3. ஓவாத³வக்³கோ³

1. ஓவாத³ஸிக்கா²பத³வண்ணனா

144. ததியவக்³க³ஸ்ஸ பட²மே திரச்சா²னபூ⁴தந்தி திரோகரணபூ⁴தம், பா³ஹிரபூ⁴தந்தி அத்தோ². ஸமித்³தோ⁴தி பரிபுண்ணோ. ஸஹிதத்தோ² அத்த²யுத்தோ. அத்த²க³ம்பீ⁴ரதாதி³னா க³ம்பீ⁴ரோ.

145-147. பரதோதி உத்தரி. கரோந்தோவாதி பரிபா³ஹிரே கரோந்தோ. விப⁴ங்கே³தி ஜா²னவிப⁴ங்கே³. சரணந்தி நிப்³பா³னக³மனாய பாத³ம்.

யத³ஸ்ஸாதி யம் அஸ்ஸ. தா⁴ரேதீதி அவினஸ்ஸமானம் தா⁴ரேதி. பரிகத²னத்த²ந்தி பகிண்ணககதா²வஸேன பரிச்சி²ன்னத⁴ம்மகத²னத்த²ம். திஸ்ஸோ அனுமோத³னாதி ஸங்க⁴ப⁴த்தாதீ³ஸு தா³னானிஸம்ஸப்படிஸம்யுத்தா நிதி⁴குண்ட³ஸுத்தாதி³ (கு². பா. 8.1 ஆத³யோ) -அனுமோத³னா, கே³ஹப்பவேஸமங்க³லாதீ³ஸு மங்க³லஸுத்தாதி³ (கு². பா. 5.1 ஆத³யோ; ஸு. நி. மங்க³லஸுத்த) -அனுமோத³னா, மதகப⁴த்தாதி³அமங்க³லேஸு திரோகுட்டாதி³ (கு². பா. 7.1 ஆத³யோ; பே. வ. 14 ஆத³யோ) -அனுமோத³னாதி இமா திஸ்ஸோ அனுமோத³னா. கம்மாகம்மவினிச்ச²யோதி பரிவாராவஸானே கம்மவக்³கே³ (பரி. 482 ஆத³யோ) வுத்தவினிச்ச²யோ. ஸமாதி⁴வஸேனாதி ஸமத²புப்³ப³கவஸேன. விபஸ்ஸனாவஸேன வாதி தி³ட்டி²விஸுத்³தி⁴ஆதி³காய ஸுக்க²விபஸ்ஸனாய வஸேன. அத்தனோ ஸீலரக்க²ணத்த²ம் அபரானபேக்க²தாய யேன காமம் க³ந்தும் சதஸ்ஸோ தி³ஸா அரஹதி, அஸ்ஸ வா ஸந்தி, தாஸு வா ஸாதூ⁴தி சாதுத்³தி³ஸோ.

அபி⁴வினயேதி பாதிமோக்க²ஸம்வரஸங்கா²தே ஸம்வரவினயே, தப்பகாஸகே வா வினயபிடகே. வினேதுந்தி ஸிக்கா²பேதும் பகாஸேதும். பகு³ணா வாசுக்³க³தாதி பாட²தோ ச அத்த²தோ ச பகு³ணா முகே² ஸன்னிதா⁴பனவஸேன வாசுக்³க³தா காதப்³பா³. அத்த²மத்தவஸேனபேத்த² யோஜனம் கரோந்தி. அபி⁴த⁴ம்மேதி லக்க²ணரஸாதி³வஸேன பரிச்சி²ன்னே நாமரூபத⁴ம்மே. புப்³பே³ கிர மஹாதே²ரா பரியத்திஅனந்தரதா⁴னாய ஏகேகஸ்ஸ க³ணஸ்ஸ தீ³க⁴னிகாயாதி³ஏகேகத⁴ம்மகோட்டா²ஸம் நிய்யாதேந்தா ‘‘தும்ஹே ஏதம் பாளிதோ ச அட்ட²கதா²தோ ச பரிஹரத², ஸக்கோந்தா உத்தரிபி உக்³க³ண்ஹதா²’’தி ஏவம் ஸகலத⁴ம்மம் க³ந்த²வஸேன நிய்யாதேந்தி, தத்த² தே ச பி⁴க்கூ² க³ந்த²னாமேன தீ³க⁴பா⁴ணகா மஜ்ஜி²மபா⁴ணகாதி வோஹரீயந்தி, தே ச அத்தனோ பா⁴ரபூ⁴தம் கோட்டா²ஸம் பரிச்சஜித்வா அஞ்ஞம் உக்³க³ஹேதும் ந லப⁴ந்தி. தம் ஸந்தா⁴யாஹ ‘‘ஸசே மஜ்ஜி²மபா⁴ணகோ ஹோதீ’’திஆதி³.

தத்த² ஹேட்டி²மா வா தயோ வக்³கா³தி மஹாவக்³க³தோ ஹேட்டி²மா ஸகா³த²கவக்³கோ³ (ஸம். நி. 1.1 ஆத³யோ), நிதா³னவக்³கோ³ (ஸம். நி. 2.1 ஆத³யோ), க²ந்த⁴வக்³கோ³தி (ஸம். நி. 3.1 ஆதி³யோ) இமே தயோ வக்³கா³. திகனிபாததோ பட்டா²ய ஹேட்டா²தி ஏககனிபாதது³கனிபாதே ஸந்தா⁴ய வுத்தம். த⁴ம்மபத³ம்பி ஸஹ வத்து²னா ஜாதகபா⁴ணகேன அத்தனோ ஜாதகேன ஸத்³தி⁴ம் உக்³க³ஹேதப்³ப³ம். ததோ ஓரம் ந வட்டதீதி மஹாபச்சரிவாத³ஸ்ஸ அதி⁴ப்பாயோ. ததோ ததோதி தீ³க⁴னிகாயாதி³தோ. உச்சினித்வா உக்³க³ஹிதம் ஸத்³த⁴ம்மஸ்ஸ டி²தியா, பி⁴க்கு²னோபி புப்³பா³பரானுஸந்தி⁴ஆதி³குஸலதாய ச ந ஹோதீதி ‘‘தம் ந வட்டதீ’’தி படிக்கி²த்தம். அபி⁴த⁴ம்மே கிஞ்சி உக்³க³ஹேதப்³ப³ந்தி ந வுத்தந்தி ஏத்த² யஸ்மா வினயே குஸலத்திகாதி³விபா⁴கோ³, ஸுத்தந்தேஸு ஸமத²விபஸ்ஸனாமக்³கோ³ ச அபி⁴த⁴ம்மபாட²ம் வினா ந விஞ்ஞாயதி, அந்த⁴காரே பவிட்ட²காலோ விய ஹோதி, தஸ்மா ஸுத்தவினயானம் க³ஹணவஸேன அபி⁴த⁴ம்மக்³க³ஹணம் வுத்தமேவாதி விஸும் ந வுத்தந்தி வேதி³தப்³ப³ம். யதா² ‘‘போ⁴ஜனம் பு⁴ஞ்ஜிதப்³ப³’’ந்தி வுத்தே ‘‘ப்³யஞ்ஜனம் கா²தி³தப்³ப³’’ந்தி அவுத்தம்பி வுத்தமேவ ஹோதி தத³வினாபா⁴வதோ, ஏவம்ஸம்பத³மித³ம் த³ட்ட²ப்³ப³ம்.

பரிமண்ட³லபத³ப்³யஞ்ஜனாயாதி பரிமண்ட³லானி பரிபுண்ணானி பதே³ஸு ஸிதி²லத⁴னிதாதி³ப்³யஞ்ஜனானி யஸ்ஸம், தாய. புரஸ்ஸ ஏஸாதி போரீ, நக³ரவாஸீனம் கதா²தி அத்தோ². அனேலக³ளாயாதி ஏத்த² ஏலாதி கே²ளம் தக்³க³ளனவிரஹிதாய. கல்யாணவாக்கரணோதி ஏத்த² வாசா ஏவ வாக்கரணம், உதா³ஹரணகோ⁴ஸோ. கல்யாணம் மது⁴ரம் வாக்கரணமஸ்ஸாதி கல்யாணவாக்கரணோ. உபஸம்பன்னாய மேது²னேனேவ அப⁴ப்³போ³ ஹோதி, ந ஸிக்க²மானாஸாமணேரீஸூதி ஆஹ ‘‘பி⁴க்கு²னியா காயஸம்ஸக்³க³ம் வா’’திஆதி³.

148. க³ருகேஹீதி க³ருகப⁴ண்டே³ஹி. ஏகதோஉபஸம்பன்னாயாதி உபயோக³த்தே² பு⁴ம்மவசனம். பி⁴க்கூ²னம் ஸந்திகே உபஸம்பன்னா நாம பரிவத்தலிங்கா³ வா பஞ்சஸதஸாகியானியோ வா. ஏதா பன ஏகதோஉபஸம்பன்னா ஓவத³ந்தஸ்ஸ பாசித்தியமேவ.

149. ந நிமந்திதா ஹுத்வா க³ந்துகாமாதி நிமந்திதா ஹுத்வா போ⁴ஜனபரியோஸானே க³ந்துகாமா ந ஹோந்தி, தத்தே²வ வஸிதுகாமா ஹோந்தீதி அத்தோ². யதோதி பி⁴க்கு²னுபஸ்ஸயதோ. யாசித்வாதி ‘‘தும்ஹேஹி ஆனீதஓவாதே³னேவ மயம்பி வஸிஸ்ஸாமா’’தி யாசித்வா. தத்தா²தி தஸ்மிம் பி⁴க்கு²னுபஸ்ஸயே. அபி⁴க்கு²காவாஸே வஸ்ஸம் வஸந்தியா பாசித்தியம், அபக³ச்ச²ந்தியா து³க்கடம்.

இமாஸு கதராபத்தி பரிஹரிதப்³பா³தி சோத³னம் பரிஹரந்தோ ஆஹ ‘‘ஸா ரக்கி²தப்³பா³’’தி. ஸா வஸ்ஸானுக³மனமூலிகா ஆபத்தி ரக்கி²தப்³பா³, இதராய அனாபத்திகாரணம் அத்தீ²தி அதி⁴ப்பாயோ. தேனாஹ ‘‘ஆபதா³ஸு ஹீ’’திஆதி³.

ஓவாத³த்தா²யாதி ஓவாதே³ யாசனத்தா²ய. த்³வே திஸ்ஸோதி த்³வீஹி தீஹி, கரணத்தே² சேதம் பச்சத்தவசனம். பாஸாதி³கேனாதி பஸாத³ஜனகேன காயகம்மாதி³னா. ஸம்பாதே³தூதி திவித⁴ம் ஸிக்க²ம் ஸம்பாதே³து. அஸம்மததா, பி⁴க்கு²னியா பரிபுண்ணூபஸம்பன்னதா, ஓவாத³வஸேன அட்ட²க³ருத⁴ம்மதா³னந்தி இமானேத்த² தீணி அங்கா³னி.

ஓவாத³ஸிக்கா²பத³வண்ணனா நிட்டி²தா.

2. அத்த²ங்க³தஸிக்கா²பத³வண்ணனா

153. து³தியே கோகனத³ந்தி பது³மவிஸேஸம், தம் கிர ப³ஹுபத்தம் வண்ணஸம்பன்னம். அயஞ்ஹேத்த² அத்தோ² – யதா² கோகனத³ஸங்கா²தம் பது³மம், ஏவம் பு²ல்லமுக²பது³மம் அவீதகு³ணக³ந்த⁴ம் நிம்மலே அந்தலிக்கே² ஆதி³ச்சம் விய ச அத்தனோ தேஜஸா தபந்தம் ததோ ஏவ விரோசமானம் அங்கே³ஹி நிச்ச²ரணகஜுதியா அங்கீ³ரஸம் ஸம்மாஸம்பு³த்³த⁴ம் பஸ்ஸாதி. ரஜோஹரணந்தி ஸரீரே ரஜம் புஞ்ச²தீதி ரஜோஹரணந்தி புஞ்ச²னசோளஸ்ஸ நாமம். ஓபா⁴ஸவிஸ்ஸஜ்ஜனபுப்³ப³கா பா⁴ஸிதகா³தா² ஓபா⁴ஸகா³தா² நாம. விஸுத்³தி⁴மக்³கா³தீ³ஸு (விஸுத்³தி⁴. 2.386) பன ‘‘ராகோ³ ரஜோ ந ச பன ரேணு வுச்சதீ’’திஆதி³ ஓபா⁴ஸகா³தா² வுத்தா, ந பனேஸா ‘‘அதி⁴சேதஸோ’’தி கா³தா². அயஞ்ச சூளபந்த²கத்தே²ரஸ்ஸ உதா³னகா³தா²தி உதா³னபாளியம் நத்தி², ஏகுதா³னியத்தே²ரஸ்ஸ (தே²ரகா³. 1.67 ஏகுதா³னியத்தே²ரகா³தா²வண்ணனா) நாயம் உதா³னகா³தா²தி தத்த² வுத்தம். இத⁴ பன பாளியா ஏவ வுத்தத்தா தே²ரஸ்ஸாபி உதா³னகா³தா²தி க³ஹேதப்³ப³ம். இத⁴ ச அக³ருத⁴ம்மேனாபி ஓவத³தோ பாசித்தியமேவ. அத்த²ங்க³தஸூரியதா, பரிபுண்ணூபஸம்பன்னதா, ஓவத³னந்தி இமானேத்த² தீணி அங்கா³னி.

அத்த²ங்க³தஸிக்கா²பத³வண்ணனா நிட்டி²தா.

3. பி⁴க்கு²னுபஸ்ஸயஸிக்கா²பத³வண்ணனா

162. ததியம் உத்தானமேவ. உபஸ்ஸயூபக³மனம், பரிபுண்ணூபஸம்பன்னதா, ஸமயாபா⁴வோ, க³ருத⁴ம்மேஹி ஓவத³னந்தி இமானேத்த² சத்தாரி அங்கா³னி.

பி⁴க்கு²னுபஸ்ஸயஸிக்கா²பத³வண்ணனா நிட்டி²தா.

4. ஆமிஸஸிக்கா²பத³வண்ணனா

164. சதுத்தே² ஆமிஸனிரபேக்க²ம்பி ஆமிஸஹேது ஓவத³தீதிஸஞ்ஞாய ப⁴ணந்தஸ்ஸபி அனாபத்தி ஸசித்தகத்தா ஸிக்கா²பத³ஸ்ஸ. ஸேஸமேத்த² உத்தானமேவ. உபஸம்பன்னதா, த⁴ம்மேன லத்³த⁴ஸம்முதிதா, அனாமிஸந்தரதா, அவண்ணகாமதாய ஏவம் ப⁴ணனந்தி இமானேத்த² சத்தாரி அங்கா³னி.

ஆமிஸஸிக்கா²பத³வண்ணனா நிட்டி²தா.

169. பஞ்சமம் சீவரதா³னஸிக்கா²பத³ம் உத்தானமேவ.

6. சீவரஸிப்³ப³னஸிக்கா²பத³வண்ணனா

176. ச²ட்டே² கதி²னவத்தந்தி கதி²னமாஸே சீவரம் கரோந்தானம் ஸப்³ரஹ்மசாரீனம் ஸஹாயபா⁴வூபக³மனம் ஸந்தா⁴ய வுத்தம். வஞ்சேத்வாதி ‘‘தவ ஞாதிகாயா’’தி அவத்வா ‘‘ஏகிஸ்ஸா பி⁴க்கு²னியா’’தி ஏத்தகமேவ வத்வா ‘‘ஏகிஸ்ஸா பி⁴க்கு²னியா’’தி ஸுத்வா தே அஞ்ஞாதிகஸஞ்ஞினோ அஹேஸுந்தி ஆஹ ‘‘அகப்பியே நியோஜிதத்தா’’தி. அஞ்ஞாதிகாய பி⁴க்கு²னியா ஸந்தகதா, நிவாஸனபாருபனூபக³தா, வுத்தனயேன ஸிப்³ப³னம் வா ஸிப்³பா³பனம் வாதி இமானேத்த² தீணி அங்கா³னி.

சீவரஸிப்³ப³னஸிக்கா²பத³வண்ணனா நிட்டி²தா.

7. ஸம்விதா⁴னஸிக்கா²பத³வண்ணனா

183. ஸத்தமே பாளியம் க³ச்சா²ம ப⁴கி³னி க³ச்சா²மாய்யாதி பி⁴க்கு²புப்³ப³கம் ஸம்விதா⁴னம், இதரம் பி⁴க்கு²னிபுப்³ப³கம். ஏகத்³தா⁴னமக்³க³ந்தி ஏகதோ அத்³தா⁴னஸங்கா²தம் மக்³க³ம். ஹிய்யோதி ஸுவே. பரேதி ததியே தி³வஸே.

த்³விதா⁴ வுத்தப்பகாரோதி பாத³க³மனே பக்க²க³மனேதி த்³விதா⁴ வுத்தப்பகாரோ. உபசாரோ ந லப்³ப⁴தீதி யோ பரிக்கி²த்தாதி³கா³மஸ்ஸ ஏகலேட்³டு³பாதாதி³உபசாரோ வுத்தோ, ஸோ இத⁴ ந லப்³ப⁴தி ஆஸன்னத்தா. ஏதேன ச அந்தரக⁴ரேயேவேத்த² கா³மோதி அதி⁴ப்பேதோ, ந ஸகலம் கா³மகே²த்தம். தத்தா²பி யத்த² உபசாரோ லப்³ப⁴தி, தத்த² உபசாரோக்கமனே ஏவ ஆபத்தீதி த³ஸ்ஸேதி. தேனாஹ ‘‘ரதனமத்தந்தரோ’’திஆதி³. உபசாரோக்கமனஞ்சேத்த² உபசாரப்³ப⁴ந்தரே பவிஸனமேவ ஹோதி. தத்த² அப்பவிஸித்வாபி உபசாரதோ ப³ஹி அத்³த⁴யோஜனப்³ப⁴ந்தரக³தேன மக்³கே³ன க³ச்ச²ந்தோபி மக்³க³ஸ்ஸ த்³வீஸு பஸ்ஸேஸு அத்³த⁴யோஜனப்³ப⁴ந்தரக³தம் கா³மூபசாரம் ஸப்³ப³ம் ஓக்கமித்வா க³ச்ச²திச்சேவ வுச்சதி. அத்³த⁴யோஜனதோ ப³ஹி க³தேன மக்³கே³ன க³ச்ச²ந்தோ ந கா³மூபசாரக³ணனாய காரேதப்³போ³, அத்³த⁴யோஜனக³ணனாயேவ காரேதப்³போ³. ஏவஞ்ச ஸதி அனந்தரஸிக்கா²பதே³ நாவாயேவ கா³மதீரபஸ்ஸேன க³ச்ச²ந்தஸ்ஸ கா³மூபசாரக³ணனாய ஆபத்தி ஸமத்தி²தா ஹோதி. ந ஹி ஸக்கா நாவாய கா³மூபசாரப்³ப⁴ந்தரே பவிஸிதும். திண்ணம் மக்³கா³னம் ஸம்ப³ந்த⁴ட்டா²னம் ஸிங்கா⁴டகம். ஏத்த²ந்தரே ஸம்வித³ஹிதேதி ஏத்த² ந கேவலம் யதா²வுத்தரதி²காதீ³ஸு ஏவ ஸம்வித³ஹனே து³க்கடம், அந்தராமக்³கே³பீதி அதி⁴ப்பாயோ.

அத்³த⁴யோஜனம் அதிக்கமந்தஸ்ஸாதி அஸதி கா³மே அத்³த⁴யோஜனம் அதிக்கமந்தஸ்ஸ. யஸ்மிஞ்ஹி கா³மகே²த்தபூ⁴தேபி அரஞ்ஞே அத்³த⁴யோஜனப்³ப⁴ந்தரே கா³மோ ந ஹோதி, தம்பி இத⁴ அகா³மகம் அரஞ்ஞந்தி அதி⁴ப்பேதம், ந விஞ்ஜா²டவாத³யோ.

185. ரட்ட²பே⁴தே³தி ரட்ட²விலோபே. சக்கஸமாருள்ஹாதி இரியாபத²சக்கம், ஸகடசக்கம் வா ஸமாருள்ஹா. த்³வின்னம்பி ஸம்வித³ஹித்வா மக்³க³ப்படிபத்தி, அவிஸங்கேதம், ஸமயாபா⁴வோ, அனாபதா³, கா³மந்தரோக்கமனம் வா அத்³த⁴யோஜனாதிக்கமோ வாதி இமானேத்த² பஞ்ச அங்கா³னி. ஏகதோஉபஸம்பன்னாதீ³ஹி ஸத்³தி⁴ம் ஸம்விதா⁴ய க³ச்ச²ந்தஸ்ஸ பன மாதுகா³மஸிக்கா²பதே³ன ஆபத்தி.

ஸம்விதா⁴னஸிக்கா²பத³வண்ணனா நிட்டி²தா.

8. நாவாபி⁴ருஹனஸிக்கா²பத³வண்ணனா

189. அட்ட²மே ஏகம் தீரம்…பே… நிரந்தரந்தி நதி³தோ அத்³த⁴யோஜனப்³ப⁴ந்தரே பதே³ஸே நிவிட்ட²கா³மேஹி நிரந்தரதா வுத்தா. ஏகம் அகா³மகம் அரஞ்ஞந்தி ததா² நிவிட்ட²கா³மாபா⁴வேன வுத்தம். அகா³மகதீரபஸ்ஸேனாதிஆதி³ பன அதிரேகஅத்³த⁴யோஜனவித்த²தம் நதி³ம் ஸந்தா⁴ய வுத்தம். ததோ ஊனவித்தா²ராய ஹி நதி³யா மஜ்ஜே²னாபி க³மனே தீரத்³வயஸ்ஸாபி அத்³த⁴யோஜனப்³ப⁴ந்தரே க³தத்தா கா³மந்தரக³ணனாய, அத்³த⁴யோஜனக³ணனாய ச ஆபத்தியோ பரிச்சி²ந்தி³தப்³பா³. தேனேவ ‘‘யோஜனவித்த²தா…பே… அத்³த⁴யோஜனக³ணனாய பாசித்தியானீ’’தி வுத்தம். தேனேவ ஹி யோஜனதோ ஊனாய நதி³யா அத்³த⁴யோஜனப்³ப⁴ந்தரக³ததீரவஸேனேவ ஆபத்திக³ணனம் வுத்தமேவ ஹோதி. ‘‘ஸப்³ப³அட்ட²கதா²ஸூ’’திஆதி³னா வுத்தமேவத்த²ம் ஸமத்தே²தி. தத்த² கிஞ்சாபி ஸமுத்³த³தளாகாதீ³ஸு பாசித்தியம் ந வுத்தம், ததா²பி கீளாபுரேக்கா²ரஸ்ஸ தத்த² து³க்கடமேவாதி க³ஹேதப்³ப³ம், பட²மம் கீளாபுரேக்கா²ரஸ்ஸாபி பச்சா² நாவாய நித்³து³பக³தஸ்ஸ, யோனிஸோ வா மனஸி கரோந்தஸ்ஸ கா³மந்தரோக்கமனாதீ³ஸுபி ஆபத்திஸம்ப⁴வதோ பண்ணத்திவஜ்ஜதா, திசித்ததா சஸ்ஸ ஸிக்கா²பத³ஸ்ஸ வுத்தாதி வேதி³தப்³ப³ம். ஸேஸம் ஸுவிஞ்ஞேய்யமேவ.

நாவாபி⁴ருஹனஸிக்கா²பத³வண்ணனா நிட்டி²தா.

9. பரிபாசிதஸிக்கா²பத³வண்ணனா

197. நவமே பாளியம் ‘‘ஸிக்க²மானா…பே… பஞ்ச போ⁴ஜனானி ட²பேத்வா ஸப்³ப³த்த² அனாபத்தீ’’தி இத³ம் இமினா ஸிக்கா²பதே³ன அனாபத்திம் ஸந்தா⁴ய வுத்தம். பஞ்சஹி ஸஹத⁴ம்மிகேஹி கதவிஞ்ஞத்திபரிகதா²தீ³ஹி உப்பன்னம் பரிபு⁴ஞ்ஜந்தஸ்ஸ து³க்கடமேவ. பி⁴க்கு²னியா பரிபாசிததா, ததா² ஜானனம், கி³ஹிஸமாரம்பா⁴பா⁴வோ, போ⁴ஜனதா, தஸ்ஸ அஜ்ஜோ²ஹரணந்தி இமானேத்த² பஞ்ச அங்கா³னி.

பரிபாசிதஸிக்கா²பத³வண்ணனா நிட்டி²தா.

10. ரஹோனிஸஜ்ஜஸிக்கா²பத³வண்ணனா

198. த³ஸமே உபனந்த³ஸ்ஸ சதுத்த²ஸிக்கா²பதே³னாதி மாதுகா³மேன ரஹோனிஸஜ்ஜஸிக்கா²பத³ம் ஸந்தா⁴ய வுத்தம், தம் பன அசேலகவக்³கே³ பஞ்சமம்பி உபனந்த³ம் ஆரப்³ப⁴ பஞ்ஞத்தேஸு சதுத்த²த்தா ஏவம் வுத்தந்தி த³ட்ட²ப்³ப³ம்.

ரஹோனிஸஜ்ஜஸிக்கா²பத³வண்ணனா நிட்டி²தா.

நிட்டி²தோ ஓவாத³வக்³கோ³ ததியோ.