4. பவாரணாக்க²ந்த⁴கோ

அபா²ஸுவிஹாரகதா²தி³வண்ணனா

209. பவாரணாக்க²ந்த⁴கே பாளியம் பிண்டா³ய படிக்கமேய்யாதி பிண்டா³ய சரித்வா படிக்கமேய்ய. அவக்காரபாதிந்தி அதிரேகபிண்ட³பாதட²பனகம் ஏகம் பா⁴ஜனம். அவிஸய்ஹந்தி உக்கி²பிதும் அஸக்குணேய்யம். விலங்க⁴னம் உக்கி²பனம் விலங்கோ⁴, ஸோ ஏவ விலங்க⁴கோ, ஹத்தே²ஹி விலங்க⁴கோ ஹத்த²விலங்க⁴கோதி ஆஹ ‘‘ஹத்து²க்கே²பகேனா’’தி. அத² வா விலங்க⁴கேன உக்கே²பகேன ஹத்தே²னாதிபி அத்தோ², அஞ்ஞமஞ்ஞம் ஸம்ஸிப்³பி³தஹத்தே²ஹீதி வுத்தம் ஹோதி.

213. ஸசே பன வுட்³ட⁴தரோ ஹோதீதி பவாரணாதா³யகோ பி⁴க்கு² வுட்³ட⁴தரோ ஹோதி. ஏவஞ்ஹி தேன தஸ்ஸத்தா²ய பவாரிதம் ஹோதீதி ஏத்த² ஏவம் தேன அப்பவாரிதோபி தஸ்ஸ ஸங்க⁴ப்பத்திமத்தேன ஸங்க⁴பவாரணாகம்மம் ஸமக்³க³கம்மமேவ ஹோதீதி த³ட்ட²ப்³ப³ம். தேன ச பி⁴க்கு²னாதி பவாரணாதா³யகேன பி⁴க்கு²னா.

234. ப³ஹூபி ஸமானவஸ்ஸா ஏகதோ பவாரேதும் லப⁴ந்தீதி ஏகஸ்மிம் ஸம்வச்ச²ரே லத்³தூ⁴பஸம்பத³தாய ஸமானுபஸம்பன்னவஸ்ஸா ஸப்³பே³ ஏகதோ பவாரேதும் லப⁴ந்தீதி அத்தோ².

237. பாளியம் மிச்சா²தி³ட்டீ²தி ‘‘நத்தி² தி³ன்ன’’ந்திஆதி³ (தீ³. நி. 1.171; ம. நி. 1.445; 2.94, 95, 225; 3.91, 116, 136; ஸம். நி. 3.210; த⁴. ஸ. 1221) நயப்பவத்தா. அந்தக்³கா³ஹிகாதி ஸஸ்ஸதுச்சே²த³ஸங்கா²தஸ்ஸ அந்தஸ்ஸ கா³ஹிகா. யம் கோ² த்வந்திஆதீ³ஸு யம் பவாரணம் ட²பேஸி, தம் தி³ட்டே²ன ட²பேஸீதி தம்-ஸத்³த³ம் அஜ்ஜா²ஹரித்வா யோஜேதப்³ப³ம்.

239. வத்து²ம் பகாஸேந்தோதி புக்³க³லே பரிஸங்குப்பத்தியா நிமித்தபூ⁴தம் வத்து²மத்தம்யேவ ஸந்தா⁴ய வுத்தம். யம் பன வத்து²ம் ஸந்தா⁴ய ‘‘புக்³க³லோ பஞ்ஞாயதி, ந வத்தூ²’’தி ஆஹ, ந தம் ஸந்தா⁴யேதம் வுத்தம். யதி³ பன தஸ்ஸ பி⁴க்கு²னோ வஸனட்டா²னே போக்க²ரணிதோ மச்ச²க்³க³ஹணாதி³ தி³ஸ்ஸேய்ய, ததா³ ‘‘வத்து² ச புக்³க³லோ ச பஞ்ஞாயதீ’’தி வத்தப்³ப³ம் ப⁴வேய்ய. தேனாஹ ‘‘புரிமனயேனேவ சோரேஹீ’’திஆதி³. பி⁴க்கு²னோ ஸரீரே மாலாக³ந்த⁴ஞ்ச அரிட்ட²க³ந்த⁴ஞ்ச தி³ஸ்வா ஏவம் ‘‘வத்து² ச புக்³க³லோ ச பஞ்ஞாயதீ’’தி வுத்தந்தி வேதி³தப்³ப³ம்.

அபா²ஸுவிஹாரகதா²தி³வண்ணனா நிட்டி²தா.

ப⁴ண்ட³னகாரகவத்து²கதா²வண்ணனா

240. த்³வே சாதுத்³த³ஸிகா ஹோந்தீதி ததியபக்கே² சாதுத்³த³ஸியா ஸத்³தி⁴ம் த்³வே சாதுத்³த³ஸிகா ஹோந்தி. ‘‘ப⁴ண்ட³னகாரகானம் தேரஸே வா சாதுத்³த³ஸே வா இமே பன்னரஸீபவாரணம் பவாரேஸ்ஸந்தீ’’தி இமினா யதா²ஸகம் உபோஸத²கரணதி³வஸதோ பட்டா²ய பி⁴க்கூ²னம் சாதுத்³த³ஸீபன்னரஸீவோஹாரோ, ந சந்த³க³திஸித்³தி⁴யா திதி²யா வஸேனாதி த³ஸ்ஸேதி. கிஞ்சாபி ஏவம் ‘‘அனுஜானாமி, பி⁴க்க²வே, ராஜூனம் அனுவத்திது’’ந்தி (மஹாவ. 186) வசனதோ பனேத்த² லோகியானம் திதி²ம் அனுவத்தந்தேஹிபி அத்தனோ உபோஸத²க்கமேன சாதுத்³த³ஸிம் பன்னரஸிம் வா, பன்னரஸிம் சாதுத்³த³ஸிம் வா கரோந்தேஹேவ அனுவத்திதப்³ப³ம், ந பன ஸோளஸமதி³வஸம் வா தேரஸமதி³வஸம் வா உபோஸத²தி³வஸம் கரோந்தேஹி. தேனேவ பாளியம்பி ‘‘த்³வே தயோ உபோஸதே² சாதுத்³த³ஸிகே காது’’ந்தி வுத்தம். அஞ்ஞதா² த்³வாத³ஸியம், தேரஸியம் வா உபோஸதோ² காதப்³போ³தி வத்தப்³ப³தோ. ‘‘ஸகிம் பக்க²ஸ்ஸ சாதுத்³த³ஸே, பன்னரஸே வா’’திஆதி³வசனம்பி உபவுத்த²க்கமேனேவ வுத்தம், ந திதி²க்கமேனாதி க³ஹேதப்³ப³ம்.

ப⁴ண்ட³னகாரகவத்து²கதா²வண்ணனா நிட்டி²தா.

பவாரணாஸங்க³ஹகதா²வண்ணனா

241. ‘‘பவாரேத்வா பன அந்தராபி சாரிகம் பக்கமிதும் லப⁴ந்தீ’’தி இமினா பவாரணாஸங்க³ஹே கதே அந்தரா பக்கமிதுகாமா ஸங்க⁴ம் ஸன்னிபாதாபேத்வா பவாரேதும் லப⁴ந்தீதி த³ஸ்ஸேதி.

பவாரணாஸங்க³ஹகதா²வண்ணனா நிட்டி²தா.

பவாரணாக்க²ந்த⁴கவண்ணனானயோ நிட்டி²தோ.