10. கோஸம்ப³கக்க²ந்த⁴கோ
கோஸம்ப³கவிவாத³கதா²வண்ணனா
451. கோஸம்ப³கக்க²ந்த⁴கே ஸசே ஹோதி, தே³ஸேஸ்ஸாமீதி வினயத⁴ரஸ்ஸ வசனேன ஆபத்திதி³ட்டி²ம் படிலபி⁴த்வா ஏவமாஹ. தேனேவ பாளியம் ‘‘ஸோ தஸ்ஸா ஆபத்தியா அனாபத்திதி³ட்டி² ஹோதீ’’தி வுத்தம். நத்தி² ஆபத்தீதி உத³கஸ்ஸ ட²பனபா⁴வம் அஜானித்வா வா ட²பிதம் ச²ட்³டே³த்வா விஸ்ஸரித்வா வா க³மனே அஸஞ்சிச்ச அஸதியா அனாபத்திபக்கோ²பி ஸம்ப⁴வதீதி வினயத⁴ரோ தத்த² அனாபத்திதி³ட்டி²ம் படிலபி⁴த்வா ஏவமாஹ. தேனேவ பாளியம் ‘‘அஞ்ஞே பி⁴க்கூ² தஸ்ஸ ஆபத்தியா அனாபத்திதி³ட்டி²னோ ஹோந்தீ’’தி வுத்தம். பரிஸாயபிஸ்ஸ அனாபத்திதி³ட்டி²யா உப்பன்னத்தா ‘‘அஞ்ஞே’’தி ப³ஹுவசனம் கதம். அனாபத்திதி³ட்டி² அஹோஸீதி ஸுத்தந்திகத்தே²ரஸ்ஸ வினயே அபகதஞ்ஞுதாய வினயத⁴ரஸ்ஸ வசனமத்தேன ஸோ ஏவமஹோஸி, ஸா பனஸ்ஸ ஆபத்தி ஏவ உத³காவஸேஸஸ்ஸ ட²பனபா⁴வம் ஞத்வா ட²பிதத்தா. வத்து²மத்தஜானனே ஏவ ஹி ஸேகி²யா ஸசித்தகா, ந பண்ணத்திவிஜானனே. தேனேவ பாளியம் ‘‘தஸ்ஸா ஆபத்தியா அனாபத்திதி³ட்டி² ஹோதீ’’தி ஸப்³ப³த்த² ஆபத்தி இச்சேவ வுத்தம். ‘‘ஆபத்திம் ஆபஜ்ஜமானோ’’தி இத³ம் வினயத⁴ரத்தே²ரோ ‘‘தயா இத³ம் உத³கம் ட²பித’’ந்தி அத்தனா புட்டே²ன ஸுத்தந்திகத்தே²ரேன ‘‘ஆமாவுஸோ’’தி வுத்தவசனம் ஸரித்வா பண்ணத்திஅகோவித³தாய ஸஞ்சிச்சேவ அகாஸீதி ஆபத்திதி³ட்டி² ஹுத்வாவ அவோச. தேனேவ பாளியம் ‘‘அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹோந்தீ’’தி வுத்தம்.
453. ‘‘ந தாவ பி⁴ன்னோ’’தி இத³ம் உக்கி²பனதத³னுவத்தனமத்தேன ஸங்கோ⁴ பி⁴ன்னோ நாம ந ஹோதி, தம் நிஸ்ஸாய பன உப⁴யபக்கி²கானம் பக்க²ம் பரியேஸித்வா அஞ்ஞமஞ்ஞம் கோத⁴வஸேன காயவசீகலஹவட்³ட⁴னேனேவ ஹோதீதி இமமத்த²ம் ஸந்தா⁴ய வுத்தம். தேனாஹ ‘‘ஸோ ச கோ² கலஹவஸேனா’’தி. ஸம்ப⁴மஅத்த²வஸேனாதி துரிதத்த²வஸேன.
454. அகாரணேதிஆதி³ அனுக்கி²பித்வாவ உபாயேன ஸஞ்ஞாபேத்வா ஹிதேஸிதாய ஆபத்திதோ மோசேதும் யுத்தட்டா²னே கோத⁴சித்தவஸேன விஹேட²னத்தா²ய கதபா⁴வம் ஸந்தா⁴ய வுத்தம், ந பன கம்மங்க³ஸ்ஸ அபா⁴வம் ஸந்தா⁴ய. தேனேவ பாளியம் ‘‘ஆபத்தி ஏஸா, பி⁴க்க²வே, நேஸா அனாபத்தி…பே… உக்கி²த்தோ ஏஸோ பி⁴க்கூ²’’திஆதி³ வுத்தம்.
455. ‘‘அத⁴ம்மவாதீ³னம் பக்கே² நிஸின்னோ’’தி இத³ம் உபலக்க²ணமத்தம், த⁴ம்மவாதீ³னம் பக்கே² நிஸீதி³த்வா அத⁴ம்மவாதீ³னம் லத்³தி⁴ம் க³ண்ஹந்தோபி த⁴ம்மவாதீ³னம் நானாஸம்வாஸகோ ஹோதி ஏவ. கம்மம் கோபேதீதி தம் வினா க³ணஸ்ஸ அபூரணபக்க²ம் ஸந்தா⁴ய வுத்தம். யத்த² வா தத்த² வாதி த⁴ம்மவாதீ³னம் பக்கே² வா அத⁴ம்மவாதீ³னம் பக்கே² வாதி அத்தோ². இமே த⁴ம்மவாதி³னோதி க³ண்ஹாதீதி தம்தம்பக்க²க³தே பி⁴க்கூ² யாதா²வதோ வா அயாதா²வதோ வா ‘‘இமே த⁴ம்மவாதி³னோ’’தி க³ண்ஹாதி, அயம் தம்தம்பக்க²க³தானம் அத்தானம் ஸமானஸம்வாஸகம் கரோதி.
456. உபத³ம்ஸேந்தீதி பவத்தேந்தி. பாளியம் ஏத்தாவதாதி ‘‘ஏத்தகபதே³ஸம் முஞ்சித்வா நிஸின்னா மயம் கோத⁴சித்தே உப்பன்னேபி அஞ்ஞமஞ்ஞம் அனனுலோமிகம் காயகம்மாதி³ம் பவத்தேதும் ந ஸக்கி²ஸ்ஸாமா’’தி ஸல்லேக்கே²த்வா தூ³ரே நிஸீதி³தப்³ப³ந்தி அதி⁴ப்பாயோ. தேனாஹ ‘‘உபசாரம் முஞ்சித்வா’’தி.
457. பாளியம் ப⁴ண்ட³னஜாதாதிஆதீ³ஸு கலஹஸ்ஸ புப்³ப³பா⁴கோ³ ப⁴ண்ட³னம் நாம. ஹத்த²பராமாஸாதி³ கலஹோ நாம. விருத்³த⁴வாதோ³ விவாதோ³ நாம.
458. பரிபுண்ணகோஸகோட்டா²கா³ரோதி ஏத்த² கோஸோ நாம ஸுவண்ணமணிஆதி³ப⁴ண்டா³கா³ரஸாரக³ப்³போ⁴. கோட்ட²ம் வுச்சதி த⁴ஞ்ஞஸ்ஸ ஆவஸனட்டா²னம், கோட்ட²பூ⁴தம் அகா³ரம் கோட்டா²கா³ரம், த⁴ஞ்ஞஸங்க³ஹட்டா²னம். அப்³பு⁴ய்யாஸீதி யுத்³தா⁴ய அபி⁴முகோ² நிக்க²மீதி அத்தோ². ஏகஸங்கா⁴தம்பீதி ஏகயுத்³த⁴ம்பி. தோ⁴வனந்தி தோ⁴வனுத³கம்.
463. பரியாதி³ன்னரூபாதி கோத⁴சித்தேன பரிக்³க³ஹிதஸபா⁴வா.
464. தம் ந ஜானந்தீதி தம் கலஹம் ந ஜானந்தி. யே உபனய்ஹந்தீதி யதா²வுத்தம் கோதா⁴காரம் சித்தே ப³ந்த⁴ந்தி. பாகடபரிஸ்ஸயேதி ஸீஹாதி³கே. படிச்ச²ன்னபரிஸ்ஸயேதி ராகா³தி³கே. பாளியம் நத்தி² பா³லே 97 ஸஹாயதாதி பா³லம் நிஸ்ஸாய ஸீலாதி³கு³ணஸங்கா²தா ஸஹாயதா நத்தி², ந ஸக்கா லத்³து⁴ந்தி அத்தோ².
466. அத்தகாமரூபாதி அத்தனோ ஹிதகாமயமானஸபா⁴வா. அனுருத்³தா⁴தி ஏகஸேஸனயேன திண்ணம்பி குலபுத்தானம் ஆலபனம், தேனேவ ப³ஹுவசனனித்³தே³ஸோ கதோ. க²மனீயம் ஸரீரம் யாபனீயம் ஜீவிதம் ‘‘கச்சி வோ ஸரீரஞ்ச தா⁴ரேதும், ஜீவிதஞ்ச யாபேதும் ஸக்கா’’தி புச்ச²தி. தக்³கா⁴தி ஏகம்ஸத்தே² நிபாதோ, ஏகம்ஸேன மயம் ப⁴ந்தேதி அத்தோ². யதா² கத²ந்தி ஏத்த² யதா²தி நிபாதமத்தம், யதா²கத²ந்தி வா ஏகோ நிபாதோ காரணபுச்ச²னத்தோ², கேன பகாரேனாதி அத்தோ². ஏகஞ்ச பன மஞ்ஞே சித்தந்தி ஏகஸ்ஸ சித்தவஸேன இதரேஸம்பி பவத்தனதோ ஸப்³பே³ஸம் நோ ஏகம் விய சித்தந்தி அத்தோ². கச்சி பன வோ அனுருத்³தா⁴தி ஏத்த² வோதி நிபாதமத்தம், பச்சத்தவசனம் வா, கச்சி தும்ஹேதி அத்தோ². அம்ஹாகந்தி நித்³தா⁴ரணே ஸாமிவசனம், அம்ஹேஸு தீஸு யோ பட²மம் படிக்கமதீதி அத்தோ².
கோஸம்ப³கவிவாத³கதா²வண்ணனா நிட்டி²தா.
பாலிலேய்யகக³மனகதா²வண்ணனா
467. யேன பாலிலேய்யகந்தி பச்சத்தே உபயோக³வசனம், யத்த² பாலிலேய்யகோ கா³மோ, தத்த² அவஸரீதி அத்தோ². த³ஹரபோதகேஹீதி பி⁴ங்கச்சா²பேஹி. ‘‘ஓகா³ஹி’’ந்திபி பாடோ², நஹானபோக்க²ரணிந்தி அத்தோ².
உதா³னகா³தா²யம் பன – ரத²ஈஸஸதி³ஸத³ந்தஸ்ஸ நாக³ஸ்ஸ ஹத்தி²னோ ஏதம் விவேகனின்னம் சித்தம் நாகே³ன பு³த்³த⁴னாக³ஸ்ஸ விவேகனின்னசித்தேன ஸமேதி. கஸ்மா? யம் யஸ்மா ஏகோவ ரமதி வனே, தஸ்மா ஏவம் யோஜனா த³ட்ட²ப்³பா³.
பாலிலேய்யகக³மனகதா²வண்ணனா நிட்டி²தா.
அட்டா²ரஸவத்து²கதா²வண்ணனா
468. யதா² த⁴ம்மோ ததா² திட்டா²ஹீதி யதா² த⁴ம்மோ ச வினயோ ச டி²தோ, ததா² திட்ட², த⁴ம்மவாதீ³பக்கே² திட்டா²தி அத்தோ².
473. ‘‘யோ படிபா³ஹேய்ய, ஆபத்தி து³க்கடஸ்ஸா’’தி இத³ம் ஸாமக்³கீ³பே⁴த³ஸ்ஸ அகாரகே ஸந்தா⁴ய வுத்தம். யே பன பே⁴த³காரகா விருத்³தா⁴ அலஜ்ஜினோ, தேஸம் படிபா³ஹிதும் வட்டதி தேஸம் ஸந்தகஸ்ஸபி ஸேனாஸனஸ்ஸ வினாஸனவசனதோ. ‘‘விவித்தம் கத்வாபி தா³தப்³ப³’’ந்தி வுத்தத்தா பன யதா²வுட்³ட⁴ம் வரஸேனாஸனம் அத³த்வா வுட்³டா⁴னம்பி அஸஞ்ஞதானம் ஸஞ்ஞதேஹி விவித்தம் கத்வா தா³தப்³ப³ந்தி த³ட்ட²ப்³ப³ம்.
475. கம்மவாசாய ஓஸாரேத்வாதி ஏத்த² உக்கி²த்தஸ்ஸ பி⁴க்கு²னோ ஆபத்தியாபன்னபா⁴வம் படிஜானித்வா ஸம்மாவத்தனேன உக்கே²பகானம் ஸமுப்பன்னஓஸாரணச்ச²ந்த³ஸ்ஸ பகே³வ ஞாதத்தா படிப்பஸ்ஸம்ப⁴னகம்மவாசாய உக்கி²த்தானுவத்தகா ஸயமேவ நம் ஓஸாரேஸுந்தி த³ட்ட²ப்³ப³ம்.
476. அத்த²தோ அபக³தாதி ஸாமக்³கீ³அத்த²விரஹிதா, துச்ச²ப்³யஞ்ஜனாதி அத்தோ².
477. அப்படிச்ச²ன்னாசாரோதி அப்படிச்சா²தே³தப்³ப³ஸுந்த³ராசாரோ. அனபக³தந்தி காரணதோ அனபேதம். ஆதா³தப்³ப³தோ க³ஹேதப்³ப³தோ ஆதா³யந்தி ஆசரியவாதோ³ வுத்தோதி ஆஹ ‘‘ஆதா³யம் அத்தனோ ஆசரியவாத³’’ந்தி.
அட்ட²ஹி தூ³தங்கே³ஹீதி ‘‘ஸோதா ச ஹோதி ஸாவேதா ச உக்³க³ஹேதா ச தா⁴ரேதா ச விஞ்ஞாதா ச விஞ்ஞாபேதா ச குஸலோ ச ஸஹிதாஸஹிதஸ்ஸ நோ ச கலஹகாரகோ’’தி (அ. நி. 8.16) ஏவம் வுத்தேஹி அட்ட²ஹி தூ³தங்கே³ஹி. ஸேஸமேத்த², ஹேட்டா² ச ஸப்³ப³த்த² ஸுவிஞ்ஞேய்யமேவாதி.
அட்டா²ரஸவத்து²கதா²வண்ணனா நிட்டி²தா.
கோஸம்ப³கக்க²ந்த⁴கவண்ணனானயோ நிட்டி²தோ.
இதி ஸமந்தபாஸாதி³காய வினயட்ட²கதா²ய விமதிவினோத³னியம்
மஹாவக்³க³வண்ணனானயோ நிட்டி²தோ.
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ