6. ஸுராபானவக்³கோ³

1. ஸுராபானஸிக்கா²பத³வண்ணனா

328. ச²ட்ட²வக்³க³ஸ்ஸ பட²மே பாளியம் கிண்ணபக்கி²த்தாதி பிட்ட²பூவாதி³ம் அபக்கி²பித்வா கிண்ணஸங்கா²தம் த⁴ஞ்ஞங்குராதி³ஸுராபீ³ஜம் பக்கி²பித்வா கதா. ஸம்பா⁴ரஸம்யுத்தாதி ஸாஸபாதி³அனேகஸம்பா⁴ரேஹி ஸஞ்ஞுத்தா.

மது⁴கதாலனாளிகேராதி³புப்பா²தி³ரஸோ சிரபரிவாஸிதோ புப்பா²ஸவோ நாம. ததா² பனஸாதி³ ப²லாஸவோ. முத்³தி³கரஸோ மத்⁴வாஸவோ. உச்சு²ரஸோ கு³ளாஸவோ. திப²லதிகடுகாதி³னானாஸம்பா⁴ரானம் ரஸோ சிரபரிவாஸிதோ ஸம்பா⁴ரஸம்யுத்தோ. பீ³ஜதோ பட்டா²யாதி யதா²வுத்தானம் பிட்டா²தீ³னம் மஜ்ஜத்தா²ய பா⁴ஜனே பக்கி²த்தகாலதோ பட்டா²ய.

329. லோணஸோவீரகம் ஸுத்தஞ்ச அனேகேஹி த³ப்³ப³ஸம்பா⁴ரேஹி அபி⁴ஸங்க²தோ பே⁴ஸஜ்ஜவிஸேஸோ. உய்யுத்தஸிக்கா²பதா³னம் அசித்தகலோகவஜ்ஜேஸு லோகவஜ்ஜதா புப்³பே³ வுத்தனயாவாதி தத்த² கிஞ்சிபி அவத்வா இத⁴ தேஹி அஸாதா⁴ரணவத்து²விஸேஸஸித்³தா⁴ய அசித்தகபக்கே²பி அகுஸலசித்ததாய தம் லோகவஜ்ஜதாதி³விஸேஸம் த³ஸ்ஸேதுமேவ ‘‘வத்து²அஜானனதாய சேத்தா²’’திஆதி³னா வுத்தந்தி வேதி³தப்³ப³ம். யம் பனேத்த² வத்தப்³ப³ம், தம் பட²மபாராஜிகவண்ணனாயம் வித்தா²ரதோ ஸாரத்த²தீ³பனியம் விரத்³த⁴ட்டா²னவிஸோத⁴னவஸேன வுத்தந்தி தத்தே²வ க³ஹேதப்³ப³ம். மஜ்ஜபா⁴வோ, தஸ்ஸ பானஞ்சாதி இமானேத்த² த்³வே அங்கா³னி.

ஸுராபானஸிக்கா²பத³வண்ணனா நிட்டி²தா.

2. அங்கு³லிபதோத³கஸிக்கா²பத³வண்ணனா

330. து³தியே ஹஸாதி⁴ப்பாயதா, உபஸம்பன்னஸ்ஸ காயேன காயாமஸனந்தி இமானேத்த² த்³வே அங்கா³னி.

அங்கு³லிபதோத³கஸிக்கா²பத³வண்ணனா நிட்டி²தா.

3. ஹஸத⁴ம்மஸிக்கா²பத³வண்ணனா

338. ததியே பாளியம் ஹஸத⁴ம்மே ஹஸத⁴ம்மஸஞ்ஞீதிஆதீ³ஸு உப்லவாதி³மத்தம் கிம் ஹஸத⁴ம்மோ ஹோதீதி க³ஹணவஸேன ஸதி கரணீயே கரியமானம் ஹஸத⁴ம்மம் ஹஸத⁴ம்மோதி க³ஹணவஸேன அத்தோ² வேதி³தப்³போ³. உஸ்ஸாரேந்தோதி உத³கே டி²தம் நாவம் தீரே ஆரோபேந்தோ.

பதனுப்பதனவாரேஸூதி உத³கஸ்ஸ உபரிதலே மண்டூ³கக³தியா பதனுப்பதனவஸேன க³மனத்த²ம் கி²த்தாய ஏகிஸ்ஸா கத²லாய வஸேன வுத்தம். உத³கஸ்ஸ உபரிகோ³ப்ப²கதா, ஹஸாதி⁴ப்பாயேன கீளனந்தி த்³வே அங்கா³னி.

ஹஸத⁴ம்மஸிக்கா²பத³வண்ணனா நிட்டி²தா.

4. அனாத³ரியஸிக்கா²பத³வண்ணனா

344. சதுத்தே² ஸுத்தானுலோமந்தி மஹாபதே³ஸா. அட்ட²கதா²திபி வத³ந்தி. உபஸம்பன்னஸ்ஸ பஞ்ஞத்தேன வசனம், அனாத³ரியகரணந்தி த்³வே அங்கா³னி.

அனாத³ரியஸிக்கா²பத³வண்ணனா நிட்டி²தா.

5. பி⁴ம்ஸாபனஸிக்கா²பத³வண்ணனா

345. பஞ்சமே உபஸம்பன்னதா, தஸ்ஸ த³ஸ்ஸனஸவனவிஸயே பி⁴ம்ஸாபேதுகாமதாய வாயமனந்தி த்³வே அங்கா³னி.

பி⁴ம்ஸாபனஸிக்கா²பத³வண்ணனா நிட்டி²தா.

6. ஜோதிஸிக்கா²பத³வண்ணனா

354. ச²ட்டே² அலாதம் பதிதந்தி அக்³கி³கபாலதோ ப³ஹி பதிதம். விஜ்ஜா²தந்தி விஜ்ஜா²தம் அலாதம் கபாலக்³கி³ம்ஹி பக்கி²பித்வா ஜாலேந்தஸ்ஸ பாசித்தியம், ததா² கேவலம் இந்த⁴னம் பாதேந்தஸ்ஸபி விஜ்ஜா²தம் கபாலக்³கி³ம் முக²வாதாதி³னா உஜ்ஜாலேந்தஸ்ஸபி. கி³லானதாதி³காரணாபா⁴வோ, விஸிப்³பே³துகாமதா, ஸமாத³ஹனந்தி தீணி அங்கா³னி.

ஜோதிஸிக்கா²பத³வண்ணனா நிட்டி²தா.

7. நஹானஸிக்கா²பத³வண்ணனா

357. ஸத்தமே பாளியம் நக³ரே த²கிதேதி ஏத்த² ரஞ்ஞா சிரம் நஹாயிதுகாமேன ‘‘அஹம் ப³ஹி உய்யானே கதாரக்கோ² வஸிஸ்ஸாமி, நக³ரம் த²கேத்வா கோ³பேதா²’’தி அனுஞ்ஞாதா, தே த²கிம்ஸூதி த³ட்ட²ப்³ப³ம். அஸம்பி⁴ன்னேனாதி அனட்டே²ன, தம் தி³வஸம் புன அக்³க³ஹிதாலங்காரேன பபு³த்³த⁴மத்தேனாதி அதி⁴ப்பாயோ. மஜ்ஜி²மதே³ஸே ஊனகத்³த⁴மாஸனஹானம், ஸமயாதீ³னம் அபா⁴வோதி த்³வே அங்கா³னி.

நஹானஸிக்கா²பத³வண்ணனா நிட்டி²தா.

8. து³ப்³ப³ண்ணகரணஸிக்கா²பத³வண்ணனா

368. அட்ட²மே படிலத்³த⁴னவசீவரேனாதி ஏத்த² புப்³பே³ அகதகப்பம் கதிபாஹம் நிவாஸனத்தா²ய தாவகாலிகவஸேன லத்³த⁴ம்பி ஸங்க³ய்ஹதீதி வத³ந்தி.

369. ‘‘நவம் நாம அகதகப்ப’’ந்தி ஸாமஞ்ஞதோ வுத்தத்தா அஞ்ஞேன பி⁴க்கு²னா கப்பபி³ந்து³ம் த³த்வா பரிபு⁴த்தம் சீவரம், தேன வா, ததோ லபி⁴த்வா அஞ்ஞேன வா கேனசி தி³ன்னம்பி கதகப்பமேவ நவம் நாம ந ஹோதீதி த³ட்ட²ப்³ப³ம். ‘‘நிவாஸேதும் வா பாருபிதும் வா’’தி வுத்தத்தா அம்ஸப³த்³த⁴காஸாவம்பி பாருபிதப்³ப³தோ கப்பம் காதப்³ப³ந்தி வத³ந்தி. சம்மகாரனீலம் நாம சம்மம் நீலவண்ணம் காதும் யோஜியமானம் நீலம். பகதினீலமேவாதி கேசி. யதா²வுத்தசீவரஸ்ஸ அகதகப்பதா, அனட்ட²சீவராதி³தா, நிவாஸனாதி³தாதி தீணி அங்கா³னி.

து³ப்³ப³ண்ணகரணஸிக்கா²பத³வண்ணனா நிட்டி²தா.

9. விகப்பனஸிக்கா²பத³வண்ணனா

374. நவமே யேனாதி யேன ஸத்³தி⁴ம், யஸ்ஸ ஸந்திகேதி அத்தோ². ஸாமம் விகப்பிதஸ்ஸ அபச்சுத்³தா⁴ரோ, விகப்பனுபக³சீவரதா, அவிஸ்ஸாஸேன பரிபோ⁴கோ³தி தீணி அங்கா³னி.

விகப்பனஸிக்கா²பத³வண்ணனா நிட்டி²தா.

10. சீவரஅபனிதா⁴னஸிக்கா²பத³வண்ணனா

378. த³ஸமே பாளியம் அந்தமஸோ ஹஸாபேக்கோ²பீதி அபி-ஸத்³தே³ன அதே²ய்யசித்தம் கோதே⁴ன து³க்கா²பேதுகாமம், அவண்ணம் பகாஸேதுகாமஞ்ச ஸங்க³ய்ஹதி. தேனேவ ‘‘திவேத³ன’’ந்தி வுத்தம். உபஸம்பன்னஸ்ஸ பத்தாதீ³னம் அபனிதா⁴னம், விஹேஸேதுகாமதாதீ³தி த்³வே அங்கா³னி.

சீவரஅபனிதா⁴னஸிக்கா²பத³வண்ணனா நிட்டி²தா.

நிட்டி²தோ ஸுராபானவக்³கோ³ ச²ட்டோ².