1. பாராஜிககண்டோ³

1. பட²மபாராஜிகம்

ஸுதி³ன்னபா⁴ணவாரவண்ணனா

24. விக்காயிகப⁴ண்ட³ஸ்ஸ விக்கிணனம் இணதா³னஞ்ச ப⁴ண்ட³ப்பயோஜனம் நாம. ஏவம் பயோஜிதஸ்ஸ மூலஸ்ஸ ஸஹ வட்³டி⁴யா க³ஹணவாயாமோ உத்³தா⁴ரோ நாம. அஸுகதி³வஸே தி³ன்னந்திஆதி³னா பமுட்ட²ஸ்ஸ ஸதுப்பாத³னாதி³ ஸாரணம் நாம. சதுப்³பி³தா⁴யாதி க²த்தியப்³ராஹ்மணக³ஹபதிஸமணானம் வஸேன, பி⁴க்கு²ஆதீ³னம் வா வஸேன சதுப்³பி³தா⁴ய. தி³ஸ்வானஸ்ஸ ஏதத³ஹோஸீதி ஹேதுஅத்தே² அயம் தி³ஸ்வான-ஸத்³தோ³ அஸமானகத்துகத்தா, யதா² க⁴தம் பிவித்வா ப³லம் ஹோதீதி, ஏவமஞ்ஞத்தா²பி ஏவரூபேஸு. ப⁴ப்³ப³குலபுத்தோதி உபனிஸ்ஸயமத்தஸபா⁴வேன வுத்தம், ந பச்சி²மப⁴விகதாய. தேனேவஸ்ஸ மாதாதி³அகல்யாணமித்தஸமாயோகே³ன கதவீதிக்கமனம் நிஸ்ஸாய உப்பன்னவிப்படிஸாரேன அதி⁴க³மந்தராயோ ஜாதோ. பச்சி²மப⁴விகானம் புப்³ப³பு³த்³து⁴ப்பாதே³ஸு லத்³த⁴ப்³யாகரணானம் ந ஸக்கா கேனசி அந்தராயம் காதும். தேனேவ அங்கு³லிமாலத்தே²ராத³யோ அகுஸலம் கத்வாபி அதி⁴க³மஸம்பன்னா ஏவ அஹேஸுந்தி. சரிமகசித்தந்தி சுதிசித்தம். ஸங்க²ம் விய லிகி²தம் க⁴ம்ஸித்வா தோ⁴விதம் ஸங்க²லிகி²தந்தி ஆஹ தோ⁴தஇச்சாதி³. அஜ்ஜா²வஸதாதி அதி⁴-ஸத்³த³யோகே³ன அகா³ரந்தி பு⁴ம்மத்தே² உபயோக³வசனந்தி ஆஹ ‘‘அகா³ரமஜ்ஜே²’’தி. கஸாயரஸரத்தானி காஸாயானீதி ஆஹ ‘‘கஸாயரஸபீததாயா’’தி. கஸாயதோ நிப்³ப³த்ததாய ச ஹி ரஸோபி ‘‘கஸாயரஸோ’’தி வுச்சதி.

26. யதா³ ஜானாதி-ஸத்³தோ³ போ³த⁴னத்தோ² ந ஹோதி, ததா³ தஸ்ஸ பயோகே³ ஸப்பினோ ஜானாதி மது⁴னோ ஜானாதீதிஆதீ³ஸு விய கரணத்தே² ஸாமிவசனம் ஸத்³த³ஸத்த²விதூ³ இச்ச²ந்தீதி ஆஹ ‘‘கிஞ்சி து³க்கே²ன நானுபோ⁴ஸீ’’தி. கேனசி து³க்கே²ன நானுபோ⁴ஸீதி அத்தோ², கிஞ்சீதி ஏத்தா²பி ஹி கரணத்தே² ஸாமிவசனஸ்ஸ லோபோ கதோ, தேனேவ வக்க²தி ‘‘விகப்பத்³வயேபி புரிமபத³ஸ்ஸ உத்தரபதே³ன ஸமானவிப⁴த்திலோபோ த³ட்ட²ப்³போ³’’தி. யதா³ பன ஜானாதி-ஸத்³தோ³ ஸரணத்தோ² ஹோதி, ததா³ மாது ஸரதீதிஆதீ³ஸு விய உபயோக³த்தே² ஸாமிவசனம் ஸத்³த³ஸத்த²விதூ³ வத³ந்தீதி ஆஹ ‘‘அத² வா கிஞ்சி து³க்க²ம் நஸ்ஸரதீதி அத்தோ²’’தி, கஸ்ஸசி து³க்க²ஸ்ஸ அனனுபூ⁴ததாய நஸ்ஸரதீதி அத்தோ². விகப்பத்³வயேபீதி அனுப⁴வனஸரணத்த²வஸேன வுத்தே து³தியததியவிகப்பத்³வயே. புரிமபத³ஸ்ஸாதி கிஞ்சீதி பத³ஸ்ஸ. உத்தரபதே³னாதி து³க்க²ஸ்ஸாதிபதே³ன. ஸமானாய ஸாமிவசனபூ⁴தாய விப⁴த்தியா ‘‘கஸ்ஸசி து³க்க²ஸ்ஸா’’தி வத்தப்³பே³ ‘‘கிஞ்சி து³க்க²ஸ்ஸா’’தி லோபோதி த³ட்ட²ப்³போ³. மரணேனபி மயம் தேதி ஏத்த² தேதி பத³ஸ்ஸ ஸஹத்தே² கரணவஸேனபி அத்த²ம் த³ஸ்ஸேதும் தயா வியோக³ம் வா பாபுணிஸ்ஸாமாதி அத்த²ந்தரம் வுத்தம்.

28. க³ந்த⁴ப்³பா³ நாம கா³யனகா. நடா நாம ரங்க³னடா. நாடகா லங்க⁴னகாத³யோ. ஸுகூ²பகரணேஹி அத்தனோ பரிசரணம் கரோந்தோ யஸ்மா லளந்தோ கீளந்தோ நாம ஹோதி, தஸ்மா து³தியே அத்த²விகப்பே லளாதிஆதி³ வுத்தம். தா³னப்பதா³னாதீ³னீதி ஏத்த² நிச்சதா³னம் தா³னம் நாம, விஸேஸதா³னம் பதா³னம் நாம, ஆதி³-ஸத்³தே³ன ஸீலாதீ³னி ஸங்க³ண்ஹாதி.

30. சுத்³த³ஸ ப⁴த்தானீதி ஸங்க⁴ப⁴த்தம் உத்³தே³ஸப⁴த்தம் நிமந்தனம் ஸலாகம் பக்கி²கம் உபோஸதி²கம் பாடிபதி³கம் ஆக³ந்துகம் க³மிகம் கி³லானம் கி³லானுபட்டா²கம் விஹார-து⁴ர-வாரப⁴த்தந்தி இமானி சுத்³த³ஸ ப⁴த்தானி. ஏத்த² ச ஸேனாஸனாதி³பச்சயத்தயனிஸ்ஸிதேஸு ஆரஞ்ஞகங்கா³தி³பதா⁴னங்கா³னம் க³ஹணவஸேன ஸேஸது⁴தங்கா³னிபி க³ஹிதானேவ ஹோந்தீதி வேதி³தப்³ப³ம். வஜ்ஜீனந்தி வஜ்ஜீராஜூனம். வஜ்ஜீஸூதி ஜனபதா³பேக்க²ம் ப³ஹுவசனம், வஜ்ஜீனாமகே ஜனபதே³தி அத்தோ². பஞ்சகாமகு³ணாயேவ உபபு⁴ஞ்ஜிதப்³ப³தோ பரிபு⁴ஞ்ஜிதப்³ப³தோ ச உபபோ⁴க³பரிபோ⁴கா³, இத்தி²வத்தா²தீ³னி ச தது³பகரணானீதி ஆஹ ‘‘யேஹி தேஸ’’ந்திஆதி³. உக்கட்ட²பிண்ட³பாதிகத்தாதி ஸேஸது⁴தங்க³பரிவாரிதேன உக்கட்ட²பிண்ட³பாதிகது⁴தங்கே³ன ஸமன்னாக³தத்தா, தேனாஹ ‘‘ஸபதா³னசாரம் சரிதுகாமோ’’தி.

31. தோ³ஸாதி ரத்தி. தத்த² அபி⁴வுத்த²ம் பரிவுஸிதம் ஆபி⁴தோ³ஸிகம், அபி⁴தோ³ஸம் வா பச்சூஸகாலம் க³தோ பத்தோ அதிக்கந்தோ ஆபி⁴தோ³ஸிகோ, தேனாஹ ஏகரத்தாதிக்கந்தஸ்ஸ வாதிஆதி³.

32. உத³ககஞ்ஜியந்தி பானீயபரிபோ⁴ஜனீயஉத³கஞ்ச யாகு³ ச. ததா²தி ஸமுச்சயத்தே².அனோகப்பனம் அஸத்³த³ஹனம், அமரிஸனம் அஸஹனம்.

34. தத்³தி⁴தலோபந்தி பிதாமஹதோ ஆக³தம் ‘‘பேதாமஹ’’ந்தி வத்தப்³பே³ தத்³தி⁴தபச்சயனிமித்தஸ்ஸ ஏ-காரஸ்ஸ லோபம் கத்வாதி அத்தோ². யேஸம் ஸந்தகம் த⁴னம் க³ஹிதம், தே இணாயிகா. பலிபு³த்³தோ⁴தி ‘மா க³ச்ச² மா பு⁴ஞ்ஜா’திஆதி³னா கதாவரணோ, பீளிதோதி அத்தோ².

35. அத்தனாதி ஸயம். ஸபதினோ த⁴னஸாமினோ இத³ம் ஸாபதேய்யம், த⁴னம். ததே³வ விப⁴வோ.

36. பி⁴ஜ்ஜந்தீதி அக³ஹிதபுப்³பா³ ஏவ பி⁴ஜ்ஜந்தி. தி³ன்னாபி படிஸந்தீ⁴தி பிதரா தி³ன்னம் ஸுக்கம் நிஸ்ஸாய உப்பன்னஸ்ஸ ஸத்தஸ்ஸ படிஸந்தி⁴பி தேன தி³ன்னா நாம ஹோதீதி வுத்தம். ஸுக்கமேவ வா இத⁴ படிஸந்தி⁴னிஸ்ஸயத்தா ‘‘படிஸந்தீ⁴’’தி வுத்தம், தேனாஹ ‘‘கி²ப்பம் பதிட்டா²தீ’’தி. ந ஹி பிது ஸம்யோக³க்க²ணேயேவ ஸத்தஸ்ஸ உப்பத்தினியமோ அத்தி² ஸுக்கமேவ ததா² பதிட்டா²னனியமதோ. ஸுக்கே பன பதிட்டி²தே யாவ ஸத்த தி³வஸானி, அட்³ட⁴மாஸமத்தம் வா, தம் க³ப்³ப⁴ஸண்டா²னஸ்ஸ கே²த்தமேவ ஹோதி மாது மம்ஸஸ்ஸ லோஹிதலேஸஸ்ஸ ஸப்³ப³தா³பி விஜ்ஜமானத்தா. புப்³பே³பி பஞ்ஞத்தஸிக்கா²பதா³னம் ஸப்³பா⁴வதோ அபஞ்ஞத்தே ஸிக்கா²பதே³தி இமஸ்ஸ பட²மபாராஜிகஸிக்கா²பதே³ அட்ட²பிதேதி அத்தோ² வுத்தோ. ஏவரூபந்தி ஏவம் க³ருகஸபா⁴வம், பாராஜிகஸங்கா⁴தி³ஸேஸவத்து²பூ⁴தந்தி அத்தோ², தேனாஹ ‘‘அவஸேஸே பஞ்சகு²த்³த³காபத்திக்க²ந்தே⁴ ஏவ பஞ்ஞபேஸீ’’தி. யம் ஆதீ³னவந்தி ஸம்ப³ந்தோ⁴. காயவிஞ்ஞத்திசோபனதோதி காயவிஞ்ஞத்தியா நிப்³ப³த்தசலனதோ.

தேனேவாதி அவதா⁴ரணேன யானி க³ப்³ப⁴க்³க³ஹணகாரணானி நிவத்திதானி, தானிபி த³ஸ்ஸேதும் கிம் பனாதிஆதி³ வுத்தம். தத்த² உப⁴யேஸம் ச²ந்த³ராக³வஸேன காயஸம்ஸக்³கோ³ வுத்தோ. இத்தி²யா ஏவ ச²ந்த³ராக³வஸேன நாபி⁴பராமஸனம் விஸும் வுத்தம். ஸாமபண்டி³தஸ்ஸ ஹி மாதா புத்துப்பத்தியா ஸஞ்ஜாதாத³ரா நாபி⁴பராமஸனகாலே காமராக³ஸமாகுலசித்தா அஹோஸி, இதரதா² புத்துப்பத்தியா ஏவ அஸம்ப⁴வதோ. ‘‘ஸக்கோ சஸ்ஸா காமராக³ஸமுப்பத்தினிமித்தானி அகாஸீ’’திபி வத³ந்தி, வத்து²வஸேன வா ஏதம் நாபி⁴பராமஸனம் காயஸம்ஸக்³க³தோ விஸும் வுத்தந்தி த³ட்ட²ப்³ப³ம். மாதங்க³பண்டி³தஸ்ஸ தி³ட்ட²மங்க³லிகாய நாபி⁴பராமஸனேன மண்ட³ப்³யஸ்ஸ நிப்³ப³த்தி அஹோஸி. சண்ட³பஜ்ஜோதமாது நாபி⁴யம் விச்சி²கா ப²ரித்வா க³தா, தேன சண்ட³பஜ்ஜோதஸ்ஸ நிப்³ப³த்தி அஹோஸீதி ஆஹ ஏதேனேவ நயேனாதிஆதி³.

அயந்தி ஸுதி³ன்னஸ்ஸ புராணது³தியிகா. யம் ஸந்தா⁴யாதி யம் அஜ்ஜா²சாரம் ஸந்தா⁴ய. மாதாபிதரோ ச ஸன்னிபதிதா ஹோந்தீதி இமினா ஸுக்கஸ்ஸ ஸம்ப⁴வம் தீ³பேதி, மாதா ச உதுனீ ஹோதீதி இமினா ஸோணிதஸ்ஸ. க³ந்த⁴ப்³போ³தி தத்ருபகோ³ ஸத்தோ அதி⁴ப்பேதோ, க³ந்தப்³போ³தி வுத்தம் ஹோதி, த-காரஸ்ஸ சேத்த² த⁴-காரோ கதோ. அத² வா க³ந்த⁴ப்³பா³ நாம ரங்க³னடா, தே விய தத்ர தத்ர ப⁴வேஸு நானாவேஸக்³க³ஹணதோ அயம்பி ‘‘க³ந்த⁴ப்³போ³’’தி வுத்தோ, ஸோ மாதாபிதூனம் ஸன்னிபாதக்க²ணதோ பச்சா²பி ஸத்தாஹப்³ப⁴ந்தரே தத்ர உபபன்னோ ‘‘பச்சுபட்டி²தோ’’தி வுத்தோ. க³ப்³ப⁴ஸ்ஸாதி கலலரூபஸஹிதஸ்ஸ படிஸந்தி⁴விஞ்ஞாணஸ்ஸ. தஞ்ஹி இத⁴ ‘‘க³ப்³போ⁴’’தி அதி⁴ப்பேதம் ஸா தேன க³ப்³ப⁴ம் க³ண்ஹீதிஆதீ³ஸு (பாரா. 36) விய. அஸ்ஸ தம் அஜ்ஜா²சாரந்தி ஸம்ப³ந்தோ⁴. பாளியம் நிரப்³பு³தோ³ வத போ⁴ பி⁴க்கு²ஸங்கோ⁴ நிராதீ³னவோதி இமஸ்ஸ அனந்தரம் தஸ்மிம் பி⁴க்கு²ஸங்கே⁴தி அஜ்ஜா²ஹரித்வா ஸுதி³ன்னேன…பே… ஆதீ³னவோ உப்பாதி³தோதி யோஜனா வேதி³தப்³பா³. இதிஹாதி நிபாதஸமுதா³யஸ்ஸ ஏவந்தி இத³ம் அத்த²ப⁴வனம். முஹுத்தேனாதி இத³ம் க²ணேனாதி பத³ஸ்ஸ வேவசனம். யாவ ப்³ரஹ்மலோகா அப்³பு⁴க்³க³தோபி தே³வானம் தாவமஹந்தோ ஸத்³தோ³ தேஸம் ரூபம் விய மனுஸ்ஸானம் கோ³சரோ ந ஹோதி. தஸ்மா பச்சா² ஸுதி³ன்னேன வுத்தே ஏவ ஜானிம்ஸூதி த³ட்ட²ப்³ப³ம்.

37. மக்³க³ப்³ரஹ்மசரியந்தி மக்³க³பத³ட்டா²னம் ஸிக்க²த்தயமேவ உபசாரதோ வுத்தம் தஸ்ஸேவ யாவஜீவம் சரிதப்³ப³த்தா. அவிப்பா²ரிகோதி உத்³தே³ஸாதீ³ஸு அப்³யாவடோ. வஹச்சி²ன்னோதி சி²ன்னபாதோ³, சி²ன்னக²ந்தோ⁴ வா. சிந்தயீதி இமினா பஜ்ஜா²யீதி பத³ஸ்ஸ கிரியாபத³த்தம் த³ஸ்ஸேதி. தேன ‘‘கிஸோ அஹோஸி…பே… பஜ்ஜா²யி சா’’தி ச-காரம் ஆனேத்வா பாளியோஜனா காதப்³பா³.

38. க³ணே ஜனஸமாக³மே ஸன்னிபாதனம் க³ணஸங்க³ணிகா, ஸாவ பபஞ்சா, தேன க³ணஸங்க³ணிகாபபஞ்சேன. யஸ்ஸாதி யே அஸ்ஸ. கதா²பா²ஸுகாதி விஸ்ஸாஸிகபா⁴வேன பா²ஸுககதா², ஸுக²ஸம்பா⁴ஸாதி அத்தோ². உபாதா³ரூபம் பூ⁴தரூபமுகே²னேவ மந்த³னம் பீனனஞ்ச ஹோதீதி ஆஹ பஸாத³இச்சாதி³. தா³னீதி நிபாதோ இத⁴ பன-ஸத்³த³த்தே² வத்ததி தக்காலவாசினோ ஏதரஹி-பத³ஸ்ஸ விஸும் வுச்சமானத்தாதி ஆஹ ‘‘ஸோ பன த்வ’’ந்தி. நோ-ஸத்³தோ³பி நு-ஸத்³தோ³ விய புச்ச²னத்தோ²தி ஆஹ ‘‘கச்சி நு த்வ’’ந்தி. தமேவாதி கி³ஹிபா⁴வபத்த²னாலக்க²ணமேவ. அனபி⁴ரதிமேவாதி ஏவ-காரேன நிவத்திதாய பன தத³ஞ்ஞாய அனபி⁴ரதியா விஜ்ஜமானத்தம் த³ஸ்ஸேதும் அதி⁴குஸலானந்திஆதி³ வுத்தம், ஸமத²விபஸ்ஸனா அதி⁴குஸலா நாம. இத³ம் பனாதிஆதி³ உபரி வத்தப்³ப³விஸேஸத³ஸ்ஸனம். பரியாயவசனமத்தந்தி ஸத்³த³த்த²கத²னமத்தம்.

தஸ்மிந்தி த⁴ம்மே, ஏவம் விராகா³ய தே³ஸிதே ஸதீதி அத்தோ². நாமாதி க³ரஹாயம். லோகுத்தரனிப்³பா³னந்தி விராகா³யாதிஆதி³னா வுத்தகிலேஸக்க²யனிப்³பா³னதோ விஸேஸேதி. ஜாதிம் நிஸ்ஸாய உப்பஜ்ஜனகமானோ ஏவ மத³ஜனனட்டே²ன மதோ³தி மானமதோ³. ‘‘அஹம் புரிஸோ’’தி பவத்தோ மானோ புரிஸமதோ³. ‘‘அஸத்³த⁴ம்மஸேவனாஸமத்த²தம் நிஸ்ஸாய மானோ, ராகோ³ ஏவ வா புரிஸமதோ³’’தி கேசி. ஆதி³-ஸத்³தே³ன ப³லமதா³தி³ம் ஸங்க³ண்ஹாதி. தேபூ⁴மகவட்டந்தி தீஸு பூ⁴மீஸு கம்மகிலேஸவிபாகா பவத்தனட்டே²ன வட்டம். விரஜ்ஜதீதி விக³ச்ச²தி. யோனியோதி அண்ட³ஜாத³யோ, தா பன யவந்தி தாஹி ஸத்தா அமிஸ்ஸிதாபி ஸமானஜாதிதாய மிஸ்ஸிதா ஹோந்தீதி ‘‘யோனியோ’’தி வுத்தா.

ஞாததீரணபஹானவஸேனாதி ஏத்த² லக்க²ணாதி³வஸேன ஸப்பச்சயனாமரூபபரிக்³க³ஹோ ஞாதபரிஞ்ஞா நாம. கலாபஸம்மஸனாதி³வஸேன பவத்தா லோகியவிபஸ்ஸனா தீரணபரிஞ்ஞா நாம. அரியமக்³கோ³ பஹானபரிஞ்ஞா நாம. இத⁴ பன ஞாததீரணகிச்சானம்பி அஸம்மோஹதோ மக்³க³க்க²ணே ஸிஜ்ஜ²னதோ அரியமக்³க³மேவ ஸந்தா⁴ய திவிதா⁴பி பரிஞ்ஞா வுத்தா, தேனேவ ‘‘லோகுத்தரமக்³கோ³வ கதி²தோ’’தி வுத்தம். காமேஸு பாதப்³யதானந்தி வத்து²காமேஸு பாதப்³யதாஸங்கா²தானம் ஸுபா⁴தி³ஆகாரானம் ததா³காரகா³ஹிகானம் தண்ஹானந்தி அத்தோ². விஸயமுகே²ன ஹேத்த² விஸயினோ க³ஹிதா. தீஸு டா²னேஸூதி ‘‘விராகா³ய த⁴ம்மோ தே³ஸிதோ…பே… நோ ஸஉபாதா³னாயா’’தி ஏவம் வுத்தேஸு.

39. கலிஸாஸனாரோபனத்தா²யாதி தோ³ஸாரோபனத்தா²ய. கலீதி கோத⁴ஸ்ஸ நாமம், தஸ்ஸ ஸாஸனம் கலிஸாஸனம், கோத⁴வஸேன வுச்சமானா க³ரஹா. அஜ்ஜா²சாரோவ வீதிக்கமோ. ஸமணகரணானம் த⁴ம்மானந்தி ஸமணபா⁴வகரானம் ஹிரோத்தப்பாதி³த⁴ம்மானம். பாளியம் கத²ம்-ஸத்³த³யோகே³ன ந ஸக்கி²ஸ்ஸஸீதி அனாக³தவசனம் கதம், ‘‘நாம-ஸத்³த³யோகே³னா’’திபி வத³ந்தி. அதிவிய து³க்க²விபாகந்தி க³ஹட்டா²னம் நாதிஸாவஜ்ஜம்பி கம்மம் பப்³ப³ஜிதானம் ப⁴க³வதோ ஆணாவீதிக்கமதோ சேவ ஸமாதி³ன்னஸிக்க²த்தயவினாஸனதோ ச மஹாஸாவஜ்ஜம் ஹோதீதி வுத்தம். உத³கே ப⁴வம் ஓத³கம், தோ⁴வனகிச்சந்தி ஆஹ உத³ககிச்சந்திஆதி³. ஸமாபஜ்ஜிஸ்ஸஸீதி அனாக³தவசனம் நாம-ஸத்³த³யோகே³ன கதந்தி ஆஹ ‘‘நாம-ஸத்³தே³ன யோஜேதப்³ப³’’ந்தி. து³ப்³ப⁴ரதாதீ³னம் ஹேதுபூ⁴தோ அஸம்வரோ இத⁴ து³ப்³ப⁴ரதாதி³-ஸத்³தே³ன வுத்தோ காரணே காரியோபசாரேனாதி ஆஹ ‘‘து³ப்³ப⁴ரதாதீ³னம் வத்து²பூ⁴தஸ்ஸ அஸம்வரஸ்ஸா’’தி. அத்தாதி அத்தபா⁴வோ. து³ப்³ப⁴ரதந்தி அத்தனா உபட்டா²கேஹி ச து³க்கே²ன ப⁴ரிதப்³ப³தம். ஸத்தேஹி கிலேஸேஹி ச ஸங்க³ணனம் ஸமோதா⁴னம் ஸங்க³ணிகாதி ஆஹ க³ணஸங்க³ணிகாயாதிஆதி³. அட்ட²குஸீதவத்து²பாரிபூரியாதி ஏத்த² கம்மம் காதப்³ப³ந்தி ஏகம், ததா² அகாஸிந்தி, மக்³கோ³ க³ந்தப்³போ³தி அக³மாஸிந்தி, நாலத்த²ம் போ⁴ஜனஸ்ஸ பாரிபூரிந்தி, அலத்த²ந்தி, உப்பன்னோ மே ஆபா³தோ⁴தி, அசிரவுட்டி²தோ கே³லஞ்ஞாதி ஏகந்தி இமானி அட்ட² குஸீதவத்தூ²னி நாம. ஏத்த² ச கோஸஜ்ஜம் குஸீத-ஸத்³தே³ன வுத்தம். வினாபி ஹி பா⁴வஜோதனபச்சயம் பா⁴வத்தோ² விஞ்ஞாயதி யதா² படஸ்ஸ ஸுக்கந்தி. ஸப்³ப³கிலேஸாபசயபூ⁴தாய விவட்டாயாதி ராகா³தி³ஸப்³ப³கிலேஸானம் அபசயஹேதுபூ⁴தாய நிப்³பா³னாய, நிப்³பா³னத்த²ந்தி அத்தோ². ஸம்வரப்பஹானபடிஸம்யுத்தந்தி ஸீலஸம்வராதீ³ஹி பஞ்சஹி ஸம்வரேஹி சேவ தத³ங்க³ப்பஹானாதீ³ஹி பஞ்சஹி பஹானேஹி ச உபேதம். அஸுத்தந்த வினிப³த்³த⁴ந்தி தீஸு பிடகேஸு பாளிஸங்கா²தஸுத்தந்தவஸேன அரசிதம், ஸங்கீ³திகாரேஹி ச அனாரோபிதம், தேனாஹ ‘‘பாளிவினிமுத்த’’ந்தி. தேன ச அட்ட²கதா²ஸு யதா²னுரூபம் ஸங்க³ஹிதந்தி த³ஸ்ஸேதி. ஏவரூபா ஹி பகிண்ணகதே³ஸனா அட்ட²கதா²ய மூலம். ஓக்கந்திகத⁴ம்மதே³ஸனா நாம தஸ்மிம் தஸ்மிம் பஸங்கே³ ஓதாரேத்வா ஓதாரேத்வா நானானயேஹி கதி²யமானா த⁴ம்மதே³ஸனா, தேனாஹ ப⁴க³வா கிராதிஆதி³. படிக்கி²பனாதி⁴ப்பாயாதி பஞ்ஞத்தம்பி ஸிக்கா²பத³ம் ‘‘கிமேதேனா’’தி மத்³த³னசித்தா.

வுத்தத்த²வஸேனாதி பதிட்டா²அதி⁴க³முபாயவஸேன. ஸிக்கா²பத³விப⁴ங்கே³ யா தஸ்மிம் ஸமயே காமேஸுமிச்சா²சாரா ஆரதி விரதீதிஆதி³னா (விப⁴. 706) நித்³தி³ட்ட²விரதியோ சேவ, யா தஸ்மிம் ஸமயே சேதனா ஸஞ்சேதனாதிஆதி³னா (விப⁴. 704) நித்³தி³ட்ட²சேதனா ச, காமேஸுமிச்சா²சாரா விரமந்தஸ்ஸ ப²ஸ்ஸோ…பே… அவிக்கே²போதிஆதி³னா (விப⁴. 705) நித்³தி³ட்ட²ப²ஸ்ஸாதி³த⁴ம்மா ச ஸிக்கா²பத³ந்தி த³ஸ்ஸேதும் ‘‘அயஞ்ச அத்தோ² ஸிக்கா²பத³விப⁴ங்கே³ வுத்தனயேனேவ வேதி³தப்³போ³’’தி வுத்தம். ‘‘யோ தத்த² நாமகாயோ பத³காயோதி இத³ம் மஹாஅட்ட²கதா²யம் வுத்த’’ந்தி வத³ந்தி. நாமகாயோதி நாமஸமூஹோ நாமபஞ்ஞத்தியேவ, ஸேஸானிபி தஸ்ஸேவ வேவசனானி. ஸிக்கா²கோட்டா²ஸோதி விரதிஆத³யோ வுத்தா தப்பகாஸகஞ்ச வசனம்.

அத்த²வஸேதி ஹிதவிஸேஸே ஆனிஸம்ஸவிஸேஸே, தே ச ஸிக்கா²பத³பஞ்ஞத்தியா ஹேதூதி ஆஹ ‘‘காரணவஸே’’தி. ஸுக²விஹாராபா⁴வே ஸஹஜீவனஸ்ஸ அபா⁴வதோ ஸஹஜீவிதாதி ஸுக²விஹாரோவ வுத்தோ. து³ஸ்ஸீலபுக்³க³லாதி நிஸ்ஸீலா தூ³ஸிதஸீலா ச. பாராஜிகஸிக்கா²பத³ப்பஸங்கே³ ஹி நிஸ்ஸீலா அதி⁴ப்பேதா, ஸேஸஸிக்கா²பத³பஸங்கே³ தேஹி தேஹி வீதிக்கமேஹி க²ண்ட³சி²த்³தா³தி³பா⁴வப்பத்தியா தூ³ஸிதஸீலா அதி⁴ப்பேதா. உப⁴யேனபி அலஜ்ஜினோவ இத⁴ ‘‘து³ஸ்ஸீலா’’தி வுத்தாதி வேதி³தப்³பா³. ஸப்³ப³ஸிக்கா²பதா³னம்பி த³ஸ அத்த²வஸே படிச்சேவ பஞ்ஞத்தத்தா உபரி து³ஸ்ஸீலபுக்³க³லே நிஸ்ஸாயாதி ஏத்தா²பி ஏஸேவ நயோ, தேனேவ ‘‘யே மங்குதம்…பே… நிக்³க³ஹேஸ்ஸதீ’’தி ஸப்³ப³ஸிக்கா²பத³ஸாதா⁴ரணவஸேன அத்தோ² வுத்தோ. தத்த² மங்குதந்தி நித்தேஜதம் அதோ⁴முக²தம். த⁴ம்மேனாதிஆதீ³ஸு த⁴ம்மோதி பூ⁴தம் வத்து². வினயோதி சோத³னா சேவ ஸாரணா ச. ஸத்து²ஸாஸனந்தி ஞத்திஸம்பதா³ சேவ அனுஸாவனஸம்பதா³ ச. ஸந்தி³ட்ட²மானாதி ஸம்ஸயம் ஆபஜ்ஜமானா. உப்³பா³ள்ஹாதி பீளிதா. து³ஸ்ஸீலபுக்³க³லே நிஸ்ஸாய ஹி உபோஸதோ² ந திட்ட²தி, பவாரணா ந திட்ட²தி, ஸங்க⁴கம்மானி நப்பவத்தந்தி, ஸாமக்³கீ³ ந ஹோதீதி இமினா அலஜ்ஜீஹி ஸத்³தி⁴ம் உபோஸதா²தி³ஸகலஸங்க⁴கம்மம் காதும் ந வட்டதி த⁴ம்மபரிபோ⁴க³த்தாதி த³ஸ்ஸேதி. உபோஸத²பவாரணானம் நியதகாலிகதாய ச அவஸ்ஸம் கத்தப்³ப³த்தா ஸங்க⁴கம்மதோ விஸும் க³ஹணம் வேதி³தப்³ப³ம். அகித்தி க³ரஹா. அயஸோ பரிவாரஹானி.

சுத்³த³ஸ க²ந்த⁴கவத்தானி நாம வத்தக்க²ந்த⁴கே (சூளவ. 356 ஆத³யோ) வுத்தானி ஆக³ந்துகவத்தம் ஆவாஸிகக³மிகஅனுமோத³னப⁴த்தக்³க³பிண்ட³சாரிகஆரஞ்ஞகஸேனாஸனஜந்தாக⁴ரவச்சகுடிஉபஜ்ஜா²யஸத்³தி⁴விஹாரிகஆசரியஅந்தேவாஸிகவத்தந்தி இமானி சுத்³த³ஸ வத்தானி, ஏதானி ச ஸப்³பே³ஸம் பி⁴க்கூ²னம் ஸப்³ப³தா³ ச யதா²ரஹம் சரிதப்³பா³னி. த்³வே அஸீதி மஹாவத்தானி பன தஜ்ஜனீயகம்மகதாதி³காலேயேவ சரிதப்³பா³னி, ந ஸப்³ப³தா³. தஸ்மா விஸும் க³ணிதானி. தானி பன ‘‘பாரிவாஸிகானம் பி⁴க்கூ²னம் வத்தம் பஞ்ஞபேஸ்ஸாமீ’’தி (சூளவ. 75) ஆரபி⁴த்வா ‘‘ந உபஸம்பாதே³தப்³ப³ம்…பே… ந ச²மாய சங்கமந்தே சங்கமே சங்கமிதப்³ப³’’ந்தி வுத்தாவஸானானி ச²ஸட்டி², ததோ பரம் ‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகேன வுட்³ட⁴தரேன பி⁴க்கு²னா ஸத்³தி⁴ம், மூலாயபடிகஸ்ஸனாரஹேன, மானத்தசாரிகேன, மானத்தாரஹேன, அப்³பா⁴னாரஹேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³’’ந்திஆதி³னா (சூளவ. 82) வுத்தவத்தானி பகதத்தேன சரிதப்³பே³ஹி அனஞ்ஞத்தா விஸும் அக³ணேத்வா பாரிவாஸிகவுட்³ட⁴தராதீ³ஸு புக்³க³லந்தரேஸு சரிதப்³ப³த்தா தேஸம் வஸேன ஸம்பிண்டே³த்வா ஏகேகம் கத்வா க³ணிதானி பஞ்சாதி ஏகஸத்ததிவத்தானி ச உக்கே²பனீயகம்மகதவத்தேஸு ச வுத்தம் ‘‘ந பகதத்தஸ்ஸ பி⁴க்கு²னோ அபி⁴வாத³னம் பச்சுட்டா²னம்…பே… நஹானே பிட்டி²பரிகம்மம் ஸாதி³தப்³ப³’’ந்தி (சூளவ. 86) இத³ம் அபி⁴வாத³னாதீ³னம் அஸாதி³யனம் ஏகம், ‘‘ந பகதத்தோ பி⁴க்கு² ஸீலவிபத்தியா அனுத்³த⁴ம்ஸேதப்³போ³’’திஆதீ³னி (சூளவ. 51) ச த³ஸாதி ஏவம் த்³வாஸீதி வத்தானி ஹோந்தி, ஏதேஸ்வேவ பன கானிசி தஜ்ஜனீயகம்மாதி³வத்தானி கானிசி பாரிவாஸிகாதி³வத்தானீதி அக்³க³ஹிதக்³க³ஹணேன த்³வாஸீதியேவ. அஞ்ஞத்த² பன அட்ட²கதா²பதே³ஸே அப்பகம் ஊனமதி⁴கம் வா க³ணனூபக³ம் ந ஹோதீதி அஸீதிக²ந்த⁴கவத்தானீதி ஆக³தம். அத² வா புரிமேஹி சுத்³த³ஸவத்தேஹி அஸங்க³ஹிதானி வினயாக³தானி ஸப்³பா³னி வத்தானி யதா² த்³வாஸீதி வத்தானி, அஸீதி வத்தானி ஏவ வா ஹோந்தி, ததா² ஸங்க³ஹேத்வா ஞாதப்³பா³னி.

ஸம்வரவினயோதி ஸீலஸம்வரோ ஸதிஸம்வரோ ஞாணஸம்வரோ க²ந்திஸம்வரோ வீரியஸம்வரோதி பஞ்சவிதோ⁴பி ஸம்வரோ யதா²ஸகம் ஸம்வரிதப்³பா³னம் வினேதப்³பா³னஞ்ச காயது³ச்சரிதாதீ³னம் ஸம்வரணதோ ஸம்வரோ, வினயனதோ வினயோதி வுச்சதி. பஹானவினயோதி தத³ங்க³ப்பஹானம் விக்க²ம்ப⁴னப்பஹானம் ஸமுச்சே²த³ப்பஹானம் படிப்பஸ்ஸத்³தி⁴ப்பஹானம் நிஸ்ஸரணப்பஹானந்தி பஞ்சவித⁴ம்பி பஹானம், யஸ்மா சாக³ட்டே²ன பஹானம், வினயனட்டே²ன வினயோ, தஸ்மா ‘‘பஹானவினயோ’’தி வுச்சதி. ஸமத²வினயோதி ஸத்த அதி⁴கரணஸமதா². பஞ்ஞத்திவினயோதி ஸிக்கா²பத³மேவ. தம்பி ஹி ப⁴க³வதோ ஸிக்கா²பத³பஞ்ஞத்தியாவ அனுக்³க³ஹிதம் ஹோதி தப்³பா⁴வே ஏவ பா⁴வதோ. ஸங்க²லிகனயம் கத்வா த³ஸக்க²த்தும் யோஜனஞ்ச கத்வா யம் வுத்தந்தி ஸம்ப³ந்தோ⁴. தத்த² புரிமபுரிமபத³ஸ்ஸ அனந்தரபதே³னேவ யோஜிதத்தா அயோஸங்க²லிகஸதி³ஸந்தி ‘‘ஸங்க²லிகனய’’ந்தி வுத்தம். த³ஸஸு பதே³ஸு ஏகமேகம் பத³ம் தத³வஸேஸேஹி நவனவபதே³ஹி யோஜிதத்தா ‘‘ஏகேகபத³மூலிக’’ந்தி வுத்தம்.

அத்த²ஸதம் த⁴ம்மஸதந்தி ஏத்த² யோ ஹி ஸோ பரிவாரே (பரி. 334) யம் ஸங்க⁴ஸுட்டு², தம் ஸங்க⁴பா²ஸூதி ஆதி³ம்கத்வா யம் ஸத்³த⁴ம்மட்டி²தியா, தம் வினயானுக்³க³ஹாயாதி பரியோஸானம் க²ண்ட³சக்கவஸேனேவ ஸங்க²லிகனயோ வுத்தோ, தஸ்மிம் ஏகமூலகனயே ஆக³தப³த்³த⁴சக்கனயேன யம் வினயானுக்³க³ஹாய, தம் ஸங்க⁴ஸுட்டூ²தி இத³ம்பி யோஜேத்வா ப³த்³த⁴சக்கே கதே புரிமபுரிமானி த³ஸ த⁴ம்மபதா³னி, பச்சி²மபச்சி²மானி த³ஸ அத்த²பதா³னி சாதி வீஸதி பதா³னி ஹோந்தி. ஏகமூலகனயே பன ஏகஸ்மிம் வாரே நவேவ அத்த²பதா³னி லப்³ப⁴ந்தி. ஏவம் த³ஸஹி வாரேஹி நவுதி அத்த²பதா³னி நவுதி த⁴ம்மபதா³னி ச ஹோந்தி, தானி ஸங்க²லிகனயே வுத்தேஹி த³ஸஹி அத்த²பதே³ஹி த³ஸஹி த⁴ம்மபதே³ஹி ச ஸத்³தி⁴ம் யோஜிதானி யதா²வுத்தம் அத்த²ஸதம் த⁴ம்மஸதஞ்ச ஹோந்தீதி வேதி³தப்³ப³ம். யம் பனேத்த² ஸாரத்த²தீ³பனியம் (ஸாரத்த² டீ. பாராஜிககண்ட³ 2.39) ஸங்க²லிகனயேபி ஏகமூலகனயேபி பச்சேகம் அத்த²ஸதஸ்ஸ த⁴ம்மஸதஸ்ஸ யோஜனாமுக²ம் வுத்தம், தம் ததா² ஸித்³தே⁴பி அத்த²ஸதம் த⁴ம்மஸதந்தி (பரி. 334) கா³தா²ய ந ஸமேதி த்³வே அத்த²ஸதானி த்³வே த⁴ம்மஸதானி சத்தாரி நிருத்திஸதானி அட்ட² ஞாணஸதானீதி வத்தப்³ப³தோ. தஸ்மா இத⁴ வுத்தனயேனேவ அத்த²ஸதம் த⁴ம்மஸதந்தி வுத்தந்தி க³ஹேதப்³ப³ம். த்³வே ச நிருத்திஸதானீதி அத்த²ஜோதிகானம் நிருத்தீனம் வஸேன நிருத்திஸதம், த⁴ம்மபூ⁴தானம் நிருத்தீனஞ்ச வஸேன நிருத்திஸதந்தி த்³வே நிருத்திஸதானி. சத்தாரி ச ஞாணஸதானீதி அத்த²ஸதே ஞாணஸதம், த⁴ம்மஸதே ஞாணஸதம், த்³வீஸு நிருத்திஸதேஸு த்³வே ஞாணஸதானீதி சத்தாரி ஞாணஸதானி. அதிரேகானயனத்தோ²தி அவுத்தஸமுச்சயத்தோ².

பட²மபஞ்ஞத்திகதா²வண்ணனானயோ நிட்டி²தோ.

ஸுதி³ன்னபா⁴ணவாரவண்ணனா நிட்டி²தா.

மக்கடீவத்து²கதா²வண்ணனா

40. பசுரத்தே² ஹி வத்தமானவசனந்தி ஏகதா³ படிஸேவித்வா பச்சா² அனோரமித்வா தி³வஸே தி³வஸே ஸேவனிச்சா²ய வத்தமானத்தா ஸேவனாய அபா⁴வக்க²ணேபி இஹ மல்லா யுஜ்ஜ²ந்தீதிஆதீ³ஸு விய அப்³போ³ச்சி²ன்னதம் பா³ஹுல்லவுத்திதஞ்ச உபாதா³ய படிஸேவதீதி வத்தமானவசனம் கதந்தி அத்தோ². ஆஹிண்ட³ந்தாதி விசரந்தா.

41. ஸஹோட்³ட⁴க்³க³ஹிதோதி ஸப⁴ண்ட³க்³க³ஹிதோ, அயமேவ வா பாடோ². தம் ஸிக்கா²பத³ம் ததே²வ ஹோதீதி மனுஸ்ஸாமனுஸ்ஸாதி³புக்³க³லவிஸேஸம் கிஞ்சி அனுபாதி³யித்வா ஸாமஞ்ஞதோ ‘‘யோ பன பி⁴க்கு² மேது²னம் த⁴ம்மம் படிஸேவேய்யா’’தி (பாரா. 39) வுத்தத்தா மனுஸ்ஸாமனுஸ்ஸதிரச்சா²னக³தானம் இத்தி²புரிஸபண்ட³கஉப⁴தோப்³யஞ்ஜனானம் திம்ஸவிதே⁴பி மக்³கே³ மேது²னம் ஸேவந்தஸ்ஸ தம் ஸிக்கா²பத³ம் மூலச்சே²ஜ்ஜகரம் ஹோதி ஏவாதி அதி⁴ப்பாயோ. ஏதேன யம் அனுபஞ்ஞத்திமூலபஞ்ஞத்தியா ஏவ அதி⁴ப்பாயப்பகாஸனவஸேன ஸுபோ³த⁴த்தா²ய வத்து²வஸேன பவத்தானம் விஸேஸத்த²ஜோதகவஸேனாதி த³ஸ்ஸிதம் ஹோதி. ஆமஸனம் ஆமட்ட²மத்தம். ததோ த³ள்ஹதரம் பு²ஸனம். க⁴ட்டனம் பன ததோ த³ள்ஹதரம் கத்வா ஸரீரேன ஸரீரஸ்ஸ ஸங்க⁴ட்டனம். தம் ஸப்³ப³ம்பீதி அனுராகே³ன பவத்திதம் த³ஸ்ஸனாதி³ஸப்³ப³ம்பி.

42. பாணாதிபாதாதி³ஸசித்தகஸிக்கா²பதா³னம் ஸுராபானாதி³அசித்தகஸிக்கா²பதா³னஞ்ச (பாசி. 326 ஆத³யோ) ஏகேனேவ லக்க²ணவசனேன லோகவஜ்ஜதம் த³ஸ்ஸேதும் ‘‘யஸ்ஸ ஸசித்தகபக்கே² சித்தம் அகுஸலமேவ ஹோதி, தம் லோகவஜ்ஜம் நாமா’’தி வுத்தம். தத்த² ஸசித்தகபக்கே²தி இத³ம் கிஞ்சாபி அசித்தகஸிக்கா²பத³ம் ஸந்தா⁴யேவ வத்தும் யுத்தம் தஸ்ஸேவ ஸசித்தகபக்க²ஸம்ப⁴வதோ, ததா²பி ஸசித்தகஸிக்கா²பதா³னம்பி அஸஞ்சிச்ச சங்கமனாதீ³ஸு லோகே பாணகா⁴தவோஹாரஸம்ப⁴வேன அசித்தகபக்க²ம் பரிகப்பேத்வா உபி⁴ன்னம்பி ஸசித்தகாசித்தகஸிக்கா²பதா³னம் ஸாதா⁴ரணவஸேன ‘‘ஸசித்தகபக்கே²’’தி வுத்தம். இதரதா² ஸசித்தகஸிக்கா²பதா³னம் இமஸ்மிம் வாக்யே லோகவஜ்ஜதாலக்க²ணம் ந வுத்தம் ஸியா. ‘‘ஸசித்தகபக்கே² சித்தம் அகுஸலமேவா’’தி வுத்தே பன ஸசித்தகஸிக்கா²பதா³னம் சித்தம் அகுஸலமேவ, இதரேஸம் ஸசித்தகபக்கே²யேவ அகுஸலனியமோ, ந அசித்தகபக்கே². தத்த² பன யதா²ஸம்ப⁴வம் குஸலம் வா ஸியா, அகுஸலம் வா, அப்³யாகதம் வாதி அயமத்தோ² ஸாமத்தி²யதோ ஸிஜ்ஜ²தீதி வேதி³தப்³ப³ம். ஸசித்தகபக்கே²தி வத்து²வீதிக்கமவிஜானனசித்தேன ஸசித்தகபக்கே²தி க³ஹேதப்³ப³ம், ந பண்ணத்திவிஜானனசித்தேன ததா² ஸதி ஸப்³ப³ஸிக்கா²பதா³னம்பி லோகவஜ்ஜதாபஸங்க³தோ. ‘‘படிக்கி²த்தமித³ம் காதும் ந வட்டதீ’’தி ஜானந்தஸ்ஸ ஹி பண்ணத்திவஜ்ஜேபி அனாத³ரியவஸேன படிக⁴சித்தமேவ உப்பஜ்ஜதி, தஸ்மா இத³ம் வாக்யம் நிரத்த²கமேவ ஸியா ஸப்³ப³ஸிக்கா²பதா³னிபி லோகவஜ்ஜானீதி ஏத்தகமத்தஸ்ஸேவ வத்தப்³ப³தாபஸங்க³தோ.

ஏத்த² ச ஸசித்தகபக்கே²யேவ சித்தம் அகுஸலந்தி நியமஸ்ஸ அகதத்தா ஸுராபானாதீ³ஸு அசித்தகபக்கே² சித்தம் அகுஸலம் ந ஹோதேவாதி ந ஸக்கா நியமேதும், கேவலம் பன ஸசித்தகபக்கே² சித்தம் அகுஸலமேவ, ந குஸலாதீ³தி ஏவமேத்த² நியமோ ஸிஜ்ஜ²தி, ஏவஞ்ச ஸுராதி அஜானித்வா பிவந்தானம்பி அகுஸலசித்தேனேவ பானம் க³ந்த⁴வண்ணகாதி³பா⁴வம் அஜானித்வா லிம்பந்தீனம் பி⁴க்கு²னீனம் வினாபி அகுஸலசித்தேன லிம்பனஞ்ச, உப⁴யத்தா²பி ஆபத்திஸம்ப⁴வோ ச ஸமத்தி²தோ ஹோதி. யம் பன ஸாரத்த²தீ³பனியம் (ஸாரத்த². டீ. பாராஜிககண்ட³ 2.42) ‘‘ஸசித்தகபக்கே² சித்தம் அகுஸலமேவாதி வசனதோ அசித்தகஸ்ஸ வத்து²அஜானனவஸேன அசித்தகபக்கே² சித்தம் அகுஸலமேவாதி அயம் நியமோ நத்தீ²தி விஞ்ஞாயதீ’’தி வுத்தம், தம் ந யுத்தம். அசித்தகேஸு ஹி தேரஸஸு லோகவஜ்ஜேஸு ஸுராபானஸ்ஸேவ அசித்தகபக்கே²பி அகுஸலசித்தனியமோ, ந இதரேஸம் த்³வாத³ஸன்னம் அகுஸலாதி³சித்தேனாபி ஆபஜ்ஜிதப்³ப³தோ. யம் பன ஏவம் கேனசி அனிச்ச²மானம் ஸத்³த³தோபி அபதீயமானமிமம் நியமம் பராதி⁴ப்பாயம் கத்வா த³ஸ்ஸேதும் ‘‘யதி³ ஹி அசித்தகஸ்ஸ அசித்தகபக்கே²பி சித்தம் அகுஸலமேவ ஸியா, ஸசித்தகபக்கே²தி இத³ம் விஸேஸனம் நிரத்த²கம் ஸியா’’திஆதி³ வுத்தம், தம் நிரத்த²கமேவ ஏவம் நியமஸ்ஸ கேனசி அனதி⁴ப்பேதத்தா. ந ஹி கோசி ஸத்³த³ஸத்த²விதூ³ நியமம் இச்ச²தி, யேன ஸசித்தகபக்கே²தி இத³ம் விஸேஸனம் நிரத்த²கம் ஸியாதிஆதி³ வுத்தம் ப⁴வேய்ய, கிந்து ஸசித்தகபக்கே² சித்தம் அகுஸலமேவ, அசித்தகபக்கே² பன சித்தம் அனியதம் அகுஸலமேவ வா ஸியா, குஸலாதீ³ஸு வா அஞ்ஞதரந்தி ஏவமேவ இச்ச²தி. தேன ஸசித்தகபக்கே²தி விஸேஸனம்பி ஸாத்த²கம் ஸியா. அசித்தகஸிக்கா²பதா³னம் ஸசித்தகபக்கே²ஸு அகுஸலனியமேன லோகவஜ்ஜதா ச ஸிஜ்ஜ²தி. தேஸு ச ஸுராபானஸ்ஸேவ அசித்தகபக்கே²பி லோகவஜ்ஜதா அகுஸலசித்ததா ச, இதரேஸம் பன ஸசித்தகபக்கே² ஏவாதி வாதோ³பி ந விருஜ்ஜ²தீதி ந கிஞ்சேத்த² அனுபபன்னம் நாம.

யம் பனேத்த² ‘‘ஸுராதி அஜானித்வா பிவந்தஸ்ஸ…பே… வினாபி அகுஸலசித்தேன ஆபத்திஸம்ப⁴வதோ…பே… ஸுராபானாதி³அசித்தகஸிக்கா²பதா³னம் லோகவஜ்ஜதா ந ஸியா’’திஆதி³ வுத்தம். யஞ்ச தமத்த²ம் ஸாதே⁴தும் க³ண்டி²பதே³ஸு ஆக³தவசனம் த³ஸ்ஸேத்வா ப³ஹும் பபஞ்சிதம், தம் ந ஸாரதோ பச்சேதப்³ப³ம் அட்ட²கதா²ஹி விருத்³த⁴த்தா. ததா² ஹி ‘‘வத்து²அஜானனதாய சேத்த² அசித்தகதா வேதி³தப்³பா³ அகுஸலேனேவ பாதப்³ப³தாய லோகவஜ்ஜதா’’தி வுத்தம். யஞ்சேதஸ்ஸ ‘‘ஸசித்தகபக்கே² அகுஸலேனேவ பாதப்³ப³தோ லோகவஜ்ஜதா’’தி வுத்தம் அட்ட²கதா²வசனம், தம் ந ஸுந்த³ரம். ‘‘ஸசித்தகபக்கே² சித்தம் அகுஸலமேவா’’தி ஸப்³பே³ஸம் லோகவஜ்ஜானம் இதே⁴வ பாராஜிகட்ட²கதா²ய ஸாமஞ்ஞதோ வத்வா ஸுராபானஸிக்கா²பத³ட்ட²கதா²யம் ‘‘அகுஸலேனேவ பாதப்³ப³தாயா’’தி ஏவம் அசித்தகபக்கே²பி அகுஸலசித்ததாய விஸேஸேத்வா வுத்தத்தா. ந ஹி ‘‘ஸாமஞ்ஞதோ இத⁴ வுத்தோவ அத்தோ² புன ஸுராபானட்ட²கதா²யம்பி வுத்தோ’’தி ஸக்கா வத்தும் வுத்தஸ்ஸேவ புன வசனே பயோஜனாபா⁴வா, தத³ஞ்ஞேஸுபி அசித்தகலோகவஜ்ஜேஸு வத்தப்³ப³தாபஸங்க³தோ ச, நாபி ஏகத்த² வுத்தோ நயோ தத³ஞ்ஞேஸுபி ஏகலக்க²ணதாய வுத்தோ ஏவ ஹோதீதி ‘‘ஸுராபானஸிக்கா²பதே³யேவ (பாசி. 326 ஆத³யோ) வுத்தோ’’தி ஸக்கா வத்தும் அசித்தகலோகவஜ்ஜானம் ஸப்³ப³பட²மே உய்யுத்தஸிக்கா²பதே³யேவ (பாசி. 311 ஆத³யோ) வத்தப்³ப³தோ, ஸுராபானஸிக்கா²பதே³யேவ வா வத்வா ஏஸேவ நயோ ஸேஸேஸு அசித்தகலோகவஜ்ஜேஸுபீதி அதிதி³ஸிதப்³ப³தோ ச.

அபிச வுத்தமேவத்த²ம் வத³ந்தேன ‘‘ஸசித்தகபக்கே² அகுஸலேனேவ பாதப்³ப³தாயா’’தி புப்³பே³ வுத்தக்கமேனேவ வத்தப்³ப³ம் ஸந்தே³ஹாதி³விக³மத்த²த்தா புன வசனஸ்ஸ. ஸிக்கா²பத³விஸயே ச விஸேஸிதப்³ப³ம் விஸேஸேத்வாவ வுச்சதி, இதரதா² ஆபத்தானாபத்தாதி³பே⁴த³ஸ்ஸ து³விஞ்ஞேய்யத்தா. ததா² ஹி பி⁴க்கு²னீவிப⁴ங்க³ட்ட²கதா²யம் ‘‘வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சா’’தி கி³ரக்³க³ஸமஜ்ஜாதீ³னம் ஸசித்தகபக்கே² ஏவ லோகவஜ்ஜதா அகுஸலசித்ததா ச விஸேஸேத்வா வுத்தா, ந ஏவம் ஸுராபானஸ்ஸ. தஸ்ஸ பன பக்க²த்³வயஸ்ஸாபி ஸாதா⁴ரணவஸேன ‘‘அகுஸலேனேவ பாதப்³ப³தாயா’’தி வுத்தம், ந பன ‘‘ஸசித்தகபக்கே²’’தி விஸேஸேத்வா. தஸ்மா இத³ம் ஸுராபானம் ஸசித்தகாசித்தகபக்க²த்³வயேபி லோகவஜ்ஜம் அகுஸலசித்தஞ்சாதி த³ஸ்ஸேதுமேவ ‘‘அகுஸலேனேவ பாதப்³ப³தாய லோகவஜ்ஜதா’’தி விஸும் வுத்தந்தி ஸுட்டு² ஸிஜ்ஜ²தி. ஏதேனேவ யம் ஸாரத்த²தீ³பனியம் ‘‘ஸசித்தகபக்கே² அகுஸலேனேவ பாதப்³ப³தாய லோகவஜ்ஜதா’’தி வுத்தஸ்ஸ இமஸ்ஸேவ அதி⁴ப்பாயஸ்ஸ படிபாத³கமேதந்தி ஸஞ்ஞாய இமினா ஏவ ஹி அதி⁴ப்பாயேன அஞ்ஞேஸுபி லோகவஜ்ஜேஸு அசித்தகஸிக்கா²பதே³ஸு அகுஸலசித்ததா ஏவ வுத்தா, ந பன திசித்ததா. தேனேவ பி⁴க்கு²னீவிப⁴ங்க³ட்ட²கதா²யம் வுத்தம் ‘‘கி³ரக்³க³ஸமஜ்ஜம் சித்தாகா³ரஸிக்கா²பத³ம் ஸங்கா⁴ணி இத்தா²லங்காரோ க³ந்த⁴வண்ணகோ வாஸிதகபிஞ்ஞாகோ பி⁴க்கு²னீஆதீ³ஹி உம்மத்³த³னபரிமத்³த³னானீதி இமானி த³ஸ ஸிக்கா²பதா³னி அசித்தகானி அகுஸலசித்தானி, அயம் பனேத்த² அதி⁴ப்பாயோ வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சா’’தி வுத்தம், தம்பி படிஸித்³த⁴ம் ஹோதி தப்³பி³பரீதஸ்ஸேவ அத்த²ஸ்ஸ யதா²வுத்தனயேன ஸாத⁴னதோ. தஸ்மா ஸுராபானஸ்ஸ அசித்தகபக்கே²பி சித்தம் அகுஸலமேவாதி இமம் விஸேஸம் த³ஸ்ஸேதுமேவ இத³ம் வசனம் வுத்தந்தி க³ஹேதப்³ப³ம். அயஞ்ஹேத்த² அத்தோ² வத்து²அஜானனதாய சேத்தா²தி ஏத்த² ச-காரோ விஸேஸத்த²ஜோதகோ அபிசாதி இமினா ஸமானத்தோ². தஸ்மா யதி³த³ம் அஞ்ஞேஸு அசித்தகலோகவஜ்ஜேஸு வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சாதி லோகவஜ்ஜதாய அகுஸலசித்ததாய ச லக்க²ணம் வுச்சதி, தம் ஏத்த² ஸுராபானஸிக்கா²பதே³ நாக³ச்ச²தி, இத⁴ பன விஸேஸோ அத்தீ²தி வுத்தம் ஹோதி. ஸோ கதரோதி சே? வத்து²அஜானனதாய ஏவ வத்து²ஜானனசித்தேன வினாபி ஆபஜ்ஜிதப்³ப³தாய ஏவ அசித்தகதா வேதி³தப்³பா³, நத்தே²த்த² அசித்தகதாய விஸேஸோ. கிந்து வத்து²அஜானனஸங்கா²தஅசித்தகபக்கே²பி அகுஸலசித்தேனேவ ஸுராமேரயஸ்ஸ அஜ்ஜோ²ஹரிதப்³ப³தாயாதி இமஸ்ஸ ஸிக்கா²பத³ஸ்ஸ ஸசித்தகபக்கே²பி அசித்தகபக்கே²பி லோகவஜ்ஜதா அகுஸலசித்ததா ச வேதி³தப்³பா³தி அயமேத்த² விஸேஸோ. இத⁴ ஹி ‘‘சித்தே பன ஸதீ’’தி அவிஸேஸேத்வா ‘‘அகுஸலேனேவா’’தி ஸாமஞ்ஞதோ வுத்தத்தா உப⁴யபக்கே²பி லோகவஜ்ஜதா அகுஸலசித்ததா ச ஸித்³தா⁴தி வேதி³தப்³பா³. தேனேவ பரமத்த²ஜோதிகாய (கு². பா. அட்ட². 2.பச்சி²மபஞ்சஸிக்கா²பத³வண்ணனா) கு²த்³த³கட்ட²கதா²ய ஸிக்கா²பத³வண்ணனாய ‘‘ஸுராமேரயமஜ்ஜபமாத³ட்டா²னம் காயதோ ச காயசித்ததோ சாதி த்³விஸமுட்டா²ன’’ந்தி வுத்தம். ஸுராதி ஜானனசித்தாபா⁴வேனேவ ஹேத்த² சித்தங்க³விரஹிதோ கேவலோபி காயோ ஏகஸமுட்டா²னம் வுத்தோ, தஸ்மிஞ்ச ஏகஸமுட்டா²னக்க²ணேபி யாய சேதனாய பிவதி, ஸா ஏகந்தஅகுஸலா ஏவ ஹோதி. தேனேவ தத்தே²வ அட்ட²கதா²யம் ‘‘பட²மா சேத்த² பஞ்ச ஏகந்தஅகுஸலசித்தஸமுட்டா²னத்தா பாணாதிபாதாதீ³னம் பகதிவஜ்ஜதோ வேரமணியோ, ஸேஸா பண்ணத்திவஜ்ஜதோ’’தி ஏவம் பஞ்சன்னம்பி ஸாமஞ்ஞதோ அகுஸலசித்ததா லோகவஜ்ஜதாஸங்கா²தா பகதிவஜ்ஜதா ச வுத்தா. அங்கே³ஸு ச ஜானனங்க³ம் ந வுத்தம். ததா² ஹி ‘‘ஸுராமேரயமஜ்ஜபமாத³ட்டா²னஸ்ஸ பன ஸுராதீ³னம் அஞ்ஞதரம் ஹோதி மத³னீயம், பாதுகாமதாசித்தஞ்ச பச்சுபட்டி²தம் ஹோதி, தஜ்ஜஞ்ச வாயாமம் ஆபஜ்ஜதி, பீதே ச பவிஸதீதி இமானி சத்தாரி அங்கா³னீ’’தி வுத்தம், ந பன ஸுராதி ஜானனங்கே³ன ஸத்³தி⁴ம் பஞ்சாதி. யதி³ ஹி ஸுராதி ஜானனம்பி அங்க³ம் ஸியா, அவஸ்ஸமேவ தம் வத்தப்³ப³ம் ஸியா, ந ச வுத்தம். யதா² சேத்த², ஏவம் அஞ்ஞாஸுபி ஸுத்தபிடகாதி³அட்ட²கதா²ஸு கத்த²சி ஜானனங்க³ம் ந வுத்தம். தஸ்மா ‘‘அகுஸலேனேவ பாதப்³ப³தாய லோகவஜ்ஜதா’’தி இமஸ்ஸ அட்ட²கதா²பாட²ஸ்ஸ அசித்தகபக்கே²பி ‘‘அகுஸலேனேவ பாதப்³ப³தாய லோகவஜ்ஜதா’’தி ஏவமேவ அத்தோ²தி நிட்ட²மேத்த² க³ந்தப்³ப³ம்.

அபிச யம் க³ண்டி²பதே³ஸு ‘‘ஏதம் ஸத்தம் மாரேஸ்ஸாமீதி தஸ்மிம்யேவ பதே³ஸே நிபன்னம் அஞ்ஞம் மாரேந்தஸ்ஸ பாணஸாமஞ்ஞஸ்ஸ அத்தி²தாய யதா² பாணாதிபாதோ ஹோதி, ஏவம் ஏதம் மஜ்ஜம் பிவிஸ்ஸாமீதி அஞ்ஞம் மஜ்ஜம் பிவந்தஸ்ஸ மஜ்ஜஸாமஞ்ஞஸ்ஸ அத்தி²தாய அகுஸலமேவ ஹோதி, யதா² பன கட்ட²ஸஞ்ஞாய ஸப்பம் கா⁴தேந்தஸ்ஸ பாணாதிபாதோ ந ஹோதி, ஏவம் நாளிகேரபானஸஞ்ஞாய மஜ்ஜம் பிவந்தஸ்ஸ அகுஸலம் ந ஹோதீ’’தி பாணாதிபாதேன ஸத்³தி⁴ம் ஸப்³ப³தா² ஸமானத்தேன உபமேத்வா வுத்தம், தம் அதிவிய அயுத்தம் ஸப்³பே³ஸம் ஸிக்கா²பதா³னம் பாணாதிபாதாதி³அகுஸலானஞ்ச அஞ்ஞமஞ்ஞம் ஸமானதாய நியமாபா⁴வா. பாணாதிபாதோ ஹி பரியாயேனாபி ஸிஜ்ஜ²தி, ந ததா² அதி³ன்னாதா³னம். தம் பன ஆணத்தியாபி ஸிஜ்ஜ²தி, ந ச மேது²னாதீ³ஸு. தஸ்மா பயோக³ங்கா³தீ³ஹிபி பி⁴ன்னானமேவ ஸம்ஸட்ட²ம் ஸப்³ப³தா² ஸமீகரணம் அயுத்தமேவ. ‘‘பாணாதிபாதோ விய அதி³ன்னாதா³னமேது²னாதீ³னிபி பரியாயகதா²தீ³ஹி ஸிஜ்ஜ²ந்தீ’’தி கேனசி வுத்தே தம் கிந்தி ந க³ய்ஹதி ததா² வசனாபா⁴வாதி சே? இதா⁴பி ‘‘ததா² பாணாதிபாதஸதி³ஸம் ஸுராபான’’ந்தி வசனாபா⁴வா இத³ம்பி ந க³ஹேதப்³ப³மேவ. கிஞ்சி அட்ட²கதா²வசனேனேவ ஸித்³த⁴மேவத்த²ம் படிபா³ஹந்தேன வினயஞ்ஞுனா ஸுத்தஸுத்தானுலோமாதீ³ஹி தஸ்ஸ விரோத⁴ம் த³ஸ்ஸேத்வா படிபா³ஹேதப்³ப³ம், ந பன பயோக³ங்கா³தீ³ஹி அச்சந்தவிபி⁴ன்னேன ஸிக்கா²பத³ந்தரேன ஸஹ ஸமீகரணமத்தேன. ந ஹி ‘‘ஸுராதி அஜானித்வா பிவந்தஸ்ஸாபி அகுஸலமேவா’’தி ஏத்த² ஸுத்தாதி³விரோதோ⁴ அத்தி², வினயபிடகே தாவ ஏதஸ்ஸ அத்த²ஸ்ஸ விருத்³த⁴ம் ஸுத்தாதி³கம் ந தி³ஸ்ஸதி, நாபி ஸுத்தபிடகாதீ³ஸு.

யம் பனேத்த² கேசி வத³ந்தி ‘‘மனோபுப்³ப³ங்க³மா த⁴ம்மாதி (த⁴. ப. 1, 2) வுத்தத்தா ஸப்³பா³னி அகுஸலானி புப்³பே³ வீதிக்கமவத்து²ம் ஜானந்தஸ்ஸேவ ஹோந்தீ’’தி. தம் தேஸம் ஸுத்தாதி⁴ப்பாயானபி⁴ஞ்ஞாதமேவ பகாஸேதி. ந ஹி ‘‘மனோபுப்³ப³ங்க³மா த⁴ம்மா’’தி இத³ம் வசனம் புப்³பே³ வீதிக்கமவத்து²ம் ஜானந்தஸ்ஸேவ அகுஸலா த⁴ம்மா உப்பஜ்ஜந்தீதி இமமத்த²ம் தீ³பேதி, அத² கோ² குஸலாகுஸலா த⁴ம்மா உப்பஜ்ஜமானா உப்பாத³பச்சயட்டே²ன புப்³ப³ங்க³மபூ⁴தம் ஸஹஜாதசித்தம் நிஸ்ஸாயேவ உப்பஜ்ஜந்தி, ந வினா சித்தேனாதி இமமத்த²ம் தீ³பேதி. ந ஹேத்த² ‘‘ஸுராதி அஜானித்வா பிவந்தஸ்ஸ அகுஸலமேவா’’தி வுத்தே ஸஹஜாதசித்தம் வினாபி லோபா⁴தி³அகுஸலசேதஸிகா த⁴ம்மா உப்பஜ்ஜந்தீதி அயமத்தோ² ஆபஜ்ஜதி. யேன தம் நிஸேதா⁴ய இத³ம் ஸுத்தம் ஆஹரணீயம் ஸியா, அபி⁴த⁴ம்மவிரோதோ⁴பேத்த² நத்தி² புப்³பே³ நாமஜாதிஆதி³வஸேன அஜானந்தஸ்ஸேவ பஞ்சவிஞ்ஞாணவீதி²யம் குஸலாகுஸலஜவனுப்பத்திவசனதோ.

அபிச பா³லபுது²ஜ்ஜனானம் ச²ஸு த்³வாரேஸு உப்பஜ்ஜமானானி ஜவனானி யேபு⁴ய்யேன அகுஸலானேவ உப்பஜ்ஜந்தி. குஸலானி பன தேஸம் கல்யாணமித்தாதி³உபனிஸ்ஸயப³லேன அப்பகானேவ உப்பஜ்ஜந்தி, துண்ஹீபூ⁴தானம்பி நித்³தா³யித்வா ஸுபினம் பஸ்ஸந்தானம்பி உத்³த⁴ச்சாதி³அகுஸலஜவனஸ்ஸேவ யேபு⁴ய்யப்பவத்திதோ குஸலாகுஸலவிரஹிதஸ்ஸ ஜவனஸ்ஸ தேஸம் அபா⁴வா. அகுஸலா ஹி விஸயானுகு³ணம் வாஸனானுகு³ணஞ்ச யதா²பச்சயம் ஸமுப்பஜ்ஜந்தி, தத்த² கிம் புப்³பே³ ஜானனாஜானனனிப³த்³தே⁴ன. யே பன ஜானனாதி³அங்க³ஸம்பன்னா பாணாதிபாதாத³யோ, யே ச ஜானனாதி³ம் வினாபி ஸிஜ்ஜ²மானா ஸுராபானமிச்சா²தி³ட்டி²ஆத³யோ, தே தே ததா² ததா² யாதா²வதோ ஞத்வா ஸம்மாஸம்பு³த்³தே⁴ன நித்³தி³ட்டா², தேஸஞ்ச யதா²னித்³தி³ட்ட²வஸேன க³ஹணே கோ நாம அபி⁴த⁴ம்மவிரோதோ⁴. ஏவம் ஸுத்தாதி³விரோதா⁴பா⁴வதோ, அட்ட²கதா²ய ச வுத்தத்தா யதா²வுத்தவஸேனேவேத்த² அத்தோ² க³ஹேதப்³போ³. யதி³ ஏவம் கஸ்மா ‘‘ஸாமணேரோ ஜானித்வா பிவந்தோ ஸீலபே⁴த³ம் ஆபஜ்ஜதி, ந அஜானித்வா’’தி அட்ட²கதா²யம் வுத்தந்தி? நாயம் தோ³ஸோ ஸீலபே⁴த³ஸ்ஸ ப⁴க³வதோ ஆணாயத்தத்தா உக்கி²த்தானுவத்திகாதீ³னம் ஸீலபே⁴தோ³ விய. ந ஹி தாஸம் அகுஸலுப்பத்தியா ஏவ ஸீலபே⁴தோ³ ஹோதி ஸங்கா⁴யத்தஸமனுபா⁴ஸனானந்தரேயேவ விஹிதத்தா. ஏவமிதா⁴பி ஜானித்வா பிவனே ஏவ விஹிதோ, ந அஜானித்வா பிவனே. அஞ்ஞோ ஹி ஸிக்கா²பத³விஸயோ, அஞ்ஞோ அகுஸலவிஸயோ. தேனேவ ஸாமணேரானம் புரிமேஸு பஞ்சஸு ஸிக்கா²பதே³ஸு ஏகஸ்மிம் பி⁴ன்னே ஸப்³பா³னிபி ஸிக்கா²பதா³னி பி⁴ஜ்ஜந்தி. அகுஸலம் பன யம் பி⁴ன்னம், தேன ஏகேனேவ ஹோதி, நாஞ்ஞேஹி. தஸ்மா ஸாமணேரஸ்ஸ அஜானித்வா பிவந்தஸ்ஸ ஸீலபே⁴தா³பா⁴வேபி கம்மபத²ப்பத்தம் அகுஸலமேவாதி க³ஹேதப்³ப³ம்.

யம் பன ஸாரத்த²தீ³பனியம் (ஸாரத்த². டீ. பாராஜிககண்ட³ 2.42) ‘‘ஸாமணேரஸ்ஸ ஸுராதி அஜானித்வா பிவந்தஸ்ஸ பாராஜிகம் நத்தி², அகுஸலம் பன ஹோதீ’’தி கேஹிசி வுத்தவசனம் ‘‘தம் தேஸம் மதிமத்த’’ந்தி படிக்கி²பித்வா ‘‘பி⁴க்கு²னோ அஜானித்வாபி பீ³ஜதோ பட்டா²ய மஜ்ஜம் பிவந்தஸ்ஸ பாசித்தியம். ஸாமணேரோ ஜானித்வா பிவந்தோ ஸீலபே⁴த³ம் ஆபஜ்ஜதி, ந அஜானித்வாதி ஏத்தகமேவ ஹி அட்ட²கதா²யம் வுத்தம், அகுஸலம் பன ஹோதீதி ந வுத்த’’ந்தி தத்த² காரணம் வுத்தம், தம் அகாரணம். ந ஹி அட்ட²கதா²யம் ஸாமணேரானம் ஜானித்வா பிவனே ஏவ ஸீலபே⁴தோ³, ந அஜானித்வாதி ஸீலபே⁴த³கத²னட்டா²னே அகுஸலம் பன ஹோதீதி அவசனம் அஜானனபக்கே² அகுஸலாபா⁴வஸ்ஸ காரணம் ஹோதி, தத்த² பஸங்கா³பா⁴வா, வத்தப்³ப³ட்டா²னே ஏவ ‘‘அகுஸலேனேவ பாதப்³ப³தாய லோகவஜ்ஜதா’’தி வுத்தத்தா ச. ந ச தே ‘‘அகுஸலம் பன ஹோதீ’’தி வத³ந்தா ஆசரியா இமம் ஸாமணேரானம் ஸீலபே⁴த³ப்பகாஸகம் க²ந்த⁴கட்ட²கதா²பாட²மேவ க³ஹேத்வா அவோசும், யேன ‘‘ஏத்தகமேவ அட்ட²கதா²யம் வுத்த’’ந்தி வத்தப்³ப³ம் ஸியா, அத² கோ² ஸுராபானட்ட²கதா²க³தம் ஸுத்தபிடகட்ட²கதா²க³தஞ்ச அனேகவித⁴ம் வசனம், மஹாவிஹாரவாஸீனம் பரம்பரோபதே³ஸஞ்ச க³ஹேத்வா அவோசும். பி⁴ன்னலத்³தி⁴கானம் அப⁴யகி³ரிகாதீ³னம் மதஞ்ஹேதம், யதி³த³ம் ஜானித்வா பிவந்தஸ்ஸேவ அகுஸலந்தி க³ஹணம். தஸ்மா யம் வுத்தம் கேஹிசி ‘‘ஸாமணேரஸ்ஸ ஸுராதி அஜானித்வா பிவந்தஸ்ஸ பாராஜிகம் நத்தி², அகுஸலம் பன ஹோதீ’’தி, தம் ஸுவுத்தந்தி க³ஹேதப்³ப³ம்.

யஞ்ச ஸாரத்த²தீ³பனியம் (ஸாரத்த². டீ. பாராஜிககண்ட³ 2.42) ‘‘அஜானித்வா பிவந்தஸ்ஸாபி ஸோதாபன்னஸ்ஸ முக²ம் ஸுரா ந பவிஸதி கம்மபத²ப்பத்தஅகுஸலசித்தேனேவ பாதப்³ப³தோ’’தி கேஹிசி வுத்தவசனம் ‘‘ந ஸுந்த³ர’’ந்தி படிக்கி²பித்வா ‘‘போ³தி⁴ஸத்தே குச்சி²க³தே போ³தி⁴ஸத்தமாது ஸீலம் விய ஹி இத³ம்பி அரியஸாவகானம் த⁴ம்மதாஸித்³த⁴ந்தி வேதி³தப்³ப³’’ந்தி வத்வா த⁴ம்மதாஸித்³த⁴த்தம்யேவ ஸமத்தே²தும் ‘‘ப⁴வந்தரேபி ஹி அரியஸாவகோ ஜீவிதஹேதுபி நேவ பாணம் ஹனதி, ந ஸுரம் பிவதி. ஸசே பிஸ்ஸ ஸுரஞ்ச கீ²ரஞ்ச மிஸ்ஸேத்வா முகே² பக்கி²பந்தி, கீ²ரமேவ பவிஸதி, ந ஸுரா. யதா² கிம்? யதா² கோஞ்சஸகுணானம் கீ²ரமிஸ்ஸகே உத³கே கீ²ரமேவ பவிஸதி, ந உத³கம். இத³ம் யோனிஸித்³த⁴ந்தி சே, இத³ம்பி த⁴ம்மதாஸித்³த⁴ந்தி வேதி³தப்³ப³’’ந்தி இத³ம் அட்ட²கதா²வசனம் த³ஸ்ஸிதம், தம்பி ந யுத்தமேவ. யதா² ஹி போ³தி⁴ஸத்தமாது ஸீலம் விய அரியஸாவகானம் த⁴ம்மதாஸித்³த⁴ந்தி ஏத்த² போ³தி⁴ஸத்தமாது த⁴ம்மதா நாம போ³தி⁴ஸத்தஸ்ஸ ச அத்தனோ ச பாரமிதானுபா⁴வேன அகுஸலானுப்பத்தினியமோ ஏவ. ததா² அரியஸாவகானம்பி ப⁴வந்தரே பாணாதிபாதாதீ³னம் த³ஸன்னம் கம்மபதா²னம் அஞ்ஞேஸஞ்ச அபாயஹேதுகானம் அகுஸலானம் அச்சந்தப்பஹாயகஸ்ஸ மக்³க³ஸ்ஸ ஆனுபா⁴வேன தம்தம்ஸீலவீதிக்கமஹேதுகஸ்ஸ அகுஸலஸ்ஸ அனுப்பத்தினியமோ ஏவ த⁴ம்மதா. ந ஹி ஸபா⁴வவாதீ³னம் த⁴ம்மதா விய அஹேதுகதா இத⁴ த⁴ம்மதா நாம. யதா² வா ஏவம்த⁴ம்மதானயே காரணஸ்ஸ பா⁴வே அபா⁴வே ச காரியஸ்ஸ பா⁴வோ அபா⁴வோ ச த⁴ம்மதா, ந அஹேதுஅப்பச்சயாபா⁴வாபா⁴வோ, ஏவமிதா⁴பி பாணாதிபாதாதி³கம்மபதா²னம் ஹேதுபூ⁴தஸ்ஸ கிலேஸஸ்ஸ அச்சந்தாபா⁴வேன தேஸம் அபா⁴வோ, தத³வஸேஸானம் அகுஸலானம் ஹேதுனோ பா⁴வேன பா⁴வோ ச த⁴ம்மதா, ந அஹேதுகதா. தஸ்மா அபாயஹேதுனோ ராக³ஸ்ஸ அபா⁴வேனேவ அரியானம் அஜானித்வாபி ஸுராய அனஜ்ஜோ²ஹரணந்தி ஸுவுத்தமேவித³ம் கேஹிசி ‘‘அஜானித்வா பிவந்தஸ்ஸாபி ஸோதாபன்னஸ்ஸ முக²ம் ஸுரா ந பவிஸதி கம்மபத²ப்பத்தஅகுஸலசித்தேனேவ பாதப்³ப³தோ’’தி, தம் கேன ஹேதுனா ந ஸுந்த³ரம் ஜாதந்தி ந ஞாயதி, த⁴ம்மதாஸித்³த⁴ந்தி வா கத²னேன கத²ம் தம் படிக்கி²த்தந்தி.

யம்பி தீ³க⁴னிகாயட்ட²கதா²யம் (தீ³. நி. அட்ட². 1.352) ‘‘ஸுரஞ்ச கீ²ரஞ்ச மிஸ்ஸேத்வா…பே… இத³ம் த⁴ம்மதாஸித்³த⁴’’ந்தி வசனம், தம்பி ஸுராபானஸ்ஸ அசித்தகபக்கே²பி அகுஸலசித்தஞ்ஞேவ ஸாதே⁴தி. ததா² ஹி ‘‘ப⁴வந்தரேபி ஹி அரியஸாவகோ ஜீவிதஹேதுபி பாணம் ந ஹனதி, நாதி³ன்னம் ஆதி³யதி…பே… ந ஸுரம் பிவதீ’’தி வுத்தே ‘‘புரிமானம் தாவ சதுன்னம் கம்மபதா²னம் ஸசித்தகத்தா விரமணம் ஸுகரம், பச்சி²மஸ்ஸ பன ஸுராபானஸ்ஸ அசித்தகத்தா கத²ம் விரமணம் ப⁴வேய்யா’’தி சோத³னாஸம்ப⁴வம் மனஸிகத்வா வத்து²அஜானனவஸேன அசித்தகத்தேபி யஸ்மா கம்மபத²ப்பத்தஅகுஸலேனேவ ஸுரா அஜ்ஜோ²ஹரிதப்³பா³, தாதி³ஸீ ச அகுஸலப்பவத்தி அரியஸாவகஸ்ஸ மக்³கே³னேவ ஹதா, தஸ்மாஸ்ஸ பரக³லம் ஸுராய பவிஸனம் நத்தீ²தி அத்த²தோ க³ம்யமானத்த²ம் பரிஹாரவசனம் வத³தா ‘‘ஸசே பிஸ்ஸ ஸுரஞ்ச கீ²ரஞ்சா’’திஆதி³ வுத்தம். தத்த² கீ²ரமேவ பவிஸதி, ந ஸுராதி இத³ம் ஸுராய ஸப்³ப³தா²பி பரக³லப்பவேஸாபா⁴வத³ஸ்ஸனபரம், ந பன ஸுராமிஸ்ஸகீ²ரஸ்ஸ ஸுராய வியோஜனஸாமத்தி²யத³ஸ்ஸனபரம். அயஞ்ஹேத்த² அதி⁴ப்பாயோ – யதி³ ஹி ஸுராமிஸ்ஸே கீ²ரே கிஞ்சி பவிஸேய்ய, கீ²ரமேவ பவிஸேய்ய, ந ஸுரா. கீ²ரே பன ஸுராய அவியுத்தே ந கிஞ்சி பவிஸதீதி. இத³ம் யோனிஸித்³த⁴ந்தி உத³கஸ்ஸ முகே² அப்பவிஸனம் யோனிஸித்³த⁴ம். யோனீதி சேத்த² ஜாதி அதி⁴ப்பேதா. தஸ்மா கோஞ்சஜாதிகானம் முக²துண்ட³ஸங்கா²தானம் ரூபத⁴ம்மானம் கீ²ரமிஸ்ஸஉத³கஜ்ஜோ²ஹரணஹேதுத்தாபா⁴வேன தம் அப்பவிஸனம் ஸித்³த⁴ந்தி அத்தோ². இத³ம்பி ஹி கீ²ரமிஸ்ஸாய ஸுராய கீ²ரே பவிஸந்தேபி பரக³லாபவிஸனந்தி. த⁴ம்மதாஸித்³த⁴ந்தி அரியஸாவகஸ்ஸ அரூபத⁴ம்மானம் ஸுராபிவனஹேதுபூ⁴தகிலேஸஸஹிதத்தாபா⁴வஸங்கா²தாய த⁴ம்மதாய ஸித்³த⁴ம். ஏவமேத்த² அசித்தகபக்கே²பி ஸுராய அகுஸலசித்தேனேவ பாதப்³ப³தோ அரியஸாவகானம் அபிவனம் ஸமத்தி²தந்தி வேதி³தப்³ப³ம். அதா²பி ஸியா அஜானனபக்கே² அகுஸலசித்தேன வினாவ பாதப்³ப³த்தேபி ஸுராய அபிவனம் அரியானம் த⁴ம்மதாதி ஸமத்த²னபரமேதந்தி, தம் ந, அட்ட²கதா²வசனந்தரேஹி விருஜ்ஜ²னதோ. யதா² ஹி வசனந்தரேஹி ந விருஜ்ஜ²தி, ததா²யேவ அத்தோ² க³ஹேதப்³போ³.

அபிச பாணாதிபாதாதீ³னம் பஞ்சன்னம் கம்மபதா²னம் ப⁴வந்தரேபி அகரணம் அரியானம் த⁴ம்மதாஸீலமேவ, தேஸஞ்ச யதி³ ஸசித்தகதம் ஸமானம். ஸுராபானம் விய இதரானிபி சத்தாரி அஜானந்தேனாபி அரியஸாவகேன ந கத்தப்³பா³னி ஸியும், ததா² ச அஜானந்தானம் அரியானம் குஸலாப்³யாகதசித்தேஹிபி விரமணபரமாரணபரஸந்தகக³ஹணாதீ³ஸு காயவசீபவத்தி ந ஸம்பஜ்ஜேய்ய, நோ சே ஸம்பஜ்ஜதி, சக்கு²பாலத்தே²ரஸ்ஸ சங்கமனேன பாணவியோக³ஸ்ஸ, உப்பலவண்ணத்தே²ரியா ப³லக்காரேன மக்³கே³னமக்³க³பு²ஸனஸ்ஸ ச பவத்தத்தா. தஸ்மா ஸுராபானஸ்ஸ அசித்தகபக்கே²பி அகுஸலேனேவ பாதப்³ப³தாய ஸுரா அரியானம் பரக³லம் ந பவிஸதீதி விஸேஸேத்வா வுத்தந்தி வேதி³தப்³ப³ம்.

நனு வத்து²ம் ஜானந்தஸ்ஸேவ ஸப்³பே³ கம்மபதா² வுத்தாதி? ந, மிச்சா²தி³ட்டி²யா விபரீதக்³க³ஹணேனேவ பவத்தத்தா. கத²ஞ்ஹி நாம அஸப்³ப³ஞ்ஞும் ஸப்³ப³ஞ்ஞுதோ, அனிச்சாதி³ம் நிச்சாதி³தோ ச க³ஹணந்தீ தி³ட்டி² வத்து²ம் விஜானாதி. யதி³ ஹி ஜானேய்ய, மிச்சா²தி³ட்டி²யேவ ந ஸியா. ஸா ச கம்மபதே²ஸு க³ணிதாதி குதோ ஜானந்தஸ்ஸேவ கம்மபத²ப்பவத்தினியமோ. அத² ஸப்³ப³ஞ்ஞும் ஸப்³ப³ஞ்ஞூதி க³ண்ஹந்தீபி ‘‘அயம் ஸத்தோ’’தி தஸ்ஸ ஸரூபக்³க³ஹணதோ தி³ட்டி²பி வத்து²ம் விஜானாதீதி சே? ந, ஸுராபானஸ்ஸபி ‘‘அயம் ந ஸுரா’’தி ஸரூபக்³க³ஹணஸ்ஸ ஸமானத்தா. ‘‘அய’’ந்தி ச வத்து²பராமஸனேபி ‘‘ஸுரா’’தி விஸேஸவிஜானனாபா⁴வா ந ஜானாதீதி சே? ‘‘அய’’ந்தி புக்³க³லத்தம் ஜானந்தீபி ‘‘அஸப்³ப³ஞ்ஞூ’’திபி விஸேஸஜானனாபா⁴வா தி³ட்டி²பி வத்து²ம் ந ஜானாதீதி ஸமானமேவ. ஏவஞ்ஹி தேஸம் பு³த்³தா⁴தி அஹிதோதி அஹிதம் வா பூரணகஸ்ஸபாதி³ம் ஹிதோ படிக⁴ஸ்ஸ வா அனுனயஸ்ஸ வா உப்பாத³னேபி ஏஸேவ நயோ. விபல்லாஸபுப்³ப³கஞ்ஹி ஸப்³ப³ம் அகுஸலம்.

அபிச ஸுராய பீயமானாய நியமேன அகுஸலுப்பாத³னம் ஸபா⁴வோ பீதாய விய. கீ²ராதி³ஸஞ்ஞாய பீதஸுரஸ்ஸ புக்³க³லஸ்ஸ மாதுப⁴கி³னிஆதீ³ஸுபி ராக³தோ³ஸாதி³அகுஸலப்பப³ந்தோ⁴ வத்து²ஸபா⁴வேனேவ உப்பஜ்ஜதி, ஏவம் பீயமானக்க²ணேபி திகி²ணோ ராகோ³ உப்பஜ்ஜதேவ, தேனேவ ஸாக³தத்தே²ரஸ்ஸ அஜானித்வா பிவனகாலே பஞ்சாபி⁴ஞ்ஞாதி³ஜா²னபரிஹானி, பச்சா² ச பு³த்³தா⁴தீ³ஸு அகா³ரவாதி³அகுஸலப்பப³ந்தோ⁴ யாவ ஸுராவிக³மா பவத்தித்த². தேனேவ ப⁴க³வாபி தஸ்ஸ அகா³ரவாதி³அகஉஸலப்பவத்தித³ஸ்ஸனமுகே²ன ஸுராதோ³ஸம் பகாஸேத்வா ஸிக்கா²பத³ம் பஞ்ஞபேஸி. ந ஹி பஞ்சனீவரணுப்பத்திம் வினா ஜா²னபரிஹானி ஹோதி. தஸ்மா அஜானந்தஸ்ஸாபி ஸுரா பீயமானா பீதா ச அத்தனோ ஸபா⁴வேனேவ அகுஸலுப்பாதி³காதி அயமத்தோ² ஸாக³தத்தே²ரஸ்ஸ ஜா²னபரிஹானியா அன்வயதோபி, அரியானம் கிலேஸாபா⁴வேன முகே²ன ஸுராய அப்பவேஸஸங்கா²தப்³யதிரேகதோபி ஸிஜ்ஜ²தீதி நிட்ட²மேத்த² க³ந்தப்³ப³ம், ஏவம் க³ஹணமேவ ஹி விப⁴ஜ்ஜவாதீ³மதானுஸாரம்.

யம் பன ‘‘ஜானித்வா பிவந்தஸ்ஸேவ அகுஸல’’ந்தி க³ஹணம், தம் பி⁴ன்னலத்³தி⁴கானம் அப⁴யகி³ரிகாதீ³னமேவ மதம், தம் பன க³ண்டி²பத³காரகாதீ³ஹி ‘‘பரவாதோ³’’தி அஜானந்தேஹி அத்தனோ மதியா ஸம்ஸந்தி³த்வா லிகி²தம் விப⁴ஜ்ஜவாதீ³மண்ட³லம்பி பவிஸித்வா யாவஜ்ஜதனா ஸாஸனம் தூ³ஸேதி, புராபி கிர இமஸ்மிம்பி த³மிளரட்டே² கோசி பி⁴ன்னலத்³தி⁴கோ நாக³ஸேனோ நாம தே²ரோ குண்ட³லகேஸீவத்து²ம் பரவாத³மத²னனயத³ஸ்ஸனத்த²ம் த³மிளகப்³ப³ரூபேன காரேந்தோ ‘‘இமம் ஸுராபானஸ்ஸ ஜானித்வாவ பிவனே அகுஸலனயம், அஞ்ஞஞ்ச தே³ஸகாலாதி³பே⁴தே³ன அனந்தம்பி ஞேய்யம் ஸப்³ப³ஞ்ஞுதஞ்ஞாணம் ஸலக்க²ணவஸேனேவ ஞாதும் ந ஸக்கோதி ஞாணேன பரிச்சி²ன்னத்தேன ஞேய்யஸ்ஸ அனந்தத்தஹானிப்பஸங்க³தோ. அனிச்சாதி³ஸாமஞ்ஞலக்க²ணவஸேனேவ பன ஞாதும் ஸக்கோதீ’’தி ச, ‘‘பரமத்த²த⁴ம்மேஸு நாமரூபந்திஆதி³பே⁴தோ³ விய புக்³க³லாதி³ஸம்முதிபி விஸும் வத்து²பே⁴தோ³ ஏவா’’தி ச ஏவமாதி³கம் ப³ஹும் விபரீதத்த²னயம் கப்³பா³காரஸ்ஸ கவினோ உபதி³ஸித்வா தஸ்மிம் பப³ந்தே⁴ காரணாபா⁴ஸேஹி ஸதிம் ஸம்மோஹேத்வா பப³ந்தா⁴பேஸி, தஞ்ச கப்³ப³ம் நிஸ்ஸாய இமம் பி⁴ன்னலத்³தி⁴கமதம் இத⁴ விப⁴ஜ்ஜவாதீ³மதே ஸம்மிஸ்ஸம் சிரம் பவத்தித்த². தம் பன பச்சா² ஆசரியபு³த்³த⁴ப்பியமஹாதே²ரேன பா³ஹிரப்³ப⁴ரிகம் தி³ட்டி²ஜாலம் விகா⁴டேத்வா இத⁴ பரிஸுத்³த⁴ம் ஸாஸனம் பதிட்டா²பேந்தேன ஸோதி⁴தம்பி ஸாரத்த²தீ³பனியா (ஸாரத்த². டீ. பாராஜிககண்ட³ 2.42) வினயடீகாய ஸுராபானஸ்ஸ ஸசித்தகபக்கே²யேவ சித்தம் அகுஸலந்தி ஸமத்த²னவசனம் நிஸ்ஸாய கேஹிசி விபல்லத்தசித்தேஹி புன உக்கி²த்தஸிரம் ஜாதம், தஞ்ச மஹாதே²ரேஹி வினிச்சி²னித்வா கா³ரய்ஹவாத³ம் கத்வா மத்³தி³த்வா லத்³தி⁴கா³ஹகே ச பி⁴க்கூ² வியோஜேத்வா த⁴ம்மேன வினயேன ஸத்து²ஸாஸனேன சிரேனேவ வூபஸமிதம். தேனேவேத்த² மயம் ஏவம் வித்தா²ரதோ இத³ம் படிக்கி²பிம்ஹ ‘‘மா அஞ்ஞேபி விப⁴ஜ்ஜவாதி³னோ அயம் லத்³தி⁴ தூ³ஸேஸீ’’தி. தஸ்மா இத⁴ வுத்தானி அவுத்தானி ச காரணானி ஸுட்டு² ஸல்லக்கே²த்வா யதா² ஆக³மவிரோதோ⁴ ந ஹோதி, ததா² அத்தோ² க³ஹேதப்³போ³.

ஸேஸந்தி யஸ்ஸ வத்து²விஜானனசித்தேன ஸசித்தகபக்கே²பி சித்தம் அகுஸலமேவாதி நியமோ நத்தி², தம் ஸப்³ப³ந்தி அத்தோ². ருந்த⁴ந்தீதி ‘‘திரச்சா²னக³தித்தி²யா தோ³ஸோ நத்தீ²’’திஆதி³னா அனாபத்தியா லேஸக்³க³ஹணம் நிவாரேந்தீ. த்³வாரம் பித³ஹந்தீதி ‘‘தஞ்ச கோ² மனுஸ்ஸித்தி²யா’’திஆதி³னா (பாரா. 41) லேஸக்³க³ஹணஸ்ஸ காரணஸங்கா²தம் த்³வாரம் பித³ஹந்தீ. ஸோதம் பச்சி²ந்த³மானாதி தது³ப⁴யலேஸக்³க³ஹணத்³வாரானம் வஸேன அவிச்சி²ன்னம் வீதிக்கமஸோதம் பச்சி²ந்த³மானா. கா³ள்ஹதரம் கரோந்தீதி யதா²வுத்தேஹி காரணேஹி பட²மபஞ்ஞத்திஸித்³த⁴ம் ஆபத்திஞ்ஞேவ த³ள்ஹம் கரோந்தீ, அனாபத்தியா ஓகாஸம் அத³த³மானாதி அத்தோ². ஸா ச யஸ்மா வீதிக்கமாபா⁴வே, அவிஸயதாய அப்³போ³ஹாரிகே வீதிக்கமே ச லோகவஜ்ஜேபி ஸிதி²லம் கரோந்தீ உப்பஜ்ஜதி, தஸ்மா ததா² உப்பத்திம் உப்பத்திகாரணஞ்ச த³ஸ்ஸேந்தோ ஆஹ அஞ்ஞத்ர அதி⁴மானாதிஆதி³. அஞ்ஞத்ர அதி⁴மானாதி இமிஸ்ஸா அனுபஞ்ஞத்தியா ‘‘வீதிக்கமாபா⁴வா’’தி காரணம் வுத்தம். அஞ்ஞத்ர ஸுபினந்தாதி இமிஸ்ஸா ‘‘அப்³போ³ஹாரிகத்தா’’தி காரணம் வுத்தம். தத்த² வீதிக்கமாபா⁴வாதி பாபிச்சா²ய அவிஜ்ஜமானஸ்ஸ உத்தரிமனுஸ்ஸத⁴ம்மஸ்ஸ விஜ்ஜமானதோ பகாஸனவஸப்பவத்தவிஸம்வாத³னாதி⁴ப்பாயஸங்கா²தஸ்ஸ வீதிக்கமஸ்ஸ அபா⁴வதோ. அதி⁴மானிகஸ்ஸ ஹி அனதி⁴க³தே அதி⁴க³தஸஞ்ஞிதாய யதா²வுத்தவீதிக்கமோ நத்தி². அப்³போ³ஹாரிகத்தாதி ‘‘அத்தே²ஸா, பி⁴க்க²வே, சேதனா, ஸா ச கோ² அப்³போ³ஹாரிகா’’தி (பாரா. 235) வசனதோ மோசனஸ்ஸாத³சேதனாய உபக்கமனஸ்ஸ ச விஜ்ஜமானத்தேபி தி²னமித்³தே⁴ன அபி⁴பூ⁴ததாய அவஸத்தேன அப்³போ³ஹாரிகத்தா, ஆபத்திகாரணவோஹாராபா⁴வாதி அத்தோ². வா-ஸத்³தோ³ சேத்த² ஸமுச்சயத்தோ² த³ட்ட²ப்³போ³, ‘‘அப்³போ³ஹாரிகத்தா சா’’தி வா பாடோ². வுத்தாதி து³விதா⁴பி சேஸா அனுபஞ்ஞத்தி அனாபத்திகரா வுத்தாதி அதி⁴ப்பாயோ.

அகதே வீதிக்கமேதி ஆபதா³ஸுபி பி⁴க்கூ²ஹி ஸிக்கா²பத³வீதிக்கமே அகதே, குக்குச்சா ந பு⁴ஞ்ஜிம்ஸூதிஆதீ³ஸு விய வீதிக்கமம் அகத்வா பி⁴க்கூ²ஹி அத்தனோ து³க்கு²ப்பத்தியா ஆரோசிதாயாதி அத்தோ². ஸிதி²லம் கரோந்தீதி பட²மம் ஸாமஞ்ஞதோ ப³த்³த⁴ஸிக்கா²பத³ம் மோசேத்வா அத்தனோ விஸயே அனாபத்திகரணவஸேன ஸிதி²லம் கரோந்தீ. த்³வாரம் த³த³மானாதி அனாபத்தியா த்³வாரம் த³த³மானா. அபராபரம்பி அனாபத்திம் குருமானாதி தி³ன்னேன தேன த்³வாரேன உபரூபரி அனாபத்திபா⁴வம் தீ³பேந்தீ. பஞ்ஞத்தேபி ஸிக்கா²பதே³ உதா³யினா ‘‘முஹுத்திகாய வேஸியா ந தோ³ஸோ’’தி லேஸேன வீதிக்கமித்வா ஸஞ்சரித்தாபஜ்ஜனவத்து²ஸ்மிம் (பாரா. 296 ஆத³யோ) பஞ்ஞத்தத்தா ‘‘கதே வீதிக்கமே’’தி வுத்தம். பஞ்ஞத்திக³திகாதி அத்த²தோ மூலபஞ்ஞத்தியேவாதி அதி⁴ப்பாயோ.

மக்கடீவத்து²கதா²வண்ணனானயோ நிட்டி²தோ.

ஸந்த²தபா⁴ணவாரோ

வஜ்ஜிபுத்தகவத்து²கதா²வண்ணனா

43-44. வஜ்ஜிபுத்தகவத்து²கதா²ய பாளியம் ‘‘வேஸாலிகா…பே… மேது²னம் த⁴ம்மம் படிஸேவிம்ஸூ’’தி ஏத்த² தே ஞாதிகுலம் க³ந்த்வா கி³ஹிலிங்க³ம் க³ஹேத்வா ‘‘கி³ஹிபூ⁴தா மய’’ந்தி ஸஞ்ஞாய மேது²னம் படிஸேவிம்ஸூதி க³ஹேதப்³ப³ம், தேனாஹ ஞாதிப்³யஸனேனபி பு²ட்டா²திஆதி³. ஞாதீனம் வினாஸோ ராஜத³ண்டா³தி³காரணேன ஹோதீதி ஆஹ ராஜத³ண்ட³இச்சாதி³. த⁴ஞ்ஞஹிரஞ்ஞதா³ஸிதா³ஸகோ³மஹிம்ஸாதி³த⁴னானி போ⁴கா³ நாம, தேஸம்பி ராஜத³ண்டா³தி³னாவ வினாஸோதி ஆஹ ‘‘ஏஸ நயோ து³தியபதே³பீ’’தி. ந ஸப்³ப³ஞ்ஞுபு³த்³தோ⁴திஆதி³னா தீஸு வத்தூ²ஸு அப்பஸன்னாவ ஸாஸனே அப⁴ப்³பா³தி ஸஞ்ஞாய அத்தனோ ப⁴ப்³ப³தம் பகாஸேந்தா ந மயந்திஆதி³மாஹம்ஸூதி வேதி³தப்³ப³ம். ‘‘அட்ட²திம்ஸாரம்மணேஸூ’’தி பாளியம் அனாக³தே ஆலோகாகாஸகஸிணே வஜ்ஜேத்வா வுத்தம், தேஹி பன ஸத்³தி⁴ம் சத்தாலீஸ ஹோந்தி. விப⁴த்தா குஸலா த⁴ம்மாதி ‘‘இமஸ்மிம் ஆரம்மணே இத³ம் ஹோதீ’’தி விபா⁴க³ஸோ த³ஸ்ஸிதா ஸஉபசாரஜ்ஜா²னா மஹக்³க³தகுஸலா த⁴ம்மா. கி³ஹிபலிபோ³த⁴ந்தி ஸஹஸோகிதாதி³வஸேன கி³ஹீஸு ப்³யாவடதம். ஆவாஸபலிபோ³த⁴ந்தி ஸேனாஸனேஸு நவகம்மாதி³வஸேன நிச்சப்³யாவடதம். து³ப்பரிச்சாகா³னம் இமேஸம் த்³வின்னம் பலிபோ³தா⁴னம் வஸேன ஸப்³பே³பி பலிபோ³தா⁴ ஸங்க³ஹிதா ஏவாதி வேதி³தப்³ப³ம்.

யேனாதி காரணேன. அஸம்வாஸோதி இத³ம் தஸ்மிம் அத்தபா⁴வே கேனசிபி பரியாயேன பி⁴க்கு² ஹுத்வா பி⁴க்கூ²ஹி ஸத்³தி⁴ம் ஸம்வாஸம் நாரஹதீதி இமமத்த²ம் ஸந்தா⁴ய வுத்தந்தி ஆஹ ‘‘அஸம்வாஸோ’’தி. பஞ்ஞத்தம் ஸமூஹனேய்யாதி ‘‘ஸோ ஆக³தோ ந பப்³பா³ஜேதப்³போ³’’தி அவத்வா ‘‘ந உபஸம்பாதே³தப்³போ³’’தி ஏத்தகஸ்ஸேவ வுத்தத்தா பாராஜிகஸ்ஸ ஸாமணேரபூ⁴மி அனுஞ்ஞாதாதி விஞ்ஞாயதி, தேனாஹ ஸாமணேரபூ⁴மியம் பன டி²தோதிஆதி³. ‘‘யோ பன பி⁴க்கூ²’’தி வுத்தத்தா (பாரா. 39) பச்சக்கா²தஸிக்கோ² யஸ்மா பி⁴க்கு² ந ஹோதி, மேது²னஸேவனே ச பாராஜிகம் நாபஜ்ஜதி, தஸ்மாஸ்ஸ ‘‘ஆக³தோ உபஸம்பாதே³தப்³போ³’’தி உபஸம்பத³ம் அனுஜானந்தோ பாராஜிகம் ந ஸமூஹனதி நாம, தேனாஹ ‘‘பி⁴க்கு²பா⁴வே ட²த்வா அவிபன்னஸீலதாயா’’தி. உத்தமத்த²ம் அரஹத்தம், நிப்³பா³னமேவ வா.

சதுப்³பி³த⁴வினயாதி³கதா²வண்ணனா

45. நீஹரித்வாதி பாளிதோ உத்³த⁴ரித்வா, ததா² ஹி ‘‘பஞ்சஹுபாலி, அங்கே³ஹி ஸமன்னாக³தேன பி⁴க்கு²னா நானுயுஞ்ஜிதப்³ப³ம். கதமேஹி பஞ்சஹி? ஸுத்தம் ந ஜானாதி, ஸுத்தானுலோமம் ந ஜானாதீ’’திஆதி³பாளிதோ ஸுத்தம் ஸுத்தானுலோமஞ்ச நீஹரிம்ஸு. ‘‘அனாபத்தி ஏவம் அம்ஹாகம் ஆசரியானம் உக்³க³ஹோ பரிபுச்சா²தி ப⁴ணதீ’’தி ஏவமாதி³தோ ஆசரியவாத³ம். ‘‘ஆயஸ்மா உபாலி ஏவமாஹ – ‘அனாபத்தி, ஆவுஸோ, ஸுபினந்தேனா’தி’’ ஏவமாதி³தோ அத்தனோ மதிம் நீஹரிம்ஸு, ஸா ச தே²ரஸ்ஸ அத்தனோமதி ஸுத்தேன ஸங்க³ஹிதத்தா ஸுத்தம் ஜாதம், ஏவமஞ்ஞாபி ஸுத்தாதீ³ஹி ஸங்க³ஹிதாவ க³ஹேதப்³பா³, நேதராதி வேதி³தப்³ப³ம். அத² வா நீஹரித்வாதி விப⁴ஜித்வா ஸாட்ட²கத²ம் ஸகலம் வினயபிடகம் ஸுத்தாதீ³ஸு சதூஸு பதே³ஸேஸு பக்கி²பித்வா சதுதா⁴ விப⁴ஜித்வா வினயம் பகாஸேஸும் தப்³பி³னிமுத்தஸ்ஸ அபா⁴வாதி அதி⁴ப்பாயோ. வுத்தந்தி நாக³ஸேனத்தே²ரேன மிலிந்த³பஞ்ஹே வுத்தம். கண்டா²தி³வண்ணுப்பத்திட்டா²னகரணாதீ³ஹி ஆஹரித்வா அத்தனோ வசீவிஞ்ஞத்தியாவ பா⁴ஸிதவசனம் ஆஹச்சபத³ம். ரஸோதி ஸாரோ ‘‘பத்தரஸோ’’திஆதீ³ஸு (த⁴. ஸ. 628-630) விய, படிக்கி²த்தஅனுஞ்ஞாதஸுத்தஸாரோதி அத்தோ², ரஸோதி வா லக்க²ணம் படிவத்து²கம் அனுத்³த⁴ரித்வா லக்க²ணானுலோமேன வுத்தத்தா. த⁴ம்மஸங்கா³ஹகாதி³ஆசரியவம்ஸேன ஆப⁴தா அட்ட²கதா² ஆசரியவம்ஸோதி ஆஹ ‘‘ஆசரியவம்ஸோதி ஆசரியவாதோ³’’தி.

வினயபிடகே பாளீதி இத⁴ அதி⁴காரவஸேன வுத்தம். ஸேஸபிடகேஸுபி ஸுத்தாதி³சதுனயா யதா²னுரூபம் லப்³ப⁴ந்தேவ. மஹாபதே³ஸாதி மஹாஓகாஸா மஹாவிஸயா, தே அத்த²தோ ‘‘யம், பி⁴க்க²வே’’திஆதி³பாளிவஸேன அகப்பியானுலோமதோ கப்பியானுலோமதோ ச புக்³க³லேஹி நயதோ ததா² ததா² க³ய்ஹமானா அத்த²னயா ஏவ. தே ஹி ப⁴க³வதா ஸரூபதோ அவுத்தேஸுபி படிக்கி²த்தானுலோமேஸு, அனுஞ்ஞாதானுலோமேஸு ச ஸேஸேஸு கிச்சேஸு நிவத்திபவத்திஹேதுதாய மஹாகோ³சராதி ‘‘மஹாபதே³ஸா’’தி வுத்தா, ந பன ‘‘யம், பி⁴க்க²வே, மயா இத³ம் ந கப்பதீ’’திஆதி³னா வுத்தா ஸாதி⁴ப்பாயா பாளியேவ தஸ்ஸா ஸுத்தே பவிட்ட²த்தா. ‘‘ஸுத்தானுலோமம்பி ஸுத்தே ஓதாரேதப்³ப³ம்…பே… ஸுத்தமேவ ப³லவதர’’ந்தி (பாரா. அட்ட². 1.45) ஹி வுத்தம், ந ஹேஸா ஸாதி⁴ப்பாயா பாளி ஸுத்தே ஓதாரேதப்³பா³, ந க³ஹேதப்³பா³ வா ஹோதி, யேனாயம் ஸுத்தானுலோமம் ஸியா. தஸ்மா இமம் பாளிஅதி⁴ப்பாயம் நிஸ்ஸாய புக்³க³லேஹி க³ஹிதா யதா²வுத்தஅத்தா²வ ஸுத்தானுலோமம். தப்பகாஸகத்தா பன அயம் பாளிபி ஸுத்தானுலோமந்தி க³ஹேதப்³ப³ம், தேனாஹ யே ப⁴க³வதா ஏவம் வுத்தாதிஆதி³. யம் பி⁴க்க²வேதிஆதி³பாளினயேன ஹி புக்³க³லேஹி க³ஹேதப்³பா³ யே அகப்பியானுலோமாத³யோ அத்தா² வுத்தா, தே மஹாபதே³ஸாதி அத்தோ².

ப⁴க³வதோ பகிண்ணகதே³ஸனாபூ⁴தா ச ஸுத்தானுலோமபூ⁴தா ச அட்ட²கதா². யஸ்மா த⁴ம்மஸங்கா³ஹகத்தே²ரேஹி பாளிவண்ணனாக்கமேன ஸங்க³ஹேத்வா வுத்தா, தஸ்மா ‘‘ஆசரியவாதோ³’’தி வுத்தா, ஏதேன ச அட்ட²கதா² ஸுத்தஸுத்தானுலோமேஸு அத்த²தோ ஸங்க³ய்ஹதீதி வேதி³தப்³பா³. யதா² ச ஏஸா, ஏவம் அத்தனோமதிபி பமாணபூ⁴தா. ந ஹி ப⁴க³வதோ வசனம் வசனானுலோமஞ்ச அனிஸ்ஸாய அக்³க³ஸாவகாத³யோபி அத்தனோ ஞாணப³லேன ஸுத்தாபி⁴த⁴ம்மவினயேஸு கஞ்சி ஸம்முதிபரமத்த²பே⁴த³ம் அத்த²ம் வத்தும் ஸக்கோந்தி, தஸ்மா ஸப்³ப³ம்பி வசனம் ஸுத்தே ஸுத்தானுலோமே ச ஸங்க³ய்ஹதி. விஸும் பன அட்ட²கதா²தீ³னம் ஸங்க³ஹிதத்தா தத³வஸேஸம் ஸுத்தஸுத்தானுலோமதோ க³ஹேத்வா சதுதா⁴ வினயோ நித்³தி³ட்டோ². ஸுத்தாத³யோ நிஸ்ஸாயேவ பவத்தாபி அத்தனோமதி தேஸு ஸரூபேன அனாக³தத்தா வுத்தம் ‘‘ஸுத்தஸுத்தானுலோமஆசரியவாதே³ முஞ்சித்வா’’தி, தேனாஹ ‘‘அனுபு³த்³தி⁴யா நயக்³கா³ஹேனா’’தி. தத்த² ஸுத்தாதீ³னி அனுக³தாய ஏவ பு³த்³தி⁴யா தேஹி லத்³த⁴னயக்³கா³ஹேன சாதி அத்தோ².

தே²ரவாதோ³தி மஹாஸுமத்தே²ராதீ³னம் கா³ஹோ. ஸுத்தாதி³ம் நிஸ்ஸாயேவ விபரீததோபி அத்தனோமதி உப்பஜ்ஜதீதி ஆஹ தம் பனாதிஆதி³. அத்தே²னாதி அத்தனா நயக்³க³ஹிதேன அத்தே²ன. பாளிந்தி அத்தனோ கா³ஹஸ்ஸ நிஸ்ஸயபூ⁴தம் ஸாட்ட²கத²ம் பாளிம். பாளியாதி தப்படிக்கே²பத்த²ம் பரேனாஹடாய ஸாட்ட²கதா²ய பாளியா, அத்தனா க³ஹிதம் அத்த²ம் நிஸ்ஸாய பாளிஞ்ச ஸம்ஸந்தி³த்வாதி அத்தோ². ஆசரியவாதே³தி அத்தனா பரேன ச ஸமுத்³த⁴டஅட்ட²கதா²ய. ஓதரதி சேவ ஸமேதி சாதி அத்தனா உத்³த⁴டேஹி ஸம்ஸந்த³னவஸேன ஓதரதி, பரேன உத்³த⁴டேன ஸமேதி. ஸப்³ப³து³ப்³ப³லாதி அஸப்³ப³ஞ்ஞுபுக்³க³லஸ்ஸ தோ³ஸவாஸனாய யாதா²வதோ அத்த²ஸம்படிபத்திஅபா⁴வதோ வுத்தம். பமாத³பாட²வஸேன ஆசரியவாத³ஸ்ஸ ஸுத்தானுலோமேன அஸம்ஸந்த³னாபி ஸியாதி ஆஹ ‘‘இதரோ ந க³ஹேதப்³போ³’’தி.

ஸமேந்தமேவ க³ஹேதப்³ப³ந்தி யே ஸுத்தேன ஸம்ஸந்த³ந்தி, ஏவரூபாவ அத்தா² மஹாபதே³ஸதோ உத்³த⁴ரிதப்³பா³தி த³ஸ்ஸேதி ததா² ததா² உத்³த⁴டஅத்தா²னமேவ ஸுத்தானுலோமத்தா, தேனாஹ ‘‘ஸுத்தானுலோமதோ ஹி ஸுத்தமேவ ப³லவதர’’ந்தி. அப்படிவத்தியந்தி அப்படிபா³ஹியம். காரகஸங்க⁴ஸதி³ஸந்தி பமாணத்தா ஸங்கீ³திகாரகஸங்க⁴ஸதி³ஸம். பு³த்³தா⁴னம் டி²தகாலஸதி³ஸந்தி த⁴ரமானகபு³த்³த⁴ஸதி³ஸந்தி அத்தோ². ஸகவாதீ³ ஸுத்தம் க³ஹேத்வா கதே²தீதிஆதீ³ஸு யோ யதா²பூ⁴தமத்த²ம் க³ஹேத்வா கத²னஸீலோ, ஸோ ஸகவாதீ³. ஸுத்தந்தி ஸங்கீ³தித்தயாருள்ஹம் பாளிவசனம். பரவாதீ³தி மஹாவிஹாரவாஸீ வா ஹோது அஞ்ஞனிகாயவாஸீ வா, யோ விபரீததோ அத்த²ம் க³ஹேத்வா கத²னஸீலோ, ஸோவ இத⁴ ‘‘பரவாதீ³’’தி வுத்தோ. ஸுத்தானுலோமந்தி ஸங்கீ³தித்தயாருள்ஹம் வா அனாருள்ஹம் வா யம்கிஞ்சி விபல்லாஸதோ வா வஞ்சனாய வா ‘‘ஸங்கீ³தித்தயாக³தமித³’’ந்தி த³ஸ்ஸியமானம் ஸுத்தானுலோமம். கேசி ‘‘அஞ்ஞனிகாயே ஸுத்தானுலோம’’ந்தி வத³ந்தி, தம் ந யுத்தம் ஸகவாதீ³பரவாதீ³னம் உபி⁴ன்னம்பி ஸங்கீ³தித்தயாருள்ஹஸுத்தாதீ³னம் ஏவ க³ஹேதப்³ப³தோ. ததா² ஹி வக்க²தி ‘‘திஸ்ஸோ ஸங்கீ³தியோ ஆருள்ஹம் பாளிஆக³தம் பஞ்ஞாயதி, க³ஹேதப்³ப³’’ந்திஆதி³. ந ஹி ஸகவாதீ³ அஞ்ஞனிகாயஸுத்தாதி³ம் பமாணதோ க³ண்ஹாதி, யேன தேஸு ஸுத்தாதீ³ஸு த³ஸ்ஸிதேஸு தத்த² டா²தப்³ப³ம் ப⁴வேய்ய, வக்க²தி ச ‘‘பரோ தஸ்ஸ அகப்பியபா⁴வஸாத⁴கம் ஸுத்ததோ ப³ஹும் காரணஞ்ச வினிச்ச²யஞ்ச த³ஸ்ஸேதி…பே… ‘ஸாதூ⁴’தி ஸம்படிச்சி²த்வா அகப்பியேயேவ டா²தப்³ப³’’ந்தி (பாரா. அட்ட². 1.45). தஸ்மா பரவாதி³னாபி ஸங்கீ³தித்தயே அனாருள்ஹம்பி அனாருள்ஹமிச்சேவ த³ஸ்ஸீயதி, கேவலம் தஸ்ஸ தஸ்ஸ ஸுத்தாதி³னோ ஸங்கீ³தித்தயே அனாக³தஸ்ஸ கூடதா, ஆக³தஸ்ஸ ச ப்³யஞ்ஜனச்சா²யாய அஞ்ஞதா² அதி⁴ப்பாயயோஜனா ச விஸேஸோ. தத்த² ச யம் கூடம், தம் அபனீயதி. யம் அஞ்ஞதா² யோஜிதம், தஸ்ஸ விபரீததாஸந்த³ஸ்ஸனத்த²ம் தத³ஞ்ஞேன ஸுத்தாதி³னா ஸம்ஸந்த³னா கரீயதி. யோ பன பரவாதி³னா க³ஹிதோ அதி⁴ப்பாயோ ஸுத்தந்தாதி³னா ஸம்ஸந்த³தி, ஸோ ஸகவாதி³னாபி அத்தனோ கா³ஹம் விஸ்ஸஜ்ஜேத்வா க³ஹேதப்³போ³தி உபி⁴ன்னம்பி ஸங்கீ³தித்தயாக³தமேவ ஸுத்தாதி³பமாணந்தி வேதி³தப்³ப³ம். தேனேவ கதா²வத்து²ப்பகரணே ஸகவாதே³ பஞ்ச ஸுத்தஸதானி பரவாதே³ பஞ்சாதி (த⁴. ஸ. அட்ட². நிதா³னகதா²; கதா². அட்ட². நிதா³னகதா²) ஸுத்தஸஹஸ்ஸம்பி அதி⁴ப்பாயக்³க³ஹணனானத்தேன ஸங்கீ³தித்தயாக³தமேவ க³ஹிதம், ந நிகாயந்தரே கிஞ்சீதி.

கே²பந்தி ‘‘கிம் இமினா’’தி படிக்கே²பம் ச²ட்³ட³னம். க³ரஹந்தி ‘‘கிமேஸ பா³லோ ஜானாதீ’’தி நிந்த³னம். ஸுத்தே ஓதாரேதப்³ப³ந்தி யஸ்ஸ ஸுத்தஸ்ஸ அனுலோமனதோ இத³ம் ஸுத்தானுலோமம் அகாஸி, தஸ்மிம், தத³னுரூபே வா அஞ்ஞதரஸ்மிம் ஸுத்தே அத்தனா க³ஹிதம் ஸுத்தானுலோமம் அத்த²தோ ஸம்ஸந்த³னவஸேன ஓதாரேதப்³ப³ம், ‘‘இமினா ச இமினா ச காரணேன இமஸ்மிம் ஸுத்தே ஸம்ஸந்த³தீ’’தி ஸம்ஸந்தி³த்வா த³ஸ்ஸேதப்³ப³ந்தி அத்தோ². அயந்தி ஸகவாதீ³. பரோதி பரவாதீ³. ஆசரியவாதோ³ ஸுத்தே ஓதாரேதப்³போ³தி யஸ்ஸ ஸுத்தஸ்ஸ வண்ணனாவஸேன அயம் ஆசரியவாதோ³ பவத்தோ, தஸ்மிம், தாதி³ஸே ச அஞ்ஞதரஸ்மிம் ஸுத்தே புப்³பா³பரஅத்த²ஸம்ஸந்த³னவஸேன ஓதாரேதப்³ப³ம். கா³ரய்ஹாசரியவாதோ³தி பமாத³லிகி²தோ, பி⁴ன்னலத்³தி⁴கேஹி வா ட²பிதோ, ஏஸ நயோ ஸப்³ப³த்த².

யம் கிஞ்சி கூடஸுத்தம் பா³ஹிரகஸுத்தாதி³வசனம் ந க³ஹேதப்³ப³ந்தி த³ஸ்ஸேதும் ஸுத்தம் ஸுத்தானுலோமே ஓதாரேதப்³ப³ந்திஆதி³ வுத்தம். கு³ள்ஹவேஸ்ஸந்தராதீ³னி மஹாஸங்கி⁴காதி³பி⁴ன்னலத்³தி⁴கானம் பகரணானி. ஆதி³-ஸத்³தே³ன கு³ள்ஹஉம்மக்³கா³தீ³னம் க³ஹணம். ஸகவாதீ³ ஸுத்தம் க³ஹேத்வா கதே²தி, பரவாதீ³பி ஸுத்தந்திஆதி³னா அஞ்ஞேபி வாதா³லம்ப³னா வுத்தனயேன ஸக்கா ஞாதுந்தி இத⁴ ந வுத்தா.

ஏவம் ஸுத்தஸுத்தானுலோமாதி³முகே²ன ஸாமஞ்ஞதோ விவாத³ம் த³ஸ்ஸேத்வா இதா³னி விஸேஸதோ விவாத³வத்து²ம் தப்³பி³னிச்ச²யமுகே²ன ஸுத்தாதீ³னஞ்ச த³ஸ்ஸேதும் அத² பனாயம் கப்பியந்திஆதி³ வுத்தம். ஸுத்தே ச ஸுத்தானுலோமே சாதி ஏத்த² ச-காரோ விகப்பத்தோ², தேன ஆசரியவாதா³தீ³னம்பி ஸங்க³ஹோ, தேனாஹ ‘‘காரணஞ்ச வினிச்ச²யஞ்ச த³ஸ்ஸேதீ’’தி. தத்த² காரணந்தி ஸுத்தாதி³னயம் நிஸ்ஸாய அத்தனோமதியா உத்³த⁴டம் ஹேதும். வினிச்ச²யந்தி அட்ட²கதா²வினிச்ச²யம். காரணச்சா²யாதி ஸுத்தாதீ³ஸு ‘‘கப்பிய’’ந்தி கா³ஹஸ்ஸ, ‘‘அகப்பிய’’ந்தி கா³ஹஸ்ஸ ச நிமித்தபூ⁴தம் கிச்சே²ன படிபாத³னீயம் அவிபூ⁴தகாரணம் காரணச்சா²யா, காரணபதிரூபகந்தி அத்தோ². வினயஞ்ஹி பத்வாதி இமஸ்ஸ விவரணம் கப்பியாகப்பியவிசாரணமாக³ம்மாதி. ருந்தி⁴தப்³ப³ந்தி கப்பியஸஞ்ஞாய வீதிக்கமகரணம் ருந்தி⁴தப்³ப³ம், தம்னிவாரணசித்தம் த³ள்ஹதரம் காதப்³ப³ம். ஸோதம் பச்சி²ந்தி³தப்³ப³ந்தி தத்த² வீதிக்கமப்பவத்தி பச்சி²ந்தி³தப்³பா³. க³ருகபா⁴வேதி அகப்பியபா⁴வே. ஸுத்தவினிச்ச²யகாரணேஹீதி ஸுத்தேன அட்ட²கதா²வினிச்ச²யேன ச லத்³த⁴காரணேஹி. ஏவந்திஆதி³ யதா²வுத்தஸ்ஸ அத்த²ஸ்ஸ நிக³மனவசனம். அதிரேககாரணந்தி ஸுத்தாதீ³ஸு புரிமம் புரிமம் அதிரேககாரணம் நாம, ப³ஹுகாரணம் வா.

வாசுக்³க³தந்தி வாசாய உக்³க³தம், தத்த² நிரந்தரம் டி²தந்தி அத்தோ². ‘‘ஸுத்தம் நாம ஸகலம் வினயபிடக’’ந்தி வுத்தத்தா புன ஸுத்ததோதி தத³த்த²படிபாத³கம் ஸுத்தாபி⁴த⁴ம்மபாளிவசனம் அதி⁴ப்பேதம். அனுப்³யஞ்ஜனதோதி இமஸ்ஸ விவரணம் பரிபுச்ச²தோ ச அட்ட²கதா²தோ சாதி. தத்த² பரிபுச்சா²தி ஆசரியஸ்ஸ ஸந்திகா பாளியா அத்த²ஸவனம். அட்ட²கதா²தி பாளிமுத்தகவினிச்ச²யோ. தது³ப⁴யம்பி ஹி பாளிம் அனுக³ந்த்வா அத்த²ஸ்ஸ ப்³யஞ்ஜனதோ ‘‘அனுப்³யஞ்ஜன’’ந்தி வுத்தம். வினயேதி வினயாசாரே, தேனேவ வக்க²தி வினயம் அவிஜஹந்தோ அவோக்கமந்தோதிஆதி³. தத்த² பதிட்டா²னம் நாம ஸஞ்சிச்ச ஆபத்தியா அனாபஜ்ஜனாதி³ ஹோதீதி ஆஹ ‘‘லஜ்ஜீபா⁴வேன பதிட்டி²தோ’’தி, தேன லஜ்ஜீ ஹோதீதி வுத்தம் ஹோதி. வினயத⁴ரஸ்ஸ லக்க²ணே வத்தப்³பே³ கிம் இமினா லஜ்ஜீபா⁴வேனாதி ஆஹ அலஜ்ஜீ ஹீதிஆதி³. தத்த² ப³ஹுஸ்ஸுதோபீதி இமினா பட²மலக்க²ணஸமன்னாக³மம் த³ஸ்ஸேதி. லாப⁴க³ருதாயாதிஆதி³னா வினயே டி²ததாய அபா⁴வே பட²மலக்க²ணயோகோ³ கிச்சகரோ ந ஹோதி, அத² கோ² அகிச்சகரோ அனத்த²கரோ ஏவாதி த³ஸ்ஸேதி. ஸங்க⁴பே⁴த³ஸ்ஸ புப்³ப³பா⁴கோ³ கலஹோ ஸங்க⁴ராஜி.

வித்து²னதீதி வித்த²ம்ப⁴தி, நித்து²னதி வா ஸந்திட்டி²தும் ந ஸக்கோதி, தேனாஹ யம் யந்திஆதி³. ஆசரியபரம்பராதி ஆசரியானம் வினிச்ச²யபரம்பரா, தேனேவ வக்க²தி ‘‘அத்தனோ மதிம் பஹாய…பே… யதா² ஆசரியோ ச ஆசரியாசரியோ ச பாளிஞ்ச பரிபுச்ச²ஞ்ச வத³ந்தி, ததா² ஞாதும் வட்டதீ’’தி. ந ஹி ஆசரியானம் நாமமத்ததோ பரம்பராஜானனே பயோஜனமத்தி². புப்³பா³பரானுஸந்தி⁴தோதி புப்³ப³வசனஸ்ஸ அபரவசனேன ஸஹ அத்த²ஸம்ப³ந்த⁴ஜானனதோ. அத்த²தோதி பத³த்த²பிண்ட³த்த²அதி⁴ப்பேதத்தா²தி³தோ. காரணதோதி தத³த்து²பபத்திதோ. தே²ரவாத³ங்க³ந்தி தே²ரவாத³படிபாடிம், தேஸம் வினிச்ச²யபடிபாடிந்தி அத்தோ².

இமேஹி ச பன தீஹி லக்க²ணேஹீதி ஏத்த² பட²மேன லக்க²ணேன வினயஸ்ஸ ஸுட்டு² உக்³க³ஹிதபா⁴வோ வுத்தோ. து³தியேனஸ்ஸ லஜ்ஜீபா⁴வேன சேவ அசலதாய ச பதிட்டி²ததா. ததியேன பாளிஅட்ட²கதா²ஸு அனுரூபேன அனாக³தம்பி தத³னுலோமதோ ஆசரியேஹி தி³ன்னனயதோ வினிச்சி²னிதும் ஸமத்த²தா. ஓதிண்ணே வத்து²ஸ்மிந்தி சோத³னாவஸேன வீதிக்கமவத்து²ஸ்மிம் ஸங்க⁴மஜ்ஜே² ஓதிண்ணே. சோத³கேன சுதி³தகேன ச வுத்தே வத்தப்³பே³தி ஏவம் ஓதிண்ணே வத்து²ம் நிஸ்ஸாய சோத³கேன ‘‘தி³ட்ட²ம் ஸுத’’ந்திஆதி³னா சுதி³தகேன ‘‘அத்தி² நத்தீ²’’திஆதி³னா ச யம் வத்தப்³ப³ம், தஸ்மிம் வத்தப்³பே³ வுத்தேதி அத்தோ². து²ல்லச்சயது³ப்³பா⁴ஸிதானம் மாதிகாய அனாக³தத்தா ‘‘பஞ்சன்னம் ஆபத்தீன’’ந்தி வுத்தம். திகது³க்கடந்தி ‘‘அனுபஸம்பன்னே உபஸம்பன்னஸஞ்ஞீ உஜ்ஜா²யதி வா கீ²யதி வா ஆபத்தி து³க்கடஸ்ஸா’’திஆதி³னா (பாசி. 106 தோ²கம் விஸதி³ஸம்) ஆக³தம் திகது³க்கடம். அஞ்ஞதரம் வா ஆபத்திந்தி ‘‘காலே விகாலஸஞ்ஞீ ஆபத்தி து³க்கடஸ்ஸ, காலே வேமதிகோ ஆபத்தி து³க்கடஸ்ஸா’’திஆதி³கம் (பாசி. 250) து³கது³க்கடம் ஸந்தா⁴ய வுத்தம். அந்தராபத்திந்தி தஸ்மிம் தஸ்மிம் ஸிக்கா²பதே³ ஆக³தவத்து²வீதிக்கமம் வினா அஞ்ஞஸ்மிம் வத்து²வீதிக்கமே நிதா³னதோ பபு⁴தி வினீதவத்து²பரியோஸானா அந்தரந்தரா வுத்தம் ஆபத்திம். இத⁴ பன ‘‘வத்து²ம் ஓலோகேதீ’’தி விஸும் க³ஹிதத்தா தத³வஸேஸா அந்தராபத்தீதி க³ஹிதா. படிலாதம் உக்கி²பதீதி இத³ம் விஸிப்³ப³னஸிக்கா²பதே³ (பாசி. 350-351) ஆக³தம். தத்த² ட³ய்ஹமானம் அலாதம் அக்³கி³கபாலாதி³தோ ப³ஹி பதிதம் அவிஜ்ஜா²தமேவ படிஉக்கி²பதி, புன யதா²டா²னே ட²பேதீதி அத்தோ². விஜ்ஜா²தம் பன பக்கி²பந்தஸ்ஸ பாசித்தியமேவ. அனாபத்திந்தி ஏத்த² அந்தரந்தரா வுத்தா அனாபத்திபி அத்தி², ‘‘அனாபத்தி, பி⁴க்க²வே, இத்³தி⁴மஸ்ஸ இத்³தி⁴விஸயே’’திஆதி³ (பாரா. 159) விய ஸாபி ஸங்க³ய்ஹதி.

பாராஜிகாபத்தீதி ந தாவ வத்தப்³ப³ந்தி இத³ம் ஆபன்னபுக்³க³லேன லஜ்ஜீத⁴ம்மே ட²த்வா யதா²பூ⁴தம் ஆவிகரணேபி து³ப்³பி³னிச்ச²யம் அதி³ன்னாதா³னாதி³ம் ஸந்தா⁴ய வுத்தம். யம் பன மேது²னாதீ³ஸு விஜானனம், தம் வத்தப்³ப³மேவ, தேனாஹ மேது²னத⁴ம்மவீதிக்கமோ ஹீதிஆதி³. யோ பன அலஜ்ஜிதாய படிஞ்ஞம் அத³த்வா விக்கே²பம் கரோதி, தஸ்ஸ ஆபத்தி ந ஸக்கா ஓளாரிகாபி வினிச்சி²னிதும், யாவ ஸோ யதா²பூ⁴தம் நாவி கரோதி, ஸங்க⁴ஸ்ஸ ச ஆபத்திஸந்தே³ஹோ ந விக³ச்ச²தி, தாவ நாஸிதகோவ ப⁴விஸ்ஸதி. ஸுகு²மாதி சித்தபரிவத்தியா ஸுகு²மதாய ஸுகு²மா. தேனாஹ ‘‘சித்தலஹுகா’’தி, சித்தம் தஸ்ஸ லஹுகந்தி அத்தோ². தேதி வீதிக்கமே. தம்வத்து²கந்தி அதி³ன்னாதா³னாதி³மூலகம். யம் ஆசரியோ ப⁴ணதி, தம் கரோஹீதிஆதி³ ஸப்³ப³ம் லஜ்ஜீபேஸலம் குக்குச்சகமேவ ஸந்தா⁴ய வுத்தம். யோ யாதா²வதோ பகாஸேத்வா ஸுத்³தி⁴மேவ க³வேஸதி, தேனாபி, பாராஜிகோஸீதி ந வத்தப்³போ³தி அனாபத்திகோடியாபி ஸங்கியமானத்தா வுத்தம், தேனேவ ‘‘பாராஜிகச்சா²யா’’தி வுத்தம். ஸீலானி ஸோதே⁴த்வாதி யஸ்மிம் வீதிக்கமே பாராஜிகாஸங்கா வத்ததி, தத்த² பாராஜிகாபா⁴வபக்க²ம் க³ஹேத்வா தே³ஸனாவுட்டா²னகா³மினீனம் ஆபத்தீனம் ஸோத⁴னவஸேன ஸீலானி ஸோதே⁴த்வா. த்³வத்திம்ஸாகாரந்தி பாகடபா⁴வதோ உபலக்க²ணவஸேன வுத்தம், யம் கிஞ்சி அபி⁴ருசிதம் மனஸிகாதும் வட்டதேவ. கம்மட்டா²னம் க⁴டியதீதி விப்படிஸாரமூலகேன விக்கே²பேன அந்தரந்தரா க²ண்ட³ம் அத³ஸ்ஸேத்வா பப³ந்த⁴வஸேன சித்தேன ஸங்க⁴டியதி. ஸங்கா²ராதி விபஸ்ஸனாகம்மட்டா²னவஸேன வுத்தம். ஸாபத்திகஸ்ஸ ஹி பகு³ணம்பி கம்மட்டா²னம் ந ஸுட்டு² உபட்டா²தி, பகே³வ பாராஜிகஸ்ஸ. தஸ்ஸ ஹி விப்படிஸாரனின்னதாய சித்தம் ஏகக்³க³ம் ந ஹோதி. ஏகஸ்ஸ பன விதக்கவிக்கே²பாதி³ப³ஹுலஸ்ஸ ஸுத்³த⁴ஸீலஸ்ஸபி சித்தம் ந ஸமாதி⁴யதி, தம் இத⁴ பாராஜிகமூலகந்தி ந க³ஹேதப்³ப³ம். கதபாபமூலகேன விப்படிஸாரேனேவேத்த² சித்தஸ்ஸ அஸமாதி⁴யனம் ஸந்தா⁴ய ‘‘கம்மட்டா²னம் ந க⁴டியதீ’’தி வுத்தம், தேனாஹ விப்படிஸாரக்³கி³னாதிஆதி³. அத்தனாதி சித்தேன கரணபூ⁴தேன புக்³க³லோ கத்தா ஜானாதி, பச்சத்தே வா கரணவசனம், அத்தா ஸயம் பஜானாதீதி அத்தோ².

சதுப்³பி³த⁴வினயாதி³கதா²வண்ணனானயோ நிட்டி²தோ.

பத³பா⁴ஜனீயவண்ணனா

யோ விய தி³ஸ்ஸதீதி யாதி³ஸோ, யம்-ஸத்³த³த்தே² யதா²-ஸத்³தோ³ வத்ததீதி ஆஹ ‘‘யேன வா தேன வா யுத்தோ’’தி. யேன தேனாதி ஹி பத³த்³வயேன அனியமதோ யம்-ஸத்³த³த்தோ²வ த³ஸ்ஸிதோ. வாஸது⁴ரயுத்தோதி விபஸ்ஸனாது⁴ரயுத்தோ. யா ஜாதி அஸ்ஸாதி யம்ஜாதி, புக்³க³லோ, ஸோவ யம்ஜச்சோ ஸகத்தே² யபச்சயம் கத்வா. கோ³த்தவஸேன யேன வா தேன வா கோ³த்தேன யதா²கோ³த்தோ வா ததா²கோ³த்தோ வா ஹோதூதி ஸம்ப³ந்தோ⁴. ஸீலேஸூதி பகதீஸு. அத² கோ²தி இத³ம் கிந்தூதி இமஸ்மிம் அத்தே². கிம் வுத்தம் ஹோதீதி அத்தோ². இமஸ்மிம் அத்தே²தி இமஸ்மிம் பாராஜிகவிஸயே. ஏஸோதி யதா²வுத்தேஹி பகாரேஹி யுத்தோ. அரியாயாதி ‘‘உத்³தி³ஸ்ஸ அரியா திட்ட²ந்தி, ஏஸா அரியானம் யாசனா’’தி ஏவம் வுத்தாய, ந, ‘‘தே³ஹி மே’’தி கபணாய. லிங்க³ஸம்படிச்ச²னேனாதி ‘‘பி⁴க்க²ம் சரிஸ்ஸாமீ’’தி சித்தாபா⁴வேபி பி⁴க்கா²ஹாரனிஸ்ஸிதபப்³ப³ஜ்ஜாலிங்க³ஸ்ஸ ஸம்படிச்ச²னேன. காஜப⁴த்தந்தி காஜேஹி ஆனீதப⁴த்தம். அத⁴ம்மிகாயாதி அதி⁴ஸீலஸிக்கா²தி³பி⁴க்கு²கு³ணாபா⁴வதோ வுத்தம், தேனாஹ ‘‘அபூ⁴தாயா’’தி. ‘‘மயம் பி⁴க்கூ²’’தி வத³ந்தா படிஞ்ஞாமத்தேனேவ பி⁴க்கூ², ந அத்த²தோதி அத்தோ². இத³ஞ்ச ‘‘மயம் பி⁴க்கூ²’’தி படிஜானனஸ்ஸாபி ஸம்ப⁴வதோ வுத்தம். ‘‘மயம் பி⁴க்கூ²’’தி அப்படிஜானந்தாபி ஹி பி⁴க்கு²வோஹாரனிமித்தஸ்ஸ லிங்க³ஸ்ஸ க³ஹணேன சேவ பி⁴க்கூ²னம் தி³ன்னபச்சயபா⁴க³க்³க³ஹணாதி³னா ச பி⁴க்கு²படிஞ்ஞா ஏவ நாம ஹோந்தி. ததா² ஹி வுத்தம் புக்³க³லபஞ்ஞத்திஅட்ட²கதா²யம் –

‘‘‘அப்³ரஹ்மசாரீ ப்³ரஹ்மசாரிபடிஞ்ஞோ’தி அஞ்ஞே ப்³ரஹ்மசாரினோ ஸுனிவத்தே² ஸுபாருதே ஸும்ப⁴கபத்தத⁴ரே கா³மனிக³மஜனபத³ராஜதா⁴னீஸு பிண்டா³ய சரித்வா ஜீவிகம் கப்பேந்தே தி³ஸ்வா ஸயம்பி தாதி³ஸேன ஆகாரேன ததா² படிபஜ்ஜனதோ ‘அஹம் ப்³ரஹ்மசாரீ’தி படிஞ்ஞம் தே³ந்தோ விய ஹோதி. ‘அஹம் பி⁴க்கூ²’தி வத்வா உபோஸத²க்³கா³தீ³னி பவிஸந்தோ பன ப்³ரஹ்மசாரிபடிஞ்ஞோ ஹோதியேவ, ததா² ஸங்கி⁴கம் லாப⁴ம் க³ண்ஹந்தோ’’தி (பு. ப. அட்ட². 91).

தஸ்மா ஏவரூபேஹி படிஞ்ஞாய பி⁴க்கூ²ஹி கோ³த்ரபு⁴பரியோஸானேஹி ஸத்³தி⁴ம் ஸம்போ⁴க³பரிபோ⁴கோ³ ந வட்டதி, அலஜ்ஜீபரிபோ⁴கோ³வ ஹோதி. ஸஞ்சிச்ச ஆபத்திஆபஜ்ஜனாதி³அலஜ்ஜீலக்க²ணம் பன உக்கட்டா²னம் பி⁴க்கூ²னம் வஸேன வுத்தம் ஸாமணேராதீ³னம்பி அலஜ்ஜீவோஹாரத³ஸ்ஸனதோ. ‘‘அலஜ்ஜீஸாமணேரேஹி ஹத்த²கம்மம்பி ந காரேதப்³ப³’’ந்தி ஹி வுத்தம். யதா²விஹிதபடிபத்தியம் அதிட்ட²னஞ்ஹி ஸப்³ப³ஸாதா⁴ரணம் அலஜ்ஜீலக்க²ணம். து³ஸ்ஸீலா லிங்க³க்³க³ஹணதோ பட்டா²ய யதா²விஹிதபடிபத்தியா அபா⁴வதோ ஏகந்தா லஜ்ஜினோவ மஹாஸங்கி⁴காதி³னிகாயந்தரிகா விய, லிங்க³த்தே²னகாத³யோ விய, ச. யாவ 11 ச தேஸம் பி⁴க்கு²படிஞ்ஞா அனுவத்ததி, தாவ பி⁴க்கு² ஏவ, தேஹி ச பரிபோ⁴கோ³ அலஜ்ஜிபஅபோ⁴கோ³வ, தேஸஞ்ச பி⁴க்கு²ஸங்க⁴ஸஞ்ஞாய தி³ன்னம் ஸங்கே⁴ தி³ன்னம் நாம ஹோதி. வுத்தஞ்ஹி ப⁴க³வதா –

‘‘ப⁴விஸ்ஸந்தி கோ² பனானந்த³, அனாக³தமத்³தா⁴னம் கோ³த்ரபு⁴னோ காஸாவகண்டா² து³ஸ்ஸீலா பாபத⁴ம்மா, தேஸு து³ஸ்ஸீலேஸு ஸங்க⁴ம் உத்³தி³ஸ்ஸ தா³னம் த³ஸ்ஸந்தி, ததா³பாஹம், ஆனந்த³, ஸங்க⁴க³தம் த³க்கி²ணம் அஸங்க்²யேய்யம் அப்பமேய்யம் வதா³மீ’’தி (ம. நி. 3.380).

ப⁴க³வதோ ஸங்க⁴ம் உத்³தி³ஸ்ஸ தி³ன்னத்தா த³க்கி²ணா அஸங்க்²யேய்யா அப்பமேய்யா ஜாதா. து³ஸ்ஸீலானம் தி³ன்னத்தா நாதி சே? ந, தேஸு ஸங்க⁴ம் உத்³தி³ஸ்ஸாதி கோ³த்ரபூ⁴னம் படிக்³கா³ஹகத்தேன பராமட்ட²த்தா, இதரதா² ‘‘யேஸு கேஸுசி க³ஹட்டே²ஸு வா பப்³ப³ஜிதேஸு வா ஸங்க⁴ம் உத்³தி³ஸ்ஸா’’தி வத்தப்³ப³தாபஸங்க³தோ, ததா² ச ‘‘ததா³பாஹம், ஆனந்தா³’’தி ஹேட்டி²மகோடித³ஸ்ஸனஸ்ஸ பயோஜனம் ந ஸியா. தஸ்மா கோ³த்ரபூ⁴னம்பி அபா⁴வே ஸங்க⁴ம் உத்³தி³ஸ்ஸ தா³னம் நத்தி², ஹேட்டி²மகோடியா தேஸுபி தி³ன்னா ஸங்க⁴க³தா த³க்கி²ணா அஸங்க்²யேய்யா, ந ததோ பரம் ஸிஜ்ஜ²தீதி தேபி படிஞ்ஞாய பி⁴க்கு² ஏவாதி க³ஹேதப்³ப³ம்.

ப்³ரஹ்மகோ⁴ஸந்தி உத்தமகோ⁴ஸம், ப்³ரஹ்முனோ கோ⁴ஸஸதி³ஸம் வா கோ⁴ஸம். ஏஹி பி⁴க்கூ²தி ‘‘பி⁴க்கூ²’’திஸம்போ³த⁴னம். ஸம்ஸாரே ப⁴யஇக்க²க தஸ்ஸ ப⁴யஸ்ஸ ஸப்³ப³ஸோ வினாஸனத்த²ம் திஸரணம், ஸாஸனம் வா ஏஹி மனஸா ‘‘தாணம் லேண’’ந்தி பவிஸ உபக³ச்ச². உபக³ந்த்வாபி சர ப்³ரஹ்மசரியந்தி ஸாஸனப்³ரஹ்மசரியம் மக்³க³ப்³ரஹ்மசரியஞ்ச சரஸ்ஸு. ப⁴ண்டூ³தி முண்டி³தகேஸோ. வாஸீதி த³ந்தகட்டா²தி³ச்சே²த³னவாஸி. ப³ந்த⁴னந்தி காயப³ந்த⁴னம். யுத்தோ யோகோ³ ஸமாதி⁴பஞ்ஞாவஸேன ஸோ யுத்தயோகோ³, தஸ்ஸ அட்டே²தே பரிக்கா²ராதி ஸேஸோ. ஸரீரே படிமுக்கேஹியேவ உபலக்கி²தோதி ஸேஸோ. ‘‘தீணி ஸதானீ’’தி வத்தப்³பே³ கா³தா²ப³ந்த⁴ஸுக²த்த²ம் ‘‘தீணி ஸத’’ந்தி வுத்தம்.

தஸ்மாதி ப⁴க³வா ஹேட்டா² வுத்தம் பராமஸதி. ஹேட்டா² ஹி ‘‘அஹம் கோ² பன, கஸ்ஸப, ஜானஞ்ஞேவ வதா³மி ‘ஜானாமீ’தி, பஸ்ஸஞ்ஞேவ வதா³மி ‘பஸ்ஸாமீ’’’தி (ஸம். நி. 2.154) வுத்தம், தம் பராமஸதி, யஸ்மா அஹம் ஜானம் வதா³மி, தஸ்மாதி அத்தோ². இஹாதி இமஸ்மிம் ஸாஸனே. திப்³ப³ந்தி மஹந்தம். பச்சுபட்டி²தம் ப⁴விஸ்ஸதீதி தே²ராதி³உபஸங்கமனதோ புரேதரமேவ தேஸு யம்னூன மே ஹிரோத்தப்பம் உபட்டி²தம் ப⁴விஸ்ஸதீதி அத்தோ². குஸலூபஸம்ஹிதந்தி அனவஜ்ஜத⁴ம்மனிஸ்ஸிதம். அட்டி²ம் கத்வாதி அத்தானம் தேன த⁴ம்மேன அட்டி²கம் கத்வா, தம் வா த⁴ம்மம் ‘‘ஏஸ மே அத்தோ²’’தி அத்த²ம் கத்வா. ஓஹிதஸோதோதி த⁴ம்மே நிஹிதஸோதோ. ஏவஞ்ஹி தே, கஸ்ஸப, ஸிக்கி²தப்³ப³ந்தி ஞாணஸோதஞ்ச பஸாத³ஸோதஞ்ச ஓத³ஹித்வா ‘‘த⁴ம்மம் ஸக்கச்சமேவ ஸுணிஸ்ஸாமீ’’தி ஏவமேவ தயா ஸிக்கி²தப்³ப³ம். ஸாதஸஹக³தா ச மே காயக³தாஸதீதி அஸுபே⁴ஸு சேவ ஆனாபானே ச பட²மஜ்ஜா²னவஸேன ஸுக²ஸம்பயுத்தகாயக³தாஸதி. யம் பனேதஸ்ஸ ஓவாத³ஸ்ஸ ஸக்கச்சபடிக்³க³ஹணம், அயமேவ தே²ரஸ்ஸ பப்³ப³ஜ்ஜா ச உபஸம்பதா³ ச அஹோஸி (ஸம். நி. அட்ட². 2.2.154).

உத்³து⁴மாதகபடிபா⁴கா³ரம்மணம் ஜா²னம் உத்³து⁴மாதகஸஞ்ஞா. கஸிணாரம்மணம் ரூபாவசரஜ்ஜா²னம் ரூபஸஞ்ஞா. இமேதி ஸஞ்ஞாஸீஸேன நித்³தி³ட்டா² இமே த்³வே ஜா²னத⁴ம்மா. ஸோபாகோ ச ப⁴க³வதா புட்டோ² ‘‘ரூபாவசரபா⁴வேன ஏகத்தா², ப்³யஞ்ஜனமேவ நான’’ந்தி ஆஹ. ஆரத்³த⁴சித்தோதி ஆராதி⁴தசித்தோ. க³ருத⁴ம்மபடிக்³க³ஹணாதி³உபஸம்பதா³ உபரி ஸயமேவ ஆவி ப⁴விஸ்ஸதி.

ஸப்³ப³ந்திமேன பரியாயேனாதி ஸப்³ப³ந்திமேன பரிச்சே²தே³ன. ஞத்திசதுத்தா² கம்மவாசா உபஸம்பதா³கம்மஸ்ஸ காரணத்தா டா²னம், தஸ்ஸ டா²னஸ்ஸ அரஹம் அனுச்ச²விகந்தி வத்து²தோ³ஸாதி³வினிமுத்தகம்மம் ‘‘டா²னாரஹ’’ந்தி வுத்தம் வத்தா²தி³தோ³ஸயுத்தஸ்ஸ கம்மஸ்ஸ ஸபா⁴வதோ கம்மவாசாரஹத்தாபா⁴வா. அத² வா டா²னந்தி நிப்³பா³னப்பத்திஹேதுதோ ஸிக்க²த்தயஸங்க³ஹம் ஸாஸனம் வுச்சதி, தஸ்ஸ அனுச்ச²விகம் கம்மம் டா²னாரஹம். யதா²விஹிதலக்க²ணேன ஹி கம்மேன உபஸம்பன்னோவ ஸகலம் ஸாஸனம் ஸமாதா³ய பரிபூரேதுமரஹதி. தஸ்மா பரிஸுத்³த⁴கம்மவாசாபரியோஸானம் ஸப்³ப³ம் ஸங்க⁴கிச்சம் டா²னாரஹம் நாம, தேனாஹ ‘‘ஸத்து²ஸாஸனாரஹேனா’’தி, ஸீலாதி³ஸகலஸாஸனபரிபுண்ணஸ்ஸ அனுச்ச²விகேனாதி அத்தோ². அயம் இமஸ்மிம் அத்தே²தி ஞத்திசதுத்த²கம்மேன உபஸம்பன்னஸ்ஸேவ ஸப்³ப³ஸிக்கா²பதே³ஸு வுத்தத்தா கிஞ்சாபி ஏஹிபி⁴க்கூ²பஸம்பதா³தீ³ஹி உபஸம்பன்னானம் ஸுத்³த⁴ஸத்தானம் பண்ணத்திவஜ்ஜஸிக்கா²பத³வீதிக்கமேபி அப⁴ப்³ப³தா வா தோ³ஸாபா⁴வோ வா ஸத்³த³தோ பஞ்ஞாயதி, ததா²பி அத்த²தோ தேஸம்பி பண்ணத்திவஜ்ஜேஸு, லோகவஜ்ஜேஸுபி வா ஸுராபானாதி³லஹுகேஸு மக்³கு³ப்பத்திதோ புப்³பே³ அஸஞ்சிச்சாதி³னா ஆபத்திஆபஜ்ஜனம் ஸிஜ்ஜ²தியேவ. ததா² ஹி ‘‘த்³வே புக்³க³லா அப⁴ப்³பா³ ஆபத்திம் ஆபஜ்ஜிதும் பு³த்³தா⁴ ச பச்சேகபு³த்³தா⁴ ச. த்³வே புக்³க³லா ப⁴ப்³பா³ ஆபத்திம் ஆபஜ்ஜிதும் பி⁴க்கூ² ச பி⁴க்கு²னியோ சா’’தி (பரி. 322) வுத்தம். ஞத்திசதுத்தே²ன கம்மேன உபஸம்பன்னோதி இத³ம் பன ஸப்³ப³ஸிக்கா²பத³வீதிக்கமாரஹே ஸப்³ப³காலிகே ச பி⁴க்கூ² க³ஹேத்வா யேபு⁴ய்யவஸேன வுத்தம். நிருத்திவஸேனாதி நிப்³ப³சனவஸேன. அபி⁴லாபவஸேனாதி வோஹாரவஸேன. கு³ணவஸேனாதி பி⁴க்கு²வோஹாரனிமித்தானம் கு³ணானம் வஸேன.

ஸாஜீவபத³பா⁴ஜனீயவண்ணனா

விவட்டூபனிஸ்ஸயா ஸீலாத³யோ லோகியேஹி அபி⁴விஸிட்ட²த்தா அதி⁴ஸீலாதி³வோஹாரேன வுத்தாதி த³ஸ்ஸேதும் கதமம் பனாதிஆதி³ ஆரத்³த⁴ம். தத்த² பஞ்சங்க³த³ஸங்க³ஸீலந்தி அபு³த்³து⁴ப்பாத³காலே ஸீலம் ஸந்தா⁴ய வுத்தம் தஸ்ஸ விவட்டூபனிஸ்ஸயத்தாபா⁴வா. யம் பன பு³த்³து⁴ப்பாதே³ ரதனத்தயகு³ணம் தத²தோ ஞத்வா ஸாஸனே ஸுனிவிட்ட²ஸத்³தா⁴ஹி உபாஸகோபாஸிகாஹி சேவ ஸாமணேரஸிக்க²மானாஹி ச ரக்கி²யமானம் பஞ்சங்க³அட்ட²ங்க³த³ஸங்க³ஸீலம், தம்பி அதி⁴ஸீலமேவ மக்³கு³ப்பத்திஹேதுதோ. விபஸ்ஸனாமக்³கு³ப்பத்தினிமித்ததாய ஹி பாதிமோக்க²ஸம்வரஸீலம் லோகியானம் ஸீலேஹி அதி⁴ஸீலம் ஜாதம் அதி⁴சித்தம் விய. ந ஹி விபஸ்ஸனாமக்³க³னிமித்ததம் முஞ்சித்வா லோகியசித்ததோ அதி⁴சித்தஸ்ஸ அஞ்ஞோ கோசி விஸேஸோ உபலப்³ப⁴தி, தது³ப⁴யஞ்ச அனாதி³மதோ ஸம்ஸாரவட்டஸ்ஸ அத்தாதி³ஸாரவிரஹிததாய திலக்க²ணப்³பா⁴ஹதத்தம், ‘‘அஹம் மமா’’தி ஆகாரேன பவத்தஅவிஜ்ஜாதண்ஹாதி³தோ³ஸமூலகத்தஞ்ச, தம்தோ³ஸமூலவித்³த⁴ம்ஸனஸமத்தா²ய ஸீலசித்தப³லோபத்த²த்³தா⁴ய விபஸ்ஸனாய உக்கம்ஸேனேவ தஸ்ஸ ஸம்ஸாரவட்டஸ்ஸ விக³மஞ்ச, தது³பதே³ஸகஸ்ஸ ஸம்மாஸம்பு³த்³த⁴ஸ்ஸ ஸப்³ப³ஞ்ஞுதாதி³அபரிமிதகு³ணக³ணயோகே³ன அவிபரீதஸத்³த⁴ம்மதே³ஸகத்தஞ்ச யாதா²வதோ ஞத்வா படிபன்னேன ஸமாதா³ய ஸிக்கி²தப்³ப³தாய விவட்டூபனிஸ்ஸயம் ஜாதம், ந அஞ்ஞேன காரணேன, தஞ்ச விவட்டூபனிஸ்ஸயத்தம் யதி³ ஸாஸனே பஞ்சஸீலாதி³ஸ்ஸாபி ஸமானம், கிமித³ம் அதி⁴ஸீலம் ந ஸியா. பஞ்சஸீலாதி³மத்தே டி²தானஞ்ஹி அனாத²பிண்டி³காதீ³னம் க³ஹட்டா²னம்பி மக்³கோ³ உப்பஜ்ஜதி. ந ஹி அதி⁴ஸீலாதி⁴சித்தம் வினா மக்³கு³ப்பத்தி ஹோதி, தஞ்ச கிஞ்சாபி கேஸஞ்சி அனுபனிஸ்ஸயதாய தஸ்மிம் அத்தபா⁴வே மக்³கு³ப்பத்தியா ஹேது ந ஹோதி, ததா²பி ப⁴வந்தரே அவஸ்ஸம் ஹோதேவாதி அதி⁴ஸீலமேவ காலம் கரோந்தானம் கல்யாணபுது²ஜ்ஜனானம் பாதிமோக்க²ஸம்வரஸீலம் விய, தேனாஹ பு³த்³து⁴ப்பாதே³யேவ ச பவத்ததீதிஆதி³. விவட்டம் பத்தே²த்வா ரக்கி²யமானம்பி பஞ்சஸீலாதி³ பு³த்³து⁴ப்பாதே³யேவ பவத்ததி. ந ஹி தம் பஞ்ஞத்திந்திஆதி³ பன உக்கட்ட²வஸேன ஸப்³ப³ம் பாதிமோக்க²ம் ஸந்தா⁴ய வுத்தம். ததே³கதே³ஸபூ⁴தம்பி ஹி பாணாதிபாதாதி³ன்னாதா³னாதி³க³ஹட்ட²ஸீலம்பி. பு³த்³தா⁴யேவ வினயே பாராஜிகஸுத்தவிப⁴ங்கா³தீ³ஸு ஆக³தவஸேன ஸப்³ப³ஸோ காயவசீத்³வாரேஸு மக்³கு³ப்பத்தியா விப³ந்த⁴கஅஜ்ஜா²சாரஸோதம் விச்சி²ந்தி³த்வா மக்³கு³ப்பத்தியா பத³ட்டா²னபா⁴வேன பஞ்ஞபேதும் ஸக்கோந்தி, ந அஞ்ஞே. மக்³கு³ப்பத்திம் ஸந்தா⁴ய ஹிஸ்ஸ அதி⁴ஸீலதா வுத்தா. தேனாஹ ‘‘பாதிமோக்க²ஸம்வரதோபி ச மக்³க³ப²லஸம்பயுத்தமேவ ஸீலம் அதி⁴ஸீல’’ந்தி. தஸ்ஸேவ ஹி அதி⁴ஸீலந்தி அப்³யவதா⁴னேன மக்³கா³தி⁴ட்டா²னாதி. இத⁴ அனதி⁴ப்பேதந்தி இமஸ்மிம் பட²மபாராஜிகவிஸயே ‘‘ஸிக்கா²’’தி அனதி⁴ப்பேதம்.

லோகியஅட்ட²ஸமாபத்திசித்தானீதி ஸாஸனஸபா⁴வம் அஜானந்தேஹி லோகியஜனேஹி ஸமாபஜ்ஜிதப்³பா³னி அட்ட² ரூபாரூபஜ்ஜா²னஸம்பயுத்தசித்தானி ஸந்தா⁴ய வுத்தம். ந ஹி மஹக்³க³தேஸு லோகியலோகுத்தரபே⁴தோ³ அத்தி², யேன லோகியவிஸேஸனம் லோகுத்தரனிவத்தனம் ஸியா. தஸ்மா ஸாஸனிகேஹி ஸமாபஜ்ஜிதப்³ப³மஹக்³க³தஜ்ஜா²னனிவத்தனமேவ லோகியவிஸேஸனம் கதம். யதா² சேத்த², ஏவம் காமாவசரானி பன அட்ட² குஸலசித்தானீதி ஏத்தா²பி லோகியவிஸேஸனம் காதப்³ப³மேவ. அயமேவ ஹி அதி⁴சித்ததோ சித்தஸ்ஸ பே⁴தோ³, யம் ஸாஸனம் அஜானந்தஸ்ஸ புக்³க³லஸ்ஸ ஸமுப்பஜ்ஜனம். ஏவஞ்ச அபு³த்³து⁴ப்பாதே³பி ஸாஸனஸபா⁴வம் ஜானந்தானம் பச்சேகபு³த்³தா⁴தீ³னம்பி ஸீலசித்தானம் அதி⁴ஸீலாதி⁴சித்ததா ஸமத்தி²தா ஹோதி. ந வினா பு³த்³து⁴ப்பாதா³தி இத³ம் பன அஞ்ஞேஸம் அபி⁴ஸமயஹேதுபா⁴வேன பச்சேகபு³த்³த⁴போ³தி⁴ஸத்தாதீ³னம் தே³ஸனாஸாமத்தி²யாபா⁴வதோ வுத்தம். ஆயதிம் வாஸனாஹேதும் பன ஸீலசித்தம் தேபி தே³ஸேந்தியேவ, தஞ்ச மக்³க³ஹேதுதாய அதி⁴ஸீலாதி⁴சித்தம்பி ஹோந்தம் அப்பகதாய விப்பா²ரிகதாபா³ஹுஜஞ்ஞத்தாபா⁴வேன அப்³போ³ஹாரிகந்தி ‘‘பு³த்³து⁴ப்பாதே³யேவா’’தி அவதா⁴ரணம் கதந்தி வேதி³தப்³ப³ம். ந ஹி தம்ஸமாபன்னோதிஆதி³அட்ட²கதா²வசனேஹி இத⁴ அதி⁴சித்தனித்³தே³ஸே, உபரி அதி⁴பஞ்ஞானித்³தே³ஸே ச மக்³க³ப²லஸம்பயுத்தஅதி⁴சித்தஅதி⁴பஞ்ஞானமேவ படிக்கே²பதோ லோகியாதி⁴சித்தாதி⁴பஞ்ஞானம் இத⁴ அதி⁴ப்பேததா, தம் த்³வயம் ஸமாபன்னஸ்ஸாபி மேது²னத⁴ம்மஸமாபஜ்ஜனஸபா⁴வோ ச விஞ்ஞாயதி, பாளியம் பன ‘‘யாயம் அதி⁴ஸீலஸிக்கா², அயம் இமஸ்மிம் அத்தே² அதி⁴ப்பேதா ஸிக்கா²’’தி வுத்தத்தா லோகியாபி அதி⁴சித்தாதி⁴பஞ்ஞா அனதி⁴ப்பேதாதி விஞ்ஞாயதி. தஸ்மா பாளியம் அட்ட²கதா²யஞ்ச ஏவமதி⁴ப்பாயோ வேதி³தப்³போ³ – ‘‘மேது²னம் த⁴ம்மம் படிஸேவிஸ்ஸாமீ’’தி சித்தே உப்பன்னமத்தே லோகியம் அதி⁴சித்தம் அதி⁴பஞ்ஞா ச பரிஹாயதி, அதி⁴ஸீலம் பன சித்துப்பாத³மத்தேன ந பரிஹாயதீதி பாளியம் அதி⁴ஸீலஸிக்கா²வ வுத்தா. அட்ட²கதா²யம் பன படிலத்³த⁴லோகுத்தரமக்³க³ஸ்ஸ பி⁴க்கு²னோ ‘‘மேது²னம் படிஸேவிஸ்ஸாமீ’’தி சித்தம்பி ந உப்பஜ்ஜதி ஸப்³ப³ஸோ அகுப்பத⁴ம்மத்தா, புது²ஜ்ஜனானம் ஸமாபத்திலாபீ⁴னம்பி கேனசி காரணேன உப்பஜ்ஜதி குப்பத⁴ம்மத்தாதி இமம் விஸேஸம் த³ஸ்ஸேதும் ‘‘ந ஹி தம்ஸமாபன்னோ’’தி லோகுத்தராவ படிக்கி²த்தாதி வேதி³தப்³ப³ம்.

அத்தி² தி³ன்னந்தி ஏத்த² தி³ன்னந்தி தா³னசேதனா அதி⁴ப்பேதா, தஸ்ஸ தி³ன்னஸ்ஸ ப²லம் அத்தீ²தி அத்தோ². ஏஸ நயோ அத்தி² யிட்ட²ந்தி ஏத்தா²பி. ஆதி³-ஸத்³தே³ன ஹுதாதீ³னம் ஸங்க³ஹோ. தத்த² யிட்ட²ந்தி மஹாயாகோ³ ஸப்³ப³ஸாதா⁴ரணம் மஹாதா³னமேவ. ஹுதந்தி பஹோனகஸக்காரோ, அத்தனோ வா ஹோது, பரேஸம் வா த³ஸ அகுஸலகம்மபதா², ஸப்³பே³பி வா அகுஸலா த⁴ம்மா அனத்து²ப்பாத³னதோ ந ஸகம் கம்மம் நாம, தப்³பி³பரீதா குஸலா த⁴ம்மா ஸகம் நாம, தது³ப⁴யம்பி வா குஸலாகுஸலம் கம்மஸ்ஸகோம்ஹீதிஆதி³வசனதோ ஸதி ஸம்ஸாரப்பவத்தியம் அதி⁴முச்சனட்டே²ன ஸத்தானம் ஸகந்தி ஏவம் கம்மஸ்ஸகதாய ஸகபா⁴வே அத்தனோ ஸந்தகதாய உப்பஜ்ஜனகஞாணம் கம்மஸ்ஸகதஞ்ஞாணம், உபலக்க²ணமத்தஞ்சேதம். ஸாஸனனிஸ்ஸிதா பன ஸப்³பா³பி வட்டகா³மினிகுஸலபஞ்ஞா கம்மஸ்ஸகதஞ்ஞாணே பவிட்டா². ஸாஸனனிஸ்ஸிதா ஹி விவட்டகா³மினீ ஸப்³பா³பி பஞ்ஞா ‘‘ஸச்சானுலோமிகஞாண’’ந்தி வுச்சதி. ஸா ஏவ ச அதி⁴பஞ்ஞா தத³வஸேஸம் ஸப்³ப³ம் கம்மஸ்ஸகதஞ்ஞாணந்தி வேதி³தப்³ப³ம், தேனேவ ப⁴க³வா ‘‘கம்மஸ்ஸகதஞ்ஞாணம் ஸச்சானுலோமிகஞாணம் மக்³க³ஸமங்கி³ஸ்ஸ ஞாணம் ப²லஸமங்கி³ஸ்ஸ ஞாண’’ந்தி ஸப்³ப³ம்பி ஞாணசதுக்கேயேவ ஸங்க³ஹேஸி. திலக்க²ணாகாரபரிச்சே²த³கம் பன விபஸ்ஸனாஞாணந்தி இத³ம் பன மக்³க³ஸ்ஸ ஆஸன்னபச்சயதாய உக்கட்ட²வஸேன வுத்தம். ததி³தராஸஞ்ஹி ரதனத்தயானுஸ்ஸரணாதி³பஞ்ஞானம்பி மக்³க³ஹேதுதாய அதி⁴பஞ்ஞதா ஸமானாவாதி க³ஹேதப்³ப³ம்.

ஸாஜீவபத³பா⁴ஜனீயவண்ணனானயோ நிட்டி²தோ.

பச்சக்கா²னவிப⁴ங்க³வண்ணனா

து³ப்³ப³ல்யே ஆவிகதேதி யம்னூனாஹம் பு³த்³த⁴ம் பச்சக்கே²ய்யந்திஆதி³னா து³ப்³ப³லபா⁴வே பகாஸிதே. முகா²ருள்ஹதாதி லோகஜனானம் ஸத்தட்டா²திஆதீ³ஸு முகா²ருள்ஹஞாயேனாதி அதி⁴ப்பாயோ. தி³ரத்ததிரத்தந்தி (பாசி. 52) ஏத்த² யதா² அந்தரந்தரா ஸஹஸேய்யாவஸேன திரத்தம் அக்³க³ஹேத்வா நிரந்தரமேவ திஸ்ஸோ ரத்தியோ அனுபஸம்பன்னேன ஸத்³தி⁴ம் ஸஹஸேய்யாய அருணுட்டா²பனவஸேன திரத்தக்³க³ஹணத்த²ம் ‘‘தி³ரத்ததிரத்த’’ந்தி அப்³யவதா⁴னேன வுத்தந்தி தி³ரத்தக்³க³ஹணஸ்ஸ பயோஜனம்பி ஸக்கா க³ஹேதும், ஏவமிதா⁴பி து³ப்³ப³ல்யம் அனாவிகத்வாதி இமஸ்ஸாபி க³ஹணஸ்ஸ பயோஜனமத்தே²வாதி த³ஸ்ஸேதும் யஸ்மா வா ஸிக்கா²பச்சக்கா²னஸ்ஸாதிஆதி³ வுத்தம்.

இதா³னி து³ப்³ப³ல்யம் அனாவிகத்வாதி இமஸ்ஸ புரிமபத³ஸ்ஸேவ விவரணபா⁴வம் வினாபி விஸும் அத்த²ஸப்³பா⁴வம் த³ஸ்ஸேதும் அபிசாதிஆதி³ வுத்தம். விஸேஸாவிஸேஸந்தி ஏத்த² யேன வாக்யேன து³ப்³ப³ல்யாவிகம்மமேவ ஹோதி, ந ஸிக்கா²பச்சக்கா²னம், தத்த² ஸிக்கா²பச்சக்கா²னது³ப்³ப³ல்யாவிகம்மானம் அஞ்ஞமஞ்ஞம் விஸேஸோ ஹோதி. யேன பன வசனேன தது³ப⁴யம்பி ஹோதி, தத்த² நேவத்தி² விஸேஸோ அவிஸேஸோபி, தம் விஸேஸாவிஸேஸம். ‘‘கட² கிச்ச²ஜீவனே’’தி தா⁴தூஸு படி²தத்தா வுத்தம் ‘‘கிச்ச²ஜீவிகப்பத்தோ’’தி. உக்கண்ட²னஞ்ஹி உக்கண்டா², தம் இதோ க³தோதி உக்கண்டி²தோ, கிச்ச²ஜீவிகம் பத்தோதி அத்தோ². உத்³த⁴ம் க³தோ கண்டோ² ஏதிஸ்ஸாதி உக்கண்டா², அனபி⁴ரதியா வஜே நிருத்³த⁴கோ³க³ணோ விய க³மனமக்³க³ம் க³வேஸந்தோ புக்³க³லோ உக்கண்டோ² ஹோதி, தம் உக்கண்ட²ம். அனபி⁴ரதிம் இதோதிபி உக்கண்டி²தோதி அத்த²ம் த³ஸ்ஸேந்தோ ஆஹ – ‘‘உத்³த⁴ம் கண்ட²ம் கத்வா விஹரமானோ’’தி. ஸா ச உக்கண்ட²தா விக்கே²பேனேவாதி விக்கி²த்தோதிஆதி³ வுத்தம்.

ஸமணபா⁴வதோதி உபஸம்பத³தோ. பா⁴வவிகப்பாகாரேனாதி பி⁴க்கு²பா⁴வதோ சவித்வா யம் யம் கி³ஹிஆதி³பா⁴வம் பத்துகாமோ ‘‘அஹம் அஸ்ஸ’’ந்தி அத்தனோ ப⁴வனம் விகப்பேதி, தேன தேன கி³ஹிஆதி³ஆகாரேன, அத்தனோ ப⁴வனஸ்ஸ விகப்பனாகாரேனாதி அதி⁴ப்பாயோ.

46. பாளியம் யதி³ பனாஹந்தி அஹம் யதி³ பு³த்³த⁴ம் பச்சக்கே²ய்யம், ஸாது⁴ வதஸ்ஸாதி அத்தோ². அபாஹம், ஹந்தா³ஹந்தி ஏத்தா²பி வுத்தனயேனேவ அத்தோ² க³ஹேதப்³போ³. ‘‘ஹோதி மே பு³த்³த⁴ம் பச்சக்கே²ய்ய’’ந்தி மம சித்தம் உப்பஜ்ஜதீதி வத³தி.

50. ந ரமாமீதி பப்³ப³ஜ்ஜாய து³க்க²ப³ஹுலதாய ஸுகா²பா⁴வம் த³ஸ்ஸேதி. நாபி⁴ரமாமீதி பப்³ப³ஜ்ஜாய விஜ்ஜமானேபி அனவஜ்ஜஸுகே² அத்தனோ அபி⁴ரதிஅபா⁴வம் த³ஸ்ஸேதி.

51. தேனேவ வசீபே⁴தே³னாதி வசீபே⁴த³ம் கத்வாபி அஞ்ஞேன காயப்பயோகே³ன விஞ்ஞாபனம் நிவத்தேதி. அயம் ஸாஸனம் ஜஹிதுகாமோதிஆதி³னா பா⁴ஸாகோஸல்லாபா⁴வேன ஸப்³ப³ஸோ பத³த்தா²வபோ³தா⁴பா⁴வேபி ‘‘அயம் அத்தனோ பப்³ப³ஜிதபா⁴வம் ஜஹிதுகாமோ இமம் வாக்யபே⁴த³ம் கரோதீ’’தி ஏத்தகம் அதி⁴ப்பேதத்த²மத்தம் சேபி ஸோ தாவ ஜானாதி, பச்சக்கா²னமேவ ஹோதீதி த³ஸ்ஸேதி. தேனாஹ ‘‘ஏத்தகமத்தம்பி ஜானாதீ’’தி. பத³பச்சா²ப⁴ட்ட²ந்தி பத³பராவத்தி, மாக³த⁴பா⁴ஸதோ அவஸிட்டா² ஸப்³பா³பி பா⁴ஸா ‘‘மிலக்க²பா⁴ஸா’’தி வேதி³தப்³பா³. கே²த்தமேவ ஓதிண்ணந்தி ஸிக்கா²பச்சக்கா²னஸ்ஸ ருஹனட்டா²னபூ⁴தம் கே²த்தமேவ ஓதிண்ணம்.

தூ³தந்தி முக²ஸாஸனம். ஸாஸனந்தி பண்ணஸாஸனம், பி⁴த்தித²ம்பா⁴தீ³ஸு அக்க²ரம் வா சி²ந்தி³த்வா த³ஸ்ஸேதி. பச்சக்கா²துகாமதாசித்தே த⁴ரந்தேயேவ வசீபே⁴த³ஸமுப்பத்திம் ஸந்தா⁴ய ‘‘சித்தஸம்பயுத்த’’ந்தி வுத்தம், சித்தஸமுட்டா²னந்தி அத்தோ². நியமிதானியமிதவஸேன விஜானனபே⁴த³ம் த³ஸ்ஸேதுமாஹ யதி³ அயமேவ ஜானாதூதிஆதி³. அயஞ்ச விபா⁴கோ³ வத³தி விஞ்ஞாபேதீதி ஏத்த² யஸ்ஸ வத³தி, தஸ்ஸேவ விஜானனம் அதி⁴ப்பேதந்தி இமினா வுத்தனயேன லத்³தோ⁴தி த³ட்ட²ப்³ப³ம், ந ஹேத்த² ஏகஸ்ஸ வத³தி அஞ்ஞஸ்ஸ விஞ்ஞாபேதீதி அயமத்தோ² ஸம்ப⁴வதி. ‘‘தேஸு ஏகஸ்மிம் ஜானந்தேபீ’’தி வுத்தத்தா ‘‘த்³வேயேவ ஜானந்து ஏகோ மா ஜானாதூ’’தி ஏவம் த்³வின்னம்பி ஜனானம் நியமேத்வா ஆரோசிதேபி தேஸு ஏகஸ்மிம்பி ஜானந்தே பச்சக்கா²னம் ஹோதியேவாதி க³ஹேதப்³ப³ம். பரிஸங்கமானோதி ‘‘வாரேஸ்ஸந்தீ’’தி ஆஸங்கமானோ. ஸமயஞ்ஞூதி ஸாஸனஸங்கேதஞ்ஞூ, இத⁴ பன அதி⁴ப்பாயமத்தஜானனேனாபி ஸமயஞ்ஞூ நாம ஹோதி, தேனாஹ உக்கண்டி²தோதிஆதி³. தஸ்மா பு³த்³த⁴ம் பச்சக்கா²மீதிஆதி³கே²த்தபதா³னம் ஸப்³ப³ஸோ அத்த²ம் ஞத்வாபி ஸசே ‘‘பி⁴க்கு²பா⁴வதோ சவிதுகாமதாய ஏஸ வத³தீ’’தி அதி⁴ப்பாயம் ந ஜானாதி, அப்பச்சக்கா²தாவ ஹோதி ஸிக்கா². அத்த²ம் பன அஜானித்வாபி ‘‘உக்கண்டி²தோ வத³தீ’’தி தம் ஜானாதி, பச்சக்கா²தாவ ஹோதி ஸிக்கா². ஸோதவிஞ்ஞாணவீதி²யா ஸத்³த³மத்தக்³க³ஹணமேவ, அத்த²க்³க³ஹணம் பன மனோவிஞ்ஞாணவீதி²பரம்பராயாதி ஆஹ தங்க²ணஞ்ஞேவாதிஆதி³.

53. வண்ணபட்டா²னந்தி ஸத்து²கு³ணவண்ணப்பகாஸகம் பகரணம். உபாலிகா³தா²ஸூதி உபாலிஸுத்தே உபாலிக³ஹபதினா தீ⁴ரஸ்ஸ விக³தமோஹஸ்ஸாதிஆதி³னா வுத்தகா³தா²ஸு. யதா²ருதந்தி பாளியம் வுத்தமேவாதி அத்தோ². அனந்தபு³த்³தீ⁴திஆதீ³னி வண்ணபட்டா²னே ஆக³தனாமானி. தீ⁴ரந்திஆதீ³னி (ம. நி. 2.76) பன உபாலிகா³தா²ஸு. தத்த² போ³தி⁴ வுச்சதி ஸப்³ப³ஞ்ஞுதஞ்ஞாணம், ஸா ஜானனஹேதுத்தா பஞ்ஞாணம் ஏதஸ்ஸாதி போ³தி⁴பஞ்ஞாணோ. ஸ்வாக்கா²தம் த⁴ம்மந்திஆதீ³ஸு த⁴ம்ம-ஸத்³தோ³ ஸ்வாக்கா²தாதி³பதா³னம் த⁴ம்மவேவசனபா⁴வம் த³ஸ்ஸேதும் வுத்தோ. தஸ்மா ஸ்வாக்கா²தம் பச்சக்கா²மீதிஆதி³னா வுத்தேயேவ வேவசனேன பச்சக்கா²னம் நாம ஹோதி. த⁴ம்ம-ஸத்³தே³ன ஸஹ யோஜேத்வா வுத்தே பன யதா²ருதவஸேன பச்சக்கா²னந்தி வேதி³தப்³ப³ம். ஸுப்படிபன்னம் ஸங்க⁴ந்திஆதீ³ஸுபி ஏஸேவ நயோ. குஸலம் த⁴ம்மந்திஆதீ³னிபி குஸலா த⁴ம்மா அகுஸலா த⁴ம்மாதிஆதி³த⁴ம்மமேவ (த⁴. ஸ. திகமாதிகா 1) ஸந்தா⁴ய வுத்தனாமானி, இதரதா² அகுஸலத⁴ம்மபச்சக்கா²னே தோ³ஸாபா⁴வப்பஸங்க³தோதி, தேனாஹ சதுராஸீதித⁴ம்மக்க²ந்த⁴ஸஹஸ்ஸேஸூதிஆதி³. பட²மபாராஜிகந்திஆதி³னா ஸிக்கா²பதா³னம்யேவ க³ஹணம் வேதி³தப்³ப³ம், ந ஆபத்தீனம்.

யஸ்ஸ மூலேனாதி யஸ்ஸ ஸந்திகே. ஆசரியவேவசனேஸு யோ உபஜ்ஜ²ம் அத³த்வா ஆசரியோவ ஹுத்வா பப்³பா³ஜேஸி, தம் ஸந்தா⁴ய ‘‘யோ மம் பப்³பா³ஜேஸீ’’தி வுத்தம். தஸ்ஸ மூலேனாதி தஸ்ஸ ஸந்திகே. ஓகல்லகோதி கு²ப்பிபாஸாதி³து³க்கா²துரானம் கிஸலூக²ஸரீரவேஸானம் க³ஹட்ட²மனுஸ்ஸானம் அதி⁴வசனம். மோளிப³த்³தோ⁴தி ப³த்³த⁴கேஸகலாபோ க³ஹட்டோ². குமாரகோதி குமாராவத்தோ² அதிவிய த³ஹரோ ஸாமணேரோ. சேல்லகோதி ததோ கிஞ்சி மஹந்தோ. சேடகோதி மஜ்ஜி²மோ. மோளிக³ல்லோதி மஹாஸாமணேரோ. ஸமணுத்³தே³ஸோதி அவிஸேஸதோ ஸாமணேராதி⁴வசனம். அஸுசிஸங்கஸ்ஸரஸமாசாரோதி அஸுசி ஹுத்வா ‘‘மயா கதம் பரே ஜானந்தி நு கோ², ந நு கோ²’’தி அத்தனா, ‘‘அஸுகேன நு கோ² இத³ம் கத’’ந்தி பரேஹி ச ஸங்காய ஸரிதப்³பே³ன அனுஸ்ஸரிதப்³பே³ன ஸமாசாரேன யுத்தோ. ஸஞ்ஜாதராகா³தி³கசவரத்தா கஸம்பு³ஜாதோ. கோண்டோ²தி து³ஸ்ஸீலாதி⁴வசனமேதம்.

54. திஹேதுகபடிஸந்தி⁴காதி அதிகி²ப்பம் ஜானனஸமத்தே² ஸந்தா⁴ய வுத்தம், ந து³ஹேதுகானம் தத்த² அஸம்ப⁴வதோ. ஸபா⁴க³ஸ்ஸாதி புரிஸஸ்ஸ. விஸபா⁴க³ஸ்ஸாதி மாதுகா³மஸ்ஸ. போத்த²கரூபஸதி³ஸஸ்ஸாதி மத்திகாதீ³ஹி கதரூபஸதி³ஸஸ்ஸ. க³ருமேத⁴ஸ்ஸாதி ஆரம்மணேஸு லஹுப்பவத்தியா அபா⁴வதோ த³ந்த⁴க³திகதாய க³ருபஞ்ஞஸ்ஸ, மந்த³பஞ்ஞஸ்ஸாதி வுத்தம் ஹோதி.

இதா³னேத்த² ஸிக்கா²பச்சக்கா²னவாரஸ்ஸ பாளியம் அட்ட²கதா²யஞ்ச வுத்தனயானம் ஸம்பிண்ட³னத்த²வஸேன ஏவம் வினிச்ச²யோ வேதி³தப்³போ³ – தத்த² ஹி ஸாமஞ்ஞா சவிதுகாமோதிஆதீ³ஹி பதே³ஹி சித்தனியமம் த³ஸ்ஸேதி. பு³த்³த⁴ந்திஆதீ³ஹி பதே³ஹி கே²த்தனியமம், பச்சக்கா²மி தா⁴ரேதீதி ஏதேன காலனியமம், வத³தீதி இமினா பயோக³னியமம், அலம் மே பு³த்³தே⁴ன, கிம் நு மே, ந மமத்தோ², ஸுமுத்தாஹந்திஆதீ³ஹி அனாமட்ட²காலவஸேனபி பச்சக்கா²னம் ஹோதீதி த³ஸ்ஸேதி, விஞ்ஞாபேதீதி இமினா விஜானனனியமம், உம்மத்தகோ ஸிக்க²ம் பச்சக்கா²தி உம்மத்தகஸ்ஸ ஸந்திகேதிஆதீ³ஹி புக்³க³லனியமம், ஸோ ச நப்படிவிஜானாதீதிஆதீ³ஹி விஜானனனியமாபா⁴வேன பச்சக்கா²னாபா⁴வம் த³ஸ்ஸேதி, த³வாயாதிஆதீ³ஹி சித்தனியமாபா⁴வேன, ஸாவேதுகாமோ ந ஸாவேதீதி இமினா பயோக³னியமாபா⁴வேன, அவிஞ்ஞுஸ்ஸ ஸாவேதி விஞ்ஞுஸ்ஸ ந ஸாவேதீதி ஏதேஹி யம் புக்³க³லம் உத்³தி³ஸ்ஸ ஸாவேதி, தஸ்ஸேவ ஸவனே ஸீஸம் ஏதி, நாஞ்ஞஸ்ஸாதி. ஸப்³ப³ஸோ வா பன ந ஸாவேதி அப்பச்சக்கா²தா ஹோதி ஸிக்கா²தி இத³ம் பன சித்தாதி³னியமேனேவ ஸிக்கா²பச்சக்கா²னம் ஹோதி, ந அஞ்ஞதா²தி த³ஸ்ஸனத்த²ம் வுத்தம். தஸ்மா சித்தகே²த்தகாலபயோக³புக்³க³லவிஜானனவஸேன ஸிக்கா²ய பச்சக்கா²னம் ஞத்வா தத³பா⁴வேன அப்பச்சக்கா²னம் வேதி³தப்³ப³ம்.

கத²ம்? உபஸம்பன்னபா⁴வதோ சவிதுகாமதாசித்தேனேவ ஹி ஸிக்கா²பச்சக்கா²னம் ஹோதி, ந த³வா வா ரவா வா ப⁴ணந்தஸ்ஸ. ஏவம் சித்தவஸேன ஸிக்கா²பச்சக்கா²னம் ஹோதி, ந தத³பா⁴வேன. ததா² பு³த்³த⁴ம் பச்சக்கா²மீதிஆதி³னா வுத்தானம் பு³த்³தா⁴தீ³னம் ஸப்³ரஹ்மசாரிபரியோஸானானம் சதுத்³த³ஸன்னஞ்சேவ கி³ஹீதி மம் தா⁴ரேஹீதிஆதி³னா வுத்தானம் கி³ஹிஆதீ³னம் அஸக்யபுத்தியபரியோஸானானம் அட்ட²ன்னஞ்சாதி இமேஸம் த்³வாவீஸதியா கே²த்தபதா³னம் யஸ்ஸ கஸ்ஸசி ஸவேவசனஸ்ஸ வஸேன தேஸு யம் கிஞ்சி வத்துகாமஸ்ஸ யம் கிஞ்சி வத³தோபி ஸிக்கா²பச்சக்கா²னம் ஹோதி. ஏவம் கே²த்தவஸேன ஸிக்கா²பச்சக்கா²னம் ஹோதி, ந தத³பா⁴வேன. தத்த² யதே³தம் ‘‘பச்சக்கா²மீதி ச மம் தா⁴ரேஹீதி சா’’தி வுத்தம் வத்தமானகாலவசனம், யானி ச ‘‘அலம் மே பு³த்³தே⁴ன, கிம் நு மே பு³த்³தே⁴ன, ந மமத்தோ² பு³த்³தே⁴ன, ஸுமுத்தாஹம் பு³த்³தே⁴னா’’திஆதி³னா நயேன ஆக்²யாதவஸேன காலம் அனாமஸித்வா புரிமேஹி சுத்³த³ஸஹி பதே³ஹி ஸத்³தி⁴ம் யோஜேத்வா வுத்தானி அலம் மேதிஆதீ³னி சத்தாரி பதா³னி, தேஸம்யேவ ச ஸவேவசனானம் வஸேன பச்சக்கா²னம் ஹோதி, ந பன ‘‘பச்சக்கா²ஸி’’ந்தி வா, ‘‘பச்சக்கி²ஸ்ஸ’’ந்தி வா, ‘‘மம் தா⁴ரேஸீ’’தி வா, ‘‘மம் தா⁴ரேஸ்ஸஸீ’’தி வா, ‘‘யம்னூன பச்சக்கே²ய்ய’’ந்தி வாதிஆதீ³னி அதீதானாக³தபரிகப்பவசனானி ப⁴ணந்தஸ்ஸ. ஏவம் வத்தமானகாலவஸேன சேவ அனாமட்ட²காலவஸேன ச பச்சக்கா²னம் ஹோதி, ந தத³பா⁴வேன. பயோகோ³ பன து³விதோ⁴ காயிகோ வாசஸிகோ, தத்த² பு³த்³த⁴ம் பச்சக்கா²மீதிஆதி³னா நயேன யாய காயசி பா⁴ஸாய வசீபே⁴த³ம் கத்வா வாசஸிகபயோகே³னேவ பச்சக்கா²னம் ஹோதி, ந அக்க²ரலிக²னம் வா ஹத்த²முத்³தா³தி³த³ஸ்ஸனம் வா காயபயோக³ம் கரோந்தஸ்ஸ. ஏவம் வாசஸிகபயோகே³னேவ பச்சக்கா²னம் ஹோதி, ந தத³பா⁴வேன.

புக்³க³லோ பன து³விதோ⁴ யோ ச பச்சக்கா²தி, யஸ்ஸ ச பச்சக்கா²தி, தத்த² யோ பச்சக்கா²தி, ஸோ ஸசே உம்மத்தககி²த்தசித்தவேத³னட்டானம் அஞ்ஞதரோ ந ஹோதி, யஸ்ஸ பன பச்சக்கா²தி, ஸோ ஸசே மனுஸ்ஸஜாதிகோ ஹோதி, ந ச உம்மத்தகாதீ³னம் அஞ்ஞதரோ ஸம்முகீ²பூ⁴தோ ச, ஸிக்கா²பச்சக்கா²னம் ஹோதி. ந ஹி அஸம்முகீ²பூ⁴தஸ்ஸ தூ³தேன வா பண்ணேன வா ஆரோசனம் ருஹதி. ஏவம் யதா²வுத்தபுக்³க³லவஸேன பச்சக்கா²னம் ஹோதி, ந தத³பா⁴வேன. விஜானனம்பி நியமிதானியமிதவஸேன து³வித⁴ம். தத்த² யஸ்ஸ யேஸம் வா நியமேத்வா இமஸ்ஸ இமேஸம் வா ஆரோசேமீதி வத³தி, ஸசே தே யதா² பகதியா லோகே மனுஸ்ஸா வசனம் ஸுத்வா ஆவஜ்ஜனஸமயே ஜானந்தி, ஏவம் தஸ்ஸ வசனானந்தரமேவ ‘‘அயம் உக்கண்டி²தோ’’தி வா, ‘‘கி³ஹிபா⁴வம் பத்த²யதீ’’தி வா யேன கேனசி ஆகாரேன மனுஸ்ஸஜாதிகோ வசனத்த²ம் ஜானாதி, பச்சக்கா²தாவ ஹோதி ஸிக்கா². அத² அபரபா⁴கே³ ‘‘கிம் இமினா வுத்த’’ந்தி சிந்தேத்வா ஜானந்தி, அஞ்ஞே வா ஜானந்தி, அப்பச்சக்கா²தாவ ஹோதி. அனியமேத்வா ஆரோசேந்தஸ்ஸ பன ஸசே வுத்தனயேன யோ கோசி மனுஸ்ஸஜாதிகோ வசனத்த²ம் ஜானாதி, பச்சக்கா²தா ஹோதி ஸிக்கா², ஏவம் ஜானனவஸேன பச்சக்கா²னம் ஹோதி, ந தத³பா⁴வேன. இதி இமேஸம் வுத்தப்பகாரானம் சித்தாதீ³னம் வஸேனேவ ஸிக்கா²பச்சக்கா²னம் ஹோதி, ந அஞ்ஞதா²தி த³ட்ட²ப்³ப³ம்.

ஸிக்கா²பச்சக்கா²னவண்ணனானயோ நிட்டி²தோ.

மூலபஞ்ஞத்திவண்ணனா

55. இதோ பட்டா²யாதி து³ட்டு²ல்லபத³தோ பட்டா²ய. மேது²னத⁴ம்மோ யதா² ஸரூபேனேவ து³ட்டு²ல்லம், ஏவம் த³ஸ்ஸனாதி³து³ட்டு²ல்லத⁴ம்மபரிவாரத்தாபி து³ட்டு²ல்லந்தி த³ஸ்ஸேதும் யஸ்மாதிஆதி³ வுத்தம். அவஸ்ஸுதானந்தி மேது²னராகே³ன திந்தானம். பரியுட்டி²தானந்தி மேது²னராகே³ன அபி⁴பூ⁴தசித்தானம். மேது²ன-ஸத்³த³ஸ்ஸ ஸதி³ஸஸத்³த³பஅயாயத்தா வுத்தம் ‘‘ஸதி³ஸான’’ந்தி, ரத்ததாதீ³ஹி ஸதி³ஸானந்தி அத்தோ². இத³ஞ்ச யேபு⁴ய்யதோ வுத்தம் உபோ⁴ஸு அஞ்ஞதரஸ்ஸ ராகா³பா⁴வேபி இதரஸ்ஸ மேது²னஸேவனஸம்ஸித்³தி⁴தோ. மேது²ன-ஸத்³தோ³ வா உப⁴யஸத்³த³பஅயாயோ, மேது²னம் யுக³ளம் யமகம் உப⁴யந்தி ஹி அத்த²தோ ஏகம், தேனாஹ ‘‘உபி⁴ன்னம் ரத்தான’’ந்தி. ‘‘த்³வயம்த்³வயஸமாபத்தீ’’தி ஹி பாளியம்பி வுத்தம். நிமித்தேனாதி பு⁴ம்மத்தே² கரணவசனம், இத்தி²னிமித்தே அத்தனோ நிமித்தம் பவேஸேதீதி அத்தோ². நிமித்தம் அங்க³ஜாதந்தி அத்த²தோ ஏகம். திலப²லந்தி ஸாஸபமத்தம் திலபீ³ஜம் அதி⁴ப்பேதம், ந கோஸஸஹிதம் ப²லந்தி ஆஹ ‘‘திலபீ³ஜமத்தம்பீ’’தி. அல்லோகாஸேதி ஸபா⁴வேன பிஹிதஸ்ஸ நிமித்தஸ்ஸ பகதிவாதேன அஸம்பு²ட்டே² திந்தப்பதே³ஸே. தாதி³ஸோ பதே³ஸோ ஸசேபி கேனசி வாதாதி³விகாரேன ஸுக்க²தி, ததா²பி அனல்லோகாஸோதி உபக்கமதோ பாராஜிகமேவ.

வேமஜ்ஜ²ந்தி யதா² சத்தாரி பஸ்ஸானி அபு²ஸந்தோ பவேஸேதி, ஏவம் கதவிவரஸ்ஸ இத்தி²னிமித்தஸ்ஸ அப்³ப⁴ந்தரதலம் வுச்சதி. புரிஸனிமித்தே பன மஜ்ஜ²ந்தி அக்³க³கோடிம் ஸந்தா⁴ய வத³தி. உபரீதி மஜ்ஜி²மபப்³பே³ன ஸமிஞ்ஜித்வா பவேஸியமானஸ்ஸ அங்க³ஜாதஸ்ஸ ஸமிஞ்ஜிதங்கு³லியா மஜ்ஜி²மபப்³ப³பிட்டி²ஸதி³ஸஅக்³க³கோடியேவ. ஹேட்டா² பவேஸேந்தோதி இத்தி²னிமித்தஸ்ஸ ஹேட்டா²பா⁴கே³ன சு²பியமானம் பவேஸேந்தோ, யதா² இத்தி²னிமித்தஸ்ஸ அல்லோகாஸம் ஹேட்டி²மதலம் திலபீ³ஜமத்தம்பி அத்தனோ நிமித்தேன சு²பதி, ஏவம் பவேஸேந்தோதி அத்தோ². சு²பனமேவ ஹேத்த² பவேஸனம், ஏவம் ஸேஸேஸுபி. மஜ்ஜே²ன பவேஸேந்தோதி அப்³ப⁴ந்தரதலேன சு²பியமானம் பவேஸேந்தோ, யதா² அப்³ப⁴ந்தரதலம் சு²பதி, ஏவம் பவேஸேந்தோதி அத்தோ². கத்த²சி அச்சு²பந்தம் பவேஸேத்வா ஆகாஸக³தமேவ நீஹரந்தஸ்ஸ நத்தி² பாராஜிகம், து³க்கடம் பன ஹோதி சி²ன்னஸீஸவத்து²ஸ்மிம் (பாரா. 73) விய. மஜ்ஜே²னேவ சு²பந்தம் பவேஸேந்தோதி அக்³க³கோடியா சு²பந்தம் பவேஸேந்தோ. மஜ்ஜி²மபப்³ப³பிட்டி²யா ஸங்கோசேத்வாதி நிமித்தம் அத்தனோ மஜ்ஜி²மபப்³ப³பிட்டி²யா ஸமிஞ்ஜித்வா உபரிபா⁴கே³ன சு²பந்தம் பவேஸேந்தோபி. கிம் விய? ஸமிஞ்ஜிதங்கு³லி வியாதி யோஜனா. அத² வா மஜ்ஜி²மபப்³ப³பிட்டி²யா ஸமிஞ்ஜிதங்கு³லி வியாதி ஸம்ப³ந்தோ⁴, ஸமிஞ்ஜிதங்கு³லிம் வா மஜ்ஜி²மபப்³ப³பிட்டி²யா பவேஸேந்தோ வியாதிபி யோஜேதப்³ப³ம். உபரிபா⁴கே³னாதி ஸங்கோசிதஸ்ஸ நிமித்தஸ்ஸ உபரிகோடியா.

இதா³னி புரிஸனிமித்தஸ்ஸ ஹேட்டா² வுத்தேஸு ச²ஸு ‘‘உபரீ’’தி வுத்தஸ்ஸ ச²ட்ட²ஸ்ஸ டா²னஸ்ஸ வஸேன விஸும் சத்தாரி பஸ்ஸானி க³ஹேத்வா புரிஸனிமித்தே த³ஸட்டா²னபே⁴த³ம் த³ஸ்ஸேந்தோ தத்தா²திஆதி³மாஹ. ஹேட்டா² பன அக³ஹிதக்³க³ஹணவஸேன ச² டா²னானி வுத்தானி. துலாத³ண்ட³ஸதி³ஸம் பவேஸேந்தஸ்ஸாபீதி அஸமிஞ்ஜித்வா உஜுகம் பவேஸேந்தஸ்ஸ. சம்மகீ²லந்தி ஏளகாதீ³னம் கீ³வாய விய நிமித்தே ஜாதம் சம்மங்குரம், ‘‘உண்ணிக³ண்டோ³’’திபி வத³ந்தி. ‘‘உபஹதகாயப்பஸாத³’’ந்தி அவத்வா நட்ட²காயப்பஸாத³ந்தி வசனேன உபாதி³ன்னபா⁴வே ஸதி கேனசி பச்சயேன உபஹதேபி காயப்பஸாதே³ உபஹதிந்த்³ரியவத்து²ஸ்மிம் (பாரா. 73) விய பாராஜிகமேவாதி த³ஸ்ஸேதி. இத்தி²னிமித்தஸ்ஸ பன நட்டே²பி உபாதி³ன்னபா⁴வே ஸதி மதஸரீரே விய பாராஜிகக்கே²த்ததா ந விஜஹதீதி வேதி³தப்³பா³. மேது²னஸ்ஸாதே³னாதி இத³ம் காயஸம்ஸக்³க³ராகே³ ஸதி ஸங்கா⁴தி³ஸேஸோ ஹோதீதி வுத்தம். பீ³ஜானீதி அண்டா³னி.

முக²ம் அபிதா⁴யாதி பமாதே³ன ஸமுப்பன்னம்பி ஹாஸம் பீ³ஜனியா படிச்சா²த³னம்பி அகத்வா நிஸீத³னம் அகா³ரவந்தி வுத்தம். அத² வா அபிதா⁴யாதி பித³ஹித்வா, பீ³ஜனியா முக²ம் படிச்சா²தே³த்வா ஹஸமானேன ந நிஸீதி³தப்³ப³ந்தி அத்தோ². த³ந்தவித³ம்ஸகந்தி த³ந்தே த³ஸ்ஸேத்வா. க³ப்³பி⁴தேனாதி ‘‘அயுத்தகதா²’’தி ஸங்கோசம் அனாபஜ்ஜந்தேன, நிரவஸேஸாதி⁴ப்பாயகத²னே ஸஞ்ஜாதுஸ்ஸாஹேனாதி அத்தோ².

அனுபஞ்ஞத்திவண்ணனா

பாராஜிகவத்து²பூ⁴தாதி யேஸம் தீஸு மக்³கே³ஸு திலபீ³ஜமத்தம்பி நிமித்தஸ்ஸ பவேஸோகாஸோ ஹோதி, தே இத்தி²புரிஸாதி³பே⁴தா³ ஸப்³பே³ ஸங்க³ய்ஹந்தி, ந இதரே. இத⁴ பன திரச்சா²னக³தாயாதி-பாளிபதா³னுரூபதோ ந ஸப்³பா³திஆதி³னா இத்தி²லிங்க³வஸேன வுத்தம். கோ³னஸாதி ஸப்பவிஸேஸா, யேஸம் பிட்டீ²ஸு மஹந்தமஹந்தானி மண்ட³லானி ஹோந்தி. கச்ச²பமண்டூ³கானம் சதுப்பத³த்தேபி ஓத³கதாஸாமஞ்ஞேன அபதே³ஹி ஸஹ க³ஹணம். முக²ஸண்டா²னந்தி ஓட்ட²சம்மஸண்டா²னம். வணஸங்கே²பந்தி வணஸங்க³ஹம். வணே து²ல்லச்சயஞ்ச ‘‘அமக்³கே³ன அமக்³க³ம் பவேஸேதி, ஆபத்தி து²ல்லச்சயஸ்ஸா’’தி (பாரா. 66) இமஸ்ஸ ஸுத்தஸ்ஸ வஸேன வேதி³தப்³ப³ம். மங்கு³ஸாதி நகுலா. ஏதமேவ ஹி அத்த²ந்தி யோ நம் அஜ்ஜா²பஜ்ஜதி, தம் பராஜேதீதி இமமத்த²ம் வுத்தானம்யேவ பாராஜிகாதி³ஸத்³தா³னம் நிப்³ப³சனப்பஸங்கே³ இமிஸ்ஸா பரிவாரகா³தா²ய பவத்தத்தா. ப⁴ட்டோ²தி ஸாஸனதோ பரிஹீனோ. நிரங்கதோதி நிராகதோ. ஏதந்தி ஆபத்திரூபம் பாராஜிகம். சி²ன்னோதி அந்தராக²ண்டி³தோ.

பகதத்தேஹி பி⁴க்கூ²ஹீதி ஏத்த² பகதத்தா நாம பாராஜிகம் அனாபன்னா அனுக்கி²த்தா ச. கேசி பன ‘‘பகதத்தேஹி பி⁴க்கூ²ஹி ஏகதோ கத்தப்³ப³த்தாதி அட்ட²கதா²யம் வுத்தத்தா பகதத்தபூ⁴தேஹி அலஜ்ஜீஹிபி ஸத்³தி⁴ம் உபோஸதா²தி³ஸங்க⁴கம்மகரணே தோ³ஸோ நத்தீ²’’தி வத³ந்தி, தம் ந யுத்தம், இமினா வசனேன தஸ்ஸ அத்த²ஸ்ஸ அஸிஜ்ஜ²னதோ. யதி³ ஹி ஸங்க⁴கம்மம் கரீயதி, பகதத்தேஹேவ கரீயதி, ந அபகதத்தேஹீதி ஏவம் அபகதத்தேஹி ஸஹஸம்வாஸபடிக்கே²பபரம் இத³ம் வசனம், ந பன பகதத்தேஹி ஸப்³பே³ஹி அலஜ்ஜீஆதீ³ஹி ஏகதோ ஸங்க⁴கம்மம் கத்தப்³ப³மேவாதி. ஏவம் ஸம்வாஸவிதா⁴னபரம் பகதத்தேஸுபி ஸபா⁴கா³பத்திம் ஆபன்னேஹி அஞ்ஞமஞ்ஞஞ்ச அலஜ்ஜீஹி ச ஸத்³தி⁴ம் ஏகதோ கம்மகரணஸ்ஸ படிக்கி²த்தத்தா. வுத்தஞ்ஹி ‘‘ஸசே ஸப்³போ³ ஸங்கோ⁴ ஸபா⁴கா³பத்தியா ஸதி வுத்தவிதி⁴ம் அகத்வா உபோஸத²ம் கரோதி, வுத்தனயேனேவ ஸப்³போ³ ஸங்கோ⁴ ஆபத்திம் ஆபஜ்ஜதீ’’திஆதி³ (கங்கா². அட்ட². நிதா³னவண்ணனா). ‘‘யத்த² ஆமிஸபரிபோ⁴கோ³ வட்டதி, த⁴ம்மபரிபோ⁴கோ³பி தத்த² வட்டதீ’’தி அலஜ்ஜீஹி ஸஹ பரிபோ⁴கோ³ ச அட்ட²கதா²யம் படிக்கி²த்தோ ஏகதோ கம்மகரணஸ்ஸாபி த⁴ம்மபரிபோ⁴க³த்தா. தஸ்மா யதா² ஹி பாளியம் பாராஜிகாபத்திஆபஜ்ஜனகபுக்³க³லனியமத்த²ம் ய்வாயம் ஞத்திசதுத்தே²ன கம்மேன…பே… உபஸம்பன்னோ, அயம் இமஸ்மிம் அத்தே² அதி⁴ப்பேதோ பி⁴க்கூ²தி இமஸ்மிம் வசனே ஸப்³பே³பி ஞத்திசதுத்த²கம்மேன உபஸம்பன்னா பாராஜிகாபஜ்ஜனகபுக்³க³லாயேவாதி நியமோ ந ஸிஜ்ஜ²தி பாராஜிகானாபஜ்ஜனகானம்பி ஸேக்கா²தீ³னம் ஸம்ப⁴வா, அத² கோ² ஞத்திசதுத்த²கம்மேன உபஸம்பன்னேஸுயேவ பாராஜிகாபத்திஆபஜ்ஜனகா அலஜ்ஜீ பா³லபுது²ஜ்ஜனா லப்³ப⁴ந்தி, ந பன ஏஹிபி⁴க்கு²ஆதீ³ஸூதி ஏவம் நியமோ ஸிஜ்ஜ²தி, ஏவமிதா⁴பி பகதத்தேஸுயேவ ஏகதோ கம்மகரணாரஹா அனாபத்திகா லஜ்ஜீ குக்குச்சகா ஸிக்கா²காமா உபலப்³ப⁴ந்தி, ந அபகதத்தேஸூதி ஏவமேவ நியமோ ஸிஜ்ஜ²தி அபகதத்தானம் க³ணபூரணத்தாபா⁴வேன அஸம்வாஸிகத்தனியமதோ. அலஜ்ஜினோ பன க³ணபூரகா ஹுத்வா கம்மஸ்ஸ ஸாத⁴னதோ அஸம்வாஸிகேஸு ந க³ஹிதா கத்தப்³ப³விதி⁴ம் அகத்வா தேஹி ஸஹ மத்³தி³த்வா கம்மம் கரோந்தானம் ஆபத்தி அலஜ்ஜிதா ச ந விக³ச்ச²தீதி வேதி³தப்³ப³ம். ‘‘ஏகோ அலஜ்ஜீ அலஜ்ஜீஸதம்பி கரோதீ’’தி (பாரா. அட்ட². 2.585) ஹி வுத்தம், தேனேவ வக்க²தி ‘‘ஸப்³பே³பி லஜ்ஜினோ ஏதேஸு கம்மாதீ³ஸு ஸஹ வஸந்தீ’’திஆதி³. அயஞ்சத்தோ² உபரி வித்தா²ரதோ ஆவி ப⁴விஸ்ஸதி.

ததா²தி ஸீமாபரிச்சி²ன்னேஹீதிஆதி³ம் பராமஸதி. ஏகதோ வந்த³னபு⁴ஞ்ஜனகா³மப்பவேஸனவத்தாபடிவத்தகரணஉக்³க³ஹபரிபுச்சா²ஸஜ்ஜா²யகரணாதி³ஸாமக்³கி³கிரியாவஸேன ப⁴க³வதா பஞ்ஞத்தஸிக்கா²பத³ஸிக்க²னம் ஸமஸிக்க²தா நாம, தஞ்ச லஜ்ஜீஹேவ ஸமம் ஸிக்கி²தப்³ப³ம், ந அலஜ்ஜீஹீதி த³ஸ்ஸேதும் ‘‘பஞ்ஞத்தம் பன…பே… ஸமஸிக்க²தா நாமா’’தி வுத்தம். தத்த² அனதிக்கமனவஸேன உக்³க³ஹபரிபுச்சா²தி³வஸேன ச லஜ்ஜீபுக்³க³லேஹி ஸமம் ஏகதோ ஸிக்கி²தப்³பா³ ஸமஸிக்கா²தி ஸிக்கா²பதா³னி வுத்தானி, தாஸம் ஸமஸிக்க²னம் யதா²வுத்தனயேன லஜ்ஜீஹி ஸிக்கி²தப்³ப³பா⁴வோ ஸமஸிக்க²தா நாமாதி அதி⁴ப்பாயோ. யதா²வுத்தேஸு ஏககம்மாதீ³ஸு அலஜ்ஜீனம் லஜ்ஜித⁴ம்மே அனோக்கந்தே லஜ்ஜீஹி ஸஹ ஸம்வாஸோ நத்தி², ததோ ப³ஹியேவ தே ஸந்தி³ஸ்ஸந்தீதி ஆஹ ஸப்³பே³பி லஜ்ஜினோதிஆதி³.

56. யம் தம் வுத்தந்தி ஸம்ப³ந்தோ⁴. வத்து²மேவ ந ஹோதீதி ஸுவண்ணாதீ³ஹி கதஇத்தி²ரூபானம் அங்க³ஜாதேஸுபி நிமித்தவோஹாரத³ஸ்ஸனதோ தத்த² பாராஜிகாஸங்கானிவத்தனத்த²ம் வுத்தம். தேனேவ வினீதவத்தூ²ஸு லேபசித்தாதி³வத்தூ²ஸு ஸஞ்ஜாதகுக்குச்சஸ்ஸ பாராஜிகேன அனாபத்தி வுத்தா.

பட²மசதுக்கவண்ணனா

57. அஸ்ஸாதி ஆக்²யாதபத³ந்தி தஸ்ஸ அத்த²ம் த³ஸ்ஸேந்தோ ‘‘ஹோதீ’’தி ஆஹ, ப⁴வேய்யாதி அத்தோ², ஹோதீதி வுத்தம் ஹோதி. து³தியே அத்த²விகப்பே ‘‘ஹோதீ’’தி இத³ம் வசனஸேஸோ.

58. ஸாதி³யந்தஸ்ஸேவாதி ஏத்த² ஸாதி³யனம் நாம ஸேவேதுகாமதாசித்தஸ்ஸ உப்பாத³னமேவாதி ஆஹ ‘‘படிஸேவனசித்தஸமங்கி³ஸ்ஸா’’தி. படிபக்க²ந்தி அனிட்ட²ம் அஹிதம். ‘‘பி⁴க்கூ²னம் பச்சத்தி²கா பி⁴க்கு²பச்சத்தி²கா’’தி வுத்தே உபரி வுச்சமானா ராஜபச்சத்தி²காத³யோபி இதே⁴வ பவிஸந்தீதி தம் நிவத்தனத்த²ம் பி⁴க்கூ² ஏவ பச்சத்தி²காதி ராஜபச்சத்தி²கானுரூபேன அத்தோ² த³ஸ்ஸிதோ. தஸ்மிம் க²ணேதி பவேஸனக்க²ணே. அக்³க³தோ ஹி யாவ மூலா பவேஸனகிரியாய வத்தமானகாலோ பவேஸனக்க²ணோ நாம. பவிட்ட²காலேதி அங்க³ஜாதஸ்ஸ யத்தகம் டா²னம் பவேஸனாரஹம், தத்தகம் அனவஸேஸதோ பவிட்ட²காலே, பவேஸனகிரியாய நிட்டி²தக்க²ணேதி அத்தோ². ஏவம் பவிட்ட²ஸ்ஸ உத்³த⁴ரணாரம்ப⁴தோ அந்தரா டி²தகாலே டி²தம் அங்க³ஜாதம், தஸ்ஸ டி²தி வா டி²தம் நாம, அட்ட²கதா²யம் பன மாதுகா³மஸ்ஸ ஸுக்கவிஸ்ஸட்டி²ம் பத்வா ஸப்³ப³தா² வாயாமதோ ஓரமித்வா டி²தகாலம் ஸந்தா⁴ய ‘‘ஸுக்கவிஸ்ஸட்டி²ஸமயே’’தி வுத்தம், தது³ப⁴யம்பி டி²தமேவாதி க³ஹேதப்³ப³ம். உத்³த⁴ரணம் நாம யாவ அக்³கா³ நீஹரணகிரியாய வத்தமானகாலோதி ஆஹ ‘‘நீஹரணகாலே படிஸேவனசித்தம் உபட்டா²பேதீ’’தி.

ஏத்த² ச யஸ்மா பரேஹி உபக்கமியமானஸ்ஸ அங்க³ஜாதாதி³காயசலனஸ்ஸ விஜ்ஜமானத்தா ஸேவனசித்தே உபட்டி²தமத்தே தஸ்மிம் க²ணே சித்தஜரூபேன ஸஞ்ஜாயமானம் அங்க³ஜாதாதி³சலனம் இமினா ஸேவனசித்தேன உப்பாதி³தமேவ ஹோதி. அபிச ஸேவனசித்தே உப்பன்னே பரேஹி அனுபக்கமியமானஸ்ஸாபி அங்க³ஜாதே சலனம் ஹோதேவ, தஞ்ச தேன கதம் நாம ஹோதி, தஸ்மா காயசித்ததோ ஸமுட்டி²தம் பாராஜிகாபத்திம் ஸோ ஆபஜ்ஜதியேவ உப்³ப⁴ஜாணுமண்ட³லிகா (பாசி. 657-658) விய. தத்தா²பி ஹி ‘‘அத⁴க்க²கம் உப்³ப⁴ஜாணுமண்ட³லம் ஆமஸனம் வா…பே… படிபீளனம் வா ஸாதி³யேய்யா’’தி (பாசி. 657) ஸாதி³யனமத்தேயேவ ஆபத்தி வுத்தா, பி⁴க்கு²னோ காயஸம்ஸக்³கே³ பன ‘‘காயஸம்ஸக்³க³ம் ஸமாபஜ்ஜேய்யா’’தி (பாரா. 270) அத்தனோ உபக்கமஸ்ஸ ஆபத்தினிமித்தபா⁴வேன வுத்தத்தா இத்தி²யா பு²ஸியமானஸ்ஸ காயஸம்ஸக்³க³ராகே³ ச இத்தி²யா ஸஞ்ஜனிதகாயசலனே ச விஜ்ஜமானேபி அத்தனோ பயோகா³பா⁴வேன அனாபத்தியேவ வுத்தாதி க³ஹேதப்³ப³ம். கேசி பன ‘‘பட²மஸங்கா⁴தி³ஸேஸவிஸயேபி பரேஹி ப³லக்காரேன ஹத்தா²தீ³ஹி உபக்கமியமானஸ்ஸ மோசனஸ்ஸாதோ³ ச உப்பஜ்ஜதி, தேன ச அஸுசிம்ஹி முத்தே ஸங்கா⁴தி³ஸேஸோ, அமுத்தே து²ல்லச்சயம் ஏவா’’தி வத³ந்தி. அங்கா³ரகாஸுந்தி அங்கா³ரராஸிம், அங்கா³ரபுண்ணாவாடம் வா. இத்தி²யா உபக்கமியமானே அஸாதி³யனம் நாம ந ஸப்³பே³ஸம் விஸயோதி ஆஹ இமஞ்ஹீதிஆதி³. ஏகாத³ஸஹி அக்³கீ³ஹீதி ராக³தோ³ஸமோஹஜாதிஜராமரணஸோகபரிதே³வது³க்க²தோ³மனஸ்ஸுபாயாஸஸங்கா²தேஹி ஏகாத³ஸக்³கீ³ஹி. அஸ்ஸாதி அஸாதி³யந்தஸ்ஸ. சதுக்கம் நீஹரித்வா ட²பேஸீதி ஏத்த² ஏகபுக்³க³லவிஸயதாய ஏகோபி அனாபத்திவாரோ பவேஸனபவிட்ட²டி²தஉத்³த⁴ரணஸங்க²ஆதானம் சதுன்னம் பதா³னம் வஸேன ‘‘சதுக்க’’ந்தி வுத்தோ. பட²மசதுக்ககதா²தி ஏத்த² பன அனாபத்திவாரேன ஸத்³தி⁴ம் பஞ்சன்னம் வாரானம் வுத்தனயேன ‘‘பஞ்ச சதுக்கா’’தி வத்தப்³பே³பி ஏகமக்³க³விஸயதாய தேஸம் ஏகத்தம் ஆரோபேத்வா பட²மசதுக்கதா வுத்தா. தேனேவ வக்க²தி திண்ணம் மக்³கா³னம் வஸேன தீணி ஸுத்³தி⁴கசதுக்கானீதிஆதி³.

ஏகூனஸத்ததித்³விஸதசதுக்ககதா²வண்ணனா

59-60. மத்தந்தி ஸுராதீ³ஹி மத்தம். அக்கா²யிதனிமித்தா இத⁴ உத்தரபத³லோபேன அக்கா²யிதஸத்³தே³ன வுத்தாதி ஆஹ ‘‘அக்கா²யிதனிமித்த’’ந்தி. ஜாக³ரந்திந்திஆதி³ விஸேஸனரஹிதத்தா ‘‘ஸுத்³தி⁴கசதுக்கானீ’’தி வுத்தம். ஸமானாசரியகாதே²ராதி ஏகாசரியஸ்ஸ உத்³தே³ஸந்தேவாஸிகா. க³ங்கா³ய அபரபா⁴கோ³ அபரக³ங்க³ம். வதரேதி க³ரஹத்தே² நிபாதோ. ஏவம் வினயக³ருகானந்தி இமினா உபரி உபதிஸ்ஸத்தே²ரேன வுச்சமானவினிச்ச²யஸ்ஸ க³ருகரணீயதாய காரணம் வுத்தம். ஸப்³ப³ம் பரியாதி³யித்வாதி ஸப்³ப³ம் பாராஜிககே²த்தம் அனவஸேஸதோ க³ஹேத்வா. யதி³ ஹி ஸாவஸேஸம் கத்வா பஞ்ஞபேய்ய, அலஜ்ஜீனம் தத்த² லேஸேன அஜ்ஜா²சாரஸோதோ பவத்ததீதி ஆஹ ‘‘ஸோதம் சி²ந்தி³த்வா’’தி. ஸஹஸேய்யாதி³பண்ணத்திவஜ்ஜஸிக்கா²பதே³ஸுயேவ (பாசி. 49-51) ஸாவஸேஸம் கத்வாபி பஞ்ஞாபனம் ஸம்ப⁴வதி, ந லோகவஜ்ஜேஸூதி ஆஹ இத³ஞ்ஹீதிஆதி³. ஸஹஸேய்யஸிக்கா²பதே³ ஹி (பாசி. 49 ஆத³யோ) கிஞ்சாபி யேபு⁴ய்யச்ச²ன்னே யேபு⁴ய்யபரிச்ச²ன்னே ஹேட்டி²மபரிச்சே²த³தோ பாசித்தியம் த³ஸ்ஸிதம், உபட்³ட⁴ச்ச²ன்னே உபட்³ட⁴பரிச்ச²ன்னே து³க்கடம், ததா²பி ஸாவஸேஸத்தா பஞ்ஞத்தியா யேபு⁴ய்யச்ச²ன்னஉபட்³ட⁴பரிச்ச²ன்னாதீ³ஸுபி அட்ட²கதா²யம் பாசித்தியமேவ த³ஸ்ஸிதம். இத⁴ பன நிரவஸேஸத்தா பஞ்ஞத்தியா ப⁴க³வதா த³ஸ்ஸிதம் யேபு⁴ய்யேன அக்கா²யிதனிமித்ததோ ஹேட்டா² பாராஜிகக்கே²த்தம் நத்தி², து²ல்லச்சயாதி³மேவ தத்த² லப்³ப⁴தி.

உபதிஸ்ஸத்தே²ரேன வுத்தஸ்ஸேவ வினிச்ச²யஸ்ஸ அஞ்ஞம்பி உபத்த²ம்ப⁴காரணம் த³ஸ்ஸேந்தோ அபிசாதிஆதி³மாஹ. நிமித்தே அப்பமத்திகாபி மம்ஸராஜி ஸசே அவஸிட்டா² ஹோதி, தம் யேபு⁴ய்யக்கா²யிதமேவ ஹோதி, ததோ பரம் பன ஸப்³ப³ஸோ கா²யிதே நிமித்தே து³க்கடமேவாதி த³ஸ்ஸேந்தோ ஆஹ ‘‘ததோ பரம் து²ல்லச்சயம் நத்தீ²’’தி. கேசி பனேத்த² வச்சமக்³கா³தி³ம் சத்தாரோ கோட்டா²ஸே கத்வா ‘‘தேஸு த்³வே கோட்டா²ஸே அதிக்கம்ம யாவ ததியகோட்டா²ஸஸ்ஸ பரியோஸானா கா²யிதம் யேபு⁴ய்யக்கா²யிதம் நாம, ததோ பரம் து²ல்லச்சயம் நத்தி², யாவ சதுத்த²கோட்டா²ஸஸ்ஸ பரியோஸானா கா²யிதம், தம்பி து³க்கடவத்து²யேவா’’தி ச வத³ந்தி, தம் ந யுத்தம். மதஸரீரஸ்மிம்யேவ வேதி³தப்³ப³ந்தி மதம் யேபு⁴ய்யேன அக்கா²யிதந்திஆதி³வசனதோ வுத்தம். யதி³பி நிமித்தந்திஆதி³ ஜீவமானகஸரீரமேவ ஸந்தா⁴ய வுத்தம் தஸ்ஸேவ அதி⁴கதத்தா. தேனேவ மாதிகாட்ட²கதா²யம் (கங்கா². அட்ட². பட²மபாராஜிகவண்ணனா) ‘‘ஜீவமானகஸரீரஸ்ஸ வுத்தப்பகாரே மக்³கே³ ஸசேபி தசாதீ³னி அனவஸேஸேத்வா ஸப்³ப³ஸோ சி²ன்னே’’திஆதி³ வுத்தம். ஸப்³ப³ஸோ கா²யிதந்தி நிமித்தமம்ஸம் ஸப்³ப³ம் சி²ன்னந்தி அத்தோ². நிமித்தஸண்டா²னந்தி சி²ன்னமம்ஸஸ்ஸ அந்தோ யாவ முத்தவத்தி²கோஸா சி²த்³தா³காரோ அப்³ப⁴ந்தரச²விசம்மமத்தோ இத்தி²னிமித்தாகாரோ, தேனாஹ ‘‘பவேஸனம் ஜாயதீ’’தி. நிமித்தஸண்டா²னம் பன அனவஸேஸேத்வாதி பவேஸனாரஹசி²த்³தா³காரேன டி²தஅப்³ப⁴ந்தரமம்ஸாதி³ம் அனவஸேஸேத்வா. ஏதேன யாவ பவேஸோ லப்³ப⁴தி, தாவ மக்³கோ³யேவாதி த³ஸ்ஸேதி. நிமித்ததோ பதிதாய மம்ஸபேஸியாதி இத³ம் நிமித்தஸண்டா²னவிரஹிதம் அப்³ப⁴ந்தரமம்ஸக²ண்ட³ம் ஸந்தா⁴ய வுத்தம். நிமித்தஸண்டா²னம் அகோபேத்வா ஸமந்ததோ சி²ந்தி³த்வா உத்³த⁴டமம்ஸபேஸியா பன மதஸரீரே யேபு⁴ய்யேன அக்கா²யிதனிமித்தே விய உபக்கமந்தஸ்ஸ பாராஜிகமேவ.

ஏவம் ஜீவமானகமனுஸ்ஸஸரீரே லப்³ப⁴மானவிஸேஸம் த³ஸ்ஸேத்வா இதா³னி மதஸரீரே த³ஸ்ஸேதும் மதஸரீரே பனாதிஆதி³மாஹ. வத்தி²கோஸேஸூதி புரிஸானம் அங்க³ஜாதகோஸசம்மேஸு. ‘‘நவத்³வாரோ மஹாவணோ’’திஆதி³ (மி. ப. 2.6.1) வசனதோ மனுஸ்ஸானம் அக்கி²னாஸாதீ³னி வணஸங்கே²பேன து²ல்லச்சயக்கே²த்தானீதி தேஸுபி து²ல்லச்சயம் வுத்தம், ஏவம் மனுஸ்ஸானம் மதஸரீரேபி, தேனாஹ மதே அல்லஸரீரேதிஆதி³. தத்த² அல்லஸரீரேதி அகுதி²தம் ஸந்தா⁴ய வுத்தம். பாராஜிகக்கே²த்தேதி யேபு⁴ய்யேன அக்கா²யிதம்பி ஸந்தா⁴ய வுத்தம். து²ல்லச்சயக்கே²த்தேதி உபட்³ட⁴க்கா²யிதாதி³ம்பி ஸந்தா⁴ய வுத்தம். ஏத்த² ச அக்கி²னாஸாதி³து²ல்லச்சயக்கே²த்தேஸு யேபு⁴ய்யேன அக்கா²யிதேஸுபி து²ல்லச்சயம், உபட்³ட⁴க்கா²யிதாதீ³ஸு து³க்கடந்தி வேதி³தப்³ப³ம். ஸப்³பே³ஸம்பீதி யதா²வுத்தஹத்தி²ஆதீ³ஹி அஞ்ஞேஸம் திரச்சா²னானம் ஸங்க³ண்ஹனத்த²ம் வுத்தம். திரச்சா²னக³தானம் அக்கி²கண்ணவணேஸு து³க்கடம் பன அட்ட²கதா²ப்பமாணேன க³ஹேதப்³ப³ம், ‘‘அமக்³கே³ன அமக்³க³ம் பவேஸேதி, ஆபத்தி து²ல்லச்சயஸ்ஸா’’தி (பாரா. 66) ஹி ஸாமஞ்ஞதோ வுத்தம், ந பன மனுஸ்ஸானந்தி விஸேஸேத்வா. யதி³ ஹி மனுஸ்ஸானஞ்ஞேவ வணேஸு து²ல்லச்சயம் ஸியா, ஹத்தி²அஸ்ஸாதீ³னம் நாஸவத்தி²கோஸேஸுபி படங்க³முக²மண்டூ³கஸ்ஸ முக²ஸண்டா²னேபி ச வணஸங்கே²பதோ து²ல்லச்சயம் ந வத்தப்³ப³ம் ஸியா, வுத்தஞ்ச. தஸ்மா அட்ட²கதா²சரியா ஏவேத்த² பமாணம். மதானம் திரச்சா²னக³தானந்தி மதகேன ஸம்ப³ந்தோ⁴.

மேது²னராகே³ன வத்தி²கோஸம் பவேஸேந்தஸ்ஸ து²ல்லச்சயம் வுத்தந்தி ஆஹ ‘‘வத்தி²கோஸம் அப்பவேஸேந்தோ’’தி. மேது²னராகோ³ ச நாம காயஸம்ஸக்³க³ராக³ம் மோசனஸ்ஸாத³ஞ்ச முஞ்சித்வா விஸும் த்³வயம்த்³வயஸமாபத்தியா ராகோ³, ஸோ ச புரிஸாதீ³ஸுபி உப்பஜ்ஜதி, தேன ச அபாராஜிகக்கே²த்தே இத்தி²ஸரீரேபி உபக்கமந்தஸ்ஸ அஸுசிம்ஹி முத்தேபி ஸங்கா⁴தி³ஸேஸோ ந ஹோதி, கே²த்தானுரூபம் து²ல்லச்சயது³க்கடமேவ ஹோதீதி வேதி³தப்³ப³ம். அப்பவேஸேந்தோதி இமினா தீஸு மக்³கே³ஸு பவேஸனாதி⁴ப்பாயே அஸதிபி மேது²னராகே³ன ப³ஹி க⁴ட்டனம் ஸம்ப⁴வதீதி த³ஸ்ஸேதி, தேனேவ து²ல்லச்சயம் வுத்தம், இதரதா² பவேஸனாதி⁴ப்பாயேன ப³ஹி சு²பந்தஸ்ஸ மேது²னஸ்ஸ புப்³ப³பயோக³த்தா து³க்கடமேவ வத்தப்³ப³ம் ஸியா. நிமித்தேன நிமித்தம் சு²பதி து²ல்லச்சயந்தி இத³ஞ்ச ‘‘ந ச, பி⁴க்க²வே, ரத்தசித்தேன அங்க³ஜாதம் சு²பிதப்³ப³ம், யோ சு²பேய்ய, ஆபத்தி து²ல்லச்சயஸ்ஸா’’தி (மஹாவ. 252) இமஸ்ஸ சம்மக்க²ந்த⁴கே ஆக³தஸ்ஸ ஸுத்தஸ்ஸ வஸேன வுத்தம். தத்த² ச கேஸஞ்சி அஞ்ஞதா²பி அத்த²விகப்பஸ்ஸ பீ³ஜம் த³ஸ்ஸேந்தோ மஹாஅட்ட²கதா²யம் பனாதிஆதி³மாஹ. முகே²னேவ சு²பனம் ஸந்தா⁴யாதி ஓட்ட²ஜிவ்ஹாதி³முகா²வயவேன சு²பனம் ஸந்தா⁴ய. ஓளாரிகத்தாதி அஜ்ஜா²சாரஸ்ஸ து²ல்லத்தா. தம் ஸந்தா⁴யபா⁴ஸிதந்தி தம் யதா²வுத்தஸுத்தம். ஸுத்தஞ்ஹி அஜ்ஜா²சாரம் ஸந்தா⁴ய படிச்ச வுத்தத்தா ‘‘ஸந்தா⁴யபா⁴ஸித’’ந்தி வுச்சதி. ஸுட்டு²ஸல்லக்கே²த்வாதி பிட்டி²ம் அபி⁴ருஹந்தானம் அங்க³ஜாதமுகே²னேவ நிமித்தசு²பனஸ்ஸ ஸம்ப⁴வம் மேது²னராகீ³னஞ்ச அங்க³ஜாதேன சு²பனஸ்ஸேவ அனுரூபதஞ்ச ஸுத்தே ச ‘‘முகே²னா’’தி அவுத்ததஞ்ச அஞ்ஞஞ்ச நயம் யதா²ப³லம் ஸுட்டு² ஸல்லக்கே²த்வாதி அத்தோ². ஸங்கா⁴தி³ஸேஸோதி மனுஸ்ஸித்தி²ம் ஸந்தா⁴ய வுத்தம். பஸ்ஸாவமக்³க³ந்தி இத³ம் சம்மக்க²ந்த⁴கே நிதா³னவஸேன வுத்தம். இதரமக்³க³த்³வயம் பன நிமித்தமுகே²ன சு²பந்தஸ்ஸ வணஸங்கே²பேன து²ல்லச்சயமேவ. வுத்தனயேனேவாதி மேது²னராகே³னேவ. நிமித்தமுகே²ன பன வினா மேது²னராகே³ன மனுஸ்ஸித்தி²யா வா திரச்சா²னக³தித்தி²யா வா பஸ்ஸாவமக்³க³ம் பகதிமுகே²ன சு²பந்தஸ்ஸ து³க்கடமேவ பகதிமுகே²ன பகதிமுக²சு²பனே விய, இதரதா² தத்தா²பி து²ல்லச்சயேன ப⁴விதப்³ப³ம், தஞ்ச ந யுத்தம் க²ந்த⁴கஸுத்தேபி ததா² அவுத்தத்தா. காயஸம்ஸக்³க³ராகே³ன து³க்கடந்தி நிமித்தமுகே²ன வா பகதிமுகா²தி³ம் இதரகாயேன வா காயஸம்ஸக்³க³ராகே³ன சு²பந்தஸ்ஸ து³க்கடமேவ.

ஏத்த² ச காயஸம்ஸக்³க³ராகே³ன ப³ஹினிமித்தே உபக்கமதோ அஜானந்தஸ்ஸேவ அங்க³ஜாதம் யதி³ பாராஜிகக்கே²த்தம் சு²பதி, தத்த² கிம் ஹோதீதி? கேசி தாவ ‘‘மேது²னராக³ஸ்ஸ அபா⁴வா மனுஸ்ஸித்தி²யா ஸங்கா⁴தி³ஸேஸோ, ஸேஸேஸு வத்து²வஸேன து²ல்லச்சயது³க்கடானீ’’தி வத³ந்தி. அஞ்ஞே பன ‘‘பவேஸனக்க²ணே ப²ஸ்ஸஸ்ஸ ஸாதி³யனஸம்ப⁴வதோ ப³லக்காரேன உபக்கமனக்க²ணே விய பாராஜிகமேவா’’தி வத³ந்தி, இத³மேவ யுத்ததரம். மக்³க³த்தயதோ ஹி அஞ்ஞஸ்மிம் பதே³ஸேயேவ காயஸம்ஸக்³கா³தி³ராக³பே⁴த³தோ ஆபத்திபே⁴தோ³ லப்³ப⁴தி, ந மக்³க³த்தயே. தத்த² பன யேன கேனசி ஆகாரேன ப²ஸ்ஸஸ்ஸ ஸாதி³யனக்க²ணே பாராஜிகமேவ, தேனேவ பரோபக்கமேன பவேஸனாதீ³ஸு ராக³பே⁴த³ம் அனுத்³த⁴ரித்வா ஸாதி³யனமத்தேன பாராஜிகம் வுத்தம்.

ஸந்த²தசதுக்கபே⁴த³கதா²வண்ணனா

61-2. படிபன்னகஸ்ஸாதி ஆரத்³த⁴விபஸ்ஸகஸ்ஸ. உபாதி³ன்னகந்தி காயிந்த்³ரியம் ஸந்தா⁴ய வுத்தம். உபாதி³ன்னகேன பு²ஸதீதி உபாதி³ன்னகஸரீரேன பு²ஸீயதீதி கம்மஸாத⁴னேன அத்தோ² த³ட்ட²ப்³போ³. அத² வா ஏவம் கரோந்தோ பி⁴க்கு² கிஞ்சி உபாதி³ன்னகம் உபாதி³ன்னகேன ந பு²ஸதீதி அத்தோ². லேஸம் ஓட்³டே³ஸ்ஸந்தீதி லேஸம் ட²பேஸ்ஸந்தி, பரிகப்பேஸ்ஸந்தீதி அத்தோ². ஸந்த²தாதி³பே⁴தே³ஹி பி⁴ந்தி³த்வாதி ஸந்த²தாதி³விஸேஸனேஹி விஸேஸேத்வா. ஸந்த²தாயாதி ஸமுதா³யே ஏகதே³ஸவோஹாரோ த³ட்³ட⁴ஸ்ஸ படஸ்ஸ சி²த்³த³ந்திஆதீ³ஸு விய. யதா² ஹி படஸ்ஸ ஏகதே³ஸோவ வத்த²தோ த³ட்³டோ⁴தி வுச்சதி, தம் ஏகதே³ஸவோஹாரம் ஸமுதா³யே படே உபசாரதோ ஆரோபேத்வா புன தம் ஸமுதா³யம் த³ட்³ட⁴ப்பதே³ஸஸங்கா²தசி²த்³த³ஸம்ப³ந்தீ⁴பா⁴வேன ‘‘த³ட்³ட⁴ஸ்ஸ படஸ்ஸ சி²த்³த³’’ந்தி வோஹரந்தி, ஏவமிதா⁴பி இத்தி²யா மக்³க³ப்பதே³ஸவோஹாரம் ஸமுதா³யபூ⁴தாய இத்தி²யா ஆரோபேத்வா புன தம் இத்தி²ம் ஸந்த²தமக்³க³ஸம்ப³ந்தி⁴னிம் கத்வா ஸந்த²தாய இத்தி²யா வச்சமக்³கே³னாதிஆதி³ வுத்தம். ஸாரத்த²தீ³பனியம் (ஸாரத்த². டீ. பாராஜிககண்ட³ 2.61-62) பனேத்த² ‘‘ஏகதே³ஸே ஸமுதா³யவோஹாரோ’’தி வுத்தம், தம் ந யுத்தம் அவயவவோஹாரேன ஸமுதா³யஸ்ஸேவ பதீயமானத்தா. இதரதா² ஹி ஸந்த²தாய வச்சமக்³கே³னாதி இத்தி²லிங்க³தா மக்³க³ஸம்ப³ந்தி⁴தா ச ந ஸியா, ஏகதே³ஸே ஸமுதா³யோபசாரஸ்ஸ பன ஏகதே³ஸோவ அத்தோ² ஸாகா²ய சி²ஜ்ஜமானாய ருக்கோ² சி²ஜ்ஜதீதிஆதீ³ஸு விய.

வத்தா²தீ³னி மக்³க³ஸ்ஸ அந்தோ அப்பவேஸேத்வா ப³ஹியேவ வேட²னம் ஸந்தா⁴ய ‘‘பலிவேடே²த்வா’’தி வுத்தம். ஸமுதா³யே அவயவூபசாரேனேவ பி⁴க்கு²பி ஸந்த²தோ நாமாதிஆதி³ வுத்தம். யத்தகே பவிட்டே²தி திலபீ³ஜமத்தே பவிட்டே². அக்கி²னாஸாதீ³னம் ஸந்த²தத்தேபி யதா²வத்து²கமேவாதி ஆஹ து²ல்லச்சயக்கே²த்தே து²ல்லச்சயந்திஆதி³. கா²ணும் க⁴ட்டேந்தஸ்ஸ து³க்கடந்தி இத்தி²னிமித்தஸ்ஸ அந்தோ கா²ணும் பவேஸேத்வா ஸமதலம், அதிரித்தம் வா டி²தம் கா²ணும் ஸசே க⁴ட்டேதி, க⁴ட்டேந்தஸ்ஸ து³க்கடம் பவேஸாபா⁴வதோ. ஸசே பன ஈஸகம் அந்தோ அல்லோகாஸே பவேஸேத்வா டி²தம் அனுபாதி³ன்னமேவ கா²ணுஸீஸம் அங்க³ஜாதேன சு²பதி, பாராஜிகமேவ. தஸ்ஸ தலந்தி வேளுனளாதி³கஸ்ஸ அந்தோதலம். ப³ஹித்³தா⁴ கா²ணுகேதி அந்தோ பவேஸிதவேளுபப்³பா³தி³கஸ்ஸ ப³ஹி நிக்க²ந்தஸீஸம் ஸந்தா⁴ய வுத்தம். யதா² ச இத்தி²னிமித்தேதிஆதீ³ஸு யதா² இத்தி²யா பஸ்ஸாவமக்³கே³ கா²ணும் கத்வா க⁴ட்டனாதி³கம் வுத்தம், ஏவம் ஸப்³ப³த்த² வச்சமக்³கா³தீ³ஸுபி லக்க²ணம் வேதி³தப்³ப³ந்தி அத்தோ².

ராஜபச்சத்தி²காதி³சதுக்கபே⁴த³கதா²வண்ணனா

65. கேராடிகாதி வஞ்சகா. பட²மம் இத்தி²து⁴த்தமேவ த³ஸ்ஸேத்வா இதா³னி இதரது⁴த்தேபி ஸங்க³ஹேத்வா த³ஸ்ஸேதும் ‘‘இத்தி²து⁴த்தஸுராது⁴த்தாத³யோ வா’’தி வுத்தம்.

ஆபத்தானாபத்திவாரவண்ணனா

66. படிஞ்ஞாதகரணம் நத்தி² ஸேவேதுகாமதா மக்³கே³ன மக்³க³ப்படிபத்தீதி த்³வின்னம் அங்கா³னம் ஸித்³த⁴த்தா. தூ³ஸிதஸ்ஸ பன மக்³கே³ன மக்³க³ப்படிபத்தி ஏவமேகம் அங்க³ம் ஸித்³த⁴ம், ஸேவேதுகாமதாஸங்கா²தம் ஸாதி³யனம் அஸித்³த⁴ம். தஸ்மா ஸோ புச்சி²த்வா ‘‘ஸாதி³யி’’ந்தி வுத்தபடிஞ்ஞாய நாஸேதப்³போ³. தத்தே²வாதி வேஸாலியம் மஹாவனே ஏவ. ஸப்³ப³ங்க³க³தந்தி ஸப்³ப³காயக³தம். ‘‘லோஹிதம் வியா’’தி வுத்தத்தா கேஸாதீ³னம் வினிமுத்தட்டா²னே ஸப்³ப³த்தா²தி க³ஹேதப்³ப³ம். நிச்சமேவ உம்மத்தகோ ஹோதீதி யஸ்ஸ பித்தகோஸதோ பித்தம் சலித்வா ஸப்³ப³தா³ ப³ஹி நிக்க²ந்தம் ஹோதி, தம் ஸந்தா⁴ய வுத்தம். யஸ்ஸ பன பித்தம் சலித்வா பித்தகோஸேயேவ டி²தம் ஹோதி, கதா³சி வா நிக்க²ந்தம் புன நிக்க²மதி, ஸோபி அந்தரந்தரா ஸஞ்ஞம் படிலப⁴தி பே⁴ஸஜ்ஜேன ச பகதிஆரோக்³யம் படிலப⁴தீதி வேதி³தப்³ப³ம்.

பத³பா⁴ஜனீயவண்ணனானயோ நிட்டி²தோ.

பகிண்ணககதா²வண்ணனா

பகிண்ணகந்தி வோமிஸ்ஸகனயம். ஸமுட்டா²னந்தி உப்பத்திகாரணம். கிரியாதிஆதி³ நித³ஸ்ஸனமத்தம் அகிரியாதீ³னம்பி ஸங்க³ஹதோ. வேத³னாய ஸஹ குஸலஞ்ச வேதி³தப்³ப³ந்தி யோஜேதப்³ப³ம். ஸப்³ப³ஸங்கா³ஹகவஸேனாதி ஸப்³பே³ஸம் ஸிக்கா²பதா³னம் ஸங்கா³ஹகவஸேன ‘‘காயோ வாசா காயவாசா காயசித்தம் வாசாசித்தம் காயவாசாசித்த’’ந்தி ஏவம் வுத்தானி ச² ஆபத்திஸமுட்டா²னானி. ஸமுட்டா²னாத³யோ ஹி ஆபத்தியா ஏவ ஹோந்தி, ந ஸிக்கா²பத³ஸ்ஸ. தம்தம்ஸிக்கா²பத³ஸ்ஸ நியதஆபத்தியா ஏவ க³ஹணத்த²ம் பன ஸிக்கா²பத³ஸீஸேன ஸமுட்டா²னாதீ³னம் கத²னம். ஏவஞ்ஹி ஆபத்திவிஸேஸோ பஞ்ஞாயதி ஆபத்தி-ஸத்³த³ஸ்ஸ ஸப்³பா³பத்திஸாதா⁴ரணத்தா, இமேஸு பன ச²ஸு ஸமுட்டா²னேஸு புரிமானி தீணி அசித்தகானி, பச்சி²மானி ஸசித்தகானி. ஸமாஸதோ தம் இமம் பகிண்ணகம் விதி³த்வா வேதி³தப்³ப³ந்தி ஸம்ப³ந்தோ⁴. ச² ஸமுட்டா²னானி ஏதஸ்ஸாதி ச²ஸமுட்டா²னம். ஏவம் ஸேஸேஸுபி.

அத்தி² கதி²னஸமுட்டா²னந்திஆதி³ ஸமுட்டா²னஸீஸவஸேன த்³விஸமுட்டா²னஏகஸமுட்டா²னானம் த³ஸ்ஸனம். தேரஸ ஹி ஸமுட்டா²னஸீஸானி பட²மபாராஜிகஸமுட்டா²னம் அதி³ன்னாதா³னஸமுட்டா²னம் ஸஞ்சரித்தஸமுட்டா²னம் ஸமனுபா⁴ஸனஸமுட்டா²னம் கதி²னஸமுட்டா²னம் ஏளகலோமஸமுட்டா²னம் பத³ஸோத⁴ம்மஸமுட்டா²னம் அத்³தா⁴னஸமுட்டா²னம் தே²ய்யஸத்த²ஸமுட்டா²னம் த⁴ம்மதே³ஸனாஸமுட்டா²னம் பூ⁴தாரோசனஸமுட்டா²னம் சோரீவுட்டா²பனஸமுட்டா²னம் அனனுஞ்ஞாதஸமஉட்டா²னந்தி. தத்த² அத்தி² ச²ஸமுட்டா²னந்தி இமினா ஸஞ்சரித்தஸமுட்டா²னம் வுத்தம், பஞ்சஸமுட்டா²னஸ்ஸ அபா⁴வதோ ‘‘அத்தி² பஞ்சஸமுட்டா²ன’’ந்தி அவத்வா ‘‘அத்தி² சதுஸமுட்டா²ன’’ந்தி வுத்தம், இமினா ச அத்³தா⁴னஸமுட்டா²னம் அனனுஞ்ஞாதஸமுட்டா²னஞ்ச ஸங்க³ஹிதம். யஞ்ஹி பட²மததியசதுத்த²ச²ட்டே²ஹி ஸமுட்டா²னேஹி ஸமுட்டா²தி, இத³ம் அத்³தா⁴னஸமுட்டா²னம். யம் பன து³தியததியபஞ்சமச²ட்டே²ஹி ஸமுட்டா²தி, இத³ம் அனனுஞ்ஞாதஸமுட்டா²னம். அத்தி² திஸமுட்டா²னந்தி இமினா அதி³ன்னாதா³னஸமுட்டா²னம் பூ⁴தாரோசனஸமுட்டா²னஞ்ச ஸங்க³ஹிதம். யஞ்ஹி ஸசித்தகேஹி தீஹி ஸமுட்டா²தி, இத³ம் அதி³ன்னாதா³னஸமுட்டா²னம். யம் பன அசித்தகேஹி தீஹி ஸமுட்டா²தி, இத³ம் பூ⁴தாரோசனஸமுட்டா²னம். அத்தி² கதி²னஸமுட்டா²னந்திஆதி³னா பன அவஸேஸஸமஉட்டா²னஸீஸவஸேன த்³விஸமுட்டா²னம் ஏகஸமுட்டா²னஞ்ச ஸங்க³ண்ஹாதி. தத்த² ஹி யம் ததியச²ட்டே²ஹி ஸமுட்டா²தி, இத³ம் கதி²னஸமுட்டா²னம் நாம. யம் பன பட²மசதுத்தே²ஹி ஸமுட்டா²தி, இத³ம் ஏளகலோமஸமுட்டா²னம். யம் ச²ட்டே²னேவ ஸமுட்டா²தி, இத³ம் து⁴ரனிக்கே²பஸமுட்டா²னம், ‘‘ஸமனுபா⁴ஸனஸமஉட்டா²ன’’ந்திபி தஸ்ஸேவ நாமம். இதி ஸரூபேன அட்ட² ஆபத்திஸீஸானி த³ஸ்ஸிதானி. ஆதி³ஸத்³தே³ன பனேத்த² அவஸேஸானி பட²மபாராஜிகஸமுட்டா²னபத³ஸோத⁴ம்மதே²ய்யஸத்த²த⁴ம்மதே³ஸனாசோரீவுட்டா²பனஸமுட்டா²னானி பஞ்சபி ஸமுட்டா²னஸீஸானி ஸங்க³ஹிதானி. தத்த² யம் காயசித்ததோ ஸமுட்டா²தி, இத³ம் பட²மபாராஜிகஸமுட்டா²னம். யம் து³தியபஞ்சமேஹி ஸமுட்டா²தி, இத³ம் பத³ஸோத⁴ம்மஸமுட்டா²னம். யம் சதுத்த²ச²ட்டே²ஹி ஸமுட்டா²தி, இத³ம் தே²ய்யஸத்த²ஸமுட்டா²னம். யம் பஞ்சமேனேவ ஸமுட்டா²தி, இத³ம் த⁴ம்மதே³ஸனாஸமஉட்டா²னம். யம் பஞ்சமச²ட்டே²ஹி ஸமுட்டா²தி, இத³ம் சோரீவுட்டா²பனஸமுட்டா²னம். ஏத்த² ச பச்சி²மேஸு தீஸு ஸசித்தகஸமுட்டா²னேஸு ஏகேகஸமுட்டா²னவஸேன ஏகஸமுட்டா²னானி திவிதா⁴னி. த்³விஸமுட்டா²னானி பன பட²மசதுத்தே²ஹி வா து³தியபஞ்சமேஹி வா ததியச²ட்டே²ஹி வா சதுத்த²ச²ட்டே²ஹி வா பஞ்சமச²ட்டே²ஹி வா ஸமுட்டா²னவஸேன பஞ்சவிதா⁴னீதி வேதி³தப்³பா³னி.

ஏவம் ஸமுட்டா²னவஸேன ஸப்³ப³ஸிக்கா²பதா³னி தேரஸதா⁴ த³ஸ்ஸேத்வா இதா³னி கிரியாவஸேன பஞ்சதா⁴ த³ஸ்ஸேதும் தத்ராபீதிஆதி³ வுத்தம். கிஞ்சீதி ஸிக்கா²பத³ம். கிரியதோதி பத²வீக²ணனாதி³ (பாசி. 84-85) விய காயவசீவிஞ்ஞத்திஜனிதகம்மதோ. அகிரியதோதி பட²மகதி²னாதி³ (பாரா. 459 ஆத³யோ) விய கத்தப்³ப³ஸ்ஸ அகரணேனேவ. கிரியாகிரியதோதி அஞ்ஞாதிகாய பி⁴க்கு²னியா ஹத்த²தோ சீவரபடிக்³க³ஹணாதி³ (பாரா. 508 ஆத³யோ) விய. ஸியா கிரியதோ, ஸியா அகிரியதோ ரூபியபடிக்³க³ஹணாதி³ (பாரா. 582 ஆத³யோ) விய, ஸியா கிரியதோ, ஸியா கிரியாகிரியதோ குடிகாராதி³ (பாரா. 342) விய. வீதிக்கமஸஞ்ஞாய அபா⁴வேன விமோக்கோ² அஸ்ஸாதி ஸஞ்ஞாவிமோக்க²ந்தி மஜ்ஜே²பத³லோபீஸமாஸோ த³ட்ட²ப்³போ³. சித்தங்க³ம் லப⁴தி ஸசித்தகஸமுட்டா²னேஹேவ ஸமுட்ட²ஹனதோ. இதரந்தி யஸ்ஸ சித்தங்க³னியமோ நத்தி², தம், அனாபத்திமுகே²ன சேதம் ஸஞ்ஞாது³கம் வுத்தம், ஆபத்திமுகே²ன ஸசித்தகது³கந்தி ஏத்தகமேவ விஸேஸோ, அத்த²தோ ஸமானாவ.

காயவசீத்³வாரேஹி ஆபஜ்ஜிதப்³ப³ம்பி காயகம்மே வா வசீகம்மே வா ஸங்க³ய்ஹதி. தத்த² பா³ஹுல்லவுத்திதோ அதி³ன்னாதா³னமுஸாவாதா³த³யோ வியாதி அத்தி² ஸிக்கா²பத³ம் காயகம்மந்திஆதி³னா காயகம்மம் வசீகம்மஞ்சாதி து³கமேவ வுத்தம், விபா⁴க³தோ பன காயவசீகம்மேன ஸத்³தி⁴ம் திகமேவ ஹோதி. தேனேவ மாதிகாட்ட²கதா²யம் (கங்கா². அட்ட². பட²மபாராஜிகவண்ணனா) வுத்தம் ‘‘ஸப்³பா³ ச காயகம்மவசீகம்மதது³ப⁴யவஸேன திவிதா⁴ ஹோந்தீ’’தி. ததோயேவ இதா⁴பி அதி³ன்னாதா³னாதீ³ஸு (பாரா. 89) காயகம்மவசீகம்மந்தி தது³ப⁴யவஸேன த³ஸ்ஸிதம். அத்தி² பன ஸிக்கா²பத³ம் குஸலந்திஆதி³ ஆபத்திஸமுட்டா²பகசித்தவஸேன காரியே காரணோபசாரேன வுத்தம், ந பன ஆபத்தியா குஸலாதி³பரமத்த²த⁴ம்மதாவஸேன ஆபத்தியா ஸம்முதிஸபா⁴வத்தா. குஸலாகுஸலாதி³பரமத்த²த⁴ம்மே உபாதா³ய ஹி ப⁴க³வதா ஆபத்திஸம்முதி பஞ்ஞத்தா. வக்க²தி ஹி ‘‘யம் குஸலசித்தேன ஆபஜ்ஜதி, தம் குஸல’’ந்திஆதி³ (பாரா. அட்ட². 1.66 பகண்ணககதா²). ந ஹி ப⁴க³வதோ ஆணாயத்தா ஆபத்தி குஸலாதி³பரமத்த²ஸபா⁴வா ஹோதி அனுபஸம்பன்னானம் ஆதி³கம்மிகானஞ்ச ஆபத்திப்பஸங்க³தோ, தஸ்ஸா தே³ஸனாதீ³ஹி விஸுத்³தி⁴அபா⁴வப்பஸங்க³தோ ச. ந ஹி காரணப³லேன உப்பஜ்ஜமானா குஸலாதி³ஸபா⁴வா ஆபத்தி அனுபஸம்பன்னாதீ³ஸு நிவத்ததி, உப்பன்னாய ச தஸ்ஸா கேனசி வினாஸோ ந ஸம்ப⁴வதி. ஸரஸவினாஸதோ தே³ஸனாதி³னா ச ஆபத்தி விக³ச்ச²தீதி வசனமத்தி², ந பன தேன அகுஸலாதி³ விக³ச்ச²தி. பிதுகா⁴தாதி³கம்மேன ஹி பாராஜிகம் ஆபன்னஸ்ஸ பி⁴க்கு²னோ கி³ஹிலிங்க³ம் க³ஹேத்வா பி⁴க்கு²பா⁴வபரிச்சாகே³ன பாராஜிகாபத்தி விக³ச்ச²தி, ந பாணாதிபாதாதி³அகுஸலம் ஆனந்தரியாதி³பா⁴வதோ. தஸ்மா து³ம்மங்கூனம் நிக்³க³ஹாதி³த³ஸஅத்த²வஸே (பாரா. 39; பரி. 2) படிச்ச ப⁴க³வதா யதா²பச்சயம் ஸமுப்பஜ்ஜமானே குஸலாகுஸலாதி³னாமரூபத⁴ம்மே உபாதா³ய பஞ்ஞத்தா ஸம்முதியேவ ஆபத்தி, ஸா ச யதா²விதி⁴படிகம்மகரணேன விக³தா நாம ஹோதீதி வேதி³தப்³ப³ம், தேனாஹ த்³வத்திம்ஸேவ ஹி ஆபத்திஸமுட்டா²பகசித்தானீதிஆதி³. ஆபத்திஸமுட்டா²பகத்தேனேவ ஹேத்த² குஸலாதீ³னம் ஆபத்திதோ பே⁴தோ³ ஸித்³தோ⁴. ந ஹி தம்ஸமுட்டி²தஸ்ஸ ததோ அபே⁴தோ³ யுத்தோ ஸமுட்டா²னஸமுட்டி²தபே⁴த³ப்³யவஹாருபச்சே²த³ப்பஸங்க³தோ. ஸாரத்த²தீ³பனியம் (ஸாரத்த². டீ. பாராஜிககண்ட³ 2.66 பகிண்ணககதா²வண்ணனா) பன ஆபத்தியா பரமத்த²தோ குஸலத்தமேவ ந ஸம்ப⁴வதி ‘‘ஆபத்தாதி⁴கரணம் ஸியா அகுஸலம், ஸியா அப்³யாகதம், நத்தி² ஆபத்தாதி⁴கரணம் குஸல’’ந்தி வசனதோ, ‘‘அகுஸலத்தம் பன அப்³யாகதத்தஞ்ச ஆபத்தியா ஸம்ப⁴வதீ’’தி ஸஞ்ஞாய குஸலசித்தஸமுட்டா²னக்க²ணேபி ரூபாப்³யாகதத்தம் ஆபத்தியா ஸமத்தே²தும் யம் குஸலசித்தேன ஆபஜ்ஜதி, தம் குஸலம், இதரேஹி இதரந்தி (பாரா. அட்ட². 1.66 பகிண்ணககதா²) இமம் அட்ட²கதா²வசனம் நிஸ்ஸாய வுத்தம் ‘‘யம் குஸலசித்தேன ஆபஜ்ஜதீதி யம் ஸிக்கா²பத³ஸீஸே க³ஹிதம் ஆபத்திம் குஸலசித்தஸமங்கீ³ ஆபஜ்ஜதி, இமினா பன வசனேன தம் குஸலந்தி ஆபத்தியா வுச்சமானோ குஸலபா⁴வோ பரியாயதோ, ந பரமத்த²தோதி த³ஸ்ஸேதி. குஸலசித்தேன ஹி ஆபத்திம் ஆபஜ்ஜந்தோ ஸவிஞ்ஞத்திகம் அவிஞ்ஞத்திகம் வா ஸிக்கா²பத³வீதிக்கமாகாரப்பவத்தம் ரூபக்க²ந்த⁴ஸங்கா²தம் அப்³யாகதாபத்திம் ஆபஜ்ஜதீ’’தி. தத்த² யம் குஸலசித்தேன ஆபஜ்ஜதீதி இமம் வசனம் உத்³தி³ஸ்ஸ ‘‘இமினா பன வசனேன தம் குஸலந்தி ஆபத்தியா வுச்சமானோ குஸலபா⁴வோ பரியாயதோ, ந பரமத்த²தோதி த³ஸ்ஸேதீ’’தி வுத்தம், ஏவம் இதரேஹி இதரந்தி வசனேன ‘‘யம் அகுஸலசித்தேன ஆபஜ்ஜஹி, தம் அகுஸலம், யம் அப்³யாகதசித்தேன ஆபஜ்ஜதி, தம் அப்³யாகத’’ந்தி இமஸ்ஸ அத்த²ஸ்ஸ வுத்தத்தா இதரேஹீதி வசனம் உத்³தி³ஸ்ஸ ‘‘இமினாபி வசனேன இதரந்தி ஆபத்தியா வுச்சமானோ அகுஸலபா⁴வோ அப்³யாகதபா⁴வோ ச பரியாயதோ த³ஸ்ஸேதீ’’தி வத்தப்³ப³ம். ஏவம் அவத்வா குஸலபக்கே² ஏவ கத²னஸ்ஸ காரணம் ந பஸ்ஸாம. யம் பன ஆபத்தாதி⁴கரணம் ஸியா அகுஸலந்திஆதி³வசனம் காரணத்தேன வுத்தம், தம்பி அகாரணம் யம் அகுஸலசித்தேன ஆபஜ்ஜதி, தம் அகுஸலந்திஆதி³னா ஹேட்டா² வுத்தனயேன அகுஸலாதி³பா⁴வஸ்ஸ பரியாயதே³ஸிதத்தா, ஆபத்தியா குஸலவோஹாரஸ்ஸ அயுத்ததாய நத்தி² ஆபத்தாதி⁴கரணம் குஸலந்தி வுத்தத்தா ச. ஆபத்தியா ஹி குஸலசித்தஸமுட்டி²தத்தேபி ப⁴க³வதா படிக்கி²த்தபா⁴வேன ஸாவஜ்ஜத⁴ம்மத்தா காரணூபசாரேனாபி அனவஜ்ஜகுஸலவோஹாரோ ந யுத்தோ ஸாவஜ்ஜானவஜ்ஜானம் அஞ்ஞமஞ்ஞவிருத்³த⁴த்தா. யதா² ஆகாஸாதி³ஸம்முதிஸச்சானம் உப்பன்னதாதி³வோஹாரோ விய ஜாதிஜராப⁴ங்கா³னம் உப்பன்னதாதி³வோஹாரோ அனவட்டா²னாதி³தே³ஸதோ அயுத்தோ, ஏவமிதா⁴பி குஸலவோஹாரோ அயுத்தோ விருத்³த⁴த்தா. அகுஸலாதி³வோஹாரோ பன யுத்தோ, காரணூபசாரேன பன அகுஸலாதி³ஸபா⁴வதா யதா²வுத்ததோ³ஸானதிவத்தனதோ. ஸுத்தஸ்ஸாபி ஹி யதா² ஸுத்தஸுத்தானுலோமாதீ³ஹி விரோதோ⁴ ந ஹோதி, ததே²வ அத்தோ² க³ஹேதப்³போ³.

யம் பன வுத்தம் ‘‘குஸலசித்தேன ஹி ஆபத்திம் ஆபஜ்ஜந்தோ…பே… ரூபக்க²ந்த⁴ஸங்கா²தம் அப்³யாகதாபத்திம் ஆபஜ்ஜதீ’’தி, தம் அயுத்தமேவ ரூபக்க²ந்த⁴ஸ்ஸ க²ணிகதாய ஆபத்தியாபி தே³ஸனாதி³படிகம்மம் வினாவ படிபஸ்ஸத்³தி⁴ப்பஸங்க³தோ. ரூபபரம்பரா ஆபத்தீதி சே? தன்ன, படிகம்மேனாபி அவிக³மப்பஸங்க³தோ. ந ஹி ரூபஸந்ததிதே³ஸனாதீ³ஹி விக³ச்ச²தி ஸகாரணாயத்தத்தா, இதி ஸப்³ப³தா² ஆபத்தியா பரமத்த²தா அயுத்தா, ஏதேனேவ யம் வுத்தம் ‘‘நிபஜ்ஜித்வா நிரோத⁴ஸமாபன்னஸ்ஸ ஸஹஸேய்யவஸேன ததா²காரப்பவத்தரூபத⁴ம்மஸ்ஸேவ ஆபத்திபா⁴வதோ’’திஆதி³, தம்பி படிஸித்³த⁴ந்தி வேதி³தப்³ப³ம். இத⁴ பன நிரோத⁴ஸமாபன்னானம் ரூபத⁴ம்மமேவ படிச்ச உப்பன்னத்தா ஆபத்தி அசித்தா அவேத³னா, அஞ்ஞத்த² பன ஸசித்தா ஸவேத³னாவ, ஸப்³ப³த்தா²பி பஞ்ஞத்திஸபா⁴வாதி வேதி³தப்³பா³. தேனேவ து³ட்ட²தோ³ஸஸிக்கா²பத³ட்ட²கதா²யம் ஆபத்தியா அகுஸலாதி³ஸபா⁴வம் பரபரிகப்பிதம் நிஸேதே⁴தும் ‘‘ஆதி³கம்மிகஸ்ஸ அனாபத்திவசனதோ…பே… பண்ணத்திமத்தமேவ ஆபத்தாதி⁴கரணந்தி வேதி³தப்³ப³’’ந்தி ஸயமேவ வக்க²தி, தஸ்மா ‘‘தம்தம்குஸலாதி³த⁴ம்மஸமுப்பத்தியா ப⁴க³வதா பஞ்ஞத்தா ஆபத்திஸம்முதி ஸமுட்டி²தா’’தி ச, ‘‘யாவ படிப்பஸ்ஸத்³தி⁴காரணா திட்ட²தீ’’தி ச, ‘‘படிப்பஸ்ஸத்³தி⁴காரணேஹி வினஸ்ஸதீ’’தி ச வோஹரீயதி. ஆபத்தியா ச ஸம்முதிஸபா⁴வத்தேபி ஹி ஸஞ்சிச்ச தம் ஆபஜ்ஜந்தஸ்ஸ, படிகிரியம் அகரோந்தஸ்ஸ ச அனாத³ரே அகுஸலராஸி சேவ ஸக்³க³மக்³க³ந்தராயோ ச ஹோதீதி லஜ்ஜினோ யதா²விதி⁴ம் நாதிக்கமந்தி, அனதிக்கமனப்பச்சயா ச தேஸம் அனந்தப்பபே⁴தா³ ஸீலாத³யோ த⁴ம்மா பரிவட்³ட⁴ந்தீதி க³ஹேதப்³ப³ம். த்³வத்திம்ஸேவாதி நியமோ ஆபத்தினிமித்தானம் காயவசீவிஞ்ஞத்தீனம் ஏதேஹேவ ஸமுப்பஜ்ஜனதோ கதோ, ந பன ஸப்³பா³பத்தீனம்பி ஏதேஹேவ ஸமுப்பஜ்ஜனதோ. நிபஜ்ஜித்வா நித்³தா³யந்தானஞ்ஹி ஜா²னனிரோத⁴ஸமாபன்னானஞ்ச அவிஞ்ஞத்திஜனகேஹி விபாகஅப்பனாசித்தேஹி சேவ ரூபத⁴ம்மேஹி ச ஸஹஸேய்யாதி³ஆபத்தி ஸம்ப⁴வதி.

த³ஸாதி கிரியாஹேதுகமனோவிஞ்ஞாணதா⁴துத்³வயேன ஸஹ அட்ட² மஹாகிரியசித்தானி. பஞ்ஞத்திம் அஜானித்வா இத்³தி⁴விகுப்³ப³னாதீ³ஸு அபி⁴ஞ்ஞானம் ஆபத்திஸமுட்டா²பகத்தம் வேதி³தப்³ப³ம். ஏத்த² ச கிஞ்சி ஸிக்கா²பத³ம் அகுஸலசித்தமேவ, கிஞ்சி குஸலாப்³யாகதவஸேன த்³விசித்தம், கிஞ்சி திசித்தந்தி அயமேவ பே⁴தோ³ லப்³ப⁴தி, நாஞ்ஞோதி வேதி³தப்³ப³ம். கிரியாஸமுட்டா²னந்தி பரூபக்கமேன ஜாயமானம் அங்க³ஜாதாதி³சலனம் ஸாதி³யனசித்தஸங்கா²தே ஸேவனசித்தே உப்பன்னே தேன சித்தேன ஸமுப்பாதி³தமேவ ஹோதீதி வுத்தம் இதரதா² ‘‘ஸியா கிரியஸமுட்டா²னம், ஸியா அகிரியஸமுட்டா²ன’’ந்தி வத்தப்³ப³தோ.

யம் பன ஸாரத்த²தீ³பனியம் (ஸாரத்த². டீ. பாராஜிககண்ட³ 2.66 பகிண்ணககதா²வண்ணனா) வுத்தம் ‘‘கிரியஸமுட்டா²னந்தி இத³ம் யேபு⁴ய்யவஸேன வுத்தம் பரூபக்கமே ஸதி ஸாதி³யந்தஸ்ஸ அகிரியஸமுட்டா²னபா⁴வதோ’’திஆதி³, தம் ந க³ஹேதப்³ப³ம் பட²மபாராஜிகஸ்ஸ அகிரியஸமுட்டா²னதாய பாளிஅட்ட²கதா²ஸு அவுத்தத்தா. ‘‘மனோத்³வாரே ஆபத்தி நாம நத்தீ²’’தி (கங்கா². அட்ட². பட²மபாராஜிகவண்ணனா; பாரா. அட்ட². 2.583-4) ஹி வுத்தம். கத²ஞ்ஹி நாம பரூபக்கமேன மேது²னம் ஸாதி³யந்தோ அத்தனோ அங்க³ஜாதாதி³காயசலனம் ந ஸாதி³யேய்ய, ஸாதி³யனசித்தானுகு³ணமேவ பன ஸகலஸரீரே சித்தஜரூபஸமுப்பத்தியா விஞ்ஞத்திபி ஸுகு²மா ஸமுப்பன்னா ஏவ ஹோதீதி த³ட்ட²ப்³ப³ம், தேனாஹ காயத்³வாரேனேவ ஸமுட்டா²னதோ காயகம்மந்திஆதி³. சித்தம் பனேத்த² அங்க³மத்தம் ஹோதீதி காயவிஞ்ஞத்தி ஏவ காயகம்மபா⁴வே காரணம், ந சித்தம். தம் பனேத்த² காயஸங்கா²தாய விஞ்ஞத்தியாயேவ அங்க³மத்தம், ந காயகம்மபா⁴வஸ்ஸ, இதரதா² மேது²னஸ்ஸ ‘‘மனோகம்ம’’ந்தி வத்தப்³ப³தோ, தேனாஹ ‘‘ந தஸ்ஸ வஸேன கம்மபா⁴வோ லப்³ப⁴தீ’’தி. கம்மபா⁴வோதி காயகம்மபா⁴வோ. ஸப்³ப³ஞ்சேதந்தி ஏதம் ஸமுட்டா²னாதி³கம். ஸிக்கா²பத³ஸீஸேனாதி தம்தம்ஸிக்கா²பத³னியதஆபத்தியா ஏவ க³ஹணத்த²ம் ஸிக்கா²பத³முகே²ன.

பகிண்ணககதா²வண்ணனானயோ நிட்டி²தோ.

வினீதவத்து²வண்ணனா

இத³ம் கிந்தி கதே²துகாமதாபுச்சா². இமாதிஆதி³ விஸ்ஸஜ்ஜனம். வினீதானி ஆபத்திம் த்வம் பி⁴க்கு² ஆபன்னோதிஆதி³னா (பாரா. 67) ப⁴க³வதா வினிச்சி²னிதானி வத்தூ²னி வினீதவத்தூ²னி. தம் தம் வத்து²ம் உத்³த⁴ரித்வா தா³னதோ த³ஸ்ஸனதோ உத்³தா³னபூ⁴தா கா³தா² உத்³தா³னகா³தா², ஸங்க³ஹகா³தா², உத்³தே³ஸகா³தா²தி வுத்தம் ஹோதி. வத்து² கா³தா²தி தேன கோ² பன ஸமயேன அஞ்ஞதரோ பி⁴க்கூ²திஆதி³கா வினீதவத்து²பாளியேவ தேஸம் தேஸம் வினீதவத்தூ²னம் க³ந்த²னதோ ‘‘வத்து²கா³தா²’’தி வுத்தா, ந ச²ந்தோ³விசிதிலக்க²ணேன. உத்³தா³னகா³தா²னம் வத்து² வத்து²கா³தா²தி ஏவம் வா ஏத்த² அத்தோ² த³ட்ட²ப்³போ³. ஏத்தா²தி வினீதவத்தூ²ஸு. து³தியாதீ³னந்தி து³தியபாராஜிகாதீ³னம். யம் பஸ்ஸித்வா சித்தகாராத³யோ ஸிப்பிகா சித்தகம்மாதீ³னி ஸிக்க²ந்தி, தம் படிச்ச²ன்னகரூபம், படிமாரூபந்தி அத்தோ².

67. புரிமானி த்³வேதி மக்கடீவஜ்ஜிபுத்தகவத்தூ²னி த்³வே. தானிபி ப⁴க³வதா வினீதபா⁴வேன புன வினீதவத்தூ²ஸு பக்கி²த்தானி. தத்த² தஸ்ஸ குக்குச்சம் அஹோஸீதிஆதி³ பன கிஞ்சாபி தேஸம் பட²மம் குக்குச்சம் ந உப்பன்னம், பி⁴க்கூ²ஹி பன ப⁴க³வதா ச க³ரஹித்வா வுத்தவசனம் ஸந்தா⁴ய பச்சா² உப்பன்னத்தம் ஸந்தா⁴ய வுத்தம். ப⁴க³வதோ ஏதமத்த²ம் ஆரோசேஸுந்திஆதி³ ச பி⁴க்கூ²ஹி ஆனந்த³த்தே²ரேன ச பட²மம் ப⁴க³வதோ ஆரோசிதே, ப⁴க³வதா ச தேஸம் பாராஜிகத்தே பகாஸிதே பீ⁴தா தே ஸயம்பி க³ந்த்வா அத்தனோ குக்குச்சம் பச்சா² ஆரோசேந்தி ஏவ. ‘‘ஸச்சம் கிர த்வ’’ந்திஆதி³னா ப⁴க³வதா புட்டா² பன ‘‘ஸச்சம் ப⁴க³வா’’தி படிஜானனவஸேனாபி ஆரோசேந்தி. ப⁴க³வாபி ஆபத்திம் த்வந்திஆதி³னா தேஸம் பாராஜிகத்தம் வினிச்சி²னோதி ஏவ. அனுபஞ்ஞத்திகதா²யம் பன தம் ஸப்³ப³ம் அவத்வா அனுபஞ்ஞத்தியா அனுகு³ணமேவ கிஞ்சிமத்தம் வுத்தம், இதா⁴பி தேஸம் வத்தூ²னம் ப⁴க³வதா வினீதபா⁴வத³ஸ்ஸனத்த²ம் ஏவம் வுத்தந்தி வேதி³தப்³ப³ம். கேசி இமம் அதி⁴ப்பாயம் அமனஸிகத்வா ‘‘அஞ்ஞானேவேதானி வத்தூ²னீ’’தி வத³ந்தி. குஸேதி குஸதிணானி. கேஸேஹீதி மனுஸ்ஸகேஸேஹி.

68. வண்ணபோக்க²ரதாயாதி ஏத்த² போக்க²லம் நாம ஸமித்³த⁴ம் ஸுந்த³ரஞ்ச, தஸ்ஸ பா⁴வோ ‘‘போக்க²ரதா’’தி ர-காரம் கத்வா வுத்தோ, ஸமித்³த⁴தா ஸுந்த³ரதாதி அத்தோ². பத⁴ம்ஸேஸீதி அபி⁴ப⁴வி. ந லிம்பதீதி ந அல்லீயதி.

69. ஏவரூபா பரிவத்தலிங்கா³ பி⁴க்கு²னியோ அத்த²தோ ஏகதோ உபஸம்பன்னாபி உப⁴தோஸங்கே⁴ உபஸம்பன்னாஸுயேவ ஸங்க³ய்ஹந்தி பி⁴க்கூ²பஸம்பதா³ய பி⁴க்கு²னீஉபஸம்பத³தோபி உக்கட்ட²த்தா. பாளியம் ‘‘தாஹி ஆபத்தீஹி அனாபத்தி’’ந்தி உபயோக³வசனம் கத்வா அனுஜானாமீதி பதே³ன ஸம்ப³ந்தி⁴தப்³ப³ம். இத்தி²லிங்க³ந்தி த²னாதி³கம் இத்தி²ஸண்டா²னம் வுத்தந்தி ஆஹ – ‘‘புரிஸ…பே… இத்தி²ஸண்டா²னம் உப்பன்ன’’ந்தி. தம் நானந்தரிகதோ பன ‘‘புரிஸிந்த்³ரியம்பி அந்தரஹிதம், இத்தி²ந்த்³ரியஞ்ச உப்பன்ன’’ந்தி வுத்தமேவ ஹோதி, ஏவம் உபரிபி லிங்க³க்³க³ஹணேனேவ இத்தி²ந்த்³ரியாதி³க்³க³ஹணம் வேதி³தப்³ப³ம். தாதி ஆபத்தியோ, தஸ்ஸ வுட்டா²துந்தி இமினா ஸம்ப³ந்தோ⁴, தாஹி ஆபத்தீஹி வுட்டா²பேதுந்தி அத்தோ². கத²ந்தி ஆஹ தா ஸப்³பா³பி பி⁴க்கு²னீஹி காதப்³ப³ந்திஆதி³. தேன படிச்ச²ன்னாயபி அப்படிச்ச²ன்னாயபி க³ருகாபத்தியா பக்க²மானத்தசரணாதி³கம் விதி⁴ம் த³ஸ்ஸேதி.

ஓக்கந்திகவினிச்ச²யோதி பஸங்கா³னுகு³ணம் ஓதரணகவினிச்ச²யோ. ப³லவஅகுஸலேனாதி பரதா³ரிககம்மாதி³னா. து³ப்³ப³லகுஸலேனாதி யதா²வுத்தப³லவாகுஸலோபஹதஸத்தினா ததோ ஏவ து³ப்³ப³லபூ⁴தேன குஸலேன. து³ப்³ப³லஅகுஸலேனாதி புரிஸபா⁴வுப்பாத³கப்³ரஹ்மசரியாதி³ப³லவகுஸலோபஹதஸத்தினா ததோ ஏவ து³ப்³ப³லபூ⁴தேன பரதா³ரிகாதி³அகுஸலேன. ஸுக³தியம் பா⁴வத்³வயஸ்ஸ குஸலகம்மஜத்தா அகுஸலேனேவ வினாஸோ குஸலேனேவ உப்பத்தீதி ஆஹ உப⁴யம்பீதிஆதி³. து³க்³க³தியம் பன அகுஸலேனேவ உபி⁴ன்னம்பி உப்பத்தி ச வினாஸோ ச, தத்த² து³ப்³ப³லப³லவபா⁴வோவ விஸேஸோ.

‘‘ஏஹி மயம் க³மிஸ்ஸாமா’’தி பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னக³மனே பாசித்தியாபத்திபரிஹாரத்த²ம் வுத்தம் ‘‘ஸம்வித³ஹனம் பரிமோசேத்வா’’தி. தேன ஏககா³மக்கே²த்தேபி ப³ஹிகா³மதோ அந்தரக⁴ரம் ஸம்விதா⁴ய க³மனம்பி ஆபத்திகரமேவாதி த³ஸ்ஸேதி. பரிமோசனவிதி⁴ம் த³ஸ்ஸேந்தோ ஆஹ மயந்திஆதி³. ப³ஹிகா³மேதி கா³மந்தரே. து³தியிகா பி⁴க்கு²னீ பக்கந்தா வா ஹோதீதிஆதி³னா (பாசி. 693) வுத்தஅனாபத்திலக்க²ணம் அனுலோமேதீதி வுத்தம் ‘‘கா³மந்தர…பே… அனாபத்தீ’’தி. கோபேத்வாதி பரிச்சஜித்வா. லஜ்ஜினியோ…பே… லப்³ப⁴தீதி லிங்க³பரிவத்தனது³க்க²பீளிதஸ்ஸ ஸங்க³ஹேபி அஸதி ஹீனாயாவத்தனம்பி ப⁴வேய்யாதி ‘‘ஆபதா³ஸூ’’தி வுத்தஅனாபத்திஅனுலோமேன வுத்தம். தாய து³தியிகம் க³ஹேத்வாவ க³ந்தப்³ப³ம். அலஜ்ஜினியோ…பே… லப்³ப⁴தீதி அலஜ்ஜினீஹி ஸத்³தி⁴ம் ஏககம்மாதி³ஸம்வாஸே ஆபத்திஸம்ப⁴வதோ தா அஸந்தபக்க²ம் ப⁴ஜந்தீதி வுத்தம், இமினாபேதம் வேதி³தப்³ப³ம் ‘‘அலஜ்ஜினீஹி ஸத்³தி⁴ம் பரிபோ⁴கோ³ ந வட்டதீ’’தி. யதி³ ஹி வட்டேய்ய, ததோபி து³தியிகம் வினா கா³மந்தரக³மனாதீ³ஸு ஆபத்தி ஏவ ஸியா ஸங்கா³ஹிகத்தா தாஸம் ஸங்கா³ஹிகலஜ்ஜினிக³ணதோ விய. ஞாதிகா ந ஹோந்தி…பே… வட்டதீதி வத³ந்தீதி இமினா அட்ட²கதா²ஸு அனாக³தபா⁴வம் தீ³பேதி. தத்தா²பி விஸ்ஸாஸிகஞாதிகபி⁴க்கு²னியோ வினா பி⁴க்கு²னிபா⁴வே அரமந்தஸ்ஸ மானபகதிகஸ்ஸ ஆபதா³ட்டா²னஸம்ப⁴வேன தம் வசனம் அப்படிக்கி²த்தம்பி தத³ஞ்ஞேஸம் ந வட்டதியேவாதி க³ஹேதப்³ப³ம். பி⁴க்கு²பா⁴வேபீதி பி⁴க்கு²காலேபி. தம் நிஸ்ஸாயாதி தம் நிஸ்ஸயாசரியம் கத்வா. உபஜ்ஜா² க³ஹேதப்³பா³தி உபஸம்பதா³க³ஹணத்த²ம் உபஜ்ஜா² க³ஹேதப்³பா³.

வினயகம்மந்தி விகப்பனம் ஸந்தா⁴ய வுத்தம். புன காதப்³ப³ந்தி புன விகப்பேதப்³ப³ம். புன படிக்³க³ஹேத்வா ஸத்தாஹம் வட்டதீதி ‘‘அனுஜானாமி, பி⁴க்க²வே, பி⁴க்கு²னீனம் ஸன்னிதி⁴ம் பி⁴க்கூ²ஹி, பி⁴க்கூ²னம் ஸன்னிதி⁴ம் பி⁴க்கு²னீஹி ச படிக்³கா³ஹாபேத்வா பரிபு⁴ஞ்ஜிது’’ந்தி (சூளவ. 421) வசனதோ புன படிக்³க³ஹேத்வா பரிபு⁴ஞ்ஜிதும் வட்டதீதி த³ஸ்ஸனத்த²ம் வுத்தம். ஸத்தமே தி³வஸேதி இத³ஞ்ச நிஸ்ஸக்³கி³யம் அனாபஜ்ஜித்வாவ புனபி ஸத்தாஹம் பரிபு⁴ஞ்ஜிதும் வட்டதீதி த³ஸ்ஸனத்த²ம் வுத்தம். பகதத்தோதி அபரிவத்தலிங்கோ³. ரக்க²தீதி தம் படிக்³க³ஹணவிஜஹனதோ ரக்க²தி, அவிப⁴த்ததாய படிக்³க³ஹணம் ந விஜஹதீதி அதி⁴ப்பாயோ.

ஸாமம் க³ஹேத்வான நிக்கி²பேய்யாதி ஸஹத்தே²ன படிக்³க³ஹேத்வான நிக்கி²பேய்ய. பரிபு⁴ஞ்ஜந்தஸ்ஸ ஆபத்தீதி லிங்க³பரிவத்தே ஜாதே புன அப்படிக்³க³ஹேத்வா பரிபு⁴ஞ்ஜந்தஸ்ஸ ஆபத்தி.

ஹீனாயாவத்தனேனாதி ஏத்த² கேசி ‘‘பகதத்தஸ்ஸ பி⁴க்கு²னோ ஸிக்க²ம் அப்பச்சக்கா²ய ‘கி³ஹீ ப⁴விஸ்ஸாமீ’தி கி³ஹிலிங்க³க்³க³ஹணம் ஹீனாயாவத்தன’’ந்தி வத³ந்தி, தம் ந யுத்தம் தத்தகேன பி⁴க்கு²பா⁴வஸ்ஸ அவிஜஹனதோ. அஞ்ஞே பன ‘‘பாராஜிகம் ஆபன்னஸ்ஸ பி⁴க்கு²படிஞ்ஞம் பஹாய கி³ஹிலிங்க³பா⁴வூபக³மனம்பி ஹீனாயாவத்தன’’ந்தி வத³ந்தி, தம் யுத்தமேவ. பாராஜிகம் ஆபன்னோ ஹி தம் படிச்சா²தே³த்வா யாவ பி⁴க்கு²படிஞ்ஞோ ஹோதி, தாவ பி⁴க்கு² ஏவ ஹோதி பி⁴க்கூ²னமேவ பாராஜிகஸ்ஸ பஞ்ஞத்தத்தா. ‘‘யோ பன பி⁴க்கூ²’’தி ஹி வுத்தம். ததா² ஹி ஸோ ஸம்வாஸம் ஸாதி³யந்தோபி தே²ய்யஸம்வாஸகோ ந ஹோதி, ஸஹஸேய்யாதி³ஆபத்திஞ்ச ந ஜனேதி, அத்தானம் ஓமஸந்தஸ்ஸ பாசித்தியஞ்ச ஜனேதி. வுத்தஞ்ஹி –

‘‘அஸுத்³தோ⁴ ஹோதி புக்³க³லோ அஞ்ஞதரம் பாராஜிகம் த⁴ம்மம் அஜ்ஜா²பன்னோ, தஞ்சே ஸுத்³த⁴தி³ட்டி² ஸமானோ ஓகாஸம் காராபேத்வா அக்கோஸாதி⁴ப்பாயோ வதே³தி, ஆபத்தி ஓமஸவாத³ஸ்ஸா’’தி (பாரா. 389).

ஏகே பன ‘‘பாராஜிகம் ஆபன்னானம் தோ³ஸம் படிஜானித்வா கி³ஹிலிங்க³க்³க³ஹணம் நாம ஸிக்கா²பச்சக்கா²னே ஸமோதா⁴னம் க³ச்ச²தி தேனாபி படிஞ்ஞாய பி⁴க்கு²பா⁴வஸ்ஸ விஜஹனதோ. தேனேவ வினயவினிச்ச²யாதீ³ஸு ஹீனாயாவத்தனம் ஸிக்கா²பச்சக்கா²னே ஸமோதா⁴னேத்வா விஸும் தம் ந வுத்தம். தஸ்மா பி⁴க்கு²னீனம் விப்³ப⁴மிதுகாமதாய கி³ஹிலிங்க³க்³க³ஹணம் இத⁴ ஹீனாயாவத்தனம் தாஸம் ஸிக்கா²பச்சக்கா²னஸ்ஸ அபா⁴வதோ. தாஸம் படிக்³க³ஹணவிஜஹனஸ்ஸாபி ஸப்³ப³ஸோ வத்தப்³ப³த்தா’’தி வத³ந்தி, தம்பி அப்படிபா³ஹியமேவ. தஸ்மா பாராஜிகானம் பி⁴க்கு²னீனஞ்ச ‘‘உப்பப்³ப³ஜிஸ்ஸாமீ’’தி கி³ஹிலிங்க³க்³க³ஹணம் ஹீனாயாவத்தனந்தி க³ஹேதப்³ப³ம். விப்³ப⁴மோதிபி ஏதஸ்ஸேவ நாமம், தேனேவ தம் கு²த்³த³ஸிக்கா²யம் ‘‘அச்சே²த³விஸ்ஸஜ்ஜனகா³ஹவிப்³ப⁴மா’’தி அதி⁴ட்டா²னவிஜஹனே விப்³ப⁴மனாமேன வுத்தம்.

அனபேக்க²விஸ்ஸஜ்ஜனேனாதி அஞ்ஞஸ்ஸ அத³த்வாவ அனத்தி²கஸ்ஸேவ படிக்³க³ஹிதவத்தூ²னம் ப³ஹி ச²ட்³ட³னேன. கேசி ‘‘படிக்³க³ஹிதவத்தூ²ஸு ஸாபேக்க²ஸ்ஸ புரே படிக்³க³ஹிதபா⁴வதோ பரிமோசனத்த²ம் தத்த² படிக்³க³ஹமத்தஸ்ஸ விஸ்ஸஜ்ஜனம்பி அனபேக்க²விஸ்ஸஜ்ஜனமேவ சீவராதி³அதி⁴ட்டா²னபச்சுத்³தா⁴ரோ வியா’’தி வத³ந்தி, தம் ந ஸுந்த³ரம் ததா²வசனாபா⁴வா. யதே²வ ஹி சீவராதீ³ஸு அனபேக்க²விஸ்ஸஜ்ஜனேன அதி⁴ட்டா²னவிஜஹனம் வத்வாபி விஸும் பச்சுத்³தா⁴ரோ ச வுத்தோ, ஏவமிதா⁴பி வத்தப்³ப³ம், யதா² ச சீவராதீ³ஸு காயபடிப³த்³தே⁴ஸுபி பச்சுத்³தா⁴ரேன அதி⁴ட்டா²னம் விக³ச்ச²தி, ந ஏவமித⁴. இத⁴ பன படிக்³க³ஹிதவத்து²ஸ்மிம் அனபேக்க²ஸ்ஸாபி காயதோ முத்தேயேவ தஸ்மிம் படிக்³க³ஹணம் விஜஹதி. ததா² ஹி வுத்தம் ‘‘ஸதக்க²த்தும்பி பரிச்சஜது, யாவ அத்தனோ ஹத்த²க³தம் படிக்³க³ஹிதமேவா’’தி. அனபேக்க²விஸ்ஸஜ்ஜனேனாதி ஏத்த² ச ‘‘அனபேக்கா²யா’’தி ஏத்தகமேவ வத்தப்³ப³ம் அனபேக்க²தம் முஞ்சித்வா இத⁴ விஸும் விஸ்ஸஜ்ஜனஸ்ஸ அபா⁴வா. ந ஹேத்த² பச்சுத்³தா⁴ரே விய விஸ்ஸஜ்ஜனவிதா⁴னமத்தி². அபிச படிக்³க³ஹணமத்தவிஸ்ஸஜ்ஜனே ஸதி புரே படிக்³க³ஹிதோபி ஆஹாரோ பு⁴ஞ்ஜிதுகம்யதாய உப்பன்னாய படிக்³க³ஹணமத்தம் விஸ்ஸஜ்ஜேத்வா புன படிக்³க³ஹேத்வா யதா²ஸுக²ம் பு⁴ஞ்ஜிதப்³போ³ ஸியாதி, ததா² ச ஸன்னிதி⁴காரகஸிக்கா²பதே³ வுத்தா ஸப்³பா³பி வினிச்ச²யபே⁴தா³ நிரத்த²கா ஏவ ஸியும். வுத்தஞ்ஹி தத்த² –

‘‘க³ண்டி²கபத்தஸ்ஸ வா க³ண்டி²கந்தரே ஸ்னேஹோ பவிட்டோ² ஹோதி…பே… தாதி³ஸே பத்தேபி புனதி³வஸே பு⁴ஞ்ஜந்தஸ்ஸ பாசித்திய’’ந்திஆதி³ (பாசி. அட்ட². 253).

தத்த² பன ‘‘படிக்³க³ஹணம் அனபேக்க²சித்தேன விஸ்ஸஜ்ஜேத்வா பு⁴ஞ்ஜிதப்³ப³’’ந்தி ஏத்தகமேவ வத்தப்³ப³ம், ந ச வுத்தம். கத்த²சி ஈதி³ஸேஸு ச க³ண்டி²கபத்தாதீ³ஸு படிக்³க³ஹணே அபேக்கா² கஸ்ஸசிபி நத்தே²வ தப்பஹானாய வாயாமதோ, ததா²பி தத்த²க³தஆமிஸே படிக்³க³ஹணம் ந விக³ச்ச²தி. கஸ்மா? பி⁴க்கு²ஸ்ஸ பத்தே புன பு⁴ஞ்ஜிதுகாமதாபேக்கா²ய விஜ்ஜமானத்தா பத்தக³திகே ஆஹாரேபி தஸ்ஸா வத்தனதோ. ந ஹி பத்தம் அவிஸ்ஸஜ்ஜேத்வா தக்³க³திகம் ஆஹாரம் விஸ்ஸஜ்ஜேதும் ஸக்கா, நாபி ஆஹாரம் அவிஸ்ஸஜ்ஜேத்வா தக்³க³திகம் படிக்³க³ஹணம் விஸ்ஸஜ்ஜேதும். தஸ்மா வத்து²னோ விஸ்ஸஜ்ஜனமேவ அனபேக்க²விஸ்ஸஜ்ஜனம், ந படிக்³க³ஹணஸ்ஸாதி நிட்ட²மேத்த² க³ந்தப்³ப³ம். தேனேவ ஸன்னிதி⁴ஸிக்கா²பத³ஸ்ஸ அனாபத்திவாரே –

‘‘அந்தோஸத்தாஹம் அதி⁴ட்டே²தி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸம் க³ண்ஹந்தி, அனுபஸம்பன்னஸ்ஸ சத்தேன வந்தேன முத்தேன அனபேக்கோ² த³த்வா படிலபி⁴த்வா பரிபு⁴ஞ்ஜதீ’’தி –

ஏவம் ஸப்³ப³த்த² வத்து²விஸ்ஸஜ்ஜனமேவ வுத்தம். ஏத்த² ச ‘‘அந்தோஸத்தாஹம் அதி⁴ட்டே²தீ’’தி பா³ஹிரபரிபோ⁴கா³ய அதி⁴ட்டா²னவசனதோ வத்து²ம் அவிஸ்ஸஜ்ஜேத்வாபி கேவலம் அனஜ்ஜோ²ஹரிதுகாமதாய ஸுத்³த⁴சித்தேன பா³ஹிரபரிபோ⁴க³த்தா²ய நியமனம்பி விஸும் ஏகம் படிக்³க³ஹணவிஜஹனகாரணமேவ, இத³ஞ்ச ஸந்தா⁴ய படிக்³க³ஹணமத்தவிஸ்ஸஜ்ஜனம் வுத்தம் ஸியா, ஸுவுத்தமேவ ஸியா, ததா² ச ‘‘புன படிக்³க³ஹேத்வா பரிபு⁴ஞ்ஜிஸ்ஸாமீ’’தி படிக்³க³ஹணவிஸ்ஸஜ்ஜனம் ந வத்தப்³ப³ம் ஸியா பா³ஹிரபரிபோ⁴கா³தி⁴ட்டா²னஸ்ஸ இதா⁴தி⁴ப்பேதத்தா.

ஸாரத்த²தீ³பனியஞ்ஹி (ஸாரத்த². தீ³. பாராஜிககண்ட³ 2.69) ‘‘அனபேக்க²விஸ்ஸஜ்ஜனேனாதி ஏத்த² அஞ்ஞஸ்ஸ அத³த்வாவ அனத்தி²கதாய ‘நத்தி² இமினா கம்மம் ந தா³னி நம் பரிபு⁴ஞ்ஜிஸ்ஸாமீ’தி வத்தூ²ஸு வா, ‘புன படிக்³க³ஹேத்வா படிபு⁴ஞ்ஜிஸ்ஸாமீ’தி படிக்³க³ஹணே வா அனபேக்க²விஸ்ஸஜ்ஜனேனா’’தி ஏவம் பரிபு⁴ஞ்ஜிதுகாமஸ்ஸேவ படிக்³க³ஹணமத்தவிஸ்ஸஜ்ஜனம்பி படிக்³க³ஹணவிஜஹனகாரணம் வுத்தம், தம் ந க³ஹேதப்³ப³ம். புரிமமேவ பன பா³ஹிரபரிபோ⁴கா³தி⁴ட்டா²னம் க³ஹேதப்³ப³ம். இத³ம் பன அட்ட²கதா²ஸு ‘‘அனபேக்க²விஸ்ஸஜ்ஜனஸங்கா²தே விஸ்ஸஜ்ஜேதீ’’தி வுத்தபாளிபத³த்தே² ஸங்க³ஹேத்வா விஸும் ந வுத்தம். நஸ்ஸதி, வினஸ்ஸதி, ட³ய்ஹதி, விஸ்ஸாஸம் வா க³ண்ஹந்தீதி இமானி பன பதா³னி அச்சி²ந்தி³த்வா க³ண்ஹந்தீதி இமஸ்மிம் பதே³ ஸங்க³ஹிதானீதி வேதி³தப்³ப³ம்.

அச்சி²ந்தி³த்வா க³ஹணேனாதி அனுபஸம்பன்னானம் ப³லக்காராதி³னா அச்சி²ந்தி³த்வா க³ஹணேன. உபஸம்பன்னானஞ்ஹி அச்சி²ந்த³னவிஸ்ஸாஸக்³கா³ஹேஸு படிக்³க³ஹணம் ந விஜஹதி. ஏத்தா²தி பி⁴க்கு²விஹாரே. உபரோபகாதி தேன ரோபிதா ருக்க²க³ச்சா². தேரஸஸு ஸம்முதீஸூதி ப⁴த்துத்³தே³ஸகஸேனாஸனபஞ்ஞாபகப⁴ண்டா³கா³ரிகசீவரபடிக்³கா³ஹகசீவரபா⁴ஜகயாகு³பா⁴ஜகப²லபா⁴ஜகக²ஜ்ஜபா⁴ஜகஅப்பமத்தகவிஸ்ஸஜ்ஜகஸாதி³யகா³ஹாபகபத்தகா³ஹாபகஆராமிகபேஸகஸாமணேரபேஸகஸம்முதிஸங்கா²தாஸு தேரஸஸு ஸம்முதீஸு.