6. பே⁴ஸஜ்ஜக்க²ந்த⁴கோ

பஞ்சபே⁴ஸஜ்ஜாதி³கதா²வண்ணனா

260. பே⁴ஸஜ்ஜக்க²ந்த⁴கே பித்தம் கோட்ட²ப்³ப⁴ந்தரக³தம் ஹோதீதி ப³ஹிஸரீரே ப்³யாபேத்வா டி²தம் அப³த்³த⁴பித்தம் கோட்ட²ப்³ப⁴ந்தரக³தம் ஹோதி, தேன பித்தம் குபிதம் ஹோதீதி அதி⁴ப்பாயோ.

261-2. பாளியம் நச்சா²தே³ந்தீதி ருசிம் ந உப்பாதே³ந்தி. ஸுஸுகாதி ஸமுத்³தே³ ஏகா மச்ச²ஜாதி, கும்பி⁴லாதிபி வத³ந்தி. ஸம்ஸட்ட²ந்தி பரிஸ்ஸாவிதம்.

263. பிட்டே²ஹீதி பிஸிதேஹி. கஸாவேஹீதி தசாதீ³னி உத³கே தாபேத்வா க³ஹிதஊஸரேஹி. உப்³பி⁴த³ந்தி ஊஸரபம்ஸுமயம். லோணபி³லந்தி லோணவிஸேஸோ.

264-5. ச²கணந்தி கோ³மயம். பாகதிகசுண்ணந்தி அபக்ககஸாவசுண்ணம், க³ந்த⁴சுண்ணம் பன ந வட்டதி. பாளியம் சுண்ணசாலினிந்தி உது³க்க²லே கோட்டிதசுண்ணபரிஸ்ஸாவனிம். ஸுவண்ணகே³ருகோதி ஸுவண்ணதுத்தா²தி³. பாளியம் அஞ்ஜனூபபிஸனந்தி அஞ்ஜனே உபனேதும் பிஸிதப்³ப³பே⁴ஸஜ்ஜம்.

267-9. கப³ளிகாதி உபனாஹபே⁴ஸஜ்ஜம். க⁴ரதி³ன்னகாபா³தோ⁴ நாம க⁴ரணியா தி³ன்னவஸீகரணபே⁴ஸஜ்ஜஸமுட்டி²தஆபா³தோ⁴. தாய சா²ரிகாய பக்³க⁴ரிதம் கா²ரோத³கந்தி பரிஸ்ஸாவனே தச்சா²ரிகம் பக்கி²பித்வா உத³கே அபி⁴ஸிஞ்சிதே ததோ சா²ரிகதோ ஹேட்டா² பக்³க⁴ரிதம் கா²ரோத³கம். பாளியம் அகடயூஸேனாதி அனபி⁴ஸங்க²தேன முக்³க³யூஸேன. கடாகடேனாதி முக்³கே³ பசித்வா அசாலேத்வா பரிஸ்ஸாவிதேன முக்³க³யூஸேனாதி வத³ந்தி.

பஞ்சபே⁴ஸஜ்ஜாதி³கதா²வண்ணனா நிட்டி²தா.

கு³ளாதி³அனுஜானனகதா²வண்ணனா

272-4. கு³ளகரணந்தி உச்சு²ஸாலம். அவிஸ்ஸத்தா²தி ஸாஸங்கா.

276. அப்பமத்தகேபி வாரேந்தீதி அப்பமத்தகே தி³ன்னே தா³யகானம் பீளாதி படிக்கி²பந்தி. படிஸங்கா²பீதி ஏத்தகேனபி யாபேதும் ஸக்கா, ‘‘அவஸேஸம் அஞ்ஞேஸம் ஹோதூ’’தி ஸல்லக்கே²த்வாபி படிக்கி²பந்தி.

279. வத்தி²பீளனந்தி யதா² வத்தி²க³ததேலாதி³ அந்தோஸரீரே ஆரோஹந்தி, ஏவம் ஹத்தே²ன வத்தி²மத்³த³னம். ஸம்பா³தே⁴ ஸத்த²கம்மவத்தி²கம்மானமேவ படிக்கி²த்தத்தா த³ஹனகம்மம் வட்டதி ஏவ.

கு³ளாதி³அனுஜானனகதா²வண்ணனா நிட்டி²தா.

யாகு³மது⁴கோ³ளகாதி³கதா²வண்ணனா

282-3. பாளியம் த³ஸஸ்ஸ டா²னானீதி அஸ்ஸ படிக்³கா³ஹகஸ்ஸ த³ஸ டா²னானி காரணானி த⁴ம்மேனாதி அத்தோ². அனுப்பவேச்ச²தீதி தே³தி. வாதஞ்ச ப்³யபனேதீதி ஸம்ப³ந்தோ⁴, வாதஞ்ச அனுலோமேதீதி அத்தோ². ஸக்³கா³ தே ஆரத்³தா⁴தி தயா தே³வலோகா ஆராதி⁴தா.

யாகு³மது⁴கோ³ளகாதி³கதா²வண்ணனா நிட்டி²தா.

பாடலிகா³மவத்து²கதா²வண்ணனா

286. பாடலிகா³மே நக³ரம் மாபேந்தீதி பாடலிகா³மஸ்ஸ ஸமீபே தஸ்ஸேவ கா³மகே²த்தபூ⁴தே மஹந்தே அரஞ்ஞப்பதே³ஸே பாடலிபுத்தம் நாம நக³ரம் மாபேந்தி. யாவதா அரியம் ஆயதனந்தி யத்தகம் அரியமனுஸ்ஸானம் ஓஸரணட்டா²னம். யாவதா வணிப்பதோ²தி யத்தகம் வாணிஜானம் ப⁴ண்ட³விக்கீணனட்டா²னம், வஸனட்டா²னம் வா, இத³ம் தேஸம் ஸப்³பே³ஸம் அக்³க³னக³ரம் ப⁴விஸ்ஸதீதி அத்தோ². புடபே⁴த³னந்தி ஸகடாதீ³ஹி நானாதே³ஸதோ ஆஹடானம் ப⁴ண்ட³புடானம் விக்கீணனத்தா²ய மோசனட்டா²னம். ஸரந்தி தளாகாதீ³ஸுபி வத்ததி, தன்னிவத்தனத்த²ம் ‘‘ஸரந்தி இத⁴ நதீ³ அதி⁴ப்பேதா’’தி வுத்தம் ஸரதி ஸந்த³தீதி கத்வா. வினா ஏவ குல்லேன திண்ணாதி இத³ம் அப்பமத்தகஉத³கம்பி அபு²ஸித்வா வினா குல்லேன பாரப்பத்தா.

பாடலிகா³மவத்து²கதா²வண்ணனா நிட்டி²தா.

கோடிகா³மேஸச்சகதா²வண்ணனா

287. பாளியம் ஸந்தா⁴விதந்தி ப⁴வதோ ப⁴வம் படிஸந்தி⁴க்³க³ஹணவஸேன ஸந்தா⁴வனம் கதம். ஸம்ஸரிதந்தி தஸ்ஸேவ வேவசனம். மமஞ்சேவ தும்ஹாகஞ்சாதி மயா ச தும்ஹேஹி ச, ஸாமிவஸேனேவ வா மம ச தும்ஹாகஞ்ச ஸந்தா⁴வனம் அஹோஸீதி அத்தோ² க³ஹேதப்³போ³. ஸம்ஸரிதந்தி ஸம்ஸரி. ப⁴வதண்ஹா ஏவ ப⁴வதோ ப⁴வம் நேதீதி ப⁴வனேத்தீதி வுத்தா.

289. ‘‘நீலா ஹோந்தீ’’தி வுத்தமேவத்த²ம் விவரிதும் ‘‘நீலவண்ணா’’திஆதி³ வுத்தம். நீலவண்ணாதி நீலவிலேபனா. ஏஸ நயோ ஸப்³ப³த்த². படிவட்டேஸீதி பஹரி. அம்ப³காயாதி அம்பா³ய. உபசாரவசனஞ்ஹேதம், மாதுகா³மேனாதி அத்தோ². உபஸம்ஹரதா²தி உபனேத², ‘‘ஈதி³ஸா தாவதிம்ஸா’’தி பரிகப்பேதா²தி அத்தோ². இத³ஞ்ச பி⁴க்கூ²னம் ஸம்வேக³ஜனனத்த²ம் வுத்தம், ந நிமித்தக்³கா³ஹத்த²ம். லிச்ச²விராஜானோ ஹி ஸப்³பே³ ந சிரஸ்ஸேவ அஜாதஸத்துனா வினாஸம் பாபுணிஸ்ஸந்தி.

கோடிகா³மேஸச்சகதா²வண்ணனா நிட்டி²தா.

ஸீஹஸேனாபதிவத்து²ஆதி³கதா²வண்ணனா

290. ஸந்தா⁴கா³ரேதி ராஜகிச்சஸ்ஸ ஸந்தா⁴ரணத்தா²ய நிச்சி²த்³த³ம் கத்வா விசாரணத்தா²ய கதமஹாஸபா⁴ய. க³மிகாபி⁴ஸங்கா²ரோதி க³மனே வாயாமோ. த⁴ம்மஸ்ஸ ச அனுத⁴ம்மந்தி தும்ஹேஹி வுத்தஸ்ஸ காரணஸ்ஸ அனுகாரணம், தும்ஹேஹி வுத்தஸ்ஸ அத்த²ஸ்ஸ அனுரூபமேவாதி அதி⁴ப்பாயோ. ஸஹத⁴ம்மிகோ வாதா³னுவாதோ³தி பரேஹி வுத்தகாரணேன ஸகாரணோ ஹுத்வா தும்ஹாகம் வாதோ³ வா இதோ பரம் தஸ்ஸ அனுவாதோ³ வா. கோசி அப்பமத்தகோபி கா³ரய்ஹம் டா²னம் ந ஆக³ச்ச²தீதி கிம் தவ வாதே³ கா³ரய்ஹகாரணம் நத்தீ²தி வுத்தம் ஹோதி.

293. அனுவிச்சகாரந்தி அனுவிதி³தாகாரம். ரதனத்தயஸ்ஸ ஸரணக³மனாதி³கிரியம் கரோதி. ஸஹஸா கத்வா மா பச்சா² விப்படிஸாரீ அஹோஸீதி அத்தோ². படாகம் பரிஹரேய்யுந்தி த⁴ஜபடாகம் உக்கி²பித்வா ‘‘ஈதி³ஸோ அம்ஹாகம் ஸரணம் க³தோ ஸாவகோ ஜாதோ’’தி நக³ரே கோ⁴ஸேந்தா ஆஹிண்ட³ந்தி.

294. நிமித்தகம்மஸ்ஸாதி மம்ஸகா²த³னனிமித்தேன உப்பன்னபாணாதிபாதகம்மஸ்ஸ.

ஸீஹஸேனாபதிவத்து²ஆதி³கதா²வண்ணனா நிட்டி²தா.

கப்பியபூ⁴மிஅனுஜானனகதா²வண்ணனா

295. அனுப்பகே³ ஏவாதி பாதோவ. ஓரவஸத்³த³ந்தி மஹாஸத்³த³ம். தம் பன அவத்வாபீதி பி-ஸத்³தே³ன ததா²வசனம்பி அனுஜானாதி. அட்ட²கதா²ஸூதி அந்த⁴கட்ட²கதா²விரஹிதாஸு ஸேஸட்ட²கதா²ஸு. ஸாதா⁴ரணலக்க²ணந்தி அந்த⁴கட்ட²கதா²ய ஸஹ ஸப்³ப³ட்ட²கதா²னம் ஸமானம்.

சயந்தி அதி⁴ட்டா²னஉச்சவத்து²ம். யதோ பட்டா²யாதி யதோ இட்ட²காதி³தோ பட்டா²ய, யம் ஆதி³ம் கத்வா பி⁴த்திம் உட்டா²பேதுகாமாதி அத்தோ². ‘‘த²ம்பா⁴ பன உபரி உக்³க³ச்ச²ந்தி, தஸ்மா வட்டந்தீ’’தி ஏதேன இட்ட²கபாஸாணா ஹேட்டா² பதிட்டா²பிதாபி யதி³ சயதோ, பூ⁴மிதோ வா ஏகங்கு³லமத்தம்பி உக்³க³தா திட்ட²ந்தி, வட்டந்தீதி ஸித்³த⁴ம் ஹோதி.

ஆராமோதி உபசாரஸீமாபரிச்சி²ன்னோ ஸகலோ விஹாரோ. ஸேனாஸனானீதி விஹாரஸ்ஸ அந்தோ திணகுடிஆதி³கானி ஸங்க⁴ஸ்ஸ நிவாஸகே³ஹானி. விஹாரகோ³னிஸாதி³கா நாமாதி ஸேனாஸனகோ³னிஸாதி³கா. ஸேனாஸனானி ஹி ஸயம் பரிக்கி²த்தானிபி ஆராமபரிக்கே²பாபா⁴வேன ‘‘கோ³னிஸாதி³கானீ’’தி வுத்தானி. ‘‘உபட்³ட⁴பரிக்கி²த்தோபீ’’தி இமினா ததோ ஊனபரிக்கி²த்தோ யேபு⁴ய்யேன அபரிக்கி²த்தோ நாம, தஸ்மா அபரிக்கி²த்தஸங்க்²யமேவ க³ச்ச²தீதி த³ஸ்ஸேதி. ஏத்தா²தி உபட்³டா⁴தி³பரிக்கி²த்தே. கப்பியகுடிம் லத்³து⁴ம் வட்டதீதி கோ³னிஸாதி³யா அபா⁴வேன ஸேஸகப்பியகுடீஸு தீஸு யா காசி கப்பியகுடி காதப்³பா³தி அத்தோ².

தேஸம் கே³ஹானீதி ஏத்த² பி⁴க்கூ²னம் வாஸத்தா²ய கதம்பி யாவ ந தே³ந்தி, தாவ தேஸம் ஸந்தகம்யேவ ப⁴விஸ்ஸதீதி த³ட்ட²ப்³ப³ம். விஹாரம் ட²பேத்வாதி உபஸம்பன்னானம் வாஸத்தா²ய கதகே³ஹம் ட²பேத்வாதி அத்தோ². கே³ஹந்தி நிவாஸகே³ஹம், தத³ஞ்ஞம் பன உபோஸதா²கா³ராதி³ ஸப்³ப³ம் அனிவாஸகே³ஹம் சதுகப்பியபூ⁴மிவிமுத்தா பஞ்சமீ கப்பியபூ⁴மி. ஸங்க⁴ஸந்தகேபி ஹி ஏதாதி³ஸே கே³ஹே ஸுட்டு² பரிக்கி²த்தாராமத்தேபி அப்³போ⁴காஸே விய அந்தோவுத்தா²தி³தோ³ஸோ நத்தி². யேன கேனசி ச²ன்னே, பரிச்ச²ன்னே ச ஸஹஸேய்யப்பஹோனகே பி⁴க்கு²ஸங்க⁴ஸ்ஸ நிவாஸகே³ஹே அந்தோவுத்தா²தி³தோ³ஸோ, ந அஞ்ஞத்த². தேனாஹ ‘‘யம் பனா’’திஆதி³. தத்த² ‘‘ஸங்கி⁴கம் வா புக்³க³லிகம் வா’’தி இத³ம் கிஞ்சாபி பி⁴க்கு²னீனம் ஸாமஞ்ஞதோ வுத்தம், பி⁴க்கூ²னம் பன ஸங்கி⁴கம் புக்³க³லிகஞ்ச பி⁴க்கு²னீனம், தாஸம் ஸங்கி⁴கம் புக்³க³லிகஞ்ச பி⁴க்கூ²னம் கி³ஹிஸந்தகட்டா²னே திட்ட²தீதி வேதி³தப்³ப³ம்.

முக²ஸன்னிதீ⁴தி அந்தோஸன்னிஹிததோ³ஸோ ஹி முக²ப்பவேஸனனிமித்தம் ஆபத்திம் கரோதி, நாஞ்ஞதா². தஸ்மா ‘‘முக²ஸன்னிதீ⁴’’தி வுத்தோ.

தத்த² தத்த² க²ண்டா³ ஹோந்தீதி உபட்³ட⁴தோ அதி⁴கம் க²ண்டா³ ஹோந்தி. ஸப்³ப³ஸ்மிம் ச²த³னே வினட்டே²தி திணபண்ணாதி³வஸ்ஸபரித்தாயகே ச²த³னே வினட்டே². கோ³பானஸீனம் பன உபரி வல்லீஹி ப³த்³த⁴த³ண்டே³ஸு டி²தேஸுபி ஜஹிதவத்து²கா ஹோந்தி ஏவ. பக்க²பாஸகமண்ட³லந்தி ஏகஸ்மிம் பஸ்ஸே திண்ணம் கோ³பானஸீனம் உபரி டி²ததிணபண்ணாதி³ச்ச²த³னம் வுச்சதி.

அனுபஸம்பன்னஸ்ஸ தா³தப்³போ³ அஸ்ஸாதிஆதி³னா அகப்பியகுடியம் வுத்த²ம்பி அனுபஸம்பன்னஸ்ஸ தி³ன்னே கப்பியம் ஹோதி, ஸாபேக்க²தா³னஞ்சேத்த² வட்டதி, படிக்³க³ஹணம் விய ந ஹோதீதி த³ஸ்ஸேதி.

299. பாளியம் கந்தாரே ஸம்பா⁴வேஸீதி அப்பப⁴க்க²கந்தாரே ஸம்பாபுணி.

கப்பியபூ⁴மிஅனுஜானனகதா²வண்ணனா நிட்டி²தா.

கேணியஜடிலவத்து²கதா²வண்ணனா

300. ஜடிலோதி ஆஹரிமஜடாத⁴ரோ தாபஸவேஸதா⁴ரகோ யஞ்ஞயுத்தோ லோகபூஜிதோ ப்³ராஹ்மணோ. பவத்தாரோ பாவசனவஸேன வத்தாரோ. யேஸம் ஸந்தகமித³ம், யேஹி வா இத³ம் கீ³தந்தி அத்தோ². கீ³தம் பவுத்தம் ஸமிஹிதந்தி அஞ்ஞமஞ்ஞஸ்ஸ பரியாயவசனம் வுத்தந்தி அத்தோ². தத³னுகா³யந்தீதி தம் தேஹி புப்³பே³ கீ³தம் அனுகா³யந்தி. ஏவம் ஸேஸேஸு ச.

யாவகாலிகபக்கானந்தி பக்கே ஸந்தா⁴ய வுத்தம், ஆமானி பன அனுபஸம்பன்னேஹி ஸீதுத³கே மத்³தி³த்வா பரிஸ்ஸாவேத்வா தி³ன்னபானம் பச்சா²ப⁴த்தம்பி கப்பதி ஏவ. அயஞ்ச அத்தோ² மஹாஅட்ட²கதா²யம் ஸரூபதோ அவுத்தோதி ஆஹ ‘‘குருந்தி³யம் பனா’’திஆதி³. ‘‘உச்சு²ரஸோ நிகஸடோ’’தி இத³ம் பாதப்³ப³ஸாமஞ்ஞேன யாமகாலிககதா²யம் வுத்தம், தம் பன ஸத்தாஹகாலிகமேவாதி க³ஹேதப்³ப³ம். இமே சத்தாரோ ரஸாதி ப²லபத்தபுப்ப²உச்சு²ரஸா சத்தாரோ.

பாளியம் அக்³கி³ஹுத்தமுகா²தி அக்³கி³ஜுஹனபுப்³ப³கா. ச²ந்த³ஸோதி வேத³ஸ்ஸ. ஸாவித்தீ முக²ம் பட²மம் ஸஜ்ஜா²யிதப்³பா³தி அத்தோ². தபதந்தி விஜோதந்தானம்.

கேணியஜடிலவத்து²கதா²வண்ணனா நிட்டி²தா.

ரோஜமல்லாதி³வத்து²கதா²வண்ணனா

301. ப³ஹுகதோ பு³த்³தே⁴ வாதி பு³த்³தே⁴ கதப³ஹுமானோதி அத்தோ². ஸோ கோ² அஹம், ப⁴ந்தே ஆனந்த³, ஞாதீனம் த³ண்ட³ப⁴யதஜ்ஜிதோ அஹோஸிந்தி ஸேஸோ. ஏவஞ்ஹி ஸதி ‘‘ஏவாஹ’’ந்தி புன அஹம்-க³ஹணம் யுஜ்ஜதி. விவரீதி ‘‘விவரதூ’’தி சிந்தாமத்தேன விவரி, ந உட்டா²ய ஹத்தே²ன.

303. அஞ்ஞதரோதி ஸுப⁴த்³தோ³ வுட்³ட⁴பப்³ப³ஜிதோ. த்³வே தா³ரகாதி ஸாமணேரபூ⁴மியம் டி²தா த்³வே புத்தா. நாளியாவாபகேனாதி நாளியா சேவ த²விகாய ச. ஸம்ஹரத² இமேஹி பா⁴ஜனேஹி தண்டு³லாதீ³னி ஸங்கட்³ட⁴தா²தி அத்தோ². பு⁴ஸாகா³ரேதி பலாலமயே அகா³ரே, பலாலபுஞ்ஜம் அப்³ப⁴ந்தரதோ பலாலம் ஸங்கட்³டி⁴த்வா அகா³ரம் கதம் ஹோதி, தத்தா²தி அத்தோ².

ரோஜமல்லாதி³வத்து²கதா²வண்ணனா நிட்டி²தா.

சதுமஹாபதே³ஸகதா²வண்ணனா

305. பரிமத்³த³ந்தாதி உபபரிக்க²ந்தா. த்³வே படா தே³ஸனாமேனேவ வுத்தாதி தேஸம் ஸரூபத³ஸ்ஸனபத³மேதம். நாஞ்ஞனிவத்தனபத³ம் பத்துண்ணபடஸ்ஸாபி தே³ஸனாமேன வுத்தத்தா.

தும்பா³தி பா⁴ஜனானி. ப²லதும்போ³ நாம லாபு³ஆதி³. உத³கதும்போ³ உத³கக⁴டோ. கிலஞ்ஜச்ச²த்தந்தி வேளுவிலீவேஹி வாயித்வா கதச²த்தம். ஸம்பி⁴ன்னரஸந்தி மிஸ்ஸீபூ⁴தரஸம்.

சதுமஹாபதே³ஸகதா²வண்ணனா நிட்டி²தா.

பே⁴ஸஜ்ஜக்க²ந்த⁴கவண்ணனானயோ நிட்டி²தோ.