10. பட²மஸங்க⁴பே⁴த³ஸிக்கா²பத³வண்ணனா

410. த³ஸமே ப³ஹூனந்தி து³ப்³ப³லதாய அரஞ்ஞாதி³ஸேவாய சித்தம் ஸமாஹிதம் காதும் அஸக்கோந்தானம். து³க்க²ஸ்ஸந்தகிரியாய தஸ்மிம் அத்தபா⁴வே பு³த்³த⁴வசனக்³க³ஹணதா⁴ரணாதி³ஸங்கா²தம் ப்³யஞ்ஜனபத³மேவ பரமம் அஸ்ஸ, ந மக்³க³லாபோ⁴தி பத³பரமோ. அபி⁴ஸம்பு⁴ணித்வாதி நிப்பா²தே³த்வா. த⁴ம்மதோ அபேதம் உத்³த⁴ம்மம். படிக்கி²த்தமேவாதி ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³’’ந்தி (மஹாவ. 204) வசனதோ வுத்தம், இத³மேவ வசனம் ஸந்தா⁴ய பாளியம்பி ‘‘அட்ட² மாஸே’’திஆதி³ (பாரா. 409) வுத்தம்.

தீஹி கோடீஹீதி அஸுத்³த⁴மூலேஹி. ஏத்த² ச பி⁴க்கூ²னம் சதூஸு குலேஸு பக்கபிண்டி³யாலோபபோ⁴ஜனனிஸ்ஸிததாய, மச்ச²மம்ஸபோ⁴ஜனவிரஹிதஸ்ஸ ச குலஸ்ஸ து³ல்லப⁴தாய தத்த² லத்³தே⁴ஸு ப⁴த்தப்³யஞ்ஜனேஸு மச்ச²மம்ஸஸம்ஸக்³க³ஸங்காய, து³ன்னிவாரணதாய ச பி⁴க்கூ²னம் ஸரீரயாபனம்பி ந ஸியாதி ப⁴க³வதா மச்ச²மம்ஸம் ஸப்³ப³தா² அப்படிக்கி²பித்வா தீஹி கோடீஹி அபரிஸுத்³த⁴மேவ படிக்கி²த்தம். யதி³ ஹி தம் ப⁴க³வா ஸப்³ப³தா² படிக்கி²பேய்ய, பி⁴க்கூ² மரமானாபி மச்சா²தி³ஸம்ஸக்³க³ஸங்கிதம் ப⁴த்தம் ந பு⁴ஞ்ஜேய்யும், ததோ தண்டு³லத⁴ஞ்ஞாதி³ம் படிக்³க³ஹேத்வா நித³ஹித்வா ஸயம் பசித்வா பு⁴ஞ்ஜிதும் தது³பகரணபூ⁴தம் தா³ஸிதா³ஸம், உது³க்க²லமுஸலாதி³கஞ்ச பி⁴க்கூ²னம் பத்தாதி³ விய அவஸ்ஸம் க³ஹேதும் அனுஜானிதப்³ப³ம் ஸியாதி தித்தி²யானம் விய க³ஹட்டா²வாஸோ ஏவ ஸியா, ந பி⁴க்கு²ஆவாஸோதி வேதி³தப்³ப³ம். ஜாலம் மச்ச²ப³ந்த⁴னம். வாகு³ரா மிக³ப³ந்த⁴னீ. கப்பதீதி யதி³ தேஸம் வசனேன ஸங்கா ந வத்ததி, வட்டதி, ந தம் வசனம் லேஸகப்பம் காதும் வட்டதி. தேனேவ வக்க²தி ‘‘யத்த² ச நிப்³பே³மதிகோ ஹோதி, தம் ஸப்³ப³ம் கப்பதீ’’தி.

பவத்தமம்ஸந்தி ஆபணாதீ³ஸு பவத்தம் விக்காயிகம் மதமம்ஸம். பி⁴க்கூ²னம்யேவ அத்தா²ய அகதந்தி ஏத்த² அட்டா²னப்பயுத்தோ ஏவ-ஸத்³தோ³, பி⁴க்கூ²னம் அத்தா²ய அகதமேவாதி ஸம்ப³ந்தி⁴தப்³ப³ம், தஸ்மா பி⁴க்கூ²னஞ்ச மங்க³லாதீ³னஞ்சாதி மிஸ்ஸேத்வா கதம்பி ந வட்டதீதி வேதி³தப்³ப³ம். கேசி பன யதா²டி²தவஸேன அவதா⁴ரணம் க³ஹேத்வா ‘‘வட்டதீ’’தி வத³ந்தி, தம் ந ஸுந்த³ரம். ‘‘வத்த’’ந்தி இமினா ஆபத்தி நத்தீ²தி த³ஸ்ஸேதி.

கப்பந்தி அஸங்கே²ய்யகப்பம், ‘‘ஆயுகப்ப’’ந்திபி (ஸாரத்த². டீ. 2.410) கேசி. மஹாகப்பஸ்ஸ ஹி சதுத்த²பா⁴கோ³ அஸங்கே²ய்யகப்போ, ததோ வீஸதிமோ பா⁴கோ³ ஸங்க⁴பே⁴த³கஸ்ஸ ஆயுகப்பந்தி வத³ந்தி, தம் அட்ட²கதா²ஸு கப்பட்ட²கதா²ய ந ஸமேதி ‘‘கப்பவினாஸே ஏவ முச்சதீ’’திஆதி³ (விப⁴. அட்ட². 809) வசனதோ. ப்³ரஹ்மம் புஞ்ஞந்தி ஸேட்ட²ம் புஞ்ஞம். கப்பம் ஸக்³க³ம்ஹீதி ஏத்த² படிஸந்தி⁴பரம்பராய கப்பட்ட²தா வேதி³தப்³பா³.

411. லத்³தி⁴னானாஸம்வாஸகேனாதி உக்கி²த்தானுவத்தகபா⁴வேன பா⁴வப்பதா⁴னத்தா நித்³தே³ஸஸ்ஸ. கம்மனானாஸம்வாஸகேனாதி உக்கி²த்தபா⁴வேன. ‘‘பே⁴தா³ய பரக்கமேய்யா’’தி விஸும் வுத்தத்தா பே⁴த³னஸம்வத்தனிகஸ்ஸ அதி⁴கரணஸ்ஸ ஸமாதா³ய பக்³க³ண்ஹனதோ புப்³பே³பி பக்க²பரியேஸனாதி³வஸேன ஸங்க⁴பே⁴தா³ய பரக்கமந்தஸ்ஸ ஸமனுபா⁴ஸனகம்மம் காதும் வட்டதீதி வேதி³தப்³ப³ம். யோபி சாயம் ஸங்க⁴பே⁴தோ³ ஹோதீதி ஸம்ப³ந்தோ⁴.

கம்மேனாதி அபலோகனாதி³னா. உத்³தே³ஸேனாதி பாதிமோக்கு²த்³தே³ஸேன. வோஹாரேனாதி தாஹி தாஹி உபபத்தீஹி ‘‘அத⁴ம்மம் த⁴ம்மோ’’திஆதி³னா (அ. நி. 3.10-39, 42; சூளவ. 352) வோஹாரேன, பரேஸம் பஞ்ஞாபனேனாதி அத்தோ². அனுஸாவனாயாதி அத்தனோ லத்³தி⁴யா க³ஹணத்த²மேவ அனு புனப்புனம் கண்ணமூலே மந்தஸாவனாய, கத²னேனாதி அத்தோ². ஸலாகக்³கா³ஹேனாதி ஏவம் அனுஸாவனாய தேஸம் சித்தம் உபத்த²ம்பே⁴த்வா அத்தனோ பக்கே² பவிட்ட²பா⁴வஸ்ஸ ஸஞ்ஞாணத்த²ம் ‘‘க³ண்ஹத² இமம் ஸலாக’’ந்தி ஸலாகக்³கா³ஹேன. ஏத்த² ச கம்மமேவ, உத்³தே³ஸோ வா ஸங்க⁴பே⁴தே³ பதா⁴னம் காரணம், வோஹாராத³யோ பன ஸங்க⁴பே⁴த³ஸ்ஸ புப்³ப³பா⁴கா³தி வேதி³தப்³பா³. அப்³பு⁴ஸ்ஸிதந்தி அப்³பு⁴க்³க³தம். அச்சே²ய்யாதி விஹரேய்ய.

‘‘லஜ்ஜீ ரக்கி²ஸ்ஸதீ’’தி (விஸுத்³தி⁴. 1.42; பாரா. அட்ட². 1.45) வசனதோ ஆபத்திப⁴யேன ஆரோசனம் லஜ்ஜீனம் ஏவ பா⁴ரோதி ஆஹ ‘‘லஜ்ஜீஹி பி⁴க்கூ²ஹீ’’தி, அலஜ்ஜிஸ்ஸபி அனாரோசேந்தஸ்ஸ ஆபத்தியேவ. அப்படினிஸ்ஸஜ்ஜதோ து³க்கடந்தி விஸும் விஸும் வத³ந்தானம் க³ணனாய து³க்கடம். பஹோந்தேனாதி க³ந்தும் ஸமத்தே²ன, இச்ச²ந்தேனாதி அத்தோ². ஆபத்தி பன அட்³ட⁴யோஜனப்³ப⁴ந்தரேனேவ அகி³லானஸ்ஸ வஸேன வேதி³தப்³பா³.

416. ஞத்தியாதீ³ஹி து³க்கடாதி³ஸப்³பா⁴வம் ஸந்தா⁴ய ‘‘ஸங்கா⁴தி³ஸேஸேன அனாபத்தீ’’தி வுத்தம். அஸ்ஸாதி தே³வத³த்தஸ்ஸ. அபஞ்ஞத்தே ஸிக்கா²பதே³ ஸமனுபா⁴ஸனகம்மஸ்ஸேவ அபா⁴வதோ ‘‘ந ஹி பஞ்ஞத்தம் ஸிக்கா²பத³ம் வீதிக்கமந்தஸ்ஸா’’தி வுத்தம். ஸிக்கா²பத³ம் பஞ்ஞபேந்தேனேவ ஹி ஸமனுபா⁴ஸனகம்மம் அனுஞ்ஞாதம். உத்³தி³ஸ்ஸ அனுஞ்ஞாததோதி ‘‘அனுஜானாமி, பி⁴க்க²வே, ரோமந்த²கஸ்ஸ ரோமந்த²ன’’ந்திஆதி³ம் (சூளவ. 273) உத்³தி³ஸ்ஸானுஞ்ஞாதம் ஸந்தா⁴ய வத³தி. அனாபத்தியந்தி அனாபத்திவாரே. ஆபத்திம் ரோபேதப்³போ³தி ஸமனுபா⁴ஸனாய பாசித்தியஆபத்திம் ரோபேதப்³போ³. ஆபத்தியேவ ந ஜாதாதி ஸங்கா⁴தி³ஸேஸாபத்தி ந ஜாதா ஏவ.

‘‘ந படினிஸ்ஸஜ்ஜாமீ’’தி ஸஞ்ஞாய அபா⁴வேன முச்சனதோ ஸஞ்ஞாவிமோக்க²ம். ஸசித்தகந்தி ‘‘ந படினிஸ்ஸஜ்ஜாமீ’’தி ஜானனசித்தேன ஸசித்தகம். யோ விஸஞ்ஞீ வா பீ⁴தோ வா விக்கி²த்தோ வா ‘‘படினிஸ்ஸஜ்ஜிதப்³ப³’’ந்திபி, ‘‘கம்மம் கரிஸ்ஸதீ’’தி வா ந ஜானாதி, தஸ்ஸ அனாபத்தி. பே⁴தா³ய பரக்கமனம், த⁴ம்மகம்மேன ஸமனுபா⁴ஸனம், கம்மவாசாபரியோஸானம், ந படினிஸ்ஸஜ்ஜாமீதி சித்தேன அப்படினிஸ்ஸஜ்ஜனந்தி இமானேத்த² சத்தாரி அங்கா³னி.

பட²மஸங்க⁴பே⁴த³ஸிக்கா²பத³வண்ணனா நிட்டி²தா.