9. ராஜவக்³கோ³

1. அந்தேபுரஸிக்கா²பத³வண்ணனா

499. நவமவக்³க³ஸ்ஸ பட²மே பாளியம் ஸம்ஸுத்³த⁴க³ஹணிகோதி ஏத்த² க³ஹணீதி க³ப்³பா⁴ஸயஸஞ்ஞிதோ மாது குச்சி²ப்பதே³ஸோ, புரிஸந்தரஸுக்காஸம்பு²ட்ட²தாய ஸம்ஸுத்³த⁴க³ஹணிகோ. அபி⁴ஸித்தக²த்தியதா, உபி⁴ன்னம்பி ஸயனிக⁴ரதோ அனிக்க²ந்ததா, அப்படிஸம்விதி³தஸ்ஸ இந்த³கீ²லாதிக்கமோதி தீணி அங்கா³னி.

அந்தேபுரஸிக்கா²பத³வண்ணனா நிட்டி²தா.

2. ரதனஸிக்கா²பத³வண்ணனா

506. து³தியே ஆவஸத²ஸ்ஸாதி ஏத்த² அந்தோஆராமே வா ஹோது அஞ்ஞத்த² வா, யத்த² கத்த²சி அத்தனோ வஸனட்டா²னம் ஆவஸதோ² நாம. ச²ந்தே³னபி ப⁴யேனபீதி வட்³ட⁴கிஆதீ³ஸு ச²ந்தே³ன, ராஜவல்லபே⁴ஸு ப⁴யேன. ஆகிண்ணமனுஸ்ஸேபி ஜாதே…பே… ஆஸங்கந்தீதி தஸ்மிம் நிம்மனுஸ்ஸட்டா²னே பச்சா² ஆகிண்ணமனுஸ்ஸே ஜாதேபி விஸரித்வா க³மனகாலே அஞ்ஞஸ்ஸ அதி³ட்ட²த்தா தமேவ பி⁴க்கு²ம் ஆஸங்கந்தி. பதிரூபம் நாம கப்பியப⁴ண்டே³ ஸயம் பம்ஸுகூலம் க³ஹேத்வா அகப்பியப⁴ண்டே³ பதிரூபானம் உபாஸகாதீ³னம் த³ஸ்ஸேத்வா சேதியாதி³புஞ்ஞே நியோஜனம் வா தா³பேத்வா நிரபேக்க²க³மனம் வா. ஸமாத³பேத்வாதி யாசித்வா. பரஸந்தகதா, விஸ்ஸாஸக்³கா³ஹபம்ஸுகூலஸஞ்ஞானம் அபா⁴வோ, அனனுஞ்ஞாதகாரணா உக்³க³ஹணாதி³ சாதி தீணி அங்கா³னி.

ரதனஸிக்கா²பத³வண்ணனா நிட்டி²தா.

3. விகாலகா³மப்பவிஸனஸிக்கா²பத³வண்ணனா

508. ததியே பாளியம் ப⁴யகத²ந்தி ராஜசோராதி³ப⁴யம் வா ரோகா³மனுஸ்ஸது³ப்³பி⁴க்க²கந்தாராதி³ப⁴யம் வா ஆரப்³ப⁴ பவத்தம். விஸிகா²கத²ந்தி ஸுனிவிட்டா²தி³வீதி²கத²ம். கும்ப⁴ட்டா²னகத²ந்தி உத³கதித்த²கத²ம், கும்ப⁴தா³ஸீகத²ம் வா. புப்³ப³பேதகத²ந்தி அதீதஞாதிகத²ம். நானத்தகத²ந்தி வுத்தாஹி, வக்க²மானாஹி ச விமுத்தம் நானாஸபா⁴வம் நிரத்த²ககத²ம். லோகக்கா²யிகந்தி ‘‘அயம் லோகோ கேன நிம்மிதோ’’திஆதி³னா லோகஸபா⁴வக்கா²னவஸேன பவத்தனகதா². ஏவம் ஸமுத்³த³க்கா²யிகா வேதி³தப்³பா³. இதி ப⁴வோ இதி அப⁴வோதி யம் வா தம் வா நிரத்த²ககாரணம் வத்வா பவத்திதகதா² இதிப⁴வாப⁴வகதா². ஏத்த² ச ப⁴வோ ஸஸ்ஸதம், வுட்³டி⁴, காமஸுக²ஞ்சாதி திவிதோ⁴, அப⁴வோ தப்³பி³பரீதவஸேன. இதி இமாய ச²ப்³பி³தா⁴ய இதிப⁴வாப⁴வகதா²ய ஸத்³தி⁴ம் த்³வத்திம்ஸதிரச்சா²னகதா² நாம ஹோந்தி. அத² வா பாளியம் ஸரூபதோ அனாக³தாபி அரஞ்ஞபப்³ப³தனதீ³தீ³பகதா² இதி-ஸத்³தே³ன ஸங்க³ஹேத்வா த்³வத்திம்ஸதிரச்சா²னகதா²தி வுச்சந்தி. இதி வாதி ஏத்த² இதி-ஸத்³தோ³ பகாரத்தே². வா-ஸத்³தோ³ விகப்பத்தே². தஸ்மா ஏவம் பகாரம் இதோ அஞ்ஞம் வா தாதி³ஸம் நிரத்த²ககத²ம் கதே²தீதி அத்தோ² க³ஹேதப்³போ³.

512. உஸ்ஸாஹம் படிப்பஸ்ஸம்பே⁴த்வா விஹாரம் க³ச்ச²ந்தாதி ஏத்த² கா³மூபசாரதோ ப³ஹி நிக்க²ந்தே அந்தராராமாதீ³னமுபசாரம் பவிட்டே² ஸந்தா⁴ய வுத்தம். கா³மூபசாரப்³ப⁴ந்தரே பன படிபஸ்ஸத்³து⁴ஸ்ஸாஹானம்பி புன தமேவ வா அஞ்ஞம் வா கா³மம் பவிஸிதுகாமதாய ஸதி ஆபுச்ச²னகிச்சம் நத்தி². ‘‘குலக⁴ரே வா…பே… க³ந்தப்³ப³’’ந்தி இத³ம் பன புரேப⁴த்தம் பவிட்டா²னம் விகாலே ஸஞ்ஜாதே விகாலே கா³மப்பவேஸஸ்ஸ ஆபுச்சி²தப்³ப³தாய வுத்தம். அதி³ன்னாதா³னே வுத்தனயேனாதி து³தியலேட்³டு³பாதம் ஸந்தா⁴ய வுத்தம்.

515. அந்தராராமந்திஆதீ³ஸூதி ஏத்த² உஸ்ஸவதி³வஸாதீ³ஸு மனுஸ்ஸேஹி கா³மே பத³க்கி²ணம் காரேந்தம் ஜினபி³ம்பா³தி³ம் பூஜேதுகாமேஹி வா ரோக³வூபஸமாதி³யத்த²ம் மனுஸ்ஸேஹி யாசிதேஹி வா பி⁴க்கூ²ஹி ஸுப்படிச்ச²ன்னாதி³விதி⁴ம் அகத்வாபி வீதி²மஜ்ஜே²னேவ கா³மம் பத³க்கி²ணம் காதும் வட்டதீதி வத³ந்தி, தம் ந க³ஹேதப்³ப³ம் அனாபத்திவாரே அவுத்தத்தா, ‘‘மக்³கா³ அனோக்கமித்வா…பே… பாசித்திய’’ந்தி (கங்கா². அட்ட². விகாலகா³மப்பவேஸனஸிக்கா²பத³வண்ணனா) படிக்கி²த்தத்தா ச. வேஸாலிம் அனுபரியாயித்வா பரித்தம் கரோந்தேனாபி ஆனந்த³த்தே²ரேன ஸுப்படிச்ச²ன்னதாதி³ம் அகோபேந்தேனேவ, அபஞ்ஞத்தே வா ஸிக்கா²பதே³ கதந்தி த³ட்ட²ப்³ப³ம். கேசி பன ‘‘அந்தராராமாதி³கா³மந்தரே டி²தேஹி க³ருட்டா²னீயானம் பச்சுக்³க³மனானுக்³க³மனாதி³வஸேன கா³மவீதி²ம் ஓதரிதும் வட்டதீ’’தி வத³ந்தி, தம்பி அந்தரக⁴ரம் பவிஸந்தம் பதி காதும் ந வட்டதி ஏவ. அந்தராராமாதி³கப்பியபூ⁴மிம் பன உத்³தி³ஸ்ஸ க³ச்ச²ந்தம் பதி காதும் வட்டதீதி கா²யதி, வீமம்ஸிதப்³ப³ம். ஸந்தம் பி⁴க்கு²ம் அனாபுச்ச²னா, அனனுஞ்ஞாதகாரணா விகாலே கா³மப்பவேஸோதி த்³வே அங்கா³னி.

விகாலகா³மப்பவிஸனஸிக்கா²பத³வண்ணனா நிட்டி²தா.

4. ஸூசிக⁴ரஸிக்கா²பத³வண்ணனா

520. சதுத்தே² பாளியம் வாஸிஜடேதி வாஸித³ண்ட³கே. அட்டி²மயாதி³ஸூசிக⁴ரதா, கரணகாராபனாதி³வஸேன அத்தனோ படிலாபோ⁴தி த்³வே அங்கா³னி.

ஸூசிக⁴ரஸிக்கா²பத³வண்ணனா நிட்டி²தா.

5. மஞ்சபீட²ஸிக்கா²பத³வண்ணனா

521. பஞ்சமே பாளியம் ஆஸயதோ, பி⁴க்க²வே, மோக⁴புரிஸோ வேதி³தப்³போ³தி ஹீனஜ்ஜா²ஸயவஸேன அயம் துச்ச²புரிஸோதி ஞாதப்³போ³, ஹீனாய பச்சயே லோலதாய புக்³க³லஸ்ஸ துச்ச²தா ஞாதப்³பா³தி அதி⁴ப்பாயோ. இமஸ்மிம் ஸிக்கா²பதே³, இதோ பரேஸு ச பஞ்சஸு அத்தனா காராபிதஸ்ஸ படிலாபே⁴ ஏவ பாசித்தியம். பரிபோ⁴கே³ பனஸ்ஸ, அஞ்ஞேஸஞ்ச து³க்கடமேவ. பமாணாதிக்கந்தமஞ்சபீட²தா, அத்தனோ கரணகாராபனவஸேன படிலாபோ⁴தி த்³வே அங்கா³னி.

மஞ்சபீட²ஸிக்கா²பத³வண்ணனா நிட்டி²தா.

6. தூலோனத்³த⁴ஸிக்கா²பத³வண்ணனா

526. ச²ட்டே² போடகிதூலந்தி திணக³ச்ச²ஜாதிகானம் தூலம். ஸேஸம் வுத்தனயமேவ.

தூலோனத்³த⁴ஸிக்கா²பத³வண்ணனா நிட்டி²தா.

7. நிஸீத³னஸிக்கா²பத³வண்ணனா

531-536. ஸத்தமே நிஸீத³னஸ்ஸ பமாணாதிக்கந்ததா, அத்தனோ கரணாதி³னா படிலாபோ⁴தி த்³வே அங்கா³னி.

நிஸீத³னஸிக்கா²பத³வண்ணனா நிட்டி²தா.

537-547. இமினா நயேன அட்ட²மனவமத³ஸமேஸுபி அங்கா³னி வேதி³தப்³பா³னி. ஸேஸம் ஸப்³ப³த்த² ஸுவிஞ்ஞேய்யமேவாதி.

நிட்டி²தோ ராஜவக்³கோ³ நவமோ.

கு²த்³த³கவண்ணனானயோ நிட்டி²தோ.