6. ஸேனாஸனக்க²ந்த⁴கோ

விஹாரானுஜானனகதா²வண்ணனா

295. ஸேனாஸனக்க²ந்த⁴கே ஸிஸிரேதி ஸிஸிரகாலே ஹிமபாதவஸேன ஸத்தாஹவத்³த³லிகாதி³வஸ்ஸபாதவஸ்ஸேன ச உப்பன்னோ க²ரோ ஸீதஸம்ப²ஸ்ஸோ அதி⁴ப்பேதோதி ஆஹ ‘‘ஸம்பு²ஸிதகோ’’தி. ‘‘ததோ’’தி இத³ம் கத்துஅத்தே² நிஸ்ஸக்கவசனம், தேன ச விஹாரேன வாதாதபோ படிஹஞ்ஞதீதி அத்தோ²தி ஆஹ ‘‘விஹாரேன படிஹஞ்ஞதீ’’தி.

296. ஆவிஞ்ச²னசி²த்³த³ந்தி யத்த² அங்கு³லிம் வா ரஜ்ஜுஸங்க²லிகாதி³ம் வா பவேஸேத்வா கவாடம் ஆகட்³ட⁴ந்தா த்³வாரபா³ஹம் பு²ஸாபேந்தி, தஸ்ஸேதம் அதி⁴வசனம். ஸேனாஸனபரிபோ⁴கே³ அகப்பியம் நாம நத்தீ²தி த³ஸ்ஸனத்த²ம் ‘‘ஸசேபி தீ³பினங்கு³ட்டே²னா’’திஆதி³ வுத்தம். சேதியே வேதி³காஸதி³ஸந்தி வாதபானதா³ரும் வா ஜாலம் வா அட்ட²பேத்வா தா³ருட்டா²னே சேதியே வேதி³காய பட்டாதீ³னி விய இட்ட²காதீ³ஹி உத்³த⁴ம், திரியஞ்ச பட்டிகாத³யோ த³ஸ்ஸேத்வா சதுசி²த்³த³யுத்தம் கதம். த²ம்ப⁴கவாதபானம் நாம திரியம் தா³ரூனி அத³த்வா உத்³த⁴ம் ட²பிததா³ரூஹி ஏவ கதம். சோளகபாத³புஞ்ச²னம் ப³ந்தி⁴துந்தி வாதபானப்பமாணேன பாத³புஞ்ச²னஸதி³ஸம் சோளகாதி³னா ப³ந்தி⁴த்வா வக்³கு³லிஆதி³ப்பவேஸனனிவாரணத்த²ம், கதே²துந்தி அத்தோ². மிட்³ட⁴கந்தி மஞ்சாகாரேன கட்ட²மத்திகாதீ³ஹி கதவேதி³காகாரம்.

297. சதுரஸ்ஸபீட²ந்தி ஸமசதுரஸ்ஸம். அட்ட²ங்கு³லபாத³கம் வட்டதீதி அட்ட²ங்கு³லபாத³கமேவ வட்டதி. பமாணாதிக்கந்தோபி வட்டதீதி ஸமசதுரஸ்ஸமேவ ஸந்தா⁴ய வுத்தம். ஆயதசதுரஸ்ஸா பன ஸத்தங்க³பஞ்சங்கா³பி உச்சபாதா³ ந வட்டந்தி. வேத்தேஹேவ சதுரஸ்ஸாதி³ஆகாரேன கதம் ப⁴த்³த³பீட²ந்தி ஆஹ ‘‘வேத்தமயம் பீட²’’ந்தி. தா³ருபட்டிகாய உபரீதி அடனிஆகாரேன டி²ததா³ருபடலஸ்ஸ ஹேட்டா² உத்³த⁴ம் பாத³ம் கத்வா. பவேஸனகாலஞ்ஹி ஸந்தா⁴ய ‘‘உபரீ’’தி வுத்தம். ஏளகஸ்ஸ பச்சி²மபாத³த்³வயம் விய வங்காகாரேன டி²தத்தா பனேதம் ‘‘ஏளகபாத³பீட²’’ந்தி வுத்தம். பலோடே²ந்தீதி ஸஹ மஞ்சேஹி பவட்டேந்தி. ருக்கே², லதா ச முஞ்சித்வா அவஸேஸம் க³ச்சா²தி³கம் ஸப்³ப³ம்பி திணஜாதி ஏவாதி ஆஹ ‘‘யேஸம் கேஸஞ்சி திணஜாதிகான’’ந்திஆதி³.

உபத³ஹந்தீதி ட²பேந்தி. ஸீஸப்பமாணம் நாம யத்த² கீ³வாய ஸஹ ஸகலம் ஸீஸம் ட²பேதும் ஸக்கா, தஸ்ஸ ச முட்டி²ரதனம் வித்தா²ரப்பமாணந்தி த³ஸ்ஸேந்தோ ‘‘வித்தா²ரதோ’’திஆதி³மாஹ. இத³ஞ்ச பி³ம்போ³ஹனஸ்ஸ உபோ⁴ஸு அந்தேஸு ட²பேதப்³ப³சோளப்பமாணத³ஸ்ஸனம். தஸ்ஸ வஸேன பி³ம்போ³ஹனஸ்ஸ வித்தா²ரப்பமாணம் பரிச்சி²ஜ்ஜதி, தம் வட்டம் வா சதுரஸ்ஸம் வா கத்வா ஸிப்³பி³தம் யதா² கோடிதோ கோடி வித்தா²ரதோ புது²லட்டா²னம் முட்டி²ரதனப்பமாணம் ஹோதி, ஏவம் ஸிப்³பி³தப்³ப³ம். இதோ அதி⁴கம் ந வட்டதி, தம் பன அந்தேஸு ட²பிதசோளம் கோடியா கோடிம் ஆஹச்ச தி³கு³ணம் கதம் திகண்ணம் ஹோதி. தேஸு தீஸு கண்ணேஸு த்³வின்னம் கண்ணானமந்தரம் வித³த்தி²சதுரங்கு³லம் ஹோதி, மஜ்ஜ²ட்டா²னம் கோடிதோ கோடிம் ஆஹச்ச முட்டி²ரதனம் ஹோதி, இத³மஸ்ஸ உக்கட்ட²ப்பமாணம். தேனாஹ ‘‘தீஸு கண்ணேஸூ’’திஆதி³.

‘‘கம்ப³லமேவ…பே… உண்ணபி⁴ஸிஸங்க்²யமேவ க³ச்ச²தீ’’தி ஸாமஞ்ஞதோ வுத்தத்தா கோ³னகாதி³அகப்பியம்பி உண்ணமயத்த²ரணம் பி⁴ஸியம் பக்கி²பித்வா ஸயிதும் வட்டதீதி த³ட்ட²ப்³ப³ம்.

மஸூரகேதி சம்மமயபி⁴ஸியம். சம்மமயம் பன பி³ம்போ³ஹனம் தூலபுண்ணம்பி ந வட்டதி. பாளியம் ஸேனாஸனபரிக்கா²ரது³ஸ்ஸந்தி ஸேனாஸனபரிக்கா²ரகரணத்தா²ய து³ஸ்ஸம். பி⁴ஸிம் ஓனந்தி⁴துந்தி பி⁴ஸித்த²விகாய பக்கி²பித்வா ப³ந்தி⁴தும். பரிபி⁴ஜ்ஜதீதி மஞ்சாதி³தோ ஸாரியமானா பீட²கோடிஆதீ³ஸு நிஸீத³ந்தேஹி க⁴ம்ஸியமானா பி⁴ஸி பரிபி⁴ஜ்ஜதி. ஓனத்³த⁴மஞ்சந்தி பி⁴ஸிம் ஏகாப³த்³த⁴ம் கத்வா ப³த்³த⁴மஞ்சம். பாளியம் ச²விம் உப்பாடேத்வா ஹரந்தீதி பி⁴ஸிச்ச²விம் சோரா ஹரந்தி. போ²ஸிதுந்தி சோரேஹி ஹரிதஸ்ஸ பச்சா² ஹரிதஸஞ்ஞாணபு²ஸிதபி³ந்தூ³னி தா³தும். பி⁴த்திகம்மந்தி நானாவண்ணேஹி விபி⁴த்திராஜிகரணம். ஹத்த²கம்மந்தி ஹத்தே²ன யம் கிஞ்சி ஸஞ்ஞாகரணம்.

298. பாளியம் ந நிபததீதி ந அல்லீயதி. படிபா³ஹேத்வாதி க⁴ம்ஸித்வா. ந நிப³ந்த⁴தீதி அனிப³ந்த⁴னீயோ, ந லக்³க³னகோதி அத்தோ².

299. ‘‘கரோஹீ’’தி வத்தும்பி ந லப்³ப⁴தீதி ஆணத்தியா ஏவ படிக்கி²த்தத்தா த்³வாரபாலம் ‘‘கிம் ந கரோஸீ’’திஆதி³னா பரியாயேன வத்தும் வட்டதி. ஜாதகபகரணந்தி ஜாதகபடிஸம்யுத்தம் இத்தி²புரிஸாதி³ யம் கிஞ்சி ரூபம் அதி⁴ப்பேதம். ‘‘பரேஹி காராபேது’’ந்தி வுத்தத்தா பு³த்³த⁴ரூபம்பி ஸயம் காதும் ந லப⁴தி. பாளியம் பஞ்சபடிகந்தி ஜாதிஆதி³பஞ்சப்பகாரவண்ணமட்ட²ம்.

300. உபசாரோ ந ஹோதீதி க³ப்³ப⁴ஸ்ஸ ப³ஹி ஸமந்தா அனுபரிக³மனஸ்ஸ ஓகாஸோ நப்பஹோதி. ருக்க²ம் விஜ்ஜி²த்வாதி தச்சி²தஸாரதா³ரும் அக்³க³ஸமீபே விஜ்ஜி²த்வா. கத்வாதி சி²த்³தே³ கத்வா. கப்பகதம் விய ஸாரகா²ணுகே ஆகோடேத்வா ஏவம் கதமேவ ‘‘ஆஹரிமம் பி⁴த்திபாத³’’ந்தி வுத்தம். உபத்த²ம்ப⁴னத்த²ம் பூ⁴மியம் பதிட்டா²பேதுந்தி ஜிண்ணபி⁴த்திபாதே³ன ப³ஹி ஸமானபா⁴ரம் கா²ணுகப்பஸீஸேன உஸ்ஸாபேத்வா மூலேன பூ⁴மியம் பதிட்டா²பேதும். பரித்தாணத்த²ந்தி உல்லித்தாவலித்தகுடியா ஓவஸ்ஸனட்டா²னஸ்ஸ பரித்தாணத்த²ம். கிடிகந்தி தாலபண்ணாதீ³ஹி கதபத³லம். மத்³தி³தமத்திகந்தி ஓவஸ்ஸனசி²த்³த³ஸ்ஸ பித³ஹனத்த²ம் வுத்தம்.

உப⁴தோகுட்டம் நீஹரித்வா கதபதே³ஸஸ்ஸாதி யதா² ப³ஹி டி²தா உஜுகம் அந்தோ நிஸின்னே ந பஸ்ஸந்தி, ஏவம் த்³வாராபி⁴முக²ம் பித³ஹனவஸேன பி⁴த்திஞ்ச அஞ்ஞதோ த்³வாரஞ்ச யோஜேத்வா கதட்டா²னம் வத³தி. ஸமந்தா பரியாகா³ரோதி ஸமந்ததோ ஆவித்³த⁴பமுக²ம். வம்ஸம் த³த்வாதி புரிஸப்பமாணே பாதே³ நிக²ணித்வா தேஸம் உபரி பிட்டி²வம்ஸஸதி³ஸம் பஸ்ஸவம்ஸம் ட²பேத்வா ஓஸாரேத்வா. ஏகம் த³ண்ட³கோடிம் அதிஉச்சாய விஹாரபி⁴த்திகோடியா ஏகம் கோடிம் நீசே வம்ஸபிட்டி²யம் ட²பனவஸேன த³ண்ட³கே பஸாரேத்வா. சக்கலயுத்தோ கிடிகோதி கவாடம் விய விவரணத²கனஸுக²த்த²ம் சக்கலப³ந்த⁴கிடிகம். பாளியம் உக்³கா⁴டனகிடிகந்தி ஆபணாதீ³ஸு அனத்தி²ககாலே உக்கி²பித்வா, உபரி ச ப³ந்தி⁴த்வா பச்சா² ஓதரணகிடிகம், கப்பஸீஸேஹி வா உபத்த²ம்ப⁴னீஹி உக்கி²பித்வா பச்சா² ஓதரணகிடிகம்பி.

301. பானீயம் ஓதப்பதீதி பானீயபா⁴ஜனேஸு ட²பிதபானீயம் ஆதபேன ஸந்தப்பதி.

303. தயோ வாடேதி தயோ பரிக்கே²பே. வேளுவாடந்தி ஸப்³ப³ம் தா³ருபரிக்கே²பம் ஸங்க³ண்ஹாதி. கண்டகவாடந்தி ஸப்³ப³ஸாகா²பரிக்கே²பம்.

305. ஆலோகோ அந்தரதா⁴யீதி யோ பு³த்³தா⁴ரம்மணாய பீதியா ஆனுபா⁴வேன மஹந்தோ ஓபா⁴ஸோ அஹோஸி, யேன சஸ்ஸ பதீ³பஸஹஸ்ஸேன விய விக³தந்த⁴காரோ மக்³கோ³ அஹோஸி, ஸோ ப³ஹினக³ரே ச²வஸரீரஸமாகுலம் து³க்³க³ந்த⁴ம் பீ³ப⁴ச்ச²ம் ஆமகஸுஸானம் பத்தஸ்ஸ ப⁴யேன பீதிவேகே³ மந்தீ³பூ⁴தே அந்தரதா⁴யி.

ஸதம் ஹத்தீ²தி கா³தா²ய ஹத்தி²னோ ஸதஸஹஸ்ஸானீதி ஏவம் பச்சேகம் ஸஹஸ்ஸ-ஸத்³தே³ன யோஜேத்வா அத்தோ² ஞாதப்³போ³. பத³வீதிஹாரஸ்ஸாதி ‘‘பு³த்³த⁴ம் வந்தி³ஸ்ஸாமீ’’தி ரதனத்தயம் உத்³தி³ஸ்ஸ க³ச்ச²தோ ஏகபத³வீதிஹாரஸ்ஸ, தப்பச்சயகுஸலப²லஸ்ஸாதி அத்தோ². தஸ்ஸ ஸோளஸமோ பா⁴கோ³ கலம் நாம, தம் ஸோளஸிம் கலம் யதா²வுத்தா ஹத்தி²ஆத³யோ ஸப்³பே³ நாக்³க⁴ந்தி நாரஹந்தி, நித³ஸ்ஸனமத்தஞ்சேதம். அனேகஸதஸஹஸ்ஸபா⁴க³ம்பி நாக்³க⁴ந்தி.

அந்த⁴காரோ அந்தரதா⁴யீதி புன ப³லவபீதியா ஆலோகே ஸமுப்பன்னே அந்தரதா⁴யி. ஆஸத்தியோதி தண்ஹாயோ. வயகரணந்தி தே³ய்யத⁴ம்மமூலம் நவகம்மம்.

309. த³தே³ய்யாதி நவகம்மம் அதி⁴ட்டா²தும் விஹாரே இஸ்ஸரியம் த³தே³ய்யாதி அத்தோ². தி³ன்னோதி நவகம்மம் காதும் விஹாரோ தி³ன்னோ, விஹாரே நவகம்மம் தி³ன்னந்தி வா அத்தோ².

313-4. ஸந்தா²கா³ரேதி ஸன்னிபாதமண்ட³பே. ஓகாஸேதி நிவாஸோகாஸே. உத்³தி³ஸ்ஸ கதந்தி ஸங்க⁴ம் உத்³தி³ஸ்ஸ கதம். கி³ஹிவிகடந்தி கி³ஹீஹி கதம் பஞ்ஞத்தம், கி³ஹிஸந்தகந்தி அத்தோ².

விஹாரானுஜானனகதா²வண்ணனா நிட்டி²தா.

ஸேனாஸனக்³கா³ஹகதா²வண்ணனா

318. ‘‘ச²மாஸச்சயேன ச²மாஸச்சயேனா’’தி இத³ம் த்³விக்க²த்தும் பச்சயதா³னகாலபரிச்சே²த³த³ஸ்ஸனம், ஏவம் உபரிபி. ‘‘தம் ந கா³ஹேதப்³ப³’’ந்தி வசனஸ்ஸ காரணமாஹ ‘‘பச்சயேனேவ ஹி த’’ந்திஆதி³னா, பச்சயஞ்ஞேவ நிஸ்ஸாய தத்த² வஸித்வா படிஜக்³க³னா ப⁴விஸ்ஸந்தீதி அதி⁴ப்பாயோ.

உப்³ப⁴ண்டி³காதி உக்கி²த்தப⁴ண்டா³ ப⁴விஸ்ஸந்தி. தீ³க⁴ஸாலாதி சங்கமனஸாலா. மண்ட³லமாளோதி உபட்டா²னஸாலா. அனுத³ஹதீதி பீளேதி. ‘‘அதா³தும் ந லப்³ப⁴தீ’’தி இமினா ஸஞ்சிச்ச அத³த³ந்தஸ்ஸ படிபா³ஹனே பவிஸனதோ து³க்கடந்தி தீ³பேதி.

‘‘ந கோ³சரகா³மோ க⁴ட்டேதப்³போ³’’தி வுத்தமேவத்த²ம் விபா⁴வேதும் ‘‘ந தத்த² மனுஸ்ஸா வத்தப்³பா³’’திஆதி³ வுத்தம். விதக்கம் சி²ந்தி³த்வாதி ‘‘இமினா நீஹாரேன க³ச்ச²ந்தம் தி³ஸ்வா நிவாரேத்வா பச்சயே த³ஸ்ஸந்தீ’’தி ஏவரூபம் விதக்கம் அனுப்பாதே³த்வா. ப⁴ண்ட³ப்படிச்சா²த³னந்தி படிச்சா²த³னப⁴ண்ட³ம். ஸரீரப்படிச்சா²த³னசீவரந்தி அத்தோ². ‘‘ஸுத்³த⁴சித்தத்தாவ அனவஜ்ஜ’’ந்தி இத³ம் புச்சி²தக்க²ணே காரணாசிக்க²னம் ஸந்தா⁴ய வுத்தம் ந ஹோதி அஸுத்³த⁴சித்தஸ்ஸபி புச்சி²தபஞ்ஹவிஸஜ்ஜனே தோ³ஸாபா⁴வா. ஏவம் பன க³தே மம் புச்சி²ஸ்ஸந்தீதிஸஞ்ஞாய அக³மனம் ஸந்தா⁴ய வுத்தந்தி த³ட்ட²ப்³ப³ம்.

படிஜக்³கி³தப்³பா³னீதி க²ண்ட³பு²ல்லபடிஸங்க²ரணஸம்மஜ்ஜனாதீ³ஹி படிஜக்³கி³தப்³பா³னி. முத்³த³வேதி³காயாதி சேதியஸ்ஸ ஹம்மியவேதி³காய க⁴டாகாரஸ்ஸ உபரி சதுரஸ்ஸவேதி³காய. கஸ்மா புச்சி²தப்³ப³ந்திஆதி³ யதோ பகதியா லப⁴தி. தத்தா²பி புச்ச²னஸ்ஸ காரணஸந்த³ஸ்ஸனத்த²ம் வுத்தம்.

படிக்கம்மாதி விஹாரதோ அபஸக்கித்வா. தமத்த²ம் த³ஸ்ஸேந்தோ ‘‘யோஜனத்³வியோஜனந்தரே ஹோதீ’’தி ஆஹ. உபனிக்கே²பம் ட²பேத்வாதி வட்³டி⁴யா கஹாபணாதி³ம் ட²பேத்வா, கே²த்தாதீ³னி வா நியமேத்வா. இதி ஸத்³தா⁴தே³ய்யேதி ஏவம் ஹேட்டா² வுத்தனயேன ஸத்³தா⁴ய தா³தப்³பே³ வஸ்ஸாவாஸிகலாப⁴விஸயேதி அத்தோ².

வத்து² பனாதி தத்ருப்பாதே³ உப்பன்னரூபியம், தஞ்ச ‘‘ததோ சதுபச்சயம் பரிபு⁴ஞ்ஜதா²’’தி தி³ன்னகே²த்தாதி³தோ உப்பன்னத்தா கப்பியகாரகானம் ஹத்தே² ‘‘கப்பியப⁴ண்ட³ம் பரிபு⁴ஞ்ஜதா²’’தி தா³யகேஹி தி³ன்னவத்து²ஸதி³ஸம் ஹோதீதி ஆஹ ‘‘கப்பியகாரகானம் ஹீ’’திஆதி³.

ஸங்க⁴ஸுட்டு²தாயாதி ஸங்க⁴ஸ்ஸ ஹிதாய. புக்³க³லவஸேனாதி ‘‘பி⁴க்கூ² சீவரேன கிலமந்தீ’’தி ஏவம் புக்³க³லபராமாஸவஸேன, ந ‘‘ஸங்கோ⁴ கிலமதீ’’தி ஏவம் ஸங்க⁴பராமாஸவஸேன.

‘‘கப்பியப⁴ண்ட³வஸேனா’’தி ஸாமஞ்ஞதோ வுத்தமேவத்த²ம் விபா⁴வேதும் ‘‘சீவரதண்டு³லாதி³வஸேனேவ சா’’தி வுத்தம். ச-காரோ சேத்த² பன-ஸத்³த³த்தே² வத்ததி, ந ஸமுச்சயத்தே²தி த³ட்ட²ப்³ப³ம். புக்³க³லவஸேனேவ, கப்பியப⁴ண்ட³வஸேன ச அபலோகனப்பகாரம் த³ஸ்ஸேதும் ‘‘தம் பன ஏவம் கத்தப்³ப³’’ந்திஆதி³ வுத்தம்.

சீவரபச்சயம் ஸல்லக்கே²த்வாதி ஸத்³தா⁴தே³ய்யதத்ருப்பாதா³தி³வஸேன தஸ்மிம் வஸ்ஸாவாஸே லப்³ப⁴மானம் சீவரஸங்கா²தம் பச்சயம் ‘‘ஏத்தக’’ந்தி பரிச்சி²ந்தி³த்வா. ஸேனாஸனஸ்ஸாதி ஸேனாஸனக்³கா³ஹாபனஸ்ஸ. ‘‘நவகோ வுட்³ட⁴தரஸ்ஸ, வுட்³டோ⁴ ச நவகஸ்ஸா’’தி இத³ம் ஸேனாஸனக்³கா³ஹஸ்ஸ அத்தனாவ அத்தனோ க³ஹணம் அஸாருப்பந்தி வுத்தம், த்³வே அஞ்ஞமஞ்ஞம் கா³ஹேஸ்ஸந்தீதி அதி⁴ப்பாயோ. அட்ட²பி ஸோளஸபி ஜனே ஸம்மன்னிதும் வட்டதீதி ஏககம்மவாசாய ஸப்³பே³பி ஏகதோ ஸம்மன்னிதும் வட்டதி. நிக்³க³ஹகம்மமேவ ஹி ஸங்கோ⁴ ஸங்க⁴ஸ்ஸ ந கரோதி. தேனேவ ஸத்தஸதிகக்க²ந்த⁴கே ‘‘உப்³பா³ஹிககம்மஸம்முதியம் அட்ட²பி ஜனா ஏகதோவ ஸம்மதாதி.

ஆஸனக⁴ரந்தி படிமாக⁴ரம். மக்³கோ³தி உபசாரஸீமப்³ப⁴ந்தரக³தே கா³மாபி⁴முக²மக்³கே³ கதஸாலா வுச்சதி. ஏவம் போக்க²ரணீருக்க²மூலாதீ³ஸுபி.

லப⁴ந்தீதி தத்ரவாஸினோ பி⁴க்கூ² லப⁴ந்தி. விஜடேத்வாதி ‘‘ஏகேகஸ்ஸ பஹோனகப்பமாணேன வியோஜேத்வா. ஆவாஸேஸு பக்கி²பித்வாதி ‘‘இதோ உப்பன்னம் அஸுகஸ்மிம் அஸுகஸ்மிஞ்ச ஆவாஸே வஸந்தா பாபேத்வா க³ண்ஹந்தூ’’தி வாசாய உபஸம்ஹரித்வா. பவிஸிதப்³ப³ந்தி மஹாலாபே⁴ பரிவேணே வஸித்வாவ லாபோ⁴ க³ஹேதப்³போ³தி அதி⁴ப்பாயோ.

அயம்பீதி ஏத்த² யோ பம்ஸுகூலிகோ பச்சயம் விஸ்ஸஜ்ஜேதி. தேனேவ விஸ்ஸட்டோ² அயம் சீவரபச்சயோபீதி யோஜனா. பாத³மூலே ட²பேத்வா ஸாடகம் தே³ந்தீதி பச்சயதா³யகா தே³ந்தி. ஏதேன க³ஹட்டே²ஹி பாத³மூலே ட²பேத்வா தி³ன்னம்பி பம்ஸுகூலிகானம்பி வட்டதீதி த³ஸ்ஸேதி. அத² வஸ்ஸாவாஸிகம் தே³மாதி வத³ந்தீதி ஏத்த² பம்ஸுகூலிகானம் ந வட்டதீதி அஜ்ஜா²ஹரித்வா யோஜேதப்³ப³ம். வஸ்ஸம்வுத்த²பி⁴க்கூ²னந்தி பம்ஸுகூலிகதோ அஞ்ஞேஸம் பி⁴க்கூ²னம்.

உபனிப³ந்தி⁴த்வா கா³ஹாபேதப்³ப³ந்தி இத⁴ ருக்கா²தீ³ஸு வஸித்வா சீவரம் க³ண்ஹதா²தி படிப³ந்த⁴ம் கத்வா கா³ஹேதப்³ப³ம்.

பாடிபத³அருணதோதிஆதி³ வஸ்ஸூபனாயிகதி³வஸம் ஸந்தா⁴ய வுத்தம். அந்தராமுத்தகம் பன பாடிபத³ம் அதிக்கமித்வாபி கா³ஹேதும் வட்டதி. நிப³த்³த⁴வத்தம் ட²பேத்வாதி ஸஜ்ஜா²யமனஸிகாராதீ³ஸு நிரந்தரகரணீயேஸு கத்தப்³ப³ம் கதிகவத்தம் கத்வா. கஸாவபரிப⁴ண்ட³ந்தி கஸாவரஸேஹி பூ⁴மிபரிகம்மம்.

திவித⁴ம்பீதி பரியத்திபடிபத்திபடிவேத⁴வஸேன திவித⁴ம்பி. ஸோதே⁴த்வாதி ஆசாராதீ³ஸு உபபரிக்கி²த்வா. ஏகசாரிகவத்தந்தி பா⁴வனாகம்மம். தஞ்ஹி க³ணஸங்க³ணிகம் பஹாய ஏகசாரிகேனேவ வத்திதப்³ப³த்தா ஏவம் வுத்தம். த³ஸவத்து²ககதா² நாம அப்பிச்ச²கதா², ஸந்துட்டி², பவிவேக, அஸம்ஸக்³க³, வீரியாரம்ப⁴, ஸீல, ஸமாதி⁴, பஞ்ஞா, விமுத்தி, விமுத்திஞாணத³ஸ்ஸனகதா²தி இமா த³ஸ.

த³ந்தகட்ட²கா²த³னவத்தந்தி த³ந்தகட்ட²மாளகே நிக்கி²த்தேஸு த³ந்தகட்டே²ஸு ‘‘தி³வஸே தி³வஸே ஏகமேவ த³ந்தகட்ட²ம் க³ஹேதப்³ப³’’ந்திஆதி³னா (பாரா. அட்ட². 1.109) அதி³ன்னாதா³னே த³ந்தபோனகதா²யம் வுத்தம் வத்தம். பத்தம் வா…பே… ந கதே²தப்³ப³ந்தி பத்தகு³த்தத்தா²ய வுத்தம். விஸபா⁴க³கதா²தி திரச்சா²னகதா². க²ந்த⁴கவத்தந்தி வத்தக்க²ந்த⁴கே (சூளவ. 365) ஆக³தம் பிண்ட³சாரிகவத்ததோ அவஸிட்ட²வத்தம் தஸ்ஸ ‘‘பி⁴க்கா²சாரவத்த’’ந்தி விஸும் க³ஹிதத்தா.

இதா³னி யம் தா³யகா பச்சி²மவஸ்ஸம்வுத்தா²னம் வஸ்ஸாவாஸிகம் தே³ந்தி, தத்த² படிபஜ்ஜனவிதி⁴ம் த³ஸ்ஸேதும் ‘‘பச்சி²மவஸ்ஸூபனாயிகதி³வஸே பனா’’தி ஆரத்³த⁴ம். ஆக³ந்துகோ ஸசே பி⁴க்கூ²தி சீவரே கா³ஹிதே பச்சா² ஆக³தோ ஆக³ந்துகோ பி⁴க்கு². பத்தட்டா²னேதி வஸ்ஸக்³கே³ன பத்தட்டா²னே. பட²மவஸ்ஸூபக³தாதி ஆக³ந்துகஸ்ஸ ஆக³மனதோ புரேதரமேவ பச்சி²மிகாய வஸ்ஸூபனாயிகாய வஸ்ஸூபக³தா. லத்³த⁴ம் லத்³த⁴ந்தி புனப்புனம் தா³யகானம் ஸந்திகா ஆக³தாக³தஸாடகம்.

நேவ வஸ்ஸாவாஸிகஸ்ஸ ஸாமினோதி சி²ன்னவஸ்ஸத்தா வுத்தம். பட²மமேவ கதிகாய கதத்தா ‘‘நேவ அதா³தும் லப⁴ந்தீ’’தி வுத்தம், தா³தப்³ப³ம் வாரேந்தானம் கீ³வா ஹோதீதி அதி⁴ப்பாயோ. தேஸமேவ தா³தப்³ப³ந்தி வஸ்ஸூபக³தேஸு அலத்³த⁴வஸ்ஸாவாஸிகானம் ஏகச்சானமேவ தா³தப்³ப³ம்.

ப⁴தினிவிட்ட²ந்தி பானீயுபட்டா²னாதி³ப⁴திம் கத்வா லத்³த⁴ம். ஸங்கி⁴கம் பனாதிஆதி³ கேஸஞ்சி வாத³த³ஸ்ஸனம். தத்த² அபலோகனகம்மம் கத்வா கா³ஹிதந்தி ‘‘சி²ன்னவஸ்ஸானம் வஸ்ஸாவாஸிகஞ்ச இதா³னி உப்பஜ்ஜனகவஸ்ஸாவாஸிகஞ்ச இமேஸம் தா³தும் ருச்சதீ’’தி அனந்தரே வுத்தனயேன அபலோகனம் கத்வா கா³ஹிதம் ஸங்கே⁴ன தி³ன்னத்தா விப்³ப⁴ந்தோபி லப⁴தி. பகே³வ சி²ன்னவஸ்ஸோ. பச்சயவஸேன கா³ஹிதம் பன தேமாஸம் வஸித்வா க³ஹேதும் அத்தனா, தா³யகேஹி ச அனுமதத்தா ப⁴தினிவிட்ட²ம்பி சி²ன்னவஸ்ஸோபி விப்³ப⁴ந்தோபி ந லப⁴தீதி கேசி ஆசரியா வத³ந்தி. இத³ஞ்ச பச்சா² வுத்தத்தா பமாணம். தேனேவ வஸ்ஸூபனாயிகதி³வஸே ஏவ தா³யகேஹி தி³ன்னவஸ்ஸாவாஸிகம் க³ஹிதபி⁴க்கு²னோ வஸ்ஸச்சே²த³ம் அகத்வா வாஸோவ ஹேட்டா² விஹிதோ, ந பானீயுபட்டா²னாதி³ப⁴திகரணவத்தம். யதி³ ஹி தம் நிவிட்ட²மேவ ஸியா, ப⁴திகரணமேவ விதா⁴தப்³ப³ம். தஸ்மா வஸ்ஸக்³கே³ன கா³ஹிதம் சி²ன்னவஸ்ஸாத³யோ ந லப⁴ந்தீதி வேதி³தப்³ப³ம்.

‘‘ஸங்கி⁴கம் ஹோதீ’’தி ஏதேன வுத்த²வஸ்ஸானம்பி வஸ்ஸாவாஸிகபா⁴கோ³ ஸங்கி⁴கதோ அமோசிதோ தேஸம் விப்³ப⁴மேன ஸங்கி⁴கோ ஹோதீதி த³ஸ்ஸேதி. லப⁴தீதி ‘‘மம பத்தபா⁴க³ம் ஏதஸ்ஸ தே³தா²’’தி தா³யகே ஸம்படிச்சா²பேந்தேனேவ ஸங்கி⁴கதோ வியோஜிதம் ஹோதீதி வுத்தம்.

வரபா⁴க³ம் ஸாமணேரஸ்ஸாதி தஸ்ஸ பட²மகா³ஹத்தா, தே²ரேன புப்³பே³ பட²மபா⁴க³ஸ்ஸ க³ஹிதத்தா, இதா³னி க³ய்ஹமானஸ்ஸ து³தியபா⁴க³த்தா ச வுத்தம்.

ஸேனாஸனக்³கா³ஹகதா²வண்ணனா நிட்டி²தா.

உபனந்த³வத்து²கதா²வண்ணனா

319. பாளியம் உப⁴யத்த² பரிபா³ஹிரோதி கமேன உப⁴யஸ்ஸபி முத்தத்தா வுத்தம், ந ஸப்³ப³தா² உப⁴யதோ பரிபா³ஹிரத்தா. தேனாஹ ‘‘பச்சி²மே…பே… திட்ட²தீ’’தி.

320. யம் திண்ணம் பஹோதீதி மஞ்சபீட²வினிமுத்தம் யம் ஆஸனம் திண்ணம் ஸுக²ம் நிஸீதி³தும் பஹோதி, இத³ம் பச்சி²மதீ³கா⁴ஸனம். ஏத்த² மஞ்சபீட²ரஹிதேஸு அஸமானாஸனிகாபி தயோ நிஸீதி³தும் லப⁴ந்தி. மஞ்சபீடே²ஸு பன த்³வே. அதீ³கா⁴ஸனேஸு மஞ்சபீடே²ஸு ஸமானாஸனிகா ஏவ த்³வே நிஸீதி³தும் லப⁴ந்தி து³வக்³க³ஸ்ஸேவ அனுஞ்ஞாதத்தா.

ஹத்தி²னகோ² ஹேட்டா²பா⁴கே³ ஏதஸ்ஸ அத்தீ²தி ஹத்தி²னகோ², பாஸாதோ³. பாஸாத³ஸ்ஸ நகோ² நாம ஹேட்டி²மபா⁴கோ³ பாத³னக²ஸதி³ஸத்தா, ஸோ ஸப்³ப³தி³ஸாஸு அனேகேஹி ஹத்தி²ரூபேஹி ஸமலங்கதோ டி²தோ. தஸ்ஸூபரி கதோ பாஸாதோ³ ஹத்தி²கும்பே⁴ பதிட்டி²தோ விய ஹோதீதி ஆஹ ‘‘ஹத்தி²கும்பே⁴ பதிட்டி²த’’ந்தி. ஸுவண்ணரஜதாதி³விசித்ரானீதி ஸங்கி⁴கஸேனாஸனம் ஸந்தா⁴ய வுத்தம். புக்³க³லிகம் பன ஸுவண்ணாதி³விசித்ரம் பி⁴க்கு²ஸ்ஸ ஸம்படிச்சி²துமேவ ந வட்டதி ‘‘ந கேனசி பரியாயேன ஜாதரூபரஜதம் ஸாதி³தப்³ப³’’ந்தி (மஹாவ. 299) வுத்தத்தா. தேனேவேத்த² அட்ட²கதா²யம் ‘‘ஸங்கி⁴கவிஹாரே வா புக்³க³லிகவிஹாரே வா’’தி ந வுத்தம், கோ³னகாதி³அகப்பியப⁴ண்ட³விஸயே ஏவ வுத்தம் ஏகபி⁴க்கு²ஸ்ஸாபி தேஸம் க³ஹணே தோ³ஸாபா⁴வா. கி³ஹிவிகடனீஹாரேனாதி கி³ஹீஹி கதனீஹாரேன, கி³ஹீஹி அத்தனோ ஸந்தகம் அத்த²ரித்வா தி³ன்னனியாமேனாதி அத்தோ². லப்³ப⁴ந்தீதி நிஸீதி³தும் லப்³ப⁴ந்தி.

உபனந்த³வத்து²கதா²வண்ணனா நிட்டி²தா.

அவிஸ்ஸஜ்ஜியவத்து²கதா²வண்ணனா

321. அரஞ்ஜரோதி ப³ஹுஉத³கக³ண்ஹனிகா மஹாசாடி, ஜலம் க³ண்ஹிதுமலந்தி அரஞ்ஜரோ.

தா²வரேன ச தா²வரந்திஆதீ³ஸு பஞ்சஸு கோட்டா²ஸேஸு புரிமத்³வயம் தா²வரம், பச்சி²மத்தயம் க³ருப⁴ண்ட³ந்தி வேதி³தப்³ப³ம். ஸமகமேவ தே³தீதி ஏத்த² ஊனகம் தே³ந்தம்பி விஹாரவத்து²ஸாமந்தம் க³ஹேத்வா தூ³ரதரம் து³க்க²கோ³பம் விஸ்ஸஜ்ஜேதும் வட்டதீதி த³ட்ட²ப்³ப³ம். வக்க²தி ஹி ‘‘பி⁴க்கூ²னம் சே மஹக்³க⁴தரம்…பே… ஸம்படிச்சி²தும் வட்டதீ’’தி (சூளவ. அட்ட². 321). ஜானாபேத்வாதி பி⁴க்கு²ஸங்க⁴ஸ்ஸ ஜானாபேத்வா, அபலோகேத்வாதி அத்தோ². ‘‘நனு தும்ஹாகம் ப³ஹுதரா ருக்கா²தி வத்தப்³ப³’’ந்தி இத³ம் ஸாமிகேஸு அத்தனோ ப⁴ண்ட³ஸ்ஸ மஹக்³க⁴தம் அஜானித்வா தே³ந்தேஸு தம் ஞத்வா தே²ய்யசித்தேன க³ண்ஹதோ அவஹாரோ ஹோதீதி வுத்தம்.

விஹாரேன விஹாரோ பரிவத்தேதப்³போ³தி ஸவத்து²கேன அஞ்ஞேஸம் பூ⁴மியம் கதபாஸாதா³தி³னா, அவத்து²கேன வா ஸவத்து²கம் பரிவத்தேதப்³ப³ம். அவத்து²கம் பன அவத்து²கேனேவ பரிவத்தேதப்³ப³ம். கேவலம் பாஸாத³ஸ்ஸ பூ⁴மிதோ அதா²வரத்தா. ஏவம் தா²வரேஸுபி தா²வரவிபா⁴க³ம் ஞத்வாவ பரிவத்தேதப்³ப³ம்.

‘‘கப்பியமஞ்சா ஸம்படிச்சி²தப்³பா³’’தி இமினா ஸுவண்ணாதி³விசித்தம் அகப்பியமஞ்சம் ‘‘ஸங்க⁴ஸ்ஸா’’தி வுத்தேபி ஸம்படிச்சி²தும் ந வட்டதீதி த³ஸ்ஸேதி. ‘‘விஹாரஸ்ஸ தே³மா’’தி வுத்தே ஸங்க⁴ஸ்ஸ வட்டதி, ந புக்³க³லஸ்ஸ கே²த்தாதி³ வியாதி த³ட்ட²ப்³ப³ம். ஏதேஸூதி மஞ்சாதீ³ஸு. கப்பியாகப்பியம் வுத்தனயமேவாதி ஆஸந்தீ³தூலிகாதி³வினிச்ச²யேஸு வுத்தனயமேவ. அகப்பியம் வாதி ஆஸந்தீ³ஆதி³, பமாணாதிக்கந்தம் பி³ம்போ³ஹனாதி³ ச. மஹக்³க⁴ம் கப்பியம் வாதி ஸுவண்ணாதி³விசித்தம் கப்பியவோஹாரேன தி³ன்னம்.

‘‘காளலோஹ…பே… பா⁴ஜேதப்³போ³’’தி வுத்தத்தா வட்டகம்ஸலோஹமயம்பி பா⁴ஜனம் புக்³க³லிகம்பி ஸம்படிச்சி²தும்பி பரிஹரிதும்பி வட்டதி புக்³க³லபரிஹரிதப்³ப³ஸ்ஸேவ பா⁴ஜேதப்³ப³த்தாதி வத³ந்தி. தம் உபரி ‘‘கம்ஸலோஹவட்டலோஹபா⁴ஜனவிகதி ஸங்கி⁴கபரிபோ⁴கே³ன வா கி³ஹிவிகடா வா வட்டதீ’’திஆதி³கேன மஹாபச்சரிவசனேன விருஜ்ஜ²தி. இமஸ்ஸ ஹி ‘‘வட்டலோஹகம்ஸலோஹானம் யேன கேனசி கதோ ஸீஹளதீ³பே பாத³க்³க³ண்ஹனகோ பா⁴ஜேதப்³போ³’’தி வுத்தஸ்ஸ மஹாஅட்ட²கதா²வசனஸ்ஸ படிக்கே²பாய தம் மஹாபச்சரிவசனம் பச்சா² த³ஸ்ஸிதம். தஸ்மா வட்டலோஹகம்ஸலோஹமயம் யம் கிஞ்சி பாத³க்³க³ண்ஹனகவாரகம்பி உபாதா³ய அபா⁴ஜனீயமேவ. கி³ஹீஹி தி³ய்யமானம்பி புக்³க³லஸ்ஸ ஸம்படிச்சி²தும்பி ந வட்டதி. பாரிஹாரியம் ந வட்டதீதி பத்தாதி³பரிக்கா²ரம் விய ஸயமேவ படிஸாமேத்வா பரிபு⁴ஞ்ஜிதும் ந வட்டதி. கி³ஹிஸந்தகம் விய ஆராமிகாத³யோ சே ஸயமேவ கோ³பேத்வா வினியோக³காலே ஆனேத்வா படினேந்தி, பரிபு⁴ஞ்ஜிதும் வட்டதி. ‘‘படிஸாமேத்வா பி⁴க்கூ²னம் தே³தா²’’தி வத்தும்பி வட்டதி.

பண்ணஸூசி நாம லேக²னீதி வத³ந்தி. ‘‘அத்தனா லத்³தா⁴னிபீ’’திஆதி³னா படிக்³க³ஹணே தோ³ஸோ நத்தி², பரிஹரித்வா பரிபோ⁴கோ³வ ஆபத்திகரோதி த³ஸ்ஸேதி. யதா² சேத்த², ஏவம் உபரி அபா⁴ஜனீயவாஸிஆதீ³ஸு அத்தனோ ஸந்தகேஸுபி.

அனாமாஸம்பீதி ஸுவண்ணாதி³மயம்பி ஸப்³ப³ம் தம் ஆமஸித்வாபி பரிபு⁴ஞ்ஜிதும் வட்டதி. உபக்க²ரேதி உபகரணே. அட்³ட⁴பா³ஹுப்பமாணா நாம அட்³ட⁴பா³ஹுமத்தா. அட்³ட⁴ப்³யாமமத்தாதிபி வத³ந்தி. யோத்தானீதி சம்மரஜ்ஜுகா.

அட்ட²ங்கு³லஸூசித³ண்ட³மத்தோபீதி தஸரத³ண்டா³தி³ஸூசிஆகாரதனுத³ண்ட³கமத்தோபி. ரித்தபோத்த²கோபீதி அலிகி²தபோத்த²கோ. இத³ஞ்ச பண்ணப்பஸங்கே³ன வுத்தம்.

‘‘க⁴ட்டனப²லகம் க⁴ட்டனமுக்³க³ரோ’’தி இத³ம் ரஜிதசீவரம் ஏகஸ்மிம் மட்டே² த³ண்ட³முக்³க³ரே வேடே²த்வா ஏகஸ்ஸ மட்ட²ப²லகஸ்ஸ உபரி ட²பேத்வா உபரி அபரேன மட்ட²ப²லகேன நிகுஜ்ஜித்வா ஏகோ உபரி அக்கமித்வா திட்ட²தி. த்³வே ஜனா உபரி ப²லகம் த்³வீஸு கோடீஸு க³ஹேத்வா அபராபரம் ஆகட்³ட⁴னவிகட்³ட⁴னம் கரோந்தி, ஏதம் ஸந்தா⁴ய வுத்தம். ஹத்தே² ட²பாபேத்வா ஹத்தே²ன பஹரணம் பன நிட்டி²தரஜனஸ்ஸ சீவரஸ்ஸ அல்லகாலே காதப்³ப³ம். இத³ம் பன ப²லகமுக்³க³ரேஹி க⁴ட்டனம் ஸுக்க²காலே த²த்³த⁴பா⁴வவிமோசனத்த²ந்தி த³ட்ட²ப்³ப³ம். அம்ப³ணந்தி ஏகதோ³ணிகனாவாப²லகேஹி போக்க²ரணீஸதி³ஸம் கதம். பானீயபா⁴ஜனந்திபி வத³ந்தி. ரஜனதோ³ணீதி ஏகதா³ருனாவ கதம் ரஜனபா⁴ஜனம். உத³கதோ³ணீபி ஏகதா³ருனாவ கதம் உத³கபா⁴ஜனம்.

பூ⁴மத்த²ரணம் காதும் வட்டதீதி அகப்பியசம்மம் ஸந்தா⁴ய வுத்தம். தத்த² பூ⁴மத்த²ரணஸங்கே²பேன ஸயிதும்பி வட்டதியேவ. ‘‘பச்சத்த²ரணக³திக’’ந்தி இமினா மஞ்சாதீ³ஸு அத்த²ரிதப்³ப³ம் மஹாசம்மம் ஏளகசம்மம் நாமாதி த³ஸ்ஸேதி.

ச²த்தமுட்டி²பண்ணந்தி தாலபண்ணம் ஸந்தா⁴ய வுத்தம். பத்தகடாஹந்தி பத்தபசனகடாஹம்.

அவிஸ்ஸஜ்ஜியவத்து²கதா²வண்ணனா நிட்டி²தா.

நவகம்மதா³னகதா²வண்ணனா

323. பாளியம் பிண்ட³னிக்கே²பனமத்தேனாதிஆதீ³ஸு க²ண்ட³பு²ல்லட்டா²னே மத்திகாபிண்ட³ட்ட²பனம் பிண்ட³னிக்கே²பனம் நாம. நவகம்மந்தி நவகம்மஸம்முதி. அக்³க³ளவட்டி நாம கவாடப³ந்தோ⁴. சா²த³னம் நாம திணாதீ³ஹி கே³ஹச்சா²த³னம். ப³ந்த⁴னம் நாம த³ண்ட³வல்லிஆதீ³ஹி ச²த³னப³ந்த⁴னமேவ. சதுஹத்த²விஹாரேதி வித்தா²ரப்பமாணதோ வுத்தம். உப்³பே³த⁴தோ பன அனேகபூ⁴மகத்தா வட்³ட⁴கீஹத்தே²ன வீஸதிஹத்தோ²பி நானாஸண்டா²னவிசித்தோபி ஹோதி. தேனஸ்ஸ சதுவஸ்ஸிகம் நவகம்மம் வுத்தம். ஏவம் ஸேஸேஸுபி.

பாளியம் ஸப்³பே³ விஹாரேதி பு⁴ம்மத்தே² உபயோக³ப³ஹுவசனம். ஏகஸ்ஸ ஸப்³பே³ஸு விஹாரேஸு நவகம்மம் தே³தீதி அத்தோ². ஸப்³ப³காலம் படிபா³ஹந்தீதி நவகம்மிகா அத்தனோ கா³ஹிதம் வரஸேய்யம் ஸம்பத்தானம் யதா²வுட்³ட⁴ம் அகத்வா உதுகாலேபி படிபா³ஹந்தி.

‘‘ஸசே ஸோ ஆவாஸோ ஜீரதீ’’திஆதி³ பாளிமுத்தகவினிச்ச²யோ. மஞ்சட்டா²னம் த³த்வாதி மஞ்சட்டா²னம் புக்³க³லிகம் த³த்வா. திபா⁴க³ந்தி ததியபா⁴க³ம். ஏவம் விஸ்ஸஜ்ஜனம்பி தா²வரேன தா²வரபரிவத்தனட்டா²னே ஏவ பவிஸதி, ந இதரதா² ஸப்³ப³ஸேனாஸனானம் வினஸ்ஸனதோ. ஸசே ஸத்³தி⁴விஹாரிகானம் தா³துகாமோ ஹோதீதி ஸசே ஸோ ஸங்க⁴ஸ்ஸ ப⁴ண்ட³கட்ட²பனட்டா²னம் வா அஞ்ஞேஸம் பி⁴க்கூ²னம் வஸனட்டா²னம் வா தா³தும் ந இச்ச²தி, அத்தனோ ஸத்³தி⁴விஹாரிகானஞ்ஞேவ தா³துகாமோ ஹோதி, தாதி³ஸஸ்ஸ துய்ஹம் புக்³க³லிகமேவ கத்வா ஜக்³கா³தி ந ஸப்³ப³ம் தஸ்ஸ தா³தப்³ப³ந்தி அதி⁴ப்பாயோ. தத்த² பன கத்தப்³ப³விதி⁴ம் த³ஸ்ஸேந்தோ ஆஹ ‘‘கம்ம’’ந்திஆதி³. ஏவஞ்ஹீதிஆதி³ம்ஹி வயானுரூபம் ததியபா⁴கே³ வா உபட்³ட⁴பா⁴கே³ வா க³ஹிதே தம் பா⁴க³ம் தா³தும் லப⁴தீதி அத்தோ².

யேனாதி தேஸு த்³வீஸு பி⁴க்கூ²ஸு யேன. ஸோ ஸாமீதி தஸ்ஸா பூ⁴மியா விஹாரகரணே ஸோவ ஸாமீ, தம் படிபா³ஹித்வா இதரேன ந காதப்³ப³ந்தி அதி⁴ப்பாயோ. ஸோ ஹி பட²மம் க³ஹிதோ. அகதட்டா²னேதி சயாதீ³னம் அகதபுப்³ப³ட்டா²னே. சயம் வா பமுக²ம் வாதி ஸங்கி⁴கஸேனாஸனம் நிஸ்ஸாய ததோ ப³ஹி சயம் ப³ந்தி⁴த்வா, ஏகம் ஸேனாஸனம் வா. ப³ஹிகுட்டேதி குட்டதோ ப³ஹி, அத்தனோ கதட்டா²னேதி அத்தோ².

நவகம்மதா³னகதா²வண்ணனா நிட்டி²தா.

அஞ்ஞத்ரபரிபோ⁴க³படிக்கே²பாதி³கதா²வண்ணனா

324. வட்³டி⁴கம்மத்தா²யாதி யதா² தம்மூலக்³க⁴தோ ந பரிஹாயதி, ஏவம் கத்தப்³ப³ஸ்ஸ ஏவம் நிப்பா²தே³தப்³ப³ஸ்ஸ மஞ்சபீடா²தி³னோ அத்தா²ய.

சக்கலிகந்தி பாத³புஞ்ச²னத்த²ம் சக்காகாரேன கதம். பரிப⁴ண்ட³கதபூ⁴மி வாதி காளவண்ணாதி³கதஸண்ஹபூ⁴மி வா. ஸேனாஸனம் வாதி மஞ்சபீடா²தி³ வா.

‘‘ததே²வ வளஞ்ஜேதும் வட்டதீ’’தி இமினா நேவாஸிகேஹி தோ⁴தபாதா³தீ³ஹி வளஞ்ஜனட்டா²னே ஸஞ்சிச்ச அதோ⁴தபாதா³தீ³ஹி வளஞ்ஜந்தஸ்ஸேவ ஆபத்தி பஞ்ஞத்தாதி த³ஸ்ஸேதி.

‘‘த்³வாரம்பீ’’திஆதி³னா ஸாமஞ்ஞதோ வுத்தத்தா த்³வாரவாதபானாத³யோ அபரிகம்மகதாபி ந அபஸ்ஸயிதப்³பா³. அஜானித்வா அபஸ்ஸயந்தஸ்ஸபி இத⁴ லோமக³ணனாய ஆபத்தி.

அஞ்ஞத்ரபரிபோ⁴க³படிக்கே²பாதி³கதா²வண்ணனா நிட்டி²தா.

ஸங்க⁴ப⁴த்தாதி³அனுஜானனகதா²வண்ணனா

325. உத்³தே³ஸப⁴த்தம் நிமந்தனந்தி இமம் வோஹாரம் பத்தானீதி ஏத்த² இதி-ஸத்³தோ³ ஆதி³அத்தோ², உத்³தே³ஸப⁴த்தம் நிமந்தனந்திஆதி³வோஹாரம் பத்தானீதி அத்தோ². தம்பீதி ஸங்க⁴ப⁴த்தம்பி.

ஸங்க⁴ப⁴த்தாதி³அனுஜானனகதா²வண்ணனா நிட்டி²தா.

உத்³தே³ஸப⁴த்தகதா²வண்ணனா

போ⁴ஜனஸாலாயாதி ப⁴த்துத்³தே³ஸட்டா²னம் ஸந்தா⁴ய வுத்தம். ஏகவளஞ்ஜந்தி ஏகத்³வாரேன வளஞ்ஜிதப்³ப³ம். நானானிவேஸனேஸூதி நானாகுலஸ்ஸ நானூபசாரேஸு நிவேஸனேஸு.

நிஸின்னஸ்ஸபி நித்³தா³யந்தஸ்ஸபீதி அனாத³ரே ஸாமிவசனம், வுட்³ட⁴தரே நித்³தா³யந்தே நவகஸ்ஸ கா³ஹிதம் ஸுக்³க³ஹிதந்தி அத்தோ².

விஸ்ஸட்ட²தூ³தோதி யதா²ருசி வத்தும் லப⁴னதோ நிராஸங்கதூ³தோ. புச்சா²ஸபா⁴கே³னாதி புச்சா²வசனபடிபா⁴கே³ன. ‘‘ஏகா கூடட்டி²திகா நாமா’’தி வுத்தமேவத்த²ம் விபா⁴வேதும் ‘‘ரஞ்ஞோ வா ஹீ’’திஆதி³ வுத்தம்.

ஸப்³ப³ம் பத்தஸ்ஸாமிகஸ்ஸ ஹோதீதி சீவராதி³கம்பி ஸப்³ப³ம் பத்தஸ்ஸாமிகஸ்ஸேவ ஹோதி, மயா ப⁴த்தமேவ ஸந்தா⁴ய வுத்தம், ந சீவராதி³ந்தி வத்வா க³ஹேதும் ந வட்டதீதி அத்தோ².

அகதபா⁴கோ³னாமாதி ஆக³ந்துகபா⁴கோ³ நாம, அதி³ன்னபுப்³ப³பா⁴கோ³தி அத்தோ².

கிம் ஆஹரீயதீதி அவத்வாதி ‘‘கதரப⁴த்தம் வா தயா ஆஹரீயதீ’’தி தா³யகம் அபுச்சி²த்வா. பகதிட்டி²திகாயாதி உத்³தே³ஸப⁴த்தட்டி²திகாய.

உத்³தே³ஸப⁴த்தகதா²வண்ணனா நிட்டி²தா.

நிமந்தனப⁴த்தகதா²வண்ணனா

விச்சி²ந்தி³த்வாதி ‘‘ப⁴த்தம் க³ண்ஹதா²’’தி பத³ம் அவத்வா. தேனேவாஹ ‘‘ப⁴த்தந்தி அவத³ந்தேனா’’தி.

ஆலோபஸங்கே²பேனாதி ஏகேகபிண்ட³வஸேன, ஏவஞ்ச பா⁴ஜனம் உத்³தே³ஸப⁴த்தே ந வட்டதி. தத்த² ஹி ஏகஸ்ஸ பஹோனகப்பமாணேனேவ பா⁴ஜேதப்³ப³ம்.

ஆருள்ஹாயேவ மாதிகம், ஸங்க⁴தோ அட்ட² பி⁴க்கூ²தி ஏத்த² யே மாதிகம் ஆருள்ஹா, தே அட்ட² பி⁴க்கூ²தி யோஜேதப்³ப³ம். உத்³தே³ஸப⁴த்தனிமந்தனப⁴த்தாதி³ஸங்கி⁴கப⁴த்தமாதிகாஸு நிமந்தனப⁴த்தமாதிகாய டி²திவஸேன ஆருள்ஹே ப⁴த்துத்³தே³ஸகேன வா ஸயம் வா ஸங்க⁴தோ உத்³தி³ஸாபேத்வா க³ஹேத்வா க³ந்தப்³ப³ம், ந அத்தனோ ருசிதே க³ஹேத்வாதி அதி⁴ப்பாயோ. மாதிகம் ஆரோபேத்வாதி ‘‘ஸங்க⁴தோ க³ண்ஹாமீ’’திஆதி³னா வுத்தமாதிகாபே⁴த³ம் தா³யகஸ்ஸ விஞ்ஞாபேத்வாதி அத்தோ².

படிப³த்³த⁴காலதோ பன பட்டா²யாதி தத்தே²வ வாஸஸ்ஸ நிப³த்³த⁴காலதோ பட்டா²ய.

நிமந்தனப⁴த்தகதா²வண்ணனா நிட்டி²தா.

ஸலாகப⁴த்தகதா²வண்ணனா

உபனிப³ந்தி⁴த்வாதி லிகி²த்வா. கா³மவஸேனபீதி யேபு⁴ய்யேன ஸமலாப⁴கா³மவஸேனபி. ப³ஹூனி ஸலாகப⁴த்தானீதி திம்ஸம் வா சத்தாரீஸம் வா ப⁴த்தானி. ‘‘ஸசே ஹோந்தீ’’தி அஜ்ஜா²ஹரித்வா யோஜேதப்³ப³ம்.

ஸல்லக்கே²த்வாதி தானி ப⁴த்தானி பமாணவஸேன ஸல்லக்கே²த்வா. நிக்³க³ஹேன த³த்வாதி தூ³ரம் க³ந்தும் அனிச்ச²ந்தஸ்ஸ நிக்³க³ஹேன ஸம்படிச்சா²பேத்வா த³த்வா. புன விஹாரம் ஆக³ந்த்வாதி ஏத்த² விஹாரம் அனாக³ந்த்வா ப⁴த்தம் க³ஹேத்வா பச்சா² விஹாரே அத்தனோ பாபேத்வா பு⁴ஞ்ஜிதும்பி வட்டதி.

ஏககே³ஹவஸேனாதி வீதி²யம்பி ஏகபஸ்ஸே க⁴ரபாளியா வஸேன. உத்³தி³ஸித்வாபீதி அஸுககுலே ஸலாகப⁴த்தானி துய்ஹம் பாபுணந்தீதி வத்வா.

வாரகா³மேதி அதிதூ³ரத்தா வாரேன க³ந்தப்³ப³கா³மே. ஸட்டி²தோ வா பண்ணாஸதோ வாதி த³ண்ட³கம்மத்தா²ய உத³கக⁴டம் ஸந்தா⁴ய வுத்தம். விஹாரவாரோதி ஸப்³ப³பி⁴க்கூ²ஸு பி⁴க்க²த்தா²ய க³தேஸு விஹாரரக்க²ணவாரோ.

தேஸந்தி விஹாரவாரிகானம். பா²திகம்மமேவாதி விஹாரரக்க²ணகிச்சஸ்ஸ பஹோனகபடிபாத³னமேவ. ஏகஸ்ஸேவ பாபுணந்தீதி தி³வஸே தி³வஸே ஏகேகஸ்ஸேவ பாபிதானீதி அத்தோ².

ரஸஸலாகந்தி உச்சு²ரஸஸலாகம். ‘‘ஸலாகவஸேன கா³ஹிதத்தா பன ந ஸாதி³தப்³பா³’’தி இத³ம் அஸாருப்பவஸேன வுத்தம், ந து⁴தங்க³பே⁴த³வஸேன. ‘‘ஸங்க⁴தோ நிராமிஸஸலாகா…பே… வட்டதியேவா’’தி (விஸுத்³தி⁴. 1.26) ஹி விஸுத்³தி⁴மக்³கே³ வுத்தம். அக்³க³பி⁴க்கா²மத்தந்தி ஏககடச்சு²பி⁴க்கா²மத்தம். லத்³தா⁴ வா அலத்³தா⁴ வா ஸ்வேபி க³ண்ஹேய்யாஸீதி லத்³தே⁴பி அப்பமத்ததாய வுத்தம். தேனாஹ ‘‘யாவத³த்த²ம் லப⁴தி…பே… அலபி⁴த்வா ‘ஸ்வே க³ண்ஹேய்யாஸீ’தி வத்தப்³போ³’’தி.

தத்தா²தி தஸ்மிம் தி³ஸாபா⁴கே³. தம் க³ஹேத்வாதி தம் வாரகா³மே ஸலாகம் அத்தனோ க³ஹேத்வா. தேனாதி தி³ஸம்க³மிகதோ அஞ்ஞேன தஸ்மிம் தி³ஸம்க³மிகே. தே³வஸிகம் பாபேதப்³பா³தி உபசாரஸீமாய டி²தஸ்ஸ யஸ்ஸ கஸ்ஸசி வஸ்ஸக்³கே³ன பாபேதப்³பா³. ஏவம் ஏதேஸு அக³தேஸு ஆஸன்னவிஹாரே பி⁴க்கூ²னம் பு⁴ஞ்ஜிதும் வட்டதி இதரதா² ஸங்கி⁴கதோ.

அம்ஹாகம் கோ³சரகா³மேவாதி ஸலாகப⁴த்ததா³யகானம் கா³மம் ஸந்தா⁴ய வுத்தம். விஹாரே தே²ரஸ்ஸ பத்தஸலாகப⁴த்தந்தி விஹாரே ஏகேகஸ்ஸேவ ஓஹீனத்தே²ரஸ்ஸ ஸப்³ப³ஸலாகானம் அத்தனோ பாபனவஸேன பத்தஸலாகப⁴த்தம்.

ஸலாகப⁴த்தகதா²வண்ணனா நிட்டி²தா.

பக்கி²கப⁴த்தாதி³கதா²வண்ணனா

‘‘ஸ்வே பக்கோ²’’தி அஜ்ஜ பக்கி²கம் ந கா³ஹேதப்³ப³ந்தி அட்ட²மியா பு⁴ஞ்ஜிதப்³ப³ம் ஸத்தமியா பு⁴ஞ்ஜனத்தா²ய ந கா³ஹேதப்³ப³ம், தா³யகேஹி நியமிததி³வஸேனேவ கா³ஹேதப்³ப³ந்தி அத்தோ². தேனாஹ ‘‘ஸசே பனா’’திஆதி³. ஸ்வே லூக²ந்தி அஜ்ஜ ஆவாஹமங்க³லாதி³கரணதோ அதிபணீதபோ⁴ஜனம் கரீயதி, ஸ்வே ததா² ந ப⁴விஸ்ஸதி, அஜ்ஜேவ பி⁴க்கூ² போ⁴ஜேஸ்ஸாமீதி அதி⁴ப்பாயோ.

பக்கி²கப⁴த்ததோ உபோஸதி²கஸ்ஸ பே⁴த³ம் த³ஸ்ஸேந்தோ ஆஹ ‘‘உபோஸத²ங்கா³னி ஸமாதி³யித்வா’’திஆதி³. நிப³ந்தா⁴பிதந்தி ‘‘அஸுகவிஹாரே ஆக³ந்துகா பு⁴ஞ்ஜந்தூ’’தி நியமிதம்.

க³மிகோ ஆக³ந்துகப⁴த்தம்பீதி கா³மந்தரதோ ஆக³ந்த்வா அவூபஸந்தேன க³மிகசித்தேன வஸித்வா புன அஞ்ஞத்த² க³ச்ச²ந்தம் ஸந்தா⁴ய வுத்தம். ஆவாஸிகஸ்ஸ பன க³ந்துகாமஸ்ஸ க³மிகப⁴த்தமேவ லப்³ப⁴தி. ‘‘லேஸம் ஓட்³டே³த்வா’’தி வுத்தத்தா லேஸாபா⁴வே யாவ க³மனபரிப³ந்தோ⁴ விக³ச்ச²தி, தாவ பு⁴ஞ்ஜிதும் வட்டதீதி ஞாபிதந்தி த³ட்ட²ப்³ப³ம்.

தண்டு³லாதீ³னி பேஸேந்தி…பே… வட்டதீதி அபி⁴ஹடபி⁴க்க²த்தா வட்டதி. ததா² படிக்³க³ஹிதத்தாதி பி⁴க்கா²னாமேன படிக்³க³ஹிதத்தா.

அவிப⁴த்தம் ஸங்கி⁴கம் ப⁴ண்ட³ந்தி குக்குச்சுப்பத்திஆகாரத³ஸ்ஸனம். ஏவம் குக்குச்சம் கத்வா புச்சி²தப்³ப³கிச்சம் நத்தி², அபுச்சி²த்வா தா³தப்³ப³ந்தி அதி⁴ப்பாயோ.

பக்கி²கப⁴த்தாதி³கதா²வண்ணனா நிட்டி²தா.

ஸேனாஸனக்க²ந்த⁴கவண்ணனானயோ நிட்டி²தோ.