1. கம்மக்க²ந்த⁴கோ

தஜ்ஜனீயகம்மகதா²வண்ணனா

1. சூளவக்³க³ஸ்ஸ பட²மே கம்மக்க²ந்த⁴கே தாவ ‘‘ப³லவாப³லவ’’ந்தி இத³ம் ஏகபத³ம். ‘‘ப³லவப³லவ’’ந்தி வத்தப்³பே³ ஆகாரம் கத்வா ‘‘ப³லவாப³லவ’’ந்தி வுத்தம். தஞ்ச ‘‘து³க்க²து³க்க²’’ந்திஆதீ³ஸு விய அதிஸயத்தே² வத்ததீதி ஆஹ ‘‘ஸுட்டு² ப³லவம் படிவத³தா²’’தி, அதி விய ப³லவம் கத்வா படிவசனம் தே³தா²தி அத்தோ².

2. பாளியம் ஆபத்தி ஆரோபேதப்³பா³தி ஏத்த² கிஞ்சாபி ‘‘மா கோ² தும்ஹே ஆயஸ்மந்தோ ஏஸோ அஜேஸீ’’திஆதி³கே ப⁴ண்ட³னாதி³ஜனகே வசனே பஞ்ஞத்தா காசி ஆபத்தி நாம நத்தி² முஸாபேஸுஞ்ஞாதீ³ஸு ஏதஸ்ஸ அப்பவிட்ட²த்தா, ததா²பி பி⁴க்கூ²ஹி விஸும், ஸங்க⁴மஜ்ஜே² ச ‘‘மா, ஆவுஸோ, பி⁴க்கூ² அஞ்ஞமஞ்ஞம் பயோஜேத்வா ப⁴ண்ட³னாதி³ம் அகாஸி, நேத³ம் அப்பிச்ச²தாதீ³னம் அத்தா²ய வத்ததீ’’தி ஏவம் அபஞ்ஞத்தேன வுச்சமானஸ்ஸ பி⁴க்கு²னோ அனாத³ரியேன அனோரமனபச்சயா வா அஞ்ஞவாத³விஹேஸாதி³கரணபச்சயா வா யா ஆபத்தி ஹோதி, ஸா ஆபத்தி ஆரோபேதப்³பா³ தி³ட்டி²விபன்னஸ்ஸ வியாதி ஏவமத்தோ² த³ட்ட²ப்³போ³.

யஸ்ஸ பன இத³ம் வசனம் வினாவ காயவாசாஹி ஆபன்னா லஹுகாபத்தி அத்தி², தஸ்ஸபி ஆரோபேதப்³பா³வ. யம் பன கம்மவாசாய ‘‘அத்தனா ப⁴ண்ட³னகாரகா’’தி அத்தனா-ஸத்³த³க்³க³ஹணம், ‘‘யேபி சஞ்ஞே பி⁴க்கூ² ப⁴ண்ட³னகாரகா…பே… தே உபஸங்கமித்வா’’திஆதி³வசனஞ்ச, தம் வத்து²வஸேன க³ஹிதம். யோ பன ஸயமேவ ப⁴ண்ட³னகாரகோ ஹோதி, அஞ்ஞே பன ப⁴ண்ட³னகாரகே உபஸங்கமித்வா ‘‘மா கோ² தும்ஹே’’திஆதி³வசனம் ந வத³தி, தஸ்ஸாபேதம் கம்மம் காதப்³ப³மேவ. கரோந்தேஹி ச ‘‘ஸுணாது மே, ப⁴ந்தே, ஸங்கோ⁴, அயம் இத்த²ன்னாமோ பி⁴க்கு² ப⁴ண்ட³னகாரகோ…பே… ஸங்கே⁴ அதி⁴கரணகாரகோ. யதி³ ஸங்க⁴ஸ்ஸ பத்தகல்ல’’ந்திஆதி³னாவ கம்மவாசா காதப்³பா³. யோ ச அஞ்ஞேபி பி⁴க்கூ² கலஹாய ஸமாத³பேதி, தஸ்ஸாபி ஏவமேவ கம்மவாசம் காதும் வட்டதி அஞ்ஞேஸம் ஸமாதா³பனஸ்ஸபி ப⁴ண்ட³னகாரகத்தே ஏவ பவிஸனதோ. அஞ்ஞேஸம் ஸமாதா³பனாகாரம்பி வத்வாவ, கம்மவாசம் காதுகாமேனபி ச தேஹி வுத்தவசனத்த²மேவ க³ஹேத்வா தத³னுகு³ணம் யோஜேத்வாவ காதப்³ப³ம், ந இதா⁴க³தவஸேனேவ ஸப்³பே³ஸம்பி இதா⁴க³தவஸேனேவ வசனாஸம்ப⁴வா. பூ⁴தேன வத்து²னா கதமேவ ஹி அவிபன்னம் ஹோதி, நாஞ்ஞந்தி க³ஹேதப்³ப³ம். ஏஸ நயோ நியஸ்ஸகம்மாதீ³ஸுபி.

தஜ்ஜனீயகம்மகதா²வண்ணனா நிட்டி²தா.

அத⁴ம்மகம்மத்³வாத³ஸககதா²தி³வண்ணனா

4. அப்படிஞ்ஞாய கதந்தி வத்து²ம் வா ஆபத்திம் வா அஸம்படிச்சா²பேத்வா கதம். யோ பன ஸப்³பே³ஸம் பஸ்ஸந்தானம் ஏவ வத்து²வீதிக்கமம் கத்வா பச்சா² கம்மகரணப⁴யேன ‘‘ந கரோமீ’’தி முஸா வத³தி, தஸ்ஸ பி⁴க்கூ²னம் ஸம்முகே² வீதிக்கமகரணமேவ படிஞ்ஞா. தத²தோ ஜானனத்த²மேவ படிஞ்ஞாய கரணம் அனுஞ்ஞாதம். யத்த² பன ஸந்தே³ஹோ ஹோதி, தத்த² ஸம்படிச்சா²பேத்வாவ கத்தப்³ப³ந்தி க³ஹேதப்³ப³ம்.

‘‘பாராஜிகாபத்தியா வா’’தி இத³ம் லிங்க³னாஸனனிமித்ததாய பாராஜிகஸ்ஸ கம்மேன அதிகிச்ச²னீயதோ வுத்தம். ‘‘ஸங்கா⁴தி³ஸேஸாபத்தியா வா’’தி இத³ம் பன பரிவாஸாதி³னிஸ்ஸாரணகம்மஸ்ஸ ஆவேணிகஸ்ஸ விஜ்ஜமானத்தா வுத்தம். யம் பன பரதோ ‘‘அதி⁴ஸீலே ஸீலவிபன்னோ ஹோதி…பே… தஜ்ஜனீயகம்மம் கரேய்யா’’தி (சூளவ. 6) வுத்தம், தம் ‘‘ஆயதிம் ஸம்வரே ட²த்வா வுட்டா²னம் கரோஹீ’’தி ஓவதி³யமானஸ்ஸ அனாத³ரியாதி³பச்சயலஹுகாபத்திம் ஸந்தா⁴ய வுத்தம். ஸீலவிபத்திமூலகஞ்ஹி லஹுகாபத்திம் ஆபன்னோ இத⁴ அபே⁴தூ³பசாரேன ‘‘அதி⁴ஸீலே ஸீலவிபன்னோ’’தி வுத்தோ ‘‘அதிதி³ட்டி²யா தி³ட்டி²விபன்னோ’’தி ஏத்த² விய.

யதா² ச தி³ட்டி²ம் க³ஹேத்வா வோஹரந்தஸ்ஸ ‘‘இதோ தி³ட்டி²தோ ஓரமாஹீ’’தி அவத்வா கதகம்மம் கேவலாய தி³ட்டி²விபத்தியா கதத்தா அனாபத்தியா கதம் நாம அத⁴ம்மகம்மம் ஹோதி, ஏவம் ஸீலவிபத்திம் ஆபஜ்ஜித்வா லஜ்ஜித⁴ம்மே ஓக்கந்தே யதா²த⁴ம்மம் வுட்டா²ய ஸம்வரே டா²துகாமஸ்ஸ கதம் தஜ்ஜனீயாதி³கம்மம் கேவலாய ஸீலவிபத்தியா கதத்தா அதே³ஸனாகா³மினியா கதம் நாம அத⁴ம்மகம்மம் ஹோதி. தேனேவ நியஸ்ஸகம்மேபி ‘‘அபிஸ்ஸு பி⁴க்கூ² பகதா பரிவாஸம் தே³ந்தா’’திஆதி³னா ஸம்வரே அட்டா²னமேவ கம்மனிமித்தபா⁴வேன வுத்தம். அத³ந்தம் த³மனத்த²மேவ ஹி தஜ்ஜனீயாதி³கம்மானி அனுஞ்ஞாதானீதி. கேசி பன ‘‘அதே³ஸனாகா³மினியாதி இத³ம் பாராஜிகாபத்திம்யேவ ஸந்தா⁴ய வுத்தம், ந ஸங்கா⁴தி³ஸேஸ’’ந்தி (ஸாரத்த². டீ. சூளவக்³க³ 3.4) வத³ந்தி, தம் ஸுக்கபக்கே² ‘‘தே³ஸனாகா³மினியா ஆபத்தியா கதம் ஹோதீ’’தி இமினா வசனேன விருஜ்ஜ²தி. ஸங்கா⁴தி³ஸேஸஸ்ஸாபி ச பரியாயதோ தே³ஸனாகா³மினிவோஹாரே க³ய்ஹமானே ‘‘ஆபத்தியா கதம் ஹோதீ’’தி வுத்தவாரதோ இமஸ்ஸ வாரஸ்ஸ விஸேஸோ ந ஸியா, அட்ட²கதா²யம்பேத்த² விஸேஸபா⁴வோ ந த³ஸ்ஸிதோ. தஸ்மா வுத்தனயேனேவேத்த² அதி⁴ப்பாயோ க³ஹேதப்³போ³.

6. ஸப்³பா³னிபீதி தஜ்ஜனீயனியஸ்ஸபப்³பா³ஜனீயகம்மானி தீணிபி. அஞ்ஞகம்மஸ்ஸ வத்து²னாதி தஜ்ஜனீயதோ அஞ்ஞஸ்ஸ கம்மஸ்ஸ வத்து²னா அஞ்ஞகம்மகரணம் நாம கோசி தோ³ஸோபி ந ஹோதீதி அதி⁴ப்பாயோ. காரணமாஹ ‘‘கஸ்மா’’திஆதி³னா.

8. பன்னலோமாதி பதிதமானலோமா.

அத⁴ம்மகம்மத்³வாத³ஸககதா²தி³வண்ணனா நிட்டி²தா.

நியஸ்ஸகம்மகதா²தி³வண்ணனா

11. நியஸ்ஸகம்மே பாளியம் அபிஸ்ஸூதி அபிசாதி இமஸ்மிம் அத்தே² நிபாதஸமுதா³யோ. நிஸ்ஸாய தே வத்த²ப்³ப³ந்தி ஏத்த² கேசி கல்யாணமித்தாயத்தவுத்திதம் ஸந்தா⁴ய வுத்தந்தி வத³ந்தி, அஞ்ஞே பன நிஸ்ஸயக்³க³ஹணமேவாதி, உப⁴யேனபிஸ்ஸ ஸேரிவிஹாரோ ந வட்டதீதி தீ³பிதந்தி த³ட்ட²ப்³ப³ம்.

21. பப்³பா³ஜனீயகம்மே ‘‘பப்³பா³ஜனீயகம்மம் படிப்பஸ்ஸம்பே⁴தூ’’தி இத³ம் பக்கமனாதி³ம் அகத்வா ஸம்மாவத்தந்தானம் வஸேன வுத்தம்.

33. படிஸாரணீயகம்மே நேவ பி⁴க்கு²வசனம், ந கி³ஹிவசனந்தி ஏத்த² பரியாயதோபி பி⁴க்கூ² பரகு²ம்ஸனம் ந வத³ந்தி, க³ஹட்டா² பன ஸரூபேனேவ அக்கோஸிதும் ஸமத்தா²பி உபகாரீஸு அகாரணம் ஏவரூபம் ந வத³ந்தி, த்வம் கி³ஹிகு³ணதோபி பரிஹீனோதி அதி⁴ப்பாயோ.

39. ‘‘அங்க³ஸமன்னாக³மோ புரிமேஹி அஸதி³ஸோ’’தி இமினா தஜ்ஜனீயாதீ³னம் வுத்தகாரணமத்தேன இத³ம் காதும் ந வட்டதீதி தீ³பேதி. இத⁴ வுத்தேன பன கி³ஹீனம் அலாபா⁴ய பரிஸக்கனாதி³னா அங்கே³ன தானிபி காதும் வட்டதீதி க³ஹேதப்³ப³ம். ஏத்த² ச ‘‘ஸத்³த⁴ம் பஸன்னம் தா³யகம் காரகம் ஸங்கு⁴பட்டா²கம் ஹீனேன கு²ம்ஸேதீ’’தி வுத்தத்தா தாதி³ஸேஸு கி³ஹீஸு கு²ம்ஸனாதீ³ஹி கி³ஹிபடிஸம்யுத்தேஹி ஏவ அங்கே³ஹி கம்மாரஹதா, ந ஆராமிகசேடகாதீ³ஸு கு²ம்ஸனாதீ³ஹி. தத்தா²பி தா³யகாதீ³ஸு க²மாபிதேஸு கம்மாரஹதா நத்தி², ஆபத்தி ச யத்த² கத்த²சி தே³ஸேதும் வட்டதி. யோ சே திக்க²த்தும் க²மாபியமானோபி ந க²மதி, அகதகம்மேனபி த³ஸ்ஸனூபசாரே ஆபத்தி தே³ஸேதப்³பா³. ஸோ சே காலகதோ ஹோதி, தே³ஸந்தரம் வா க³தோ, க³ததி³ஸா ந ஞாயதி, அந்தராமக்³கே³ வா ஜீவிதந்தராயோ ஹோதி, கதகம்மேனபி அகதகம்மேனபி ஸங்க⁴மஜ்ஜே² யதா²பூ⁴தம் விஞ்ஞாபேத்வா க²மாபேத்வா ஆபத்தி தே³ஸேதப்³பா³தி வத³ந்தி. த⁴ம்மிகபடிஸ்ஸவஸ்ஸ அஸச்சாபனே பன தேஸம் ஸந்திகம் க³ந்த்வா ‘‘மயா அஸமவேக்கி²த்வா படிஸ்ஸவம் கத்வா ஸோ ந ஸச்சாபிதோ, தம் மே க²மதா²’’திஆதி³னா க²மாபனே வசனக்கமோ ஞாபேதப்³போ³.

41. பாளியம் மங்குபூ⁴தோ நாஸக்கி² சித்தம் க³ஹபதிம் க²மாபேதுந்தி திம்ஸயோஜனமக்³க³ம் புன க³ந்த்வாபி மானத²த்³த⁴தாய யதா²பூ⁴தம் தோ³ஸம் ஆவிகத்வா அக²மாபனேன ‘‘நாஹம் க²மாமீ’’தி தேன படிக்கி²த்தோ மங்குபூ⁴தோ க²மாபேதும் ந ஸக்கி², ஸோ புனதே³வ ஸாவத்தி²ம் பச்சாக³ந்த்வாபி மானனிக்³க³ஹத்தா²யேவ புனபி ஸத்தா²ரா பேஸிதோ புரிமனயேனேவ க²மாபேதும் அஸக்கோந்தோ புனாக³ச்சி². அத²ஸ்ஸ ப⁴க³வா ‘‘அஸந்தம் பா⁴வனமிச்சே²ய்யா’’திஆதி³னாவ (த⁴. ப. 73) த⁴ம்மம் தே³ஸேத்வா மானனிம்மத²னம் கத்வா அனுதூ³ததா³னம் அனுஞ்ஞாஸீதி த³ட்ட²ப்³ப³ம்.

42. ‘‘நோ சே க²மதி…பே… ஆபத்திம் தே³ஸாபேதப்³போ³’’தி வுத்தத்தா பகே³வ க³ஹட்டோ² க²மதி சே, த³ஸ்ஸனூபசாரே ஆபத்திதே³ஸனாகிச்சம் நத்தீ²தி க³ஹேதப்³ப³ம்.

46. உக்கே²பனீயகம்மேஸு தீஸு அரிட்ட²வத்து²ஸ்மிம் ஆபத்திம் ஆரோபேத்வாதி விஸும் ஸங்க⁴மஜ்ஜே²வ பாபிகாய தி³ட்டி²யா அப்படினிஸ்ஸஜ்ஜனபச்சயா து³க்கடம், ஸமனுபா⁴ஸனபரியோஸானே பாசித்தியம் வா ஆபத்திம் ஆரோபேத்வா. ஏத்தா²பி கம்மவாசாய ‘‘ததா²ஹம் ப⁴க³வதா’’திஆதி³ வத்து²வஸேன வுத்தம். யேன யேன பகாரேன தி³ட்டி²க³திகா வோஹரிம்ஸு, தேன தேன பகாரேன யோஜேத்வா கம்மவாசா காதப்³பா³. க³ஹணாகாரம் பன வினாபி ‘‘ஸுணாது மே, ப⁴ந்தே, ஸங்கோ⁴, இத்த²ன்னாமஸ்ஸ பி⁴க்கு²னோ பாபிகம் தி³ட்டி²க³தம் உப்பன்னம், ஸோ தம் தி³ட்டி²ம் அப்படினிஸ்ஸஜ்ஜதி, யதி³ ஸங்க⁴ஸ்ஸ பத்தகல்ல’’ந்தி ஏவம் ஸாமஞ்ஞதோபி கம்மவாசம் காதும் வட்டதி.

65. ‘‘யம் தி³ட்டி²ம் நிஸ்ஸாய ப⁴ண்ட³னாதீ³னி கரோதீ’’தி இமினா தி³ட்டி²ம் நிஸ்ஸாய உப்பன்னானி ஏவ ப⁴ண்ட³னாதீ³னி இத⁴ அதி⁴ப்பேதானி, ந கேவலானீதி த³ஸ்ஸேதி. யோ பன ‘‘ப⁴ண்ட³னாதீ³னம் கரணே தோ³ஸோ நத்தீ²’’தி தி³ட்டி²கோ ஹுத்வா ப⁴ண்ட³னாதி³ம் கரோதி, ஸாபிஸ்ஸ தி³ட்டி² ஏவ ஹோதி, தஸ்ஸபி அப்படினிஸ்ஸக்³கே³ கம்மம் காதும் வட்டதி.

நியஸ்ஸகம்மகதா²தி³வண்ணனா நிட்டி²தா.

கம்மக்க²ந்த⁴கவண்ணனானயோ நிட்டி²தோ.