4. சதுத்த²பாராஜிகம்

வக்³கு³முதா³தீரியபி⁴க்கு²வத்து²வண்ணனா

193. அதி⁴ட்டே²மாதி ஸம்வித³ஹாம. இரியாபத²ம் ஸண்ட²பேத்வாதி பதா⁴னானுரூபம் கத்வா. அனாக³தஸம்ப³ந்தே⁴ பன அஸதீதி பா⁴ஸிதோ ப⁴விஸ்ஸதீதி பாட²ஸேஸம் கத்வா அனாக³தஸம்ப³ந்தே⁴ அஸதி. பா⁴ஸிதோதி அதீதவசனம் கத²ம் அனாக³தவசனேன ஸம்ப³ந்த⁴முபக³ச்ச²தீதி ஆஹ லக்க²ணம் பனாதிஆதி³. ஈதி³ஸே ஹி டா²னே தா⁴துஸம்ப³ந்தே⁴ பச்சயாதி இமினா லக்க²ணேன தா⁴த்வத்த²ஸம்ப³ந்தே⁴ ஸதி அயதா²காலவிஹிதாபி பச்சயா ஸாத⁴வோ ப⁴வந்தீதி ஸத்³த³ஸத்த²விதூ³ வத³ந்தி.

194. வண்ணவாதி இமினா அபி⁴னவுப்பன்னவண்ணதா வுத்தா. பஸன்னமுக²வண்ணாதி இமினா முக²வண்ணஸ்ஸ அதிபணீததா வுத்தா. விப்பஸன்னச்ச²விவண்ணாதி இமினா பகதிஸரீரவண்ணஸ்ஸேவ யதா²வுத்தனயேன விப்பஸன்னதா வுத்தா. யஸ்மா இந்த்³ரியானம் உபாதா³ரூபத்தா நிஸ்ஸயவஸேனேவ பீணனந்தி ஆஹ ‘‘அபி⁴னிவிட்டோ²காஸஸ்ஸ பரிபுண்ணத்தா’’தி. பஞ்சப்பஸாதா³னம் விய ஹத³யரூபஸ்ஸாபி பரிபுண்ணதா வுத்தாயேவாதி ஆஹ ‘‘மனச்ச²ட்டா²னம் இந்த்³ரியான’’ந்தி. உத்³தே³ஸம் பரிபுச்ச²ம் அனுயுஞ்ஜந்தா இமம் ஸரீரஸோப⁴ம் நேவ பாபுணிம்ஸூதி ஸம்ப³ந்தோ⁴. யதா² தந்தி ஏத்த² தந்தி நிபாதமத்தம். சதுசக்கந்தி ஏத்த² பவத்தனட்டே²ன இரியாபதோ²வ சக்கந்தி வுத்தோ.

195. உபலப்³ப⁴ந்தீதி தி³ஸ்ஸந்தி, ஞாயந்தீதி அத்தோ². பசந்தோதி பீளேந்தோ, கே³ஹாதீ³னி வா ஸயம் ட³ஹந்தோ, அஞ்ஞேஹி வா பாசேந்தோ. உத்³த⁴தேதி உத்³த⁴ச்சபகதிகே. உன்னளேதி உக்³க³தனளஸதி³ஸேன உக்³க³ததுச்ச²மானேன ஸஹிதே. சபலேதி பத்தசீவரமண்ட³னாதி³னா சாபல்லேன யுத்தே. முக²ரேதி க²ரவசனே. பாகதிந்த்³ரியேதி அஸம்வுதத்தா கி³ஹிகாலே விய பகதியம் டி²திந்த்³ரியே. இரியாபத²ஸண்ட²பனாதீ³னீதி ஆதி³-ஸத்³தே³ன பச்சயபடிஸேவனஸாமந்தஜப்பானம் க³ஹணம் வேதி³தப்³ப³ம். பரமஸல்லேக²வுத்தீஹி மஹாஅரியவம்ஸேஹி பி⁴க்கூ²ஹி நிவுத்த²ஸேனாஸனானி லோகஸம்மதஸேனாஸனானி நாம. பரிபாசேதுந்தி விம்ஹாபனவஸேன பரிணாமேதும். பி⁴க்கா²சாரே அஸம்பஜ்ஜமானேதி இத³ம் ஜனபத³சாரிகம் சரந்தீதி இமினா ஸம்ப³ந்தி⁴தப்³ப³ம், ந பன பாளிம் வாசேந்தோதிஆதீ³ஹி, தானி பன பதா³னி அத்தனோ நிரந்தரவாஸட்டா²னேபி ஜனபதே³ஸுபி கத்தப்³ப³கிச்சத³ஸ்ஸனவஸேன வுத்தானி, தானி ச தே வத்தஸீஸேன கரோந்தி, ந லாப⁴னிமித்தம், தேனாஹ தந்தீதிஆதி³. கிச்சே²னாதி இமஸ்ஸேவ வேவசனம் கஸிரேனாதி. தது³ப⁴யம்பி பாரமீபூரணவாயாமம் ஸந்தா⁴ய வுத்தம். ஸாதா⁴ரணபரிக்கா²ரபா⁴வேனாதி ஸங்கி⁴கபரிக்கா²ரபா⁴வேன. ததா²பா⁴வதோ தே²னேத்வாதி அவிஸ்ஸஜ்ஜியஅவேப⁴ங்கி³யபா⁴வதோ தே²னேத்வா, ந டா²னாசாவனவஸேனாதி அதி⁴ப்பாயோ, தேனாஹ ‘‘குலதூ³ஸகது³க்கடம் ஆபஜ்ஜதீ’’தி. அஸந்தந்தி இமஸ்ஸ அபூ⁴தந்தி இத³ம் காரணவசனம், அனுப்பன்னத்தா அவிஜ்ஜமானந்தி அத்தோ². கிதவஸ்ஸேவாதி கிதவஸ்ஸ ஸகுணக³ஹணமிவ. கேராடிகஸ்ஸாதி ஸட²ஸ்ஸ. ஸமணோதி கோ³த்தமத்தம் அனுபோ⁴ந்தி தா⁴ரேந்தீதி கோ³த்ரபு⁴னோ, நாமமத்தஸமணாதி அத்தோ². து³ஜ்ஜானபரிச்சே²த³ந்தி அனந்தது³க்க²த்தா ‘‘ஏத்தகம் து³க்க²’’ந்தி ஸங்க்²யாவஸேன பரிச்சி²ந்தி³த்வா ஞாதும் ஸப்³ப³ஞ்ஞுதஞ்ஞாணேனாபி து³க்கரம், ந பன ஸரூபவஸேன ஞாதும் பு³த்³த⁴ஞாணஸ்ஸ அவிஸயபா⁴வா.

அதி⁴மானவத்து²வண்ணனா

196. அரஹத்தேதி அக்³க³ப²லே. ஞாணசக்கு²னாதி பச்சவேக்க²ணஞாணஸங்கா²தேன சக்கு²னா, அத² வா ப²லசித்தஸம்பயுத்தேனேவ ஞாணசக்கு²னா. அத்தனா ஸம்பயுத்தேனாபி ஹி ஞாணேன அஸம்மோஹதோ ஸயம் தி³ட்ட²ம் நாம ஹோதி, ததா² தஸ்மிம் அதி³ட்டே²தி அத்தோ². ஸப்³பே³ஸம் கிலேஸானம் பஹாயகவஸேன ஆஜானாதி, ஸமந்ததோ ஸப்³பே³ன வா பகாரேன ஜானாதீதி ‘‘அஞ்ஞா’’தி அக்³க³மக்³கோ³ வுச்சதி, தது³பசாரேன பன தப்ப²லம்பீதி ஆஹ ‘‘அஞ்ஞம் ப்³யாகரிம்ஸூதி அரஹத்தம் ப்³யாகரிம்ஸூ’’தி. அந்தரா ட²பேதீதி ஸேக²பூ⁴மியம் அதி⁴மானோ ட²பேதி. கிலேஸஸமுதா³சாரம் அபஸ்ஸந்தோதி புரிமமக்³க³த்தயவஜ்ஜா²னம்யேவ கிலேஸானம் வஸேன வுத்தம், ந ப⁴வராகா³தீ³னம்.

ஸவிப⁴ங்க³ஸிக்கா²பத³வண்ணனா

197. பகதிமனுஸ்ஸேஹி உத்தரிதரானம் பு³த்³தா⁴தி³உத்தமபுரிஸானம் அதி⁴க³மத⁴ம்மோ உத்தரிமனுஸ்ஸத⁴ம்மோதி ஆஹ உத்தரிமனுஸ்ஸானந்திஆதி³. பாளியம் (பாரா. 198) ‘‘அத்தி² ச மே ஏதே த⁴ம்மா மயீ’’தி ஏத்த² மேதி இத³ம் பத³பூரணமத்தம். அதி⁴க³ந்தப்³ப³தோ அதி⁴க³மஸங்கா²தஸ்ஸ ஜா²னாதி³னோ புச்சா² அதி⁴க³மபுச்சா², ஸா ச ஜா²னாதீ³ஸு ஸாமஞ்ஞதோ பவத்தாதி இதா³னி தத்த² பட²மஜ்ஜா²னம் வா து³தியாதீ³ஸு அஞ்ஞதரம் வா தத்தா²பி கஸிணாதி³ஆரம்மணேஸு கதரமாரம்மணம் ஜா²னம் வா லோகுத்தரேஸு ச ஸோதாபத்திமக்³க³ம் வா ஸகதா³கா³மிமக்³கா³தீ³ஸு அஞ்ஞதரம் வா தத்தா²பி ஸுஞ்ஞதவிமோக்க²ம் வா அப்பணிஹிதவிமோக்கா²தீ³ஸு அஞ்ஞதரம் வாதி ஏவம் பச்சேகம் பே⁴த³னித்³தா⁴ரணவஸேன புச்ச²னாகாரம் த³ஸ்ஸேதும் பாளியம் (பாரா. 198) ‘‘புன கதமேஸம் த்வம் த⁴ம்மானம் லாபீ⁴’’தி அயம் புச்சா² த³ஸ்ஸிதாதி த³ட்ட²ப்³பா³, தேனாஹ பட²மமக்³கா³தீ³ஸூதிஆதி³. யாய அனுக்கமபடிபத்தியா லோகுத்தரோ அதி⁴க³மோ ஆக³ச்ச²தி, ஸா புப்³ப³பா⁴க³படிபத்தி ஆக³மனபடிபதா³. ந ஸுஜ்ஜ²தீதி புச்சி²யமானோ படிபத்திக்கமம் உல்லங்கி⁴த்வா கதே²தி. அபனேதப்³போ³தி தயா வுத்தக்கமேனாயம் ந ஸக்கா அதி⁴க³ந்துந்தி அதி⁴க³தமானதோ அபனேதப்³போ³. ஸன்னிஹிதேஸு கப்பியேஸுபி சதூஸு பச்சயேஸு அலக்³க³த்தா ‘‘ஆகாஸே பாணிஸமேன சேதஸா’’தி வுத்தம். வுத்தஸதி³ஸம் ப்³யாகரணம் ஹோதீதி யோஜனா. கீ²ணாஸவபடிபத்திஸதி³ஸா படிபதா³ ஹோதி ஸுவிக்க²ம்பி⁴தகிலேஸத்தா. இத³ஞ்ச அரஹத்தம் படிஜானந்தஸ்ஸ வஸேன வுத்தம், தேனாஹ கீ²ணாஸவஸ்ஸ நாமாதிஆதி³. ஏவம் ஸுவிக்க²ம்பி⁴தகிலேஸஸ்ஸ வத்தனஸேக்க²த⁴ம்மபடிஜானனம் இமினா ப⁴யுப்பாத³னேன, அம்பி³லாதி³த³ஸ்ஸனே கே²ளுப்பாதா³தி³னா ச ந ஸக்கா வீமம்ஸிதும், தஸ்மா தஸ்ஸ வசனேனேவ தம் ஸத்³தா⁴தப்³ப³ம். அயம் பி⁴க்கு² ஸம்பன்னப்³யாகரணோதி இத³ம் ந கேவலம் அபா⁴யனகமேவ ஸந்தா⁴ய வுத்தம் ஏகச்சஸ்ஸ ஸூரஜாதிகஸ்ஸ புது²ஜ்ஜனஸ்ஸாபி அபா⁴யனதோ, ரஜ்ஜனீயாரம்மணானம் ப³த³ரஸாளவாதி³அம்பி³லமத்³த³னாதீ³னம் உபனயனேபி கே²ளுப்பாதா³தி³தண்ஹாபவத்தரஹிதம் ஸப்³ப³தா² ஸுஸோதி⁴தமேவ ஸந்தா⁴ய வுத்தந்தி க³ஹேதப்³ப³ம்.

அஸந்தகு³ணஸம்பா⁴வனலக்க²ணா பாபிச்சா²தி ஆஹ யா ஸா இதே⁴கச்சோதிஆதி³. ஆதி³-ஸத்³தே³ன அஸ்ஸத்³தோ⁴திஆதி³பாட²ம் ஸங்க³ண்ஹாதி. ஸாமஞ்ஞம் து³ப்பராமட்ட²ந்தி ஸமணத⁴ம்மஸங்கா²தம் ஸாமஞ்ஞம் க²ண்ட³ஸீலாதி³தாய து³ப்பராமட்ட²ம் து³ட்டு² க³ஹிதம் நிரயாய நிரயது³க்கா²ய தம் புக்³க³லம் தத்த² நிரயே உபகட்³ட⁴தி நிப்³ப³த்தாபேதீதி அத்தோ². ஸிதி²லோதி ஓலீயித்வா கரணேன ஸிதி²லகா³ஹேன கதோ, ஸதே²ன வா ஸாடே²ய்யேன ஆதி³ண்ணோ ஸிதி²லோ. பரிப்³ப³ஜோதி ஸமணபா⁴வோ. பி⁴ய்யோதி புப்³பே³ விஜ்ஜமானானம் ராக³ரஜாதீ³னம் உபரி அபரம்பி ரஜம் ஆகிரதீதி அத்தோ². பி⁴க்கு²பா⁴வோதி அத⁴ம்மிகபடிஞ்ஞாமத்தஸித்³தோ⁴ பி⁴க்கு²பா⁴வோ. அஜானமேவாதி ஏத்த² ஏவ-ஸத்³தோ³ அவதா⁴ரணே அஜானந்தோ ஏவாதி, ‘‘அஜானமேவ’’ந்திபி பாடோ², தத்த² பன ஏவம் ஜானாமி ஏவம் பஸ்ஸாமீதி யோஜேதப்³ப³ம்.

பத³பா⁴ஜனீயவண்ணனா

199. ஏவந்தி ச பட²மஜ்ஜா²னாதி³பராமஸனம் பட²மஜ்ஜா²னம் ஜானாமி து³தியாதி³ஜா²னந்தி. அஸுப⁴ஜ்ஜா²னாதீ³னீதி ஆதி³-ஸத்³தே³ன காயக³தாஸதிஜ்ஜா²னம் கஸிணஜ்ஜா²னம் கஸிணமூலகானி ஆருப்பஜ்ஜா²னானி ச ஸங்க³ண்ஹாதி. விமோக்கோ²தி சதுப்³பி³தோ⁴ மக்³கோ³, தஸ்ஸ ஸகு³ணதோ ஸுஞ்ஞதாதி³னாமம் த³ஸ்ஸேந்தோ ஆஹ ஸோ பனாயந்திஆதி³. மக்³கோ³ ஹி நாம பஞ்சஹி காரணேஹி நாமம் லப⁴தி ஸரஸேன வா பச்சனீகேன வா ஸகு³ணேன வா ஆரம்மணேன வா ஆக³மனேன வா. ஸசே ஹி ஸங்கா²ருபேக்கா² அனிச்சதோ ஸங்கா²ரே ஸம்மஸித்வா வுட்டா²தி, மக்³கோ³ அனிமித்தவிமோக்கே²ன விமுச்சதி. ஸசே து³க்க²தோ ஸம்மஸித்வா வுட்டா²தி, அப்பணிஹிதவிமோக்கே²ன விமுச்சதி. ஸசே அனத்ததோ ஸம்மஸித்வா வுட்டா²தி, ஸுஞ்ஞதவிமோக்கே²ன விமுச்சதி, இத³ம் ஸரஸதோ நாமம் நாம. யஸ்மா பனேஸ ஸங்கா²ரேஸு அனிச்சானுபஸ்ஸனாய நிச்சனிமித்தம் பஜஹந்தோ ஆக³தோ, தஸ்மா அனிமித்தோ. து³க்கா²னுபஸ்ஸனாய ஸுக²ஸஞ்ஞம் பணிதி⁴ம் பத்த²னம் பஹாய ஆக³தத்தா அப்பணிஹிதோ. அனத்தானுபஸ்ஸனாய அத்தஸஞ்ஞம் பஹாய அத்தஸுஞ்ஞதாத³ஸ்ஸனவஸேன ஸுஞ்ஞதா ஹோதி, இத³ம் பச்சனீகதோ நாமம் நாம. ராகா³தீ³ஹி பனேஸ ஸுஞ்ஞதத்தா ஸுஞ்ஞதோ, ரூபனிமித்தாதீ³னம், ராக³னிமித்தாதீ³னம் ஏவ வா அபா⁴வேன அனிமித்தோ, ராக³பணிதி⁴ஆதீ³னம் அபா⁴வதோ அப்பணிஹிதோதி வுச்சதி, இத³ம் அஸ்ஸ ஸகு³ணதோ நாமம். ராகா³தி³ஸுஞ்ஞம் அனிமித்தம் அப்பணிஹிதஞ்ச நிப்³பா³னம் ஆரம்மணம் கரோதீதி ஸுஞ்ஞதோ அனிமித்தோ அப்பணிஹிதோதி வுச்சதி, இத³மஸ்ஸ ஆரம்மணதோ நாமம். ஆக³மனம் பன து³வித⁴ம் விபஸ்ஸனாக³மனம் மக்³கா³க³மனஞ்ச. தத்த² மக்³கே³ விபஸ்ஸனாக³மனமேவ, ப²லே பன மக்³கா³னந்தரே மக்³கா³க³மனம், ப²லஸமாபத்தியம் விபஸ்ஸனாக³மனம்பி. அனத்தானுபஸ்ஸனாவஸேன மக்³கோ³ ஸுஞ்ஞதோ அனிச்சது³க்கா²னுபஸ்ஸனாஹி அனிமித்தோ அப்பணிஹிதோதி ஏவம் விபஸ்ஸனா அத்தனோ நாமம் மக்³க³ஸ்ஸ தே³தி, மக்³கோ³ ப²லஸ்ஸாதி இத³ம் ஆக³மனதோ நாமம்.

ஸுஞ்ஞத்தாதி விவித்தத்தா. ராகா³த³யோவ பதிட்டா²னட்டே²ன பணிதீ⁴தி ஆஹ ‘‘ராக³தோ³ஸமோஹபணிதீ⁴ன’’ந்தி. இமிஸ்ஸா விஜ்ஜாயாதி தி³ப்³ப³சக்கு²விஜ்ஜாயாதிஆதி³னா ஏகேகவிஜ்ஜம் ஸந்தா⁴ய வத³ந்தி. ஏவம் ஏகிஸ்ஸாபி நாமம் அக்³க³ஹேத்வாபி தா ஏவ ஸந்தா⁴ய ‘‘விஜ்ஜானம் லாபி⁴ம்ஹீ’’தி ப⁴ணந்தோபி பாராஜிகோ ஹோதீதி ஸங்கே²பட்ட²கதா²யம் அதி⁴ப்பாயோ. வத்து²விஜ்ஜாதீ³னி பன ஸந்தா⁴ய வத³ந்தோ ந ஹோதி. ஏகேககோட்டா²ஸவஸேனாதி மஹாஅட்ட²கதா²யம் வுத்தனயேன லோகுத்தரவிஸேஸம் அகத்வா கேவலம் ‘‘ஸதிபட்டா²னானம் லாபீ⁴’’தி ஏகேககோட்டா²ஸவஸேனாதி அதி⁴ப்பாயோ. தத்தா²தி தேஸு கோட்டா²ஸேஸு. கிலேஸானம் பஹானம் நாம அபா⁴வமத்தம்பி லோகுத்தரகிச்சத்தா லோகுத்தரந்தி ஸமத்தே²தும் தம் பனாதிஆதி³ வுத்தம். ராகா³ சித்தம் வினீவரணதாதி ராக³தோ சித்தஸ்ஸ வினீவரணதா, ததோ ராக³தோ விமுத்தத்தா ஏவ வீதராக³னீவரணதாதி அத்தோ², யா ச பஞ்ச விஜ்ஜாதி யோஜேதப்³ப³ம். ந ஆக³தாதி இத⁴ பத³பா⁴ஜனே ‘‘ஞாணந்தி திஸ்ஸோ விஜ்ஜா’’தி (பாரா. 199) வுத்தத்தா ஸேஸா பஞ்ச விஜ்ஜா ந ஆக³தாதி அத்தோ². நிப்³ப³த்திதலோகுத்தரத்தாதி லோகியத⁴ம்மஸாதா⁴ரணஸங்க²தஸ்ஸாபி அபா⁴வா லோகியேஹி ஸப்³ப³தா² அஸம்மிஸ்ஸலோகுத்தரத்தா. அஞ்ஞந்தி ஸங்கே²பட்ட²கதா²தி³ம் வத³ந்தி, தம்பி தத்தே²வ படிக்கி²த்தந்தி ஸம்ப³ந்தோ⁴.

200. புன ஆனேத்வா பட²மஜ்ஜா²னாதீ³ஹி ந யோஜிதந்தி ஏத்த² ‘‘பட²மஜ்ஜா²னேனாதி பாடோ²’’தி கேசி வத³ந்தி, தம் யுத்தமேவ ஆதி³-ஸத்³தே³ன க³ஹேதப்³ப³ஸ்ஸ ஜா²னஸ்ஸ அபா⁴வா. பட²மஜ்ஜா²னமூலகஞ்ஹி ஏகமேவ க²ண்ட³சக்கம். கத்துஸாத⁴னோபி ப⁴ணித-ஸத்³தோ³ ஹோதீதி ஆஹ அத² வாதிஆதி³. யேன சித்தேன முஸா ப⁴ணதி, தேனேவ சித்தேன ந ஸக்கா ‘‘முஸா ப⁴ணாமீ’’தி ஜானிதும், அந்தரந்தரா பன அஞ்ஞாஹி மனோத்³வாரவீதீ²ஹி ‘‘முஸா ப⁴ணாமீ’’தி ஜானாதீதி வுத்தம் ‘‘ப⁴ணந்தஸ்ஸ ஹோதி முஸா ப⁴ணாமீ’’தி. அயமேத்த² அத்தோ² த³ஸ்ஸிதோதி தீஹி அங்கே³ஹி ஸமன்னாக³தோ முஸாவாதோ³தி அயமத்தோ² த³ஸ்ஸிதோ. த³வாதி ஸஹஸா. ரவாதி அஞ்ஞம் வத்துகாமஸ்ஸ க²லித்வா அஞ்ஞப⁴ணனம். தம் ஜானாதீதி தம்ஞாணம், தஸ்ஸ பா⁴வோ தம்ஞாணதா, ஞாணஸ்ஸ விஸயவிஸயீபா⁴வேன அத்தஸம்வேத³னந்தி அத்தோ². ஞாணஸமோதா⁴னந்தி ப³ஹூனம் ஞாணானம் ஏகஸ்மிம் க²ணே ஸமோதா⁴னம், ஸஹுப்பத்தீதி அத்தோ². யேன சித்தேன ‘‘முஸா ப⁴ணிஸ்ஸ’’ந்தி ஜானாதீதி இத³ம் புப்³ப³பா⁴க³சேதனஞ்ச ஸன்னிட்டா²னசேதனஞ்ச ஏகதோ கத்வா வுத்தம். யேன சித்தேன புப்³ப³பா⁴க³சேதனாபூ⁴தேன ஸன்னிட்டா²னசேதனாபூ⁴தேன ச விஸம்வாதி³தப்³ப³ஸத்தஸங்கா²ரே ஜானாதி, யேன சித்தேன முஸா ப⁴ணிஸ்ஸந்தி அத்தோ². தேனேவ…பே… பரிச்சஜிதப்³பா³தி தேனேவ சித்தேன ‘‘ஏவம் அஹம் முஸா ப⁴ணாமீ’’தி வா ‘‘ப⁴ணித’’ந்தி வா ததே³வ முஸாவாத³சித்தமாரம்மணம் கத்வா பி⁴க்கு² ஜானாதீதி ஏவம் புப்³பா³பரஸன்னிட்டா²னசேதனாக்க²ணேஸு தீஸு ஏகேனேவ சித்தேன ஞாணவிஸயஞ்ச ஞாணஞ்சாதி உப⁴யம்பி ஏகக்க²ணே புக்³க³லோ ஜானாதீதி அயம் தம்ஞாணதா பரிச்சஜிதப்³பா³ விஸயஸ்ஸேவ ததா³ பகாஸனதோதி அதி⁴ப்பாயோ, தேனாஹ ந ஹீதிஆதி³. யதி³ ஞாணஸ்ஸ அத்தனோ ஸரூபம் ந ஞாயதி, கத²ம் பச்சி²மம் சித்தம் ஜானாதீதி ஆஹ புரிமம் புரிமந்திஆதி³. தத்த² ப⁴ணிஸ்ஸாமீதிஆதி³னா தீஸு காலேஸு உப்பன்னம் புரிமபுரிமசித்தம் அத்தானம் விஸயம் கத்வா உப்பஜ்ஜமானஸ்ஸ பச்சி²மஸ்ஸ பச்சி²மஸ்ஸ சித்தஸ்ஸ ததா² உப்பத்தியா பச்சயோ ஹோதீதி அத்தோ². தேனாதி யேன காரணேன தீஸு க²ணேஸு சித்தானி தத³ஞ்ஞேஹேவ சித்தேஹி ஜானிதப்³பா³னி, தானி ச புரிமபுரிமசித்தேனேவ அவஸ்ஸம் உப்பஜ்ஜந்தி, தேன காரணேனாதி அத்தோ². தஸ்மிம் ஸதீதி ப⁴ணிஸ்ஸாமீதி புப்³ப³பா⁴கே³ ஸதி. ஸேஸத்³வயந்தி ப⁴ணாமி, ப⁴ணிதந்தி இத³ம் த்³வயம் ந ஹேஸ்ஸதீதி ஏதம் நத்தீ²தி யோஜனா ஹோதியேவாதி அத்தோ². ஏகம் விய பகாஸதீதி பி⁴ன்னக்க²ணானம்பி நிரந்தருப்பத்தியா ‘‘ததே³வேத³’’ந்தி க³ஹேதப்³ப³தம் ஸந்தா⁴ய வத³தி.

ப³லவத⁴ம்மவினிதா⁴னவஸேனாதி ப³லவகா³ஹஸ்ஸ வினிதா⁴னவஸேன. து³ப்³ப³லது³ப்³ப³லானந்தி து³ப்³ப³லது³ப்³ப³லானம் கா³ஹானம். ஸகபா⁴வபரிச்சஜனவஸேனாதி அத்தனோ ஸந்தகபா⁴வஸ்ஸ பரிச்சஜனவஸேன.

207. உத்தாஸிதத்தாதி ப⁴யம் ஜனேத்வா விய பலாபிதத்தா. ஏவம் பலாபிதோ ந புன தம் டா²னம் ஆக³ச்ச²தீதி ஆஹ ‘‘புன அனல்லீயனபா⁴வத³ஸ்ஸனவஸேனா’’தி. கே²ட-ஸத்³த³ம் ஸத்³த³த்த²விதூ³ உத்தாஸத்தே² பட²ந்தீதி ஆஹ ஸ்வாயமத்தோ²திஆதி³. அணு ஏவ அணுஸஹக³தம், அணுத்தேன வா யுத்தந்தி அத்தோ².

வத்துகாமவாரகதா²வண்ணனா

215. கேவலஞ்ஹியந்தி கேவலஞ்ஹி அயம் வாரோதி அஜ்ஜா²ஹரிதப்³ப³ம். தங்க²ணஞ்ஞேவ ஜானாதீதி பகதியா வசனானந்தரம் விஜானனம் ஸந்தா⁴ய வுத்தம். ஏவம் பன வசீபே⁴த³ம் அகத்வா ‘‘யோ இமம்ஹா ஆவாஸா பட²மம் பக்கமிஸ்ஸதி, நம் மயம் ‘அரஹா’தி ஜானிஸ்ஸாமா’’தி ஏவம் கதஸங்கேதா விஹாரா பட²மம் பக்கமனேன தஸ்மிம் க²ணே அவீதிவத்தேபி நிக்க²ந்தமத்தேபி பாராஜிகம் அஞ்ஞதரோ பி⁴க்கு² ‘‘மம் ‘அரஹா’தி ஜானந்தூ’’தி தம்ஹா ஆவாஸா பட²மம் பக்காமீதி ஆக³தவத்து²ம்ஹி (பாரா. 227) விய. விஞ்ஞத்திபதே²தி காயவசீவிஞ்ஞத்தீனம் க³ஹணயோக்³கே³ பதே³ஸே, தேன விஞ்ஞத்திபத²ம் அதிக்கமித்வா டி²தோ கோசி தி³ப்³பே³ன சக்கு²னா காயவிகாரம் தி³ஸ்வா தி³ப்³பா³ய ஸோததா⁴துயா வசீபே⁴த³ஞ்ச ஸுத்வா ஜானாதி, ந பாராஜிகந்தி தீ³பேதி. பாளியம் ‘‘படிவிஜானந்தஸ்ஸ ஆபத்தி பாராஜிகஸ்ஸா’’தி (பாரா. 215) இமஸ்மிம் படிவிஜானனவாரே யஸ்மிம் அக்க²ரே வா உச்சாரிதே காயப்பயோகே³ வா கதேயேவ அயம் பட²மஜ்ஜா²னம் ஸமாபன்னோதிஆதி³அத்த²ம் பரோ விஜானாதி, ததோ புரிமேஸு அக்க²ருச்சாரணாதி³ப்பயோகே³ஸு து²ல்லச்சயம் ஆபஜ்ஜித்வா பச்சி²மேவ படிவிஜானனபயோக³க்க²ணே பாராஜிகம் ஆபஜ்ஜதீதி வேதி³தப்³ப³ம் து²ல்லச்சயஸ்ஸேவேத்த² ஸாமந்தத்தா, தேனேவ பு³த்³த⁴த³த்தாசரியேன –

‘‘து³க்கடம் பட²மஸ்ஸேவ, ஸாமந்தமிதி வண்ணிதம்;

ஸேஸானம் பன திண்ணம்பி, து²ல்லச்சயமுதீ³ரித’’ந்தி –

வுத்தம், அயஞ்சத்தோ² ‘‘ந படிவிஜானந்தஸ்ஸ ஆபத்தி து²ல்லச்சயஸ்ஸா’’தி இமினா ஸுத்தேன ஸங்க³ஹிதோதி த³ட்ட²ப்³போ³. உக்³க³ஹபரிபுச்சா²தி³வஸேனாதிஆதி³னா ஜா²னஸமாதி⁴ஆதி³ஸத்³தா³னமத்தே²ஸு புப்³பே³ அகதபரிசயத்தா ஸுத்வா ‘‘அத்த²ம் ஈதி³ஸ’’ந்தி அஜானித்வா கேவலம் ‘‘விஸிட்டோ² கோசி ஸமணகு³ணோ அனேன லத்³தோ⁴’’தி பரேன ஞாதேபி பாராஜிகமேவாதி த³ஸ்ஸேதி.

அனாபத்திபே⁴த³கதா²வண்ணனா

220. அனுல்லபனாதி⁴ப்பாயஸ்ஸாதி ‘‘ஏவம் வுத்தே உத்தரிமனுஸ்ஸத⁴ம்மோ மயா பகாஸிதோ ஹோதீ’’தி அமனஸிகத்வா ‘‘நாஹம், ஆவுஸோ, மச்சுனோ பா⁴யாமீ’’திஆதி³கம் கதே²ந்தஸ்ஸ. ஏவம் கதே²ந்தோ ச வோஹாரதோ அஞ்ஞம் ப்³யாகரோந்தோ நாம ஹோதீதி வுத்தம் ‘‘அஞ்ஞம் ப்³யாகரோந்தஸ்ஸா’’தி. பா⁴யந்தோதி ‘‘ஞத்வா க³ரஹந்தி நு கோ²’’தி பா⁴யந்தோ.

பத³பா⁴ஜனீயவண்ணனானயோ நிட்டி²தோ.

வினீதவத்து²வண்ணனா

223. ஸேக்க²பூ⁴மியந்தி இமினா ஜா²னபூ⁴மிம்பி ஸங்க³ண்ஹாதி. திண்ணம் விவேகானந்தி காயசித்தஉபதி⁴விவேகானம். பிண்டா³ய சரணஸ்ஸ போ⁴ஜனபரியோஸானதாய வுத்தம் ‘‘யாவ போ⁴ஜனபஅயோஸான’’ந்தி. அந்தரக⁴ரே பு⁴த்வா ஆக³ச்ச²ந்தஸ்ஸாபி வுத்தனயேனேவ ஸம்பா⁴வனிச்சா²ய சீவரஸண்டா²பனாதீ³னி கரோந்தஸ்ஸ து³க்கடமேவ, பாளியம் பன து³க்கராதி³வத்தூ²ஸு ‘‘அனாபத்தி அனுல்லபனாதி⁴ப்பாயஸ்ஸா’’தி இத³ம் து²ல்லச்சயேனாபி அனாபத்தித³ஸ்ஸனத்த²ம் வுத்தம். உல்லபனாதி⁴ப்பாயஸ்ஸாபி ஹி ‘‘நாவுஸோ, து³க்கரம் அஞ்ஞம் ப்³யாகாது’’ந்தி வுத்தே து²ல்லச்சயமேவ அத்துபனாயிகத்தாபா⁴வதோதி த³ட்ட²ப்³ப³ம்.

227. ந தா³னாஹம் தத்த² க³மிஸ்ஸாமீதி புன தத்த² வஸிதட்டா²னே ந க³மிஸ்ஸாமி, ஏவம் ஸதி பட²மம் க³தோ அயம் புன ச நாக³தோ, தஸ்மா அரஹாதி மஞ்ஞிஸ்ஸந்தீதி அதி⁴ப்பாயோ. தம் டா²னந்தி ஆவாஸம் வாதிஆதி³னா புப்³பே³ பரிச்சி²ன்னட்டா²னம். பத³ஸா க³மனம் ஸந்தா⁴ய கதிகாய கதத்தா யானேனாதிஆதி³ வுத்தம். விஜ்ஜாமயித்³தி⁴ம் ஸந்தா⁴ய ‘‘இத்³தி⁴யா’’தி வுத்தம் உல்லபனாதி⁴ப்பாயஸ்ஸ அபி⁴ஞ்ஞித்³தி⁴யா அஸம்ப⁴வதோ. அஞ்ஞமஞ்ஞம் ரக்க²ந்தீதி உல்லபனாதி⁴ப்பாயே ஸதிபி ஏகஸ்ஸாபி பட²மக³மனாபா⁴வா ரக்க²ந்தி. ஸசே பன கதிகம் கத்வா நிஸின்னேஸு ஏகம் த்³வே ட²பேத்வா அவஸேஸா உல்லபனாதி⁴ப்பாயேன ஏகதோ க³ச்ச²ந்தி, க³தானம் ஸப்³பே³ஸம் பாராஜிகமேவ. தேஸு யஸ்ஸ உல்லபனாதி⁴ப்பாயோ நத்தி², தஸ்ஸ அனாபத்தி. ஏதந்தி ஹேட்டா² வுத்தம் ஸப்³ப³ம் கதிகவத்தம். நானாவேரஜ்ஜகாதி நானாஜனபத³வாஸினோ. ஸங்க⁴லாபோ⁴தி யதா²வுட்³ட⁴ம் பாபுணனககோட்டா²ஸோ. அயஞ்ச படிக்கே²போ அவிஸேஸேத்வா கரணம் ஸந்தா⁴ய கதோ, விஸேஸேத்வா பன ‘‘ஏத்தகோ அஸுகஸ்ஸா’’தி பரிச்சி²ந்தி³த்வா அபலோகேத்வா தா³தும் வட்டதி.

228. த⁴ம்மதா⁴தூதி ஸப்³ப³ஞ்ஞுதஞ்ஞாணம், த⁴ம்மானம் ஸபா⁴வோ வா. உபபத்தீதி அத்தபா⁴வம் ஸந்தா⁴ய வத³தி. து³ஸ்ஸத்³தா⁴பயா ஹோந்தீதி புது²ஜ்ஜனே ஸந்தா⁴ய வுத்தம், ந லக்க²ணத்தே²ராதி³கே அரியபுக்³க³லே. விதுடே³ந்தீதி வினிவிஜ்ஜி²த்வா டே³ந்தி க³ச்ச²ந்தி, பா²ஸுளந்தரிகாயோ சி²த்³தா³வசி²த்³த³ம் கத்வா தாஹி க³ச்ச²ந்தீதி நிஸ்ஸக்கவஸேன அத்தோ². விதுதே³ந்தீதி பாடே² பா²ஸுளந்தரிகாஹீதி ஆதா⁴ரத்தே² நிஸ்ஸக்கவசனம். லோஹதுண்டே³ஹீதி காளலோஹமயேஹி துண்டே³ஹி. அச்ச²ரியம் வதாதி க³ரஹிதப்³ப³தாய அச்ச²ரம் பஹரிதும் யுத்தரூபம். சக்கு²பூ⁴தாதி லோகஸ்ஸ சக்கு² விய பூ⁴தா ஸஞ்ஜாதா, சக்கு²ஸதி³ஸாதிபி அத்தோ². தஸ்ஸேவ கம்மஸ்ஸாதி யேன கோ³கா⁴தககம்மேனேவ நிரயே நிப்³ப³த்தோ, தஸ்ஸேவாதி அத்தே² க³ய்ஹமானே ஏகாய சேதனாய ப³ஹுபடிஸந்தி⁴யோ ஹோந்தீதி ஆபஜ்ஜதி, ந சேதம் யுத்தம் ஏகஸ்ஸ அம்பா³தி³பீ³ஜஸ்ஸ அனேகங்குருப்பத்தி வியாதி தம் பரிஹரந்தோ ஆஹ தஸ்ஸ நானாசேதனாஹி ஆயூஹிதஸ்ஸாதிஆதி³, தேன கோ³கா⁴தககம்மக்க²ணே புப்³ப³சேதனா அபரசேதனா ஸன்னிட்டா²பகசேதனாதி ஏகஸ்மிம்பி பாணாதிபாதே ப³ஹூ சேதனா ஹோந்தி, நானாபாணாதிபாதேஸு வத்தப்³ப³மேவ நத்தி². தத்த² ஏகாய சேதனாய நரகே பசித்வா தத³ஞ்ஞசேதனாஸு ஏகாய அபராபரியசேதனாய இமஸ்மிம் பேதத்தபா⁴வே நிப்³ப³த்தோதி த³ஸ்ஸேதி, தேனாஹ ‘‘அவஸேஸகம்மம் வா கம்மனிமித்தம் வா’’தி. ஏத்த² ச கம்மஸரிக்க²விபாகுப்பத்திம் ஸந்தா⁴ய கம்மகம்மனிமித்தானமேவ க³ஹணம் கதம், ந க³தினிமித்தஸ்ஸ, தேனாஹ ‘‘அட்டி²ராஸியேவ நிமித்தம் அஹோஸீ’’தி. பாளியம் விதச்சே²ந்தீதி துண்டே³ஹி தச்சே²ந்தோ விய லுஞ்சந்தி. விராஜேந்தீதி விலிக²ந்தி.

229. வல்லூரவிக்கயேனாதி ஸுக்கா²பிதமம்ஸவிக்கயேன. நிப்பக்க²சம்மேதி விக³தபக்க²லோமசம்மே. ஏகம் மிக³ந்தி தீ³பகமிக³ம். காரணாஹீதி கா⁴தனாஹி. ஞத்வாதி கம்மட்டா²னம் ஞத்வா.

230. மங்க³னவஸேன உலதீதி மங்கு³லி, விரூபபீ³ப⁴ச்ச²பா⁴வேன பவத்ததீதி அத்தோ². சித்தகேளிந்தி சித்தருசியம் அனாசாரகீளம்.

231. நிஸ்ஸேவாலபணககத்³த³மோதி திலபீ³ஜகாதி³ஸேவாலேன நீலமண்டூ³கபிட்டி²வண்ணேன உத³கபிட்டே² உத³கம் நீலவண்ணம் குருமானேன பணகேன கத்³த³மேன ச விரஹிதோ. உண்ஹபா⁴வேன தபனதோ தபம் உத³கம் அஸ்ஸாதி தபோத³காதி வத்தப்³பே³ க-காரலோபம் கத்வா ‘‘தபோதா³’’தி வுச்சதி. பேதலோகோதி பகட்டே²ன அகுஸலகம்மேன ஸுக³திதோ து³க்³க³திம் இதானம் க³தானம் லோகோ ஸமூஹோ, நிவாஸட்டா²னம் வா. கதஹத்தா²தி த⁴னுஸிப்பே ஸுட்டு² ஸிக்கி²தஹத்தா², அவிரஜ்ஜ²னலக்க²வேதா⁴தி அத்தோ². ஸிப்பத³ஸ்ஸனவஸேன ராஜகுலாதீ³ஸு ராஜஸமூஹம் உபேச்ச கதம் அஸனம் ஸரக்கே²போ ஏதேஸந்தி கதுபாஸனா, ஸப்³ப³த்த² த³ஸ்ஸிதஸிப்பாதி அத்தோ². பப⁴க்³கோ³தி பப⁴ஞ்ஜிதோ, பராஜிதோதி அத்தோ².

232. ஆனேஞ்ஜஸமாதி⁴ந்தி அரூபஸமாபத்தியம் நிருத்³தே⁴ ஸதிபி ஸத்³த³கண்டகேன உட்டா²னாரஹோ ரூபாவசரஸமாதி⁴யேவ இத⁴ வத்தப்³போ³தி ஆஹ அனேஜம் அசலந்திஆதி³. ஸமாதி⁴பரிபந்த²கேதி விதக்காதி³கே ஸந்தா⁴ய வத³தி, இத³ம் பன பட²மபோ³தி⁴யம் உப்பன்னம்பி வத்து²ம் அனாசாரமத்தவஸேன பி⁴க்கூ²ஹி சோதி³தேபி ப⁴க³வதா ‘‘அனாபத்தி, பி⁴க்க²வே, மோக்³க³ல்லானஸ்ஸா’’தி (பாரா. 228) ஏவம் ஆயதிம் அத்தனா பஞ்ஞபியமானபாராஜிகானுகு³ணம் ததா³ ஏவ வினீதந்தி த⁴ம்மஸங்கா³ஹகத்தே²ரேஹி பச்சா² பஞ்ஞத்தஸ்ஸ இமஸ்ஸ ஸிக்கா²பத³ஸ்ஸ வினீதவத்து²பா⁴வேன ஸங்க³ஹமாரோபிதந்தி த³ட்ட²ப்³ப³ம். ஸாவகானம் உப்படிபாடியா அனுஸ்ஸரணாபா⁴வம் த³ஸ்ஸேதும் ‘‘ந உப்படிபாடியா’’தி வுத்தம். து³க்கரம் கதந்தி அனந்தரே பஞ்சகப்பஸதிகே காலே விஞ்ஞாணஸந்ததிம் அதி³ஸ்வாபி அஸம்முய்ஹித்வா பரதோ ததியத்தபா⁴வே தி³ட்ட²சுதிசித்தேன ஸத்³தி⁴ம் வத்தமானப⁴வபடிஸந்தி⁴யா அனுமானேனாபி காரியகாரணாபா⁴வக³ஹணம் நாம ஸாவகானம் து³க்கரத்தா வுத்தம். படிவித்³தா⁴தி படிவித்³த⁴ஸதி³ஸா. யதா² நாம ஸத்ததா⁴ பா²லிதஸ்ஸ சாமரவாலலோமஸ்ஸ ஏகாய அக்³க³கோடியா அபரஸ்ஸ வாலலோமம்ஸுனோ கோடிம் தூ³ரே ட²த்வா விஜ்ஜே²ய்ய ஆவுனந்தோ விய படிபாதே³ய்ய, ஏவமேவ இமினாபி து³க்கரம் கதந்தி வுத்தம் ஹோதி. ஏதத³க்³க³ந்தி ஏஸோ அக்³கோ³. யதி³த³ந்தி யோ அயம்.

நிக³மனவண்ணனா

233. இதா⁴தி பி⁴க்கு²விப⁴ங்கே³. உத்³தி³ட்ட²பாராஜிகபரிதீ³பனந்தி ஸிக்கா²பதே³ஸு பாதிமோக்கு²த்³தே³ஸவஸேன உத்³தி³ட்ட²பாராஜிகபரிதீ³பனம், ந பன ஸப்³ப³ஸ்மிம் பாராஜிகவிப⁴ங்கே³ ஆக³தஆபத்திபரிதீ³பனம் தத்த² து²ல்லச்சயாதீ³னம்பி ஆக³தத்தா தேனேவ உத்³தி³ட்ட²-ஸத்³தே³ன வுத்தவிப⁴ங்க³ஸ்ஸ நித்³தே³ஸத்தா. பி⁴க்கு²னீனம் அஸாதா⁴ரணானி சத்தாரீதி உப்³ப⁴ஜாணுமண்ட³லிகா (பாசி. 658) வஜ்ஜப்படிச்சா²தி³கா (பாசி. 665) உக்கி²த்தானுவத்திகா (பாசி. 669) அட்ட²வத்து²காதி (பாசி. 675) இமானி பி⁴க்கூ²ஹி அஸாதா⁴ரணானி பி⁴க்கு²னீனம் ஏவ பஞ்ஞத்தானி பாராஜிகானீதி அத்தோ². வத்து²விபன்னாதி பப்³ப³ஜ்ஜுபஸம்பதா³னம் வத்து²பா⁴வோ வத்து² நாம, தேன வத்து²மத்தேன விபன்னா, விபன்னவத்து²காதி அத்தோ². அஹேதுகபடிஸந்தி⁴காதி மக்³கா³னுப்பத்திகாரணமாஹ. கிஞ்சாபி து³ஹேதுகானம்பி மக்³கோ³ நுப்பஜ்ஜதி, தே பன பப்³ப³ஜ்ஜுபஸம்பதா³ஸு ட²த்வா ஆயதிம் மக்³க³ஹேதும் ஸம்பாதே³தும் ஸக்கோந்தி, அஹேதுகா பன பரிஸுத்³தே⁴ சதுபாரிஸுத்³தி⁴ஸீலே ட²த்வா ஸம்பாதே³தும் ந ஸக்கோந்தி, தஸ்மா தே தம்பி படிச்ச வத்து²விபன்னாவாதி வேதி³தப்³பா³. பாராஜிகாதி கம்மவிபத்தியா படிஸந்தி⁴க்க²ணேயேவ பராஜயம் ஆபன்னா. தே²ய்யஸம்வாஸகாதீ³னம் கி³ஹிபா⁴வே ட²த்வா விபஸ்ஸனாய வாயமந்தானம்பி தஸ்மிம் அத்தபா⁴வே மக்³கு³ப்பத்திஅபா⁴வதோ ‘‘மக்³கோ³ பன வாரிதோ’’தி வுத்தம். தீ³க⁴தாய லம்ப³மானம் அங்க³ஜாதம் லம்ப³ம் நாம, தம் யஸ்ஸ அத்தி² ஸோ லம்பீ³. ஸோ ஏத்தாவதா ந பாராஜிகோ, தம் பன தீ³க⁴ம் அங்க³ஜாதம் அத்தனோ முகே² வா வச்சமக்³கே³ வா ஸேவனாதி⁴ப்பாயேன பவேஸேந்தோவ பாராஜிகோ, இத⁴ பன வச்சமக்³கே³ பவேஸேந்தோவ அதி⁴ப்பேதோ முது³பிட்டி²கேனேவ முகே² பவேஸனஸ்ஸ வுத்தத்தா. ஸோபி ஹி கதபரிகம்மதாய முது³பூ⁴தாய பிட்டி²யா ஓனமித்வா அத்தனோ அங்க³ஜாதம் முகே²ன க³ண்ஹந்தோவ பாராஜிகோ ஹோதி, ந கேவலோ. யோ பன முகே²ன அத்தனோ வச்சமக்³க³ம் வா பரேஸம் வச்சமக்³க³முக²ம் வா இத்தீ²னம் பஸ்ஸாவமக்³க³ம் வா க³ண்ஹாதி, தஸ்ஸ ச புரிஸனிமித்தேன புரிஸனிமித்தம் சு²பந்தஸ்ஸ ச மக்³கே³ன மக்³க³படிபாத³னேபி பாராஜிகம் ந ஹோதி புரிஸனிமித்தேன ததி³தரமக்³க³ஸம்படிபாத³னேனேவ மேது²னத⁴ம்மவோஹாரதோ. பரஸ்ஸ அங்க³ஜாதே அபி⁴னிஸீத³தீதி பரஸ்ஸ உத்தானம் ஸயந்தஸ்ஸ கம்மனியே அங்க³ஜாதே அத்தனோ வச்சமக்³க³ம் பவேஸேந்தோ தஸ்ஸூபரி நிஸீத³தி, இத³ஞ்ச உபலக்க²ணமத்தம் பரேஸம் அங்க³ஜாதம் வச்சமக்³கே³ பவேஸேந்தோ ஸாதி³யந்தோபி பாராஜிகோவ, ப³லக்காரேன பன வச்சமக்³கே³ வா முகே² வா பரேன பவேஸியமானோ யதி³ ந ஸாதி³யதி, அனாபத்திகோவ. ஏத்த² அஸாதி³யனம் நாம து³க்கரம் விரஜ்ஜிதப்³ப³தோ. ஏத்த² ச அனுபஸம்பன்னபா⁴வே ட²த்வா மாதுபிதுஅரஹந்தேஸு அஞ்ஞதரம் கா⁴தேந்தோ பி⁴க்கு²னிம் தூ³ஸேந்தோ ச ஸாமணேரபப்³ப³ஜ்ஜம்பி ந லப⁴தீதி த³ஸ்ஸனத்த²ம் விஸும் க³ஹிதத்தா மாதுகா⁴தகாதீ³னம் சதுன்னம் ததியபட²மபாராஜிகேஸு அந்தோக³த⁴தா வேதி³தப்³பா³. யதா² ஏத்த², ஏவம் கி³ஹிபா⁴வே ட²த்வா லோஹிதுப்பாத³ம் கரோந்தோ லோஹிதுப்பாத³கோவாதி க³ஹேதப்³ப³ம். ஏதேன பரியாயேனாதி உபி⁴ன்னம் ராக³பரியுட்டா²னஸங்கா²தேன பரியாயேன. து³தியவிகப்பே கச்சி அத்தா²தி பத³ச்சே²தோ³ வேதி³தப்³போ³.

இதி ஸமந்தபாஸாதி³காய வினயட்ட²கதா²ய விமதிவினோத³னியம்

சதுத்த²பாராஜிகவண்ணனானயோ நிட்டி²தோ.

நிட்டி²தோ ச பாராஜிககண்ட³வண்ணனானயோ.