8. ஸஹத⁴ம்மிகவக்³கோ³

1. ஸஹத⁴ம்மிகஸிக்கா²பத³வண்ணனா

434. அட்ட²மவக்³க³ஸ்ஸ பட²மே உபஸம்பன்னஸ்ஸ பஞ்ஞத்தேன வசனம், அஸிக்கி²துகாமஸ்ஸ லேஸேன ஏவம் வசனந்தி த்³வே அங்கா³னி.

ஸஹத⁴ம்மிகஸிக்கா²பத³வண்ணனா நிட்டி²தா.

2. விலேக²னஸிக்கா²பத³வண்ணனா

438. து³தியே அலஜ்ஜிதாதி அலஜ்ஜிதாய. ஏவம் ஸேஸேஸுபி. ஸஞ்சிச்ச ஆபத்திம் ஆபஜ்ஜதீதிஆதி³ பி⁴க்கு²பி⁴க்கு²னீனஞ்ஞேவ வுத்தம் அலஜ்ஜிலக்க²ணம், ஸாமணேராதீ³னம், பன க³ஹட்டா²னஞ்ச ஸாதா⁴ரணவஸேன யதா²ஸகம் ஸிக்கா²பத³வீதிக்கமனபடிகூ³ஹனாதி³தோ வேதி³தப்³ப³ம். லஜ்ஜிலக்க²ணேபி ஏஸேவ நயோ. கிஞ்சாபி குக்குச்சே உப்பன்னேபி மத்³தி³த்வா கரோந்தோ, கப்பியே அகப்பியஸஞ்ஞிதாய கரோந்தோபி தங்க²ணிகாய அலஜ்ஜிதாய ஏவம் கரோந்தி. ததா²பி குக்குச்சாதி³பே⁴தே³ விஸும் க³ஹிதாதி த³ட்ட²ப்³ப³ம்.

வஜ்ஜிபுத்தகா த³ஸவத்து²தீ³பகா. பரூபஹாரஅஞ்ஞாணகங்கா²பரவிதாரணாதி³வாதா³தி ஏத்த² அரஹத்தம் படிஜானந்தானம் குஹகானம் ஸுக்கவிஸ்ஸட்டி²ம் தி³ஸ்வா ‘‘மாரகாயிகா தே³வதா அஸுசிம் உபஸம்ஹரந்தீ’’திகா³ஹினோ பரூபஹாரவாதா³ நாம. அரஹதோ ஸப்³பே³ஸம் இத்தி²புரிஸாதீ³னம் நாமாதி³அஜானனே அஞ்ஞாணம், தத்த² ஸன்னிட்டா²னபா⁴வேன கங்கா², பரதோ ஸுத்வா நாமாதி³ஜானனேன பரவிதாரணோ அத்தீ²திவாதி³னோ அஞ்ஞாணவாதா³, கங்கா²வாதா³, பரவிதாரணவாதா³ ச தேஸம், மஹாஸங்கி⁴காதீ³னஞ்ச விபா⁴கோ³ கதா²வத்து²ப்பகரணே வுத்தோ.

சத்தாரோ மக்³கா³ ச ப²லானி சாதி ஏத்த² ச-காரேன அபி⁴ஞ்ஞாபடிஸம்பி⁴தா³பி ஸங்க³ஹிதாதி த³ட்ட²ப்³ப³ம். கேசீதி பரியத்தித⁴ரா த⁴ம்மகதி²கா. புன கேசீதி படிபத்தித⁴ரா பம்ஸுகூலிகத்தே²ரா. இதரே பனாதிஆதீ³ஸு அயம் அதி⁴ப்பாயோ – த⁴ம்மகதி²கத்தே²ரா பன பம்ஸுகூலிகத்தே²ரேஹி ஆப⁴தம் ஸுத்தம் ஸுத்வா –

‘‘யாவ திட்ட²ந்தி ஸுத்தந்தா, வினயோ யாவ தி³ப்பதி;

தாவ த³க்க²ந்தி ஆலோகம், ஸூரியே அப்³பு⁴ட்டி²தே யதா².

‘‘ஸுத்தந்தேஸு அஸந்தேஸு, பமுட்டே² வினயம்ஹி ச;

தமோ ப⁴விஸ்ஸதி லோகே, ஸூரியே அத்த²ங்க³தே யதா².

‘‘ஸுத்தந்தே ரக்கி²தே ஸந்தே, படிபத்தி ஹோதி ரக்கி²தா;

படிபத்தியம் டி²தோ தீ⁴ரோ, யோக³க்கே²மா ந த⁴ம்ஸதீ’’தி. (அ. நி. அட்ட². 1.1.130) –

இத³ம் ஸுத்தம் ஆஹரித்வா அத்தனோவ வாத³ம் பதிட்ட²பேந்தா பாராஜிகானாபஜ்ஜனவஸேன டி²தா படிபத்திஸங்க³ஹிதா பரியத்தியேவ மூலந்தி ஆஹம்ஸூதி. தேனாஹ ‘‘ஸசே பஞ்ச பி⁴க்கூ² சத்தாரி பாராஜிகானி ரக்க²ணகா…பே… ஸாஸனம் வுட்³டி⁴ம் விருள்ஹிம் க³மயிஸ்ஸந்தீ’’தி. ஏதேன ச பரிக்கீ²ணே காலே லஜ்ஜிக³ணம் அலப⁴ந்தேன வினயத⁴ரேன அலஜ்ஜினோபி பகதத்தே ஸங்க³ஹேத்வா தேஹி ஸஹ த⁴ம்மாமிஸஸம்போ⁴க³ம் ஸம்வாஸம் கரோந்தேன ப³ஹூ குலபுத்தே உபஸம்பாதே³த்வா ஸாஸனம் பக்³க³ஹேதும் வட்டதீதி இத³ம் ஸிஜ்ஜ²தீதி த³ட்ட²ப்³ப³ம். க³ரஹிதுகாமதா, உபஸம்பன்னஸ்ஸ ஸந்திகே ஸிக்கா²பத³விவண்ணனந்தி த்³வே அங்கா³னி.

விலேக²னஸிக்கா²பத³வண்ணனா நிட்டி²தா.

3. மோஹனஸிக்கா²பத³வண்ணனா

444. ததியே பாளியம் கோ பன வாதோ³ பி⁴ய்யோதி தேஹி அஞ்ஞேஹி பி⁴க்கூ²ஹி தி³ட்ட²த்³வத்திவாரதோ பி⁴ய்யோ பன வித்தா²ரேன உத்³தி³ஸியமானே பாதிமோக்கே² நிஸின்னபுப்³ப³தா அத்தி² சே, தத்த² கிமேவ வத்தப்³ப³ம், ஆபத்திமோக்கோ² நத்தி² ஏவாதி அதி⁴ப்பாயோ. தஞ்ச யதா²த⁴ம்மோ காரேதப்³போ³தி தந்தி காரணத்தே² உபயோக³வசனம், தாயாதி அத்தோ². யதா² த⁴ம்மோ ச வினயோ ச டி²தோ, ததா² தாய ஆபத்தியா காரேதப்³போ³தி வுத்தம் ஹோதி. மோஹாரோபனம், திக்க²த்தும் ஸுதபா⁴வோ, மோஹேதுகாமஸ்ஸ மோஹனந்தி தீணி அங்கா³னி.

மோஹனஸிக்கா²பத³வண்ணனா நிட்டி²தா.

4. பஹாரஸிக்கா²பத³வண்ணனா

451. சதுத்தே² பாளியம் காயபடிப³த்³தே⁴ன வாதி ஏத்த² பாஸாணாதி³னிஸ்ஸக்³கி³யபஹாரோபி ஸங்க³ஹிதோ.

452. ரத்தசித்தோதி காயஸம்ஸக்³க³ராகே³ன வுத்தம். மேது²னராகே³ன பன பஹாரதோ புரிஸாதீ³ஸு து³க்கடமேவ. மோக்கா²தி⁴ப்பாயேன த³ண்ட³கோடியா ஸப்பாதி³ம் க⁴ட்டேத்வா மண்டூ³காதி³ம் மோசேந்தஸ்ஸபி அனாபத்தி ஏவ. குபிததா, உபஸம்பன்னஸ்ஸ ந மோக்கா²தி⁴ப்பாயேன பஹாரோதி த்³வே அங்கா³னி.

பஹாரஸிக்கா²பத³வண்ணனா நிட்டி²தா.

5. தலஸத்திகஸிக்கா²பத³வண்ணனா

457. பஞ்சமே ந பஹரிதுகாமதாய தி³ன்னத்தா து³க்கடந்தி ஏத்த² கிமித³ம் து³க்கடம், பஹாரபச்சயா, உதா³ஹு உக்³கி³ரணபச்சயாதி? உக்³கி³ரணபச்சயாவ, ந பஹாரபச்சயா. ந ஹி பஹரிதுகாமதாய அஸதி தப்பச்சயா காசி ஆபத்தி யுத்தா, உக்³கி³ரணஸ்ஸ பன அத்தனோ ஸபா⁴வேன அஸண்டி²தத்தா தப்பச்சயா பாசித்தியம் ந ஜாதம், அஸுத்³த⁴சித்தேன கதபயோக³த்தா ச ஏத்த² அனாபத்தி ந யுத்தாதி து³க்கடம் வுத்தந்தி க³ஹேதப்³ப³ம்.

458. புப்³பே³தி அனந்தரஸிக்கா²பதே³. ஸேஸம் அனந்தரஸதி³ஸமேவ.

தலஸத்திகஸிக்கா²பத³வண்ணனா நிட்டி²தா.

6. அமூலகஸிக்கா²பத³வண்ணனா

459. ச²ட்டே² ‘‘அத்தபரித்தாணம் கரோந்தா’’தி இத³ம் ந ச வேரமூலிகா அனுத்³த⁴ம்ஸனாதி த³ஸ்ஸனத்த²ம் வுத்தம். அனுத்³த⁴ம்ஸனக்க²ணே பன கோபசித்தமேவ உப்பஜ்ஜதி. தேனேவ ‘‘து³க்க²வேத³ன’’ந்தி வுத்தம். ஸேஸம் வுத்தனயமேவ.

அமூலகஸிக்கா²பத³வண்ணனா நிட்டி²தா.

7. குக்குச்சுப்பாத³னஸிக்கா²பத³வண்ணனா

464. ஸத்தமே உபஸம்பன்னஸ்ஸ அபா²ஸுகாமதா, குக்குச்சுப்பாத³னந்தி த்³வே அங்கா³னி.

குக்குச்சுப்பாத³னஸிக்கா²பத³வண்ணனா நிட்டி²தா.

8. உபஸ்ஸுதிஸிக்கா²பத³வண்ணனா

471. அட்ட²மே ஸுய்யதீதி ஸுதி, வசனம். தஸ்ஸா ஸமீபம் உபஸ்ஸுதி. ஸுய்யதி ஏத்தா²தி ஸுதீதி ஏவஞ்ஹி அத்தே² க³ய்ஹமானே ஸவனட்டா²னஸமீபே அஞ்ஞஸ்மிம் அஸ்ஸவனட்டா²னே திட்ட²தீதி ஆபஜ்ஜதி. அட்ட²கதா²யஞ்ச உபஸ்ஸுதி-ஸத்³த³ஸ்ஸேவ அத்த²ம் த³ஸ்ஸேதும் ‘‘யத்த² ட²த்வா’’திஆதி³ வுத்தம், ந ஸுதி-ஸத்³த³மத்தஸ்ஸ.

473. ஏகபரிச்சே²தா³னீதி கதா³சி அகிரியதோ, கதா³சி கிரியதோ ஸமுட்டா²னஸாமஞ்ஞேன வுத்தம். உபஸம்பன்னேன சோத³னாதி⁴ப்பாயோ, ஸவனந்தி த்³வே அங்கா³னி.

உபஸ்ஸுதிஸிக்கா²பத³வண்ணனா நிட்டி²தா.

9. கி²ய்யனஸிக்கா²பத³வண்ணனா

474. நவமே த⁴ம்மகம்மதா, ஜானனம், ச²ந்த³ம் த³த்வா கி²ய்யனந்தி தீணி அங்கா³னி.

கி²ய்யனஸிக்கா²பத³வண்ணனா நிட்டி²தா.

10. பக்கமனஸிக்கா²பத³வண்ணனா

481. த³ஸமே வினிச்ச²யகதா²ய த⁴ம்மிகதா, தம் ஞத்வா கம்மதோ பட்டா²ய ஏகஸீமட்ட²ஸ்ஸ ஸமானஸம்வாஸிகஸ்ஸ ஹத்த²பாஸவிஜஹனந்தி த்³வே அங்கா³னி.

பக்கமனஸிக்கா²பத³வண்ணனா நிட்டி²தா.

11. து³ப்³ப³லஸிக்கா²பத³வண்ணனா

484. ஏகாத³ஸமே உபஸம்பன்னஸ்ஸ த⁴ம்மேன லத்³த⁴ஸம்முதிதா, ஸங்கே⁴ன ஸத்³தி⁴ம் சீவரம் த³த்வா கி²ய்யிதுகாமதாய கி²ய்யனந்தி த்³வே அங்கா³னி.

து³ப்³ப³லஸிக்கா²பத³வண்ணனா நிட்டி²தா.

489. த்³வாத³ஸமம் வுத்தனயமேவ.

நிட்டி²தோ ஸஹத⁴ம்மிகவக்³கோ³ அட்ட²மோ.