13. குலதூ³ஸகஸிக்கா²பத³வண்ணனா

431. தேரஸமே கீடாகி³ரீதி தஸ்ஸ நிக³மஸ்ஸ நாமம். தஞ்ஹி ஸந்தா⁴ய பரதோ ‘‘ந அஸ்ஸஜிபுனப்³ப³ஸுகேஹி பி⁴க்கூ²ஹி கீடாகி³ரிஸ்மிம் வத்த²ப்³ப³’’ந்தி வுத்தம், கா³மனிக³மதோ ச பப்³பா³ஜனம், ந ஜனபத³தோ. தேன பன யோக³தோ ஜனபதோ³பி ‘‘கீடாகி³ரி’’இச்சேவ ஸங்க்²யம் க³தோதி ஆஹ ‘‘ஏவம்னாமகே ஜனபதே³’’தி.

தத்ராதி ஸாவத்தி²யம். து⁴ரட்டா²னேதி அபி⁴முக²ட்டா²னே, ஜேதவனத்³வாரஸமீபேதி அத்தோ². த்³வீஹி மேகே⁴ஹீதி வஸ்ஸிகேன, ஹேமந்திகேன சாதி த்³வீஹி மேகே⁴ஹி. க³ணாசரியேஹி ச²ஹி அதி⁴கதாய ‘‘ஸமதி⁴க’’ந்தி வுத்தம்.

உத³கஸ்ஸாதி அகப்பியஉத³கஸ்ஸ ‘‘கப்பியஉத³கஸிஞ்சன’’ந்தி விஸும் வக்க²மானத்தா, தஞ்ச ‘‘ஆராமாதி³அத்தா²ய ருக்க²ரோபனே அகப்பியவோஹாரேஸுபி கப்பியஉத³கஸிஞ்சனாதி³ வட்டதீ’’தி வக்க²மானத்தா இதா⁴பி விபா⁴க³ம் கத்வா கப்பியஉத³கஸிஞ்சனாதி³ விஸும் த³ஸ்ஸிதம். யதா² கோட்டனக²ணனாதி³காயிககிரியாபி அகப்பியவோஹாரே ஸங்க³ஹிதா, ஏவம் மாதிகாஉஜுகரணாதி³கப்பியவோஹாரேபீதி ஆஹ ‘‘ஸுக்க²மாதிகாய உஜுகரண’’ந்தி. ஏத்த² புராணபண்ணாதி³ஹரணம்பி ஸங்க³ய்ஹதி. மஹாபச்சரியவாதோ³வ பமாணத்தா பச்சா² வுத்தோ. அகப்பியவோஹாரேபி ஏகச்சம் வட்டதீதி த³ஸ்ஸேதும் ‘‘ந கேவலஞ்ச ஸேஸ’’ந்திஆதி³மாஹ. யம்கிஞ்சி மாதிகந்தி ஸுக்க²ம் வா அஸுக்க²ம் வா. தத்தா²தி ஆராமாதி³அத்தா²ய ருக்க²ரோபனே. ததா²தி கப்பியவோஹாரபரியாயாதீ³ஹி க³ந்தா²பனம் ஸந்தா⁴ய வுத்தம். இமினா ச குலஸங்க³ஹத்தா²ய க³ந்தா²பனாதி³பி ந வட்டதீதி த³ஸ்ஸேதி.

வத்து²பூஜனத்தா²ய ஸயம் க³ந்த²னம் கஸ்மா ந வட்டதீதி சோதே³ந்தோ ‘‘நனு சா’’திஆதி³மாஹ. யதா² ஆராமாதி³அத்த²ம் கப்பியபத²வியம் ஸயம் ரோபேதும்பி வட்டதி, ததா² வத்து²பூஜனத்தா²ய ஸயம் க³ந்த²னம்பி கஸ்மா ந வட்டதீதி சோத³கஸ்ஸ அதி⁴ப்பாயோ. வுத்தந்திஆதி³ பரிஹாரோ. அத² ‘‘ந பன மஹாஅட்ட²கதா²ய’’ந்தி கஸ்மா வத³தி? மஹாபச்சரிஆதீ³ஸு வுத்தம்பி ஹி பமாணமேவாதி நாயம் விரோதோ⁴, மஹாஅட்ட²கதா²யம் அவுத்தஸ்ஸ ஸயம் ரோபனஸ்ஸ தத்தே²வ வுத்தேன உத³கஸிஞ்சனேன ஸஹ ஸம்ஸந்த³னனயத³ஸ்ஸனமுகே²ன பமாணமேவாதி பதிட்டா²பேதும் வுத்தத்தா. ‘‘மஞ்ஞேய்யாஸீ’’தி பத³ம் ‘‘தம் கத²’’ந்தி இமினா ஸம்ப³ந்தி⁴தப்³ப³ம். தத்தா²யம் அதி⁴ப்பாயோ – கிஞ்சாபி மஹாஅட்ட²கதா²யம் ஸயம் ரோபனம் ந வுத்தம், கப்பியஉத³கஸ்ஸ ஸயம் ஆஸிஞ்சனம் வுத்தமேவ, தஸ்மா யதா² ஆராமாதி³அத்தா²ய கப்பியஉத³கம் ஸயம் ஸிஞ்சிதும்பி வட்டதி, ததா² வத்து²பூஜனத்தா²ய க³ந்த²னம்பி கஸ்மா ந வட்டதீதி. தம்பி ந விருஜ்ஜ²தீதி யதே³தம் வத்து²பூஜனத்தா²யபி க³ந்த²னாதி³ம் படிக்கி²பித்வா ஆராமாதி³அத்தா²ய ஸயம் ரோபனஸிஞ்சனம் வுத்தம், தம்பி பாளியா ஸம்ஸந்த³னதோ புப்³பா³பரம் ந விருஜ்ஜ²தி.

தம் கத²ம் ந விருஜ்ஜ²தீதி ஆஹ ‘‘தத்ர ஹீ’’திஆதி³. தத்ராதி ரோபனஸிஞ்சனவிஸயே. புப்பா²தீ³ஹி குலஸங்க³ஹப்பஸங்கே³ ‘‘மாலாவச்ச²’’ந்தி விஸேஸிதத்தா குலஸங்க³ஹத்த²மேவ ரோபனம் அதி⁴ப்பேதந்தி விஞ்ஞாயதீதி ஆஹ ‘‘மாலாவச்ச²ந்தி வத³ந்தோ’’திஆதி³. ஏதம் வுத்தந்தி ‘‘மாலாவச்ச²ம் ரோபேந்திபி ரோபாபேந்திபி, ஸிஞ்சந்திபி ஸிஞ்சாபேந்திபீ’’தி ஏதம் வுத்தம். அஞ்ஞத்ர பனாதி ஆராமாதி³அத்தா²ய மாலாவச்சா²தீ³னம் ரோபனே பன. பரியாயோதி ஸயம்கரணகாராபனஸங்கா²தோ பரியாயோ வோஹாரோ அத்த²விஸேஸோதி அத்தோ² அத்தி² உபலப்³ப⁴தி, குலஸங்க³ஹத்த²த்தாபா⁴வாதி அதி⁴ப்பாயோ. ஏவமேத்த² பரியாயஸத்³த³ஸ்ஸ கரணகாராபனவஸேன அத்தே² க³ய்ஹமானே ‘‘க³ந்தே²ந்திபி க³ந்தா²பேந்திபீ’’தி பாளியம் படிக்கி²த்தக³ந்த²னக³ந்தா²பனம் ட²பேத்வா யம் பரதோ ‘‘ஏவம் ஜான, ஏவம் கதே ஸோபே⁴ய்யா’’திஆதி³கப்பியவசனேஹி க³ந்தா²பனம் வுத்தம், தத்த² தோ³ஸாபா⁴வோ ஸமத்தி²தோ ஹோதி, ‘‘க³ந்தே²ஹீ’’தி ஆணத்தியா காராபனஸ்ஸேவ க³ந்தா²பனந்தி அதி⁴ப்பேதத்தா. தத்த² பரியாயம் இத⁴ ச பரியாயாபா⁴வம் ஞத்வாதி தத்த² ‘‘மாலாவச்ச²ம் ரோபேந்தீ’’திஆதீ³ஸு ‘‘மாலாவச்ச²’’ந்தி குலஸங்க³ஹத்த²தாஸூசனகஸ்ஸ விஸேஸனஸ்ஸ ஸப்³பா⁴வதோ கரணகாராபனஸங்கா²தபரியாயஸப்³பா⁴வம். இத⁴ ‘‘க³ந்தே²ந்தீ’’திஆதீ³ஸு ததா²வித⁴விஸேஸவசனாபா⁴வதோ தஸ்ஸ பரியாயஸ்ஸ அபா⁴வஞ்ச ஞத்வா. தம் ஸுவுத்தமேவாதி வேதி³தப்³ப³ந்தி யோஜனா.

ஸப்³ப³ம் வுத்தனயேனேவ வேதி³தப்³ப³ந்தி அட்ட²கதா²ஸு ஆக³தனயேனேவ ரோபனாதி³, க³ந்தா²பனாதி³ ச ஸப்³ப³ம் வேதி³தப்³ப³ம். ந ஹேத்த² ஸந்தே³ஹோ காதப்³போ³தி நிக³மேதி.

ஹரணாதீ³ஸூதி வத்து²பூஜனத்தா²ய ஹரணாதீ³ஸு. குலித்தி²ஆதீ³னம் அத்தா²ய ஹரணதோதி குலித்தி²ஆதீ³னம் ஹரணஸ்ஸேவ விஸேஸேத்வா படிக்கி²த்தத்தாதி அதி⁴ப்பாயோ. தேனாஹ ‘‘ஹரணாதி⁴காரே ஹீ’’திஆதி³. மஞ்ஜரீதி புப்ப²கோ³ச்ச²ம். வடம்ஸகோதி கண்ணஸ்ஸ உபரி பிளந்த⁴னத்த²ம் கதபுப்ப²விகதி, ஸோ ச ‘‘வடம்ஸோ’’தி வுச்சதி. கண்ணிகாதி ப³ஹூனம் புப்பா²னம் வா மாலானம் வா ஏகதோ ப³ந்தி⁴தஸ்ஸ நாமம், ‘‘கண்ணாப⁴ரண’’ந்திபி வத³ந்தி. ஹாரஸதி³ஸந்தி முத்தாஹாரஸதி³ஸம்.

கப்பியேனாதி கப்பியஉத³கேன. தேஸம்யேவ த்³வின்னந்தி குலதூ³ஸனபரிபோ⁴கா³னம் த்³வின்னம். து³க்கடந்தி குலஸங்க³ஹத்தா²ய ஸயம் ஸிஞ்சனே, கப்பியவோஹாரேன வா அகப்பியவோஹாரேன வா ஸிஞ்சாபனே ச து³க்கடம், பரிபோ⁴க³த்தா²ய பன ஸயம் ஸிஞ்சனே, அகப்பியவோஹாரேன ஸிஞ்சாபனே ச து³க்கடம். பயோக³ப³ஹுலதாயாதி ஸயம் கரணே, காயபயோக³ஸ்ஸ காராபனே ச வசீபயோக³ஸ்ஸ ச ப³ஹுத்தேன.

க³ந்தே²ன நிப்³ப³த்தம் தா³மம் க³ந்தி²மம். ஏஸேவ நயோ ஸேஸேஸுபி. ந வட்டதீதி வத்து²பூஜனத்தா²யபி ந வட்டதி, து³க்கடந்தி அத்தோ². வட்டதீதி வத்து²பூஜனத்தா²ய வட்டதி, குலஸங்க³ஹத்தா²ய பன கப்பியவோஹாரேன காராபேந்தஸ்ஸாபி து³க்கடமேவ.

நீபபுப்ப²ம் நாம கத³ம்ப³புப்ப²ம். புரிமனயேனேவாதி ‘‘பி⁴க்கு²ஸ்ஸ வா’’திஆதி³னா வுத்தனயேன.

கத³லிக்க²ந்த⁴ம்ஹீதிஆதி³னா வுத்தம் ஸப்³ப³மேவ ஸந்தா⁴ய ‘‘தம் அதிஓளாரிகமேவா’’தி வுத்தம், ஸப்³ப³த்த² கரணே, அகப்பியவசனேன காராபனே ச து³க்கடமேவாதி அத்தோ². ‘‘புப்ப²விஜ்ஜ²னத்த²ம் கண்டகம் ப³ந்தி⁴தும்பி ந வட்டதீ’’தி இமஸ்ஸ உபலக்க²ணத்தா புப்ப²தா³மோலம்ப³னாதி³அத்தா²ய ரஜ்ஜுப³ந்த⁴னாதி³பி ந வட்டதீதி கேசி வத³ந்தி, அஞ்ஞே பன ‘‘புப்ப²விஜ்ஜ²னத்த²ம் கண்டகந்தி விஸேஸிதத்தா தத³த்த²ம் கண்டகமேவ ப³ந்தி⁴தும் ந வட்டதி, தஞ்ச அட்ட²கதா²பமாணேனா’’தி வத³ந்தி, வீமம்ஸித்வா க³ஹேதப்³ப³ம். புப்ப²படிச்ச²கம் நாம த³ண்டா³தீ³ஹி கதம் புப்பா²தா⁴னம், ஏதம்பி நாக³த³ந்தகம்பி ஸசி²த்³த³கமேவ க³ஹேதப்³ப³ம். அஸோகபிண்டி³யாதி அஸோகஸாகா²னம், புப்பா²னம் வா ஸமூஹே. த⁴ம்மரஜ்ஜு நாம சேதியாதீ³னி பரிக்கி²பித்வா தேஸஞ்ச ரஜ்ஜுயா ச அந்தரா புப்ப²ப்பவேஸனத்தா²ய ப³ந்த⁴ரஜ்ஜு. ‘‘ஸிதி²லவட்டிதா வா ரஜ்ஜுவட்டிஅந்தரே புப்ப²ப்பவேஸனத்தா²ய ஏவம் ப³ந்தா⁴’’திபி வத³ந்தி.

மத்த²கதா³மந்தி த⁴ம்மாஸனாதி³மத்த²கலம்ப³கதா³மம். தேஸம்யேவாதி உப்பலாதீ³னம் ஏவ. வாகேன வா த³ண்ட³கேன வாதி புப்ப²னாளம் பா²லேத்வா புப்பே²ன ஏகாப³த்³த⁴ம் டி²தவாகேன, த³ண்ட³கேன ச ஏகப³ந்த⁴னேனேவ, ஏதேன புப்ப²ம் பீ³ஜகா³மே ஸங்க³ஹம் ந க³ச்ச²தி பஞ்சஸு பீ³ஜேஸு அப்பவிட்ட²த்தா பண்ணம் விய, தஸ்மா கப்பியம் அகாராபேத்வாபி கோபனே தோ³ஸோ நத்தி². யஞ்ச சி²ன்னஸ்ஸாபி மகுளஸ்ஸ விகஸனம், தம்பி அதிதருணஸ்ஸ அபா⁴வா வுட்³டி⁴லக்க²ணம் ந ஹோதி, பரிணதஸ்ஸ பன மகுளஸ்ஸ பத்தானம் ஸினேஹே பரியாதா³னம் க³தே விஸும்பா⁴வோ ஏவ விகாஸோ, தேனேவ சி²ன்னமகுளவிகாஸோ அச்சி²ன்னமகுளவிகாஸதோ பரிஹீனோ, மிலாதயுத்தோ வா தி³ஸ்ஸதி. யஞ்ச மிலாதஸ்ஸ உத³கஸஞ்ஞோகே³ அமிலானதாபஜ்ஜனம், தம்பி தம்பு³லபண்ணாதீ³ஸு ஸமானந்தி வுட்³டி⁴லக்க²ணம் ந ஹோதி, பாளிஅட்ட²கதா²தீ³ஸு ச ந கத்த²சி புப்பா²னம் கப்பியகரணம் ஆக³தம், தஸ்மா புப்ப²ம் ஸப்³ப³தா² அபீ³ஜமேவாதி விஞ்ஞாயதி, வீமம்ஸித்வா க³ஹேதப்³ப³ம். ‘‘பஸிப்³ப³கே வியா’’தி வுத்தத்தா புப்ப²பஸிப்³ப³கே வா பஸிப்³ப³கஸதி³ஸப³ந்தே⁴ வா யத்த² கத்த²சி சீவரே வா பக்கி²பிதும் வட்டதீதி ஸித்³த⁴ம். ப³ந்தி⁴தும் ந வட்டதீதி ரஜ்ஜுஆதீ³ஹி ப³ந்த⁴னம் ஸந்தா⁴ய வுத்தம், புப்ப²ஸ்ஸேவ பன அச்சி²ன்னத³ண்ட³வாகேஹி ப³ந்தி⁴தும் வட்டதி ஏவ.

புப்ப²படே ச த³ட்ட²ப்³ப³ந்தி புப்ப²படம் கரோந்தஸ்ஸ தீ³க⁴தோ புப்ப²தா³மஸ்ஸ ஹரணபச்சாஹரணவஸேன பூரணம் ஸந்தா⁴ய வுத்தம், திரியதோ ஹரணம் பன வாயிமம் நாம ஹோதி, ந பூரிமம். ‘‘புரிமட்டா²னம் அதிக்காமேதீ’’தி ஸாமஞ்ஞதோ வுத்தத்தா புரிமம் புப்ப²கோடிம் பு²ஸாபேத்வா வா அபு²ஸாபேத்வா வா பரிக்கி²பனவஸேன பன அதிக்கமந்தஸ்ஸ ஆபத்தியேவ. ப³ந்தி⁴தும் வட்டதீதி புப்ப²ரஹிதாய ஸுத்தவாககோடியா ப³ந்தி⁴தும் வட்டதி. ‘‘ஏகவாரம் ஹரித்வா வா பரிக்கி²பித்வா வா’’தி இத³ம் புப்³பே³ வுத்தசேதியாதி³பரிக்கே²பம், புப்ப²படகரணஞ்ச ஸந்தா⁴ய வுத்தம்.

பரேஹி பூரிதந்தி தீ³க⁴தோ பஸாரிதம். வாயிதுந்தி திரியதோ ஹரிதும், தம் பன ஏகவாரம்பி ந லப்³ப⁴தி. புப்பா²னி ட²பேந்தேனாதி அக³ந்தி²தபுப்பா²னி அஞ்ஞமஞ்ஞம் பு²ஸாபேத்வாபி ட²பேந்தேன. க⁴டிகதா³மஓலம்ப³கோதி ஹேட்டா²பா⁴கே³ க⁴டிகாகாரயுத்தோ, தா³ருக⁴டிகாகாரோ வா ஓலம்ப³கோ. ஸுத்தமயம் கே³ண்டு³கம் நாம. ஸப்³ப³த்தா²தி க³ந்தி²மாதீ³ஸு ஸப்³ப³த்த².

ரேசகந்தி அபி⁴னயம், ‘‘ஏவம் நச்சாஹீ’’தி நடனாகாரத³ஸ்ஸனந்தி அத்தோ², ‘‘சக்கம் விய அத்தானம் ப⁴மாபன’’ந்திபி கேசி. ஆகாஸேயேவ கீளந்தீதி ‘‘அயம் ஸாரீ அஸுகபத³ம் மயா நீதா’’தி ஏவம் முகே²னேவ உபோ⁴பி வத³ந்தா கீளந்தி. ஜூதப²லகேதி ஜூதமண்ட³லே. பாஸககீளாயாதி த்³வின்னம் திவங்கு³லப்பமாணானம் தா³ருத³ந்தாதி³மயானம் பாஸகானம் சதூஸு பஸ்ஸேஸு ஏககாதி³வஸேன பி³ந்தூ³னி கத்வா ப²லகே கி²பித்வா உபரிபா⁴கே³ தி³ட்ட²பி³ந்தூ³னம் வஸேன ஸாரியோ அபனேத்வா கீளனகஜூதகீளாய.

மஞ்ஜட்டி² நாம மஞ்ஜட்ட²ருக்க²ஸாரகஸாவம். ஸலாகஹத்த²ந்தி நாளிகேரஹீராதீ³னம் கலாபஸ்ஸேதம் நாமம். பாளியம் த²ருஸ்மிந்தி க²க்³கே³. உஸ்ஸேளேந்தீதி முகே²ன உஸ்ஸேளனஸத்³த³ம் பமுஞ்சந்தி, மஹந்தம் அப்³யத்தஸத்³த³ம் பவத்தேந்தீதி அத்தோ². அப்போ²டேந்தீதி த்³விகு³ணிதவாமஹத்தே² த³க்கி²ணஹத்தே²ன தாளேத்வா ஸத்³த³ம் கரோந்தி. முக²டி³ண்டி³மந்தி முக²பே⁴ரீ.

432. தேஸந்தி ஸமாஸே கு³ணீபூ⁴தானி பப்³பா³னிபி பராமஸதி. போ³ந்தோ³தி லோலோ, மந்த³தா⁴துகோதி அத்தோ². ப⁴குடிம் கத்வாதி ப⁴முகபே⁴த³ம் கத்வா. நேலாதி நித்³தோ³ஸா.

433. பாளியம் ‘‘ஸாரிபுத்தா’’தி இத³ம் ஏகஸேஸனயேன ஸாரிபுத்தமோக்³க³ல்லானானம் உபி⁴ன்னம் ஆலபனம், தேனேவ ப³ஹுவசனனித்³தே³ஸோ கதோ.

435. அட்டா²ரஸ வத்தானீதி ‘‘ந உபஸம்பாதே³தப்³ப³’’ந்திஆதீ³னி ‘‘ந பி⁴க்கூ²ஹி ஸம்பயோஜேதப்³ப³’’ந்தி பரியோஸானானி கம்மக்க²ந்த⁴கே (சூளவ. 7) ஆக³தானி அட்டா²ரஸ வத்தானி. ந பன்னலோமாதி ந பதிதமானலோமா, அனனுகூலவத்தினோதி அத்தோ².

437. பரஸந்தகம் தே³தி து³க்கடமேவாதி விஸ்ஸாஸகா³ஹேன தா³னம் ஸந்தா⁴ய வுத்தம். து²ல்லச்சயந்தி ஏத்த² ப⁴ண்ட³தே³ய்யம்பி ஹோதி ஏவ.

தஞ்ச கோ² வத்து²பூஜனத்தா²யாதி மாதாபிதூனம்பி புப்ப²ம் தே³ந்தேன வத்து²பூஜனத்தா²யேவ தா³தப்³ப³ந்தி த³ஸ்ஸேதி. மண்ட³னத்தா²ய பன ஸிவலிங்கா³தி³பூஜனத்தா²யாதி ஏத்தகமேவ வுத்தத்தா ‘‘இமம் விக்கிணித்வா ஜீவிஸ்ஸந்தீ’’தி மாதாபிதூனம் தா³தும் வட்டதி, ஸேஸஞாதீனம் பன தாவகாலிகமேவ தா³தும் வட்டதி. ஞாதிஸாமணேரேஹேவாதி தேஸம் கி³ஹிகம்மபரிமோசனத்த²ம் வுத்தம். இதரேதி அஞ்ஞாதகா, தேஹிபி ஸாமணேரேஹி ஆசரியுபஜ்ஜா²யானம் வத்தஸீஸேன ஹரிதப்³ப³ம். சூளகந்தி உபட்³ட⁴பா⁴க³தோபி உபட்³ட⁴ம்.

ஸாமணேரா…பே… ட²பேந்தீதி அரக்கி²தாகோ³பிதம் ஸந்தா⁴ய வுத்தம். தத்த² தத்தா²தி மக்³கே³ வா சேதியங்க³ணே வா. ‘‘ஸாமணேரேஹி தா³பேதும் ந லப⁴ந்தீ’’தி இத³ம் ஸாமணேரேஹி கி³ஹீனம் கம்மம் காரிதம் விய ஹோதீதி வுத்தம், ந பன புப்ப²தா³னம் ஹோதீதி ஸாமணேரானம்பி ந வட்டனதோ. வுத்தஞ்ச ‘‘ஸயமேவா’’திஆதி³. ‘‘அவிஸேஸேன வுத்த’’ந்தி இமினா ஸப்³பே³ஸம்பி ந வட்டதீதி த³ஸ்ஸேதி.

கீ²ணபரிப்³ப³யானந்தி ஆக³ந்துகே ஸந்தா⁴ய வுத்தம். பரிச்சி²ன்னேஸுபி ருக்கே²ஸு ‘‘இத⁴ ப²லானி ஸுந்த³ரானீ’’திஆதி³ம் வத³ந்தேன குலஸங்க³ஹோ கதோ நாம ஹோதீதி ஆஹ ‘‘ஏவம் பன ந வத்தப்³ப³’’ந்தி.

ருக்க²ச்ச²ல்லீதி ருக்க²த்தசோ. அபா⁴ஜனீயத்தா க³ருப⁴ண்ட³ம் வுத்தம். வுத்தனயேனாதி பண்ணதா³னம்பி புப்ப²ப²லாதீ³ஸு வுத்தனயேன குலஸங்க³ஹோ ஹோதீதி த³ஸ்ஸேதி.

புப்³பே³ வுத்தப்பகாரந்தி மம வசனேன ப⁴க³வதோ பாதே³ வந்த³தா²திஆதி³னா வுத்தப்பகாரஸிக்கா²பதே³ பட²மம் வுத்தம். ‘‘பக்கமதாயஸ்மா’’தி இத³ம் பப்³பா³ஜனீயகம்மவஸேன வுத்தம். புன ‘‘பக்கமதாயஸ்மா’’தி இத³ம்பி பப்³பா³ஜனீயகம்மகதஸ்ஸ வத்தவஸேன வுத்தம். ஏத்த² ச அஸ்ஸஜிபுனப்³ப³ஸுகேஹி ஆசரியேஸு அனேகவிதே⁴ஸு அனாசாரேஸு பஞ்ஞபேதப்³பா³ ஆபத்தியோ ஸிக்கா²பத³ந்தரேஸு பஞ்ஞத்தா ஏவாதி தா இத⁴ அபஞ்ஞபேத்வா குலதூ³ஸகானம் பப்³பா³ஜனீயகம்மவஸேன நிக்³க³ஹம் காதும் தத்தே²வ ஸம்மா அவத்தித்வா காரகஸங்க⁴ம் ச²ந்த³கா³மிதாதீ³ஹி பாபேந்தானம் ஸமனுபா⁴ஸனாய ஸங்கா⁴தி³ஸேஸம் ஆரோபிதஞ்ச இத³ம் ஸிக்கா²பத³ம் பஞ்ஞத்தந்தி வேதி³தப்³ப³ம். பட²மஸங்க⁴பே⁴த³ஸதி³ஸானேவாதி ஏத்த² அங்கே³ஸுபி யதா² தத்த² பரக்கமனம், ஏவமித⁴ ச²ந்தா³தீ³ஹி பாபனம் த³ட்ட²ப்³ப³ம். ஸேஸம் தாதி³ஸமேவாதி.

குலதூ³ஸகஸிக்கா²பத³வண்ணனா நிட்டி²தா.

நிக³மனவண்ணனா

442. இதரே பன யாவததியகாதி வேதி³தப்³பா³தி ஸம்ப³ந்தோ⁴. யோ ஹி ஜரோ ஏகஸ்மிம் தி³வஸே ஆக³ந்த்வாபி க³தோ அனந்தரேஸு த்³வீஸு தி³வஸேஸு அனுப்பஜ்ஜித்வா ததியே தி³வஸே உப்பஜ்ஜதி, ஸோ ததியகோ. யோ பன ததியேபி அனுப்பஜ்ஜித்வா சதுத்தே² ஏவ தி³வஸே உப்பஜ்ஜதி, ஸோ சதுத்த²கோ சாதி வுச்சதி. தம் ஸந்தா⁴யாஹ ‘‘யதா² ததியே’’திஆதி³. ‘‘அகாமேன அவஸேனா’’தி இமினா அப்படிகம்மகரணம் நாம யஸ்மா அலஜ்ஜிலக்க²ணம், ஸக்³க³மோக்கா²வரணஞ்ச, தஸ்மா ஆபன்னோ புக்³க³லோ ‘‘பச்சா² பரிவஸிஸ்ஸாமீ’’தி விக்கி²பிதும் ந லப⁴தி, ஸங்கே⁴ன ச அனிச்ச²ந்தஸ்ஸேவ பரிவாஸோ தா³தப்³போ³தி த³ஸ்ஸேதி. பாளியம் சிண்ணமானத்தோ பி⁴க்கு²…பே… அப்³பே⁴தப்³போ³தி ஏத்த² யோ பி⁴க்கு² சிண்ணமானத்தோ, ஸோ பி⁴க்கு² அப்³பே⁴தப்³போ³தி ஏவம் பி⁴க்கு²ஸத்³த³த்³வயஸ்ஸ யோஜனா வேதி³தப்³பா³. தே ச பி⁴க்கூ² கா³ரய்ஹாதி ஊனபா⁴வம் ஞத்வா அப்³பே⁴ந்தி, து³க்கடாபஜ்ஜனேன க³ரஹிதப்³பா³. ஸாமீசீதி வத்தம்.

இதி ஸமந்தபாஸாதி³காய வினயட்ட²கதா²ய விமதிவினோத³னியம்

தேரஸகவண்ணனானயோ நிட்டி²தோ.