8. வத்தக்க²ந்த⁴கோ

ஆக³ந்துகவத்தகதா²வண்ணனா

357. வத்தக்க²ந்த⁴கே பத்த²ரிதப்³ப³ந்தி ஆதபே பத்த²ரிதப்³ப³ம். பாளியம் அபி⁴வாதா³பேதப்³போ³தி வந்த³னத்தா²ய வஸ்ஸம் புச்ச²னேன நவகோ ஸயமேவ வந்த³தீதி வுத்தம். நில்லோகேதப்³போ³தி ஓலோகேதப்³போ³.

ஆக³ந்துகவத்தகதா²வண்ணனா நிட்டி²தா.

ஆவாஸிகவத்தகதா²வண்ணனா

359. ‘‘யதா²பா⁴க³’’ந்தி ட²பிதட்டா²னம் அனதிக்கமித்வா மஞ்சபீடா²தி³ம் பப்போ²டேத்வா பத்த²ரித்வா உபரி பச்சத்த²ரணம் த³த்வா தா³னம்பி ஸேனாஸனபஞ்ஞாபனமேவாதி த³ஸ்ஸேந்தோ ஆஹ ‘‘பப்போ²டேத்வா ஹி பத்த²ரிதும் பன வட்டதியேவா’’தி.

ஆவாஸிகவத்தகதா²வண்ணனா நிட்டி²தா.

அனுமோத³னவத்தகதா²வண்ணனா

362. பஞ்சமே நிஸின்னேதி அனுமோத³னத்தா²ய நிஸின்னே. ந மஹாதே²ரஸ்ஸ பா⁴ரோ ஹோதீதி அனுமோத³கம் ஆக³மேதும் ந பா⁴ரோ. அஜ்ஜி²ட்டோ²வ ஆக³மேதப்³போ³தி அத்தனா அஜ்ஜி²ட்டே²ஹி பி⁴க்கூ²ஹி அனுமோத³ந்தேயேவ நிஸீதி³தப்³ப³ந்தி அத்தோ².

அனுமோத³னவத்தகதா²வண்ணனா நிட்டி²தா.

ப⁴த்தக்³க³வத்தகதா²வண்ணனா

364. மனுஸ்ஸானம் பரிவிஸனட்டா²னந்தி யத்த² அந்தோவிஹாரேபி மனுஸ்ஸா ஸபுத்ததா³ரா ஆவஸித்வா பி⁴க்கூ² நேத்வா போ⁴ஜேந்தி. ஆஸனேஸு ஸதீதி நிஸீத³னட்டா²னேஸு ஸந்தேஸு. இத³ம், ப⁴ந்தே, ஆஸனம் உச்சந்தி ஆஸன்னே ஸமபூ⁴மிபா⁴கே³ பஞ்ஞத்தம் தே²ராஸனேன ஸமகம் ஆஸனம் ஸந்தா⁴ய வுத்தம், தே²ராஸனதோ பன உச்சதரே ஆபுச்சி²த்வாபி நிஸீதி³தும் ந வட்டதி. யதி³ தம் ஆஸன்னம்பி நீசதரம் ஹோதி, அனாபுச்சா²பி நிஸீதி³தும் வட்டதி. மஹாதே²ரஸ்ஸேவ ஆபத்தீதி ஆஸனேன படிபா³ஹனாபத்தியா ஆபத்தி. அவத்த²ரித்வாதி பாருதஸங்கா⁴டிம் அவத்த²ரித்வா, அனுக்கி²பித்வாதி அத்தோ².

பாளியம் ‘‘உபோ⁴ஹி ஹத்தே²ஹி…பே… ஓத³னோ படிக்³க³ஹேதப்³போ³’’தி இத³ம் ஹத்த²தலே வா பச்சி²பிட்டி²ஆதி³து³ஸ்ஸண்டி²தாதா⁴ரே வா பத்தம் ட²பேத்வா ஓத³னஸ்ஸ க³ஹணகாலே பத்தஸ்ஸ அபதனத்தா²ய வுத்தம், ஸுஸஜ்ஜிதே பன ஆதா⁴ரே பத்தம் ட²பேத்வா ஏகேன ஹத்தே²ன தம் பராமஸித்வாபி ஓத³னம் படிக்³க³ஹேதும் வட்டதி ஏவ. உபோ⁴ஹி ஹத்தே²ஹி…பே… உத³கம் படிக்³க³ஹேதப்³ப³ந்தி ஏத்தா²பி ஏஸேவ நயோ.

ஹத்த²தோ⁴வனஉத³கந்தி போ⁴ஜனாவஸானே உத³கம். தேனாஹ ‘‘பானீயம் பிவித்வா ஹத்தா² தோ⁴விதப்³பா³’’தி. தேன பரியோஸானே தோ⁴வனமேவ படிக்கி²த்தம், போ⁴ஜனந்தரே பன பானீயபிவனாதி³னா நயேன ஹத்த²ம் தோ⁴வித்வா புன பு⁴ஞ்ஜிதும் வட்டதீதி த³ஸ்ஸேதி. போத்த²கேஸு பன ‘‘பானீயம் பிவித்வா ஹத்தா² ந தோ⁴விதப்³பா³’’தி லிக²ந்தி, தம் புரிமவசனேன ந ஸமேதி பரியோஸானே உத³கஸ்ஸேவ ‘‘ஹத்த²தோ⁴வனஉத³க’’ந்தி வுத்தத்தா. ஸசே மனுஸ்ஸா தோ⁴வத², ப⁴ந்தேதிஆதி³ நிட்டி²தப⁴த்தம் நிஸின்னம் தே²ரம் ஸந்தா⁴ய வுத்தம். து⁴ரே த்³வாரஸமீபே.

ப⁴த்தக்³க³வத்தகதா²வண்ணனா நிட்டி²தா.

பிண்ட³சாரிகவத்தகதா²தி³வண்ணனா

366. பாளியம் டா²பேதி வாதி திட்ட² ப⁴ந்தேதி வத³ந்தி.

367. அத்தி², ப⁴ந்தே, நக்க²த்தபதா³னீதி நக்க²த்தபத³விஸயானி ஞாதானி அத்தி², அஸ்ஸயுஜாதி³னக்க²த்தம் ஜானாதா²தி அதி⁴ப்பாயோ. தேனாஹ ‘‘ந ஜானாம, ஆவுஸோ’’தி. அத்தி², ப⁴ந்தே, தி³ஸாபா⁴க³ந்தி ஏத்தா²பி ஏஸேவ நயோ. கேனஜ்ஜ, ப⁴ந்தே, யுத்தந்தி கேன நக்க²த்தேன சந்தோ³ யுத்தோதி அத்தோ².

369. அங்க³ணேதி அப்³போ⁴காஸே. ஏவமேவ படிபஜ்ஜிதப்³ப³ந்தி உத்³தே³ஸதா³னாதி³ ஆபுச்சி²தப்³ப³ந்தி த³ஸ்ஸேதி.

374. நிப³த்³த⁴க³மனத்தா²யாதி அத்தனோவ நிரந்தரக³மனத்தா²ய. ஊஹதி³தாதி ஏத்த² ஹத³-தா⁴துஸ்ஸ வச்சவிஸ்ஸஜ்ஜனத்த²தாயாஹ ‘‘ப³ஹி வச்சமக்கி²தா’’தி.

பிண்ட³சாரிகவத்தகதா²தி³வண்ணனா நிட்டி²தா.

வத்தக்க²ந்த⁴கவண்ணனானயோ நிட்டி²தோ.