3. அனியதகண்டோ³

1. பட²மஅனியதஸிக்கா²பத³வண்ணனா

443. புத்தஸத்³தே³ன ஸாமஞ்ஞனித்³தே³ஸதோ, ஏகஸேஸனயேன வா புத்தீபி க³ஹிதாதி ஆஹ ‘‘ப³ஹூ தீ⁴தரோ சா’’தி. தத³னந்தரந்தி பி⁴க்கூ²னம் போ⁴ஜனானந்தரம்.

444-5. தம் கம்மந்தி தம் மேது²னாதி³அஜ்ஜா²சாரகம்மம். பாளியம் ‘‘ஸோதஸ்ஸ ரஹோ’’தி இத³ம் அத்து²த்³தா⁴ரவஸேன வுத்தம், உபரி ஸிக்கா²பதே³ ‘‘ந ஹேவ கோ² பன படிச்ச²ன்ன’’ந்திஆதி³னா (பாரா. 454) ஏதஸ்ஸ ஸிக்கா²பத³ஸ்ஸ விஸயம் படிக்கி²பித்வா ‘‘அலஞ்ச கோ² ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிது’’ந்தி விஸயந்தரபூ⁴தஸோதரஹஸ்ஸ விஸும் வக்க²மானத்தா, இத⁴ பன சக்கு²ரஹோவ அதி⁴ப்பேதோ ‘‘படிச்ச²ன்னே ஆஸனே’’திஆதி³வசனதோ, ‘‘ஸக்கா ஹோதி மேது²னம் த⁴ம்மம் படிஸேவிது’’ந்தி வுத்தத்தா ச. தேனாஹ ‘‘கிஞ்சாபீ’’திஆதி³. பரிச்சே²தோ³தி ரஹோனிஸஜ்ஜாபத்தியா வவத்தா²னம்.

இதா³னி சக்கு²ரஹேனேவ ஆபத்திம் பரிச்சி²ந்தி³த்வா த³ஸ்ஸேந்தோ ‘‘ஸசேபி ஹீ’’திஆதி³மாஹ. ‘‘பிஹிதகவாடஸ்ஸா’’தி இமினா படிச்ச²ன்னபா⁴வதோ சக்கு²ஸ்ஸ ரஹோவ அதி⁴ப்பேதோ, ந ஸோதஸ்ஸ ரஹோதி த³ஸ்ஸேதி. தேனாஹ ‘‘அபிஹிதகவாடஸ்ஸ…பே… அனாபத்தி’’ந்தி. ந ஹி கவாடபித³ஹனேன ஸோதஸ்ஸ ரஹோ விக³ச்ச²தி, சக்கு²ஸ்ஸ ரஹோ ஏவ பன விக³ச்ச²தி. ‘‘அந்தோத்³வாத³ஸஹத்தே²பீ’’தி இத³ம் து³தியஸிக்கா²பதே³ ஆக³தஸோதஸ்ஸ ரஹேன ஆபஜ்ஜிதப்³ப³து³ட்டு²ல்லவாசாபத்தியா ஸப்³ப³தா² அனாபத்திபா⁴வம் த³ஸ்ஸேதும் வுத்தம். த்³வாத³ஸஹத்த²தோ ப³ஹி நிஸின்னோ ஹி தத்த² ஸோதஸ்ஸ ரஹஸப்³பா⁴வதோ து³ட்டு²ல்லவாசாபத்தியா அனாபத்திம் ந கரோதி, ததா² ச ‘‘அனாபத்திம் ந கரோதீ’’தி ஸாமஞ்ஞதோ ந வத்தப்³ப³ம் ஸியா, ‘‘மேது²னகாயஸம்ஸக்³கா³பத்தீஹி அனாபத்திம் கரோதீ’’தி விஸேஸேத்வா வத்தப்³ப³ம் ப⁴வேய்ய. தஸ்மா ததா² தம் அவத்வா ஸப்³ப³தா² அனாபத்திம் த³ஸ்ஸேதுமேவ ‘‘த்³வாத³ஸஹத்தே²’’தி வுத்தந்தி க³ஹேதப்³ப³ம். யதி³ ஹி சக்கு²ஸ்ஸேவ ரஹபா⁴வம் ஸந்தா⁴ய வதே³ய்ய, ‘‘அந்தோத்³வாத³ஸஹத்தே²’’தி ந வதே³ய்ய அப்படிச்ச²ன்னே ததோ தூ³ரே நிஸின்னேபி சக்கு²ஸ்ஸ ரஹாஸம்ப⁴வதோ. யஸ்மா நிஸீதி³த்வா நித்³தா³யந்தோ கபிமித்³த⁴பரேதோ கிஞ்சி காலம் சக்கூ²னி உம்மீலேதி, கிஞ்சி காலம் நிம்மீலேதி. தஸ்மா ‘‘நித்³தா³யந்தோபி அனாபத்திம் கரோதீ’’தி வுத்தம்.

படிலத்³த⁴ஸோதாபத்திப²லாதி அந்திமபரிச்சே²த³தோ வுத்தம். நிஸஜ்ஜம் படிஜானமானோதி மேது²னகாயஸம்ஸக்³கா³தி³வஸேன ரஹோ நிஸஜ்ஜம் படிஜானமானோதி அத்தோ². தேனாஹ ‘‘பாராஜிகேன வா’’திஆதி³. ந அப்படிஜானமானோதி அலஜ்ஜீபி அப்படிஜானமானோ ஆபத்தியா ந காரேதப்³போ³வ. ஸோ ஹி யாவ தோ³ஸம் ந படிஜானாதி, தாவ ‘‘நேவ ஸுத்³தோ⁴, நாஸுத்³தோ⁴’’தி வா வத்தப்³போ³, வத்தானுஸந்தி⁴னா பன காரேதப்³போ³. வுத்தஞ்ஹேதம் –

‘‘படிஞ்ஞா லஜ்ஜீஸு கதா, அலஜ்ஜீஸு ஏவம் ந விஜ்ஜதி;

ப³ஹும்பி அலஜ்ஜீ பா⁴ஸேய்ய, வத்தானுஸந்தி⁴தேன காரயே’’தி. (பரி. 359);

நிஸஜ்ஜாதீ³ஸு…பே… படிஜானமானோவ தேன ஸோ பி⁴க்கு² காரேதப்³போ³தி ஏத்த² படிஜானமானோதி பாளியம் அனாக³தம்பி அதி⁴காரதோ ஆக³தமேவாதி கத்வா வுத்தம்.

வதா³பேதா²தி தஸ்ஸ இத்³தி⁴யா விக³தாஸங்கோபி தம் ஓவத³ந்தோ ஆஹ, அனுபபரிக்கி²த்வா அதே³ஸே நிஸின்னா ‘‘மாதுகா³மேன ஸத்³தி⁴ம் ஏகாஸனே தே²ரோ ரஹோ நிஸின்னோ’’தி ஏவம் மாதி³ஸேஹிபி தும்ஹே தும்ஹாகம் அவண்ணம் வதா³பேத² கதா²பயித்த², மா புன ஏவம் கரித்தா²தி அதி⁴ப்பாயோ. ஏவமகாஸிந்தி நிகூ³ஹிதப்³ப³ம்பி இமம் விஸேஸாதி⁴க³மம் பகாஸேந்தோ தம் ஸத்³தா⁴பேதுமேவ ஏவமகாஸிந்தி அத்தோ². ரக்கே²ய்யாஸிமந்தி இமம் உத்தரிமனுஸ்ஸத⁴ம்மம் அஞ்ஞேஸம் மா பகாஸயி.

451. நிஸஜ்ஜாய பாசித்தியந்தி ரஹோனிஸஜ்ஜஸ்ஸாதே³ வத்தமானே பாசித்தியம். ஸசே பன ஸோ ரஹோனிஸஜ்ஜஸ்ஸாத³ம் படிவினோதே³த்வா கம்மட்டா²னமனஸிகாராதி³னா அஞ்ஞவிஹிதோ, நித்³தூ³பக³தோ வா அனாபத்தி ஏவ. தேனாஹ ‘‘அஸ்ஸாதே³ உப்பன்னே’’தி. ‘‘நிஸின்னாய இத்தி²யா’’தி இமினா நிஸீத³னக்க²ணே அஸ்ஸாதா³பா⁴வம் த³ஸ்ஸேதி. யதி³ ஹி நிஸீத³னக்க²ணே அஸ்ஸாதோ³ உப்பஜ்ஜேய்ய, தேன உட்டா²தப்³ப³ம். இதரதா² ஆபத்தி ஏவ இத்தி²யா உட்டா²யுட்டா²ய புனப்புனம் நிஸீத³னே விய, தத்தா²பி பி⁴க்கு²ஸ்ஸ உட்ட²ஹதோ அனாபத்தி, தேன ரஹோனிஸஜ்ஜாபத்தி அகிரியஸமுட்டா²னாபி ஹோதீதி வத³ந்தி. இத³ம் பன அனியதஸிக்கா²பத³ம், அனந்தரஞ்சாதி த்³வேபி விஸும் ஆபத்திபஞ்ஞாபனவஸேன பஞ்ஞத்தானி ந ஹோந்தி ரஹோனிஸஜ்ஜாதீ³ஸு ஆபத்தியா ஸிக்கா²பத³ந்தரேஸு பஞ்ஞத்தத்தா. பாராஜிகாதி³ஆபத்தீஹி பன கேனசி சோதி³தஸ்ஸ அனுவிஜ்ஜகேஹி வினிச்ச²யகாரணனயத³ஸ்ஸனத்த²ம் ஏவம் வத்து²வஸேன த்³விதா⁴ விப⁴ஜித்வா பஞ்ஞத்தானி, இமானேவ ச யஸ்மா பி⁴க்கு²னீனம்பி வினிச்ச²யனயக்³க³ஹணாய அலம், தஸ்மா தாஸம் விஸும் ந வுத்தானீதி வேதி³தப்³ப³ம். யம் பன ஆபத்திம் படிஜானாதி, தஸ்ஸ வஸேனேத்த² அங்க³பே⁴தோ³ வேதி³தப்³போ³. தேனேவ ‘‘அயம் த⁴ம்மோ அனியதோ’’தி வுத்தம்.

இத⁴ அனியதவஸேன வுத்தானம் பாராஜிகஸங்கா⁴தி³ஸேஸபாசித்தியானம் திண்ணம்பி அஞ்ஞமஞ்ஞம் ஸதி³ஸஸமுட்டா²னாதி³தாய வுத்தம் ‘‘ஸமுட்டா²னாதீ³னி பட²மபாராஜிகஸதி³ஸானேவா’’தி.

பட²மஅனியதஸிக்கா²பத³வண்ணனா நிட்டி²தா.

2. து³தியஅனியதஸிக்கா²பத³வண்ணனா

452. ‘‘ந லப⁴தி மாதுகா³மேன ஸத்³தி⁴ம் ஏகோ ஏகாய…பே… நிஸஜ்ஜம் கப்பேது’’ந்தி அவத்வா ‘‘படிக்கி²த்தம் மாதுகா³மேனா’’திஆதி³னா வுத்தத்தா ‘‘ஏகோ’’தி பச்சத்தபத³ம் படிக்கி²த்தபதே³ன ந ஸமேதி, ‘‘ஏகஸ்ஸா’’தி வத்தப்³போ³தி ஸாதே⁴ந்தோ ஆஹ ‘‘இதரதா² ஹீ’’திஆதி³.

453. பரிவேணங்க³ணாதீ³தி பரிவேணஸ்ஸ மாளகம். ஆதி³-ஸத்³தே³ன பாகாராதி³பரிக்கி²த்தம் சேதியமாளகாதி³ம் ஸங்க³ண்ஹாதி. அந்தோக³த⁴ந்தி அப்படிச்ச²ன்னட்டா²னே ஏவ பரியாபன்னம். இத⁴ இத்தீ²பி அனாபத்திம் கரோதீதி ஸம்ப³ந்தோ⁴. கஸ்மா பன இத்தீ² இதே⁴வ அனாபத்திம் கரோதி, ந புரிமஸிக்கா²பதே³தி? இமஸ்ஸ ஸிக்கா²பத³ஸ்ஸ மேது²னம் வினா து³ட்டு²ல்லவாசாய வஸேன ஆக³தத்தா. மேது²னமேவ ஹி இத்தி²யோ அஞ்ஞமஞ்ஞம் படிச்சா²தே³ந்தி மஹாவனே த்³வாரம் விவரித்வா நித்³தூ³பக³தம்ஹி பி⁴க்கு²ம்ஹி விய. து³ட்டு²ல்லம் பன ந படிச்சா²தே³ந்தி, தேனேவ து³ட்டு²ல்லவாசாஸிக்கா²பதே³ ‘‘யா தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பேஸு’’ந்தி (பாரா. 283) வுத்தம், தஸ்மா ‘‘இத்தீ²பி அனாபத்திம் கரோதீ’’தி வுத்தம், ‘‘அப்படிச்ச²ன்னட்டா²னத்தா’’திபி காரணம் வத³ந்தி.

காயேனாபி து³ட்டு²ல்லோபா⁴ஸஸம்ப⁴வதோ இமஸ்மிம் ஸிக்கா²பதே³ சக்கு²ஸ்ஸ ரஹோ, ஸோதஸ்ஸ ரஹோ ச அதி⁴ப்பேதோதி ஆஹ ‘‘அனந்தோ⁴ அப³தி⁴ரோ’’திஆதி³. கேசி பன விப⁴ங்கே³ ‘‘நாலம் கம்மனியந்தி ந ஸக்கா ஹோதி மேது²னம் த⁴ம்மம் படிஸேவிது’ந்தி (பாரா. 454) ஏத்தகமேவ வத்வா ‘ந ஸக்கா ஹோதி காயஸம்ஸக்³க³ம் ஸமாபஜ்ஜிது’ந்தி அவுத்தத்தா அப்படிச்ச²ன்னேபி டா²னே ரஹோ அஞ்ஞேஸம் அபா⁴வம் தி³ஸ்வா ஏகாய இத்தி²யா காயஸம்ஸக்³கோ³பி ஸக்கா ஆபஜ்ஜிதுந்தி அந்தோத்³வாத³ஸஹத்தே² ஸவனூபசாரே டி²தோ அப³தி⁴ரோபி அந்தோ⁴ காயஸம்ஸக்³க³ஸ்ஸாபி ஸப்³பா⁴வாபா⁴வம் ந ஜானாதீதி காயேன து³ட்டு²ல்லோபா⁴ஸனஸப்³பா⁴வம் அமனஸிகத்வாபி காயஸம்ஸக்³கா³பத்தியாபி பரிஹாராய அனந்தோ⁴ அப³தி⁴ரோதிஆதி³ வுத்த’’ந்தி வத³ந்தி. யம் பன ஸாரத்த²தீ³பனியம் ‘‘காயஸம்ஸக்³க³வஸேன அனந்தோ⁴ வுத்தோ’’தி (ஸாரத்த². டீ. 2.453) வுத்தம், தம் பன காயேன து³ட்டு²ல்லோபா⁴ஸனஸம்ப⁴வம் அமனஸிகத்வா வுத்தம், காயஸம்ஸக்³க³வஸேனாபீதி க³ஹேதப்³ப³ம். தேனேவ ‘‘இமஸ்மிம் ஸிக்கா²பதே³ ஸோதஸ்ஸ ரஹோ ஏவ அதி⁴ப்பேதோ…பே… கேனசி பன ‘த்³வேபி ரஹா இத⁴ அதி⁴ப்பேதா’தி வுத்தம், தம் ந க³ஹேதப்³ப³’’ந்தி வுத்தம். யம் பன சக்கு²ஸ்ஸ ரஹாபா⁴வஸாத⁴னத்த²ம் ‘‘ந ஹி அப்படிச்ச²ன்னே ஓகாஸே சக்கு²ஸ்ஸ ரஹோ ஸம்ப⁴வதீ’’திஆதி³ வுத்தம், தம் ந யுத்தம் அதிதூ³ரதரே டி²தஸ்ஸ காயேன ஓபா⁴ஸனம்பி ஹத்த²க்³கா³ஹாதீ³னிபி ஸல்லக்கே²தும் அஸக்குணேய்யத்தா. தேனேவ பாளியம் ‘‘சக்கு²ஸ்ஸ ரஹோ’’தி வுத்தம், அட்ட²கதா²யம் அப்படிக்கி²த்தம். ந கேவலஞ்ச அப்படிக்கி²த்தம், அத² கோ² ‘‘அனந்தோ⁴ ப³தி⁴ரோதி ச அந்தோ⁴ வா அப³தி⁴ரோபி ந கரோதீ’’தி ச வுத்தம், தஸ்மா த்³வேபி ரஹா இத⁴ க³ஹேதப்³பா³. ‘‘அந்தோத்³வாத³ஸஹத்தே²’’திஇமினா ஸோதஸ்ஸ ரஹோ த்³வாத³ஸஹத்தே²ன பரிச்சி²ன்னோதி இத³ம் த³ஸ்ஸேதி. சக்கு²ஸ்ஸ ரஹோ பன யத்த² டி²தஸ்ஸ காயவிகாராத³யோ ந பஞ்ஞாயந்தி, தேன பரிச்சி²ந்தி³தப்³போ³தி த³ட்ட²ப்³ப³ம். ப³தி⁴ரோ பன சக்கு²மாபீதி து³ட்டு²ல்லவாசாஸங்கா⁴தி³ஸேஸம் ஸந்தா⁴ய வுத்தம். து³ட்டு²ல்லாபத்தி வுத்தாதி புரிமஸிக்கா²பதே³ வுத்தேஹி அதி⁴கவஸேன து³ட்டு²ல்லாபத்தி ச வுத்தாதி ஏவமத்தோ² க³ஹேதப்³போ³, ந பன து³ட்டு²ல்லாபத்தி ஏவாதி காயஸம்ஸக்³க³ஸ்ஸாபி இத⁴ க³ஹேதப்³ப³தோ. தேனேவ ‘‘பாராஜிகாபத்திஞ்ச பரிஹாபேத்வா’’தி ஏத்தகமேவ வுத்தம், இதரதா² ‘‘காயஸம்ஸக்³க³ஞ்சா’’தி வத்தப்³ப³ம் ப⁴வேய்ய.

திஸமுட்டா²னந்திஆதி³ பன புரிமஸிக்கா²பதே³ ஆக³தேஹி அதி⁴கஸ்ஸ து³ட்டு²ல்லவாசாஸங்கா⁴தி³ஸேஸஸ்ஸ வஸேன வுத்தம் காயஸம்ஸக்³கா³தீ³னம்பி புரிமஸிக்கா²பதே³ ஏவ வுத்தத்தா, இத⁴ பன ந வுத்தந்திபி வத³ந்தி, வீமம்ஸித்வா க³ஹேதப்³ப³ம்.

து³தியஅனியதஸிக்கா²பத³வண்ணனா நிட்டி²தா.

நிட்டி²தோ அனியதவண்ணனானயோ.