10. த³ந்தபோனஸிக்கா²பத³வண்ணனா

263. த³ஸமே க⁴னப³த்³தோ⁴தி க⁴னமம்ஸேன ஸம்ப³த்³தோ⁴, கதி²னஸம்ஹதஸரீரோதி அத்தோ².

264. முக²த்³வாரந்தி முக²தோ ஹேட்டா² த்³வாரம் முக²த்³வாரம், க³லனாளிகந்தி அத்தோ². ஏவஞ்ச நாஸிகாய பவிட்ட²ம்பி முக²த்³வாரம் பவிட்ட²மேவ ஹோதி, முகே² பக்கி²த்தமத்தஞ்ச அப்பவிட்ட²ம். ஆஹாரந்தி அஜ்ஜோ²ஹரிதப்³ப³ம் காலிகம் அதி⁴ப்பேதம், ந உத³கம். தஞ்ஹி பே⁴ஸஜ்ஜஸங்க³ஹிதம்பி அகாலிகமேவ படிக்³க³ஹிதஸ்ஸேவ காலிகத்தா. உத³கே ஹி படிக்³க³ஹணம் ந ருஹதி. தேனேவ பி⁴க்கு²னா தாபிதேன உத³கேன சிரபடிக்³க³ஹிதேன ச அகப்பியகுடியம் வுத்தே²ன ச ஸஹ ஆமிஸம் பு⁴ஞ்ஜந்தஸ்ஸாபி ஸாமபாகாதி³தோ³ஸோ ந ஹோதி. வக்க²தி ஹி ‘‘பி⁴க்கு² யாகு³அத்தா²ய…பே… உத³கம் தாபேதி, வட்டதீ’’திஆதி³ (பாசி. அட்ட². 265). பி⁴க்கூ² பன ஏதம் அதி⁴ப்பாயம் ததா³ ந ஜானிம்ஸு. தேனாஹ ‘‘ஸம்மா அத்த²ம் அஸல்லக்கே²த்வா’’திஆதி³.

265. ரத²ரேணும்பீதி ரதே² க³ச்ச²ந்தே உட்ட²ஹனரேணுஸதி³ஸரேணும். தேன ததோ ஸுகு²மம் ஆகாஸே பரிப்³ப⁴மனகம் தி³ஸ்ஸமானம்பி அப்³போ³ஹாரிகந்தி த³ஸ்ஸேதி. அகல்லகோதி கி³லானோ.

‘‘க³ஹேதும் வா…பே… தஸ்ஸ ஓரிமந்தேனா’’தி இமினா ஆகாஸே உஜும் ட²த்வா பரேன உக்கி²த்தம் க³ண்ஹந்தஸ்ஸாபி ஆஸன்னங்க³பூ⁴தபாத³தலதோ பட்டா²ய ஹத்த²பாஸோ பரிச்சி²ந்தி³தப்³போ³, ந பன ஸீஸந்ததோ பட்டா²யாதி த³ஸ்ஸேதி. தத்த² ‘‘ஓரிமந்தேனா’’தி இமஸ்ஸ ஹேட்டி²மந்தேனாதி அத்தோ² க³ஹேதப்³போ³.

ஏத்த² ச பவாரணாஸிக்கா²பத³ட்ட²கதா²யம் ‘‘ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²யா’’திஆதி³னா (பாசி. அட்ட². 238-239) படிக்³கா³ஹகானம் ஆஸன்னங்க³ஸ்ஸ பாரிமந்ததோ பட்டா²ய பரிச்சே²த³ஸ்ஸ த³ஸ்ஸிதத்தா இதா⁴பி ஆகாஸே டி²தஸ்ஸ படிக்³கா³ஹகஸ்ஸ ஆஸன்னங்க³பூ⁴தபாத³ங்கு³லஸ்ஸ பாரிமந்தபூ⁴ததோ பண்ஹிபரியந்தஸ்ஸ ஹேட்டி²மதலதோ பட்டா²ய, தா³யகஸ்ஸ பன ஓரிமந்தபூ⁴ததோ பாத³ங்கு³லஸ்ஸ ஹேட்டி²மதலதோ பட்டா²ய ஹத்த²பாஸோ பரிச்சி²ந்தி³தப்³போ³தி த³ட்ட²ப்³ப³ம். இமினாவ நயேன பூ⁴மியம் நிபஜ்ஜித்வா உஸ்ஸீஸே நிஸின்னஸ்ஸ ஹத்த²தோ படிக்³க³ண்ஹந்தஸ்ஸபி ஆஸன்னஸீஸங்க³ஸ்ஸ பாரிமந்தபூ⁴ததோ கீ³வந்ததோ பட்டா²யேவ ஹத்த²பாஸோ மினிதப்³போ³, ந பாத³தலதோ பட்டா²ய. ஏவம் நிபஜ்ஜித்வா தா³னேபி யதா²னுரூபம் வேதி³தப்³ப³ம். ‘‘யம் ஆஸன்னதரம் அங்க³’’ந்தி ஹி வுத்தம்.

படிக்³க³ஹணஸஞ்ஞாயாதி ‘‘மஞ்சாதி³னா படிக்³க³ஹேஸ்ஸாமீ’’தி உப்பாதி³தஸஞ்ஞாய. இமினா ‘‘படிக்³க³ண்ஹாமீ’’தி வாசாய வத்தப்³ப³கிச்சம் நத்தீ²தி த³ஸ்ஸேதி. கத்த²சி அட்ட²கதா²ஸு, பதே³ஸேஸு வா. அஸம்ஹாரிமே ப²லகேதி தா²மமஜ்ஜி²மேன புரிஸேன அஸம்ஹாரியே. புஞ்சி²த்வா படிக்³க³ஹேத்வாதி புஞ்சி²தேபி ரஜனசுண்ணஸங்காய ஸதி படிக்³க³ஹணத்தா²ய வுத்தம், நாஸதி. தம் பனாதி பதிதரஜம் அப்படிக்³க³ஹேத்வா உபரி க³ஹிதபிண்ட³பாதம். அனாபத்தீதி து³ருபசிண்ணாதி³தோ³ஸோ நத்தி². ‘‘அனுபஸம்பன்னஸ்ஸ த³ஸ்ஸாமீ’’திஆதி³பி வினயது³க்கடபரிஹாராய வுத்தம். ததா² அகத்வா க³ஹிதேபி படிக்³க³ஹேத்வா பரிபு⁴ஞ்ஜதோ அனாபத்தி ஏவ. ‘‘அனுபஸம்பன்னஸ்ஸ த³த்வா’’தி இத³ம்பி புரிமாபோ⁴கா³னுகு³ணதாய வுத்தம்.

சருகேனாதி கு²த்³த³கபா⁴ஜனேன. அபி⁴ஹடத்தாதி தி³ய்யமானக்க²ணம் ஸந்தா⁴ய வுத்தம். த³த்வா அபனயனகாலே பன சா²ரிகா வா பி³ந்தூ³னி வா பதந்தி, புன படிக்³க³ஹேதப்³ப³ம் அபி⁴ஹாரஸ்ஸ விக³தத்தாதி வத³ந்தி. தம் யதா² ந பததி, ததா² அபனேஸ்ஸாமீதி பரிஹரந்தே யுஜ்ஜதி. பகதிஸஞ்ஞாய அபனேந்தே அபி⁴ஹாரோ ந சி²ஜ்ஜதி, தம் படிக்³க³ஹிதமேவ ஹோதி. முக²வட்டியாபி க³ஹேதும் வட்டதீதி அபி⁴ஹரியமானஸ்ஸ பத்தஸ்ஸ முக²வட்டியா உபரிபா⁴கே³ ஹத்த²ம் பஸாரேத்வா பு²ஸிதும் வட்டதி.

பாதே³ன பேல்லேத்வாதி ‘‘பாதே³ன படிக்³க³ஹேஸ்ஸாமீ’’திஸஞ்ஞாய அக்கமித்வா. கேசீதி அப⁴யகி³ரிவாஸினோ. வசனமத்தமேவாதி படிப³த்³த⁴ப்படிப³த்³த⁴ந்தி ஸத்³த³மத்தமேவ நானம், காயபடிப³த்³த⁴மேவ ஹோதி. தஸ்மா தேஸம் வசனம் ந க³ஹேதப்³ப³ந்தி அதி⁴ப்பாயோ.

தேன ஆஹராபேதுந்தி யஸ்ஸ பி⁴க்கு²னோ ஸந்திகம் க³தம், தம் இத⁴ ஆனேஹீதி ஆணாபேத்வா தேன ஆஹராபேதும் இதரஸ்ஸ வட்டதீதி அத்தோ². ந ததோ பரந்தி தத³ஹேவ ஸாமம் அப்படிக்³க³ஹிதம் ஸந்தா⁴ய வுத்தம். தத³ஹேவ படிக்³க³ஹிதம் பன புனதி³வஸாதீ³ஸு அப்படிக்³க³ஹேத்வாபி பரிபு⁴ஞ்ஜிதும் வட்டதீதி வத³ந்தி.

கி²ய்யந்தீதி க²யம் க³ச்ச²ந்தி, தேஸம் சுண்ணேஹி து²ல்லச்சயஅப்படிக்³க³ஹணாபத்தியோ ந ஹோந்தீதி அதி⁴ப்பாயோ. ‘‘நவஸமுட்டி²த’’ந்தி ஏதேனேவ உச்சு²ஆதீ³ஸு அபி⁴னவலக்³க³த்தா அப்³போ³ஹாரிகம் ந ஹோதீதி த³ஸ்ஸேதி. ஏஸேவ நயோதி ஸன்னிதி⁴தோ³ஸாதி³ம் ஸந்தா⁴ய வத³தி. தேனாஹ ‘‘ந ஹீ’’திஆதி³. தேன ச படிக்³க³ஹணங்கே³ஸு பஞ்சஸுபி ஸமித்³தே⁴ஸு அஜ்ஜோ²ஹரிதுகாமதாய க³ஹிதமேவ படிக்³க³ஹிதம் நாம ஹோதி அஜ்ஜோ²ஹரிதப்³பே³ஸு ஏவ படிக்³க³ஹணஸ்ஸ அனுஞ்ஞாதத்தாதி த³ஸ்ஸேதி. ததா² பா³ஹிரபரிபோ⁴க³த்தா²ய க³ஹேத்வா ட²பிததேலாதி³ம் அஜ்ஜோ²ஹரிதுகாமதாய ஸதி படிக்³க³ஹேத்வா பரிபு⁴ஞ்ஜிதும் வட்டதி.

கேஸஞ்சீதிஆதீ³ஸு அனுபஸம்பன்னானம் அத்தா²ய கத்த²சி ட²பியமானம்பி ஹத்த²தோ முத்தமத்தே ஏவ படிக்³க³ஹணம் ந விஜஹதி, அத² கோ² பா⁴ஜனே பதிதமேவ படிக்³க³ஹணம் விஜஹதி. பா⁴ஜனஞ்ச பி⁴க்கு²னா புனதி³வஸத்தா²ய அபேக்கி²தமேவாதி தக்³க³தம்பி ஆமிஸம் து³த்³தோ⁴தபத்தக³தம் விய படிக்³க³ஹணம் ந விஜஹதீதி ஆஸங்காய ‘‘ஸாமணேரஸ்ஸ ஹத்தே² பக்கி²பிதப்³ப³’’ந்தி வுத்தந்தி வேதி³தப்³ப³ம். ஈதி³ஸேஸு ஹி யுத்தி ந க³வேஸிதப்³பா³, வுத்தனயேனேவ படிபஜ்ஜிதப்³ப³ம். ‘‘பத்தக³தா யாகூ³’’தி இமினா பத்தமுக²வட்டியா பு²ட்டே²பி கூடே யாகு³ படிக்³க³ஹிதா, உக்³க³ஹிதா வா ந ஹோதி பி⁴க்கு²னோ அனிச்சா²ய பு²ட்ட²த்தாதி த³ஸ்ஸேதி. ஆரோபேதீதி ஹத்த²ம் பு²ஸாபேதி. படிக்³க³ஹணூபக³ம் பா⁴ரம் நாம மஜ்ஜி²மஸ்ஸ புரிஸஸ்ஸ உக்கே²பாரஹம். ந பித³ஹிதப்³ப³ந்தி ஹத்த²தோ முத்தம் ஸந்தா⁴ய வுத்தம், ஹத்த²க³தம் பன இதரேன ஹத்தே²ன பித³ஹதோ, ஹத்த²தோ முத்தம்பி வா அபு²ஸித்வா உபரிபிதா⁴னம் பாதேந்தஸ்ஸ ந தோ³ஸோ.

படிக்³க³ண்ஹாதீதி சா²யத்தா²ய உபரி தா⁴ரயமானா மஹாஸாகா² யேன கேனசி சி²ஜ்ஜேய்ய, தத்த² லக்³க³ரஜம் முகே² பாதேய்ய சாதி கப்பியம் காராபேத்வா படிக்³க³ண்ஹாதி. குண்ட³கேதி மஹாக⁴டே. தஸ்மிம்பீதி சாடிக⁴டேபி. கா³ஹாபேத்வாதி அப்படிக்³க³ஹிதம் காலிகம் கா³ஹாபேத்வா.

து³தியத்தே²ரஸ்ஸாதி ‘‘தே²ரஸ்ஸ பத்தம் மய்ஹம் தே³தா²’’தி தேன அத்தனோ பரிச்சஜாபேத்வா து³தியத்தே²ரஸ்ஸ தே³தி. ஏத்த² பனாதி பத்தபரிவத்தனே. காரணந்தி ஏத்த² யதா² ‘‘ஸாமணேரா இதோ அம்ஹாகம்பி தே³ந்தீ’’தி விதக்கோ உப்பஜ்ஜதி, ந ததா²தி காரணம் வத³ந்தி, தஞ்ச யுத்தம். யஸ்ஸ பன தாதி³ஸோ விதக்கோ நத்தி², தேன அபரிவத்தேத்வாபி பு⁴ஞ்ஜிதும் வட்டதி.

நிச்சாலேதுந்தி சாலேத்வா பாஸாணஸக்க²ராதி³அபனயம் காதும். உத்³த⁴னம் ஆரோபேதப்³ப³ந்தி அனக்³கி³கம் உத்³த⁴னம் ஸந்தா⁴ய வுத்தம். உத்³த⁴னே பச்சமானஸ்ஸ ஆலுளனே உபரி அபக்கதண்டு³லா ஹேட்டா² பவிஸித்வா பச்சதீதி ஆஹ ‘‘ஸாமம்பாகஞ்சேவ ஹோதீ’’தி.

ஆதா⁴ரகே பத்தோ ட²பிதோதி அப்படிக்³க³ஹிதாமிஸோ பத்தோ புன படிக்³க³ஹணத்தா²ய ட²பிதோ. ஏகக்³க³ஹணேனேவாதி ஸாமணேரானம் க³ஹிதஸ்ஸ புன அச்ச²ட்³ட³னவஸேன க³ஹணேன. பு⁴ஞ்ஜிதும் வட்டதீதி தூ⁴மவட்டியா தத³ஹுபடிக்³க³ஹிதத்தா வுத்தம். ப⁴த்துக்³கா³ரோதிஆதி³ அப்³போ³ஹாரிகப்பஸங்கே³ன விகாலபோ⁴ஜனவினிச்ச²யத³ஸ்ஸனம். ஸமுத்³தோ³த³கேனாதி அப்படிக்³க³ஹிதேன. ஹிமகரகா நாம கதா³சி வஸ்ஸோத³கேன ஸஹ பதனகா பாஸாணலேகா² விய க⁴னீபூ⁴தஉத³கவிஸேஸா, தேஸு படிக்³க³ஹணகிச்சம் நத்தி². தேனாஹ ‘‘உத³கக³திகா ஏவா’’தி. புரேப⁴த்தமேவ வட்டதீதி அப்படிக்³க³ஹிதாபத்தீஹி அப்³போ³ஹாரிகம்பி விகாலபோ⁴ஜனாபத்தீஹி ஸப்³போ³ஹாரிகந்தி த³ஸ்ஸேதி.

லக்³க³தீதி முகே² ச ஹத்தே² ச மத்திகாவண்ணம் த³ஸ்ஸேதி. ப³ஹலந்தி ஹத்த²முகே²ஸு அலக்³க³னகம்பி படிக்³க³ஹேதப்³ப³ம். வாஸமத்தந்தி ரேணுகீ²ராபா⁴வம் த³ஸ்ஸேதி. ஆகிரதி படிக்³க³ஹேதப்³ப³ந்தி புப்ப²ரஸஸ்ஸ பஞ்ஞாயனதோ வுத்தம்.

மஹாபூ⁴தேஸூதி பாணஸரீரஸன்னிஸ்ஸிதேஸு பத²வீஆதி³மஹாபூ⁴தேஸு. ஸப்³ப³ம் வட்டதீதி அத்தனோ, பரேஸஞ்ச ஸரீரனிஸ்ஸிதம் ஸப்³ப³ம் வட்டதி. அகப்பியமம்ஸானுலோமதாய து²ல்லச்சயாதி³ம் ந ஜனேதீதி அதி⁴ப்பாயோ. பததீதி அத்தனோ ஸரீரதோ விச்சி²ந்தி³த்வா பததி. ‘‘ருக்க²தோ சி²ந்தி³த்வா’’தி வுத்தத்தா மத்திகத்தா²ய பத²விம் க²ணிதும், அஞ்ஞம்பி யம்கிஞ்சி மூலபண்ணாதி³விஸபே⁴ஸஜ்ஜம் சி²ந்தி³த்வா சா²ரிகம் அகத்வாபி அப்படிக்³க³ஹிதம்பி பரிபு⁴ஞ்ஜிதும் வட்டதீதி த³ட்ட²ப்³ப³ம். அப்படிக்³க³ஹிததா, அனனுஞ்ஞாததா, தூ⁴மாதி³அப்³போ³ஹாரிகதாபா⁴வோ, அஜ்ஜோ²ஹரணந்தி இமானேத்த² சத்தாரி அங்கா³னி.

த³ந்தபோனஸிக்கா²பத³வண்ணனா நிட்டி²தா.

நிட்டி²தோ போ⁴ஜனவக்³கோ³ சதுத்தோ².