8. சீவரக்க²ந்த⁴கோ

ஜீவகவத்து²கதா²தி³வண்ணனா

329. சீவரக்க²ந்த⁴கே கம்மவிபாகந்தி கம்மபச்சயஉதுசித்தாஹாரஸமுட்டி²தம் அப்படிபா³ஹியரோக³ம் ஸந்தா⁴ய வுத்தம் கம்மஜஸ்ஸ ரோக³ஸ்ஸ அபா⁴வா.

330. பாளியம் ஸம்யமஸ்ஸாதி ஸங்க³ஹணஸ்ஸ. அவிஸஜ்ஜனஸ்ஸாதி அத்தோ² ‘‘யோ ஸம்யமோ ஸோ வினாஸோ’’திஆதீ³ஸு (பே. வ. 237) விய. ஏதஸ்ஸ ஸம்யமஸ்ஸ ப²லம் உபஜானாமாதி யோஜனா. தமேவ ப²லம் த³ஸ்ஸேந்தீ ஆஹ ‘‘வரமேதம்…பே… ஆஸித்த’’ந்தி. கேசி பன ‘‘ஸம்யமஸ்ஸாதி ஆனிஸம்ஸஸ்ஸ, உபயோக³த்தே² சேதம் ஸாமிவசன’’ந்தி (ஸாரத்த². டீ. மஹாவக்³க³ 3.329-330) அத்த²ம் வத³ந்தி.

336. உஸ்ஸன்னதோ³ஸோதி ஸஞ்ஜாதபித்தாதி³தோ³ஸோ. ஸப்³ப³த்தா²தி ஸகலஸரீரே.

337. மஹாபிட்டி²யகோஜவந்தி ஹத்தி²பிட்டி²யம் அத்த²ரிதப்³ப³தாய ‘‘மஹாபிட்டி²ய’’ந்தி லத்³த⁴ஸமஞ்ஞம் உண்ணாமயத்த²ரணம்.

338-9. உபட்³ட⁴காஸினம் க²மமானந்தி அட்³ட⁴காஸிஅக்³க⁴னகம். பாளியம் கிம் நு கோ²தி கதமம் நு கோ².

340-342. உபசாரேதி ஸுஸானஸ்ஸ ஆஸன்னே பதே³ஸே. ச²ட்³டே³த்வா க³தாதி கிஞ்சி அவத்வா ஏவ ச²ட்³டே³த்வா க³தா, ஏதேன ‘‘பி⁴க்கூ² க³ண்ஹந்தூ’’தி ச²ட்³டி³தே ஏவ அகாமா பா⁴க³தா³னம் விஹிதம், கேவலம் ச²ட்³டி³தே பன கதிகாய அஸதி ஏகதோ ப³ஹூஸு பவிட்டே²ஸு யேன க³ஹிதம், தேன அகாமபா⁴கோ³ ந தா³தப்³போ³தி த³ஸ்ஸேதி. ஸமானா தி³ஸா புரத்தி²மாதி³பே⁴தா³ ஏதேஸந்தி ஸதி³ஸாதி ஆஹ ‘‘ஏகதி³ஸாய வா ஓக்கமிம்ஸூ’’தி. து⁴ரவிஹாரட்டா²னேதி விஹாரஸ்ஸ ஸம்முக²ட்டா²னே.

ஜீவகவத்து²கதா²தி³வண்ணனா நிட்டி²தா.

ப⁴ண்டா³கா³ரஸம்முதிஆதி³கதா²வண்ணனா

343. விஹாரமஜ்ஜே²தி ஸப்³பே³ஸம் ஜானனத்தா²ய வுத்தம். வண்ணாவண்ணம் கத்வாதி படிவீஸப்பஹோனகதாஜானனத்த²ம் ஹலித்³தி³யாதீ³ஹி கு²த்³த³கமஹந்தவண்ணேஹி யுத்தே ஸமே கோட்டா²ஸே கத்வா. தேனாஹ ‘‘ஸமே படிவீஸே ட²பேத்வா’’தி. இத³ந்தி ஸாமணேரானம் உபட்³ட⁴படிவீஸதா³னம். பா²திகம்மந்தி பஹோனககம்மம். யத்தகேன வினயாக³தேன ஸம்முஞ்ஜனீப³ந்த⁴னாதி³ஹத்த²கம்மேன விஹாரஸ்ஸ ஊனகதா ந ஹோதி, தத்தகம் கத்வாதி அத்தோ². ஸப்³பே³ஸந்தி தத்ருப்பாத³வஸ்ஸாவாஸிகம் க³ண்ஹந்தானம் ஸப்³பே³ஸம் பி⁴க்கூ²னம், ஸாமணேரானஞ்ச. ப⁴ண்டா³கா³ரிகசீவரேபீதி அகாலசீவரம் ஸந்தா⁴ய வுத்தம். ஏதந்தி உக்குட்டி²யா கதாய ஸமபா⁴க³தா³னம். விரஜ்ஜி²த்வா கரோந்தீதி கத்தப்³ப³காலேஸு அகத்வா யதா²ருசிதக்க²ணே கரோந்தி.

ஏத்தகேன மம சீவரம் பஹோதீதி த்³வாத³ஸக்³க⁴னகேனேவ மம சீவரம் பரிபுண்ணம் ஹோதி, ந ததோ ஊனேனாதி ஸப்³ப³ம் க³ஹேதுகாமோதி அத்தோ².

ப⁴ண்டா³கா³ரஸம்முதிஆதி³கதா²வண்ணனா நிட்டி²தா.

சீவரரஜனகதா²தி³வண்ணனா

344. ஏவஞ்ஹி கதேதி வட்டாதா⁴ரஸ்ஸ அந்தோ ரஜனோத³கம், ப³ஹி ச²ல்லிகஞ்ச கத்வா வியோஜனே கதே. ந உத்தரதீதி கேவலம் உத³கதோ பே²ணுட்டா²னாபா⁴வா ந உத்தரதி. ரஜனகுண்ட³ந்தி பக்கரஜனட்ட²பனகம் மஹாக⁴டம்.

345. அனுவாதாதீ³னம் தீ³க⁴பத்தானந்தி ஆயாமதோ, வித்தா²ரதோ ச அனுவாதம். ஆதி³-ஸத்³தே³ன த்³வின்னம் க²ந்தா⁴னம் அந்தரா மாதிகாகாரேன ட²பிதபத்தஞ்ச ‘‘தீ³க⁴பத்த’’ந்தி த³ட்ட²ப்³ப³ம். ஆக³ந்துகபத்தந்தி தி³கு³ணசீவரஸ்ஸ உபரி அஞ்ஞம் பட்டம் அப்பேந்தி, தம் ஸந்தா⁴ய வுத்தம். தம் கிர இதா³னி ந கரோந்தி.

346. பாளியம் நந்தி³முகி²யாதி துட்டி²முகி²யா, பஸன்னதி³ஸாமுகா²யாதி அத்தோ².

348. அச்சு²பேய்யந்தி பதிட்ட²பேய்யம். ஹதவத்த²கானந்தி புராணவத்தா²னம். அனுத்³த⁴ரித்வாவாதி அக்³க³ளே விய து³ப்³ப³லட்டா²னம் அனபனேத்வாவ.

349-351. விஸாக²வத்து²ம்ஹி கல்லகாயாதி அகிலந்தகாயா. க³தீதி ஞாணக³தி அதி⁴க³மோ. அபி⁴ஸம்பராயோதி ‘‘ஸகிதே³வ இமம் லோகம் ஆக³ந்த்வா து³க்க²ஸ்ஸந்தம் கரோதீ’’திஆதி³னா (ஸம். நி. 5.1048) வுத்தோ ஞாணாபி⁴ஸம்பராயோ, மக்³க³ஞாணயுத்தேஹி க³ந்தப்³ப³க³திவிஸேஸோதி அத்தோ². தம் ப⁴க³வா ப்³யாகரிஸ்ஸதி. ‘‘த³தா³தி தா³ன’’ந்தி இத³ம் அன்னபானவிரஹிதானம் ஸேஸபச்சயானம் தா³னவஸேன வுத்தம். ஸோவக்³கி³கந்தி ஸக்³க³ஸம்வத்தனிகம்.

359. அட்ட²பத³கச்ச²ன்னேனாதி அட்ட²பத³கஸங்கா²தஜூதப²லகலேகா²ஸண்டா²னேன.

362. பாளியம் நதீ³பாரம் க³ந்துந்தி பி⁴க்கு²னோ நதீ³பாரக³மனம் ஹோதீதி அத்தோ². அக்³க³ளகு³த்தியேவ பமாணந்தி இமேஹி சதூஹி நிக்கே²பகாரணேஹி ட²பேந்தேனபி அக்³க³ளகு³த்திவிஹாரே ஏவ ட²பேதும் வட்டதீதி அதி⁴ப்பாயோ. நிஸ்ஸீமாக³தந்தி வஸ்ஸானஸங்கா²தம் காலஸீமம் அதிக்கந்தம், தம் வஸ்ஸிகஸாடிகசீவரம் ந ஹோதீதி அத்தோ².

சீவரரஜனகதா²தி³வண்ணனா நிட்டி²தா.

ஸங்கி⁴கசீவருப்பாத³கதா²வண்ணனா

363. பஞ்ச மாஸேதி அச்சந்தஸம்யோகே³ உபயோக³வசனம். வட்³டி⁴ம் பயோஜேத்வா ட²பிதஉபனிக்கே²பதோதி வஸ்ஸாவாஸிகஸ்ஸத்தா²ய தா³யகேஹி வட்³டி⁴ம் பயோஜேத்வா ட²பிதஉபனிக்கே²பதோ. ‘‘இத⁴ வஸ்ஸம்வுத்த²ஸங்க⁴ஸ்ஸா’’தி இத³ம் அபி⁴லாபமத்தம். இத⁴-ஸத்³த³ம் பன வினா ‘‘வஸ்ஸம்வுத்த²ஸங்க⁴ஸ்ஸ தே³மா’’தி வுத்தேபி ஸோ ஏவ நயோ. அனத்த²தகதி²னஸ்ஸாபி பஞ்ச மாஸே பாபுணாதீதி வஸ்ஸாவாஸிகலாப⁴வஸேன உப்பன்னத்தா அனத்த²தகதி²னஸ்ஸாபி வுத்த²வஸ்ஸஸ்ஸ பஞ்ச மாஸே பாபுணாதி. வக்க²தி ஹி ‘‘சீவரமாஸதோ பட்டா²ய யாவ ஹேமந்தஸ்ஸ பச்சி²மோ தி³வஸோ, தாவ வஸ்ஸாவாஸிகம் தே³மாதி வுத்தே கதி²னம் அத்த²தம் வா ஹோது அனத்த²தம் வா, அதீதவஸ்ஸம்வுத்தா²னமேவ பாபுணாதீ’’தி (மஹாவ. அட்ட². 379). ததோ பரந்தி பஞ்சமாஸதோ பரம், கி³ம்ஹானஸ்ஸ பட²மதி³வஸதோ பட்டா²யாதி அத்தோ². ‘‘கஸ்மா? பிட்டி²ஸமயே உப்பன்னத்தா’’தி இத³ம் ‘‘உதா³ஹு அனாக³தவஸ்ஸே’’தி இமஸ்ஸானந்தரம் த³ட்ட²ப்³ப³ம். போத்த²கேஸு பன ‘‘அனத்த²தகதி²னஸ்ஸாபி பஞ்ச மாஸே பாபுணாதீ’’தி இமஸ்ஸானந்தரம் ‘‘கஸ்மா பிட்டி²ஸமயே உப்பன்னத்தா’’தி இத³ம் லிக²ந்தி, தம் பமாத³லிகி²தம் பிட்டி²ஸமயே உப்பன்னம் ஸந்தா⁴ய ‘‘அனத்த²தகதி²னஸ்ஸாபீ’’தி வத்தப்³ப³தோ. வுத்த²வஸ்ஸே ஹி ஸந்தா⁴ய ‘‘அனத்த²தகதி²னஸ்ஸாபீ’’தி வுத்தம், ந ச பிட்டி²ஸமயே உப்பன்னம் வுத்த²வஸ்ஸஸ்ஸேவ பாபுணாதீதி ஸம்முகீ²பூ⁴தானம் ஸப்³பே³ஸம்பி பாபுணனதோ. தேனேவ வக்க²தி ‘‘ஸசே பன கி³ம்ஹானம் பட²மதி³வஸதோ பட்டா²ய ஏவம் வத³தி, தத்ர ஸம்முகீ²பூ⁴தானம் ஸப்³பே³ஸம் பாபுணாதி. கஸ்மா? பிட்டி²ஸமயே உப்பன்னத்தா’’தி (மஹாவ. அட்ட². 179).

து³க்³க³ஹிதானீதி அக்³க³ஹிதானி. ஸங்கி⁴கானேவாதி அத்தோ². இதோவாதி தே²ரானம் தா³தப்³ப³தோவ, இதா³னேவாதி வா அத்தோ².

ஸங்கி⁴கசீவருப்பாத³கதா²வண்ணனா நிட்டி²தா.

உபனந்த³ஸக்யபுத்தவத்து²கதா²வண்ணனா

364. ‘‘ஸத்தாஹவாரேன அருணமேவ உட்டா²பேதீ’’தி இத³ம் நானாஸீமாவிஹாரேஸு கத்தப்³ப³னயேன ஏகஸ்மிம்பி விஹாரே த்³வீஸு ஸேனாஸனேஸு நிவுத்த²பா⁴வத³ஸ்ஸனத்த²ம் வுத்தம், அருணுட்டா²பனேனேவ தத்த² வுத்தோ² ஹோதி, ந பன வஸ்ஸச்சே²த³பரிஹாராய. அந்தோஉபசாரஸீமாயபி யத்த² கத்த²சி அருணம் உட்டா²பேந்தோ அத்தனா க³ஹிதஸேனாஸனம் அப்பவிட்டோ²பி வுத்த²வஸ்ஸோ ஏவ ஹோதி, க³ஹிதஸேனாஸனே பன நிவுத்தோ² நாம ந ஹோதி, தத்த² ச அருணுட்டா²பனே பன ஸதி ஹோதி. தேனாஹ ‘‘புரிமஸ்மிம் ப³ஹுதரம் நிவஸதி நாமா’’தி, ஏதேன ச இதரஸ்மிம் ஸத்தாஹவாரேனாபி அருணுட்டா²பனே ஸதி ஏவ அப்பகதரம் நிவஸதி நாம ஹோதி, நாஸதீதி தீ³பிதம் ஹோதி. நானாலாபே⁴ஹீதி விஸும் விஸும் நிப³த்³த⁴வஸ்ஸாவாஸிகலாபே⁴ஹி. நானூபசாரேஹீதி நானாபரிக்கே²பனானாத்³வாரேஹி. ஏகஸீமாவிஹாரேஹீதி த்³வின்னம் விஹாரானம் ஏகேன பாகாரேன பரிக்கி²த்தத்தா ஏகாய உபசாரஸீமாய அந்தோக³தேஹி த்³வீஹி விஹாரேஹி. ஸேனாஸனக்³கா³ஹோ படிப்பஸ்ஸம்ப⁴தீதி பட²மம் க³ஹிதோ படிப்பஸ்ஸம்ப⁴தி. தத்தா²தி யத்த² ஸேனாஸனக்³கா³ஹோ படிப்பஸ்ஸத்³தோ⁴, தத்த².

உபனந்த³ஸக்யபுத்தவத்து²கதா²வண்ணனா நிட்டி²தா.

கி³லானவத்து²கதா²வண்ணனா

365-6. பூ⁴மியம் பரிப⁴ண்ட³ம் அகாஸீதி கி³லானேன நிபன்னபூ⁴மியம் கிலிட்ட²ட்டா²னம் தோ⁴வித்வா ஹரிதூபலித்தம் காரேஸீதி அத்தோ². பே⁴ஸஜ்ஜம் யோஜேதும் அஸமத்தோ²தி பரேஹி வுத்தவிதி⁴ம்பி காதும் அஸமத்தோ². பாளியம் கி³லானுபட்டா²கானம் சீவரதா³னே ஸாமணேரானம் திசீவராதி⁴ட்டா²னாபா⁴வா ‘‘சீவரஞ்ச பத்தஞ்சா’’திஆதி³ ஸப்³ப³த்த² வுத்தம். ஸசேபி ஸஹஸ்ஸம் அக்³க⁴தி, கி³லானுபட்டா²கானஞ்ஞேவ தா³தப்³ப³ந்தி ஸம்ப³ந்தோ⁴.

கி³லானவத்து²கதா²வண்ணனா நிட்டி²தா.

மதஸந்தககதா²தி³வண்ணனா

369. அஞ்ஞந்தி சீவரபத்ததோ அஞ்ஞம். அப்பக்³க⁴ந்தி அதிஜிண்ணாதி³பா⁴வேன நிஹீனம். ததோதி அவஸேஸபரிக்கா²ரதோ. ஸப்³ப³ந்தி பத்தம், திசீவரஞ்ச.

தத்த² தத்த² ஸங்க⁴ஸ்ஸேவாதி தஸ்மிம் தஸ்மிம் விஹாரே ஸங்க⁴ஸ்ஸேவ. பாளியம் அவிஸ்ஸஜ்ஜிகம் அவேப⁴ங்கி³கந்தி ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸேவ ஸந்தகம் ஹுத்வா கஸ்ஸசி அவிஸ்ஸஜ்ஜிகம் அவேப⁴ங்கி³கம் ப⁴விதும் அனுஜானாமீதி அத்தோ².

371-2. அக்கனாளமயந்தி அக்கத³ண்ட³மயம். அக்கது³ஸ்ஸானீதி அக்கவாகேன கதது³ஸ்ஸானி, போத்த²கக³திகானி து³க்கடவத்து²கானீதி அத்தோ². து³பட்டசீவரஸ்ஸ வா மஜ்ஜே²தி யம் நிட்டி²தே திபட்டசீவரம் ஹோதி, தஸ்ஸ மஜ்ஜே² படலம் கத்வா தா³தப்³பா³னீதி அத்தோ².

374. ‘‘ஸந்தே பதிரூபே கா³ஹகே’’தி வுத்தத்தா கா³ஹகே அஸதி அத³த்வா பா⁴ஜிதேபி ஸுபா⁴ஜிதமேவாதி த³ட்ட²ப்³ப³ம்.

376. த³க்கி²ணோத³கம் பமாணந்தி ‘‘ஏத்தகானி சீவரானி த³ஸ்ஸாமீ’’தி பட²மம் உத³கம் பாதேத்வா பச்சா² தே³ந்தி. தம் யேஹி க³ஹிதம், தே பா⁴கி³னோவ ஹோந்தீதி அதி⁴ப்பாயோ. பரஸமுத்³தே³தி ஜம்பு³தீ³பே. தம்ப³பண்ணிதீ³பஞ்ஹி உபாதா³யேஸ ஏவம் வுத்தோ.

மதஸந்தககதா²தி³வண்ணனா நிட்டி²தா.

அட்ட²சீவரமாதிகாகதா²வண்ணனா

379. புக்³க³லாதி⁴ட்டா²னனயேன வுத்தந்தி ‘‘ஸீமாய தா³ன’’ந்திஆதி³னா வத்தப்³பே³ ‘‘ஸீமாய தே³தீ’’திஆதி³ புக்³க³லாதி⁴ட்டா²னேன வுத்தம். ‘‘அபிசா’’திஆதி³னா பட²மலேட்³டு³பாதபூ⁴தபரிக்கே²பாரஹட்டா²னதோ ப³ஹி து³தியலேட்³டு³பாதோபி உபசாரஸீமா ஏவாதி த³ஸ்ஸேதி. து⁴வஸன்னிபாதட்டா²னாதி³கம்பி பரியந்தே டி²தமேவ க³ஹேதப்³ப³ம். லோகே கா³மஸீமாத³யோ விய லாப⁴ஸீமா நாம விஸும் பஸித்³தா⁴ நாம நத்தி², கேனாயம் அனுஞ்ஞாதாதி ஆஹ ‘‘நேவ ஸம்மாஸம்பு³த்³தே⁴னா’’திஆதி³. ஏதேன நாயம் ஸாஸனவோஹாரஸித்³தா⁴, லோகவோஹாரஸித்³தா⁴ ஏவாதி த³ஸ்ஸேதி. ‘‘ஜனபத³பரிச்சே²தோ³’’தி இத³ம் லோகபஸித்³த⁴ஸீமாஸத்³த³த்த²வஸேன வுத்தம். பரிச்சே²த³ப்³ப⁴ந்தரம் பன ஸப்³ப³ம் ஜனபத³ஸீமாதி க³ஹேதப்³ப³ம், ஜனபதோ³ ஏவ ஜனபத³ஸீமா. ஏவம் ரட்ட²ஸீமாதீ³ஸுபி. தேனாஹ ‘‘ஆணாபவத்திட்டா²ன’’ந்திஆதி³.

பத²வீவேமஜ்ஜே² க³தஸ்ஸாதி யாவ உத³கபரியந்தா க²ண்ட³ஸீமத்தா வுத்தம், உபசாரஸீமாதீ³ஸு பன அப³த்³த⁴ஸீமாஸு ஹேட்டா²பத²வியம் ஸப்³ப³த்த² டி²தானம் ந பாபுணாதி, கூபாதி³பவேஸாரஹட்டா²னே டி²தானஞ்ஞேவ பாபுணாதீதி ஹேட்டா² ஸீமாகதா²யம் வுத்தனயேன தம்தம்ஸீமட்ட²பா⁴வோ வேதி³தப்³போ³. சக்கவாளஸீமாய பன தி³ன்னம் பத²வீஸந்தா⁴ரகஉத³கட்டா²னேபி டி²தானம் பாபுணாதி ஸப்³ப³த்த² சக்கவாளவோஹாரத்தா.

பு³த்³தா⁴தி⁴வுத்தோ²தி பு³த்³தே⁴ன ப⁴க³வதா நிவுத்தோ². பாகவட்டந்தி நிப³த்³த⁴தா³னம். வத்ததீதி பவத்ததி. தேஹீதி யேஸம் ஸம்முகே² ஏஸ தே³தி, தேஹி பி⁴க்கூ²ஹி. து³தியபா⁴கே³ பன தே²ராஸனம் ஆருள்ஹேதி யாவ ஸங்க⁴னவகா ஏகவாரம் ஸப்³பே³ஸம் பா⁴க³ம் த³த்வா சீவரே அபரிக்கீ²ணே புன ஸப்³பே³ஸம் தா³தும் து³தியபா⁴கே³ தே²ரஸ்ஸ தி³ன்னேதி அத்தோ². பம்ஸுகூலிகானம்பி வட்டதீதி ஏத்த² ‘‘துய்ஹம் தே³மா’’தி அவுத்தத்தாதி காரணம் வத³ந்தி. யதி³ ஏவம் ‘‘ஸங்க⁴ஸ்ஸ தே³மா’’தி வுத்தேபி வட்டேய்ய, ‘‘பி⁴க்கூ²னம் தே³ம, தே²ரானம் தே³ம, ஸங்க⁴ஸ்ஸ தே³மா’’தி (மஹாவ. அட்ட². 379) வசனதோ பே⁴தோ³ ந தி³ஸ்ஸதி. வீமம்ஸிதப்³ப³மேத்த² காரணம்.

பாருபிதும் வட்டதீதி பம்ஸுகூலிகானம் வட்டதி. பி⁴க்கு²ஸங்க⁴ஸ்ஸ ச பி⁴க்கு²னீனஞ்ச த³ம்மீதி வுத்தே பன ந மஜ்ஜே² பி⁴ந்தி³த்வா தா³தப்³ப³ந்தி ஏத்த² யஸ்மா பி⁴க்கு²னிபக்கே² ஸங்க⁴ஸ்ஸ பச்சேகம் அபராமட்ட²த்தா பி⁴க்கு²னீனம் க³ணனாய பா⁴கோ³ தா³தப்³போ³தி தா³யகஸ்ஸ அதி⁴ப்பாயோதி ஸிஜ்ஜ²தி, ததா² தா³னஞ்ச பி⁴க்கூ²பி க³ணேத்வா தி³ன்னே ஏவ யுஜ்ஜதி. இதரதா² ஹி கித்தகம் பி⁴க்கூ²னம் தா³தப்³ப³ம், கித்தகம் பி⁴க்கு²னீனந்தி ந விஞ்ஞாயதி, தஸ்மா ‘‘பி⁴க்கு²ஸங்க⁴ஸ்ஸா’’தி வுத்தவசனம்பி ‘‘பி⁴க்கூ²ன’’ந்தி வுத்தவசனஸதி³ஸமேவாதி ஆஹ ‘‘பி⁴க்கூ² ச பி⁴க்கு²னியோ ச க³ணேத்வா தா³தப்³ப³’’ந்தி. தேனாஹ ‘‘புக்³க³லோ …பே… பி⁴க்கு²ஸங்க⁴க்³க³ஹணேன அக்³க³ஹிதத்தா’’தி. பி⁴க்கு²ஸங்க⁴-ஸத்³தே³ன பி⁴க்கூ²னஞ்ஞேவ க³ஹிதத்தா, புக்³க³லஸ்ஸ பன ‘‘துய்ஹஞ்சா’’தி விஸும் க³ஹிதத்தா ச தத்த²ஸ்ஸ அக்³க³ஹிததா த³ட்ட²ப்³பா³, ‘‘பி⁴க்கூ²னஞ்ச பி⁴க்கு²னீனஞ்ச துய்ஹஞ்சா’’தி வுத்தட்டா²னஸதி³ஸத்தாதி அதி⁴ப்பாயோ. புக்³க³லப்பதா⁴னோ ஹேத்த² ஸங்க⁴-ஸத்³தோ³ த³ட்ட²ப்³போ³. கேசி பன ‘‘பி⁴க்கு²ஸங்க⁴க்³க³ஹணேன க³ஹிதத்தா’’தி (ஸாரத்த². டீ. மஹாவக்³க³ 3.379) பாட²ம் லிக²ந்தி, தம் ந ஸுந்த³ரம் தஸ்ஸ விஸும் லாப⁴க்³க³ஹணே காரணவசனத்தா. ததா² ஹி விஸும் ஸங்க⁴க்³க³ஹணேன க³ஹிதத்தாதி விஸும் புக்³க³லஸ்ஸபி பா⁴க³க்³க³ஹணே காரணம் வுத்தம். யதா² சேத்த² புக்³க³லஸ்ஸ அக்³க³ஹணம், ஏவம் உபரி ‘‘பி⁴க்கு²ஸங்க⁴ஸ்ஸ ச துய்ஹஞ்சா’’திஆதீ³ஸுபி ஸங்கா⁴தி³-ஸத்³தே³ஹி புக்³க³லஸ்ஸ அக்³க³ஹணம் த³ட்ட²ப்³ப³ம். யதி³ ஹி க³ஹணம் ஸியா, ஸங்க⁴தோபி, விஸும்பீதி பா⁴க³த்³வயம் லபே⁴ய்ய உப⁴யத்த² க³ஹிதத்தா.

பூஜேதப்³ப³ந்திஆதி³ கி³ஹிகம்மம் ந ஹோதீதி த³ஸ்ஸனத்த²ம் வுத்தம். ‘‘பி⁴க்கு²ஸங்க⁴ஸ்ஸ ஹரா’’தி இத³ம் பிண்ட³பாதஹரணம் ஸந்தா⁴ய வுத்தம். தேனாஹ ‘‘பு⁴ஞ்ஜிதும் வட்டதீ’’தி. ‘‘அந்தோஹேமந்தே’’தி இமினா அனத்த²தே கதி²னே வஸ்ஸானம் பச்சி²மே மாஸே தி³ன்னம் புரிமவஸ்ஸம்வுத்தா²னஞ்ஞேவ பாபுணாதி, ததோ பரம் ஹேமந்தே தி³ன்னம் பச்சி²மவஸ்ஸம்வுத்தா²னம்பி வுத்த²வஸ்ஸத்தா பாபுணாதி. ஹேமந்ததோ பன பரம் பிட்டி²ஸமயே ‘‘வஸ்ஸம்வுத்த²ஸங்க⁴ஸ்ஸா’’தி ஏவம் வத்வா தி³ன்னம் அனந்தரே வஸ்ஸே வா ததோ பரேஸு வா யத்த² கத்த²சி தஸ்மிம் வுத்த²வஸ்ஸானம் ஸப்³பே³ஸம் பாபுணாதி. யே பன ஸப்³ப³தா² அவுத்த²வஸ்ஸா, தேஸம் ந பாபுணாதீதி த³ஸ்ஸேதி. ஸப்³பே³ஸம்பீதி ஹி தஸ்மிம் பி⁴க்கு²பா⁴வே வுத்த²வஸ்ஸானம் ஸப்³பே³ஸம்பீதி அத்தோ² த³ட்ட²ப்³போ³. ‘‘வஸ்ஸம்வுத்த²ஸங்க⁴ஸ்ஸா’’தி வுத்தத்தா ஸம்முகீ²பூ⁴தானம் ஸப்³பே³ஸந்தி ஏத்தா²பி ஏஸேவ நயோ. அதீதவஸ்ஸந்தி அனந்தராதீதவஸ்ஸம்.

உத்³தே³ஸம் க³ஹேதும் ஆக³தோதி உத்³தே³ஸே அக்³க³ஹிதேபி அந்தேவாஸிகோவாதி வுத்தம். க³ஹேத்வா க³ச்ச²ந்தோதி பரினிட்டி²தஉத்³தே³ஸோ ஹுத்வா க³ச்ச²ந்தோ. ‘‘வத்தம் கத்வா உத்³தே³ஸபரிபுச்சா²தீ³னி க³ஹேத்வா விசரந்தான’’ந்தி இத³ம் ‘‘உத்³தே³ஸந்தேவாஸிகான’’ந்தி இமஸ்ஸேவ விஸேஸனம், தேன உத்³தே³ஸகாலே ஆக³ந்த்வா உத்³தே³ஸம் க³ஹேத்வா க³ந்த்வா அஞ்ஞத்த² நிவஸந்தே அனிப³த்³த⁴சாரிகே நிவத்தேதி.

அட்ட²சீவரமாதிகாகதா²வண்ணனா நிட்டி²தா.

சீவரக்க²ந்த⁴கவண்ணனானயோ நிட்டி²தோ.