8. ஸன்னிதி⁴காரகஸிக்கா²பத³வண்ணனா

252-3. அட்ட²மே தாதி³ஸந்தி அஸூபப்³யஞ்ஜனம். யாவகாலிகம் வா யாமகாலிகம் வா…பே… பாசித்தியந்தி ஏத்த² கிஞ்சாபி பாளியம் கா²த³னீயபோ⁴ஜனீயபதே³ஹி யாவகாலிகமேவ ஸங்க³ஹிதம், ந யாமகாலிகம். ததா²பி ‘‘அனாபத்தி யாமகாலிகம் யாமே நித³ஹித்வா பு⁴ஞ்ஜதீ’’தி இத⁴ சேவ –

‘‘யாமகாலிகேன, பி⁴க்க²வே, ஸத்தாஹகாலிகம்…பே… யாவஜீவிகம் தத³ஹுபடிக்³க³ஹிதம் யாமே கப்பதி, யாமாதிக்கந்தே ந கப்பதீ’’தி (மஹாவ. 305) –

அஞ்ஞத்த² ச வுத்தத்தா, ‘‘யாமகாலிக’’ந்தி வசனஸாமத்தி²யதோ ச ப⁴க³வதோ அதி⁴ப்பாயஞ்ஞூஹி அட்ட²கதா²சரியேஹி யாமகாலிகம் ஸன்னிதி⁴காரககதம் பாசித்தியவத்து²மேவ வுத்தந்தி த³ட்ட²ப்³ப³ம். யந்தி பத்தம், க⁴ம்ஸனகிரியாபேக்கா²ய சேதம் உபயோக³வசனம். அங்கு³லிலேகா² பஞ்ஞாயதீதி ஸினேஹாபா⁴வேபி பத்தஸ்ஸ ஸுச்ச²விதாய பஞ்ஞாயதி. யந்தி யாவகாலிகம், யாமகாலிகஞ்ச. அபரிச்சத்தமேவாதி நிரபேக்க²தாய அனுபஸம்பன்னஸ்ஸ அதி³ன்னம், அபரிச்சத்தஞ்ச யாவகாலிகாதி³வத்து²மேவ ஸந்தா⁴ய வத³தி, ந பன தக்³க³தபடிக்³க³ஹணம். ந ஹி வத்து²ம் அபரிச்சஜித்வா தத்த²க³தபடிக்³க³ஹணம் பரிச்சஜிதும் ஸக்கா, ந ச தாதி³ஸம் வசனமத்தி². யதி³ ப⁴வேய்ய, ‘‘ஸசே பத்தோ து³த்³தோ⁴தோ ஹோதி…பே… பு⁴ஞ்ஜந்தஸ்ஸ பாசித்திய’’ந்தி வசனம் விருஜ்ஜே²ய்ய. ந ஹி தோ⁴வனேன ஆமிஸம் அபனேதும் வாயமந்தஸ்ஸ படிக்³க³ஹணே அபேக்கா² வத்ததி. யேன புனதி³வஸே பு⁴ஞ்ஜதோ பாசித்தியம் ஜனேய்ய, பத்தே பன வத்தமானா அபேக்கா² தக்³க³திகே ஆமிஸேபி வத்ததி ஏவனாமாதி ஆமிஸே அனபேக்க²தா ஏத்த² ந லப்³ப⁴தி, ததோ ஆமிஸே அவிஜஹிதபடிக்³க³ஹணம் புனதி³வஸே பாசித்தியம் ஜனேதீதி இத³ம் வுத்தம். அத² மதம் ‘‘யத³க்³கே³னேத்த² ஆமிஸானபேக்க²தா ந லப்³ப⁴தி. தத³க்³கே³ன படிக்³க³ஹணானபேக்கா²பி ந லப்³ப⁴தீ’’தி. ததா² ஸதி யத்த² ஆமிஸாபேக்கா² அத்தி², தத்த² படிக்³க³ஹணாபேக்கா²பி ந விக³ச்ச²தீதி ஆபன்னம், ஏவஞ்ச படிக்³க³ஹணே அனபேக்க²விஸ்ஸஜ்ஜனம் விஸும் ந வத்தப்³ப³ம் ஸியா. அட்ட²கதா²யஞ்சேதம்பி படிக்³க³ஹணவிஜஹனகாரணத்தேன அபி⁴மதம் ஸியா, இத³ம் ஸுட்டு²தரம் கத்வா விஸும் வத்தப்³ப³ம் சீவராபேக்கா²ய வத்தமானாயபி பச்சுத்³தா⁴ரேன அதி⁴ட்டா²னவிஜஹனம் விய. ஏதஸ்மிஞ்ச உபாயே ஸதி க³ண்டி²காஹதபத்தேஸு அவட்டனதா நாம ந ஸியாதி வுத்தோவாயமத்தோ². தஸ்மா யம் வுத்தம் ஸாரத்த²தீ³பனியம் ‘‘யம் பரஸ்ஸ பரிச்சஜித்வா அதி³ன்னம்பி ஸசே படிக்³க³ஹணே நிரபேக்க²னிஸ்ஸஜ்ஜனேன விஜஹிதபடிக்³க³ஹணம் ஹோதி, தம்பி து³தியதி³வஸே வட்டதீ’’திஆதி³ (ஸாரத்த². டீ. பாசித்தியகண்ட³ 3.252-253), தம் ந ஸாரதோ பச்சேதப்³ப³ம்.

பகதிஆமிஸேதி ஓத³னாதி³கப்பியயாவகாலிகே. த்³வேதி புரேப⁴த்தம் படிக்³க³ஹிதம் யாமகாலிகம் புரேப⁴த்தம் ஸாமிஸேன முகே²ன பு⁴ஞ்ஜதோ ஸன்னிதி⁴பச்சயா ஏகம், யாமகாலிகஸம்ஸட்ட²தாய யாவகாலிகத்தப⁴ஜனேன அனதிரித்தபச்சயா ஏகந்தி த்³வே பாசித்தியானி. விகப்பத்³வயேதி ஸாமிஸனிராமிஸபக்க²த்³வயே. து²ல்லச்சயஞ்ச து³க்கடஞ்சாதி மனுஸ்ஸமம்ஸே து²ல்லச்சயம், ஸேஸேஸு து³க்கடம். யாவகாலிகயாமகாலிகதா, ஸன்னிதி⁴பா⁴வோ, தஸ்ஸ அஜ்ஜோ²ஹரணந்தி இமானேத்த² தீணி அங்கா³னி.

ஸன்னிதி⁴காரகஸிக்கா²பத³வண்ணனா நிட்டி²தா.