7. கதி²னக்க²ந்த⁴கோ

கதி²னானுஜானனகதா²வண்ணனா

306. கதி²னக்க²ந்த⁴கே ஸீஸவஸேனாதி பதா⁴னவஸேன. கதி²னந்தி பஞ்சானிஸம்ஸே அந்தோகரணஸமத்த²தாய தி²ரந்தி அத்தோ². ஸோ நேஸம் ப⁴விஸ்ஸதீதி யுஜ்ஜதீதி ‘‘ஸோ தும்ஹாக’’ந்தி அவத்வா ‘‘நேஸ’’ந்தி வசனம் யுஜ்ஜதி. யே அத்த²தகதி²னாதி ந கேவலம் தும்ஹாகமேவ, யே அஞ்ஞேபி அத்த²தகதி²னா, தேஸம் ப⁴விஸ்ஸதீதி அத்தோ². அத² வா வோதி ததா³ ஸம்முகீ²பூ⁴தேஹி ஸத்³தி⁴ம் அஸம்முகீ²பூ⁴தே ச அனாக³தே ச பி⁴க்கூ² ஸப்³பே³ ஏகதோ ஸம்பிண்டே³த்வா வுத்தம், தும்ஹாகந்தி அத்தோ². ஸோ நேஸந்தி ஏத்த² ஸோ தேஸந்தி யோஜேதப்³ப³ம். தேனாஹ ‘‘அத்த²தகதி²னானம் வோ, பி⁴க்க²வே, இமானி பஞ்ச கப்பிஸ்ஸந்தீ’’தி. மதகசீவரந்தி மதஸ்ஸ சீவரம். ‘‘வுத்த²வஸ்ஸவஸேனா’’தி இத³ம் பச்சி²மவஸ்ஸம்வுத்தா²னம்பி ஸாதா⁴ரணந்தி ஆஹ ‘‘புரிமிகாய வஸ்ஸம் உபக³ந்த்வா பட²மபவாரணாய பவாரிதா லப⁴ந்தீ’’தி. உபக³தா வா ந லப⁴ந்தீதி பச்சி²மிகாய வுத்த²வஸ்ஸேபி ஸந்தா⁴ய வுத்தம்.

க²லிமக்கி²தஸாடகோதி அஹதவத்த²ம் ஸந்தா⁴ய வுத்தம். ‘‘அகாதும் ந லப்³ப⁴தீ’’தி இமினா அனாத³ரியே ஸதி து³க்கடந்தி தீ³பேதி.

‘‘அபலோகேத்வா’’தி இத³ம் அஞ்ஞேஸம் வஸ்ஸம்வுத்த²பி⁴க்கூ²னம் அத³த்வா தா³துகாமேஹி கத்தப்³ப³விதி⁴த³ஸ்ஸனம். யதி³ ஏவம் கம்மவாசாய ஏவ தா³னம் அவுத்தந்தி ஆஹ ‘‘கம்மவாசா பனா’’திஆதி³. கதி²னசீவரம் விய கம்மவாசாய தா³தும் ந வட்டதீதி அபலோகேத்வாவ தா³தப்³ப³ந்தி அதி⁴ப்பாயோ.

308. மஹாபூ⁴மிகந்தி மஹாவிஸயம், சதுவீஸதிஆகாரவந்ததாய மஹாவித்தா²ரிகந்தி வுத்தம் ஹோதி. பஞ்சகந்தி பஞ்சக²ண்ட³ம். ஏஸேவ நயோ ஸேஸேஸுபி. பட²மசிமிலிகாதி கதி²னவத்த²தோ அஞ்ஞா அத்தனோ பகதிசிமிலிகா. குச்சி²சிமிலிகம் கத்வா ஸிப்³பி³தமத்தேனாதி தி²ரஜிண்ணானம் சிமிலிகானம் ஏகதோ கத்வா ஸிப்³ப³னஸ்ஸேதம் அதி⁴வசனந்தி வத³ந்தி. மஹாபச்சரியம், குருந்தி³யஞ்ச வுத்தவசனந்தி த³ஸ்ஸனம், ப்³யஞ்ஜனதோ ஏவ பே⁴தோ³, ந அத்த²தோதி த³ஸ்ஸனத்த²ம் கதந்திபி வத³ந்தி. பிட்டி²அனுவாதாரோபனமத்தேனாதி தீ³க⁴தோ அனுவாதஸ்ஸ ஆரோபனமத்தேன. குச்சி²அனுவாதாரோபனமத்தேனாதி புது²லதோ அனுவாதஸ்ஸ ஆரோபனமத்தேன. ரத்தினிஸ்ஸக்³கி³யேனாதி ரத்திஅதிக்கந்தேன.

309. ஹதவத்த²கஸாடகேனாதி அதிஜிண்ணஸாடகோ. ந ஹி தேனாதிஆதீ³ஸு தேன பரிவாராக³தபாடே²ன இத⁴ ஆனேத்வா அவுச்சமானேன கதி²னத்தா²ரகஸ்ஸ ஜானிதப்³பே³ஸு ந கிஞ்சி பரிஹாயதி, தஸ்ஸ ஸப்³ப³ஸ்ஸ இதே⁴வ வுத்தத்தாதி அதி⁴ப்பாயோ.

310. மாதா வியாதி மாதிகா, இவத்தே² க-பச்சயோ த³ட்ட²ப்³போ³. தேன ஸித்³த⁴மத்த²ம் த³ஸ்ஸேந்தோ ஆஹ ‘‘மாதிகாதி மாதரோ’’திஆதி³. அஸ்ஸாதி ஏதிஸ்ஸா மாதிகாய. பக்கமனந்திகோ கதி²னுப்³பா⁴ரோ ஏவ ஹி ஸயம் அத்தனோ உப்பஜ்ஜதீதி ஏவமபே⁴தூ³பசாரேன ‘‘மாதிகா’’தி வுத்தோ உப்³பா⁴ரஸ்ஸேவ பக்கமனந்தே ஸமுப்பத்திதோ, தப்³பி³னிமுத்தாய ச மாதிகாய அபா⁴வா, தப்பகாஸிகாபி சேத்த² பாளி ‘‘மாதிகா’’தி வத்தும் யுஜ்ஜதி. ஸாபி ஹி பக்கமனந்திகுப்³பா⁴ரப்பகாஸனேன ‘‘பக்கமனந்திகா’’தி வுத்தா. ஏஸேவ நயோ ஸேஸுப்³பா⁴ரேஸுபி. பக்கமனந்தி சேத்த² உபசாரஸீமாதிக்கமனம் த³ட்ட²ப்³ப³ம்.

கதி²னானுஜானனகதா²வண்ணனா நிட்டி²தா.

ஆதா³யஸத்தககதா²வண்ணனா

311. ‘‘ந புன ஆக³மிஸ்ஸ’’ந்தி இத³ம் ஆவாஸபலிபோ³து⁴பச்சே²த³காரணத³ஸ்ஸனம். பஞ்சஸு ஹி சீவரமாஸேஸு யதா³ கதா³சி ந பச்சேஸ்ஸந்தி சித்தேன உபசாரஸீமாதிக்கமேன ஆவாஸபலிபோ³தோ⁴ சி²ஜ்ஜதி. பச்சேஸ்ஸந்தி ப³ஹிஉபசாரக³தஸ்ஸ பன யத்த² கத்த²சி ந பச்சேஸ்ஸந்தி சித்தே உப்பன்னமத்தே சி²ஜ்ஜதி. பட²மம் சீவரபலிபோ³தோ⁴ சி²ஜ்ஜதீதி ந பச்சேஸ்ஸந்தி பக்கமனதோ புரேதரமேவ சீவரஸ்ஸ நிட்டி²தத்தா வுத்தம். ‘‘கதசீவரமாதா³யா’’தி ஹி வுத்தம். அத்த²தகதி²னஸ்ஸ ஹி பி⁴க்கு²னோ யாவ ‘‘ஸங்க⁴தோ வா தா³யககுலாதி³தோ வா சீவரம் லபி⁴ஸ்ஸாமீ’’தி சீவராஸா வா லத்³த⁴வத்தா²னம் ஸஹாயஸம்பதா³தி³யோக³ம் லபி⁴த்வா ஸங்கா⁴டிஆதி³பா⁴வேன ‘‘சி²ந்தி³த்வா கரிஸ்ஸாமீ’’தி கரணிச்சா² வா பவத்ததி, தாவ சீவரபலிபோ³தோ⁴ அனுபச்சி²ன்னோ ஏவ. யதா³ பன யதா²பத்தி²தட்டா²னதோ சீவராதீ³னம் ஸப்³ப³தா² அலாபே⁴ன வா சீவராஸா சேவ லத்³தா⁴னம் கத்வா நிட்டா²னேன வா நட்ட²வினட்டா²தி³பா⁴வேன வா சீவரே நிரபேக்க²தாய வா கரணிச்சா² ச விக³ச்ச²தி, ததா³ சீவரபலிபோ³தோ⁴ உபச்சி²ன்னோ ஹோதி.

ஸோ ச இத⁴ ‘‘கதசீவரம் ஆதா³யா’’தி வசனேன பகாஸிதோ. ஏவம் உபரி ஸப்³ப³த்த² பாளிவசனக்கமம் நிஸ்ஸாய நேஸம் பட²மம், பச்சா² ச உபச்சி²ஜ்ஜனம் வுத்தந்தி த³ட்ட²ப்³ப³ம். ஸப்³ப³தா²பி ச இமேஸம் உபி⁴ன்னம் பலிபோ³தா⁴னம் உபச்சே²தே³னேவ கதி²னுப்³பா⁴ரோ, ந ஏகஸ்ஸ. தேஸஞ்ச புப்³பா³பரியேன, ஏகக்க²ணே ச உபச்சி²ஜ்ஜனம் த³ஸ்ஸேதும் இமா அட்ட² மாதிகா ட²பிதாதி வேதி³தப்³பா³. அந்தோஸீமாயந்தி சீவரனிட்டா²னக்க²ணேயேவ சி²ன்னத்தா வுத்தம். நேவிமம் சீவரம் காரேஸ்ஸந்தி சீவரே அபேக்கா²ய விக³தத்தா கரணபலிபோ³த⁴ஸ்ஸாபி உபச்சி²ன்னதம் த³ஸ்ஸேதி. யோ பன அப்பிச்ச²தாய வா அனத்தி²கதாய வா ஸப்³ப³தா² சீவரம் ந ஸம்படிச்ச²தி, தஸ்ஸ ப³ஹிஸீமாக³தஸ்ஸ ஸப்³ப³தா²பி சீவரபலிபோ³தா⁴பா⁴வேன ந பச்சேஸ்ஸந்தி ஸன்னிட்டா²னமத்தேன ஸன்னிட்டா²னந்திகோ கதி²னுப்³பா⁴ரோ வேதி³தப்³போ³. ஸோ பனாதி பலிபோ³து⁴பச்சே²தோ³. அயம் பனாதி ஆஸாவச்சே²த³கோ கதி²னுப்³பா⁴ரோ விஸும் வித்தா²ரேத்வா வுத்தோ, இத⁴ ந வுத்தோதி ஸம்ப³ந்தோ⁴.

அனாஸாய லப⁴தீதி ‘‘யஸ்மிம் குலே சீவரம் லபி⁴ஸ்ஸாமா’’தி ஆஸா அனுப்பன்னபுப்³பா³, தத்த² சீவராஸாய அனுப்பன்னட்டா²னே யத்த² கத்த²சி லப⁴தீதி அத்தோ². ஆஸாய ந லப⁴தீதி ஆஸீஸிதட்டா²னே ந லப⁴தீதி அத்தோ². இத⁴ ந வுத்தோதி இத⁴ ஸவனந்திகானந்தரே ந வுத்தோ. தத்தா²தி தஸ்மிம் ஸீமாதிக்கந்திகே. ஸீமாதிக்கந்திகோ நாம சீவரமாஸானம் பரியந்ததி³வஸஸங்கா²தாய ஸீமாய அதிக்கமனதோ ஸஞ்ஜாதோ. கேசி ‘‘ப³ஹிஸீமாய காலாதிக்கமோ ஸீமாதிக்கமோ’’தி மஞ்ஞந்தி, தேஸம் அந்தோஉபசாரே சீவரகாலாதிக்கமேபி கதி²னுப்³பா⁴ரோ அஸம்மதோ நாம ஸியாதி ந சேதம் யுத்தம். தஸ்மா யத்த² கத்த²சி காலாதிக்கமோ ஸீமாதிக்கமோதி வேதி³தப்³போ³. ஏத்த² ச பாளியம் ‘‘கதசீவரோ’’தி இத³ம் உபலக்க²ணமத்தம், அகதசீவரஸ்ஸபி காலாதிக்கமேன ஸீமாதிக்கந்திகோ ஹோதி, த்³வே ச பலிபோ³தா⁴ ஏகதோ சி²ஜ்ஜந்தி. ஏவம் அஞ்ஞத்தா²பி யதா²ஸம்ப⁴வம் தம்தம் விஸேஸனாபா⁴வேபி கதி²னுப்³பா⁴ரதா, பலிபோ³து⁴பச்சே²த³ப்பகாரோ ச வேதி³தப்³போ³. ‘‘ஸஹுப்³பா⁴ரே த்³வேபி பலிபோ³தா⁴ அபுப்³ப³ம் அசரிமம் சி²ஜ்ஜந்தீ’’தி இத³ம் அகதசீவரஸ்ஸ பச்சேஸ்ஸந்தி அதி⁴ட்டா²னஸம்ப⁴வபக்க²ம் ஸந்தா⁴ய வுத்தம், தேஸு அஞ்ஞதராபா⁴வேபி ஸஹுப்³பா⁴ரோவ ஹோதி.

312-325. ஸமாதா³யவாரோ ஆதா³யவாரஸதி³ஸோவ. உபஸக்³க³மேவேத்த² விஸேஸோ. தேனாஹ ‘‘புன ஸமாதா³யவாரேபி…பே… தேயேவ த³ஸ்ஸிதா’’தி. விப்பகதசீவரே பக்கமனந்திகஸ்ஸ அபா⁴வதோ ‘‘யதா²ஸம்ப⁴வ’’ந்தி வுத்தம். தேனேவ விப்பகதசீவரவாரே ச²ளேவ உப்³பா⁴ரா வுத்தா, சீவரே ஹத்த²க³தே ச ஆஸாவச்சே²தி³கஸ்ஸ அஸம்ப⁴வா, ஸோ ஏதேஸு வாரேஸு யத்த² கத்த²சி ந வுத்தோ, விஸுஞ்ஞேவ வுத்தோ. விப்பகதவாரே சேத்த² ஆதா³யவாரஸமாதா³யவாரவஸேன த்³வே ச²க்கவாரா வுத்தா.

ததோ பரம் நிட்டா²னஸன்னிட்டா²னனாஸனந்திகானம் வஸேன தீணி திகானி த³ஸ்ஸிதானி. தத்த² ததியத்திகே அனதி⁴ட்டி²தேனாதி ‘‘பச்சேஸ்ஸம், ந பச்சேஸ்ஸ’’ந்தி ஏவம் அனதி⁴ட்டி²தேன, ந ஏவம் மனஸிகத்வாதி அத்தோ². ததியத்திகதோ பன பரம் ஏகம் ச²க்கம் த³ஸ்ஸிதம். ஏவம் தீணி திகானி, ஏகம் ச²க்கஞ்சாதி பட²மம் பன்னரஸகம் வுத்தம், இமினா நயேன து³தியபன்னரஸகாதீ³னி வேதி³தப்³பா³னி.

பாளியம் ஆஸாத்³வாத³ஸகே ப³ஹிஸீமாக³தஸ்ஸ கதி²னுத்³தா⁴ரேஸு தேஸம்பி சீவராஸாதி³வஸேன சீவரபலிபோ³தோ⁴ யாவ சீவரனிட்டா²னா திட்ட²தீதி ஆஹ ‘‘ஸோ ப³ஹிஸீமாக³தோ ஸுணாதி ‘உப்³ப⁴தம் கிர தஸ்மிம் ஆவாஸே கதி²னந்தி…பே… ஸவனந்திகோ கதி²னுத்³தா⁴ரோ’’’தி. ஏத்த² ச ஸவனக்க²ணே ஆவாஸபலிபோ³தோ⁴ பட²மம் சி²ஜ்ஜதி, நிட்டி²தே சீவரபலிபோ³தோ⁴தி வேதி³தப்³போ³.

தி³ஸம்க³மிகனவகே தி³ஸம்க³மிகோ பக்கமதீதி ந பச்சேஸ்ஸந்தி பக்கமதி, இமினா ஆவாஸபலிபோ³தா⁴பா⁴வோ த³ஸ்ஸிதோ ஹோதி. தேனேவ வஸ்ஸம்வுத்தா²வாஸே புன க³ந்த்வா சீவரனிட்டா²பிதமத்தே நிட்டா²னந்திகோ கதி²னுத்³தா⁴ரோ வுத்தோ. ‘‘சீவரபடிவிஸம் அபவிலாயமானோ’’தி இமினா சீவரபலிபோ³த⁴ஸமங்கி³கத்தமஸ்ஸ த³ஸ்ஸேதி, அபவிலாயமானோதி ஆகங்க²மானோ. ஸேஸம் ஸுவிஞ்ஞேய்யமேவ.

ஆதா³யஸத்தககதா²வண்ணனா நிட்டி²தா.

கதி²னக்க²ந்த⁴கவண்ணனானயோ நிட்டி²தோ.