7. ஸப்பாணகவக்³கோ³

1. ஸஞ்சிச்சபாணஸிக்கா²பத³வண்ணனா

382. ஸத்தமஸ்ஸ பட²மே உஸும் ஸரம் அஸதி கி²பதீதி இஸ்ஸாஸோ. ந ஹேத்த² கிஞ்சி ஜீவிதம் நாம விஸும் திட்ட²தீதி ஸம்ப³ந்தோ⁴. தத்த² பாணேதி ஸத்தே. அப்பமத்தேன வத்தம் காதப்³ப³ந்தி யதா² பாணகானம் விஹேஸாபி ந ஹோதி, ஏவம் ஸல்லக்கே²த்வா ஓதாபனஸம்மஜ்ஜனாதி³வத்தம் காதப்³ப³ம். ஸேஸம் வுத்தனயமேவ.

ஸஞ்சிச்சபாணஸிக்கா²பத³வண்ணனா நிட்டி²தா.

2. ஸப்பாணகஸிக்கா²பத³வண்ணனா

387. து³தியே உத³கஸண்டா²னகப்பதே³ஸேதி கத்³த³மபாஸாணாதி³பூ⁴மியம். தத்தா²தி ஆஸித்தே கப்பியஉத³கே. ஸேஸம் வுத்தனயமேவ.

ஸப்பாணகஸிக்கா²பத³வண்ணனா நிட்டி²தா.

3. உக்கோடனஸிக்கா²பத³வண்ணனா

392. ததியே ‘‘தஸ்ஸ பி⁴க்கு²னோ ஸந்திகம் க³ந்த்வா’’தி வுத்தத்தா யஸ்ஸ அதி⁴கரணம் ஸங்க⁴கம்மேன நிஹதம், தஸ்ஸ ஸம்முகே² ஏவ உக்கோடேந்தஸ்ஸ பாசித்தியம். பரம்முகே² பன து³க்கடமேவ.

395. ‘‘த⁴ம்மகம்மே அத⁴ம்மகம்மஸஞ்ஞீ உக்கோடேதி, அனாபத்தீ’’தி வுத்தத்தா அனாத³ரியதாதி³ விய உக்கோடனம் ஸயம் அகுஸலம் ந ஹோதி, த⁴ம்மகம்மஸஞ்ஞாய, பன விமதியா ச உக்கோடனேனேவ அகுஸலம் ஹோதி. யதா²த⁴ம்மம் நிஹததா, ஜானனா, உக்கோடனாதி தீணி அங்கா³னி.

உக்கோடனஸிக்கா²பத³வண்ணனா நிட்டி²தா.

4. து³ட்டு²ல்லஸிக்கா²பத³வண்ணனா

399. சதுத்தே² ஆபத்திம் ஆபஜ்ஜதியேவாதி து⁴ரனிக்கே²பபக்கே² வுத்தம். வத்து²புக்³க³லோதி ஆபன்னபுக்³க³லோ. சா²தே³துகாமதாய ஹி ஸதி ஏவ அவஸ்ஸம் அஞ்ஞஸ்ஸ ஆரோசனம் வுத்தம், வத்து²புக்³க³லஸ்ஸ ச ஆரோசனா நாம ந ஹோதீதி படிச்சா²த³னமேவாதி அதி⁴ப்பாயோ. கோடி சி²ன்னா ஹோதீதி சா²தே³ஸ்ஸாமீதி து⁴ரனிக்கே²பே ஸதிபி புக்³க³லபரம்பராய க³ச்ச²ந்தீ ஆபத்திகோடி சி²ஜ்ஜதி.

400. ‘‘அனுபஸம்பன்னஸ்ஸ ஸுக்கவிஸ்ஸட்டி² ச காயஸம்ஸக்³கோ³ சாதி அயம் து³ட்டு²ல்லஅஜ்ஜா²சாரோ நாமா’’தி இத³ம் து³ட்டு²ல்லாரோசனஸிக்கா²பத³ட்ட²கதா²யம் ‘‘அனுபஸம்பன்னஸ்ஸ…பே… ஆதி³தோ பஞ்ச ஸிக்கா²பதா³னி து³ட்டு²ல்லோ நாம அஜ்ஜா²சாரோ, ஸேஸானி அது³ட்டு²ல்லோ. ஸுக்கவிஸ்ஸட்டி²காயஸம்ஸக்³க³து³ட்டு²ல்லஅத்தகாமா பனஸ்ஸ அஜ்ஜா²சாரோ நாமா’’தி (பாசி. அட்ட². 82) இமினா வசனேன விருஜ்ஜ²தீதி வீமம்ஸிதப்³ப³ம். புக்³க³லபேமேன சா²த³யதோ சேத்த² ‘‘அஞ்ஞே க³ரஹிஸ்ஸந்தீ’’தி ப⁴யவஸேன சா²த³னக்க²ணே படிகோ⁴வ உப்பஜ்ஜதீதி ‘‘து³க்க²வேத³ன’’ந்தி வுத்தந்தி த³ட்ட²ப்³ப³ம். உபஸம்பன்னஸ்ஸ து³ட்டு²ல்லாபத்திஜானனம், படிச்சா²தே³துகாமதாய து⁴ரனிக்கே²போதி த்³வே அங்கா³னி.

து³ட்டு²ல்லஸிக்கா²பத³வண்ணனா நிட்டி²தா.

5. ஊனவீஸதிவஸ்ஸஸிக்கா²பத³வண்ணனா

402. பஞ்சமே ரூபஸிப்பந்தி ஹேரஞ்ஞிகஸிப்பம். க³ப்³பே⁴ ஸயிதகாலேன ஸத்³தி⁴ம் வீஸதிமம் வஸ்ஸம் பரிபுண்ணமஸ்ஸாதி க³ப்³ப⁴வீஸோ.

404. நிக்க²மனீயபுண்ணமாஸீதி ஸாவணமாஸஸ்ஸ புண்ணமியா ஆஸாள்ஹீபுண்ணமியா அனந்தரபுண்ணமீ. பாடிபத³தி³வஸேதி பச்சி²மிகாய வஸ்ஸூபனாயிகாய. த்³வாத³ஸ மாஸே மாது குச்சி²ஸ்மிம் வஸித்வா மஹாபவாரணாய ஜாதம் உபஸம்பாதே³ந்தீதி அத்தோ². ‘‘திம்ஸ ரத்திந்தி³வோ மாஸோ, த்³வாத³ஸமாஸிகோ ஸம்வச்ச²ரோ’’தி (அ. நி. 3.71; 8.43; விப⁴. 1023) வசனதோ ‘‘சத்தாரோ மாஸா பரிஹாயந்தீ’’தி வுத்தம். வஸ்ஸம் உக்கட்³ட⁴ந்தீதி வஸ்ஸம் உத்³த⁴ம் கட்³ட⁴ந்தி, ‘‘ஏகமாஸம் அதி⁴கமாஸோ’’தி ச²ட்³டே³த்வா வஸ்ஸம் உபக³ச்ச²ந்தீதி அத்தோ². தஸ்மா ததியோ ததியோ ஸம்வச்ச²ரோ தேரஸமாஸிகோ ஹோதி. தே த்³வே மாஸே க³ஹேத்வாதி நிக்க²மனீயபுண்ணமாஸதோ யாவ ஜாததி³வஸபூ⁴தா மஹாபவாரணா. தாவ யே த்³வே மாஸா அனாக³தா, தேஸம் அத்தா²ய அதி⁴கமாஸதோ லத்³தே⁴ த்³வே மாஸே க³ஹேத்வா. தேனாஹ ‘‘யோ பவாரேத்வா வீஸதிவஸ்ஸோ ப⁴விஸ்ஸதீ’’திஆதி³. ‘‘நிக்கங்கா² ஹுத்வா’’தி இத³ம் அட்டா²ரஸன்னம் வஸ்ஸானம் ஏகஅதி⁴கமாஸே க³ஹேத்வா ததோ வீஸதியா வஸ்ஸேஸுபி சாதுத்³த³ஸீஅத்தா²ய சதுன்னம் மாஸானம் பரிஹாபனேன ஸப்³ப³தா³ பரிபுண்ணவீஸதிவஸ்ஸதம் ஸந்தா⁴ய வுத்தம். பவாரேத்வா வீஸதிவஸ்ஸோ ப⁴விஸ்ஸதீதி மஹாபவாரணாதி³வஸே அதிக்கந்தே க³ப்³ப⁴வஸ்ஸேன ஸஹ வீஸதிவஸ்ஸோ ப⁴விஸ்ஸதீதி அத்தோ². தஸ்மாதி யஸ்மா க³ப்³ப⁴மாஸாபி க³ணனூபகா³ ஹோந்தி, தஸ்மா. ஏகவீஸதிவஸ்ஸோதி ஜாதியா வீஸதிவஸ்ஸம் ஸந்தா⁴ய வுத்தம்.

406. அஞ்ஞம் உபஸம்பாதே³தீதி உபஜ்ஜா²யோ, ஆசரியோ வா ஹுத்வா உபஸம்பாதே³தி. ஸோபீதி உபஸம்பாதே³ந்தோபி அனுபஸம்பன்னோ. ஊனவீஸதிவஸ்ஸதா, தம் ஞத்வா உபஜ்ஜா²யேன ஹுத்வா உபஸம்பாத³னந்தி த்³வே அங்கா³னி.

ஊனவீஸதிவஸ்ஸஸிக்கா²பத³வண்ணனா நிட்டி²தா.

6. தே²ய்யஸத்த²ஸிக்கா²பத³வண்ணனா

409. ச²ட்டே² தே²ய்யஸத்த²பா⁴வோ, ஞத்வா ஸம்விதா⁴னம், அவிஸங்கேதேன க³மனந்தி தீணி அங்கா³னி.

தே²ய்யஸத்த²ஸிக்கா²பத³வண்ணனா நிட்டி²தா.

412. ஸத்தமம் வுத்தனயமேவ.

8. அரிட்ட²ஸிக்கா²பத³வண்ணனா

417. அட்ட²மே அந்தராயந்தி அந்தரா வேமஜ்ஜே² ஏதி ஆக³ச்ச²தீதி அந்தராயோ, தி³ட்ட²த⁴ம்மிகாதி³அனத்தோ². ஆனந்தரியத⁴ம்மாதி அனந்தரே ப⁴வே ப²லனிப்³ப³த்தனே நியுத்தா சேதனாதி³த⁴ம்மாதி அத்தோ². ‘‘ந ஸக்³க³ஸ்ஸா’’தி இத³ம் பி⁴க்கு²னிதூ³ஸனகம்மஸ்ஸ ஆனந்தரியத்தாபா⁴வதோ வுத்தம். அரியஸாவிகாஸு, பன கல்யாணபுது²ஜ்ஜனபூ⁴தாய ச ப³லக்காரேன தூ³ஸேந்தஸ்ஸ ஆனந்தரியஸஅஸமேவ. மோக்க²ந்தராயிகதா பன லோலாயபி பகதத்தபி⁴க்கு²னியா தூ³ஸகஸ்ஸ தஸ்மிம் அத்தபா⁴வே மக்³கு³ப்பத்தியா அபா⁴வதோ வுத்தா.

தஸ்மிம் அத்தபா⁴வே அனிவத்தனகா அஹேதுகஅகிரியனத்தி²கதி³ட்டி²யோவ நியதமிச்சா²தி³ட்டி²த⁴ம்மா. பண்ட³காதீ³னம் க³ஹணம் நித³ஸ்ஸனமத்தம். ஸப்³பா³பி து³ஹேதுகாஹேதுகபடிஸந்தி⁴யோ விபாகந்தராயிகாவ து³ஹேதுகானம்பி மக்³கா³னுப்பத்திதோ.

அயந்தி அரிட்டோ². ரஸேன ரஸந்தி அனவஜ்ஜேன பச்சயபரிபு⁴ஞ்ஜனரஸேன பஞ்சகாமகு³ணபஅபோ⁴க³ரஸம் ஸமானேத்வா. உபனேந்தோ வியாதி க⁴டேந்தோ விய, ஸோ ஏவ வா பாடோ².

அட்டி²கங்கலூபமாதி ஏத்த² அட்டி² ஏவ நிம்மம்ஸதாய கங்கலந்தி ச வுச்சதி. பலிப⁴ஞ்ஜனட்டே²னாதி அவஸ்ஸம் பதனட்டே²ன. அதி⁴குட்டனட்டே²னாதி அதி விய குட்டனட்டே²ன. பாளியம் ‘‘ததா²ஹம் ப⁴க³வதா…பே… நாலம் அந்தராயாயா’’தி இத³ம் வத்து²அனுரூபதோ வுத்தம். ஏவம் பன அக்³க³ஹேத்வா அஞ்ஞேனபி ஆகாரேன யம் கிஞ்சி ப⁴க³வதா வுத்தம் விபரீததோ க³ஹேத்வா பரேஹி வுத்தேபி அமுஞ்சித்வா வோஹரந்தஸ்ஸாபி வுத்தனயானுஸாரேன தத³னுகு³ணம் ஸமனுபா⁴ஸனகம்மவாசம் யோஜேத்வா ஆபத்தியா ஆரோபேதும், ஆபத்தியா அத³ஸ்ஸனாதீ³ஸு தீஸு யம் கிஞ்சி அபி⁴ருசிதம் நிமித்தம் கத்வா உக்கே²பனீயகம்மம் காதுஞ்ச லப்³ப⁴தி. ஸமனுபா⁴ஸனம் அகத்வாபி ‘‘மாயஸ்மா ஏவம் அவசா’’தி பி⁴க்கூ²ஹி வுத்தமத்தே லத்³தி⁴யா அப்படினிஸ்ஸஜ்ஜனபச்சயாய து³க்கடாபத்தியாபி உக்கே²பனீயகம்மம் காதும்பி வட்டதேவாதி த³ட்ட²ப்³ப³ம். த⁴ம்மகம்மதா, ஸமனுபா⁴ஸனாய அப்படினிஸ்ஸஜ்ஜனந்தி த்³வே அங்கா³னி.

அரிட்ட²ஸிக்கா²பத³வண்ணனா நிட்டி²தா.

9. உக்கி²த்தஸம்போ⁴க³ஸிக்கா²பத³வண்ணனா

424. நவமே ‘‘உக்கி²த்தோ அனோஸாரிதோ’’தி வுத்தத்தா அரிட்ட²ஸ்ஸ உக்கே²பனீயகம்மம் கதந்தி த³ட்ட²ப்³ப³ம்.

425. பாளியம் ‘‘ஏகச்ச²ன்னே’’தி ஸாமஞ்ஞதோ வுத்தத்தா நானூபசாரேபி ஏகச்ச²ன்னே நிபஜ்ஜனே பண்ணத்திம் அஜானந்தஸ்ஸ அரஹதோபி உக்கி²த்தானுவத்தகானம்பி பாசித்தியமேவ. அகதானுத⁴ம்மதா, ஞத்வா ஸம்போ⁴கா³தி³கரணந்தி த்³வே அங்கா³னி.

உக்கி²த்தஸம்போ⁴க³ஸிக்கா²பத³வண்ணனா நிட்டி²தா.

10. கண்டகஸிக்கா²பத³வண்ணனா

428. த³ஸமே பிரேதி ஸம்போ³த⁴னத்தே² நிபாதபத³ம். ஸேஸம் அனந்தரஸிக்கா²பத³த்³வயே வுத்தனயமேவ.

கண்டகஸிக்கா²பத³வண்ணனா நிட்டி²தா.

நிட்டி²தோ ஸப்பாணகவக்³கோ³ ஸத்தமோ.