதஞ்ஞூ. தேனாஹ ‘‘ஆபத்தானாபத்திம் ந ஜானாதீ’’தி (பரி. 325). ‘‘தி³ட்டி²ஞ்ச அனிஸ்ஸஜ்ஜந்தானம்யேவ கம்மம் காதப்³ப³’’ந்தி இத³ம் பி⁴க்கூ²ஹி ஓவதி³யமானஸ்ஸ தி³ட்டி²யா அனிஸ்ஸஜ்ஜனபச்சயா து³க்கடம், பாசித்தியம்பி வா அவஸ்ஸமேவ ஸம்ப⁴வதீதி வுத்தம்.

முகா²லம்ப³ரகரணாதி³பே⁴தோ³தி முக²பே⁴ரீவாத³னாதி³ப்பபே⁴தோ³. உபகா⁴தேதீதி வினாஸேதி. பீ³ஜனிக்³கா³ஹாதி³கேதி சித்தம் பீ³ஜனிம் கா³ஹேத்வா அனுமோத³னாதி³கரணேதி அத்தோ².

திகவாரவண்ணனா நிட்டி²தா.

சதுக்கவாரவண்ணனா

324. சதுக்கேஸு ஸோதி கி³ஹிபரிக்கா²ரோ. அவாபுரணம் தா³துந்தி க³ப்³ப⁴ம் விவரித்வா அந்தோ பரிக்கா²ரட்ட²பனத்தா²ய விவரணகுஞ்சிகம் தா³தும். ஸங்க⁴த்தா²ய உபனீதம் ஸயமேவ அந்தோ படிஸாமிதும்பி வட்டதி. தேனாஹ ‘‘அந்தோ ட²பாபேதுஞ்ச வட்டதீ’’தி.

ஆதி³கம்மிகேஸு பட²மம் புரிஸலிங்க³ம் உப்பஜ்ஜதீதி ஆஹ ‘‘பட²மம் உப்பன்னவஸேனா’’தி. பாளியம் அனாபத்தி வஸ்ஸச்சே²த³ஸ்ஸாதி வஸ்ஸச்சே²த³ஸம்ப³ந்தி⁴னியா அனாபத்தியா ஏவமத்தோ². மந்தபா⁴ஸாதி மந்தாய பஞ்ஞாய கத²னம். ‘‘நவமபி⁴க்கு²னிதோ பட்டா²யா’’தி இத³ம் ‘‘அனுஜானாமி, பி⁴க்க²வே, அட்ட²ன்னம் பி⁴க்கு²னீனம் யதா²வுட்³ட⁴ம் அவஸேஸானம் யதா²கதிக’’ந்தி (சூளவ. 426) வசனதோ ஆதி³தோ அட்ட²ன்னம் பி⁴க்கு²னீனம் பச்சுட்டா²தப்³ப³த்தா வுத்தம்.

‘‘இத⁴ ந கப்பந்தீதி வத³ந்தோபி பச்சந்திமேஸு ஆபஜ்ஜதீ’’திஆதி³னா ஸஞ்சிச்ச கப்பியம் அகப்பியந்தி வா அகப்பியம் கப்பியந்தி வா கதே²ந்தஸ்ஸ ஸப்³ப³த்த² து³க்கடந்தி த³ஸ்ஸேதி.

புப்³ப³கரணந்தி வுச்சதீதி அட்ட²கதா²ஸு வுத்தம், தானி இத⁴ பரிவாரே உத்³த⁴டானீதி அதி⁴ப்பாயோ. இதா⁴தி⁴ப்பேதானி பன த³ஸ்ஸேந்தோ ‘‘ச²ந்த³பாரிஸுத்³தீ⁴’’திஆதி³மாஹ.

சதுக்கவாரவண்ணனா நிட்டி²தா.

பஞ்சகவாரவண்ணனா

325. பஞ்சகேஸு ஆபுச்சி²த்வா சாரஸ்ஸ அபா⁴வோதி பிண்ட³பாதிகஸ்ஸ ‘‘நிமந்திதோ ஸப⁴த்தோ’’தி இமஸ்ஸ அங்க³ஸ்ஸ அபா⁴வா தேன ஸிக்கா²பதே³ன தஸ்ஸ ஸப்³ப³தா² அனாபத்தீதி அதி⁴ப்பாயோ. ஸுஸானம் நேத்வா புன ஆனீதகந்தி ஸுஸானே பேதகிச்சம் கத்வா நிக்க²ந்தேஹி ந்ஹத்வா ச²ட்³டி³தானி நிவத்த²பாருதவத்தா²னி ஏவம் வுச்சந்தி.

பாளியம் பஞ்சஹாகாரேஹீதி பஞ்சஹி அவஹாரங்கே³ஹி. வத்து²தோ பன க³ருகலஹுகபே⁴தே³ன பாராஜிகது²ல்லச்சயது³க்கடானி வுத்தானி. இத்தி²புரிஸஸம்யோகா³தி³கம் கிலேஸஸமுதா³சாரஹேதுகம் படிபா⁴னசித்தகம்மம் நாம. பஞ்ஹாஸஹஸ்ஸம் புச்சீ²தி ஸமத²விபஸ்ஸனாகம்மட்டா²னேஸு பஞ்ஹாஸஹஸ்ஸம் ஸம்மஜ்ஜித்வா டி²தம் த³ஹரம் புச்சி². இதரோபி த³ஹரோ அத்தனோ க³தமக்³க³த்தா ஸப்³ப³ம் விஸ்ஸஜ்ஜேஸி, தேன தே²ரோ பஸீதி³. வத்தம் பரிச்சி²ந்தீ³தி வத்தம் நிட்டா²பேஸி. கிம் த்வம் ஆவுஸோதிஆதி³கம் தே²ரோ கீ²ணாஸவோ ஸம்மஜ்ஜனானிஸம்ஸம் ஸப்³பே³ஸம் பாகடம் காதும் அவோசாதி த³ட்ட²ப்³ப³ம்.

‘‘ஜண்ணுகேஹி பதிட்டா²ய பத³சேதிய’’ந்தி பாட²ஸேஸோ. சோத³னம் காரேஸ்ஸாமீதி ப⁴க³வதா அத்தானம் சோதா³பேஸ்ஸாமி, அத்தானம் நிக்³க³ண்ஹாபேஸ்ஸாமீதி அத்தோ².

ஏத்தகம் க³ய்ஹூபக³ந்தி ஏத்தகம் அதி⁴கரணவூபஸமத்தா²ய க³ஹேதப்³ப³வசனந்தி யதா² ஸுத்வா விஞ்ஞாதும் ஸக்கோதி, ஏவம் அனுக்³க³ண்ஹந்தோதி யோஜனா. ஏத்த² ச ‘‘அத்தனோ பா⁴ஸபரியந்தம் அனுக்³க³ஹேத்வா பரஸ்ஸ பா⁴ஸபரியந்தம் அனுக்³க³ஹேத்வா’’தி ஏகம், ‘‘அத⁴ம்மேன கரோதீ’’தி ஏகம், ‘‘அப்படிஞ்ஞாயா’’தி ஏகஞ்ச கத்வா புரிமேஹி த்³வீஹி பஞ்சங்கா³னி வேதி³தப்³பா³னி. வத்து²ந்தி மேது²னாதி³வீதிக்கமம். கதா²னுஸந்தி⁴வினிச்ச²யானுலோமஸந்தி⁴வஸேன வத்து²ம் ந ஜானாதீதி சோத³கேன வா சுதி³தகேன வா வுத்தகதா²னுஸந்தி⁴னா தேஸம் வசனபடிவசனானுரூபேன வத³ந்தோ கதா²னுஸந்தி⁴னா வத்து²ம் ந ஜானாதி நாம, தஞ்ச ஸுத்தவிப⁴ங்கே³ வினீதவத்து²ஸங்கா²தேன வினிச்ச²யானுலோமேனேவ வத³ந்தோ வினிச்ச²யானுலோமஸந்தி⁴வஸேன வத்து²ம் ந ஜானாதி நாம. ஞத்திகம்மம் நாம ஹோதீதி ஞத்திகம்மம் நிட்டி²தம் நாம ஹோதீதி ந ஜானாதீதி ஸம்ப³ந்தோ⁴. ஞத்தியா கம்மப்பத்தோதி ஞத்தியா நிட்டி²தாயபி கம்மப்பத்தோ ஏவ ஹோதி. அனுஸ்ஸாவனட்டா²னே ஏவ கம்மம் நிட்டி²தம் ஹோதீதி ஞத்திகம்மம் நிட்டி²தம் நாம ஹோதி, தம் ஞத்தியா காரணம் ந ஜானாதீதி அத்தோ².

பாளியம் பஞ்ச விஸுத்³தி⁴யோதி ஆபத்திதோ விஸுத்³தி⁴ஹேதுத்தா, விஸுத்³தே⁴ஹி கத்தப்³ப³தோ ச பாதிமோக்கு²த்³தே³ஸா வுத்தா.

பஞ்சகவாரவண்ணனா நிட்டி²தா.

ச²க்கவாராதி³வண்ணனா

326. ச²க்காதீ³ஸு பாளியம் ச² அகா³ரவாதி பு³த்³த⁴த⁴ம்மஸங்க⁴ஸிக்கா²ஸு, அப்பமாதே³, படிஸந்தா²ரே ச ச² அகா³ரவா, தேஸு ஏவ ச ச² கா³ரவா வேதி³தப்³பா³. ‘‘ச²ப்³ப³ஸ்ஸபரமதா தா⁴ரேதப்³ப³’’ந்தி இத³ம் விப⁴ங்கே³ ஆக³தஸ்ஸ பரமஸ்ஸ த³ஸ்ஸனம்.

328. பாளியம் ஆக³தேஹி ஸத்தஹீதி ‘‘புப்³பே³வஸ்ஸ ஹோதி முஸா ப⁴ணிஸ்ஸ’’ந்திஆதி³னா முஸாவாத³ஸிக்கா²பதே³ (பாசி. 4) ஆக³தேஹி ஸத்தஹி.

329. தம் குதேத்த² லப்³பா⁴தி தம் அனத்த²ஸ்ஸ அசரணம் ஏத்த² ஏதஸ்மிம் புக்³க³லே, லோகஸன்னிவாஸே வா குதோ கேன காரணேன ஸக்கா லத்³து⁴ந்தி ஆகா⁴தம் படிவினேதி.

330. ஸஸ்ஸதோ லோகோதிஆதி³னா வஸேனாதி ‘‘ஸஸ்ஸதோ லோகோ, அஸஸ்ஸதோ லோகோ. அந்தவா லோகோ, அனந்தவா லோகோ. தம் ஜீவம் தம் ஸரீரந்தி வா, அஞ்ஞம் ஜீவம் அஞ்ஞம் ஸரீரந்தி வா. ஹோதி ததா²க³தோ பரம்மரணா, ந ஹோதி ததா²க³தோ பரம்மரணா. ஹோதி ச ந ஹோதி ச ததா²க³தோ பரம்மரணா, நேவ ஹோதி ந ந ஹோதி ததா²க³தோ பரம்மரணா’’தி (ம. நி. 1.269) ஏவம் ஆக³தா த³ஸ அந்தக்³கா³ஹிகா தி³ட்டி²யோ ஸந்தா⁴ய வுத்தம். மிச்சா²தி³ட்டி²ஆத³யோதி மிச்சா²தி³ட்டி²மிச்சா²ஸங்கப்பாத³யோ அட்ட²மிச்சா²ஞாணமிச்சா²விமுத்தீஹி ஸத்³தி⁴ம் த³ஸ மிச்ச²த்தா. தத்த² மிச்சா²ஞாணந்தி மிச்சா²தி³ட்டி²ஸம்பயுத்தோ மோஹோ. அவிமுத்தஸ்ஸேவ விமுத்தஸஞ்ஞிதா மிச்சா²விமுத்தி நாம.

விபரீதாதி ஸம்மாதி³ட்டி²ஆத³யோ ஸம்மாஞாணஸம்மாவிமுத்திபரியோஸானா த³ஸ. தத்த² ஸம்மாவிமுத்தி அரஹத்தப²லம், தம்ஸம்பயுத்தம் பன ஞாணம் வா பச்சவேக்க²ணஞாணம் வா ஸம்மாஞாணந்தி வேதி³தப்³ப³ம்.

ஏகுத்தரிகனயோ நிட்டி²தோ.