9. சம்பேய்யக்க²ந்த⁴கோ

கஸ்ஸபகோ³த்தபி⁴க்கு²வத்து²கதா²தி³வண்ணனா

380. சம்பேய்யக்க²ந்த⁴கே தந்திப³த்³தோ⁴தி தந்தி வுச்சதி ப்³யாபாரோ, தத்த² ப³த்³தோ⁴, உஸ்ஸுக்கம் ஆபன்னோதி அத்தோ². தேனாஹ ‘‘தஸ்மிம் ஆவாஸே’’திஆதி³.

387-8. ஹாபனம் வா அஞ்ஞதா² கரணம் வா நத்தீ²தி ஞத்திகம்மஸ்ஸ ஞத்தியா ஏகத்தா ஹாபனம் ந ஸம்ப⁴வதி, தஸ்ஸா ஏகத்தா ஏவ பச்சா² ஞத்திட²பனவஸேன, த்³விக்க²த்தும் ட²பனவஸேன ச அஞ்ஞதா² கரணம் நத்தி². பரதோதி பரிவாரே. தந்தி பப்³பா³ஜனீயகம்மம், தஸ்ஸாதி அத்தோ².

கஸ்ஸபகோ³த்தபி⁴க்கு²வத்து²கதா²தி³வண்ணனா நிட்டி²தா.

த்³வேனிஸ்ஸரணாதி³கதா²வண்ணனா

395. ஏஸாதி ‘‘பா³லோ’’திஆதி³னா நித்³தி³ட்ட²புக்³க³லோ, அப்பத்தோதி ஸம்ப³ந்தோ⁴. தத்த² காரணமாஹ ‘‘யஸ்மா’’திஆதி³. தத்த² ஆவேணிகேன லக்க²ணேனாதி பப்³பா³ஜனீயகம்மஸ்ஸ நிமித்தபா⁴வேன பாளியம் வுத்தத்தா அஸாதா⁴ரணபூ⁴தேன குலதூ³ஸகபா⁴வேன. யதி³ ஹேஸ தம் கம்மம் அப்பத்தோ, கத²ம் பன ஸுனிஸ்ஸாரிதோதி ஆஹ ‘‘யஸ்மா பனஸ்ஸ ஆகங்க²மானோ ஸங்கோ⁴ பப்³பா³ஜனீயகம்மம் கரேய்யாதி வுத்தம், தஸ்மா ஸுனிஸ்ஸாரிதோ’’தி. தத்த² வுத்தந்தி கம்மக்க²ந்த⁴கே (சூளவ. 27) வுத்தம்.

ஏத்த² பன குலதூ³ஸககம்மம் கத்வா பப்³பா³ஜனீயகம்மகதஸ்ஸ தேரஸககண்ட³கட்ட²கதா²யம் ‘‘யஸ்மிம் விஹாரே வஸந்தேன யஸ்மிம் கா³மே குலதூ³ஸககம்மம் கதம் ஹோதி, தஸ்மிம் விஹாரே வா தஸ்மிம் கா³மே வா ந வஸிதப்³ப³’’ந்திஆதி³னா (பாரா. அட்ட². 2.433) யா ஸம்மாவத்தனா வுத்தா, ஸா இதரேனாபி பூரேதப்³பா³. யம் பன படிப்பஸ்ஸத்³த⁴கம்மஸ்ஸ குலதூ³ஸகஸ்ஸ தத்தே²வ அட்ட²கதா²யம் ‘‘யேஸு குலேஸு குலதூ³ஸககம்மம் கதம், ததோ பச்சயா ந க³ஹேதப்³பா³’’திஆதி³ வுத்தம், தம் ந பூரேதப்³ப³ம் குலஸங்க³ஹஸ்ஸ அகதத்தா. ஏவம் ஸேஸகம்மேஸுபி. யதி³ ஏவம் ‘‘தஜ்ஜனீயகம்மாரஹஸ்ஸ நியஸகம்மம் கரோதி…பே… ஏவம் கோ², உபாலி, அத⁴ம்மகம்மம் ஹோதீ’’திஆதி³வசனம் (மஹாவ. 402) விருஜ்ஜ²தீதி? ந விருஜ்ஜ²தி ஸங்க⁴ஸன்னிட்டா²னவஸேன தஜ்ஜனீயாதி³கம்மாரஹத்தஸ்ஸ ஸிஜ்ஜ²னதோ. யஸ்ஸ ஹி ஸங்கோ⁴ ‘‘தஜ்ஜனீயகம்மம் கரோமா’’தி ஸன்னிட்டா²னம் கத்வா கம்மவாசம் ஸாவேந்தோ பப்³பா³ஜனீயகம்மவாசம் ஸாவேதி, தஸ்ஸ கம்மம் அத⁴ம்மகம்மம் ஹோதி. ஸசே பன ‘‘தஸ்ஸேவ பப்³பா³ஜனீயகம்மமேவ கரோமா’’தி ஸன்னிட்டா²னம் கத்வா ததே³வ கரோதி, தஸ்ஸ தம் கம்மம் த⁴ம்மகம்மந்தி வேதி³தப்³ப³ம்.

ஏவமித⁴ ‘‘நிஸ்ஸாரண’’ந்தி அதி⁴ப்பேதஸ்ஸ பப்³பா³ஜனீயகம்மஸ்ஸ வஸேன அத்த²ம் த³ஸ்ஸேத்வா இதா³னி தத³ஞ்ஞேஸம் தஜ்ஜனீயாதீ³னம் வஸேன நிஸ்ஸாரணே அதி⁴ப்பேதே ‘‘அப்பத்தோ நிஸ்ஸாரண’’ந்தி இமஸ்ஸ படிபக்க²வஸேன ஸம்பத்தோ நிஸ்ஸாரணம், ‘‘தஞ்சே ஸங்கோ⁴ நிஸ்ஸாரேதி. ஸுனிஸ்ஸாரிதோ’’தி அத்த²ஸம்ப⁴வம் த³ஸ்ஸேதும் புன ‘‘தஞ்சே ஸங்கோ⁴ நிஸ்ஸாரேதீதி ஸசே ஸங்கோ⁴’’திஆதி³ வுத்தம். தத்த² தத்தா²தி தஜ்ஜனீயாதி³கம்மவிஸயே, ஏகேனாபி அங்கே³ன நிஸ்ஸாரணா அனுஞ்ஞாதாதி யோஜனா. பாளியம் அப்பத்தோ நிஸ்ஸாரணந்தி ஏத்த² ஆபன்னோ ஆவேணிகவஸேன தஜ்ஜனீயாதி³ஸங்கா²தம் நிஸ்ஸாரணம் பத்தோதி அத்தோ² க³ஹேதப்³போ³.

த்³வேனிஸ்ஸரணாதி³கதா²வண்ணனா நிட்டி²தா.

சம்பேய்யக்க²ந்த⁴கவண்ணனானயோ நிட்டி²தோ.