10. பி⁴க்கு²னிக்க²ந்த⁴கோ

மஹாபஜாபதிகோ³தமீவத்து²கதா²வண்ணனா

403. பி⁴க்கு²னிக்க²ந்த⁴கே ‘‘மாதுகா³மஸ்ஸ பப்³ப³ஜிதத்தா’’தி இத³ம் பஞ்சவஸ்ஸஸததோ உத்³த⁴ம் ஸத்³த⁴ம்மஸ்ஸ அப்பவத்தனகாரணத³ஸ்ஸனம். ஸுக்க²விபஸ்ஸககீ²ணாஸவவஸேன வஸ்ஸஸஹஸ்ஸந்திஆதி³ க²ந்த⁴கபா⁴ணகானம் மதம் க³ஹேத்வா வுத்தம். தீ³க⁴னிகாயட்ட²கதா²யம் பன ‘‘படிஸம்பி⁴தா³ப்பத்தேஹி வஸ்ஸஸஹஸ்ஸம் அட்டா²ஸி, ச²ளபி⁴ஞ்ஞேஹி வஸ்ஸஸஹஸ்ஸம், தேவிஜ்ஜேஹி வஸ்ஸஸஹஸ்ஸம், ஸுக்க²விபஸ்ஸகேஹி வஸ்ஸஸஹஸ்ஸம், பாதிமோக்கே²ஹி வஸ்ஸஸஹஸ்ஸம் அட்டா²ஸீ’’தி (தீ³. நி. அட்ட². 3.161) வுத்தம். அங்கு³த்தர (அ. நி. அட்ட². 3.8.51) -ஸம்யுத்தட்ட²கதா²ஸுபி (ஸம். நி. அட்ட². 2.2.156) அஞ்ஞதா²வ வுத்தம், தம் ஸப்³ப³ம் அஞ்ஞமஞ்ஞவிருத்³த⁴ம்பி தம்தம்பா⁴ணகானம் மதேன லிகி²தஸீஹளட்ட²கதா²ஸு ஆக³தனயமேவ க³ஹேத்வா ஆசரியேன லிகி²தம் ஈதி³ஸே கதா²விரோதே⁴ ஸாஸனபரிஹானியா அபா⁴வதோ, ஸோத⁴னுபாயாபா⁴வா ச. பரமத்த²விரோதோ⁴ ஏவ ஹி ஸுத்தாதி³னயேன ஸோத⁴னீயோ, ந கதா²மக்³க³விரோதோ⁴தி.

மஹாபஜாபதிகோ³தமீவத்து²கதா²வண்ணனா நிட்டி²தா.

பி⁴க்கு²னீஉபஸம்பதா³னுஜானனகதா²வண்ணனா

404-8. பாளியம் யத³க்³கே³னாதி யஸ்மிம் தி³வஸே. ததா³தி தஸ்மிம்யேவ தி³வஸே. விமானேத்வாதி அவமானம் கத்வா.

410-1. ஆபத்திகா³மினியோதி ஆபத்திம் ஆபன்னாயோ. கம்மவிப⁴ங்கே³தி பரிவாரே கம்மவிப⁴ங்கே³ (பரி. 482 ஆத³யோ).

413-5. பாளியம் த்³வே திஸ்ஸோ பி⁴க்கு²னியோதி த்³வீஹி தீஹி பி⁴க்கு²னீஹி. ந ஆரோசேந்தீதி பாதிமோக்கு²த்³தே³ஸகஸ்ஸ ந ஆரோசேந்தி.

416. து³ஸ்ஸவேணியாதி அனேகது³ஸ்ஸபட்டே ஏகதோ கத்வா கதவேணியா.

417. விஸேஸகந்தி பத்தலேகா²தி³வண்ணவிஸேஸம். பகிணந்தீதி விக்கிணந்தி. நமனகந்தி பாஸுகட்டி²னமனகப³ந்த⁴னம்.

422-5. ஸம்வேல்லியந்தி கச்ச²ம் ப³ந்தி⁴த்வா நிவாஸனம். தயோ நிஸ்ஸயேதி ருக்க²மூலஸேனாஸனஸ்ஸ தாஸம் அலப்³ப⁴னதோ வுத்தம்.

426-8. அட்டே²வ பி⁴க்கு²னியோ யதா²வுட்³ட⁴ம் படிபா³ஹந்தீதி அட்ட² பி⁴க்கு²னியோ வுட்³ட⁴படிபாடியாவ க³ண்ஹந்தியோ ஆக³தபடிபாடிம் படிபா³ஹந்தி, நாஞ்ஞாதி அத்தோ². அனுவாத³ம் பட்ட²பேந்தீதி இஸ்ஸரியம் பவத்தேந்தீதி அத்த²ம் வத³ந்தி.

430. பி⁴க்கு²தூ³தேனாதி பி⁴க்கு²னா தூ³தபூ⁴தேன. ஸிக்க²மானதூ³தேனாதி ஸிக்க²மானாய தூ³தாய.

431. ந ஸம்மதீதி நப்பஹோதி. நவகம்மந்தி ‘‘நவகம்மம் கத்வா வஸதூ’’தி அபலோகேத்வா ஸங்கி⁴கபூ⁴மியா ஓகாஸதா³னம்.

432-6. ஸன்னிஸின்னக³ப்³பா⁴தி து³விஞ்ஞேய்யக³ப்³பா⁴. மஹிலாதித்தே²தி இத்தீ²னம் ஸாதா⁴ரணதித்தே².

பி⁴க்கு²னீஉபஸம்பதா³னுஜானனகதா²வண்ணனா நிட்டி²தா.

பி⁴க்கு²னிக்க²ந்த⁴கவண்ணனானயோ நிட்டி²தோ.