9. து³தியது³ட்ட²தோ³ஸஸிக்கா²பத³வண்ணனா

391. நவமே மேத்தியம் பி⁴க்கு²னிந்தி லிங்க³னாஸனாய நாஸிதாயபி தஸ்ஸா பூ⁴தபுப்³ப³வோஹாரம் க³ஹேத்வா வுத்தம். அஞ்ஞபா⁴க³ஸ்ஸாதி தே²ரஸ்ஸ மனுஸ்ஸஜாதிபி⁴க்கு²பா⁴வதோ அஞ்ஞஸ்ஸ திரச்சா²னஜாதிச²க³லகபா⁴வஸங்கா²தஸ்ஸ கோட்டா²ஸஸ்ஸ. இத³ந்தி ஸாமஞ்ஞதோ நபும்ஸகலிங்கே³ன வுத்தம், அயம் ச²க³லகோதி அத்தோ². அஞ்ஞபா⁴கோ³தி யதா²வுத்ததிரச்சா²னஜாதிச²க³லகபா⁴வஸங்கா²தோ அஞ்ஞோ கோட்டா²ஸோ, அஞ்ஞபா⁴க³ஸ்ஸ இத³ந்தி அஞ்ஞபா⁴கி³யந்தி பட²மவிக்³க³ஹஸ்ஸ அத்தோ², அஞ்ஞபா⁴க³மத்தீ²தி து³தியவிக்³க³ஹஸ்ஸ, த்³வீஹிபி ச²க³லகோவ வுத்தோ. இதா³னி த்³வீஹிபி விக்³க³ஹேஹி வுத்தமேவத்த²ம் வித்தா²ரதோ த³ஸ்ஸேந்தோ ‘‘யோ ஹி ஸோ’’திஆதி³மாஹ. தத்த² யோ ஹி ஸோ ச²க³லகோ வுத்தோ, ஸோ அஞ்ஞஸ்ஸ பா⁴க³ஸ்ஸ ஹோதீதி ச அஞ்ஞபா⁴கி³யஸங்க்²யம் லப⁴தீதி ச யோஜனா. து³தியவிக்³க³ஹஸ்ஸ அத்த²ம் த³ஸ்ஸேதும் ‘‘ஸோ வா’’திஆதி³ வுத்தம். அதி⁴கரணந்தி வேதி³தப்³போ³தி ஏத்தா²பி யோ ஹி ஸோ ‘‘த³ப்³போ³ மல்லபுத்தோ நாமா’’தி ச²க³லகோ வுத்தோ, ஸோதி ஆனேத்வா ஸம்ப³ந்தி⁴தப்³ப³ம். தஞ்ஹி ஸந்தா⁴யாதி ‘‘த³ப்³போ³’’தி நாமகரணஸ்ஸ அதி⁴ட்டா²னபூ⁴தம் ச²க³லகம் ஸந்தா⁴ய. தே பி⁴க்கூ²தி தே அனுயுஞ்ஜந்தா பி⁴க்கூ². ஆபத்தியாபி புக்³க³லாதி⁴ட்டா²னத்தா ‘‘புக்³க³லானம்யேவ லேஸா’’தி வுத்தம்.

393. யா ச ஸா அவஸானே…பே… சோத³னா வுத்தாதி ‘‘பி⁴க்கு² ஸங்கா⁴தி³ஸேஸம் அஜ்ஜா²பஜ்ஜந்தோ தி³ட்டோ² ஹோதி ஸங்கா⁴தி³ஸேஸே ஸங்கா⁴தி³ஸேஸதி³ட்டி² ஹோதி, தஞ்சே பாராஜிகேன சோதே³தீ’’திஆதி³ம் (பாரா. 407) சோத³னாபே⁴த³ம் ஸந்தா⁴ய வத³தி. ஸத்தன்னம்பி ஆபத்தீனம் பச்சேகம் பாராஜிகத்தாதி³ஸாமஞ்ஞேபி மேது²னாதி³ன்னாதா³னாதி³வத்து²தோ, ராக³தோ³ஸத்தாதி³ஸபா⁴வதோ ச விஸபா⁴க³தாபி அத்தீ²தி ஆஹ ‘‘யஸ்மா பன…பே… ந ஹோதீ’’தி.

வுத்தனயேனேவாதி ‘‘ஸபா⁴க³விஸபா⁴க³வத்து²தோ’’திஆதி³னா (பாரா. அட்ட². 2.393) வுத்தனயேன. கம்மலக்க²ணம், தம்மனஸிகாரோ ச அவிபன்னகம்மஸ்ஸ நிமித்ததோ ப²லூபசாரேன கம்மந்தி வுச்சதீதி ஆஹ ‘‘தம் நிஸ்ஸாய உப்பஜ்ஜனதோ’’தி. பரிவாஸாதி³ம் நிஸ்ஸாய மானத்தாதீ³னம் உப்பஜ்ஜனதோ ‘‘புரிமம் புரிம’’ந்திஆதி³ வுத்தம்.

395. ஸவத்து²கம் கத்வாதி புக்³க³லாதி⁴ட்டா²னம் கத்வா. தீ³கா⁴தி³னோதி தீ³க⁴ரஸ்ஸாதி³லிங்க³ஸ்ஸ. தி³ட்டா²தி³னோதி தி³ட்ட²புப்³பா³தி³னோ.

408. ஏவம் ததா²ஸஞ்ஞீதி அஞ்ஞஸ்ஸ மேது²னாதி³கிரியம் தி³ஸ்வா ‘‘அயம் ஸோ’’தி ஏவம் ததா²ஸஞ்ஞீ. அங்கா³னி பட²மது³ட்ட²தோ³ஸே வுத்தஸதி³ஸானி, இத⁴ பன கிஞ்சிதே³ஸம் லேஸமத்தம் உபாதி³யனா அதி⁴கா.

து³தியது³ட்ட²தோ³ஸஸிக்கா²பத³வண்ணனா நிட்டி²தா.