4. போ⁴ஜனவக்³கோ³

1. ஆவஸத²பிண்ட³ஸிக்கா²பத³வண்ணனா

206. சதுத்த²வக்³க³ஸ்ஸ பட²மே இமேஸம்யேவாதி இமேஸம் பாஸண்டா³னம்யேவ. ஏத்தகானந்தி இமஸ்மிம் பாஸண்டே³ ஏத்தகானம்.

208. ‘‘க³ச்ச²ந்தோ வா ஆக³ச்ச²ந்தோ வா’’தி இத³ம் அத்³த⁴யோஜனவஸேன க³ஹேதப்³ப³ம். அஞ்ஞே உத்³தி³ஸ்ஸ பஞ்ஞத்தஞ்ச பி⁴க்கூ²ஸு அப்பஸன்னேஹி தித்தி²யேஹி ஸாமஞ்ஞதோபி பஞ்ஞத்தம்பி பி⁴க்கூ²னம் ந வட்டதி ஏவ. ஆவஸத²பிண்ட³தா, அகி³லானதா, அனுவஸித்வா போ⁴ஜனந்தி இமானேத்த² தீணி அங்கா³னி.

ஆவஸத²பிண்ட³ஸிக்கா²பத³வண்ணனா நிட்டி²தா.

2. க³ணபோ⁴ஜனஸிக்கா²பத³வண்ணனா

209. து³தியே அபி⁴மாரேதி அபி⁴ப⁴வித்வா ப⁴க³வந்தம் மாரணத்தா²ய பயோஜிதே த⁴னுத⁴ரே. நனு ‘‘ராஜானம்பி மாராபேஸீ’’தி வசனதோ இத³ம் ஸிக்கா²பத³ம் அஜாதஸத்துனோ காலே பஞ்ஞத்தந்தி ஸித்³த⁴ம், ஏவஞ்ச ஸதி பாளியம் ‘‘தேன கோ² பன ஸமயேன ரஞ்ஞோ மாக³த⁴ஸ்ஸ…பே… ஞாதிஸாலோஹிதோ ஆஜீவகேஸு பப்³ப³ஜிதோ ஹோதி…பே… பி³ம்பி³ஸாரம் ஏதத³வோசா’’திஆதி³ விருஜ்ஜ²தீதி? ந விருஜ்ஜ²தி. ஸோ கிர ஆஜீவகோ பி³ம்பி³ஸாரகாலதோ பபு⁴தி அந்தரந்தரா பி⁴க்கூ² நிமந்தேத்வா தா³னம் தே³ந்தோ அஜாதஸத்துகாலேபி ஸிக்கா²பதே³ பஞ்ஞத்தேபி பி⁴க்கூ²னம் ஸந்திகே தூ³தம் பாஹேஸி, பி⁴க்கூ² ச குக்குச்சாயந்தா நிவாரேஸும். தஸ்மா ஆதி³தோ பட்டா²ய தம் வத்து² த³ஸ்ஸிதந்தி வேதி³தப்³ப³ம்.

215. அஞ்ஞமஞ்ஞம் விஸதி³ஸம் ரஜ்ஜம் விரஜ்ஜம், விரஜ்ஜதோ ஆக³தா வேரஜ்ஜகா. தே ச யஸ்மா ஜாதிகோ³த்தாதி³தோ நானாவிதா⁴, தஸ்மா நானாவேரஜ்ஜகேதிபி அத்தோ².

217-8. இமஸ்ஸ ஸிக்கா²பத³ஸ்ஸ வத்து²வஸேனேவ விஞ்ஞத்திதோ க³ணபோ⁴ஜனத்த²தா ஸித்³தா⁴தி தம் அவத்வா பத³பா⁴ஜனே அஸித்³த⁴மேவ நிமந்தனதோ க³ணபோ⁴ஜனம் த³ஸ்ஸிதந்தி வேதி³தப்³ப³ம். தேனாஹ ‘‘த்³வீஹாகாரேஹீ’’திஆதி³. ‘‘யேன கேனசி வேவசனேனா’’தி வுத்தத்தா ‘‘போ⁴ஜனம் க³ண்ஹதா²’’திஆதி³ஸாமஞ்ஞனாமேனாபி க³ணபோ⁴ஜனம் ஹோதி. யம் பன பாளியம் அத்³தா⁴னக³மனாதி³வத்தூ²ஸு ‘‘இதே⁴வ பு⁴ஞ்ஜதா²’’தி வுத்தவசனஸ்ஸ குக்குச்சாயனம், தம்பி ஓத³னாதி³னாமம் க³ஹேத்வா வுத்தத்தா ஏவ கதந்தி வேதி³தப்³ப³ம். ஏகதோ க³ண்ஹந்தீதி அஞ்ஞமஞ்ஞஸ்ஸ த்³வாத³ஸஹத்த²ம் அமுஞ்சித்வா ஏகதோ ட²த்வா க³ண்ஹந்தி.

‘‘அம்ஹாகம் சதுன்னம்பி ப⁴த்தம் தே³ஹீ’’தி வுத்தத்தா பாளி (வண்ணனா) யம் ‘‘த்வம் ஏகஸ்ஸ பி⁴க்கு²னோ ப⁴த்தம் தே³ஹீ’’திஆதி³னோ வுத்தத்தா ச போ⁴ஜனனாமேன விஞ்ஞத்தமேவ க³ணபோ⁴ஜனம் ஹோதி, தஞ்ச அஞ்ஞேன விஞ்ஞத்தம்பி ஏகதோ க³ண்ஹந்தானம் ஸப்³பே³ஸம்பி ஹோதீதி த³ட்ட²ப்³ப³ம். விஸும் க³ஹிதம் பன விஞ்ஞத்தம் பு⁴ஞ்ஜதோ பணீதபோ⁴ஜனாதி³ஸிக்கா²பதே³ஹி ஆபத்தி ஏவ.

ஆக³ந்துகபட்டந்தி அச்சி²ந்தி³த்வா அன்வாதி⁴ம் ஆரோபேத்வா கரணசீவரம் ஸந்தா⁴ய வுத்தம். ட²பேதீதி ஏகம் அந்தம் சீவரே ப³ந்த⁴னவஸேன ட²பேதி. பச்சாக³தம் ஸிப்³ப³தீதி தஸ்ஸேவ து³தியஅந்தம் பரிவத்தித்வா ஆஹதம் ஸிப்³ப³தி. ஆக³ந்துகபட்டம் ப³ந்த⁴தீதி சீவரேன லக்³க³ம் கரோந்தோ புனப்புனம் தத்த² தத்த² ஸுத்தேன ப³ந்த⁴தி. க⁴ட்டேதீதி பமாணேன க³ஹேத்வா த³ண்டா³தீ³ஹி க⁴ட்டேதி. ஸுத்தம் கரோதீதி கு³ணாதி³பா⁴வேன வட்டேதி. வலேதீதி அனேககு³ணஸுத்தம் ஹத்தே²ன வா சக்கத³ண்டே³ன வா வட்டேதி ஏகத்தம் கரோதி. பரிவத்தனம் கரோதீதி பரிவத்தனத³ண்ட³யந்தகம் கரோதி, யஸ்மிம் ஸுத்தகு³ளம் பவேஸேத்வா வேளுனாளிகாதீ³ஸு ட²பேத்வா பரிப்³ப⁴மாபேத்வா ஸுத்தகோடிதோ பட்டா²ய ஆகட்³ட⁴ந்தி.

220. அனிமந்திதசதுத்த²ந்தி அனிமந்திதோ சதுத்தோ² யஸ்ஸ பி⁴க்கு²சதுக்கஸ்ஸ, தம் அனிமந்திதசதுத்த²ம். ஏவம் ஸேஸேஸுபி. தேனாஹ ‘‘பஞ்சன்னம் சதுக்கான’’ந்தி. ஸம்பவேஸேத்வாதி தேஹி யோஜேத்வா. க³ணோ பி⁴ஜ்ஜதீதி நிமந்திதஸங்கோ⁴ ந ஹோதீதி அத்தோ².

அதி⁴வாஸேத்வா க³தேஸூதி ஏத்த² அகப்பியனிமந்தனாதி⁴வாஸனக்க²ணே புப்³ப³பயோகே³ து³க்கடம்பி நத்தி², விஞ்ஞத்திதோ பஸவனே பன விஞ்ஞத்திக்க²ணே இதரஸிக்கா²பதே³ஹி து³க்கடம் ஹோதீதி க³ஹேதப்³ப³ம். நிமந்தனம் ஸாதி³யதா²தி நிமந்தனப⁴த்தம் படிக்³க³ண்ஹத². தானி சாதி கும்மாஸாதீ³னி ச தேஹி பி⁴க்கூ²ஹி ஏகேன பச்சா² க³ஹிதத்தா ஏகதோ ந க³ஹிதானி.

‘‘ப⁴த்துத்³தே³ஸகேன பண்டி³தேன ப⁴விதப்³ப³ம்…பே… மோசேதப்³பா³’’தி ஏதேன ப⁴த்துத்³தே³ஸகேன அகப்பியனிமந்தனே ஸாதி³தே ஸப்³பே³ஸம்பி ஸாதி³தம் ஹோதி. ஏகதோ க³ண்ஹந்தானம் க³ணபோ⁴ஜனாபத்தி ச ஹோதீதி த³ஸ்ஸேதி. தூ³தஸ்ஸ த்³வாரே ஆக³ந்த்வா புன ‘‘ப⁴த்தம் க³ண்ஹதா²’’தி வசனப⁴யேன ‘‘கா³மத்³வாரே அட்ட²த்வா’’தி வுத்தம். க³ணபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானேத்த² தீணி அங்கா³னி.

க³ணபோ⁴ஜனஸிக்கா²பத³வண்ணனா நிட்டி²தா.

3. பரம்பரபோ⁴ஜனஸிக்கா²பத³வண்ணனா

221. ததியே பாளியம் ப⁴த்தபடிபாடி அட்டி²தாதி குலபடிபாடியா தா³தப்³பா³ ப⁴த்தபடிபாடி அட்டி²தா ந டி²தா, அப்³போ³ச்சி²ன்னா நிரந்தரப்பவத்தாதி அத்தோ². ப³த³ரப²லானி பக்கி²பித்வா பக்கயாகு³ஆதி³கம் ‘‘ப³த³ரஸாளவ’’ந்தி வுச்சதி.

பாளியம் பரம்பரபோ⁴ஜனேதி யேன பட²மம் நிமந்திதோ, தஸ்ஸ போ⁴ஜனதோ பரஸ்ஸ போ⁴ஜனஸ்ஸ பு⁴ஞ்ஜனே. விகப்பனாவ இத⁴ அனுபஞ்ஞத்திவஸேன மாதிகாயம் அனாரோபிதாபி பரிவாரே ‘‘சதஸ்ஸோ அனுபஞ்ஞத்தியோ’’தி (பரி. 86) அனுபஞ்ஞத்தியம் க³ணிதா. தத்த² கிஞ்சாபி அட்ட²கதா²யம் மஹாபச்சரிவாத³ஸ்ஸ பச்சா² கத²னேன பரம்முகா²விகப்பனா பதிட்ட²பிதா, ததா²பி ஸம்முகா²விகப்பனாபி க³ஹேதப்³பா³வ. தேனேவ மாதிகாட்ட²கதா²யம்பி ‘‘யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹம் ப⁴த்தபச்சாஸம் துய்ஹம் த³ம்மீ’தி வா ‘விகப்பேமீ’தி வா ஏவம் ஸம்முகா²’’திஆதி³ (கங்கா². அட்ட². பரம்பரபோ⁴ஜனஸிக்கா²பத³வண்ணனா) வுத்தம்.

229. கீ²ரம் வா ரஸம் வாதி பஞ்சபோ⁴ஜனாமிஸம் ப⁴த்ததோ உபரி டி²தம் ஸந்தா⁴ய வுத்தம். தஞ்ஹி அபோ⁴ஜனத்தா உப்படிபாடியா பிவதோபி அனாபத்தி. தேனாஹ ‘‘பு⁴ஞ்ஜந்தேனா’’திஆதி³.

விகப்பனாய அகரணதோ அகிரியாவஸேன இத³ம் வாசாயபி ஸமுட்டி²தந்தி ஆஹ ‘‘வசீகம்ம’’ந்தி. பரம்பரபோ⁴ஜனதா, ஸமயாபா⁴வோ, அஜ்ஜோ²ஹரணந்தி இமானேத்த² தீணி அங்கா³னி.

பரம்பரபோ⁴ஜனஸிக்கா²பத³வண்ணனா நிட்டி²தா.

4. காணமாதாஸிக்கா²பத³வண்ணனா

231. சதுத்தே² பாளியம் படியாலோகந்தி பச்சி²மதி³ஸம், பச்சா²தி³ஸந்தி அத்தோ². அபாதே²ய்யாதி³அத்தா²ய படியாதி³தந்திஸஞ்ஞாய க³ண்ஹந்தஸ்ஸாபி ஆபத்தி ஏவ அசித்தகத்தா ஸிக்கா²பத³ஸ்ஸ. அத்தனோ அத்தா²ய ‘‘இமஸ்ஸ ஹத்தே² தே³ஹீ’’தி வசனேனாபி ஆபஜ்ஜனதோ ‘‘வசீகம்ம’’ந்தி வுத்தம். வுத்தலக்க²ணபூவமந்த²தா, அஸேஸகதா, அப்படிப்பஸ்ஸத்³த⁴க³மனதா, அஞ்ஞாதகாதி³தா, அதிரேகபடிக்³க³ஹணந்தி இமானேத்த² பஞ்ச அங்கா³னி.

காணமாதாஸிக்கா²பத³வண்ணனா நிட்டி²தா.

5. பட²மபவாரணாஸிக்கா²பத³வண்ணனா

237. பஞ்சமே ‘‘தி-காரம் அவத்வா’’தி இமினா காதப்³ப³ஸத்³த³ஸாமத்தி²யா லத்³த⁴ம் இதி-பத³ம் கதகாலே ந வத்தப்³ப³ந்தி த³ஸ்ஸேதி. இத⁴ பன அஜானந்தேஹி இதி-ஸத்³தே³ பயுத்தேபி அதிரித்தம் கதமேவ ஹோதீதி த³ட்ட²ப்³ப³ம்.

238-9. ‘‘பவாரிதோ’’தி இத³ஞ்ச கத்துஅத்தே² நிப்ப²ன்னந்தி த³ஸ்ஸேதும் ‘‘கதபவாரணோ’’திஆதி³ வுத்தம். பு⁴த்தாவீ-பத³ஸ்ஸ நிரத்த²கபா⁴வமேவ ஸாதே⁴தும் ‘‘வுத்தம்பி சேத’’ந்திஆதி³ வுத்தம். தாஹீதி புது²காஹி. ஸத்துமோத³கோதி ஸத்தும் தேமேத்வா கதோ அபக்கோ. ஸத்தும் பன பிஸித்வா பிட்ட²ம் கத்வா தேமேத்வா பூவம் கத்வா பசந்தி, தம் ந பவாரேதி. ‘‘படிக்கி²பிதப்³ப³ட்டா²னே டி²தமேவ படிக்கி²பதி நாமா’’தி வுத்தத்தா யம் யம் அலஜ்ஜிஸந்தகம் வா அத்தனோ அபாபுணகஸங்கி⁴காதி³ம் வா படிக்கே²பதோ பவாரணா ந ஹோதீதி த³ட்ட²ப்³ப³ம்.

ஆஸன்னதரம் அங்க³ந்தி ஹத்த²பாஸதோ ப³ஹி ட²த்வா ஓனமித்வா தே³ந்தஸ்ஸ ஸீஸம் ஆஸன்னதரம் ஹோதி, தஸ்ஸ ஓரிமந்தேன பரிச்சி²ந்தி³தப்³ப³ம்.

அபனாமேத்வாதி அபி⁴முக²ம் ஹரித்வா. ‘‘இமம் ப⁴த்தம் க³ண்ஹா’’தி வத³தீதி கிஞ்சி அனாமேத்வா வத³தி. கேவலம் வாசாபி⁴ஹாரஸ்ஸ அனதி⁴ப்பேதத்தா க³ண்ஹதா²தி க³ஹேதும் ஆரத்³த⁴ம் கடச்சு²னா அனுக்கி²த்தம்பி புப்³பே³பி ஏவம் அபி⁴ஹடத்தா பவாரணா ஹோதீதி ‘‘அபி⁴ஹடாவ ஹோதீ’’தி வுத்தம். உத்³த⁴டமத்தேதி பா⁴ஜனதோ வியோஜிதமத்தே. த்³வின்னம் ஸமபா⁴ரேபீதி பரிவேஸகஸ்ஸ ச அஞ்ஞஸ்ஸ ச ப⁴த்தபச்சி²பா⁴ஜனவஹனே ஸமகேபீதி அத்தோ².

ரஸம் க³ண்ஹதா²தி ஏத்த² கேவலம் மம்ஸரஸஸ்ஸ அபவாரணாஜனகஸ்ஸ நாமேன வுத்தத்தா படிக்கி²பதோ பவாரணா ந ஹோதி. மச்ச²ரஸந்திஆதீ³ஸு மச்சோ² ச ரஸஞ்சாதி அத்த²ஸ்ஸ ஸம்ப⁴வதோ வத்து²னோபி தாதி³ஸத்தா பவாரணா ஹோதி, ‘‘இத³ம் க³ண்ஹதா²’’திபி அவத்வா துண்ஹீபா⁴வேன அபி⁴ஹடம் படிக்கி²பதோபி ஹோதி ஏவ. கரம்ப³கோதி மிஸ்ஸகாதி⁴வசனமேதம். யஞ்ஹி ப³ஹூஹி மிஸ்ஸேத்வா கரோந்தி, ஸோ ‘‘கரம்ப³கோ’’தி வுச்சதி.

‘‘உத்³தி³ஸ்ஸ கத’’ந்தி மஞ்ஞமானோதி ஏத்த² வத்து²னோ கப்பியத்தா ‘‘பவாரிதோவ ஹோதீ’’தி வுத்தம். தஞ்சே உத்³தி³ஸ்ஸ கதமேவ ஹோதி, படிக்கே²போ நத்தி². அயமேத்த² அதி⁴ப்பாயோதி ‘‘யேனாபுச்சி²தோ’’திஆதி³னா வுத்தமேவத்த²ம் ஸந்தா⁴ய வத³தி. காரணம் பனேத்த² து³த்³த³ஸந்தி ப⁴த்தஸ்ஸ ப³ஹுதரபா⁴வேன பவாரணாஸம்ப⁴வகாரணம் து³த்³த³ஸம், அஞ்ஞதா² கரம்ப³கேபி மச்சா²தி³ப³ஹுபா⁴வே பவாரணா ப⁴வேய்யாதி அதி⁴ப்பாயோ. யதா² சேத்த² காரணம் து³த்³த³ஸம், ஏவம் பரதோ ‘‘மிஸ்ஸகம் க³ண்ஹதா²’’தி ஏத்தா²பி காரணம் து³த்³த³ஸமேவாதி த³ட்ட²ப்³ப³ம். யஞ்ச ‘‘இத³ம் பன ப⁴த்தமிஸ்ஸகமேவா’’திஆதி³ காரணம் வுத்தம், தம்பி ‘‘அப்பதரம் ந பவாரேதீ’’தி வசனேன ந ஸமேதி. விஸும் கத்வா தே³தீதி ‘‘ரஸம் க³ண்ஹதா²’’திஆதி³னா வாசாய விஸும் கத்வா தே³தீதி அத்தோ² க³ஹேதப்³போ³. ந பன காயேன ரஸாதி³ம் வியோஜேத்வாதி. ததா² அவியோஜிதேபி படிக்கி²பதோ பவாரணாய அஸம்ப⁴வதோ அப்பவாரணாபஹோணகஸ்ஸ நாமேன வுத்தத்தா ப⁴த்தமிஸ்ஸகயாகு³ம் ஆஹரித்வா ‘‘யாகு³ம் க³ண்ஹதா²’’தி வுத்தட்டா²னாதீ³ஸு விய, அஞ்ஞதா² வா ஏத்த² யதா² புப்³பா³பரம் ந விருஜ்ஜ²தி, ததா² அதி⁴ப்பாயோ க³ஹேதப்³போ³.

நாவா வா ஸேது வாதிஆதி³ம்ஹி நாவாதி³அபி⁴ருஹனாதி³க்க²ணே கிஞ்சி ட²த்வாபி அபி⁴ருஹனாதி³காதப்³ப³த்தேபி க³மனதப்பரதாய டா²னம் நாம ந ஹோதி, ஜனஸம்மத்³தே³ன பன அனோகாஸாதி³பா⁴வேன காதும் ந வட்டதி. அசாலேத்வாதி வுத்தட்டா²னதோ அஞ்ஞஸ்மிம்பி பதே³ஸே வா உத்³த⁴ம் வா அபேஸேத்வா தஸ்மிம் ஏவ பன டா²னே பரிவத்தேதும் லப⁴தி. தேனாஹ ‘‘யேன பஸ்ஸேனா’’திஆதி³.

அகப்பியபோ⁴ஜனம் வாதி குலதூ³ஸனாதி³னா உப்பன்னம், தம் ‘‘அகப்பிய’’ந்தி இமினா தேன மிஸ்ஸம் ஓத³னாதி³ அதிரித்தம் ஹோதி ஏவாதி த³ஸ்ஸேதி. தஸ்மா யம் தத்த² அகப்பகதம் கந்த³ப²லாதி³, தம் அபனேத்வா ஸேஸம் பு⁴ஞ்ஜிதப்³ப³மேவ.

ஸோ புன காதும் ந லப⁴தீதி தஸ்மிஞ்ஞேவ பா⁴ஜனே கரியமானம் பட²மகதேன ஸத்³தி⁴ம் கதம் ஹோதீதி புன ஸோ ஏவ காதும் ந லப⁴தி, அஞ்ஞோ லப⁴தி. அஞ்ஞேன ஹி கததோ அஞ்ஞோ புன காதும் லப⁴தி. அஞ்ஞஸ்மிம் பன பா⁴ஜனே தேன வா அஞ்ஞேன வா காதும் வட்டதி. தேனாஹ ‘‘யேன அகதம், தேன காதப்³ப³ம், யஞ்ச அகதம், தம் காதப்³ப³’’ந்தி. ஏவம் கதந்தி அஞ்ஞஸ்மிம் பா⁴ஜனே கதம். ஸசே பன ஆமிஸஸம்ஸட்டா²னீதி ஏத்த² முகா²தீ³ஸு லக்³க³ம்பி ஆமிஸம் ஸோதே⁴த்வாவ அதிரித்தம் பு⁴ஞ்ஜிதப்³ப³ந்தி வேதி³தப்³ப³ம்.

241. வாசாய ஆணாபேத்வா அதிரித்தம் அகாராபனதோ அகிரியஸமுட்டா²னந்தி த³ட்ட²ப்³ப³ம். பவாரிதபா⁴வோ, ஆமிஸஸ்ஸ அனதிரித்ததா, காலே அஜ்ஜோ²ஹரணந்தி இமானேத்த² தீணி அங்கா³னி.

பட²மபவாரணாஸிக்கா²பத³வண்ணனா நிட்டி²தா.

6. து³தியபவாரணாஸிக்கா²பத³வண்ணனா

243. ச²ட்டே² ‘‘பு⁴த்தஸ்மி’’ந்தி மாதிகாயம் வுத்தத்தா போ⁴ஜனபரியோஸானே பாசித்தியம். பவாரிததா, ததா²ஸஞ்ஞிதா, ஆஸாத³னாபேக்க²தா, அனதிரித்தேன அபி⁴ஹடபவாரணா, போ⁴ஜனபஅயோஸானந்தி இமானேத்த² பஞ்ச அங்கா³னி.

து³தியபவாரணாஸிக்கா²பத³வண்ணனா நிட்டி²தா.

7. விகாலபோ⁴ஜனஸிக்கா²பத³வண்ணனா

247. ஸத்தமே நடானம் நாடகாதி நடனாடகா, ஸீதாஹரணாதீ³னி.

248-9. கா²த³னீயே கா²த³னீயத்த²ந்தி பூவாதி³கா²த³னீயே விஜ்ஜமானகா²த³னீயகிச்சம் கா²த³னீயேஹி காதப்³ப³ம் ஜிக⁴ச்சா²ஹரணஸங்கா²தம் அத்த²ம் பயோஜனம் நேவ ப²ரந்தி ந நிப்பா²தே³ந்தி. ஏகஸ்மிம் தே³ஸே ஆஹாரகிச்சம் ஸாதே⁴ந்தம் வா அஞ்ஞஸ்மிம் தே³ஸே உட்டி²தபூ⁴மிரஸாதி³பே⁴தே³ன ஆஹாரகிச்சம் அஸாதே⁴ந்தம்பி வா ஸம்ப⁴வேய்யாதி ஆஹ ‘‘தேஸு தேஸு ஜனபதே³ஸூ’’திஆதி³. கேசி பன ‘‘ஏகஸ்மிம் ஜனபதே³ ஆஹாரகிச்சம் ஸாதே⁴ந்தம் ஸேஸஜனபதே³ஸுபி விகாலே ந கப்பதி ஏவாதி த³ஸ்ஸனத்த²ம் இத³ம் வுத்த’’ந்திபி (ஸாரத்த². டீ. பாசித்தியகண்ட³ 3.248-249) வத³ந்தி. பகதிஆஹாரவஸேனாதி அஞ்ஞேஹி யாவகாலிகேஹி அயோஜிதம் அத்தனோ பகதியாவ ஆஹாரகிச்சகரணவஸேன. ஸம்மோஹோயேவ ஹோதீதி அனேகத்தா²னம் நாமானம், அப்பஸித்³தா⁴னஞ்ச ஸம்ப⁴வதோ ஸம்மோஹோ ஏவ ஸியா. தேனேவேத்த² மயம்பி மூலகமூலாதீ³னம் பரியாயந்தரத³ஸ்ஸனேன அத³ஸ்ஸனம் கரிம்ஹ உபதே³ஸதோவ க³ஹேதப்³ப³தோ.

யந்தி வட்டகந்த³ம். முளாலந்தி தூ²லதருணமூலமேவ, ருக்க²வல்லிஆதீ³னம் மத்த²கோதி ஹேட்டா² வுத்தமேவ ஸம்பிண்டே³த்வா வுத்தம். அச்சி²வாதீ³னம் அபரிபக்கானேவ ப²லானி யாவஜீவிகானீதி த³ஸ்ஸேதும் ‘‘அபரிபக்கானீ’’தி வுத்தம். ஹரீதகாதீ³னம் அட்டீ²னீதி ஏத்த² மிஞ்ஜம் யாவகாலிகந்தி கேசி வத³ந்தி, தம் ந யுத்தம் அட்ட²கதா²யம் அவுத்தத்தா.

ஹிங்கு³ருக்க²தோ பக்³க⁴ரிதனிய்யாஸோ ஹிங்கு³ நாம. ஹிங்கு³ஜதுஆத³யோ ச ஹிங்கு³விகதியோவ. தத்த² ஹிங்கு³ஜது நாம ஹிங்கு³ருக்க²ஸ்ஸ த³ண்ட³பத்தானி பசித்வா கதனிய்யாஸோ. ஹிங்கு³ஸிபாடிகா நாம ஹிங்கு³பத்தானி பசித்வா கதனிய்யாஸோ. அஞ்ஞேன மிஸ்ஸேத்வா கதோதிபி வத³ந்தி. தகந்தி அக்³க³கோடியா நிக்க²ந்தஸிலேஸோ. தகபத்திந்தி பத்ததோ நிக்க²ந்தஸிலேஸோ. தகபண்ணிந்தி பலாஸே ப⁴ஜ்ஜித்வா கதஸிலேஸோ. த³ண்ட³தோ நிக்க²ந்தஸிலேஸோதிபி வத³ந்தி. விகாலதா, யாவகாலிகதா, அஜ்ஜோ²ஹரணந்தி இமானேத்த² தீணி அங்கா³னி.

விகாலபோ⁴ஜனஸிக்கா²பத³வண்ணனா நிட்டி²தா.

8. ஸன்னிதி⁴காரகஸிக்கா²பத³வண்ணனா

252-3. அட்ட²மே தாதி³ஸந்தி அஸூபப்³யஞ்ஜனம். யாவகாலிகம் வா யாமகாலிகம் வா…பே… பாசித்தியந்தி ஏத்த² கிஞ்சாபி பாளியம் கா²த³னீயபோ⁴ஜனீயபதே³ஹி யாவகாலிகமேவ ஸங்க³ஹிதம், ந யாமகாலிகம். ததா²பி ‘‘அனாபத்தி யாமகாலிகம் யாமே நித³ஹித்வா பு⁴ஞ்ஜதீ’’தி இத⁴ சேவ –

‘‘யாமகாலிகேன, பி⁴க்க²வே, ஸத்தாஹகாலிகம்…பே… யாவஜீவிகம் தத³ஹுபடிக்³க³ஹிதம் யாமே கப்பதி, யாமாதிக்கந்தே ந கப்பதீ’’தி (மஹாவ. 305) –

அஞ்ஞத்த² ச வுத்தத்தா, ‘‘யாமகாலிக’’ந்தி வசனஸாமத்தி²யதோ ச ப⁴க³வதோ அதி⁴ப்பாயஞ்ஞூஹி அட்ட²கதா²சரியேஹி யாமகாலிகம் ஸன்னிதி⁴காரககதம் பாசித்தியவத்து²மேவ வுத்தந்தி த³ட்ட²ப்³ப³ம். யந்தி பத்தம், க⁴ம்ஸனகிரியாபேக்கா²ய சேதம் உபயோக³வசனம். அங்கு³லிலேகா² பஞ்ஞாயதீதி ஸினேஹாபா⁴வேபி பத்தஸ்ஸ ஸுச்ச²விதாய பஞ்ஞாயதி. யந்தி யாவகாலிகம், யாமகாலிகஞ்ச. அபரிச்சத்தமேவாதி நிரபேக்க²தாய அனுபஸம்பன்னஸ்ஸ அதி³ன்னம், அபரிச்சத்தஞ்ச யாவகாலிகாதி³வத்து²மேவ ஸந்தா⁴ய வத³தி, ந பன தக்³க³தபடிக்³க³ஹணம். ந ஹி வத்து²ம் அபரிச்சஜித்வா தத்த²க³தபடிக்³க³ஹணம் பரிச்சஜிதும் ஸக்கா, ந ச தாதி³ஸம் வசனமத்தி². யதி³ ப⁴வேய்ய, ‘‘ஸசே பத்தோ து³த்³தோ⁴தோ ஹோதி…பே… பு⁴ஞ்ஜந்தஸ்ஸ பாசித்திய’’ந்தி வசனம் விருஜ்ஜே²ய்ய. ந ஹி தோ⁴வனேன ஆமிஸம் அபனேதும் வாயமந்தஸ்ஸ படிக்³க³ஹணே அபேக்கா² வத்ததி. யேன புனதி³வஸே பு⁴ஞ்ஜதோ பாசித்தியம் ஜனேய்ய, பத்தே பன வத்தமானா அபேக்கா² தக்³க³திகே ஆமிஸேபி வத்ததி ஏவனாமாதி ஆமிஸே அனபேக்க²தா ஏத்த² ந லப்³ப⁴தி, ததோ ஆமிஸே அவிஜஹிதபடிக்³க³ஹணம் புனதி³வஸே பாசித்தியம் ஜனேதீதி இத³ம் வுத்தம். அத² மதம் ‘‘யத³க்³கே³னேத்த² ஆமிஸானபேக்க²தா ந லப்³ப⁴தி. தத³க்³கே³ன படிக்³க³ஹணானபேக்கா²பி ந லப்³ப⁴தீ’’தி. ததா² ஸதி யத்த² ஆமிஸாபேக்கா² அத்தி², தத்த² படிக்³க³ஹணாபேக்கா²பி ந விக³ச்ச²தீதி ஆபன்னம், ஏவஞ்ச படிக்³க³ஹணே அனபேக்க²விஸ்ஸஜ்ஜனம் விஸும் ந வத்தப்³ப³ம் ஸியா. அட்ட²கதா²யஞ்சேதம்பி படிக்³க³ஹணவிஜஹனகாரணத்தேன அபி⁴மதம் ஸியா, இத³ம் ஸுட்டு²தரம் கத்வா விஸும் வத்தப்³ப³ம் சீவராபேக்கா²ய வத்தமானாயபி பச்சுத்³தா⁴ரேன அதி⁴ட்டா²னவிஜஹனம் விய. ஏதஸ்மிஞ்ச உபாயே ஸதி க³ண்டி²காஹதபத்தேஸு அவட்டனதா நாம ந ஸியாதி வுத்தோவாயமத்தோ². தஸ்மா யம் வுத்தம் ஸாரத்த²தீ³பனியம் ‘‘யம் பரஸ்ஸ பரிச்சஜித்வா அதி³ன்னம்பி ஸசே படிக்³க³ஹணே நிரபேக்க²னிஸ்ஸஜ்ஜனேன விஜஹிதபடிக்³க³ஹணம் ஹோதி, தம்பி து³தியதி³வஸே வட்டதீ’’திஆதி³ (ஸாரத்த². டீ. பாசித்தியகண்ட³ 3.252-253), தம் ந ஸாரதோ பச்சேதப்³ப³ம்.

பகதிஆமிஸேதி ஓத³னாதி³கப்பியயாவகாலிகே. த்³வேதி புரேப⁴த்தம் படிக்³க³ஹிதம் யாமகாலிகம் புரேப⁴த்தம் ஸாமிஸேன முகே²ன பு⁴ஞ்ஜதோ ஸன்னிதி⁴பச்சயா ஏகம், யாமகாலிகஸம்ஸட்ட²தாய யாவகாலிகத்தப⁴ஜனேன அனதிரித்தபச்சயா ஏகந்தி த்³வே பாசித்தியானி. விகப்பத்³வயேதி ஸாமிஸனிராமிஸபக்க²த்³வயே. து²ல்லச்சயஞ்ச து³க்கடஞ்சாதி மனுஸ்ஸமம்ஸே து²ல்லச்சயம், ஸேஸேஸு து³க்கடம். யாவகாலிகயாமகாலிகதா, ஸன்னிதி⁴பா⁴வோ, தஸ்ஸ அஜ்ஜோ²ஹரணந்தி இமானேத்த² தீணி அங்கா³னி.

ஸன்னிதி⁴காரகஸிக்கா²பத³வண்ணனா நிட்டி²தா.

9. பணீதபோ⁴ஜனஸிக்கா²பத³வண்ணனா

259. நவமே பணீதஸம்ஸட்டா²னி போ⁴ஜனானி பணீதபோ⁴ஜனானீதி பாளியம் பன போ⁴ஜனானி புப்³பே³ வுத்தத்தா பாகடானீதி அத³ஸ்ஸிதானி, தாதி³ஸேஹி பணீதேஹி மிஸ்ஸத்தா பணீதபோ⁴ஜனானி நாம ஹோந்தி. தேஸம் பபே⁴த³த³ஸ்ஸனத்த²ம் ‘‘ஸேய்யதி²த³ம் ஸப்பி நவனீத’’ந்திஆதி³ வுத்தம். ஸப்பிப⁴த்தந்தி ஏத்த² கிஞ்சாபி ஸப்பினா ஸம்ஸட்ட²ம் ப⁴த்தம், ஸப்பி ச ப⁴த்தஞ்சாதிபி அத்தோ² விஞ்ஞாயதி, அட்ட²கதா²யம் பன ‘‘ஸாலிப⁴த்தம் விய ஸப்பிப⁴த்தம் நாம நத்தீ²’’திஆதி³னா வுத்தத்தா ந ஸக்கா அஞ்ஞம் வத்து²ம். அட்ட²கதா²சரியா ஏவ ஹி ஈதி³ஸேஸு டா²னேஸு பமாணம்.

மூலந்தி கப்பியப⁴ண்ட³ம் வுத்தம். தஸ்மா அனாபத்தீதி ஏத்த² விஸங்கேதேன பாசித்தியாபா⁴வேபி ஸூபோத³னது³க்கடா ந முச்சதீதி வத³ந்தி. ‘‘கப்பியஸப்பினா, அகப்பியஸப்பினா’’தி ச இத³ம் கப்பியாகப்பியமம்ஸஸத்தானம் வஸேன வுத்தம்.

261. மஹானாமஸிக்கா²பத³ம் நாம உபரி சாதுமாஸபச்சயபவாரணாஸிக்கா²பத³ம் (பாசி. 303 ஆத³யோ). அகி³லானோ ஹி அப்பவாரிதட்டா²னே விஞ்ஞாபேந்தோபி காலபரிச்சே²த³ம், பே⁴ஸஜ்ஜபரிச்சே²த³ம் வா கத்வா ஸங்க⁴வஸேன பவாரிதட்டா²னதோ தது³த்தரி விஞ்ஞாபேந்தேன, பரிச்சே²த³ப்³ப⁴ந்தரேபி ந பே⁴ஸஜ்ஜகரணீயேன ரோகே³ன பே⁴ஸஜ்ஜம் விஞ்ஞாபேந்தேன ச ஸமோ ஹோதீதி ‘‘மஹானாமஸிக்கா²பதே³ன காரேதப்³போ³’’தி வுத்தம். பணீதபோ⁴ஜனதா, அகி³லானதா, அகதவிஞ்ஞத்தியா படிலாபோ⁴, அஜ்ஜோ²ஹரணந்தி இமானேத்த² சத்தாரி அங்கா³னி.

பணீதபோ⁴ஜனஸிக்கா²பத³வண்ணனா நிட்டி²தா.

10. த³ந்தபோனஸிக்கா²பத³வண்ணனா

263. த³ஸமே க⁴னப³த்³தோ⁴தி க⁴னமம்ஸேன ஸம்ப³த்³தோ⁴, கதி²னஸம்ஹதஸரீரோதி அத்தோ².

264. முக²த்³வாரந்தி முக²தோ ஹேட்டா² த்³வாரம் முக²த்³வாரம், க³லனாளிகந்தி அத்தோ². ஏவஞ்ச நாஸிகாய பவிட்ட²ம்பி முக²த்³வாரம் பவிட்ட²மேவ ஹோதி, முகே² பக்கி²த்தமத்தஞ்ச அப்பவிட்ட²ம். ஆஹாரந்தி அஜ்ஜோ²ஹரிதப்³ப³ம் காலிகம் அதி⁴ப்பேதம், ந உத³கம். தஞ்ஹி பே⁴ஸஜ்ஜஸங்க³ஹிதம்பி அகாலிகமேவ படிக்³க³ஹிதஸ்ஸேவ காலிகத்தா. உத³கே ஹி படிக்³க³ஹணம் ந ருஹதி. தேனேவ பி⁴க்கு²னா தாபிதேன உத³கேன சிரபடிக்³க³ஹிதேன ச அகப்பியகுடியம் வுத்தே²ன ச ஸஹ ஆமிஸம் பு⁴ஞ்ஜந்தஸ்ஸாபி ஸாமபாகாதி³தோ³ஸோ ந ஹோதி. வக்க²தி ஹி ‘‘பி⁴க்கு² யாகு³அத்தா²ய…பே… உத³கம் தாபேதி, வட்டதீ’’திஆதி³ (பாசி. அட்ட². 265). பி⁴க்கூ² பன ஏதம் அதி⁴ப்பாயம் ததா³ ந ஜானிம்ஸு. தேனாஹ ‘‘ஸம்மா அத்த²ம் அஸல்லக்கே²த்வா’’திஆதி³.

265. ரத²ரேணும்பீதி ரதே² க³ச்ச²ந்தே உட்ட²ஹனரேணுஸதி³ஸரேணும். தேன ததோ ஸுகு²மம் ஆகாஸே பரிப்³ப⁴மனகம் தி³ஸ்ஸமானம்பி அப்³போ³ஹாரிகந்தி த³ஸ்ஸேதி. அகல்லகோதி கி³லானோ.

‘‘க³ஹேதும் வா…பே… தஸ்ஸ ஓரிமந்தேனா’’தி இமினா ஆகாஸே உஜும் ட²த்வா பரேன உக்கி²த்தம் க³ண்ஹந்தஸ்ஸாபி ஆஸன்னங்க³பூ⁴தபாத³தலதோ பட்டா²ய ஹத்த²பாஸோ பரிச்சி²ந்தி³தப்³போ³, ந பன ஸீஸந்ததோ பட்டா²யாதி த³ஸ்ஸேதி. தத்த² ‘‘ஓரிமந்தேனா’’தி இமஸ்ஸ ஹேட்டி²மந்தேனாதி அத்தோ² க³ஹேதப்³போ³.

ஏத்த² ச பவாரணாஸிக்கா²பத³ட்ட²கதா²யம் ‘‘ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²யா’’திஆதி³னா (பாசி. அட்ட². 238-239) படிக்³கா³ஹகானம் ஆஸன்னங்க³ஸ்ஸ பாரிமந்ததோ பட்டா²ய பரிச்சே²த³ஸ்ஸ த³ஸ்ஸிதத்தா இதா⁴பி ஆகாஸே டி²தஸ்ஸ படிக்³கா³ஹகஸ்ஸ ஆஸன்னங்க³பூ⁴தபாத³ங்கு³லஸ்ஸ பாரிமந்தபூ⁴ததோ பண்ஹிபரியந்தஸ்ஸ ஹேட்டி²மதலதோ பட்டா²ய, தா³யகஸ்ஸ பன ஓரிமந்தபூ⁴ததோ பாத³ங்கு³லஸ்ஸ ஹேட்டி²மதலதோ பட்டா²ய ஹத்த²பாஸோ பரிச்சி²ந்தி³தப்³போ³தி த³ட்ட²ப்³ப³ம். இமினாவ நயேன பூ⁴மியம் நிபஜ்ஜித்வா உஸ்ஸீஸே நிஸின்னஸ்ஸ ஹத்த²தோ படிக்³க³ண்ஹந்தஸ்ஸபி ஆஸன்னஸீஸங்க³ஸ்ஸ பாரிமந்தபூ⁴ததோ கீ³வந்ததோ பட்டா²யேவ ஹத்த²பாஸோ மினிதப்³போ³, ந பாத³தலதோ பட்டா²ய. ஏவம் நிபஜ்ஜித்வா தா³னேபி யதா²னுரூபம் வேதி³தப்³ப³ம். ‘‘யம் ஆஸன்னதரம் அங்க³’’ந்தி ஹி வுத்தம்.

படிக்³க³ஹணஸஞ்ஞாயாதி ‘‘மஞ்சாதி³னா படிக்³க³ஹேஸ்ஸாமீ’’தி உப்பாதி³தஸஞ்ஞாய. இமினா ‘‘படிக்³க³ண்ஹாமீ’’தி வாசாய வத்தப்³ப³கிச்சம் நத்தீ²தி த³ஸ்ஸேதி. கத்த²சி அட்ட²கதா²ஸு, பதே³ஸேஸு வா. அஸம்ஹாரிமே ப²லகேதி தா²மமஜ்ஜி²மேன புரிஸேன அஸம்ஹாரியே. புஞ்சி²த்வா படிக்³க³ஹேத்வாதி புஞ்சி²தேபி ரஜனசுண்ணஸங்காய ஸதி படிக்³க³ஹணத்தா²ய வுத்தம், நாஸதி. தம் பனாதி பதிதரஜம் அப்படிக்³க³ஹேத்வா உபரி க³ஹிதபிண்ட³பாதம். அனாபத்தீதி து³ருபசிண்ணாதி³தோ³ஸோ நத்தி². ‘‘அனுபஸம்பன்னஸ்ஸ த³ஸ்ஸாமீ’’திஆதி³பி வினயது³க்கடபரிஹாராய வுத்தம். ததா² அகத்வா க³ஹிதேபி படிக்³க³ஹேத்வா பரிபு⁴ஞ்ஜதோ அனாபத்தி ஏவ. ‘‘அனுபஸம்பன்னஸ்ஸ த³த்வா’’தி இத³ம்பி புரிமாபோ⁴கா³னுகு³ணதாய வுத்தம்.

சருகேனாதி கு²த்³த³கபா⁴ஜனேன. அபி⁴ஹடத்தாதி தி³ய்யமானக்க²ணம் ஸந்தா⁴ய வுத்தம். த³த்வா அபனயனகாலே பன சா²ரிகா வா பி³ந்தூ³னி வா பதந்தி, புன படிக்³க³ஹேதப்³ப³ம் அபி⁴ஹாரஸ்ஸ விக³தத்தாதி வத³ந்தி. தம் யதா² ந பததி, ததா² அபனேஸ்ஸாமீதி பரிஹரந்தே யுஜ்ஜதி. பகதிஸஞ்ஞாய அபனேந்தே அபி⁴ஹாரோ ந சி²ஜ்ஜதி, தம் படிக்³க³ஹிதமேவ ஹோதி. முக²வட்டியாபி க³ஹேதும் வட்டதீதி அபி⁴ஹரியமானஸ்ஸ பத்தஸ்ஸ முக²வட்டியா உபரிபா⁴கே³ ஹத்த²ம் பஸாரேத்வா பு²ஸிதும் வட்டதி.

பாதே³ன பேல்லேத்வாதி ‘‘பாதே³ன படிக்³க³ஹேஸ்ஸாமீ’’திஸஞ்ஞாய அக்கமித்வா. கேசீதி அப⁴யகி³ரிவாஸினோ. வசனமத்தமேவாதி படிப³த்³த⁴ப்படிப³த்³த⁴ந்தி ஸத்³த³மத்தமேவ நானம், காயபடிப³த்³த⁴மேவ ஹோதி. தஸ்மா தேஸம் வசனம் ந க³ஹேதப்³ப³ந்தி அதி⁴ப்பாயோ.

தேன ஆஹராபேதுந்தி யஸ்ஸ பி⁴க்கு²னோ ஸந்திகம் க³தம், தம் இத⁴ ஆனேஹீதி ஆணாபேத்வா தேன ஆஹராபேதும் இதரஸ்ஸ வட்டதீதி அத்தோ². ந ததோ பரந்தி தத³ஹேவ ஸாமம் அப்படிக்³க³ஹிதம் ஸந்தா⁴ய வுத்தம். தத³ஹேவ படிக்³க³ஹிதம் பன புனதி³வஸாதீ³ஸு அப்படிக்³க³ஹேத்வாபி பரிபு⁴ஞ்ஜிதும் வட்டதீதி வத³ந்தி.

கி²ய்யந்தீதி க²யம் க³ச்ச²ந்தி, தேஸம் சுண்ணேஹி து²ல்லச்சயஅப்படிக்³க³ஹணாபத்தியோ ந ஹோந்தீதி அதி⁴ப்பாயோ. ‘‘நவஸமுட்டி²த’’ந்தி ஏதேனேவ உச்சு²ஆதீ³ஸு அபி⁴னவலக்³க³த்தா அப்³போ³ஹாரிகம் ந ஹோதீதி த³ஸ்ஸேதி. ஏஸேவ நயோதி ஸன்னிதி⁴தோ³ஸாதி³ம் ஸந்தா⁴ய வத³தி. தேனாஹ ‘‘ந ஹீ’’திஆதி³. தேன ச படிக்³க³ஹணங்கே³ஸு பஞ்சஸுபி ஸமித்³தே⁴ஸு அஜ்ஜோ²ஹரிதுகாமதாய க³ஹிதமேவ படிக்³க³ஹிதம் நாம ஹோதி அஜ்ஜோ²ஹரிதப்³பே³ஸு ஏவ படிக்³க³ஹணஸ்ஸ அனுஞ்ஞாதத்தாதி த³ஸ்ஸேதி. ததா² பா³ஹிரபரிபோ⁴க³த்தா²ய க³ஹேத்வா ட²பிததேலாதி³ம் அஜ்ஜோ²ஹரிதுகாமதாய ஸதி படிக்³க³ஹேத்வா பரிபு⁴ஞ்ஜிதும் வட்டதி.

கேஸஞ்சீதிஆதீ³ஸு அனுபஸம்பன்னானம் அத்தா²ய கத்த²சி ட²பியமானம்பி ஹத்த²தோ முத்தமத்தே ஏவ படிக்³க³ஹணம் ந விஜஹதி, அத² கோ² பா⁴ஜனே பதிதமேவ படிக்³க³ஹணம் விஜஹதி. பா⁴ஜனஞ்ச பி⁴க்கு²னா புனதி³வஸத்தா²ய அபேக்கி²தமேவாதி தக்³க³தம்பி ஆமிஸம் து³த்³தோ⁴தபத்தக³தம் விய படிக்³க³ஹணம் ந விஜஹதீதி ஆஸங்காய ‘‘ஸாமணேரஸ்ஸ ஹத்தே² பக்கி²பிதப்³ப³’’ந்தி வுத்தந்தி வேதி³தப்³ப³ம். ஈதி³ஸேஸு ஹி யுத்தி ந க³வேஸிதப்³பா³, வுத்தனயேனேவ படிபஜ்ஜிதப்³ப³ம். ‘‘பத்தக³தா யாகூ³’’தி இமினா பத்தமுக²வட்டியா பு²ட்டே²பி கூடே யாகு³ படிக்³க³ஹிதா, உக்³க³ஹிதா வா ந ஹோதி பி⁴க்கு²னோ அனிச்சா²ய பு²ட்ட²த்தாதி த³ஸ்ஸேதி. ஆரோபேதீதி ஹத்த²ம் பு²ஸாபேதி. படிக்³க³ஹணூபக³ம் பா⁴ரம் நாம மஜ்ஜி²மஸ்ஸ புரிஸஸ்ஸ உக்கே²பாரஹம். ந பித³ஹிதப்³ப³ந்தி ஹத்த²தோ முத்தம் ஸந்தா⁴ய வுத்தம், ஹத்த²க³தம் பன இதரேன ஹத்தே²ன பித³ஹதோ, ஹத்த²தோ முத்தம்பி வா அபு²ஸித்வா உபரிபிதா⁴னம் பாதேந்தஸ்ஸ ந தோ³ஸோ.

படிக்³க³ண்ஹாதீதி சா²யத்தா²ய உபரி தா⁴ரயமானா மஹாஸாகா² யேன கேனசி சி²ஜ்ஜேய்ய, தத்த² லக்³க³ரஜம் முகே² பாதேய்ய சாதி கப்பியம் காராபேத்வா படிக்³க³ண்ஹாதி. குண்ட³கேதி மஹாக⁴டே. தஸ்மிம்பீதி சாடிக⁴டேபி. கா³ஹாபேத்வாதி அப்படிக்³க³ஹிதம் காலிகம் கா³ஹாபேத்வா.

து³தியத்தே²ரஸ்ஸாதி ‘‘தே²ரஸ்ஸ பத்தம் மய்ஹம் தே³தா²’’தி தேன அத்தனோ பரிச்சஜாபேத்வா து³தியத்தே²ரஸ்ஸ தே³தி. ஏத்த² பனாதி பத்தபரிவத்தனே. காரணந்தி ஏத்த² யதா² ‘‘ஸாமணேரா இதோ அம்ஹாகம்பி தே³ந்தீ’’தி விதக்கோ உப்பஜ்ஜதி, ந ததா²தி காரணம் வத³ந்தி, தஞ்ச யுத்தம். யஸ்ஸ பன தாதி³ஸோ விதக்கோ நத்தி², தேன அபரிவத்தேத்வாபி பு⁴ஞ்ஜிதும் வட்டதி.

நிச்சாலேதுந்தி சாலேத்வா பாஸாணஸக்க²ராதி³அபனயம் காதும். உத்³த⁴னம் ஆரோபேதப்³ப³ந்தி அனக்³கி³கம் உத்³த⁴னம் ஸந்தா⁴ய வுத்தம். உத்³த⁴னே பச்சமானஸ்ஸ ஆலுளனே உபரி அபக்கதண்டு³லா ஹேட்டா² பவிஸித்வா பச்சதீதி ஆஹ ‘‘ஸாமம்பாகஞ்சேவ ஹோதீ’’தி.

ஆதா⁴ரகே பத்தோ ட²பிதோதி அப்படிக்³க³ஹிதாமிஸோ பத்தோ புன படிக்³க³ஹணத்தா²ய ட²பிதோ. ஏகக்³க³ஹணேனேவாதி ஸாமணேரானம் க³ஹிதஸ்ஸ புன அச்ச²ட்³ட³னவஸேன க³ஹணேன. பு⁴ஞ்ஜிதும் வட்டதீதி தூ⁴மவட்டியா தத³ஹுபடிக்³க³ஹிதத்தா வுத்தம். ப⁴த்துக்³கா³ரோதிஆதி³ அப்³போ³ஹாரிகப்பஸங்கே³ன விகாலபோ⁴ஜனவினிச்ச²யத³ஸ்ஸனம். ஸமுத்³தோ³த³கேனாதி அப்படிக்³க³ஹிதேன. ஹிமகரகா நாம கதா³சி வஸ்ஸோத³கேன ஸஹ பதனகா பாஸாணலேகா² விய க⁴னீபூ⁴தஉத³கவிஸேஸா, தேஸு படிக்³க³ஹணகிச்சம் நத்தி². தேனாஹ ‘‘உத³கக³திகா ஏவா’’தி. புரேப⁴த்தமேவ வட்டதீதி அப்படிக்³க³ஹிதாபத்தீஹி அப்³போ³ஹாரிகம்பி விகாலபோ⁴ஜனாபத்தீஹி ஸப்³போ³ஹாரிகந்தி த³ஸ்ஸேதி.

லக்³க³தீதி முகே² ச ஹத்தே² ச மத்திகாவண்ணம் த³ஸ்ஸேதி. ப³ஹலந்தி ஹத்த²முகே²ஸு அலக்³க³னகம்பி படிக்³க³ஹேதப்³ப³ம். வாஸமத்தந்தி ரேணுகீ²ராபா⁴வம் த³ஸ்ஸேதி. ஆகிரதி படிக்³க³ஹேதப்³ப³ந்தி புப்ப²ரஸஸ்ஸ பஞ்ஞாயனதோ வுத்தம்.

மஹாபூ⁴தேஸூதி பாணஸரீரஸன்னிஸ்ஸிதேஸு பத²வீஆதி³மஹாபூ⁴தேஸு. ஸப்³ப³ம் வட்டதீதி அத்தனோ, பரேஸஞ்ச ஸரீரனிஸ்ஸிதம் ஸப்³ப³ம் வட்டதி. அகப்பியமம்ஸானுலோமதாய து²ல்லச்சயாதி³ம் ந ஜனேதீதி அதி⁴ப்பாயோ. பததீதி அத்தனோ ஸரீரதோ விச்சி²ந்தி³த்வா பததி. ‘‘ருக்க²தோ சி²ந்தி³த்வா’’தி வுத்தத்தா மத்திகத்தா²ய பத²விம் க²ணிதும், அஞ்ஞம்பி யம்கிஞ்சி மூலபண்ணாதி³விஸபே⁴ஸஜ்ஜம் சி²ந்தி³த்வா சா²ரிகம் அகத்வாபி அப்படிக்³க³ஹிதம்பி பரிபு⁴ஞ்ஜிதும் வட்டதீதி த³ட்ட²ப்³ப³ம். அப்படிக்³க³ஹிததா, அனனுஞ்ஞாததா, தூ⁴மாதி³அப்³போ³ஹாரிகதாபா⁴வோ, அஜ்ஜோ²ஹரணந்தி இமானேத்த² சத்தாரி அங்கா³னி.

த³ந்தபோனஸிக்கா²பத³வண்ணனா நிட்டி²தா.

நிட்டி²தோ போ⁴ஜனவக்³கோ³ சதுத்தோ².