2. பாரிவாஸிகக்க²ந்த⁴கோ

பாரிவாஸிகவத்தகதா²வண்ணனா

75. பாரிவாஸிகக்க²ந்த⁴கே அந்தமஸோ மூலாயபடிகஸ்ஸனாரஹாதீ³னம்பீதி ஆதி³-ஸத்³தே³ன மானத்தாரஹமானத்தசாரிகஅப்³பா⁴னாரஹே ஸங்க³ண்ஹாதி. தே ஹி பாரிவாஸிகானம், பாரிவாஸிகா ச தேஸம் பகதத்தட்டா²னே ஏவ திட்ட²ந்தி. அதோ⁴தபாத³ட்ட²பனகந்தி யத்த² ட²த்வா பாதே³ தோ⁴வந்தி, தாதி³ஸம் தா³ருப²லகக²ண்டா³தி³ம். பாத³க⁴ம்ஸனந்தி ஸக்க²ரகத²லாதி³ம். ‘‘வத்தம் கரோந்தீ’’தி ஏத்தகமத்தஸ்ஸேவ வுத்தத்தா ஸத்³தி⁴விஹாரிகாதீ³ஹிபி அபி⁴வாத³னாதி³ம் காதும் ந வட்டதி.

‘‘பாரிஸுத்³தி⁴உபோஸதே² கரியமானே’’தி இத³ம் பவாரணாதி³வஸேஸு ஸங்கே⁴ பவாரேந்தே அனுபக³தசி²ன்னவஸ்ஸாதீ³ஹி கரியமானபாரிஸுத்³தி⁴உபோஸத²ம்பி ஸந்தா⁴ய வுத்தம். அத்தனோ பாளியாதி நவகானம் புரதோ.

‘‘பாரிவாஸிகஸ்ஸேவா’’தி இத³ம் அப்³பா⁴னாரஹபரியோஸானே ஸப்³பே³ க³ருகட்டே² ஸந்தா⁴ய வுத்தம். தேஸம்பி பச்சேகம் ஓணோஜனஸ்ஸ அனுஞ்ஞாதத்தா தத³வஸேஸா பகதத்தா ஏவ தம் ந லப⁴ந்தி.

சதுஸ்ஸாலப⁴த்தந்தி போ⁴ஜனஸாலாய படிபாடியா தி³ய்யமானப⁴த்தம். ஹத்த²பாஸே டி²தேனாதி தா³யகஸ்ஸ ஹத்த²பாஸே படிக்³க³ஹணருஹனட்டா²னேதி அதி⁴ப்பாயோ. மஹாபேளப⁴த்தேபீதி மஹந்தேஸு ப⁴த்தபச்சி²ஆதி³பா⁴ஜனேஸு ட²பேத்வா தி³ய்யமானப⁴த்தேஸுபி.

76. பாபிட்ட²தராதி பாராஜிகாபத்தீதி உக்கம்ஸவஸேன வுத்தம். ஸஞ்சரித்தாதி³பண்ணத்திவஜ்ஜதோ பன ஸுக்கவிஸ்ஸட்டா²தி³கா லோகவஜ்ஜாவ, தத்தா²பி ஸங்க⁴பே⁴தா³தி³கா பாபிட்ட²தரா ஏவ.

‘‘கம்மந்தி பாரிவாஸிககம்மவாசா’’தி ஏதேன கம்மபூ⁴தா வாசாதி கம்மவாசா-ஸத்³த³ஸ்ஸ அத்தோ²பி ஸித்³தோ⁴தி வேதி³தப்³போ³. ஸவசனீயந்தி ஏத்த² ‘‘ஸதோ³ஸ’’ந்தி (ஸாரத்த². டீ. சூளவக்³க³. 3.76) அத்த²ம் வத³தி. அத்தனோ வசனே பவத்தனகம்மந்தி ஏவமேத்த² அத்தோ² த³ட்ட²ப்³போ³, ‘‘மா பக்கமாஹீ’’தி வா ‘‘ஏஹி வினயத⁴ரானம் ஸம்முகீ²பா⁴வ’’ந்தி வா ஏவம் அத்தனோ ஆணாய பவத்தனககம்மம் ந காதப்³ப³ந்தி அதி⁴ப்பாயோ. ஏவஞ்ஹி கேனசி ஸவசனீயே கதே அனாத³ரேன அதிக்கமிதும் ந வட்டதி, பு³த்³த⁴ஸ்ஸ ஸங்க⁴ஸ்ஸ ஆணா அதிக்கந்தா நாம ஹோதி.

ரஜோஹதபூ⁴மீதி பண்ணஸாலாவிஸேஸனம். பச்சயந்தி வஸ்ஸாவாஸிகசீவரம். ஸேனாஸனம் ந லப⁴தீதி வஸ்ஸக்³கே³ன ந லப⁴தி.

அபண்ணகபடிபதா³தி அவிரத்³த⁴படிபதா³. ஸசே வாயமந்தோபீதி ஏத்த² அவிஸயபா⁴வம் ஞத்வா அவாயமந்தோபி ஸங்க³ய்ஹதி.

81. அவிஸேஸேனாதி பாரிவாஸிகுக்கி²த்தகானம் ஸாமஞ்ஞேன. பஞ்சவண்ணச்ச²த³னப³த்³த⁴ட்டா²னேஸூதி பஞ்சப்பகாரச்ச²த³னேஹி ச²ன்னட்டா²னேஸு.

ஓப³த்³த⁴ந்தி உட்டா²னாதி³ப்³யாபாரபடிப³த்³த⁴ம். பீளிதந்தி அத்தோ². மஞ்சே வா பீடே² வாதி ஏத்த² வா-ஸத்³தோ³ ஸமுச்சயத்தோ², தேன தட்டிகாசம்மக²ண்டா³தீ³ஸு தீ³கா⁴ஸனேஸுபி நிஸீதி³தும் ந வட்டதீதி தீ³பிதம் ஹோதி.

ந வத்தபே⁴த³து³க்கடந்தி வுட்³ட⁴தரஸ்ஸ ஜானந்தஸ்ஸாபி வத்தபே⁴தே³ து³க்கடம் நத்தீ²தி த³ஸ்ஸேதி. ‘‘வத்தம் நிக்கி²பாபேத்வா’’தி இத³ம் பாரிவாஸாதி³மேவ ஸந்தா⁴ய வுத்தம்.

பாரிவாஸிகவத்தகதா²வண்ணனா நிட்டி²தா.

பாரிவாஸிகக்க²ந்த⁴கவண்ணனானயோ நிட்டி²தோ.