அபரது³தியகா³தா²ஸங்க³ணிகம்

காயிகாதி³ஆபத்திவண்ணனா

474. ‘‘கதி ஆபத்தியோ’’திஆதி³னா உபாலித்தே²ரேன வினயஸ்ஸ பாடவத்த²ம் ஸயமேவ புச்சி²த்வா விஸ்ஸஜ்ஜனம் கதம். பி⁴க்கு²னீனம்யேவ…பே… அட்ட²வத்து²கா நாமாதி பி⁴க்கு²னீனம் பஞ்ஞத்தா ஏகா ஏவ ஆபத்தி அட்ட²வத்து²கா நாமாதி அத்தோ².

475. கம்மஞ்ச கம்மபாத³கா சாதி ஏத்த² யஸ்மா ஞத்திகம்மேஸு ஞத்தி ஸயமேவ கம்மம் ஹோதி, ஞத்திது³தியஞத்திசதுத்தே²ஸு கம்மேஸு அனுஸ்ஸாவனஸங்கா²தஸ்ஸ கம்மஸ்ஸ ஞத்திபாத³கபா⁴வேன திட்ட²தி, தஸ்மா இமானி த்³வே ‘‘ஞத்திகிச்சானீ’’தி வுத்தானி.

பாசித்தியேன ஸத்³தி⁴ம் து³க்கடா கதாதி த³ஸஸுபி ஸிக்கா²பதே³ஸு ஏகதோஉபஸம்பன்னாய வஸேன வுத்தது³க்கடம் ஸந்தா⁴ய வுத்தம். பட²மஸிக்கா²பத³ம்ஹீதி பி⁴க்கு²னோவாத³வக்³க³ஸ்ஸ பட²மஸிக்கா²பத³விப⁴ங்கே³ (பாசி. 144 ஆத³யோ). அத⁴ம்மகம்மேதி பி⁴க்கு²னோவாத³கஸம்முதிகம்மே அத⁴ம்மகம்மே ஜாதே ஆபஜ்ஜிதப்³பா³ த்³வே ஆபத்தினவகா, த⁴ம்மகம்மே த்³வே ஆபத்தினவகாதி சத்தாரோ நவகா வுத்தா. ஆமகத⁴ஞ்ஞம் விஞ்ஞாபேத்வா பு⁴ஞ்ஜந்தியா விஞ்ஞாபனாதி³புப்³ப³பயோகே³ து³க்கடம், அஜ்ஜோ²ஹாரே பாசித்தியம். பாசித்தியேன ஸத்³தி⁴ம் து³க்கடா கதாயேவாதி வுத்தம்.

விஜஹந்தீ திட்ட²தீதிஆதீ³ஸு யதா³ பி⁴க்கு²னியா ஏகேன பாதே³ன ஹத்த²பாஸம் விஜஹித்வா ட²த்வா கிஞ்சி கம்மம் கத்வா ததோ அபரேன பாதே³ன விஜஹித்வா டா²துகாமதா உப்பஜ்ஜதி, ததா³ ஸா யதா²க்கமம் ‘‘விஜஹந்தீ திட்ட²தி, விஜஹித்வா திட்ட²தீ’’தி இமம் வோஹாரம் லப⁴தி. அஞ்ஞதா² ஹிஸ்ஸா கா³மூபசாரமோக்கந்தியா விஸேஸோ ந ஸியா ஹத்த²பாஸவிஜஹனஸ்ஸாபி க³மனத்தா. நிஸீத³தி வா நிபஜ்ஜதி வாதி ஏத்தா²பி யதா²வுத்தாதி⁴ப்பாயேன அத்³தா⁴ஸனேன ஹத்த²பாஸம் விஜஹந்தீ நிஸீத³தி, ஸகலேன வா ஆஸனேன விஜஹித்வா நிஸீத³தி, அத்³த⁴ஸரீரேன விஜஹந்தீ நிபஜ்ஜதி, ஸகலேன ஸரீரேன விஜஹித்வா நிபஜ்ஜதீதி யோஜேதப்³ப³ம்.

காயிகாதி³ஆபத்திவண்ணனா நிட்டி²தா.

பாசித்தியவண்ணனா

476. ஸப்³பா³னி நானாவத்து²கானீதி ஸப்பினவனீதாதீ³னம் பஞ்சன்னம் வத்தூ²னம் பே⁴தே³ன பாசித்தியானி பஞ்ச நானாவத்து²கானி. ஏஸ நயோ பணீதபோ⁴ஜனவிஸயே நவ பாசித்தியானீதிஆதீ³ஸுபி. ஏதேன பே⁴ஸஜ்ஜபணீதபோ⁴ஜனஸிக்கா²பதா³னி ஏகேகஸிக்கா²பத³வஸேன பஞ்ஞத்தானிபி வத்து²பே⁴தே³ன பச்சேகம் பஞ்சஸிக்கா²பத³னவஸிக்கா²பத³ஸதி³ஸானி பி⁴க்கு²னீனம் பாடிதே³ஸனீயாபத்தியோ வியாதி த³ஸ்ஸேதி. தேனேவ ‘‘நானாவத்து²கானீ’’தி வுத்தம். ஸப்பிம் ஏவ படிக்³க³ஹேத்வா அனேகபா⁴ஜனேஸு ட²பேத்வா ஸத்தாஹம் அதிக்காமேந்தஸ்ஸ பா⁴ஜனக³ணனாய ஸம்ப⁴வந்தியோ ப³ஹுகாபி ஆபத்தியோ ஏகவத்து²கா ஏவ ஹோந்தி, ஏவம் ஸப்பிபோ⁴ஜனமேவ ப³ஹூஸு டா²னேஸு விஞ்ஞாபேத்வா ஏகதோ வா விஸும் விஸுமேவ வா பு⁴ஞ்ஜந்தஸ்ஸ ஆபத்தியோ ஏகவத்து²கா ஏவாதி த³ட்ட²ப்³பா³.

பாளியம் ஏகவாசாய தே³ஸேய்ய, வுத்தா ஆதி³ச்சப³ந்து⁴னாதி ஏத்த² ‘‘தே³ஸேய்யாதி வுத்தா’’தி இதி-ஸத்³த³ம் அஜ்ஜா²ஹரித்வா யோஜேதப்³ப³ம். ஏவம் ஸேஸேஸுபி.

பே⁴தா³னுவத்தகானந்தி ஏத்த² ஆதி³-ஸத்³தோ³ லுத்தனித்³தி³ட்டோ². யாவததியகா ச ஸப்³பே³ உப⁴தோவிப⁴ங்கே³ ஆக³தா, ஸங்கா⁴தி³ஸேஸஸாமஞ்ஞேன ஏகம், பாசித்தியஸாமஞ்ஞேன ச ஏகம் கத்வா ‘‘யாவததியகே திஸ்ஸோ’’தி வுத்தந்தி த³ட்ட²ப்³ப³ம். ஏத்த² ச ஞத்தியா து³க்கடம், த்³வீஹி கம்மவாசாஹி து²ல்லச்சயாபி ஸந்தி ஏவ. தானி மாதிகாய ந ஆக³தானி. மாதிகாக³தவஸேன ஹேத்த² ‘‘திஸ்ஸோ’’தி வுத்தம்.

ஸங்கா⁴தீ³ஹீதி ஸங்க⁴க³ணபுக்³க³லேஹி காரணபூ⁴தேஹி. அப்³பு⁴ண்ஹஸீலோதி பரிஸுத்³த⁴பா⁴வூபக³மனேன அபி⁴னவுப்பன்னஸீலோ. அபி⁴னவுப்பன்னஞ்ஹி ‘‘அப்³பு⁴ண்ஹ’’ந்தி வுச்சதி, பரிஸுத்³த⁴ஸீலோதி அத்தோ². தேனாஹ ‘‘பாகதிகோ’’தி.

‘‘கோஸம்ப³கக்க²ந்த⁴கே வுத்தானிஸம்ஸே’’தி இத³ம் கோஸம்ப³கக்க²ந்த⁴கே ‘‘ஸசே மம் இமே பி⁴க்கூ² ஆபத்தியா அத³ஸ்ஸனே உக்கி²பிஸ்ஸந்தி, ந மயா ஸத்³தி⁴ம் உபோஸத²ம் கரிஸ்ஸந்தீ’’திஆதி³னா ஆபத்தியா அத³ஸ்ஸனே ஆதீ³னவம் த³ஸ்ஸேத்வா பரேஸம்பி ஸத்³தா⁴ய ஆபத்திதே³ஸனாவிதா⁴னமுகே²ன ஸாமத்தி²யதோ பகாஸிதோ. ஏகதோ உபோஸத²கரண, பவாரணாகரண, ஸங்க⁴கம்மகரண, ஆஸனேனிஸீத³ன, யாகு³பானேனிஸீத³ன, ப⁴த்தக்³கே³னிஸீத³ன, ஏகச்ச²ன்னேஸயன, யதா²வுட்³ட⁴அபி⁴வாத³னாதி³கரணஸங்கா²தே அட்டா²னிஸம்ஸே ஸந்தா⁴ய வுத்தம்.

சதுன்னந்தி வினயபிடகே ஆக³தானம் வஸேன வுத்தம். கதமா பன ஸாதி ஸா சதுப்³பி³தா⁴ அச்சயதே³ஸனா கதமாதி அத்தோ². அபி⁴மாரானந்தி மாரணத்தா²ய பயோஜிதத⁴னுக்³க³ஹானம். உபட்டா²யிகாயாதி ஸஹஸேய்யஸிக்கா²பத³வத்து²ஸ்மிம் ஆக³தாய.

அட்ட²ன்னம் பி⁴க்கு²னீனந்தி தே²ராஸனதோ பட்டா²ய அட்ட²ஹி பி⁴க்கு²னீஹி இதராய ஆக³தாய வுட்³டா⁴ய பி⁴க்கு²னியா ஆஸனம் தா³தப்³ப³ம். அட்ட²ன்னம் பன பி⁴க்கு²னீனம் நவகாய ஆக³தாய அதா³தும்பி வட்டதி. தாய பன ஸங்க⁴னவகாஸனே லத்³தோ⁴காஸே நிஸீதி³தப்³ப³ம். அத² வா அட்ட²ன்னம் வுட்³டா⁴னம் பி⁴க்கு²னீனம் இதராய நவகதராய ஆஸனம் தா³தப்³ப³ம். கம்மானி நவாதி ஓஸாரணாதீ³னி நவ ஏவ.

பாசித்தியவண்ணனா நிட்டி²தா.

அவந்த³னீயபுக்³க³லாதி³வண்ணனா

477. த³ஸ ஜனாதி ‘‘த³ஸ இமே, பி⁴க்க²வே, அவந்தி³யா’’திஆதி³னா (பரி. 330) வுத்தா நவகஅனுபஸம்பன்னனானாஸம்வாஸகமாதுகா³மபண்ட³கா பஞ்ச, பாரிவாஸிகாத³யோ ச பஞ்சாதி த³ஸ ஜனா.

த்³வாத³ஸ கம்மதோ³ஸாதி தோ³ஸயுத்தகம்மானி த்³வாத³ஸாதி அத்தோ². கம்மஸம்பத்தியோதி ஸம்பன்னகம்மானி, விஸுத்³த⁴கம்மானீதி அத்தோ². ஏததே³வாதி த⁴ம்மேன ஸமக்³க³மேவ.

அனந்தம் நிப்³பா³னம் அஜினி ஜினித்வா படிலப⁴தீதி அனந்தஜினோதி ஆஹ ‘‘பரியந்த’’இச்சாதி³. ஸ்வேவாதி ஸோ ஏவ ப⁴க³வா.

‘‘வினயம் படிஜானந்தஸ்ஸ, வினயானி ஸுணோம தே’’திஆதி³னா உபாலித்தே²ரேனேவ ஏகம் வினயத⁴ரம் ஸம்முகே² டி²தம் புச்ச²ந்தேன விய புச்சி²த்வா தேன விஸ்ஸஜ்ஜிதம் விய விஸ்ஸஜ்ஜனம் கதம். தத்த² வினயம் படிஜானந்தஸ்ஸாதி வினயம் ஜானாமீதி படிஜானந்தஸ்ஸ. வினயானீதி வினயே தயா வுச்சமானே ஸுணோம.

478. பாளியம் பாராஜிகாதிஆதி³ உப⁴தோவிப⁴ங்கே³ஸு ஆக³தேஸு அக்³க³ஹிதக்³க³ஹணவஸேன வுத்தம்.

அவந்த³னீயபுக்³க³லாதி³வண்ணனா நிட்டி²தா.