5. கு²த்³த³கவத்து²க்க²ந்த⁴கோ

கு²த்³த³கவத்து²கதா²வண்ணனா

243. கு²த்³த³கவத்து²க்க²ந்த⁴கே அட்ட²பதா³காரேனாதி ஜூதப²லகே அட்ட²க³ப்³ப⁴ராஜிஆகாரேன. மல்லகமூலஸண்டா²னேனாதி கே²ளமல்லகமூலஸண்டா²னேன. இத³ஞ்ச வட்டாதா⁴ரகம் ஸந்தா⁴ய வுத்தம், கண்டகே உட்டா²பேத்வா கதவட்டகபாலஸ்ஸேதம் அதி⁴வசனம்.

244. புது²பாணிகந்தி முட்டி²ம் அகத்வா விகஸிதஹத்த²தலேஹி பிட்டி²பரிகம்மம் வுச்சதி. ஏதமேவ ஸந்தா⁴ய ‘‘ஹத்த²பரிகம்ம’’ந்தி வுத்தம்.

245. முத்தோலம்ப³காதீ³னந்தி ஆதி³-ஸத்³தே³ன குண்ட³லாதி³ம் ஸங்க³ண்ஹாதி. பலம்ப³கஸுத்தந்தி ப்³ராஹ்மணானம் யஞ்ஞோபசிதஸுத்தாதி³ஆகாரம் வுச்சதி. வலயந்தி ஹத்த²பாத³வலயம்.

246. த்³வங்கு³லேதி உபயோக³ப³ஹுவசனம், த்³வங்கு³லப்பமாணம் அதிக்காமேதும் ந வட்டதீதி அத்தோ². ஏத்த² ச து³மாஸஸ்ஸ வா த்³வங்கு³லஸ்ஸ வா அதிக்கந்தபா⁴வம் அஜானந்தஸ்ஸாபி கேஸமஸ்ஸுக³ணனாய அசித்தகாபத்தியோ ஹோந்தீதி வத³ந்தி.

கோச்சே²னாதி உஸீரதிணாதீ³னி ப³ந்தி⁴த்வா ஸமம் சி²ந்தி³த்வா க³ஹிதகோச்சே²ன. சிக்கலேனாதி ஸிலேஸயுத்ததேலேன. உண்ஹாபி⁴தத்தரஜஸிரானம்பீதி உண்ஹாபி⁴தத்தானம் ரஜோகிண்ணஸிரானம். அத்³த³ஹத்தே²னாதி அல்லஹத்தே²ன.

248-9. ஸாது⁴கீ³தந்தி அனிச்சதாதி³படிஸஞ்ஞுத்தம் கீ³தம். சதுரஸ்ஸேன வத்தேனாதி பரிபுண்ணேன உச்சாரணவத்தேன. தரங்க³வத்தாதீ³னம் ஸப்³பே³ஸம்பி ஸாமஞ்ஞலக்க²ணம் த³ஸ்ஸேதும் ‘‘ஸப்³பே³ஸம்…பே… லக்க²ண’’ந்தி வுத்தம். யத்தகாஹி மத்தாஹி அக்க²ரம் பரிபுண்ணம் ஹோதி, ததோபி அதி⁴கமத்தாயுத்தம் கத்வா கத²னம் விகாரகத²னம் நாம, ததா² அகத்வா கத²னமேவ லக்க²ணந்தி அத்தோ². பா³ஹிரலோமிந்தி பா⁴வனபும்ஸகனித்³தே³ஸோ, யதா² ப³ஹித்³தா⁴ லோமானி தி³ஸ்ஸந்தி, ஏவம் தா⁴ரேந்தஸ்ஸ து³க்கடந்தி அத்தோ².

250. பாளியம் தருணஞ்ஞேவ அம்ப³ந்தி தருணம் அஸஞ்ஜாதபீ³ஜம் ஏவ அம்ப³ப²லம். பாதாபேத்வாதி சி²ந்தா³பேத்வாவ. ‘‘மத்தாவண்ணிதா’’தி இத³ம் ‘‘பரே நிந்த³ந்தீ’’தி ஸாஸனஹிதேஸிதாய வுத்தம். ந பரியாபுணிம்ஸூதி நாஸிக்கி²ம்ஸு.

251. சத்தாரி அஹிராஜகுலானீதி ஸப்³பே³ஸம் அஹிபே⁴தா³னம் சதூஸு ஏவ ஸங்க³ஹதோ வுத்தம். அத்தபரித்தம் காதுந்தி அத்தனோ பரித்தாணம் காதும்.

விரூபக்கே²ஹி மே மேத்தந்தி விரூபக்க²ஜாதிகேஹி நாகே³ஹி ஸஹ மய்ஹம் மித்தபா⁴வோ ஹோது, மேத்தா ஹோதூதி அத்தோ², தே ஸுகி²தா நித்³து³க்கா² அவேரா ஹோந்தூதி அதி⁴ப்பாயோ. ஏவஞ்ஹி மேத்தாப²ரணம் ஹோதி. ஸேஸேஸுபி ஏஸேவ நயோ. அபாத³கேஹீதி அஹிகுலேஹி ஸஹ ஸப்³ப³ஸத்தேஸு ஓதி⁴ஸோ மேத்தாப²ரணத³ஸ்ஸனம். மா மம் அபாத³கோ ஹிம்ஸீதி தாய மேத்தாய அத்தரக்கா²விதா⁴னத³ஸ்ஸனம்.

ஸப்³பே³ ஸத்தாதிஆதி³ அத்தானம் உபமம் கத்வா ஸப்³ப³ஸத்தேஸு அனோதி⁴ஸோ மேத்தாப²ரணத³ஸ்ஸனம். தத்த² மா கஞ்சி பாபமாக³மாதி கஞ்சி ஸத்தம் லாமகம் து³க்க²ஹேது, து³க்க²ஞ்ச மா ஆக³ச்ச²து.

ஏவம் மேத்தாய அத்தகு³த்திம் த³ஸ்ஸேத்வா இதா³னி ரதனத்தயானுஸ்ஸரணேன த³ஸ்ஸேதும் ‘‘அப்பமாணோ’’திஆதி³ வுத்தம். தத்த² பமாணகரத⁴ம்மா அகுஸலா, தப்³பி³பாகா ச பமாணா, தப்படிபக்கா² ஸீலாத³யோ கு³ணா, தப்³பி³பாகா ச லோகியலோகுத்தரப²லானி அப்பமாணா, தே அஸ்ஸ அத்தீ²தி அப்பமாணோ, அப்பமாணா வா அபரிமேய்யகு³ணா அஸ்ஸாதிபி அப்பமாணோ. பமாணவந்தானீதி யதா²வுத்தபமாணகரத⁴ம்மயுத்தானி. அஹிவிச்சி²காதி ஸரீஸபானஞ்ஞேவ பபே⁴த³த³ஸ்ஸனம். உண்ணனாபீ⁴தி லோமஸனாபி⁴கோ மக்கடோ. ஸரபூ³தி க⁴ரகோ³ளிகா.

படிக்கமந்தூதி அபக³ச்ச²ந்து, மா மம் விஹேஸயிம்ஸூதி அத்தோ². ஸோஹம் நமோதி ஏத்த² ‘‘கரோமீ’’தி பாட²ஸேஸோ. யஸ்மா மயா மேத்தாதீ³ஹி தும்ஹாகஞ்ச மய்ஹஞ்ச ரக்கா² கதா, யஸ்மா ச ஸோஹம் ப⁴க³வதோ நமோ கரோமி, விபஸ்ஸீஆதீ³னம் ஸத்தன்னம்பி நமோ கரோமி, தஸ்மா படிக்கமந்து பூ⁴தானீதி யோஜனா.

அஞ்ஞம்ஹீதி காமராகே³ அஸுப⁴மனஸிகாராதி³னா சே²தப்³பே³தி அத்தோ². அங்க³ஜாதந்தி பீ³ஜவிரஹிதம் புரிஸனிமித்தம். பீ³ஜே ஹி சி²ன்னே ஓபக்கமிகபண்ட³கோ நாம அப⁴ப்³போ³ ஹோதீதி வத³ந்தி. ஏகே பன ‘‘பீ³ஜஸ்ஸாபி சே²த³னக்க²ணே து³க்கடாபத்தி ஏவ கமேன புரிஸிந்த்³ரியாதி³கே அந்தரஹிதே பண்ட³கோ நாம அப⁴ப்³போ³ ஹோதி, ததா³ லிங்க³னாஸனாய நாஸேதப்³போ³’’தி வத³ந்தி. தாதி³ஸம் வா து³க்க²ம் உப்பாதே³ந்தஸ்ஸாதி முட்டி²ப்பஹாராதீ³ஹி அத்தனோ து³க்க²ம் உப்பாதே³ந்தஸ்ஸ.

252. பாளியம் துய்ஹேஸோ பத்தோதி ‘‘யோ ச அரஹா சேவ இத்³தி⁴மா ச, தஸ்ஸ தி³ன்னமேவா’’தி ஸேட்டி²னா வுத்தம், தம் ஸந்தா⁴ய வத³தி. தம் பத்தம் க³ஹேத்வா திக்க²த்தும் ராஜக³ஹம் அனுபரியாயீதி ஏத்த² வேளுபரம்பராய ப³த்³த⁴பத்தஸ்ஸ உபரிபா⁴கே³ ஆகாஸே நக³ரம் திக்க²த்தும் அனுபரியாயித்வா டி²தபா⁴வம் ஸந்தா⁴ய ‘‘பத்தம் க³ஹேத்வா’’தி வுத்தம், ந பன தே²ரோ ஹத்தே²ன பத்தம் ஸயமேவ அக்³க³ஹேஸி. கேசி பன வத³ந்தி ‘‘இத்³தி⁴ப³லேன தம் பத்தம் வேளுபரம்பரதோ முஞ்சித்வா தே²ரம் அனுப³ந்த⁴மானோ அட்டா²ஸி, ஸோ ச அனேன ஹத்தே²ன க³ஹிதோ விய அஹோஸீ’’தி. ததா² டி²தமேவ பன ஸந்தா⁴ய ‘‘பா⁴ரத்³வாஜஸ்ஸ ஹத்த²தோ பத்தம் க³ஹேத்வா’’தி வுத்தம். தே ச மனுஸ்ஸா…பே… அனுப³ந்தி⁴ம்ஸூதி யே ச மனுஸ்ஸா பட²மம் பாடிஹாரியம் நாத்³த³ஸம்ஸு, தே அம்ஹாகம்பி பாடிஹாரியம் த³ஸ்ஸேஹீதி தே²ரமனுப³ந்தி⁴ம்ஸு. தே²ரோ ச ஸீஹப்³யக்³கா⁴தி³ரூபம் க³ஹேத்வா விகுப்³ப³னித்³தி⁴ம் த³ஸ்ஸேதி, தே ச அச்ச²ரியப்³பு⁴தஜாதா உச்சாஸத்³தா³ மஹாஸத்³தா³ அஹேஸும். தேனாஹ ‘‘கிம் நு கோ² ஸோ, ஆனந்த³, உச்சாஸத்³தோ³ மஹாஸத்³தோ³’’தி. இத்³தி⁴பாடிஹாரியம் ந த³ஸ்ஸேதப்³ப³ந்தி ஏத்த² ‘‘யோ பகதிவண்ணம் விஜஹித்வா குமாரவண்ணம் வா த³ஸ்ஸேதி, நாக³வண்ணம் வா…பே… விவித⁴ம்பி ஸேனாப்³யூஹம் த³ஸ்ஸேதீ’’தி (படி. ம. 3.13) ஏவமாக³தா அத்தனோ ஸரீரஸ்ஸ விகாராபாத³னவஸப்பவத்தா விகுப்³ப³னித்³தி⁴ அதி⁴ப்பேதாதி ஆஹ ‘‘அதி⁴ட்டா²னித்³தி⁴ பன அப்படிக்கி²த்தா’’தி. பகதியா ஏகோ ப³ஹுகம் ஆவஜ்ஜதி, ஸதம் வா ஸஹஸ்ஸம் வா ஸதஸஹஸ்ஸம் வா ஆவஜ்ஜேத்வா ஞாணேன அதி⁴ட்டா²தி ‘‘ப³ஹுகோ ஹோமீ’’தி (படி. ம. 3.10) ஏவம் த³ஸ்ஸிதா அதி⁴ட்டா²னவஸேன நிப்ப²ன்னா அதி⁴ட்டா²னித்³தி⁴ நாம. கி³ஹிவிகடானீதி கி³ஹிஸந்தகானி.

253. பாளியம் ந அச்சு²பியந்தீதி ந பு²ஸிதானி ஹோந்தி. ரூபகாகிண்ணானீதி இத்தி²ரூபாதீ³ஹி ஆகிண்ணானி.

254. பூ⁴மிஆதா⁴ரகேதி த³ந்தாதீ³ஹி கதே வலயாதா⁴ரகே. ஏதஸ்ஸ வலயாதா⁴ரகஸ்ஸ அனுச்சதாய ட²பிதா பத்தா ந பரிபதந்தீதி ‘‘தயோ பத்தே ட²பேதும் வட்டதீ’’தி வுத்தம். அனுச்சதஞ்ஹி ஸந்தா⁴ய அயம் ‘‘பூ⁴மிஆதா⁴ரகோ’’தி வுத்தோ. தா³ருஆதா⁴ரகத³ண்டா³தா⁴ரகேஸூதி ஏகதா³ருனா கதஆதா⁴ரகே, ப³ஹூஹி த³ண்டே³ஹி கதஆதா⁴ரகே ச. ஏதே ச உச்சதரா ஹோந்தி பத்தேஹி ஸஹ பதனஸபா⁴வா. தேன ‘‘ஸுஸஜ்ஜிதேஸூ’’தி வுத்தம். ப⁴மகோடிஸதி³ஸோதி யத்த² த⁴மகரணாதி³ம் பவேஸேத்வா லிக²ந்தி, தஸ்ஸ ப⁴மகஸ்ஸ கோடியா ஸதி³ஸோ. தாதி³ஸஸ்ஸ தா³ருஆதா⁴ரகஸ்ஸ அவித்தி²ண்ணதாய ட²பிதோபி பத்தோ பததீதி ‘‘அனோகாஸோ’’தி வுத்தோ.

ஆலிந்த³கமிட்³டி⁴காதீ³னந்தி பமுக²மிட்³டி⁴காதீ³னம், உச்சவத்து²கானந்தி அத்தோ². பா³ஹிரபஸ்ஸேதி பாஸாதா³தீ³னம் ப³ஹிகுட்டே. தனுகமிட்³டி⁴காயாதி வேதி³காய. ஸப்³ப³த்த² பன ஹத்த²ப்பமாணதோ அப்³ப⁴ந்தரே ட²பேதும் வட்டதி. ஆதா⁴ரே பன ததோ ப³ஹிபி வட்டதி.

பாளியம் ஓட்டோ²தி முக²வட்டி. பத்தமாளகந்தி உபசிகானம் அனுட்ட²ஹனத்தா²ய பூ⁴மிதோ உச்சதரம் கதம் வேதி³காகாரமாளகம். மஹாமுக²குண்ட³ஸண்டா²னாதி மஹாமுக²சாடிஸண்டா²னா. லக்³கே³ந்தஸ்ஸ து³க்கடந்தி கேவலம் பத்தம் லக்³கே³ந்தஸ்ஸ, ந த²விகாய லக்³கே³ந்தஸ்ஸாதி வத³ந்தி. வீமம்ஸிதப்³ப³ம். அஞ்ஞேன பன ப⁴ண்ட³கேனாதி அஞ்ஞேன பா⁴ரப³ந்த⁴னேன ப⁴ண்ட³கேன. ‘‘ப³ந்தி⁴த்வா ஓலம்பே³து’’ந்தி வுத்தத்தா பத்தத்த²விகாய அம்ஸப³த்³த⁴கோ யதா² லக்³கி³தட்டா²னதோ ந பரிக³ளதி, ததா² ஸப்³ப³தா²பி ப³ந்தி⁴த்வா ட²பேதும் வட்டதி. ப³ந்தி⁴த்வாபி உபரி ட²பேதும் ந வட்டதீதி உபரி நிஸீத³ந்தா ஓத்த²ரித்வா பி⁴ந்த³ந்தீதி வுத்தம். தத்த² ட²பேதும் வட்டதீதி நிஸீத³னஸங்காபா⁴வதோ வுத்தம். ப³ந்தி⁴த்வா வாதி ப³ந்தி⁴த்வா ட²பிதச²த்தே வா. யோ கோசீதி ப⁴த்தபூரோபி துச்ச²பத்தோபி.

255. பரிஹரிதுந்தி தி³வஸே தி³வஸே பிண்டா³ய சரணத்தா²ய ட²பேதும். பத்தம் அலப⁴ந்தேன பன ஏகதி³வஸம் பிண்டா³ய சரித்வா பு⁴ஞ்ஜித்வா ச²ட்³டே³தும் வட்டதி. தேனாஹ ‘‘தாவகாலிகம் பரிபு⁴ஞ்ஜிதும் வட்டதீ’’தி. பண்ணபுடாதீ³ஸுபி ஏஸேவ நயோ. அபு⁴ம் மேதி அபூ⁴தி மய்ஹம், வினாஸோ மய்ஹந்தி அத்தோ². பாளியம் பிஸாசோ வதமந்தி பிஸாசோ வதாயம், அயமேவ வா பாடோ². பிஸாசில்லிகாதி பிஸாசதா³ரகா. ச²வஸீஸஸ்ஸ பத்தோதி ச²வஸீஸமயோ பத்தோ. பகதிவிகாரஸம்ப³ந்தே⁴ சேதம் ஸாமிவசனம்.

சப்³பே³த்வாதி நிட்டு²பி⁴த்வா. ‘‘படிக்³க³ஹம் கத்வா’’தி வுத்தத்தா உச்சி²ட்ட²ஹத்தே²ன உத³கம் க³ஹேத்வா பத்தம் பரிப்போ²ஸித்வா தோ⁴வனக⁴ம்ஸனவஸேன ஹத்த²ம் தோ⁴விதும் வட்டதி, ஏத்தகேன பத்தம் படிக்³க³ஹம் கத்வா ஹத்தோ² தோ⁴விதோ நாம ந ஹோதி. ஏகம் உத³கக³ண்டு³ஸம் க³ஹேத்வாதி பத்தம் அபு²ஸித்வா தத்த² உத³கமேவ உச்சி²ட்ட²ஹத்தே²ன உக்கி²பித்வா க³ண்டு³ஸம் கத்வா, வாமஹத்தே²னேவ வா பத்தம் உக்கி²பித்வா முகே²ன க³ண்டு³ஸம் க³ஹேதும்பி வட்டதி. ப³ஹி உத³கேன விக்கா²லேத்வாதி த்³வீஸு அங்கு³லீஸு ஆமிஸமத்தம் விக்கா²லேத்வா ப³ஹி க³ஹேதும்பி வட்டதி. படிகா²தி³துகாமோதி ஏத்த² ந ஸயம் கா²தி³துகாமோபி அஞ்ஞேஸம் கா²த³னாரஹம் ட²பேதும் லப⁴தி. தத்தே²வ கத்வாதி பத்தேயேவ யதா²ட²பிதட்டா²னதோ அனுத்³த⁴ரித்வா. லுஞ்சித்வாதி ததோ மம்ஸமேவ நிரவஸேஸம் உப்பட்டேத்வா.

256. கிண்ணசுண்ணேனாதி ஸுராகிண்ணசுண்ணேன. மக்கே²துந்தி ஸூசிம் மக்கே²தும். நிஸ்ஸேணிம்பீதி சதூஹி த³ண்டே³ஹி சீவரப்பமாணேன ஆயதசதுரஸ்ஸம் கத்வா ப³த்³த⁴படலம்பி. ஏத்த² ஹி சீவரகோடியோ ஸமகம் ப³ந்தி⁴த்வா சீவரம் யதா²ஸுக²ம் ஸிப்³ப³ந்தி. தத்த² அத்த²ரிதப்³ப³ந்தி தஸ்ஸா நிஸ்ஸேணியா உபரி சீவரஸ்ஸ உபத்த²ம்ப⁴னத்தா²ய அத்த²ரிதப்³ப³ம். கதி²னஸங்கா²தாய நிஸ்ஸேணியா சீவரஸ்ஸ ப³ந்த⁴னகரஜ்ஜு கதி²னரஜ்ஜூதி மஜ்ஜி²மபத³லோபீஸமாஸோதி ஆஹ ‘‘யாயா’’திஆதி³. தத்த² யஸ்மா த்³வின்னம் படலானம் ஏகஸ்மிம் அதி⁴கே ஜாதே தத்த² வலியோ ஹோந்தி, தஸ்மா து³பட்டசீவரஸ்ஸ படலத்³வயம்பி ஸமகம் கத்வா ப³ந்த⁴னகரஜ்ஜு கதி²னரஜ்ஜூதி வேதி³தப்³ப³ம்.

பாளியம் கதி²னஸ்ஸ அந்தோ ஜீரதீதி கதி²னே ப³த்³த⁴ஸ்ஸ சீவரஸ்ஸ பரியந்தோ ஜீரதி. கதி²னனிஸ்ஸிதஞ்ஹி சீவரம் இத⁴ நிஸ்ஸயவோஹாரேன ‘‘கதி²ன’’ந்தி வுத்தம் ‘‘மஞ்சா கோ⁴ஸந்தீ’’திஆதீ³ஸு விய. அனுவாதம் பரிப⁴ண்ட³ந்தி கதி²னே ப³ந்த⁴னரஜ்ஜூஹி சீவரஸ்ஸ ஸமந்தா பரியந்தஸ்ஸ அஜீரணத்த²ம் யேஹி கேஹிசி சோளகேஹி தீ³க⁴தோ அனுவாதம், திரியதோ பரிப⁴ண்ட³ஞ்ச ஸிப்³பி³த்வா காதும் யத்த² ரஜ்ஜுகே பவேஸேத்வா த³ண்டே³ஸு பலிவேடே²த்வா சீவரஸமகம் ஆகட்³டி⁴தும் ஸக்கா, தாதி³ஸந்தி அத்தோ². கேசி பன ‘‘கதி²னஸங்கா²தேஸு கிலஞ்ஜாதீ³ஸு ஏவ அஜீரணத்தா²ய அனுவாதபரிப⁴ண்ட³கரணம் அனுஞ்ஞாத’’ந்தி வத³ந்தி. தஸ்ஸ மஜ்ஜே²தி புராணகதி²னஸ்ஸேவ அந்தோ. பி⁴க்கு²னோ பமாணேனாதி பி⁴க்கு²னோ சீவரஸ்ஸ பமாணேன. அஞ்ஞம் நிஸ்ஸேணிந்தி தீ³க⁴தோ ச திரியதோ ச அஞ்ஞம் த³ண்ட³ம் ட²பேத்வா ப³ந்தி⁴தும்.

பி³த³லகந்தி தி³கு³ணகரணஸங்கா²தகிரியாவிஸேஸஸ்ஸ அதி⁴வசனம். தேனாஹ ‘‘து³கு³ணகரண’’ந்தி. பவேஸனஸலாகந்தி வலீனம் அக்³க³ஹணத்தா²ய பவேஸனகவேளுஸலாகாதி³. பாளியம் படிக்³க³ஹந்தி அங்கு³லிகஞ்சுகம்.

257. பாதி நாம ப⁴ண்ட³ட்ட²பனகோ பா⁴ஜனவிஸேஸோ. பாளியம் படிக்³க³ஹத²விகந்தி பாதிஆதி³பா⁴ஜனத்த²விகம். சினிதுந்தி உச்சவத்து²பரியந்தஸ்ஸ அபதனத்தா²ய இட்ட²காதீ³ஹி சினிதும். ஆலம்ப³னபா³ஹந்தி ஆலம்ப³னரஜ்ஜுத³ண்டா³தி³. பரிபி⁴ஜ்ஜதீதி கடஸாராதி³கம் கதி²னமஜ்ஜே² ப⁴ங்க³ம் ஹோதி. உஸ்ஸாபேத்வாதி த³ண்ட³கதி²னம் ஸந்தா⁴ய வுத்தம்.

258-9. உத³கம் அகப்பியந்தி ஸப்பாணகம். உபனந்தீ⁴தி வேரம் ப³ந்தி⁴. அத்³தா⁴னமக்³கோ³ படிபஜ்ஜிதப்³போ³தி ஏத்த² அத்³த⁴யோஜனம் அத்³தா⁴னமக்³கோ³ நாம, தம் படிபஜ்ஜிதுகாமஸ்ஸ ஸஞ்சிச்ச விஹாரூபசாராதிக்கமனே ஆபத்தி. அஸஞ்சிச்ச க³தஸ்ஸ பன யத்த² ஸரதி, தத்த² ட²த்வா ஸங்கா⁴டிகண்ணாதி³ம் அனதி⁴ட்ட²ஹித்வா க³மனே பத³வாரேன ஆபத்தீதி வேதி³தப்³ப³ம். ந ஸம்மதீதி ந பஹோதி.

260. அபி⁴ஸன்னகாயாதி ஸேம்ஹாதி³தோ³ஸஸன்னிசிதகாயா. தத்த² மஜ்ஜே²தி அக்³க³ளபாஸகஸ்ஸ மஜ்ஜே². உபரீதி அக்³க³ளபாஸகஸ்ஸ உபரிபா⁴கே³. உத³கட்ட²பனட்டா²னந்தி உத³கட்ட²பனத்தா²ய பரிச்சி²ந்தி³த்வா கதட்டா²னம்.

261. பாளியம் உத³பானந்தி கூபம். நீசவத்து²கோதி கூபஸ்ஸ ஸமந்தா கூலட்டா²னம், பூ⁴மிஸமம் திட்ட²தீதி அத்தோ². உத³கேன ஓத்த²ரிய்யதீதி ஸமந்தா வஸ்ஸோத³கம் ஆக³ந்த்வா கூபே பததீதி அத்தோ².

262. வாஹேந்தீதி உஸ்ஸிஞ்சந்தி. அரஹடக⁴டியந்தம் நாம சக்கஸண்டா²னம் அனேகாரம் அரே அரே க⁴டிகானி ப³ந்தி⁴த்வா ஏகேன, த்³வீஹி வா பரிப்³ப⁴மியமானயந்தம்.

263. ஆவித்³த⁴பக்க²பாஸகந்தி கண்ணிகமண்ட³லஸ்ஸ ஸமந்தா ட²பிதபக்க²பாஸகம். மண்ட³லேதி கண்ணிகமண்ட³லே. பக்க²பாஸகே ட²பேத்வாதி ஸமந்தா சதுரஸ்ஸாகாரேன ப²லகாதீ³னி ட²பேத்வா.

264. நமதகம் நாம ஸந்த²தஸதி³ஸந்தி கேசி வத³ந்தி. கேசி பன ‘‘ருக்க²தசமய’’ந்தி. சம்மக²ண்ட³பரிஹாரேனாதி அனதி⁴ட்ட²ஹித்வா ஸயனாஸனவிதி⁴னாதி அத்தோ². பேளாயாதி அட்ட²ம்ஸஸோளஸம்ஸாதி³ஆகாரேன கதாய பா⁴ஜனாகாராய பேளாய. யத்த² உண்ஹபாயாஸாதி³ம் பக்கி²பித்வா உபரி போ⁴ஜனபாதிம் ட²பேந்தி ப⁴த்தஸ்ஸ உண்ஹபா⁴வாவிக³மனத்த²ம், தாதி³ஸஸ்ஸ பா⁴ஜனாகாரஸ்ஸ ஆதா⁴ரஸ்ஸேதம் அதி⁴வசனம். தேனேவ பாளியம் ‘‘ஆஸித்தகூபதா⁴ன’’ந்தி வுத்தம். தஸ்ஸ ச பாயாஸாதீ³ஹி ஆஸித்தகாதா⁴ரோதி அத்தோ². இத³ஞ்ச ஆஸித்தகூபதா⁴னம் பச்சந்தேஸு ந ஜானந்தி காதும், மஜ்ஜி²மதே³ஸேயேவ கரோந்தி. கேசி பன ‘‘கி³ஹிபரிபோ⁴கோ³ அயோமயாதி³ ஸப்³போ³பி ஆதா⁴ரோ ஆஸித்தகூபதா⁴னமேவ அனுலோமேதீ’’தி வத³ந்தி, ஏகே பன ‘‘கப்பியலோஹமயோ ஆதா⁴ரோ மளோரிகமேவ அனுலோமேதீ’’தி. வீமம்ஸித்வா க³ஹேதப்³ப³ம். புப்³பே³ பத்தகு³த்தியா ஆதா⁴ரோ அனுஞ்ஞாதோ. இதா³னி பு⁴ஞ்ஜிதும் மளோரிகா அனுஞ்ஞாதா. சி²த்³த³ந்தி சி²த்³த³யுத்தம். வித்³த⁴ந்தி அந்தோவினிவித்³த⁴சி²த்³த³ம். ஆவித்³த⁴ந்தி ஸமந்ததோ சி²த்³த³ம்.

265. பத்தம் நிக்குஜ்ஜிதுந்தி ஏத்த² கம்மவாசாய அஸம்போ⁴க³கரணவஸேனேவ நிக்குஜ்ஜனம், ந பத்தானம் அதோ⁴முக²ட்ட²பனேன. தேனாஹ ‘‘அஸம்போ⁴க³ம் ஸங்கே⁴ன கரோதூ’’திஆதி³, தம் வட்³ட⁴ம் கம்மவாசாய ஸங்கே⁴ன ஸத்³தி⁴ம் அஸம்போ⁴க³ம் ஸங்கோ⁴ கரோதூதி அத்தோ².

பத்தம் நிக்குஜ்ஜேய்யாதி வட்³ட⁴ஸ்ஸ பத்தனிக்குஜ்ஜனத³ண்ட³கம்மம் கரேய்ய. அஸம்போ⁴க³ம் ஸங்கே⁴ன கரணந்தி ஸங்கே⁴ன வட்³ட⁴ஸ்ஸ அஸம்போ⁴க³கரணம். யதா² அஸம்போ⁴கோ³ ஹோதி, ததா² கரணந்தி அத்தோ². நிக்குஜ்ஜிதோ…பே… அஸம்போ⁴க³ம் ஸங்கே⁴னாதி ஏத்த² ஸங்கே⁴ன அஸம்போ⁴கோ³ ஹோதீதி அத்தோ² த³ட்ட²ப்³போ³. ஏவம் ப⁴க³வதா அஸம்போ⁴க³கரணஸ்ஸ ஆணத்தத்தா, கம்மவாசாய ச ஸாவிதத்தா, அட்ட²கதா²யஞ்ச ‘‘கோசி தே³ய்யத⁴ம்மோ ந க³ஹேதப்³போ³’’தி வுத்தத்தா பத்தே நிக்குஜ்ஜிதே தஸ்ஸ ஸந்தகம் ஞத்வா க³ண்ஹந்தஸ்ஸ து³க்கடமேவாதி க³ஹேதப்³ப³ம்.

அச்சயோதி ஞாயப்படிபத்திம் அதிக்கமித்வா பவத்தி, அபராதோ⁴தி அத்தோ². மம் அச்சக³மாதி மம் அதிக்கம்ம பவத்தோ. தம் தே மயம் படிக்³க³ண்ஹாமாதி தம் தே அபராத⁴ம் மயம் க²மாம. பி⁴க்கூ²னம் அலாபா⁴ய பரிஸக்கதீதிஆதீ³ஸு அலாபா⁴ய பரிஸக்கனாதி³தோ விரதோதி ஏவமத்தோ² க³ஹேதப்³போ³. அஸம்போ⁴க³ம் பி⁴க்கு²ஸங்கே⁴னாதி ஏத்த² ‘‘கதோ’’தி பாட²ஸேஸோ.

268. யாவ பச்சி²மா ஸோபானகளேவராதி பட²மஸோபானப²லகம் ஸந்தா⁴ய வுத்தம். தஞ்ஹி பச்சா² து³ஸ்ஸேன ஸந்த²தத்தா ஏவ வுத்தம். ‘‘பச்சி²மம் ஜனதம் ததா²க³தோ அனுகம்பதீ’’தி இத³ம் தே²ரோ அனாக³தே பி⁴க்கூ²னம் சேலபடிகஸ்ஸ அக்கமனபச்சயா அபவாத³ம் ஸிக்கா²பத³பஞ்ஞத்தியா நிவாரணேன ப⁴க³வதோ அனுகம்பம் ஸந்தா⁴யாஹ. அபக³தக³ப்³பா⁴தி விஜாதபுத்தா. தேனாஹ ‘‘மங்க³லத்தா²யா’’தி.

269-270. பீ³ஜனிந்தி சதுரஸ்ஸபீ³ஜனிம். ஏகபண்ணச்ச²த்தந்தி தாலபண்ணாதி³னா ஏகேன பத்தேன கதச²த்தம்.

274-5. அனுரக்க²ணத்த²ந்தி பரிக்³க³ஹேத்வா கோ³பனத்த²ம். தீ³க⁴ம் காரேந்தீதி கேஸேஹி ஸத்³தி⁴ம் அச்சி²ந்தி³த்வா ட²பாபேந்தி. சதுகோணந்தி யதா² உபரி நலாடந்தேஸு த்³வே, ஹேட்டா² ஹனுகபஸ்ஸே த்³வேதி சத்தாரோ கோணா பஞ்ஞாயந்தி, ஏவம் சதுரஸ்ஸம் கத்வா கப்பாபனம். பாளியம் தா³டி²கம் ட²பாபேந்தீதி உத்தரோட்டே² மஸ்ஸும் அச்சி²ந்தி³த்வா ட²பாபேந்தி. ருதீ⁴தி கு²த்³த³கவணம்.

277. பாளியம் லோஹப⁴ண்ட³கம்ஸப⁴ண்ட³ஸன்னிசயோதி லோஹப⁴ண்ட³ஸ்ஸ, கம்ஸப⁴ண்ட³ஸ்ஸ ச ஸன்னிசயோதி அத்தோ². ப³ந்த⁴னமத்தந்தி வாஸித³ண்டா³தீ³னம் கோடீஸு அபாதனத்த²ம் லோஹேஹி ப³ந்த⁴னம். தந்தகந்தி ஆயோக³வாயனத்த²ம் ததா³காரேன பஸாரிததந்தம்.

278. ‘‘யத்த² ஸரதி, தத்த² ப³ந்தி⁴தப்³ப³’’ந்தி ஏதேன அஸஞ்சிச்ச காயப³ந்த⁴னம் அப³ந்தி⁴த்வா பவிட்ட²ஸ்ஸ அனாபத்தீதி த³ஸ்ஸேதி. முரஜவட்டிஸண்டா²னம் வேடே²த்வா கதந்தி ஏவம் ப³ஹுரஜ்ஜுகே ஏகதோ கத்வா நானாவண்ணேஹி ஸுத்தேஹி கதந்தி கேசி வத³ந்தி. ஏகவண்ணஸுத்தேனாபி வலயக⁴டகாதி³விகாரம் த³ஸ்ஸேத்வா வேடி²தம்பி முரஜமேவ. விகாரம் பன அத³ஸ்ஸேத்வா மட்ட²ம் கத்வா நிரந்தரம் வேடி²தம் வட்டதி. தேனேவ து³தியபாராஜிகஸம்வண்ணனாயம் வுத்தம் ‘‘ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ‘ப³ஹுரஜ்ஜுக’ந்தி ந வத்தப்³ப³ம், வட்டதீ’’தி. முத்³தி³ககாயப³ந்த⁴னம் நாம சதுரஸ்ஸம் அகத்வா ஸஜ்ஜிதம். பாமங்க³த³ஸா சதுரஸ்ஸா. முதி³ங்க³ஸண்டா²னேனாதி வரகஸீஸாகாரேன. பாஸந்தோதி த³ஸாபரியோஸானம்.

279. பாளியம் க³ண்டி²கப²லகம் பாஸகப²லகந்தி ஏத்த² தா³ருத³ந்தாதி³மயேஸு ப²லகேஸு க³ண்டி²கபாஸகானி அப்பேத்வா சீவரே ட²பேதும் அனுஞ்ஞாதம். கோட்டோ விவரியதீதி அனுவாதோ விவரியதி.

280-1. பாளிகாரகோதி பி⁴க்கூ²னம் யதா²வுட்³ட⁴ம் பாளியா பதிட்டா²பகோ. தஸ்ஸாபி ததா² பாருபிதும் ந வட்டதி. பாளியம் முண்ட³வட்டீதி மல்லாத³யோ.

282. பமாணங்கு³லேனாதி வட்³ட⁴கீஅங்கு³லேன. கேசி பன ‘‘பகதிஅங்கு³லேனா’’தி வத³ந்தி, தம் சதுரங்கு³லபச்சி²மகவசனேன ந ஸமேதி. ந ஹி பகதங்கு³லேன சதுரங்கு³லப்பமாணம் த³ந்தகட்ட²ம் கண்டே² அவிலக்³க³ம் கா²தி³தும் ஸகாதி.

285. பாளியம் ஸகாய நிருத்தியா பு³த்³த⁴வசனம் தூ³ஸேந்தீதி மாக³த⁴பா⁴ஸாய ஸப்³பே³ஸம் வத்தும் ஸுகரதாய ஹீனஜச்சாபி உக்³க³ண்ஹந்தா தூ³ஸேந்தீதி அத்தோ².

289. மா பி⁴க்கூ² ப்³யாபா³த⁴யிம்ஸூதி லஸுணக³ந்தே⁴ன பி⁴க்கூ² மா பா³த⁴யிம்ஸு.

291. அவலேக²னபீட²ரோதி அவலேக²னகட்டா²னம் ட²பனபா⁴ஜனவிஸேஸோ. அபிதா⁴னந்தி பிதா⁴னப²லகாதி³.

கு²த்³த³கவத்து²கதா²வண்ணனா நிட்டி²தா.

கு²த்³த³கவத்து²க்க²ந்த⁴கவண்ணனானயோ நிட்டி²தோ.