9. பாதிமோக்க²ட்ட²பனக்க²ந்த⁴கோ

பாதிமோக்கு²த்³தே³ஸயாசனகதா²வண்ணனா

383. பாதிமோக்க²ட்ட²பனக்க²ந்த⁴கே பாளியம் நந்தி³முகி²யாதி ஓதா³ததி³ஸாமுக²தாய துட்ட²முகி²யா. ‘‘உத்³த⁴ஸ்தம் அருண’’ந்தி வத்வாபி ‘‘உத்³தி³ஸது, ப⁴ந்தே, ப⁴க³வா’’தி பாதிமோக்கு²த்³தே³ஸயாசனம் அனுபோஸதே² உபோஸத²கரணபடிக்கே²பஸ்ஸ ஸிக்கா²பத³ஸ்ஸ அபஞ்ஞத்தத்தா தே²ரேன கதந்தி த³ட்ட²ப்³ப³ம். கஸ்மா பன ப⁴க³வா ஏவம் துண்ஹீபூ⁴தோவ தியாமரத்திம் வீதினாமேஸீதி? அபரிஸுத்³தா⁴ய பரிஸாய உபோஸதா²தி³ஸம்வாஸகரணஸ்ஸ ஸாவஜ்ஜதம் பி⁴க்கு²ஸங்கே⁴ பாகடம் காதும், தஞ்ச ஆயதிம் பி⁴க்கூ²னம் ததா²படிபஜ்ஜனத்த²ம் ஸிக்கா²பத³ம் ஞாபேதும். கேசி பனேத்த² ‘‘அபரிஸுத்³த⁴ம்பி புக்³க³லம் தஸ்ஸ ஸம்முகா² ‘அபரிஸுத்³தோ⁴’தி வத்தும் மஹாகருணாய அவிஸஹந்தோ ப⁴க³வா ததா² நிஸீதீ³’’தி காரணம் வத³ந்தி. தம் அகாரணம் பச்சா²பி அவத்தப்³ப³தோ, மஹாமோக்³க³ல்லானத்தே²ரேனாபி தம் பா³ஹாயம் க³ஹேத்வா ப³ஹி நீஹரணஸ்ஸ அகத்தப்³ப³தாபஸங்க³தோ. தஸ்மா யதா²வுத்தமேவேத்த² காரணந்தி. தேனேவ ‘‘அட்டா²னமேதம், பி⁴க்க²வே, அனவகாஸோ, யம் ததா²க³தோ அபரிஸுத்³தா⁴ய பரிஸாய உபோஸத²ம் கரேய்ய, பாதிமோக்க²ம் உத்³தி³ஸேய்யா’’தி (அ. நி. 8.20; சூளவ. 386; உதா³. 45) வத்வா ‘‘ந ச, பி⁴க்க²வே, ஸாபத்திகேன பாதிமோக்க²ம் ஸோதப்³ப³’’ந்திஆதி³னா (சூளவ. 386) ஸாபத்திகபரிஸாய கத்தப்³ப³விதி⁴ த³ஸ்ஸிதோ.

ஸங்கஸ்ஸரஸமாசாரந்தி கிஞ்சிதே³வ அஸாருப்பம் தி³ஸ்வா ‘‘இத³ம் இமினா கதம் ப⁴விஸ்ஸதீ’’தி பரேஹி ஸங்காய ஸரிதப்³ப³ஸமாசாரம், அத்தனா வா ‘‘மம அனாசாரம் ஏதே ஜானந்தீ’’தி ஸங்காய ஸரிதப்³ப³ஸமாசாரம். ஸமணவேஸதா⁴ரணேன, ஸங்கி⁴கபச்சயபா⁴க³க³ஹணாதி³னா ச ஜீவிகம் கப்பேந்தோ ‘‘அஹம் ஸமணோ’’தி படிஞ்ஞம் அதே³ந்தோபி அத்த²தோ தே³ந்தோ விய ஹோதீதி ‘‘ஸமணபடிஞ்ஞம் ப்³ரஹ்மசாரிபடிஞ்ஞ’’ந்தி வுத்தம். அவஸ்ஸுதந்தி கிலேஸாவஸ்ஸனேன திந்தம். ஸஞ்ஜாதது³ஸ்ஸில்யகசவரத்தா கஸம்பு³ஜாதம், அஸாரதாய வா கஸம்பு³ விய ஜாதம். ப³ஹித்³வாரகோட்ட²கா நிக்கா²மேத்வாதி த்³வாரஸாலதோ ப³ஹி நிக்க²மாபேத்வா.

384. மஹாஸமுத்³தே³ அபி⁴ரமந்தீதி ப³ஹுஸோ த³ஸ்ஸனபவிஸனாதி³னா மஹாஸமுத்³தே³ அபி⁴ரதிம் விந்த³ந்தி. ந ஆயதகேனேவ பபாதோதி சி²ன்னதடமஹாஸோப்³போ⁴ விய ந ஆதி³தோவ நின்னோதி அத்தோ². டி²தத⁴ம்மோதி அவட்டி²தஸபா⁴வோ. பூரத்தந்தி புண்ணத்தம். நாகா³தி ஸப்பஜாதிகா.

பாதிமோக்கு²த்³தே³ஸயாசனகதா²வண்ணனா நிட்டி²தா.

பாதிமோக்க²ஸவனாரஹகதா²தி³வண்ணனா

386. உதா³ஹரிதப்³ப³ந்தி பாளியா அவத்வா தமத்த²ம் யாய காயசி பா⁴ஸாய உதா³ஹடம்பி உதா³ஹடமேவாதி த³ட்ட²ப்³ப³ம்.

புரே வா பச்சா² வாதி ஞத்திஆரம்ப⁴தோ புப்³பே³ வா ஞத்தினிட்டா²னதோ பச்சா² வா.

387. கதஞ்ச அகதஞ்ச உப⁴யம் க³ஹேத்வாதி யஸ்ஸ கதாபி அத்தி² அகதாபி. தஸ்ஸ தது³ப⁴யம் க³ஹேத்வா. த⁴ம்மிகம் ஸாமக்³கி³ந்தி த⁴ம்மிகம் ஸமக்³க³கம்மம். பச்சாதி³யதீதி உக்கோடனாதி⁴ப்பாயேன புன காதும் ஆதி³யதி.

388. ஆகாராதி³ஸஞ்ஞா வேதி³தப்³பா³தி ஆகாரலிங்க³னிமித்தனாமானி வுத்தானீதி வேதி³தப்³பா³னி.

பாதிமோக்க²ஸவனாரஹகதா²தி³வண்ணனா நிட்டி²தா.

அத்தாதா³னஅங்க³கதா²தி³வண்ணனா

398. புன சோதே³தும் அத்தனா ஆதா³தப்³ப³ம் க³ஹேதப்³ப³ம் அதி⁴கரணம் அத்தாதா³னந்தி ஆஹ ‘‘ஸாஸனம் ஸோதே⁴துகாமோ’’திஆதி³. வஸ்ஸாரத்தோதி வஸ்ஸகாலோ. ஸோபி ஹி து³ப்³பி⁴க்கா²தி³காலோ விய அதி⁴கரணவூபஸமத்த²ம் லஜ்ஜிபரிஸாய தூ³ரதோ ஆனயனஸ்ஸ, ஆக³தானஞ்ச பிண்டா³ய சரணாதி³ஸமாசாரஸ்ஸ து³க்கரத்தா அகாலோ ஏவ.

ஸமனுஸ்ஸரணகரணந்தி அனுஸ்ஸரிதானுஸ்ஸரிதக்க²ணே பீதிபாமோஜ்ஜஜனனதோ அனுஸ்ஸரணுப்பாத³கம். விக³தூபக்கிலேஸ…பே… ஸம்வத்ததீதி ஏத்த² யதா² அப்³ப⁴ஹிமாதி³உபக்கிலேஸவிரஹிதானம் சந்தி³மஸூரியானம் ஸஸ்ஸிரீகதா ஹோதி, ஏவமஸ்ஸாபி சோத³கஸ்ஸ பாபபுக்³க³லூபக்கிலேஸவிக³மேன ஸஸ்ஸிரீகதா ஹோதீதி அதி⁴ப்பாயோ.

399. அதி⁴க³தம் மேத்தசித்தந்தி அப்பனாப்பத்தம் மேத்தஜா²னம்.

400-1. ‘‘தோ³ஸந்தரோ’’தி ஏத்த² அந்தர-ஸத்³தோ³ சித்தபரியாயோதி ஆஹ ‘‘ந து³ட்ட²சித்தோ ஹுத்வா’’தி.

காருஞ்ஞம் நாம கருணா ஏவாதி ஆஹ ‘‘காருஞ்ஞதாதி கருணாபா⁴வோ’’தி. கருணந்தி அப்பனாப்பத்தம் வத³தி. ததா² மேத்தந்தி.

அத்தாதா³னஅங்க³கதா²தி³வண்ணனா நிட்டி²தா.

பாதிமோக்க²ட்ட²பனக்க²ந்த⁴கவண்ணனானயோ நிட்டி²தோ.