சூளஸங்கா³மம்

அனுவிஜ்ஜகஸ்ஸ படிபத்திவண்ணனா

365. தத்ர ஹீதி தஸ்மிம் ஸன்னிபாதே. அத்தபச்சத்தி²காதி லஜ்ஜிபேஸலஸ்ஸ சோத³கபாபக³ரஹீபுக்³க³லஸ்ஸ அனத்த²காமா வேரீபுக்³க³லா. ஸாஸனபச்சத்தி²காதி அத்தனோ அனாசாரானுகு³ணம் பு³த்³த⁴வசனம் பகாஸேந்தோ தண்ஹாக³திகா, தி³ட்டி²க³திகா ச. அஜ்ஜோ²கா³ஹேத்வாதி அலஜ்ஜிஅபி⁴ப⁴வனவஸேன ஸங்க⁴மஜ்ஜ²ம் பவிஸித்வா. ஸோ ஸங்கா³மாவசரோதி ஸோ சோத³கோ ஸங்கா³மாவசரோ நாம. தி³ட்ட²ஸுதமுதம்பி ராஜகதா²தி³கந்தி தி³ட்ட²ஸுதவஸேனேவ ராஜசோராதி³கத²ம், முதவஸேனபி அன்னாதி³கத²ஞ்ச அகதே²ந்தேனாதி யோஜேதப்³ப³ம். கப்பியாகப்பியனிஸ்ஸிதா வாதிஆதீ³ஸு ரூபாரூபபடிச்சே²த³பதே³ன ஸகலஅபி⁴த⁴ம்மத்த²பிடகத்தம் த³ஸ்ஸேதி. ஸமதா²சாராதீ³ஹி படிஸம்யுத்தந்தி ஸகலஸுத்தந்தபிடகத்தம். தத்த² ஸமதா²சாரோ நாம ஸமத²பா⁴வனாக்கமோ. ததா² விபஸ்ஸனாசாரோ. டா²னனிஸஜ்ஜவத்தாதி³னிஸ்ஸிதாதி ஸங்க⁴மஜ்ஜா²தீ³ஸு க³ருசித்தீகாரம் பச்சுபட்ட²பேத்வா டா²னாதி³க்கமனிஸ்ஸிதா சேவ சுத்³த³ஸமஹாவத்தாதி³வத்தனிஸ்ஸிதா ச, ஆதி³-ஸத்³தே³ன அப்பிச்ச²தாதி³னிஸ்ஸிதா சாதி அத்தோ². பஞ்ஹே உப்பன்னேதி கேனசி உப்பன்னே பஞ்ஹே புச்சி²தே. இத³ஞ்ச உபலக்க²ணமத்தம், யம் கிஞ்சி உபட்டி²தம் த⁴ம்மம் பா⁴ஸஸ்ஸூதி அதி⁴ப்பாயோ.

குலபதே³ஸோ நாம க²த்தியாதி³ஜாதியம்பி காஸிகராஜகுலாதி³குலவிஸேஸோ. ஏதமேவாஹ ‘‘குலபதே³ஸோ க²த்தியகுலாதி³வஸேனேவ வேதி³தப்³போ³’’தி. ஸன்னிபாதமண்ட³லேதி அத்தனோ அனுவிஜ்ஜமானப்பகாரம் ஸங்க⁴ஸ்ஸ ஞாபனத்த²ம் உட்டா²ய ஸங்க⁴ஸன்னிபாதமஜ்ஜே² இதோ சிதோ ச பரேஸம் முக²ம் ஓலோகேந்தேன ந சரிதப்³ப³ம். யதா²னிஸின்னேனேவ த⁴ம்மவினயானுகு³ணம் வினிச்ச²யம் யதா² ஸப்³பே³ ஸுணந்தி, ததா² வத்தப்³ப³ந்தி அத்தோ².

பாளியம் அசண்டி³கதேனாதி அகதசண்ட³பா⁴வேன, அப²ருஸேனாதி அத்தோ². ‘‘ஹிதானுகம்பினா’’தி ஏதேன மேத்தாபுப்³ப³பா⁴கோ³ வுத்தோ. ‘‘காருணிகேன ப⁴விதப்³ப³’’ந்தி இமினா அப்பனாப்பத்தகருணா வுத்தா. ‘‘ஹிதபரிஸக்கினா’’தி இமினா கருணாபுப்³ப³பா⁴கோ³. தேனாஹ ‘‘கருணா ச கருணாபுப்³ப³பா⁴கோ³ ச உபட்டா²பேதப்³போ³தி அயம் பத³த்³வயேபி அதி⁴ப்பாயோ’’தி. லஜ்ஜியாதி லஜ்ஜினீ.

அனுயோக³வத்தம் கதா²பேத்வாதி ‘‘காலேன வக்கா²மீ’’திஆதி³னா (பரி. 362) வுத்தவத்தம். அனுயுஞ்ஜனாசாரக்கமேனேவ அனுயுஞ்ஜனம் அனுயோக³வத்தம் நாம, தம் கதா²பேத்வா தேனேவ கமேன அனுயுஞ்ஜாபேத்வாதி அத்தோ². உஜுமத்³த³வேனாதி ஏத்த² அஜ்ஜா²ஹரிதப்³ப³பத³ம் த³ஸ்ஸேதி ‘‘உபசரிதப்³போ³’’தி. ‘‘த⁴ம்மேஸு ச புக்³க³லேஸு சா’’தி இத³ம் ‘‘மஜ்ஜ²த்தேன ப⁴விதப்³ப³’’ந்தி பகதேன ஸம்ப³ந்தி⁴தப்³ப³ந்தி ஆஹ ‘‘த⁴ம்மேஸு ச புக்³க³லேஸு ச…பே… மஜ்ஜ²த்தோதி வேதி³தப்³போ³’’தி. யஞ்ஹி யத்த² கத்த²சி கத்தப்³ப³ம், தம் தத்த² அதிக்கமந்தோ மஜ்ஜ²த்தோ நாம ந ஹோதி, த⁴ம்மேஸு ச கா³ரவோ கத்தப்³போ³. புக்³க³லேஸு பன மேத்தாபா⁴வேன பக்க²பாதகா³ரவோ. தஸ்மா இமம் விதி⁴ம் அனதிக்கந்தோவ தேஸு மஜ்ஜ²த்தோதி வேதி³தப்³போ³.

366. ஸம்ஸந்த³னத்த²ந்தி ஆபத்தி வா அனாபத்தி வாதி ஸம்ஸயே ஜாதே ஸம்ஸந்தி³த்வா நிச்ச²யகரணத்த²ம் வுத்தந்தி அதி⁴ப்பாயோ. அத்த²த³ஸ்ஸனாயாதி ஸாதே⁴தப்³ப³ஸ்ஸ ஆபத்தாதி³உபமேய்யத்த²ஸ்ஸ சோத³கசுதி³தகே அத்தனோ படிஞ்ஞாய ஏவ ஸரூபவிபா⁴வனத்த²ம். அத்தோ² ஜானாபனத்தா²யாதி ஏவம் விபா⁴விதோ அத்தோ² சோத³கசுதி³தகஸங்கா⁴னம் ஞாபனத்தா²ய நிஜ்ஜா²பனத்தா²ய, ஸம்படிச்சா²பனத்தா²யாதி அத்தோ². புக்³க³லஸ்ஸ ட²பனத்தா²யாதி சோத³கசுதி³தகே அத்தனோ படிஞ்ஞாய ஏவ ஆபத்தியம், அனாபத்தியம் வா பதிட்டா²பனத்தா²ய. ஸாரணத்தா²யாதி பமுட்ட²ஸராபனத்தா²ய. ஸவசனீயகரணத்தா²யாதி தோ³ஸே ஸாரிதேபி ஸம்படிச்சி²த்வா படிகம்மம் அகரோந்தஸ்ஸ ஸவசனீயகரணத்தா²ய. ‘‘ந தே அபஸாதே³தப்³பா³’’தி இத³ம் அதி⁴ப்பேதத்த²த³ஸ்ஸனம். தத்த² அவிஸம்வாத³கட்டா²னே டி²தா ஏவ ந அபஸாதே³தப்³பா³, ந இதரேதி த³ட்ட²ப்³ப³ம்.

அப்பச்சயபரினிப்³பா³னத்தா²யாதி ஆயதிம் படிஸந்தி⁴யா அகாரணபூ⁴தபரினிப்³பா³னத்தா²ய. பரினிப்³பா³னஞ்ஹி நாம கீ²ணாஸவானம் ஸப்³ப³பச்சி²மா சுதிசித்தகம்மஜரூபஸங்கா²தா க²ந்தா⁴, தே ச ஸப்³பா³காரதோ ஸமுச்சி²ன்னானுஸயதாய புனப்³ப⁴வாய அனந்தராதி³பச்சயா ந ஹோந்தி அஞ்ஞேஹி ச தண்ஹாதி³பச்சயேஹி விரஹிதத்தா. தஸ்மா ‘‘அப்பச்சயபரினிப்³பா³ன’’ந்தி வுச்சதி. தந்தி விமுத்திஞாணத³ஸ்ஸனம். தேனேவாஹ ‘‘தஸ்மி’’ந்தி. வினயமந்தனாதி வினயவினிச்ச²யோ. ஸோதாவதா⁴னந்தி ஸோதஸ்ஸ ஓத³ஹனம், ஸவனந்தி அத்தோ². தேனாஹ ‘‘யம் உப்பஜ்ஜதி ஞாண’’ந்தி. யதா²வுத்தாய வினயஸம்வராதி³காரணபரம்பராய விமுத்தியா ஏவ பதா⁴னத்தா ஸா புன சித்தஸ்ஸ விமோக்கோ²தி உத்³த⁴டோதி ஆஹ ‘‘அரஹத்தப²லஸங்கா²தோ விமோக்கோ²’’தி. அத² வா யோ யம் கிஞ்சி த⁴ம்மம் அனுபாதி³யித்வா பரினிப்³பா³னவஸேன சித்தஸ்ஸ சித்தஸந்ததியா, தப்படிப³த்³த⁴கம்மஜரூபஸந்ததியா ச விமோக்கோ² விமுச்சனம் அபுனப்பவத்திவஸேன விக³மோ, ஏதத³த்தா²ய ஏதஸ்ஸ விக³மஸ்ஸத்தா²ய ஏவாதி ஏவம் நிக³மனவஸேனபேத்த² அத்தோ² வேதி³தப்³போ³.

367. அனுயோக³வத்தகா³தா²ஸு குஸலேன பு³த்³தி⁴மதாதி ஸம்மாஸம்பு³த்³தே⁴ன. கதந்தி நிப்³ப³த்திதம், பகாஸிதந்தி அத்தோ². தேனேவாதிஆதீ³ஸு தேனேவ கதாகதஸ்ஸ அஜானனேவ புப்³பா³பரம் அஜானனஸ்ஸ, அஞ்ஞஸ்ஸபி பி⁴க்கு²னோ யம் கதாகதம் ஹோதி, தம்பி ந ஜானாதீதி அத்தோ². அத்தனோ ஸதி³ஸாயாதி யதா²வுத்தேஹி தோ³ஸேஹி யுத்ததாய அத்தனா ஸதி³ஸாய.

அனுவிஜ்ஜகஸ்ஸ படிபத்திவண்ணனா நிட்டி²தா.