2. து³தியபாராஜிகம்

அது³தியேனாதி அஸதி³ஸேன ஜினேன யம் து³தியம் பாராஜிகம் பகாஸிதம், தஸ்ஸ இதா³னி யஸ்மா ஸம்வண்ணனாக்கமோ பத்தோ, தஸ்மா அஸ்ஸ து³தியஸ்ஸ அயம் ஸம்வண்ணனா ஹோதீதி யோஜனா.

த⁴னியவத்து²வண்ணனா

84. ராஜூஹி க³ஹிதந்தி ராஜக³ஹந்தி ஆஹ ‘‘மந்தா⁴தூ’’தி. ராஜபுரோஹிதேன பரிக்³க³ஹிதம்பி ராஜபரிக்³க³ஹிதமேவாதி மஹாகோ³விந்த³க்³க³ஹணம், நக³ரஸத்³தா³பேக்கா²ய சேத்த² ‘‘ராஜக³ஹ’’ந்தி நபும்ஸகனித்³தே³ஸோ. அஞ்ஞேபேத்த² பகாரேதி ஸுஸம்விஹிதாரக்க²த்தா ராஜூனம் க³ஹம் கே³ஹபூ⁴தந்தி ராஜக³ஹந்திஆதி³கே பகாரே. வஸந்தவனந்தி கீளாவனம், வஸந்தகாலே கீளாய யேபு⁴ய்யத்தா பன வஸந்தவனந்தி வுத்தம்.

ஸத்³வாரப³ந்தா⁴தி வஸ்ஸூபக³மனயோக்³க³தாத³ஸ்ஸனம். நாலகபடிபத³ந்தி ஸுத்தனிபாதே (ஸு. நி. 684 ஆத³யோ) நாலகத்தே²ரஸ்ஸ தே³ஸிதம் மோனேய்யபடிபத³ம். பஞ்சன்னம் ச²த³னானந்தி திணபண்ணஇட்ட²கஸிலாஸுதா⁴ஸங்கா²தானம் பஞ்சன்னம். நோ சே லப⁴தி…பே… ஸாமம்பி காதப்³ப³ந்தி இமினா நாவாஸத்த²வஜே ட²பேத்வா அஞ்ஞத்த² ‘‘அஸேனாஸனிகோ அஹ’’ந்தி ஆலயகரணமத்தேன உபக³மனம் ந வட்டதி. ஸேனாஸனம் பரியேஸித்வா வசீபே⁴த³ம் கத்வா வஸ்ஸம் உபக³ந்தப்³ப³மேவாதி த³ஸ்ஸேதி. ‘‘ந, பி⁴க்க²வே, அஸேனாஸனிகேனா’’திஆதி³னா (மஹாவ. 204) ஹி பாளியம் ‘‘நாலகபடிபத³ம் படிபன்னேனாபீ’’தி அட்ட²கதா²யஞ்ச அவிஸேஸேன த³ள்ஹம் கத்வா வுத்தம், நாவாஸத்த²வஜேஸுயேவ ச ‘‘அனுஜானாமி, பி⁴க்க²வே, நாவாய வஸ்ஸம் உபக³ந்து’’ந்திஆதி³னா (மஹாவ. 203) அஸதிபி ஸேனாஸனே ஆலயகரணவஸேன வஸ்ஸூபக³மனம் அனுஞ்ஞாதம், நாஞ்ஞத்தா²தி க³ஹேதப்³ப³ம். அயமனுத⁴ம்மதாதி ஸாமீசிவத்தம். கதிகவத்தானீதி ப⁴ஸ்ஸாராமதாதி³ம் விஹாய ஸப்³ப³தா³ அப்பமத்தேஹி ப⁴விதப்³ப³ந்திஆதி³கதிகவத்தானி. க²ந்த⁴கவத்தானீதி ‘‘ஆக³ந்துகாதி³க²ந்த⁴கவத்தம் பூரேதப்³ப³’’ந்தி ஏவம் க²ந்த⁴கவத்தானி ச அதி⁴ட்ட²ஹித்வா.

வஸ்ஸம்வுத்தா²தி பத³ஸ்ஸ அட்ட²கதா²யம் ‘‘புரிமிகாய உபக³தா மஹாபவாரணாய பவாரிதா பாடிபத³தி³வஸதோ பட்டா²ய ‘வுத்த²வஸ்ஸா’தி வுச்சந்தீ’’தி வுத்தத்தா மஹாபவாரணாதி³வஸே பவாரேத்வா வா அப்பவாரேத்வா வா அஞ்ஞத்த² க³ச்ச²ந்தேஹி ஸத்தாஹகரணீயனிமித்தே ஸதி ஏவ க³ந்தப்³ப³ம், நாஸதி, இதரதா² வஸ்ஸச்சே²தோ³ து³க்கடஞ்ச ஹோதீதி வேதி³தப்³ப³ம். ‘‘இமம் தேமாஸம் வஸ்ஸம் உபேமீ’’தி ஹி ‘‘ந, பி⁴க்க²வே, வஸ்ஸம் உபக³ந்த்வா புரிமம் வா தேமாஸம் பச்சி²மம் வா தேமாஸம் அவஸித்வா சாரிகா பக்கமிதப்³பா³’’தி (மஹாவ. 185) ச வுத்தம். இதே⁴வ ச வஸ்ஸம்வுத்தா² தேமாஸச்சயேன…பே… பக்கமிம்ஸூதி வுத்தம். பவாரணாதி³வஸோபி தேமாஸபரியாபன்னோவ. கேசி பன ‘‘அனுஜானாமி, பி⁴க்க²வே, வஸ்ஸம்வுத்தா²னம் பி⁴க்கூ²னம் தீஹி டா²னேஹி பவாரேதுந்தி (மஹாவ. 209) பவாரணாகம்மஸ்ஸ புப்³பே³யேவ வஸ்ஸம்வுத்தா²னந்தி வுத்த²வஸ்ஸதாய வுத்தத்தா மஹாபவாரணாதி³வஸே ஸத்தாஹகரணீயனிமித்தம் வினாபி யதா²ஸுக²ம் க³ந்தும் வட்டதீ’’தி வத³ந்தி, தம் தேஸம் மதிமத்தம், வுத்த²வஸ்ஸானஞ்ஹி பவாரணானுஜானனம் அனுபக³தசி²ன்னவஸ்ஸாதீ³னம் நிவத்தனத்த²ம் கதம், ந பன பவாரணாதி³வஸே அவஸித்வா பக்கமிதப்³ப³ந்தி த³ஸ்ஸனத்த²ம் தத³த்த²ஸ்ஸ இத⁴ பஸங்கா³பா⁴வா, பவாரணம் காதும் அனுச்ச²விகானம் பவாரணா இத⁴ விதீ⁴யதி, யே ச வஸ்ஸம் உபக³ந்த்வா வஸ்ஸச்சே²த³ஞ்ச அகத்வா யாவ பவாரணாதி³வஸா வஸிம்ஸு, தே தத்தகேன பவாரணாகம்மம் பதி பரியாயதோ வுத்த²வஸ்ஸாதி வுச்சந்தி, அப்பகம் ஊனமதி⁴கம் வா க³ணனூபக³ம் ந ஹோதீதி ஞாயதோ, ந கதி²னகம்மம் பதி தேமாஸஸ்ஸ அபரிபுண்ணத்தா, இதரதா² தஸ்மிம் மஹாபவாரணாதி³வஸேபி கதி²னத்தா²ரப்பஸங்க³தோ. ‘‘அனுஜானாமி, பி⁴க்க²வே, வஸ்ஸம்வுத்தா²னம் பி⁴க்கூ²னம் கதி²னம் அத்த²ரிது’’ந்தி (மஹாவ. 306) இத³ம் பன ‘‘ந, பி⁴க்க²வே, வஸ்ஸம் உபக³ந்த்வா புரிமம் வா தேமாஸம் பச்சி²மம் வா தேமாஸம் அவஸித்வா சாரிகா பக்கமிதப்³பா³’’திஆதி³ (மஹாவ. 185) ச நிப்பரியாயதோ மஹாபவாரணாய அனந்தரபாடிபத³தி³வஸதோ பட்டா²ய கதி²னத்தா²ரம் பக்கமனஞ்ச ஸந்தா⁴ய வுத்தம், பரிவாரே ச ‘‘கதி²னஸ்ஸ அத்தா²ரமாஸோ ஜானிதப்³போ³’’தி (பரி. 412) வத்வா ‘‘வஸ்ஸானஸ்ஸ பச்சி²மோ மாஸோ ஜானிதப்³போ³’’தி (பரி. 412) வுத்தம். யோ ஹி கதி²னத்தா²ரஸ்ஸ காலோ, ததோ பட்டா²யேவ சாரிகாபக்கமனஸ்ஸாபி காலோ, ந ததோ புரே வஸ்ஸம்வுத்தா²னம்யேவ கதி²னத்தா²ராரஹத்தா. யத³க்³கே³ன ஹி பவாரணாதி³வஸே கதி²னத்தா²ரோ ந வட்டதி, தத³க்³கே³ன பி⁴க்கூ²பி வுத்த²வஸ்ஸா ந ஹோந்தி பவாரணாதி³வஸஸ்ஸ அவுத்த²த்தா.

யம் பன ஸாரத்த²தீ³பனியம் (ஸாரத்த². டீ. பாராஜிககண்ட³ 2.84) ‘‘ஏகதே³ஸேன அவுத்த²ம்பி தம் தி³வஸம் வுத்த²பா⁴கா³பேக்கா²ய வுத்த²மேவ ஹோதீ’’திஆதி³ வுத்தம், தம் ந யுத்தம், தம்தி³வஸபரியோஸானே அருணுக்³க³மனகாலே வஸந்தோவ ஹி தம் தி³வஸம் வுத்தோ² நாம ஹோதி பரிவாஸஅரஞ்ஞவாஸாதீ³ஸு விய, அயஞ்ச விசாரணா உபரி வஸ்ஸூபனாயிகக்க²ந்த⁴கே ஆவி ப⁴விஸ்ஸதீதி தத்தே²வ தம் பாகடம் கரிஸ்ஸாம.

மஹாபவாரணாய பவாரிதாதி புரிமிகாய வஸ்ஸம் உபக³ந்த்வா அச்சி²ன்னவஸ்ஸதாத³ஸ்ஸனபரம் ஏதம் கேனசி அந்தராயேன அப்பவாரிதானம்பி வுத்த²வஸ்ஸத்தா. ந ஓவஸ்ஸியதீதி அனோவஸ்ஸகந்தி கம்மஸாத⁴னம் த³ட்ட²ப்³ப³ம், யதா² ந தேமியதி, ததா² கத்வாதி அத்தோ². அனவயோதி ஏத்த² அனுஸத்³தோ³ விச்சா²யம் வத்ததீதி ஆஹ அனு அனு அவயோதிஆதி³. ஆசரியஸ்ஸ கம்மம் ஆசரியகந்தி ஆஹ ‘‘ஆசரியகம்மே’’தி. கட்ட²கம்மம் த²ம்பா⁴தி³. தேலதம்ப³மத்திகாயாதி தேலமிஸ்ஸாய தம்ப³மத்திகாய.

85. குடிகாய கரணபா⁴வந்தி குடியா கதபா⁴வம். கிம்-ஸத்³த³ப்பயோகே³ அனாக³தப்பச்சயவிதா⁴னம் ஸந்தா⁴ய தஸ்ஸ லக்க²ணந்திஆதி³ வுத்தம். கிஞ்சாபி தே²ரஸ்ஸ பாணகா⁴தாதி⁴ப்பாயோ நத்தி², அனுபபரிக்கி²த்வா கரணேன பன ப³ஹூனம் பாணானம் மரணத்தா பாணே ப்³யாபா³தே⁴ந்தஸ்ஸாதிஆதி³ வுத்தம். பாதப்³யபா⁴வந்தி வினாஸேதப்³ப³தம். பாணாதிபாதம் கரோந்தானந்தி தே²ரேன அகதேபி பாணாதிபாதே பாணகானம் மரணமத்தேன பச்சி²மானம் லேஸேன க³ஹணாகாரம் த³ஸ்ஸேதி, தேன ச ‘‘மம தாதி³ஸம் அகுஸலம் நத்தீ²’’தி பச்சி²மானம் விபல்லாஸலேஸக்³க³ஹணனிமித்தகிச்சம் ந கத்தப்³ப³ந்தி தீ³பிதம் ஹோதி. தி³ட்டா²னுக³திந்தி தி³ட்ட²ஸ்ஸ கம்மஸ்ஸ அனுபக³மனம் அனுகிரியம், தி³ட்டி²யா வா லத்³தி⁴யா அனுக³மனம் கா³ஹம். க⁴ம்ஸிதப்³பே³தி மத்³தி³தப்³பே³, வினாஸிதப்³பே³தி அத்தோ². கதம் லபி⁴த்வா தத்த² வஸந்தானம்பி து³க்கடமேவாதி இத³ம் ப⁴க³வதா குடியா பே⁴தா³பனவசனேன ஸித்³த⁴ம், ஸாபி திணத³ப்³ப³ஸம்பா⁴ரேஹி துலாத²ம்பா⁴தீ³ஹி அமிஸ்ஸா ஸுத்³த⁴மத்திகாமயாபி இட்ட²காஹி கதா வட்டதி. கேசி ஹி இட்ட²காஹியேவ த²ம்பே⁴ சினித்வா தது³பரி இட்ட²காஹியேவ விதானாதி³ஸண்டா²னேன துலாதி³தா³ருஸம்பா⁴ரவிரஹிதம் ச²த³னம்பி ப³ந்தி⁴த்வா இட்ட²காமயமேவ ஆவஸத²ம் கரோந்தி, தாதி³ஸம் வட்டதி. கி³ஞ்ஜகாவஸத²ஸங்கே²பேன கதாதி ஏத்த² கி³ஞ்ஜகா வுச்சந்தி இட்ட²கா, தாஹியேவ கதோ ஆவஸதோ² கி³ஞ்ஜகாவஸதோ². வயகம்மம்பீதி மத்திகுத்³தா⁴ரணஇட்ட²கதா³ருச்சே²த³னாதி³காரகானம் தி³ன்னப⁴த்தவேத்தனாதி³வத்து²ப்³ப³யேன நிப்ப²ன்னகம்மம்பி அத்தி², ஏதேன குடிபே⁴த³கானம் கீ³வாதி³பா⁴வம் பரிஸங்கதி. தித்தி²யத⁴ஜோதி தித்தி²யானமேவ ஸஞ்ஞாணபூ⁴தத்தா வுத்தம். தே ஹி ஈதி³ஸேஸு சாடிஆதீ³ஸு வஸந்தி. அஞ்ஞானிபீதி பி-ஸத்³தே³ன அத்தனா வுத்தகாரணத்³வயம்பி மஹாஅட்ட²கதா²யமேவ வுத்தந்தி த³ஸ்ஸேதி. யஸ்மா ஸப்³ப³மத்திகாமயா குடி ஸீதகாலே அதிஸீதா உண்ஹகாலே ச உண்ஹா ஸுகரா ச ஹோதி சோரேஹி பி⁴ந்தி³தும், தஸ்மா தத்த² ட²பிதபத்தசீவராதி³கம் ஸீதுண்ஹசோராதீ³ஹி வினஸ்ஸதீதி வுத்தம் ‘‘பத்தசீவரகு³த்தத்தா²யா’’தி. சி²ந்தா³பேய்ய வா பி⁴ந்தா³பேய்ய வா அனுபவஜ்ஜோதி இத³ம் அயம் குடி விய ஸப்³ப³தா² அனுபயோகா³ரஹம் ஸந்தா⁴ய வுத்தம். யம் பன பஞ்சவண்ணஸுத்தேஹி வினத்³த⁴ச²த்தாதி³கம், தத்த² அகப்பியபா⁴கோ³வ சி²ந்தி³தப்³போ³, ந தத³வஸேஸோ தஸ்ஸ கப்பியத்தா, தம் சி²ந்த³ந்தோ உபவஜ்ஜோவ ஹோதி. தேனேவ வக்க²தி ‘‘க⁴டகம்பி வாளரூபம்பி பி⁴ந்தி³த்வா தா⁴ரேதப்³ப³’’ந்திஆதி³.

பாளிமுத்தகவினிச்ச²யவண்ணனா

ச²த்தத³ண்ட³க்³கா³ஹகம் ஸலாகபஞ்ஜரந்தி ஏத்த² யோ பஞ்ஜரஸலாகானம் மஜ்ஜ²ட்டோ² பு³ந்தே³ புது²லோ அஹிச்ச²த்தகஸதி³ஸோ அக்³கே³ ஸசி²த்³தோ³ யத்த² த³ண்ட³ந்தரம் பவேஸேத்வா ச²த்தம் க³ண்ஹந்தி, யோ வா ஸயமேவ தீ³க⁴தாய க³ஹணத³ண்டோ³ ஹோதி, அயம் ச²த்தத³ண்டோ³ நாம, தஸ்ஸ அபரிக³ளனத்தா²ய ச²த்தஸலாகானம் மூலப்பதே³ஸத³ண்ட³ஸ்ஸ ஸமந்ததோ த³ள்ஹபஞ்ஜரம் கத்வா ஸுத்தேஹி வினந்த⁴ந்தி, ஸோ பதே³ஸோ ச²த்தத³ண்ட³கா³ஹகஸலாகபஞ்ஜரம் நாம, தம் வினந்தி⁴தும் வட்டதி. ந வண்ணமட்ட²த்தா²யாதி இமினா தி²ரகரணத்த²மேவ ஏகவண்ணஸுத்தேன வினந்தி⁴யமானம் யதி³ வண்ணமட்ட²ம் ஹோதி, ந தத்த² தோ³ஸோதி த³ஸ்ஸேதி. ஆரக்³கே³னாதி நிகா²த³னமுகே²ன. த³ண்ட³பு³ந்தே³தி த³ண்ட³மூலே கோடியம். ச²த்தமண்ட³லிகந்தி ச²த்தபஞ்ஜரே மண்ட³லாகாரேன ப³த்³த⁴த³ண்ட³வலயம். உக்கிரித்வாதி நின்னம், உன்னதம் வா கத்வா.

நானாஸுத்தகேஹீதி நானாவண்ணேஹி ஸுத்தேஹி. இத³ஞ்ச ததா² கரோந்தானம் வஸேன வுத்தம், ஏகவண்ணஸுத்தகேனாபி ந வட்டதியேவ, ‘‘பகதிஸூசிகம்மமேவ வட்டதீ’’தி ஹி வுத்தம். பட்டமுகே²தி த்³வின்னம் பட்டானம் ஸங்க⁴டிதட்டா²னம் ஸந்தா⁴யேதம் வுத்தம். பரியந்தேதி சீவரபரியந்தே, அனுவாதம் ஸந்தா⁴யேதம் வுத்தம். வேணிந்தி வரகஸீஸாகாரேன ஸிப்³ப³னம். ஸங்க²லிகந்தி தி³கு³ணஸங்க²லிகாகாரேன ஸிப்³ப³னம், வேணிம் வா ஸங்க²லிகம் வா கரோந்தீதி பகதேன ஸம்ப³ந்தோ⁴. அக்³கி⁴யம் நாம சேதியஸண்டா²னம், யம் அக்³கி⁴யத்த²ம்போ⁴தி வத³ந்தி. உக்கிரந்தீதி உட்ட²பேந்தி. சதுகோணமேவ வட்டதீதி க³ண்டி²கபாஸகபட்டானி ஸந்தா⁴ய வுத்தம். கோணஸுத்தபிளகாதி க³ண்டி²கபாஸகபட்டானம் கோணேஹி ப³ஹி நிக்³க³தஸுத்தானம் பிளகாகாரேன ட²பிதகோடியோதி கேசி வத³ந்தி, தே பிளகே சி²ந்தி³த்வா து³விஞ்ஞேய்யா காதப்³பா³தி தேஸம் அதி⁴ப்பாயோ. கேசி பன ‘‘கோணஸுத்தா ச பிளகாதி த்³வேயேவா’’தி வத³ந்தி, தேஸம் மதேன க³ண்டி²கபாஸகபட்டானம் கோணதோ கோணேஹி நீஹதஸுத்தா கோணஸுத்தா நாம. ஸமந்ததோ பன பரியந்தேன கதா சதுரஸ்ஸஸுத்தா பிளகா நாம. தம் து³வித⁴ம்பி கேசி சீவரதோ விஸும் பஞ்ஞாயனத்தா²ய விகாரயுத்தம் கரோந்தி, தம் நிஸேதா⁴ய ‘‘து³விஞ்ஞேய்யரூபா வட்டந்தீ’’தி வுத்தம், ந பன ஸப்³ப³தா² அசக்கு²கோ³சரபா⁴வேன ஸிப்³ப³னத்தா²ய ததா²ஸிப்³ப³னஸ்ஸ அஸக்குணேய்யத்தா. யதா² பகதிசீவரதோ விகாரோ ந பஞ்ஞாயதி, ஏவம் ஸிப்³பி³தப்³ப³ந்தி அதி⁴ப்பாயோ. ரஜனகம்மதோ புப்³பே³ பஞ்ஞாயமானோபி விஸேஸோ சீவரே ரத்தே ஏகவண்ணதாய ந பஞ்ஞாயதீதி ஆஹ ‘‘சீவரே ரத்தே’’தி. மணினாதி நீலமணிஆதி³மட்ட²பாஸாணேன, அம்ஸவத்³த⁴ககாயப³ந்த⁴னாதி³கம் பன அசீவரத்தா ஸங்கா²தீ³ஹி க⁴ம்ஸிதும் வட்டதீதி வத³ந்தி. கண்ணஸுத்தகந்தி சீவரஸ்ஸ தீ³க⁴தோ திரியஞ்ச ஸிப்³பி³தானம் சதூஸு கண்ணேஸு கோணேஸு ச நிக்க²ந்தானம் ஸுத்தஸீஸானமேதம் நாமம், தம் சி²ந்தி³த்வாவ பாருபிதப்³ப³ம், தேனாஹ ‘‘ரஜிதகாலே சி²ந்தி³தப்³ப³’’ந்தி. ப⁴க³வதா அனுஞ்ஞாதம் ஏகம் கண்ணஸுத்தம்பி அத்தி², தம் பன நாமேன ஸதி³ஸம்பி இதோ அஞ்ஞமேவாதி த³ஸ்ஸேதும் யம் பனாதிஆதி³ வுத்தம். லக்³க³னத்தா²யாதி சீவரரஜ்ஜுயம் சீவரப³ந்த⁴னத்தா²ய. க³ண்டி²கேதி த³ந்தாதி³மயே. பீளகாதி பி³ந்து³ம் பி³ந்து³ம் கத்வா உட்டா²பேதப்³ப³பீளகா.

தா²லகே வாதி தம்பா³தி³மயே புக்³க³லிகே திவிதே⁴பி கப்பியதா²லகே. ந வட்டதீதி மணிவண்ணகரணப்பயோகோ³ ந வட்டதி, தேலவண்ணகரணத்த²ம் பன வட்டதி. பத்தமண்ட³லேதி திபுஸீஸாதி³மயே. ‘‘ந, பி⁴க்க²வே, சித்தானி பத்தமண்ட³லானி தா⁴ரேதப்³பா³னி ரூபகாகிண்ணானி பி⁴த்திகம்மகதானீ’’தி (சூளவ. 253) வுத்தத்தா ‘‘பி⁴த்திகம்மம் ந வட்டதீ’’தி வுத்தம். ‘‘அனுஜானாமி, பி⁴க்க²வே, மகரத³ந்தகம் சி²ந்தி³து’’ந்தி (சூளவ. 253) வுத்தத்தா ‘‘மகரத³ந்தகம் பன வட்டதீ’’தி வுத்தம், இத³ம் பன பாளியா லத்³த⁴ம்பி இத⁴ பாளியா முத்தத்தா பாளிமுத்தகனயே வுத்தம். ஏவமஞ்ஞம்பி ஈதி³ஸம்.

லேகா² ந வட்டதீதி ஆரக்³கே³ன தி³ன்னலேகா²வ ந வட்டதி, ஜாதிஹிங்கு³லிகாதி³வண்ணேஹி கதலேகா² வட்டதி. ச²த்தமுக²வட்டியந்தி த⁴மகரணஸ்ஸ ஹத்தே²ன க³ஹணச²த்தாகாரஸ்ஸ முக²வட்டியம், ‘‘பரிஸ்ஸாவனசோளப³ந்த⁴னட்டா²னே’’தி கேசி.

தே³ட்³டு³ப⁴ஸீஸந்தி உத³கஸப்பஸீஸம். அச்சீ²னீதி குஞ்ஜரச்சி²ஸண்டா²னானி. ஏகமேவ வட்டதீதி ஏத்த² ஏகரஜ்ஜுகம் தி³கு³ணம் திகு³ணம் கத்வாபி ப³ந்தி⁴தும் ந வட்டதி, ஏகமேவ பன ஸதவாரம்பி ஸரீரம் பரிக்கி²பித்வா ப³ந்தி⁴தும் வட்டதி, ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ‘‘ப³ஹுரஜ்ஜுக’’ந்தி ந வத்தப்³ப³ம் ‘‘வட்டதீ’’தி வுத்தத்தா, தம் முரஜஸங்க²ம் ந க³ச்ச²தீதி வேதி³தப்³ப³ம். முரஜஞ்ஹி நானாவண்ணேஹி ஸுத்தேஹி முரஜவட்டிஸண்டா²னம் வேடே²த்வா கதம், இத³ம் பன முரஜம் மத்³த³வீணஸங்கா²தம் பாமங்க³ஸண்டா²னஞ்ச த³ஸாஸு வட்டதி ‘‘காயப³ந்த⁴னஸ்ஸ த³ஸா ஜீரந்தி; அனுஜானாமி, பி⁴க்க²வே, முரஜம் மத்³த³வீண’’ந்தி (சூளவ. 278) வுத்தத்தா.

விதே⁴தி த³ஸாபரியோஸானே தி²ரபா⁴வாய த³ந்தவிஸாணஸுத்தாதீ³ஹி கத்தப்³பே³ விதே⁴. அட்ட² மங்க³லானி நாம ஸங்கோ² சக்கம் புண்ணகும்போ⁴ க³யா ஸிரீவச்சோ² அங்குஸோ த⁴ஜம் ஸோவத்திகந்தி வத³ந்தி. மச்ச²யுக³ளச²த்தனந்தி³யாவட்டாதி³வஸேனபி வத³ந்தி. பரிச்சே²த³லேகா²மத்தந்தி த³ந்தாதீ³ஹி கதவித⁴ஸ்ஸ உபோ⁴ஸு கோடீஸு கதபரிச்சே²த³ராஜிமத்தம்.

‘‘உஜுகமேவா’’தி வுத்தத்தா சதுரஸ்ஸாதி³ஸண்டா²னாபி அஞ்ஜனீ வங்கக³திகா ந வட்டதி. ஸிபாடிகாயாதி வாஸிஆதி³ப⁴ண்ட³னிக்கி²பனபஸிப்³ப³கே. ஆரகண்டகம் நாம போத்த²காதி³அஅஸங்கா²ரணத்த²ம் கததீ³க⁴முக²ஸத்த²கந்தி வத³ந்தி. ‘‘ப⁴மகாரானம் தா³ருஆதி³லிக²னஸத்த²க’’ந்தி கேசி. வட்டமணிகந்தி வட்டம் கத்வா உட்ட²பேதப்³ப³ம் புப்பு²ளகம். அஞ்ஞந்தி இமினா பிளகாதி³ம் ஸங்க³ண்ஹாதி. பிப்ப²லிகேதி யம் கிஞ்சி சே²த³னகே கு²த்³த³கஸத்தே². வலிதகந்தி நக²ச்சே²த³னகாலே த³ள்ஹக்³க³ஹணத்த²ம் வலீஹி யுத்தமேவ கரோந்தி. தஸ்மா தம் வட்டதீதி இமினா யம் அஞ்ஞம்பி விகாரம் த³ள்ஹீகம்மாதி³அத்தா²ய கரோந்தி, ந வண்ணமட்ட²த்தா²ய, தம் வட்டதீதி தீ³பிதம், தேன ச கத்தரத³ண்ட³கோடியம் அஞ்ஞமஞ்ஞம்பி க⁴ட்டனேன ஸத்³த³னிச்ச²ரணத்தா²ய கதம் அயோவலயாதி³கம் ஸம்யுத்தம்பி கப்பியதோ உபபன்னம் ஹோதி. மண்ட³லந்தி உத்தராரணியா பவேஸனத்த²ம் ஆவாடமண்ட³லம் ஹோதி. உஜுகமேவ ப³ந்தி⁴துந்தி ஸம்ப³ந்தோ⁴, உபோ⁴ஸு வா பஸ்ஸேஸு ஏகபஸ்ஸே வாதி வசனஸேஸோ. வாஸித³ண்ட³ஸ்ஸ உபோ⁴ஸு பஸ்ஸேஸு த³ண்ட³கோடீனம் அசலனத்த²ம் ப³ந்தி⁴துந்தி அத்தோ².

ஆமண்ட³ஸாரகேதி ஆமலகப²லானி பிஸித்வா தேன கக்கேன கததேலபா⁴ஜனே. தத்த² கிர பக்கி²த்தம் தேலம் ஸீதலம் ஹோதி. பூ⁴மத்த²ரணேதி கடஸாராதி³மயே பரிகம்மகதாய பூ⁴மியா அத்த²ரிதப்³ப³அத்த²ரணே. பானீயக⁴டேதி ஸப்³ப³ம் பா⁴ஜனவிகதிம் ஸங்க³ண்ஹாதி. ஸப்³ப³ம்…பே… வட்டதீதி யதா²வுத்தேஸு மஞ்சாதீ³ஸு இத்தி²புரிஸரூபம்பி வட்டதி தேலபா⁴ஜனேஸுயேவ இத்தி²புரிஸரூபானம் படிக்கி²த்தத்தா, தேலபா⁴ஜனேன ஸஹ அக³ணேத்வா விஸும் மஞ்சாதீ³னம் க³ஹிதத்தா சாதி வத³ந்தி, கிஞ்சாபி வத³ந்தி, ஏதேஸம் பன மஞ்சாதீ³னம் ஹத்தே²ன ஆமஸிதப்³ப³ப⁴ண்ட³த்தா இத்தி²ரூபமேவேத்த² ந வட்டதீதி க³ஹேதப்³ப³ம். அஞ்ஞேஸந்தி ஸீமஸாமிகானம். ராஜவல்லபே⁴ஹீதி லஜ்ஜீபேஸலாதீ³னம் உபோஸதா²தி³அந்தராயகரா அலஜ்ஜினோ பி⁴ன்னலத்³தி⁴கா ச பி⁴க்கூ² அதி⁴ப்பேதா தேஹி ஸஹ உபோஸதா²தி³கரணாயோகா³, தேனேவ ‘‘ஸீமாயா’’தி வுத்தம். தேஸம் லஜ்ஜீபரிஸாதி தேஸம் ஸீமாஸாமிகானம் அனுப³லம் தா³தும் ஸமத்தா² லஜ்ஜீபரிஸா. பி⁴க்கூ²ஹி கதந்தி யம் அலஜ்ஜீனம் ஸேனாஸனபே⁴த³னாதி³கம் லஜ்ஜீபி⁴க்கூ²ஹி கதம், ஸப்³ப³ஞ்சேதம் ஸுகதமேவ அலஜ்ஜீனிக்³க³ஹத்தா²ய பவத்திதப்³ப³தோ.

88. அவஜ்ஜா²யந்தீதி நீசதோ சிந்தேந்தி. உஜ்ஜா²யனத்தோ²தி பி⁴க்கு²னோ தே²ய்யகம்மனிந்த³னத்தோ² ‘‘கத²ஞ்ஹி நாம அதி³ன்னம் ஆதி³யிஸ்ஸதீ’’தி, ந பன தா³ரு-ஸத்³த³விஸேஸனத்தோ² தஸ்ஸ ப³ஹுவசனத்தா. வசனபே⁴தே³தி ஏகவசனப³ஹுவசனானம் பே⁴தே³. ஸப்³பா³வந்தந்தி பி⁴க்கு²பி⁴க்கு²னீஆதி³ஸப்³பா³வயவவந்தம். பி³ம்பி³ஸாரோதி தஸ்ஸ நாமந்தி ஏத்த² பி³ம்பீ³தி ஸுவண்ணம். தஸ்மா ஸாரஸுவண்ணஸதி³ஸவண்ணதாய ‘‘பி³ம்பி³ஸாரோ’’தி வுச்சதீதி வேதி³தப்³ப³ம். போராணஸத்தா²னுரூபம் உப்பாதி³தோ வீஸதிமாஸப்பமாணஉத்தமஸுவண்ணக்³க⁴னகோ லக்க²ணஸம்பன்னோ நீலகஹாபணோதி வேதி³தப்³போ³. ருத்³ரதா³மேன நாம கேனசி உப்பாதி³தோ ருத்³ரதா³மகோ. ஸோ கிர நீலகஹாபணஸ்ஸ திபா⁴க³ம் அக்³க⁴தி. யஸ்மிம் பன தே³ஸே நீலகஹாபணா ந ஸந்தி, தத்தா²பி காளகவிரஹிதஸ்ஸ நித்³த⁴ந்தஸுவண்ணஸ்ஸ பஞ்சமாஸக்³க⁴னகேன ப⁴ண்டே³ன பாத³பரிச்சே²தோ³ காதப்³போ³. தேனாதி நீலகஹாபணஸ்ஸ சதுத்த²பா⁴க³பூ⁴தேன. பாராஜிகவத்து²ம்ஹி வாதிஆதி³ பாராஜிகானம் ஸப்³ப³பு³த்³தே⁴ஹி பஞ்ஞத்தபா⁴வேன வுத்தம், ஸங்கா⁴தி³ஸேஸாதீ³ஸு பன இதராபத்தீஸுபி தப்³ப³த்தூ²ஸு ச நானத்தம் நத்தே²வ, கேவலம் கேசி ஸப்³பா³காரேன பஞ்ஞபேந்தி, கேசி ஏகதே³ஸேனாதி ஏத்தகமேவ விஸேஸோ. ந ஹி கதா³சிபி ஸம்மாஸம்பு³த்³தா⁴ யதா²பராத⁴ம் அதிக்கம்ம ஊனமதி⁴கம் வா ஸிக்கா²பத³ம் பஞ்ஞபேந்தி.

பத³பா⁴ஜனீயவண்ணனா

92. புனபி ‘‘ஆக³ந்துகாமா’’தி வுத்தத்தா ச ஸப்³ப³தா² மனுஸ்ஸேஹி அனிவுத்த²புப்³பே³ அபி⁴னவமாபிதே, ‘‘புன ந பவிஸிஸ்ஸாமா’’தி நிராலயேஹி பரிச்சத்தே ச கா³மே கா³மவோஹாராபா⁴வா கா³மப்பவேஸனாபுச்ச²னாதி³கிச்சம் நத்தீ²தி வேதி³தப்³ப³ம். அரஞ்ஞபரிச்சே²த³த³ஸ்ஸனத்த²ந்தி கா³மகா³மூபசாரேஸு த³ஸ்ஸிதேஸு தத³ஞ்ஞம் அரஞ்ஞந்தி அரஞ்ஞபரிச்சே²தோ³ ஸக்கா ஞாதுந்தி வுத்தம். மாதிகாயம் பன கா³மக்³க³ஹணேனேவ கா³மூபசாரோபி க³ஹிதோதி த³ட்ட²ப்³போ³. இந்த³கீ²லேதி உம்மாரே. அரஞ்ஞஸங்கே²பம் க³ச்ச²தி ததா² அபி⁴த⁴ம்மே வுத்தத்தா. அஸதிபி இந்த³கீ²லே இந்த³கீ²லட்டா²னியத்தா ‘‘வேமஜ்ஜ²மேவ இந்த³கீ²லோதி வுச்சதீ’’தி வுத்தம். யத்த² பன த்³வாரபா³ஹாபி நத்தி², தத்த² பாகாரவேமஜ்ஜ²மேவ இந்த³கீ²லோதி க³ஹேதப்³ப³ம். லுடி²த்வாதி பவட்டித்வா.

மஜ்ஜி²மஸ்ஸ புரிஸஸ்ஸ ஸுப்பபாதோ வாதிஆதி³ மாதுகா³மஸ்ஸ காகுட்டா²பனவஸேன க³ஹேதப்³ப³ம், ந ப³லத³ஸ்ஸனவஸேன ‘‘மாதுகா³மோ பா⁴ஜனதோ⁴வனஉத³கம் ச²ட்³டே³தீ’’தி (பாரா. அட்ட². 1.92) உபரி வுச்சமானத்தா, தேனேவ ‘‘லேட்³டு³பாதோ’’தி அவத்வா ஸுப்பபாதோதிஆதி³ வுத்தம். குருந்த³ட்ட²கதா²யம் மஹாபச்சரியஞ்ச க⁴ரூபசாரோவ கா³மோதி அதி⁴ப்பாயேன ‘‘க⁴ரூபசாரே டி²தஸ்ஸ லேட்³டு³பாதோ கா³மூபசாரோ’’தி வுத்தம். கதபரிக்கே²போதி இமினா பரிக்கே²பதோ ப³ஹி உபசாரோ ந க³ஹேதப்³போ³தி த³ஸ்ஸேதி. ஸுப்பமுஸலபாதோபி அபரிக்கி²த்தகே³ஹஸ்ஸேவ, ஸோ ச யதோ பஹோதி, தத்தே²வ க³ஹேதப்³போ³, அப்பஹோனட்டா²னே பன விஜ்ஜமானட்டா²னமேவ க³ஹேதப்³ப³ம். யஸ்ஸ பன க⁴ரஸ்ஸ ஸமந்ததோ பாகாராதீ³ஹி பரிக்கே²போ கதோ ஹோதி, தத்த² ஸோவ பரிக்கே²போ க⁴ரூபசாரோதி க³ஹேதப்³ப³ம்.

புப்³பே³ வுத்தனயேனாதி பரிக்கி²த்தகா³மே வுத்தனயேன. ஸங்கரீயதீதி மிஸ்ஸீயதி. விகாலே கா³மப்பவேஸனே ‘‘பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ ஆபத்தி பாசித்தியஸ்ஸ. அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸ ஆபத்தி பாசித்தியஸ்ஸா’’தி (பாசி. 513) வுத்தத்தா கா³மகா³மூபசாரானம் அஸங்கரதா இச்சி²தப்³பா³தி ஆஹ அஸங்கரதோ சாதிஆதி³. கேசி பனேத்த² பாளியம் ‘‘அபரிக்கி²த்தஸ்ஸ கா³மஸ்ஸ உபசாரம் ஓக்கமந்தஸ்ஸாதி இத³ம் பரிக்கே²பாரஹட்டா²னம் ஸந்தா⁴ய வுத்தம், ந ததோ பரம் ஏகலேட்³டு³பாதபரிச்சி²ன்னம் உபசாரம். தஸ்மா பரிக்கே²பாரஹட்டா²னஸங்கா²தம் கா³மம் ஓக்கமந்தஸ்ஸேவ ஆபத்தி, ந உபசார’’ந்தி வத³ந்தி, தம் ந க³ஹேதப்³ப³ம் ‘‘க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதப்³ப⁴ந்தரம் கா³மோ நாம. ததோ அஞ்ஞஸ்ஸ லேட்³டு³பாதஸ்ஸ அப்³ப⁴ந்தரம் கா³மூபசாரோ நாமா’’தி (பாரா. அட்ட². 1.92) இதே⁴வ அட்ட²கதா²யம் வுத்தத்தா. விகாலே கா³மப்பவேஸனஸிக்கா²பத³ட்ட²கதா²யஞ்ஹி அபரிக்கி²த்தஸ்ஸ கா³மஸ்ஸ உபசாரோ அதி³ன்னாதா³னே வுத்தனயேனேவ வேதி³தப்³போ³தி (பாசி. அட்ட². 512) அயமேவ நயோ அதிதி³ஸிதோ. தேனேவ மாதிகாட்ட²கதா²யம்பி ‘‘ய்வாயம் அபரிக்கி²த்தஸ்ஸ கா³மஸ்ஸ உபசாரோ த³ஸ்ஸிதோ, தஸ்ஸ வஸேன விகாலே கா³மப்பவேஸனாதீ³ஸு ஆபத்தி பரிச்சி²ந்தி³தப்³பா³’’தி (கங்கா². அட்ட². து³தியபாராஜிகவண்ணனா) வுத்தம், தஸ்மா பரிக்கி²த்தஸ்ஸ கா³மஸ்ஸ பரிக்கே²பம் அதிக்கமந்தஸ்ஸ, அபரிக்கி²த்தஸ்ஸ கா³மஸ்ஸ க⁴ரூபசாரதோ பட்டா²ய து³தியலேட்³டு³பாதஸங்கா²தம் கா³மூபசாரம் ஓக்கமந்தஸ்ஸ விகாலே கா³மப்பவேஸனாபத்தி ஹோதி, மாதிகாயஞ்ச விகாலே கா³மம் பவிஸேய்யாதி கா³மக்³க³ஹணேனேவ கா³மூபசாரோபி க³ஹிதோதி வேதி³தப்³ப³ம். விகாலே கா³மப்பவேஸனாதீ³ஸூதி ஆதி³-ஸத்³தே³ன க⁴ரக⁴ரூபசாராதீ³ஸு டி²தானம் உப்பன்னலாப⁴பா⁴ஜனாதி³ம் ஸங்க³ண்ஹாதி.

நிக்க²மித்வா ப³ஹி இந்த³கீ²லாதி இந்த³கீ²லதோ ப³ஹி நிக்க²மித்வா டி²தம் யம் டா²னம் ஸப்³ப³மேதம் அரஞ்ஞந்தி யோஜனா. ஆசரியத⁴னு நாம பகதிஹத்தே²ன நவவித³த்தி²பமாணம், ஜியாய பன ஆரோபிதாய ஸத்தட்ட²வித³த்தி²மத்தந்தி வத³ந்தி.

கப்பியந்தி அனுரூபவஸேன வுத்தம் அகப்பியஸ்ஸாபி அப்படிக்³க³ஹிதஸ்ஸ பரிபோ⁴கே³ பாசித்தியத்தா. பரிச்சாகா³தி³ம்ஹி அகதே ‘‘இத³ம் மய்ஹம் ஸந்தக’’ந்தி வத்து²ஸாமினா அவிதி³தம்பி பரிக்³க³ஹிதமேவ பா³லும்மத்தாதீ³னம் ஸந்தகம் விய, தாதி³ஸம் அவஹரந்தோபி ஞாதகாதீ³ஹி பச்சா² ஞத்வா வத்து²ஸாமினா ச அனுப³ந்தி⁴தப்³ப³தோ பாராஜிகோவ ஹோதி. யஸ்ஸ வஸேன புரிஸோ தே²னோ ஹோதி, தம் தே²ய்யந்தி ஆஹ ‘‘அவஹரணசித்தஸ்ஸேதம் அதி⁴வசன’’ந்தி. பபஞ்சஸங்கா²தி தண்ஹாமானதி³ட்டி²ஸங்கா²தா பபஞ்சகோட்டா²ஸா. ஏகோ சித்தகோட்டா²ஸோதி டா²னாசாவனபயோக³ஸமுட்டா²பகோ ஏகோ சித்தகோட்டா²ஸோதி அத்தோ².

அபி⁴யோக³வஸேனாதி அட்டகரணவஸேன. ஸவிஞ்ஞாணகேனேவாதி இத³ம் ஸவிஞ்ஞாணகானஞ்ஞேவ ஆவேணிகவினிச்ச²யம் ஸந்தா⁴ய வுத்தம். பாணோ அபத³ந்திஆதீ³ஸு ஹி ‘‘பத³ஸா நேஸ்ஸாமீ’’தி பட²மம் பாத³ம் ஸங்காமேதி, ஆபத்தி து²ல்லச்சயஸ்ஸாதிஆதி³னா பாளியம் (பாரா. 111), பி⁴க்கு² தா³ஸம் தி³ஸ்வா ஸுக²து³க்க²ம் புச்சி²த்வா வா அபுச்சி²த்வா வா ‘‘க³ச்ச², பலாயித்வா ஸுக²ம் ஜீவா’’தி வத³தி, ஸோ சே பலாயதி, து³தியபத³வாரே பாராஜிகந்திஆதி³னா (பாரா. அட்ட². 1.114) அட்ட²கதா²யஞ்ச யோ ஸவிஞ்ஞாணகானஞ்ஞேவ ஆவேணிகோ வினிச்ச²யோ வுத்தோ, ஸோ ஆராமாதி³அவிஞ்ஞாணகேஸு ந லப்³ப⁴தீதி தாதி³ஸம் ஸந்தா⁴ய ‘‘ஸவிஞ்ஞாணகேனேவா’’தி வுத்தம். யோ பன வினிச்ச²யோ ஆராமாதி³அவிஞ்ஞாணகேஸு லப்³ப⁴தி, ஸோ யஸ்மா ஸவிஞ்ஞாணகேஸு அலப்³ப⁴னகோ நாம நத்தி², தஸ்மா வுத்தம் ‘‘நானாப⁴ண்ட³வஸேன ஸவிஞ்ஞாணகாவிஞ்ஞாணகமிஸ்ஸகேனா’’தி. ஸவிஞ்ஞாணகேன ச அவிஞ்ஞாணகேன சாதி அத்தோ². யஸ்மா சேத்த² அவிஞ்ஞாணகேனேவ ஆதி³யனாதீ³னி ச²பி பதா³னி ந ஸக்கா யோஜேதும் இரியாபத²விகோபனஸ்ஸ ஸவிஞ்ஞாணகவஸேனேவ யோஜேதப்³ப³தோ, தஸ்மா ‘‘அவிஞ்ஞாணகேனேவா’’தி ததியம் பகாரம் ந வுத்தந்தி த³ட்ட²ப்³ப³ம்.

ஆராமந்தி இத³ம் உபலக்க²ணமத்தம் தா³ஸாதி³ஸவிஞ்ஞாணகஸ்ஸாபி இத⁴ ஸங்க³ஹேதப்³ப³தோ, நானாப⁴ண்ட³வஸேன ஹேத்த² யோஜனா த³ஸ்ஸியதி. பரிகப்பிதட்டா²னந்தி பரிகப்பிதோகாஸம். ஸுங்ககா⁴தந்தி ஏத்த² மக்³க³ம் க³ச்ச²ந்தேஹி ஸத்தி²கேஹி அத்தனா நீயமானப⁴ண்ட³தோ ரஞ்ஞோ தா³தப்³ப³பா⁴கோ³ ஸுங்கோ நாம, ஸோ ஏத்த² ஹஞ்ஞதி அத³த்வா க³ச்ச²ந்தேஹி அவஹரீயதி, தம் வா ஹந்தி ஏத்த² ராஜபுரிஸா அத³த³ந்தானம் ஸந்தகம் ப³லக்காரேனாதி ஸுங்ககா⁴தோ, ‘‘ஏத்த² பவிட்டே²ஹி ஸுங்கோ தா³தப்³போ³’’தி ருக்க²பப்³ப³தாதி³ஸஞ்ஞாணேன நியமிதப்பதே³ஸஸ்ஸேதம் அதி⁴வசனம்.

பஞ்சவீஸதிஅவஹாரகதா²வண்ணனா

கத்த²சீதி ஏகிஸ்ஸா அட்ட²கதா²யம். ஏகம் பஞ்சகம் த³ஸ்ஸிதந்தி ‘‘பரபரிக்³க³ஹிதஞ்ச ஹோதி, பரபரிக்³க³ஹிதஸஞ்ஞீ ச, க³ருகோ ச ஹோதி பரிக்கா²ரோ பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி, டா²னா சாவேதீ’’தி (பாரா. 122) வுத்தபஞ்சஅவஹாரங்கா³னி ஏகம் பஞ்சகந்தி த³ஸ்ஸிதம். த்³வே பஞ்சகானி த³ஸ்ஸிதானீதி ‘‘ச²ஹி ஆகாரேஹி அதி³ன்னம் ஆதி³யந்தஸ்ஸ ஆபத்தி பாராஜிகஸ்ஸ. ந ச ஸகஸஞ்ஞீ, ந ச விஸ்ஸாஸக்³கா³ஹீ, ந ச தாவகாலிகம், க³ருகோ ச ஹோதி பரிக்கா²ரோ பஞ்சமாஸகோ வா அதிரேகபஞ்சமாஸகோ வா, தே²ய்யசித்தஞ்ச பச்சுபட்டி²தம் ஹோதி, டா²னா சாவேதி, ஆபத்தி பாராஜிகஸ்ஸா’’தி (பாரா. 125) ஏவம் வுத்தேஸு ச²ஸு பதே³ஸு ஏகம் அபனேத்வா ஸேஸானி பஞ்ச பதா³னி ஏகம் பஞ்சகம் கத்வா ஹேட்டா² வுத்தபஞ்சகஞ்ச க³ஹேத்வா த்³வே பஞ்சகானி த³ஸ்ஸிதானி. ஏத்த² பனாதி பஞ்சஹாகாரேஹீதிஆதீ³ஸு. ஸப்³பே³ஹிபி பதே³ஹீதி பரபரிக்³க³ஹிதஞ்ச ஹோதீதிஆதீ³ஹி ஸப்³பே³ஹி பஞ்சஹி பதே³ஹி.

பஞ்சன்னம் அவஹாரானம் ஸமூஹோ பஞ்சகம். ஸகோ ஹத்தோ² ஸஹத்தோ², தேன நிப்³ப³த்தோ, தஸ்ஸ வா ஸம்ப³ந்தீ⁴தி ஸாஹத்தி²கோ, அவஹாரோ. ஸாஹத்தி²காதி³ பஞ்சகம் ஸாஹத்தி²கபஞ்சகந்திஆதி³பத³வஸேன நாமலாபோ⁴ த³ட்ட²ப்³போ³. ஏவம் ஸேஸேஸுபி. ததியபஞ்சமேஸு பஞ்சகேஸூதி ஸாஹத்தி²கபஞ்சகதே²ய்யாவஹாரபஞ்சகேஸு. லப்³ப⁴மானபத³வஸேனாதி ஸாஹத்தி²கபஞ்சகே லப்³ப⁴மானஸ்ஸ நிஸ்ஸக்³கி³யாவஹாரபத³ஸ்ஸ வஸேன, தே²ய்யாவஹாரபஞ்சகே லப்³ப⁴மானஸ்ஸ பரிகப்பாவஹாரபத³ஸ்ஸ ச வஸேன யோஜேதப்³ப³ந்தி அத்தோ².

நிஸ்ஸக்³கி³யோ நாம…பே… பாராஜிகஸ்ஸாதி இமினா ப³ஹிஸுங்ககா⁴தபாதனம் நிஸ்ஸக்³கி³யபயோகோ³தி த³ஸ்ஸேதி. ‘‘ஹத்தே² பா⁴ரம் தே²ய்யசித்தோ பூ⁴மியம் நிக்கி²பதி, ஆபத்தி பாராஜிகஸ்ஸா’’தி (பாரா. 101) வுத்தத்தா பன ஸுத்³த⁴சித்தேன க³ஹிதபரப⁴ண்ட³ஸ்ஸ தே²ய்யசித்தேன கு³ம்பா³தி³படிச்ச²ன்னட்டா²னே கி²பனம்பி இமஸ்மிம் நிஸ்ஸக்³கி³யபயோகே³ ஸங்க³ய்ஹதீதி த³ட்ட²ப்³ப³ம். கிரியாஸித்³தி⁴தோ புரேதரமேவ பாராஜிகாபத்திஸங்கா²தம் அத்த²ம் ஸாதே⁴தீதி அத்த²ஸாத⁴கோ. அத² வா அத்தனோ வத்தமானக்க²ணே அவிஜ்ஜமானம்பி கிரியாஸித்³தி⁴ஸங்கா²தம் அத்த²ம் அவஸ்ஸம் ஆபத்திம் ஸாதே⁴தீதிபி அத்த²ஸாத⁴கோ. அஸுகம் நாம ப⁴ண்ட³ம் யதா³ ஸக்கோஸீதி இத³ம் நித³ஸ்ஸனமத்தம் பரஸ்ஸ தேலகும்பி⁴யா உபாஹனாதீ³னம் நிக்கே²பபயோக³ஸ்ஸாபி அத்த²ஸாத⁴கத்தா. ததா² ஹி வுத்தம் மாதிகாட்ட²கதா²யம் –

‘‘அத்த²ஸாத⁴கோ நாம ‘அஸுகஸ்ஸ ப⁴ண்ட³ம் யதா³ ஸக்கோதி, ததா³ தம் அவஹரா’தி அஞ்ஞம் ஆணாபேதி. தத்த² ஸசே பரோ அனந்தராயிகோ ஹுத்வா தம் அவஹரதி, ஆணாபகஸ்ஸ ஆணத்திக்க²ணேயேவ பாராஜிகம். பரஸ்ஸ வா பன தேலகும்பி⁴யா பாத³க்³க⁴னகதேலம் அவஸ்ஸம் பிவனகானி உபாஹனாதீ³னி பக்கி²பதி, ஹத்த²தோ முத்தமத்தேயேவ பாராஜிக’’ந்தி (கங்கா². அட்ட². து³தியபாராஜிகவண்ணனா).

இமஸ்ஸ அத்த²ஸாத⁴கஸ்ஸ ஆணத்தியா ச கோ விஸேஸோதி? தங்க²ணஞ்ஞேவ க³ஹணே நியுஞ்ஜனம் ஆணத்திகபயோகோ³, காலந்தரேன க³ஹணத்த²ம் நியோகோ³ அத்த²ஸாத⁴கோதி அயம் நேஸம் விஸேஸோ. தேனேவாஹ ‘‘அஸுகம் நாம ப⁴ண்ட³ம் யதா³ ஸக்கோஸீ’’திஆதி³. து⁴ரனிக்கே²போ பன உபனிக்கி²த்தப⁴ண்ட³வஸேன வேதி³தப்³போ³தி இத³ம் நித³ஸ்ஸனமத்தம், ஆராமாபி⁴யுஞ்ஜனாதீ³ஸுபி தாவகாலிகப⁴ண்ட³தே³ய்யானம் அதா³னேபி ஏஸேவ நயோ. ப⁴ண்ட³க்³க³ஹணப்பயோக³தோ ஆணத்தியா புப்³ப³த்தா ஆஹ ‘‘ஆணத்திவஸேன புப்³ப³பயோகோ³ வேதி³தப்³போ³’’தி. பயோகே³ன ஸஹ வத்தமானோ அவஹாரோ ஸஹபயோகோ³தி ஆஹ ‘‘டா²னாசாவனவஸேனா’’தி, இத³ஞ்ச நித³ஸ்ஸனமத்தம் கீ²லஸங்கமனாதீ³ஸுபி அஸதி டா²னாசாவனே ஸஹபயோக³த்தா. வுத்தஞ்ஹி மாதிகாட்ட²கதா²யம் ‘‘டா²னாசாவனவஸேன கீ²லாதீ³னி ஸங்காமேத்வா கே²த்தாதி³க்³க³ஹணவஸேன ச ஸஹபயோகோ³ வேதி³தப்³போ³’’தி (கங்கா². அட்ட². து³தியபாராஜிகவண்ணனா).

துலயித்வாதி உபபரிக்கி²த்வா. ஸாமீசீதி வத்தம். ஸகஸஞ்ஞாய அதே³ந்தஸ்ஸ ஆபத்தி நத்தீ²தி வத³ந்தி. ஸம்மத்³தோ³தி நிவித்³த⁴தாஸங்கோ²போ⁴. ப⁴ட்டே² ஜனகாயேதி அபக³தே ஜனஸமூஹே. அத்தனோ ஸந்தகம் கத்வா ஏதஸ்ஸேவ பி⁴க்கு²னோ தே³ஹீதி இத³ம் உபி⁴ன்னம்பி குக்குச்சவினோத³னத்த²ம் வுத்தம். அவஹாரகஸ்ஸ ஹி ‘‘மயா ஸஹத்தே²ன ந தி³ன்னம், ப⁴ண்ட³தே³ய்யம் ஏத’’ந்தி குக்குச்சம் உப்பஜ்ஜேய்ய, இதரஸ்ஸ ச ‘‘மயா பட²மம் து⁴ரனிக்கே²பம் கத்வா பச்சா² அதி³ன்னம் க³ஹித’’ந்தி குக்குச்சம் உப்பஜ்ஜேய்யாதி.

ஸமக்³க⁴ந்தி அப்பக்³க⁴ம். தா³ருஅத்த²ம் ப²ரதீதி தா³ரூஹி கத்தப்³ப³கிச்சம் ஸாதே⁴தி. ஏகதி³வஸம் த³ந்தகட்ட²ச்சே²த³னாதி³னா யா அயம் அக்³க⁴ஹானி வுத்தா, ஸா ஸப்³பா³ ப⁴ண்ட³ஸாமினா கிணித்வா க³ஹிதமேவ ஸந்தா⁴ய வுத்தா. ஸப்³ப³ம் பனேதம் அட்ட²கதா²சரியப்பமாணேன வேதி³தப்³ப³ம். பாஸாணஞ்ச ஸக்க²ரஞ்ச பாஸாணஸக்க²ரம்.

அக்க²த³ஸ்ஸாதி ஏத்த² அக்க²-ஸத்³தே³ன கிர வினிச்ச²யஸாலா வுச்சதி, தத்த² நிஸீதி³த்வா வஜ்ஜாவஜ்ஜம் நிரூபயந்தீதி ‘‘அக்க²த³ஸ்ஸா’’தி வுச்சந்தி த⁴ம்மவினிச்ச²னகா. ஹனனம் நாம ஹத்த²பாதா³தீ³ஹி போத²னஞ்சேவ ஹத்த²னாஸாதி³ச்சே²த³னஞ்ச ஹோதீதி ஆஹ ‘‘ஹனேய்யுந்தி போதே²ய்யுஞ்சேவ சி²ந்தே³ய்யுஞ்சா’’தி.

பத³பா⁴ஜனீயஞ்ச ‘‘ஹத்தே²ன வா பாதே³ன வா கஸாய வா வேத்தேன வா அட்³ட⁴த³ண்ட³கேன வா ச²ஜ்ஜாய வா ஹனேய்யு’’ந்தி (பாரா. 92) வுத்தம். தத்த² அட்³ட⁴த³ண்ட³கேனாதி த்³விஹத்த²ப்பமாணேன ரஸ்ஸமுக்³க³ரேன, வேளுபேஸிகாய வா. சே²ஜ்ஜாய வாதி ஹத்தா²தீ³னம் சே²த³னேன. சி²ந்த³ந்தி ஏதாய ஹத்த²பாதா³தீ³னீதி சே²ஜ்ஜா, ஸத்த²ம், தேன ஸத்தே²னாதிபி அத்தோ². நீஹரேய்யுந்தி ரட்ட²தோ நீஹரேய்யும். ‘‘சோரோஸி…பே… தே²னோஸீ’’தி ஏத்த² பரிபா⁴ஸேய்யுந்தி பத³ம் அஜ்ஜா²ஹரித்வா அத்தோ² வேதி³தப்³போ³தி ஆஹ ‘‘சோரோஸி…பே… பரிபா⁴ஸேய்யு’’ந்தி. யம் தம் ப⁴ண்ட³ம் த³ஸ்ஸிதந்தி ஸம்ப³ந்தோ⁴.

93. யத்த² யத்த² டி²தந்தி பூ⁴மியாதீ³ஸு யத்த² யத்த² டி²தம். யதா² யதா² ஆதா³னம் க³ச்ச²தீதி யேன யேன ஆகாரேன க³ஹணம் உபக³ச்ச²தி.

பூ⁴மட்ட²கதா²வண்ணனா

94. வாசாய வாசாயாதி ஏகேகத்த²தீ³பிகாய வாசாய வாசாய. உபலத்³தோ⁴தி ஞாதோ. பாளியம் ஸேஸஅட்ட²கதா²ஸு ச குதா³லம் வா பிடகம் வாதி இத³மேவ த்³வயம் வத்வா வாஸிப²ரஸூனம் அவுத்தத்தா தேஸம்பி ஸங்கே²பட்ட²கதா²தீ³ஸு ஆக³தபா⁴வம் த³ஸ்ஸேதும் ஸங்கே²பட்ட²கதா²யந்திஆதி³ வுத்தம். தே²ய்யசித்தேன கதத்தா ‘‘து³க்கடேஹி ஸத்³தி⁴ம் பாசித்தியானீ’’தி வுத்தம்.

அட்ட²வித⁴ம் ஹேதந்திஆதீ³ஸு ஏதம் து³க்கடம் நாம தே²ரேஹி த⁴ம்மஸங்கா³ஹகேஹி இமஸ்மிம் டா²னே ஸமோதா⁴னேத்வா அட்ட²வித⁴ந்தி த³ஸ்ஸிதந்தி யோஜனா. ஸப்³பே³ஸம்பி து³க்கடானம் இமேஸுயேவ அட்ட²ஸு ஸங்க³ஹேதப்³ப³பா⁴வதோ பன இதரேஹி ஸத்தஹி து³க்கடேஹி வினிமுத்தம் வினயது³க்கடேயேவ ஸங்க³ஹேதப்³ப³ம். த³ஸவித⁴ம் ரதனந்தி ‘‘முத்தா மணி வேளுரியோ ஸங்கோ² ஸிலா பவாளம் ரஜதம் ஜாதரூபம் லோஹிதகோ மஸாரக³ல்ல’’ந்தி ஏவமாக³தம் த³ஸவித⁴ம் ரதனம்.

‘‘முத்தா மணி வேளுரியோ ச ஸங்கோ²,

ஸிலா பவாளம் ரஜதஞ்ச ஹேமம்;

லோஹிதகஞ்ச மஸாரக³ல்லம்,

த³ஸேதே தீ⁴ரோ ரதனானி ஜஞ்ஞா’’தி. –

ஹி வுத்தம். ஸத்தவித⁴ம் த⁴ஞ்ஞந்தி ஸாலி வீஹி யவோ கங்கு³ குத்³ரூஸம் வரகோ கோ³து⁴மோதி இமம் ஸத்தவித⁴ம் த⁴ஞ்ஞம். ஆவுத⁴ப⁴ண்டா³தி³ந்தி ஆதி³-ஸத்³தே³ன துரியப⁴ண்ட³இத்தி²ரூபாதி³ம் ஸங்க³ண்ஹாதி. அனாமஸிதப்³பே³ வத்து²ம்ஹி து³க்கடம் அனாமாஸது³க்கடம். து³ரூபசிண்ணது³க்கடந்தி ‘‘அகத்தப்³ப³’’ந்தி வாரிதஸ்ஸ கதத்தா து³ட்டு² உபசிண்ணம் சரிதந்தி து³ரூபசிண்ணம், தஸ்மிம் து³க்கடம் து³ரூபசிண்ணது³க்கடம். வினயே பஞ்ஞத்தம் அவஸேஸம் து³க்கடம் வினயது³க்கடம். ஏகாத³ஸ ஸமனுபா⁴ஸனா நாம பி⁴க்கு²பாதிமோக்கே² சத்தாரோ யாவததியகா ஸங்கா⁴தி³ஸேஸா அரிட்ட²ஸிக்கா²பத³ந்தி பஞ்ச, பி⁴க்கு²னீபாதிமோக்கே² ஏகம் யாவததியகபாராஜிகம் சத்தாரோ ஸங்கா⁴தி³ஸேஸா சண்ட³காளீஸிக்கா²பத³ந்தி ச².

ஸஹபயோக³தோ பட்டா²ய சேத்த² புரிமபுரிமா ஆபத்தியோ படிப்பஸ்ஸம்ப⁴ந்தீதி ஆஹ அத² து⁴ரனிக்கே²பம் அகத்வாதிஆதி³. ‘‘து⁴ரனிக்கே²பம் அகத்வா’’தி வுத்தத்தா து⁴ரனிக்கே²பம் கத்வா புன க²ணந்தஸ்ஸ புரிமாபத்தியோ ந படிப்பஸ்ஸம்ப⁴ந்தீதி வத³ந்தி. ‘‘சே²த³னபச்சயா து³க்கடம் தே³ஸேத்வா முச்சதீ’’தி வத்வா புப்³ப³பயோகே³ ஆபத்தீனம் தே³ஸேதப்³ப³தாய அவுத்தத்தா ஸஹபயோகே³ பத்தே புப்³ப³பயோகே³ ஆபத்தியோ படிப்பஸ்ஸம்ப⁴ந்தீதி வேதி³தப்³ப³ம்.

அபரத்³த⁴ம் விரத்³த⁴ம் க²லிதந்தி ஸப்³ப³மேதம் யஞ்ச து³க்கடந்தி ஏத்த² வுத்தஸ்ஸ து³க்கடஸ்ஸ பரியாயவசனம், யம் மனுஸ்ஸோ கரேதிஆதி³ பனேத்த² ஓபம்மனித³ஸ்ஸனம். ஸம்யோக³பா⁴வோதி த்³வித்தம் ஸந்தா⁴ய வுத்தம், தேன ரஸ்ஸத்தஸ்ஸாபி நிமித்தம் த³ஸ்ஸிதந்தி வேதி³தப்³ப³ம். ஏகஸ்ஸ மூலேதி ஏகஸ்ஸ ஸந்திகே. ஸப்³ப³த்தா²பி ஆமஸனே து³க்கடம், ப²ந்தா³பனே து²ல்லச்சயஞ்ச விஸும் விஸும் ஆமஸனப²ந்தா³பனபயோக³ம் கரோந்தஸ்ஸேவ ஹோதி, ஏகபயோகே³ன க³ண்ஹந்தஸ்ஸ பன உத்³தா⁴ரே பாராஜிகமேவ, ந து³க்கடது²ல்லச்சயானீதி வத³ந்தி, ஏகபயோகே³ன க³ண்ஹந்தஸ்ஸாபி ஆமஸனப²ந்தா³பனானம்பி லப்³ப⁴மானத்தா தம் ந க³ஹேதப்³ப³ம். ந ஹி ஸக்கா அனாமஸித்வா அப²ந்தா³பேத்வா ச கிஞ்சி க³ஹேதும். ‘‘ஏகமேவ தே³ஸேத்வா முச்சதீ’’தி பம்ஸுக²ணனாதி³ஸமானபயோகே³பி புரிமா ஆபத்தி உத்தரமுத்தரம் ஆபத்திம் பத்வா படிப்பஸ்ஸம்ப⁴ந்தீதி ஸஞ்ஞாய குருந்த³ட்ட²கதா²யம் வுத்தம், இதரட்ட²கதா²ஸு பன க²ணனபயோக³பே⁴தே³ஹி பயோகே³ பயோகே³ ஆபன்னா ஆபத்தியோ உத்தரமுத்தரம் பத்வா ந படிப்பஸ்ஸம்ப⁴ந்தி அஞ்ஞமஞ்ஞம் ஸதி³ஸத்தா வியூஹனம் பத்வா தா ஸப்³பா³பி படிப்பஸ்ஸம்ப⁴ந்தி விஸதி³ஸபயோக³த்தாதி இமினா அதி⁴ப்பாயேன படிப்பஸ்ஸத்³தி⁴விதா⁴னம் வுத்தந்தி வேதி³தப்³ப³ம். இமினா ஹி அவஹாரகஸ்ஸ ஆஸன்னம் ஓரிமந்தம் பராமஸதி.

தத்தே²வாதி முக²வட்டியமேவ. பு³ந்தே³னாதி கும்பி⁴யா ஹேட்டி²மதலேன. ஏகட்டா²னே டி²தாய கும்பி⁴யா டா²னா சாவனம் ச²ஹி ஆகாரேஹி வேதி³தப்³ப³ந்தி ஸம்ப³ந்தோ⁴. ஏகட்டா²னேதி ச ஸங்க²லிகப³த்³த⁴பா⁴வேன ஏகஸ்மிம் பதிட்டி²தோகாஸட்டா²னேதி அத்தோ². கா²ணுகம் கேஸக்³க³மத்தம்பி டா²னா சாவேதீதி கா²ணுகம் அத்தனோ பதிட்டி²தட்டா²னதோ பஞ்சஹி ஆகாரேஹி டா²னா சாவேதி. சி²ன்னமத்தே பாராஜிகந்தி அவஸ்ஸம் சே பததி, சி²ன்னமத்தே பாராஜிகம். பரிச்சே²தோ³தி பஞ்சமாஸகாதி³க³ருபா⁴வபரிச்சே²தோ³. அபப்³யூஹந்தோதி டி²தட்டா²னதோ அபனயனவஸேன வியூஹந்தோ ராஸிம் கரோந்தோ. ஏவம் கத்வாதி பா⁴ஜனமுக²வட்டியா கும்பி⁴க³தேன பா⁴ஜனக³தஸ்ஸ ஏகாப³த்³த⁴பா⁴வம் வியோஜேத்வாதி அத்தோ². உபட்³ட⁴கும்பீ⁴யந்தி உபட்³ட⁴புண்ணாய கும்பி⁴யா. வினயத⁴ம்மதாதி அதி⁴ககாரணாலாபே⁴ வினயவினிச்ச²யத⁴ம்மதாதி அதி⁴ப்பாயோ. ந கேவலஞ்சேத்த² க³ருகதாவ, ஸுத்தானுக³மனம்பி அத்தீ²தி த³ஸ்ஸேந்தோ அபிசாதிஆதி³மாஹ. கண்டே²ன பன பரிச்சி²ன்னகாலேதி முக²க³தம் அஜ்ஜோ²ஹடகாலேதி அத்தோ². அஜ்ஜோ²ஹரணமேவ ஹேத்த² பரிச்சி²ந்த³னம், ந கண்ட²பித³ஹனம். சிக்கனந்தி த²த்³த⁴ம், ப³ஹலம் க⁴னந்தி அத்தோ².

யோபி தே²ய்யசித்தேன பரஸ்ஸ கும்பி⁴யா பாத³க்³க⁴னகம் ஸப்பிம் வா தேலம் வா அவஸ்ஸம் பிவனகம் யம் கிஞ்சி து³கூலஸாடகம் வா சம்மக²ண்டா³தீ³னம் வா அஞ்ஞதரம் பக்கி²பதி, ஹத்த²தோ முத்தமத்தே பாராஜிகந்தி ஏத்த² அவஹாரோ வீமம்ஸிதப்³போ³. யதி³ ச து³கூலாதீ³ஸு ஸப்பிதேலானம் பவிஸனம் ஸந்தா⁴ய பாராஜிகம் ப⁴வேய்ய, தத்த² பவிட்ட²தேலாதி³னோ கும்பி⁴க³தேன ஏகாப³த்³த⁴தாய ந தாவ அவஹாரோ பா⁴ஜனந்தரம் பவேஸேத்வா க³ஹணகாலே விய. ததா² ஹி வுத்தம் – ‘‘பா⁴ஜனம் பன நிமுஜ்ஜாபேத்வா க³ண்ஹந்தஸ்ஸ யாவ ஏகாப³த்³த⁴ம் ஹோதி, தாவ ரக்க²தீ’’திஆதி³. அத² தேலாதி³வினாஸேன பாராஜிகம் ப⁴வேய்ய, ததா³பி திணஜ்ஜா²பனாதீ³ஸு விய அவஹாரோ நத்தி², து³க்கடேன ஸத்³தி⁴ம் ப⁴ண்ட³தே³ய்யமேவ ஹோதி, ததா² ச பாத³க்³க⁴னகம் தேலாதி³ம் பீதம் து³கூலாதி³ம் உத்³த⁴ரந்தஸ்ஸாபி பாராஜிகம் ந ஸியா தத்த² பவிட்ட²ஸ்ஸ தேலாதி³னோ வினட்ட²ட்டே²ன க³ஹணக்க²ணே அவிஜ்ஜமானத்தா, விஜ்ஜமானத்தேன ச உத்³தா⁴ரேயேவ பாராஜிகம் வத்தப்³ப³ம், ந ஹத்த²தோ முத்தமத்தேதி. ஸப்³ப³அட்ட²கதா²ஸு ச து³கூலாதீ³னம் பக்கி²பனே ஹத்த²தோ முத்தமத்தே பாராஜிகஸ்ஸ வுத்தத்தா ந தம் படிக்கி²பிதும் ஸக்கா. அட்ட²கதா²ப்பமாணேன பனேதம் க³ஹேதப்³ப³ம், யுத்தி பனேத்த² பண்டி³தேஹி புப்³பா³பரம் ஸம்ஸந்தி³த்வா உத்³தா⁴ரேதப்³பா³.

பலிபு³ஜ்ஜி²ஸ்ஸதீதி நிவாரேஸ்ஸதி. வுத்தனயேன பாராஜிகந்தி ஹத்த²தோ முத்தமத்தேயேவ பாராஜிகம். நேவ அவஹாரோ, ந கீ³வாதி அத்தனோ பா⁴ஜனத்தா வுத்தம், அனாபத்திமத்தமேவ வுத்தம், ந பன ஏவம் விசாரிதந்தி அதி⁴ப்பாயோ. ப³ஹிக³தம் நாம ஹோதீதி ததோ பட்டா²ய தேலஸ்ஸ அட்டா²னதோ அதோ⁴முக²பா⁴வதோ ச ப³ஹிக³தம் நாம ஹோதி. அந்தோ பட்டா²ய சி²த்³தே³ கரியமானே தேலஸ்ஸ நிக்க²மித்வா க³தக³தட்டா²னம் பா⁴ஜனஸங்க்²யமேவ க³ச்ச²தீதி ஆஹ ‘‘பா³ஹிரந்ததோ பாத³க்³க⁴னகே க³ளிதே பாராஜிக’’ந்தி. யதா² ததா² வா கதஸ்ஸாதி பா³ஹிரந்ததோ வா அப்³ப⁴ந்தரந்ததோ வா பட்டா²ய கதஸ்ஸ. மஜ்ஜே² ட²பேத்வா கதசி²த்³தே³தி மஜ்ஜே² தோ²கம் கபாலம் ட²பேத்வா பச்சா² தம் சி²ந்த³ந்தேன கதசி²த்³தே³.

பத்தீ²னஸ்ஸ கா²த³னம் இதரஸ்ஸ பானஞ்ச ஸப்பிஆதீ³னம் பரிபோ⁴கோ³தி ஆஹ ‘‘அகா²தி³தப்³ப³ம் வா அபாதப்³ப³ம் வா கரோதீ’’தி. கஸ்மா பனேத்த² து³க்கடம் வுத்தந்தி ஆஹ ‘‘டா²னாசாவனஸ்ஸ நத்தி²தாய து³க்கட’’ந்தி. புரிமத்³வயந்தி பே⁴த³னம் ச²ட்³ட³னஞ்ச. கும்பி⁴ஜஜ்ஜரகரணேனாதி புண்ணகும்பி⁴யா ஜஜ்ஜரகரணேன. மாதிகாஉஜுகரணேனாதி உத³கபுண்ணாய மாதிகாய உஜுகரணேன. ஏகலக்க²ணந்தி பே⁴த³னம் கும்பி⁴யா ஜஜ்ஜரகரணேன, ச²ட்³ட³னம் மாதிகாய உஜுகரணேன ச ஸத்³தி⁴ம் ஏகஸபா⁴வம். பச்சி²மம் பன த்³வயந்தி ஜா²பனம் அபரிபோ⁴க³கரணஞ்ச. ஏத்த² ஏவம் வினிச்ச²யம் வத³ந்தீதி ஏதஸ்மிம் மஹாஅட்ட²கதா²யம் வுத்தே அத்தே² ஏகே ஆசரியா ஏவம் வினிச்ச²யம் வத³ந்தி. பச்சி²மத்³வயம் ஸந்தா⁴ய வுத்தந்தி ஏத்த² புரிமபத³த்³வயே வினிச்ச²யோ ஹேட்டா² வுத்தானுஸாரேன ஸக்கா விஞ்ஞாதுந்தி தத்த² கிஞ்சி அவத்வா பச்சி²மபத³த்³வயம் ஸந்தா⁴ய ‘‘டா²னாசாவனஸ்ஸ நத்தி²தாய து³க்கட’’ந்தி இத³ம் வுத்தந்தி அதி⁴ப்பாயோ. தே²ய்யசித்தேனாதி அத்தனோ வா பரஸ்ஸ வா காதுகாமதாவஸேன உப்பன்னதே²ய்யசித்தேன. வினாஸேதுகாமதாயாதி ஹத்த²பாதா³தீ³னி சி²ந்த³ந்தோ விய கேவலம் வினாஸேதுகாமதாய. வுத்தனயேன பி⁴ந்த³ந்தஸ்ஸ வா ச²ட்³டே³ந்தஸ்ஸ வாதி முக்³க³ரேன போதே²த்வா பி⁴ந்த³ந்தஸ்ஸ வா உத³கம் வா வாலிகம் வா ஆகிரித்வா உத்தராபேந்தஸ்ஸ வாதி அத்தோ². அயுத்தந்தி சேதி பாளியம் புரிமத்³வயேபி து³க்கடஸ்ஸேவ வுத்தத்தா ‘‘புரிமத்³வயே பாராஜிக’’ந்தி இத³ம் அயுத்தந்தி யதி³ தும்ஹாகம் ஸியாதி அத்தோ². நாதி அயுத்தபா⁴வம் நிஸேதே⁴த்வா தத்த² காரணமாஹ ‘‘அஞ்ஞதா² க³ஹேதப்³ப³த்த²தோ’’தி.

ஏவமேகே வத³ந்தீதி ஹேட்டா² வுத்தஸ்ஸ அத்த²னயஸ்ஸ அத்தனா அனபி⁴மதபா⁴வம் த³ஸ்ஸேத்வா ஸயம் அஞ்ஞதா²பி பாளிம் அட்ட²கத²ஞ்ச ஸம்ஸந்தி³த்வா அத்த²ம் த³ஸ்ஸேதுகாமோ அயம் பனேத்த² ஸாரோதிஆதி³மாஹ. அசாவேதுகாமோவாதி தே²ய்யசித்தேன டா²னா அசாவேதுகாமோவ. அச²ட்³டே³துகாமோயேவாதி ஏத்தா²பி தே²ய்யசித்தேனாதி ஸம்ப³ந்தி⁴தப்³ப³ம். இத³ஞ்ஹி தே²ய்யசித்தபக்க²ம் ஸந்தா⁴ய வுத்தம் நாஸேதுகாமதாபக்க²ஸ்ஸ வக்க²மானத்தா. தேனேவாஹ நாஸேதுகாமதாபக்கே² பனாதிஆதி³. இதரதா²பி யுஜ்ஜதீதி தே²ய்யசித்தாபா⁴வா டா²னா சாவேதுகாமஸ்ஸாபி து³க்கடம் யுஜ்ஜதீதி வுத்தம் ஹோதி.

பூ⁴மட்ட²கதா²வண்ணனானயோ நிட்டி²தோ.

ஆகாஸட்ட²கதா²வண்ணனா

96. ஆகாஸட்ட²கதா²யம் அந்தோவத்து²ம்ஹீதி பரிக்கி²த்தஸ்ஸ வத்து²ஸ்ஸ அந்தோ. அந்தோகா³மேதி பரிக்கி²த்தஸ்ஸ கா³மஸ்ஸ அந்தோ. அபரிக்கி²த்தே பன வத்து²ம்ஹி கா³மே வா டி²தட்டா²னமேவ டா²னம். அடவிமுக²ம் கரோதி…பே… ரக்க²தீதி தேன பயோகே³ன தஸ்ஸ இச்சி²தட்டா²னம் ஆக³தத்தா ரக்க²தி. கா³மதோ நிக்க²ந்தஸ்ஸாதி பரிக்கி²த்தகா³மதோ நிக்க²ந்தஸ்ஸ. கபிஞ்ஜரோ நாம அஞ்ஞமஞ்ஞம் யுஜ்ஜா²பனத்தா²ய பா³லஜனேஹி போஸாவனியபக்கி²ஜாதி.

வேஹாஸட்ட²கதா²வண்ணனா

97. வேஹாஸட்ட²கதா²யம் சி²ன்னமத்தே முத்தமத்தேதி யதா² சி²ன்னம் முத்தஞ்ச பகதிட்டா²னே ந திட்ட²தி, ததா² சே²த³னம் மோசனஞ்ச ஸந்தா⁴ய வுத்தம்.

உத³கட்ட²கதா²வண்ணனா

98. உத³கட்ட²கதா²யம் ஸந்த³மானஉத³கே நிக்கி²த்தம் ந திட்ட²தீதி ஆஹ ‘‘அஸந்த³னகே உத³கே’’தி. அனாபத்தீதி ஹத்த²வாரபத³வாரேஸு து³க்கடாபத்தியா அபா⁴வம் ஸந்தா⁴ய வுத்தம். கட்³ட⁴தீதி ஹேட்ட²தோ ஓஸாரேதி. ஸகலமுத³கந்தி த³ண்டே³ன பு²ட்டோ²காஸக³தம் ஸகலமுத³கம். ந உத³கம் டா²னந்தி அத்தனா கதட்டா²னஸ்ஸ அட்டா²னத்தா. பது³மினியந்தி பது³மக³ச்சே². கலாபப³ந்த⁴ந்தி ஹத்த²கவஸேன கு²த்³த³கம் கத்வா ப³த்³த⁴ம் கலாபப³த்³த⁴ம். பா⁴ரப³த்³த⁴ம் நாம ஸீஸபா⁴ராதி³வஸேன ப³த்³த⁴ம். முளாலந்தி கந்த³ம். பத்தம் வா புப்ப²ம் வாதி இத³ம் கத்³த³மஸ்ஸ அந்தோ பவிஸித்வா டி²தம் ஸந்தா⁴ய வுத்தம். நித்³த⁴மனதும்ப³ந்தி வாபியா உத³கஸ்ஸ நிக்க²மனனாளம். உத³கவாஹகந்தி மஹாமாதிகம். அவஹாரேன ஸோ ந காரேதப்³போ³தி இமினா பாணம் ஜீவிதா வோரோபனே ஆபத்தியா ஸப்³ப³த்த² ந முச்சதீதி தீ³பேதி. மாதிகம் ஆரோபேத்வாதி கு²த்³த³கமாதிகம் ஆரோபேத்வா. மரித்வா…பே… திட்ட²ந்தீதி ஏத்த² மதமச்சா²னம்யேவ தேஸம் ஸந்தகத்தா அமதே க³ண்ஹந்தஸ்ஸ நத்தி² அவஹாரோ.

நாவட்ட²கதா²வண்ணனா

99. நாவட்ட²கதா²யம் து²ல்லச்சயம்பி பாராஜிகம்பி ஹோதீதி ஏத்த² பட²மம் டா²னா அசாவேத்வா முத்தே து²ல்லச்சயம், பட²மம் பன டா²னா சாவேத்வா முத்தே பாராஜிகந்தி வேதி³தப்³ப³ம். பாஸே ப³த்³த⁴ஸூகரோ வியாதிஆதி³னா வுத்தம் ஸந்தா⁴யாஹ ‘‘தத்த² யுத்தி புப்³பே³ வுத்தாஏவா’’தி. விபன்னட்ட²னாவாதி விஸமவாதேஹி தே³ஸந்தரம் பலாதா, பி⁴ஜ்ஜித்வா வா வினாஸம் பத்வா உத³கே நிமுஜ்ஜித்வா ஹேட்டா² பூ⁴மிதலம் அப்பத்வா ஸாமிகேஹி ச அபரிச்சத்தாலயா வுச்சதி. ப³லவா ச வாதோ ஆக³ம்மாதி இமினா அஸதி வாதே அயம் பயோகோ³ கதோதி த³ஸ்ஸேதி. புக்³க³லஸ்ஸ நத்தி² அவஹாரோதி ஸுக்க²மாதிகாயம் உஜுகரணனயேன வுத்தம். தம் அத்தனோ பாதே³ன அனக்கமித்வா ஹத்தே²ன ச அனுக்கி²பித்வா அஞ்ஞஸ்மிம் த³ண்டா³தீ³ஸு ப³ந்தி⁴த்வா ட²பிதே யுஜ்ஜதி, அத்தனோ பாதே³ன அக்கமித்வா ஹத்தே²ன ச உக்கி²பித்வா டி²தஸ்ஸ பன ப³லவவாதேன ச²த்தசீவராதீ³ஸு பஹடேஸு பகதிம் விஜஹித்வா த³ள்ஹதரம் அக்கமனக³ஹணாதி³பயோகோ³ அபி⁴னவோ காதப்³போ³ ஸியா. இதரதா² ச²த்தசீவராதீ³னி வா விக³ச்ச²ந்தி, அவஹாரகோ வா ஸயம் பதிஸ்ஸதி, நாவா ச ததா³ ந க³மிஸ்ஸதி. தஸ்மா ஈதி³ஸே அபி⁴னவப்பயோகே³ ஸதி அவஹாரேன ப⁴விதப்³ப³ம். ஸுக்க²மாதிகாயம் உஜுகதாய உத³காக³மனகாலே காதப்³ப³கிச்சம் நத்தீ²தி தம் இத⁴ நித³ஸ்ஸனம் ந ஹோதி. தா³ஸம் பன பகதியா பலாயந்தம் ‘‘ஸீக⁴ம் யாஹீ’’தி வத்வா பகதிக³மனதோ துரிதக³மனுப்பாத³னாதி³னா இத⁴ நித³ஸ்ஸனேன ப⁴விதப்³ப³ந்தி அம்ஹாகம் க²ந்தி, வீமம்ஸித்வா க³ஹேதப்³ப³ம். வாதே ஆக³தேபி யத்த² அதிலஹுகத்தா நாவாய கஞ்சி பயோக³ம் அகத்வா பகதியா அவஹாரகோ திட்ட²தி, தத்தி²த³ம் அட்ட²கதா²யம் வுத்தந்தி க³ஹேதப்³ப³ம்.

யானட்ட²கதா²வண்ணனா

100. யானட்ட²கதா²யம் உபோ⁴ஸு பஸ்ஸேஸூதி சதுன்னம் த²ம்பா⁴னம் உபரி சதுரஸ்ஸம் தா³ருஸங்கா⁴டம் ஆரோபேத்வா தஸ்ஸ வாமத³க்கி²ணபஸ்ஸேஸு உபோ⁴ஸு வாதாதபாதி³பரிஸ்ஸயவினோத³னத்த²ம் க³ருளபக்கி²னோ உபோ⁴ பக்கா² விய கதா ஸந்த³மானிகா. து³கயுத்தஸ்ஸாதி த்³வீஹி கோ³ணேஹி யுத்தஸ்ஸ. அயுத்தகந்தி கோ³ணேஹி அயுத்தம். கப்பகதாதி த்³வின்னம் ஸிகா²னம் ஸந்தி⁴ட்டா²னே கோ³ஸிங்கா³னி விய த்³வே கோடியோ ட²பேத்வா உபத்த²ம்ப⁴னீ கப்பகதா நாம, ஸா த்³வீஹிபி கோடீஹி பூ⁴மியம் பதிட்டா²தி, தேனாஹ ‘‘ச² டா²னானீ’’தி. தீணி வா சத்தாரி வா டா²னானீதி அகப்பகதாய உபத்த²ம்ப⁴னியா ச த்³வின்னம் சக்கானஞ்ச வஸேன தீணி டா²னானி, கப்பகதாய வஸேன சத்தாரி டா²னானி, ததா² பத²வியம் ட²பிதஸ்ஸ தீணி டா²னானீதி ஸம்ப³ந்தோ⁴. அக்க²ஸீஸேஹீதி அக்க²தா³ருனோ த்³வீஹி கோடீஹி. அக்கு²த்³தீ⁴ஹீதி அக்க²தா³ருனா ஸம்படிச்ச²கா ஹேட்டி²மபா⁴கே³ கப்பகதா த்³வே தா³ருக²ண்டா³ அக்கு²த்³தி⁴யோ நாம, தாஸம் கப்பகதானம் த்³வின்னம் கப்பஸீஸானி சத்தாரி இத⁴ ‘‘அக்கு²த்³தி⁴யோ’’தி வுச்சந்தி, தேனாஹ ‘‘சதூஹி ச அக்கு²த்³தீ⁴ஹீ’’தி. தாஹி பதிட்டி²தாஹி பதிட்டி²தட்டா²னானி சத்தாரி து⁴ரேன பதிட்டி²தட்டா²னம் ஏகந்தி பஞ்ச டா²னானி ஹோந்தி. உத்³தி⁴யோவ ‘‘உத்³தி⁴கா²ணுகா’’தி வுத்தா, உத்³தி⁴கா²ணுகானம் அபா⁴வே அக்க²ஸீஸானம் பதிட்டா²னோகாஸம் த³ஸ்ஸேந்தோ ஆஹ ஸமமேவ பா³ஹம் கத்வாதிஆதி³. தத்த² ஸமமேவாதி உத்³தி⁴யோ ஹேட்டா² அனோலம்பே³த்வா பா³ஹுனோ ஹேட்டி²மபா⁴க³ம் ஸமம் கத்வா த்³வின்னம் பா³ஹுதா³ரூனம் மஜ்ஜே² அக்க²ஸீஸப்பமாணேன சி²த்³த³ம் கத்வா தத்த² அக்க²ஸீஸானி பவேஸிதானி ஹோந்தி, தேன பா³ஹானம் ஹேட்டா²பா⁴க³ம் ஸப்³ப³ம் பூ⁴மிம் பு²ஸித்வா திட்ட²தி, தேனாஹ ‘‘ஸப்³ப³ம் பத²விம் பு²ஸித்வா திட்ட²தீ’’தி. ஸேஸம் நாவாயம் வுத்தஸதி³ஸந்தி இமினா யதி³ பன தம் ஏவம் க³ச்ச²ந்தம் பகதிக³மனம் பச்சி²ந்தி³த்வா அஞ்ஞம் தி³ஸாபா⁴க³ம் நேதி, பாராஜிகம். ஸயமேவ யம் கிஞ்சி டா²னம் ஸம்பத்தம் டா²னா அசாலேந்தோவ விக்கிணித்வா க³ச்ச²தி, நேவத்தி² அவஹாரோ, ப⁴ண்ட³தே³ய்யம் பன ஹோதீதி இமம் நயம் அதிதி³ஸதி.

பா⁴ரட்ட²கதா²வண்ணனா

101. பா⁴ரட்ட²கதா²யம் பா⁴ரட்ட²ந்தி மாதிகாபத³ஸ்ஸ பா⁴ரோ நாமாதி இத³ம் அத்த²த³ஸ்ஸனந்தி ஆஹ ‘‘பா⁴ரோயேவ பா⁴ரட்ட²’’ந்தி. புரிமக³லேதி க³லஸ்ஸ புரிமபா⁴கே³. க³லவாடகோதி கீ³வாய உபரிமக³லவாடகோ. உரபரிச்சே²த³மஜ்ஜே²தி உரபரியந்தஸ்ஸ மஜ்ஜே². ஸாமிகேஹி அனாணத்தோதி இத³ம் யதி³ ஸாமிகேஹி ‘‘இமம் பா⁴ரம் நேத்வா அஸுகட்டா²னே தே³ஹீ’’தி ஆணத்தோ ப⁴வேய்ய, ததா³ தேன க³ஹிதப⁴ண்ட³ம் உபனிக்கி²த்தம் ஸியா, தஞ்ச தே²ய்யசித்தேன ஸீஸாதி³தோ ஓரோபேந்தஸ்ஸாபி அவஹாரோ ந ஸியா, ஸாமிகானம் பன து⁴ரனிக்கே²பே ஏவ ஸியாதி ததோ உபனிக்கி²த்தப⁴ண்ட³பா⁴வதோ வியோஜேதும் வுத்தம், தேனேவ வக்க²தி ‘‘தேஹி பன அனாணத்தத்தா பாராஜிக’’ந்தி. க⁴ம்ஸந்தோதி ஸீஸதோ அனுக்கி²பந்தோ, யதி³ உக்கி²பேய்ய, உக்கி²த்தமத்தே பாராஜிகம், தேனாஹ ஸீஸதோ கேஸக்³க³மத்தம்பீதிஆதி³. யோ சாயந்தி யோ அயம் வினிச்ச²யோ.

ஆராமட்ட²கதா²வண்ணனா

102. ஆராமட்ட²கதா²யம் ஆராமம் அபி⁴யுஞ்ஜதீதி இத³ம் அபி⁴யோக³கரணம் பரேஸம் பூ⁴மட்ட²ப⁴ண்டா³தீ³ஸுபி காதும் வட்டதியேவ. ஆராமாதி³தா²வரேஸு பன யேபு⁴ய்யேன அபி⁴யோக³வஸேனேவ க³ஹணஸம்ப⁴வதோ ஏத்தே²வ பாளியம் அபி⁴யோகோ³ வுத்தோ, இதி இமினா நயேன ஸப்³ப³த்தா²பி ஸக்கா ஞாதுந்தி க³ஹேதப்³ப³ம். அதி³ன்னாதா³னஸ்ஸ பயோக³த்தாதி ஸஹபயோக³மாஹ. வத்து²ம்ஹியேவ கதபயோக³த்தா ஸஹபயோக³வஸேன ஹேதம் து³க்கடம். ஸயம்பீதி அபி⁴யுஞ்ஜகோபி. ‘‘கிம் கரோமி கிம் கரோமீ’’தி ஏவம் கிங்காரமேவ படிஸ்ஸுணந்தோ விய சரதீதி கிங்காரபடிஸ்ஸாவீ, தஸ்ஸ பா⁴வோ கிங்காரபடிஸ்ஸாவிபா⁴வோ, தஸ்மிம், அத்தனோ வஸவத்திபா⁴வேதி வுத்தம் ஹோதி. உக்கோசந்தி லஞ்ஜம். ஸப்³பே³ஸம் பாராஜிகந்தி கூடவினிச்ச²யிகாதீ³னம். அயம் வத்து²ஸாமீதிஆதி³கஸ்ஸ உபி⁴ன்னம் து⁴ரனிக்கே²பகரணஹேதுனோ பயோக³ஸ்ஸ கரணக்க²ணேவ பாராஜிகம் ஹோதீதி வேதி³தப்³ப³ம். ஸசே பன ஸாமிகஸ்ஸ விமதி ச து⁴ரனிக்கே²போ ச கமேன உப்பஜ்ஜந்தி, பயோக³ஸமுட்டா²பகசித்தக்க²ணே பாராஜிகமேவ ஹோதி, ந து²ல்லச்சயம். யதி³ விமதியேவ உப்பஜ்ஜதி, ததா³ து²ல்லச்சயமேவாதி வேதி³தப்³ப³ம், அயம் நயோ ஸப்³ப³த்த² யதா²னுரூபம் க³ஹேதப்³போ³. து⁴ரனிக்கே²பவஸேனேவ பராஜயோதி ஸாமிகோ ‘‘அஹம் ந முச்சாமீ’’தி து⁴ரம் அனிக்கி²பந்தோ அட்டோ பராஜிதோ நாம ந ஹோதீதி த³ஸ்ஸேதி.

விஹாரட்ட²கதா²வண்ணனா

103. விஹாரட்ட²கதா²யம் விஹாரந்தி உபசாரஸீமாஸங்கா²தம் ஸகலம் விஹாரம். பரிவேணந்தி தஸ்ஸ விஹாரஸ்ஸ அப்³ப⁴ந்தரே விஸும் விஸும் பாகாராதி³பரிச்சி²ன்னட்டா²னம். ஆவாஸந்தி ஏகம் ஆவஸத²மத்தம். க³ணஸந்தகே பரிச்சி²ன்னஸாமிகத்தா ஸக்கா து⁴ரம் நிக்கி²பாபேதுந்தி ஆஹ ‘‘தீ³க⁴பா⁴ணகாதி³பே⁴த³ஸ்ஸ பன க³ணஸ்ஸா’’தி. இதா⁴பி ஸசே ஏகோபி து⁴ரம் ந நிக்கி²பதி, ரக்க²தியேவ. ஏஸ நயோ ப³ஹூனம் ஸந்தகே ஸப்³ப³த்த².

கே²த்தட்ட²கதா²வண்ணனா

104. கே²த்தட்ட²கதா²யம் நிரும்பி⁴த்வா வாதிஆதீ³ஸு க³ண்ஹந்தஸ்ஸாதி பச்சேகம் யோஜேதப்³ப³ம், தத்த² நிரும்பி⁴த்வா க³ஹணம் நாம வீஹிஸீஸம் அச்சி²ந்தி³த்வா யதா²டி²தமேவ ஹத்தே²ன க³ஹேத்வா ஆகட்³டி⁴த்வா பீ³ஜமத்தஸ்ஸேவ க³ஹணம். ஏகமேகந்தி ஏகம் வீஹிஸீஸம். யஸ்மிம் பீ³ஜே வாதிஆதி³ நிரும்பி⁴த்வா க³ஹணாதீ³ஸு யதா²க்கமம் யோஜேதப்³ப³ம். ‘‘தஸ்மிம் ப³ந்த⁴னா மோசிதமத்தே’’தி வசனதோ தஸ்மிம் பீ³ஜாதி³ம்ஹி ப³ந்த⁴னா முத்தே ஸதி ததோ அனபனீதேபி டா²னந்தரஸ்ஸ அபா⁴வா பாராஜிகமேவ. யஸ்ஸ பன ஸீஸாதி³கஸ்ஸ ஸந்தராதி³னா ஸஹ ஸம்ஸிப்³ப³னம் வா ஏகாப³த்³த⁴தா வா ஹோதி, தஸ்ஸ ப³ந்த⁴னா மோசிதே து²ல்லச்சயம், இதரட்டா²னதோ மோசிதே பாராஜிகந்தி க³ஹேதப்³ப³ம், தேனாஹ வீஹினாளந்திஆதி³. ஸபு⁴ஸந்தி பலாலஸஹிதம். கீ²லேனாதி கா²ணுகேன. ஏத்த² ச கீ²லஸங்கமனாதீ³ஸு ஸஹபயோகோ³ து⁴ரனிக்கே²போ சாதி உப⁴யம் ஸம்ப⁴வதி. கீ²லஸங்கமனாதி³ ஏத்த² ஸஹபயோகோ³. தஸ்மிஞ்ச கதே யதி³ ஸாமிகா து⁴ரம் ந நிக்கி²பந்தி புன க³ண்ஹிதுகாமாவ ஹோந்தி, ந தாவ அவஹாரோ, ‘‘கீ²லம் ஸங்காமேத்வா கே²த்தாதி³ம் அஸுகோ ராஜவல்லபோ⁴ பி⁴க்கு² க³ண்ஹிதுகாமோ’’தி ஞத்வா தஸ்ஸ ப³லம் கக்க²ளாதி³பா⁴வஞ்ச நிஸ்ஸாய கீ²லஸங்கமனாதி³கிரியானிட்டா²னதோ பட²மமேவ ஸாமிகா து⁴ரம் நிக்கி²பந்தி, ந அவஹாரோ ஏதஸ்ஸ பயோக³னிட்டா²னதோ புரேதரமேவ து⁴ரஸ்ஸ நிக்கி²த்தத்தா. யதா³ பன கீ²லஸங்கமனாதி³பயோகே³னேவ து⁴ரனிக்கே²போ ஹோதி, ததா³யேவ அவஹாரோ, தேனேவேத்த² ‘‘தஞ்ச கோ² ஸாமிகானம் து⁴ரனிக்கே²பேனா’’தி வுத்தம். கீ²லாதீ³னம் ஸங்கமிதபா⁴வம் அஜானித்வா ஸாமிகானம் ஸம்படிச்ச²னம்பேத்த² து⁴ரனிக்கே²போதி வேதி³தப்³போ³. ஏவம் ஸப்³ப³த்தா²தி யதா²வுத்தமத்த²ம் ரஜ்ஜுஸங்கமனாதீ³ஸுபி அதிதி³ஸதி. யட்டி²ந்தி மானத³ண்ட³ம். ஏகஸ்மிம் அனாக³தே து²ல்லச்சயம், தஸ்மிம் ஆக³தே பாராஜிகந்தி ஸசே தா³ரூனி நிக²ணித்வா தத்தகேனேவ க³ண்ஹிதுகாமோ ஹோதி, அவஸானே தா³ரும்ஹி பாராஜிகம். ஸசே தத்த² கண்டகஸாகா²தீ³ஹி பாதா³னம் அந்தரம் படிச்சா²தே³த்வா கஸ்ஸசி அப்பவேஸாரஹம் கத்வா க³ஹேதுகாமோ ஹோதி, அவஸானஸாகா²ய பாராஜிகம், தேனாஹ ‘‘ஸாகா²பரிவாரேனேவ அத்தனோ காதும் ஸக்கோதீ’’தி, தா³ரூனி ச நிக²ணித்வா ஸாகா²பரிவாரஞ்ச கத்வா ஏவ அத்தனோ ஸந்தகம் காதும் ஸக்கோதீதி அத்தோ². கே²த்தமரியாத³ந்தி வுத்தமேவத்த²ம் விபா⁴வேதும் ‘‘கேதா³ரபாளி’’ந்தி வுத்தம். இத³ஞ்ச கீ²லஸங்கமனாதி³னா க³ஹணம் ஆராமாதீ³ஸுபி லப்³ப⁴தேவ.

வத்து²ட்ட²கதா²வண்ணனா

105. வத்து²ட்ட²கதா²யம் திண்ணம் பாகாரானந்தி இட்ட²கஸிலாதா³ரூனம் வஸேன திண்ணம் பாகாரானம்.

106. கா³மட்ட²கதா²யம் ‘‘கா³மோ நாமா’’தி பாளியம் ந வுத்தம் ஸப்³ப³ஸோ கா³மலக்க²ணஸ்ஸ புப்³பே³ வுத்தத்தா.

அரஞ்ஞட்ட²கதா²வண்ணனா

107. அரஞ்ஞட்ட²கதா²யம் வினிவிஜ்ஜி²த்வாதி உஜுகமேவ வினிவிஜ்ஜி²த்வா. லக்க²ணச்சி²ன்னஸ்ஸாதி அரஞ்ஞஸாமிகானம் ஹத்த²தோ கிணித்வா க³ண்ஹந்தேஹி கதஅக்க²ராதி³ஸஞ்ஞாணஸ்ஸ. ச²ல்லியா பரியோனத்³த⁴ந்தி இமினா ஸாமிகானம் நிராபேக்க²தாய சிரச²ட்³டி³தபா⁴வம் தீ³பேதி, தேனாஹ ‘‘க³ஹேதும் வட்டதீ’’தி. யதி³ ஸாமிகானம் ஸாபேக்க²தா அத்தி², ந வட்டதி. தானி கதானி அஜ்ஜா²வுத்தா²னி ச ஹோந்தீதி தானி கே³ஹாதீ³னி கதானி பரினிட்டி²தானி மனுஸ்ஸேஹி ச அஜ்ஜா²வுத்தா²னி ச ஹோந்தி. தா³ரூனீதி கே³ஹாதீ³னம் கதத்தா அவஸிட்ட²தா³ரூனி. க³ஹேதும் வட்டதீதி ஸாமிகானம் அனாலயத்தா வுத்தம், தே ச யதி³ க³ஹணகாலே தி³ஸ்வா ஸாலயா ஹுத்வா வாரேந்தி, க³ஹேதும் ந வட்டதியேவ. ‘‘தே³ஹீ’’தி வுத்தே தா³தப்³ப³மேவாதி ‘‘தே³ஹீ’’தி வுத்தே ‘‘த³ஸ்ஸாமீ’’தி ஆபோ⁴க³ம் கத்வா க³ச்ச²ந்தஸ்ஸ ‘‘தே³ஹீ’’தி அவுத்தே அத³த்வா க³மனே ஆபத்தி நத்தி². பச்சா²பி தேஹி சோதி³தே தா³தப்³ப³மேவ.

அதி³ஸ்வா க³ச்ச²தி, ப⁴ண்ட³தே³ய்யந்தி ஸுத்³த⁴சித்தேன க³தஸ்ஸ ப⁴ண்ட³தே³ய்யம். ஆரக்க²ட்டா²னம்பி ஸுத்³த⁴சித்தேன அதிக்கமித்வா தே²ய்யசித்தே உப்பன்னேபி அவஹாரோ நத்தி² ஆரக்க²ட்டா²னஸ்ஸ அதிக்கந்தத்தா. கேசி பன ‘‘யத்த² கத்த²சி நீதானம்பி தா³ரூனம் அரஞ்ஞஸாமிகானஞ்ஞேவ ஸந்தகத்தா புன தே²ய்யசித்தம் உப்பாதே³த்வா க³ச்ச²தி, பாராஜிகமேவா’’தி வத³ந்தி, தம் ந யுத்தம் ‘‘ஆரக்க²ட்டா²னம் பத்வா…பே… அஸ்ஸதியா அதிக்கமதீ’’தி, ஸஹஸா தம் டா²னம் அதிக்கமதீதிஆதி³னா (பாரா. அட்ட². 1.107) ச ஆரக்க²ட்டா²னாதிக்கமேயேவ ஆபத்தியா வுச்சமானத்தா, ஆரக்க²ட்டா²னாதிக்கமமேவ ஸந்தா⁴ய ‘‘இத³ம் பன தே²ய்யசித்தேன பரிஹரந்தஸ்ஸ ஆகாஸேன க³ச்ச²தோபி பாராஜிகமேவா’’தி வுத்தம். யஞ்ச ‘‘யத்த² கத்த²சி நீதானம்பி தா³ரூனம் அரஞ்ஞஸாமிகானஞ்ஞேவ ஸந்தகத்தா’’தி காரணம் வுத்தம், தம்பி ஆரக்க²ட்டா²னதோ ப³ஹி பாராஜிகாபஜ்ஜனஸ்ஸ காரணம் ந ஹோதி ப⁴ண்ட³தே³ய்யபா⁴வஸ்ஸேவ காரணத்தா. தேஸம் ஸந்தகத்தேனேவ ஹி ப³ஹி கதஸ்ஸாபி ப⁴ண்ட³தே³ய்யம் ஜாதம், இதரதா² ச ப⁴ண்ட³தே³ய்யம்பி ந ஸியா ஸுங்ககா⁴தாதிக்கமே விய. அத்³தி⁴கேஹி தி³ன்னமேவ ஸுங்கிகானம் ஸந்தகம் ஹோதி, நாதி³ன்னம், தேன தம் டா²னம் யதோ குதோசி பச்சயதோ ஸுத்³த⁴சித்தேன அதிக்கந்தஸ்ஸ ப⁴ண்ட³தே³ய்யம்பி ந ஹோதி. இத⁴ பன அரஞ்ஞஸாமிகானம் ஸந்தகத்தா ஸப்³ப³த்தா²பி ப⁴ண்ட³தே³ய்யமேவ ஹோதி, தேனேவேதம் அரஞ்ஞே ஆரக்க²ட்டா²னம் ஸுங்ககா⁴ததோபி க³ருதரம் ஜாதம். யதி³ ஹி ஆரக்க²ட்டா²னதோ ப³ஹிபி தே²ய்யசித்தே ஸதி அவஹாரோ ப⁴வேய்ய, ஆரக்க²ட்டா²னம் பத்வாதிஆதி³னா டா²னனியமோ நிரத்த²கோ ஸியா யத்த² கத்த²சி தே²ய்யசித்தே உப்பன்னே பாராஜிகந்தி வத்தப்³ப³தோ. தஸ்மா ஆரக்க²ட்டா²னதோ ப³ஹி தே²ய்யசித்தேன க³ச்ச²ந்தஸ்ஸ அவஹாரோ ந ப⁴வதி ஏவாதி நிட்ட²மேத்த² க³ந்தப்³ப³ம். இத³ம் பன தே²ய்யசித்தேன பரிஹரந்தஸ்ஸாதி யஸ்மிம் பதே³ஸே அதிக்கந்தே தேஸம் அரஞ்ஞம் ஆரக்க²ட்டா²னஞ்ச அதிக்கந்தோ நாம ஹோதி, தம் பதே³ஸம் ஆகாஸேனாபி அதிக்கமனவஸேன க³ச்ச²ந்தஸ்ஸாபீதி அத்தோ².

உத³ககதா²வண்ணனா

108. உத³ககதா²யம் மஹாகுச்சி²கா உத³கசாடி உத³கமணிகோ, ‘‘ஸமேக²லா சாடி உத³கமணிகோ’’திபி வத³ந்தி. தத்தா²தி தேஸு பா⁴ஜனேஸு. பூ⁴தகா³மேன ஸத்³தி⁴ம்பீதி பி-ஸத்³தே³ன அகப்பியபத²விம்பி ஸங்க³ண்ஹாதி. தளாகரக்க²ணத்தா²யாதி ‘‘மஹோத³கம் ஆக³ந்த்வா தளாகமரியாத³ம் மா சி²ந்தீ³’’தி தளாகரக்க²ணத்த²ம். நிப்³ப³ஹனஉத³கந்தி ஏத்த² தளாகஸ்ஸ ஏகேன உன்னதேன பஸ்ஸேன அதி⁴கஜலம் நிப்³ப³ஹதி நிக³ச்ச²தி ஏதேனாதி ‘‘நிப்³ப³ஹன’’ந்தி அதி⁴கஜலனிக்க²மனமாதிகா வுச்சதி. தத்த² க³ச்ச²மானம் உத³கம் நிப்³ப³ஹனஉத³கம் நாம. நித்³த⁴மனதும்ப³ந்தி ஸஸ்ஸாதீ³னம் அத்தா²ய இட்ட²காதீ³ஹி கதம் உத³கனிக்க²மனபனாளி. மரியாத³ம் து³ப்³ப³லம் கத்வாதி ஏத்த² து³ப்³ப³லம் அகத்வாபி யதா²வுத்தப்பயோகே³ கதே மரியாத³ம் சி²ந்தி³த்வா நிக்க²ந்தஉத³கக்³கா⁴னுரூபேன அவஹாரேன கத்தப்³ப³மேவ. யத்தகம் தப்பச்சயா ஸஸ்ஸம் உப்பஜ்ஜதீதி பீ³ஜகஸிகம்மாதி³ப்³ப³யம் ட²பேத்வா யம் அதி⁴கலாப⁴ம் உப்பஜ்ஜதி, தம் ஸந்தா⁴ய வுத்தம். ந ஹி தேஹி காதப்³ப³ம் வயகரணம்பி ஏதஸ்ஸ தா³தப்³ப³ம். இத³ஞ்ச தருணஸஸ்ஸே ஜாதே உத³கம் வினாஸேந்தஸ்ஸ யுஜ்ஜதி, ஸஸ்ஸே பன ஸப்³ப³தா² அகதேயேவ உத³கம் வினாஸேந்தேன ச உத³கக்³க⁴மேவ தா³தப்³ப³ம், ந தப்பச்சயா ஸகலம் ஸஸ்ஸம் தேன வினாஸிதப⁴ண்ட³ஸ்ஸேவ ப⁴ண்ட³தே³ய்யத்தா, இதரதா² வாணிஜ்ஜாதி³அத்தா²ய பரேஹி ட²பிதப⁴ண்ட³ம் அவஹரந்தஸ்ஸ தது³ப⁴யம்பி க³ஹேத்வா ப⁴ண்ட³க்³க⁴ம் காதப்³ப³ம் ஸியா, தஞ்ச ந யுத்தந்தி அம்ஹாகம் க²ந்தி. ஸாமிகானம் து⁴ரனிக்கே²பேனாதி ஏத்த² ஏகஸ்ஸ ஸந்தகே தளாகே கே²த்தே ச ஜாதே தஸ்ஸேவ து⁴ரனிக்கே²பேன பாராஜிகம், யதி³ பன தம் தளாகம் ஸப்³ப³ஸாதா⁴ரணம், கே²த்தானி பாடிபுக்³க³லிகானி, தஸ்ஸ தஸ்ஸ புக்³க³லஸ்ஸேவ து⁴ரனிக்கே²பே அவஹாரோ, அத² கே²த்தானிபி ஸப்³ப³ஸாதா⁴ரணானி, ஸப்³பே³ஸம் து⁴ரனிக்கே²பேயேவ பாராஜிகம், நாஸதீதி த³ட்ட²ப்³ப³ம்.

அனிக்³க³தேதி அனிக்க²ந்தே, தளாகேயேவ டி²தேதி அத்தோ². பரேஸம் மாதிகாமுக²ந்தி கு²த்³த³கமாதிகாமுக²ம். அஸம்பத்தேவாதி தளாகதோ நிக்க²மித்வா மஹாமாதிகாயம் ஏவ டி²தே. அனிக்க²ந்தே ப³த்³தா⁴ ஸுப³த்³தா⁴தி தளாகதோ அனிக்க²ந்தே ப⁴ண்ட³தே³ய்யம்பி ந ஹோதி ஸப்³ப³ஸாதா⁴ரணத்தா உத³கஸ்ஸாதி அதி⁴ப்பாயோ. நிக்க²ந்தே பன பாடிபுக்³க³லிகம் ஹோதீதி ஆஹ ‘‘நிக்க²ந்தே ப³த்³தா⁴ ப⁴ண்ட³தே³ய்ய’’ந்தி. இத⁴ பன கு²த்³த³கமாதிகாயம் அப்பவிட்ட²த்தா அவஹாரோ ந ஜாதோ, ‘‘தளாகதோ அனிக்³க³தே பரேஸம் மாதிகாமுக²ம் அஸம்பத்தேவா’’தி ஹேட்டா² வுத்தஸ்ஸ விகப்பத்³வயஸ்ஸ ‘‘அனிக்க²ந்தே ப³த்³தா⁴ ஸுப³த்³தா⁴, நிக்க²ந்தே ப³த்³தா⁴ ப⁴ண்ட³தே³ய்ய’’ந்தி இத³ம் த்³வயம் யதா²க்கமேன யோஜனத்த²ம் வுத்தம். நத்தி² அவஹாரோதி ஏத்த² ‘‘அவஹாரோ நத்தி², ப⁴ண்ட³தே³ய்யம் பன ஹோதீ’’தி கேசி வத³ந்தி, தம் ந யுத்தம். வத்து²ம்…பே… ந ஸமேதீதி ஏத்த² தளாகக³தஉத³கஸ்ஸ ஸப்³ப³ஸாதா⁴ரணத்தா பரஸந்தகவத்து² ந ஹோதீதி அதி⁴ப்பாயோ.

த³ந்தபோனகதா²வண்ணனா

109. த³ந்தகட்ட²கதா²யம் ததோ பட்டா²ய அவஹாரோ நத்தீ²தி ‘‘யதா²ஸுக²ம் பி⁴க்கு²ஸங்கோ⁴ பரிபு⁴ஞ்ஜதூ’’தி அபா⁴ஜேத்வாவ யாவதி³ச்ச²கம் க³ஹணத்த²மேவ ட²பிதத்தா அரக்கி²தத்தா ஸப்³ப³ஸாதா⁴ரணத்தா ச அஞ்ஞம் ஸங்கி⁴கம் விய ந ஹோதீதி தே²ய்யசித்தேன க³ண்ஹந்தஸ்ஸாபி நத்தி² அவஹாரோ. கா²த³ந்து, புன ஸாமணேரா ஆஹரிஸ்ஸந்தீதி கேசி தே²ரா வதே³ய்யுந்தி யோஜேதப்³ப³ம்.

வனப்பதிகதா²வண்ணனா

110. வனப்பதிகதா²யம் ஸந்தா⁴ரிதத்தாதி சி²ன்னஸ்ஸ ருக்க²ஸ்ஸ பதிதும் ஆரத்³த⁴ஸ்ஸ ஸந்தா⁴ரணமத்தேன வுத்தம், ந பன மரிசவல்லிஆதீ³ஹி புப்³பே³ வேடே²த்வா டி²தபா⁴வேன. தாதி³ஸே ஹி சி²ன்னேபி அவஹாரோ நத்தி² அரஞ்ஞட்ட²கதா²யம் வேடி²தவல்லியம் விய. உஜுகமேவ திட்ட²தீதி இமினா ஸப்³ப³ஸோ சி²ந்த³னமேவ வல்லிஆதீ³ஹி அஸம்ப³த்³த⁴ஸ்ஸ ருக்க²ஸ்ஸ டா²னாசாவனம் புப்³பே³ விய ஆகாஸாதீ³ஸு பு²ட்ட²ஸகலபதே³ஸதோ மோசனந்தி ஆவேணிகமித⁴ டா²னாசாவனம் த³ஸ்ஸேதி. கேசி பன ‘‘ருக்க²பா⁴ரேன கிஞ்சிதே³வ ப⁴ஸ்ஸித்வா டி²தத்தா ஹோதியேவ டா²னாசாவன’’ந்தி வத³ந்தி, தன்ன, ருக்கே²ன பு²ட்ட²ஸ்ஸ ஸகலஸ்ஸ ஆகாஸபதே³ஸஸ்ஸ பஞ்சஹி ச²ஹி வா ஆகாரேஹி அனதிக்கமிதத்தா. வாதமுக²ம் ஸோதே⁴தீதி யதா² வாதோ ஆக³ந்த்வா ருக்க²ம் பாதேதி, ஏவம் வாதஸ்ஸ ஆக³மனமக்³க³ம் ருந்தி⁴த்வா டி²தானி ஸாகா²கு³ம்பா³தீ³னி சி²ந்தி³த்வா அபனேந்தோ ஸோதே⁴தி. மண்டூ³ககண்டகம் வாதி மண்டூ³கானம் நங்கு³ட்டே² அக்³க³கோடியம் டி²தகண்டகந்தி வத³ந்தி, ஏகே ‘‘விஸமச்ச²கண்டக’’ந்திபி வத³ந்தி.

ஹரணககதா²வண்ணனா

111. ஹரணககதா²யம் ஹரணகந்தி வத்து²ஸாமினா ஹரியமானம். ஸோ ச பாத³ம் அக்³க⁴தி, பாராஜிகமேவாதி ‘‘அந்தம் ந க³ண்ஹிஸ்ஸாமீ’’தி அஸல்லக்கி²தத்தா ஸாமஞ்ஞதோ ‘‘க³ண்ஹிஸ்ஸாமி ஏத’’ந்தி ஸல்லக்கி²தஸ்ஸேவ படஸ்ஸ ஏகதே³ஸதாய தம்பி க³ண்ஹிதுகாமோவாதி பாராஜிகம் வுத்தம். ஸப⁴ண்ட³ஹாரகந்தி ஸஹப⁴ண்ட³ஹாரகம், ஸகாராதே³ஸஸ்ஸ விகப்பத்தா ஸஹ ஸத்³தோ³வ டி²தோ, ப⁴ண்ட³ஹாரகேன ஸஹ தம் ப⁴ண்ட³ந்தி அத்தோ². ஸாஸங்கோதி ‘‘யதி³ உபஸங்கமித்வா ப⁴ண்ட³ம் க³ண்ஹிஸ்ஸாமி, ஆவுதே⁴ன மம் பஹரேய்யா’’தி ப⁴யேன ஸஞ்ஜாதாஸங்கோ. ஏகமந்தம் படிக்கம்மாதி ப⁴யேனேவ அனுபக³ந்த்வா மக்³க³தோ ஸயம் படிக்கம்ம. ஸந்தஜ்ஜேத்வாதி ப²ருஸவாசாய சேவ ஆவுத⁴பரிவத்தனாதி³காயவிகாரேன ச ஸந்தஜ்ஜேத்வா. அனஜ்ஜா²வுத்த²கந்தி அபரிக்³க³ஹிதகம். ஆலயேன அனதி⁴முத்தம்பி ப⁴ண்ட³ம் அனஜ்ஜா²வுத்த²கம் நாம ஹோதீதி ஆஹ ‘‘ஆஹராபேந்தே தா³தப்³ப³’’ந்தி, இமினா பட²மம் பரிச்சத்தாலயானம்பி யதி³ பச்சா²பி ஸகஸஞ்ஞா உப்பஜ்ஜதி, தேஸஞ்ஞேவ தம் ப⁴ண்ட³ம் ஹோதி, ப³லக்காரேனாபி ஸகஸஞ்ஞாய தஸ்ஸ க³ஹணே தோ³ஸோ நத்தி², அத³த³ந்தஸ்ஸேவ அவஹாரோதி த³ஸ்ஸேதி. யதி³ பன ஸாமினோ ‘‘பரிச்சத்தம் மயா பட²மம், இதா³னி மம ஸந்தகம் வா ஏதம், நோ’’தி ஆஸங்கா ஹோதி, ப³லக்காரேன க³ஹேதும் ந வட்டதி ஸகஸஞ்ஞாப³லேனேவ புன க³ஹேதப்³ப³பா⁴வஸ்ஸ ஆபன்னத்தா. ‘‘அதே³ந்தஸ்ஸ பாராஜிக’’ந்தி வசனதோ சோரஸ்ஸ ஸகஸஞ்ஞாய விஜ்ஜமானாயபி ஸாமிகேஸு ஸாலயேஸு அதா³தும் ந வட்டதீதி தீ³பிதம் ஹோதி. அஞ்ஞேஸூதி மஹாபச்சரியாதீ³ஸு. விசாரணாயேவ நத்தீ²தி இமினா தத்தா²பி படிக்கே²பாபா⁴வதோ அயமேவ அத்தோ²தி த³ஸ்ஸேதி.

உபனிதி⁴கதா²வண்ணனா

112. உபனிதி⁴கதா²யம் ஸங்கோ³பனத்தா²ய அத்தனோ ஹத்தே² நிக்கி²த்தஸ்ஸ ப⁴ண்ட³ஸ்ஸ கு³த்தட்டா²னே படிஸாமனப்பயோக³ம் வினா நாஹம் க³ண்ஹாமீதிஆதி³னா அஞ்ஞஸ்மிம் பயோகே³ அகதே ரஜ்ஜஸங்கோ²பா⁴தி³காலே ‘‘ந தா³னி தஸ்ஸ த³ஸ்ஸாமி, ந மய்ஹம் தா³னி த³ஸ்ஸதீ’’தி உபோ⁴ஹிபி ஸகஸகட்டா²னே நிஸீதி³த்வா து⁴ரனிக்கே²பே கதேபி அவஹாரோ நத்தி². கேசி பனேத்த² ‘‘பாராஜிகமேவ படிஸாமனப்பயோக³ஸ்ஸ கதத்தா’’தி வத³ந்தி, தம் தேஸம் மதிமத்தம், ந ஸாரதோ பச்சேதப்³ப³ம். படிஸாமனகாலே ஹிஸ்ஸ தே²ய்யசித்தம் நத்தி², ‘‘ந தா³னி தஸ்ஸ த³ஸ்ஸாமீ’’தி தே²ய்யசித்துப்பத்திக்க²ணே பன ஸாமினோ து⁴ரனிக்கே²பசித்துப்பத்தியா ஹேதுபூ⁴தோ காயவசீபயோகோ³ நத்தி², யேன ஸோ ஆபத்திம் ஆபஜ்ஜேய்ய. ந ஹி அகிரியஸமுட்டா²னாயம் ஆபத்தீதி. தா³னே ஸஉஸ்ஸாஹோ, ரக்க²தி தாவாதி அவஹாரம் ஸந்தா⁴ய அவுத்தத்தா நாஹம் க³ண்ஹாமீதிஆதி³னா முஸாவாத³கரணே பாசித்தியமேவ ஹோதி, ந து³க்கடம் தே²ய்யசித்தாபா⁴வேன ஸஹபயோக³ஸ்ஸாபி அபா⁴வதோதி க³ஹேதப்³ப³ம். யதி³பி முகே²ன த³ஸ்ஸாமீதி வத³தி…பே… பாராஜிகந்தி ஏத்த² கதரபயோகே³ன ஆபத்தி, ந தாவ பட²மேன ப⁴ண்ட³படிஸாமனப்பயோகே³ன ததா³ தே²ய்யசித்தாபா⁴வா, நாபி ‘‘த³ஸ்ஸாமீ’’தி கத²னப்பயோகே³ன ததா³ தே²ய்யசித்தே விஜ்ஜமானேபி பயோக³ஸ்ஸ கப்பியத்தாதி? வுச்சதே – ஸாமினா ‘‘தே³ஹீ’’தி ப³ஹுஸோ யாசியமானோபி அத³த்வா யேன பயோகே³ன அத்தனோ அதா³துகாமதம் ஸாமிகஸ்ஸ ஞாபேதி, யேன ச ஸோ ‘‘அதா³துகாமோ அயம் விக்கி²பதீ’’தி ஞத்வா து⁴ரம் நிக்கி²பதி, தேனேவ பயோகே³னஸ்ஸ ஆபத்தி. ந ஹேத்த² உபனிக்கி²த்தப⁴ண்டே³ பரியாயேன முத்தி அத்தி². அதா³துகாமதாய ஹி கதா³ தே தி³ன்னம், கத்த² தே தி³ன்னந்திஆதி³பரியாயவசனேனாபி ஸாமிகஸ்ஸ து⁴ரே நிக்கி²பாபிதே ஆபத்தியேவ. தேனேவ அட்ட²கதா²யம் வுத்தம் – ‘‘கிம் தும்ஹே ப⁴ணத²…பே… ஏவம் உபி⁴ன்னம் து⁴ரனிக்கே²பேன பி⁴க்கு²னோ பாராஜிக’’ந்தி (பாரா. அட்ட². 1.111). பரஸந்தகஸ்ஸ பரேஹி க³ண்ஹாபனே ஏவ பரியாயதோ முத்தி, ந ஸப்³ப³த்தா²தி க³ஹேதப்³ப³ம். அத்தனோ ஹத்தே² நிக்கி²த்தத்தாதி ஏத்த² அத்தனோ ஹத்தே² ஸாமினா தி³ன்னதாய ப⁴ண்டா³கா³ரிகட்டா²னே டி²தத்தா ச டா²னாசாவனேபி நத்தி² அவஹாரோ, தே²ய்யசித்தேன பன க³ஹணே து³க்கடதோ ந முச்சதீதி வேதி³தப்³ப³ம்.

ஏஸேவ நயோதி உத்³தா⁴ரேயேவ சோரஸ்ஸ பாராஜிகம், கஸ்மா? அஞ்ஞேஹி ஸாதா⁴ரணஸ்ஸ அபி⁴ஞ்ஞாணஸ்ஸ வுத்தத்தா. அஞ்ஞம் தாதி³ஸமேவ க³ண்ஹந்தே யுஜ்ஜதீதி ஸஞ்ஞாணதோ ஓகாஸதோ ச தேன ஸதி³ஸமேவ அஞ்ஞம் க³ண்ஹந்தே யுஜ்ஜதி, சோரேன ஸல்லக்கி²தப்பதே³ஸதோ தம் அபனேத்வா கேஹிசி தத்த² தாதி³ஸே அஞ்ஞஸ்மிம் பத்தே ட²பிதே தம் க³ண்ஹந்தேயேவ யுஜ்ஜதீதி அதி⁴ப்பாயோ, தேன சோரேன தி³வா ஸல்லக்கி²தபத்தம் அஞ்ஞத்த² அபனேத்வா தத³ஞ்ஞே தாதி³ஸே பத்தே தத்த² ட²பிதேபி சோரஸ்ஸ பச்சா² ரத்திபா⁴கே³ உப்பஜ்ஜமானம் தே²ய்யசித்தம் தி³வா ஸல்லக்கி²தப்பதே³ஸே ட²பிதம் அஞ்ஞம் தாதி³ஸம் பத்தமேவ ஆலம்பி³த்வா உப்பஜ்ஜதீதி த³ஸ்ஸிதம் ஹோதி. பத³வாரேனாதி தே²ரேன நீஹரித்வா தி³ன்னம் பத்தம் க³ஹேத்வா க³ச்ச²தோ சோரஸ்ஸ பத³வாரேன. அதாதி³ஸமேவ க³ண்ஹந்தே யுஜ்ஜதீதி அதாதி³ஸஸ்ஸ தே²ரேன க³ஹணக்க²ணே அவஹாராபா⁴வதோ பச்சா² ஹத்த²பத்தம் ‘‘த’’ந்தி வா ‘‘அஞ்ஞ’’ந்தி வா ஸஞ்ஞாய ‘‘இத³ம் க³ஹேத்வா க³ச்சா²மீ’’தி க³மனே பத³வாரேனேவ அவஹாரோ யுஜ்ஜதீதி அதி⁴ப்பாயோ.

பாராஜிகம் நத்தீ²தி பத³வாரேபி பாராஜிகம் நத்தி² உபனிதி⁴ப⁴ண்டே³ வியாதி க³ஹேதப்³ப³ம். கா³மத்³வாரந்தி ப³ஹிகா³மே விஹாரஸ்ஸ பதிட்டி²தத்தா கா³மப்பவேஸஸ்ஸ ஆரம்ப⁴ப்பதே³ஸத³ஸ்ஸனவஸேன வுத்தம், அந்தோகா³மந்தி அத்தோ². த்³வின்னம்பி உத்³தா⁴ரேயேவ பாராஜிகந்தி தே²ரஸ்ஸ அப⁴ண்டா³கா³ரிகத்தா வுத்தம். யதி³ ஹி ஸோ ப⁴ண்டா³கா³ரிகோ ப⁴வேய்ய, ஸப்³ப³ம்பி உபனிக்கி²த்தமேவ ஸியா, உபனிக்கி²த்தப⁴ண்டே³ ச தே²ய்யசித்தேன க³ண்ஹதோபி ந தாவ தே²ரஸ்ஸ அவஹாரோ ஹோதி, சோரஸ்ஸேவ அவஹாரோ. உபி⁴ன்னம்பி து³க்கடந்தி தே²ரஸ்ஸ அத்தனோ ஸந்தகதாய சோரஸ்ஸ ஸாமிகேன தி³ன்னத்தா அவஹாரோ ந ஜாதோ, உபி⁴ன்னம்பி அஸுத்³த⁴சித்தேன க³ஹிதத்தா து³க்கடந்தி அத்தோ².

ஆணத்தியா க³ஹிதத்தாதி ‘‘பத்தசீவரம் க³ண்ஹா’’தி ஏவம் தே²ரேன கதஆணத்தியா க³ஹிதத்தா. அடவிம் பவிஸதி, பத³வாரேன காரேதப்³போ³தி ‘‘பத்தசீவரம் க³ண்ஹ, அஸுகம் நாம கா³மம் க³ந்த்வா பிண்டா³ய சரிஸ்ஸாமா’’தி தே²ரேன விஹாரதோ பட்டா²ய கா³மமக்³கே³பி ஸகலேபி கா³மே விசரணஸ்ஸ நியமிதத்தா மக்³க³தோ ஓக்கம்ம க³ச்ச²ந்தஸ்ஸேவ பத³வாரேன ஆபத்தி வுத்தா. விஹாரஸ்ஸ ஹி பரபா⁴கே³ உபசாரதோ பட்டா²ய யாவ தஸ்ஸ கா³மஸ்ஸ பரதோ உபசாரோ, தாவ ஸப்³ப³ம் த³ஹரஸ்ஸ தே²ராணத்தியா ஸஞ்சரணூபசாரோவ ஹோதி, ந பன ததோ பரம். தேனேவ ‘‘உபசாராதிக்கமே பாராஜிகம். கா³மூபசாராதிக்கமே பாராஜிக’’ந்தி ச வுத்தம். படினிவத்தனே சீவரதோ⁴வனாதி³அத்தா²ய பேஸனேபி ஏஸேவ நயோ. அட்ட²த்வா அனிஸீதி³த்வாதி ஏத்த² விஹாரம் பவிஸித்வா ஸீஸாதீ³ஸு பா⁴ரம் பூ⁴மியம் அனிக்கி²பித்வா திட்ட²ந்தோ வா நிஸீத³ந்தோ வா விஸ்ஸமித்வா தே²ய்யசித்தே வூபஸந்தே புன தே²ய்யசித்தம் உப்பாதே³த்வா க³ச்ச²தி சே, பாது³த்³தா⁴ரேன காரேதப்³போ³. ஸசே பூ⁴மியம் நிக்கி²பித்வா புன தம் க³ஹேத்வா க³ச்ச²தி, உத்³தா⁴ரேன காரேதப்³போ³. கஸ்மா? ஆணாபகஸ்ஸ ஆணத்தியா யம் கத்தப்³ப³ம், தஸ்ஸ தாவதா பரினிட்டி²தத்தா. ‘‘அஸுகம் நாம கா³ம’’ந்தி அனியமேத்வா ‘‘அந்தோகா³மம் க³மிஸ்ஸாமா’’தி அவிஸேஸேன வுத்தே விஹாரஸாமந்தா புப்³பே³ பிண்டா³ய பவிட்ட²புப்³பா³ ஸப்³பே³ கோ³சரகா³மாபி கே²த்தமேவாதி வத³ந்தி. ஸேஸந்தி மக்³கு³க்கமனவிஹாராபி⁴முக²க³மனாதி³ ஸப்³ப³ம். புரிமஸதி³ஸமேவாதி அனாணத்தியா க³ஹிதேபி ஸாமிகஸ்ஸ கதே²த்வா க³ஹிதத்தா ஹேட்டா² வுத்தவிஹாரூபசாராதி³ ஸப்³ப³ம் கே²த்தமேவாதி கத்வா வுத்தம். ஏஸேவ நயோதி அந்தராமக்³கே³ தே²ய்யசித்தம் உப்பாதே³த்வாதிஆதி³னா (பாரா. அட்ட². 1.112) வுத்தம் நயம் அதிதி³ஸதி.

நிமித்தே வா கதேதி சீவரம் மே கிலிட்ட²ம், கோ நு கோ² ரஜித்வா த³ஸ்ஸதீதிஆதி³னா நிமித்தே கதே. வுத்தனயேனேவாதி அனாணத்தஸ்ஸ தே²ரேன ஸத்³தி⁴ம் பத்தசீவரம் க³ஹேத்வா க³மனவாரே வுத்தனயேனேவ. ஏகபஸ்ஸேதி விஹாரஸ்ஸ மஹந்ததாய அத்தானம் அத³ஸ்ஸேத்வா ஏகஸ்மிம் பஸ்ஸே. தே²ய்யசித்தேன பரிபு⁴ஞ்ஜந்தோ ஜீராபேதீதி தே²ய்யசித்தே உப்பன்னே டா²னாசாவனம் அகத்வா நிவத்த²பாருதனீஹாரேனேவ பரிபு⁴ஞ்ஜந்தோ ஜீராபேதி, டா²னா சாவேந்தஸ்ஸ பன தே²ய்யசித்தே ஸதி பாராஜிகமேவ ஸீஸே பா⁴ரம் க²ந்தே⁴ கரணாதீ³ஸு விய (பாரா. 101). யதா² வா ததா² வா நஸ்ஸதீதி அக்³கி³ஆதி³னா நஸ்ஸதி, அஞ்ஞோ வா கோசீதி இமினா யேன ட²பிதம், ஸோபி ஸங்க³ஹிதோதி வேதி³தப்³ப³ம்.

இதரஸ்ஸாதி சோரஸ்ஸ. இதரம் க³ண்ஹதோ உத்³தா⁴ரே பாராஜிகந்தி ஏத்த² ‘‘பவிஸித்வா தவ ஸாடகம் க³ண்ஹாஹீ’’தி இமினாவ உபனிதி⁴பா⁴வதோ மோசிதத்தா, ஸாமிகஸ்ஸ இதரம் க³ண்ஹதோ அத்தனோ ஸாடகே ஆலயஸ்ஸ ஸப்³பா⁴வதோ ச ‘‘உத்³தா⁴ரே பாராஜிக’’ந்தி வுத்தம். ஸாமிகோ சே ‘‘மம ஸந்தகம் இத³ம் வா ஹோது, அஞ்ஞம் வா, கிம் தேன, அலம் மய்ஹம் இமினா’’தி ஏவம் ஸுட்டு² நிராலயோ ஹோதி, சோரஸ்ஸ பாராஜிகம் நத்தீ²தி க³ஹேதப்³ப³ம். ந ஜானந்தீதி தேன வுத்தவசனம் அஸுணந்தா ந ஜானந்தி. ஏஸேவ நயோதி ஏத்த² ஸசே ஜானித்வாபி சித்தேன ந ஸம்படிச்ச²ந்தி, ஏஸேவ நயோதி த³ட்ட²ப்³ப³ம். படிக்கி²பந்தீதி ஏத்த² சித்தேன படிக்கே²போபி ஸங்க³ஹிதோவாதி வேதி³தப்³ப³ம். உபசாரே விஜ்ஜமானேதி ப⁴ண்டா³கா³ரஸ்ஸ ஸமீபே உச்சாரபஸ்ஸாவட்டா²னே விஜ்ஜமானே. மயி ச மதே ஸங்க⁴ஸ்ஸ ச ஸேனாஸனே வினட்டே²தி ஏத்த² ‘‘தம் மாரேஸ்ஸாமா’’தி ஏத்தகே வுத்தேபி விவரிதும் வட்டதி கி³லானபக்கே² டி²தத்தா அவிஸயோதி வுத்தத்தா. மரணதோ ஹி பரம் கே³லஞ்ஞம் அவிஸயத்தஞ்ச நத்தி². ‘‘த்³வாரம் சி²ந்தி³த்வா பரிக்கா²ரம் ஹரிஸ்ஸாமா’’தி ஏத்தகே வுத்தேபி விவரிதும் வட்டதியேவ. ஸஹாயேஹி ப⁴விதப்³ப³ந்தி தேஹிபி பி⁴க்கா²சாராதீ³ஹி பரியேஸித்வா அத்தனோ ஸந்தகேபி கிஞ்சி கிஞ்சி தா³தப்³ப³ந்தி வுத்தம் ஹோதி. அயம் ஸாமீசீதி ப⁴ண்டா³கா³ரே வஸந்தானம் இத³ம் வத்தம்.

லோலமஹாதே²ரோதி மந்தோ³ மோமூஹோ ஆகிண்ணவிஹாரீ. இதரேஹீதி தஸ்மிம்யேவ க³ப்³பே⁴ வஸந்தேஹி இதரபி⁴க்கூ²ஹி. விஹாரரக்க²ணவாரே நியுத்தோ விஹாரவாரிகோ, வுட்³ட⁴படிபாடியா அத்தனோ வாரே விஹாரரக்க²ணகோ. நிவாபந்தி ப⁴த்தவேதனம். சோரானம் படிபத²ம் க³தேஸூதி சோரானம் ஆக³மனம் ஞத்வா ‘‘பட²மதரஞ்ஞேவ க³ந்த்வா ஸத்³த³ம் கரிஸ்ஸாமா’’தி சோரானம் அபி⁴முக²ம் க³தேஸு, ‘‘சோரேஹி ஹடப⁴ண்ட³ம் ஆஹரிஸ்ஸாமா’’தி தத³னுபத²ம் க³தேஸுபி ஏஸேவ நயோ. நிப³த்³த⁴ம் கத்வாதி ‘‘அஸுககுலே யாகு³ப⁴த்தம் விஹாரவாரிகானஞ்ஞேவா’’தி ஏவம் நியமனம் கத்வா. த்³வே திஸ்ஸோ யாகு³ஸலாகா சத்தாரி பஞ்ச ஸலாகப⁴த்தானி ச லப⁴மானோவாதி இத³ம் நித³ஸ்ஸனமத்தம், ததோ ஊனம் வா ஹோது அதி⁴கம் வா அத்தனோ வேய்யாவச்சகரஸ்ஸ ச யாபனமத்தம் லப⁴னமேவ பமாணந்தி க³ஹேதப்³ப³ம். நிஸ்ஸிதகே ஜக்³கே³ந்தீதி தேஹி விஹாரம் ஜக்³கா³பேந்தீதி அத்தோ². அஸஹாயகஸ்ஸாதி ஸஹாயரஹிதஸ்ஸ. அத்தது³தியஸ்ஸாதி அப்பிச்ச²ஸ்ஸ அத்தா ஸரீரமேவ து³தியோ அஸ்ஸ நாஞ்ஞோதி அத்தது³தியோ. தது³ப⁴யஸ்ஸாபி அத்த²ஸ்ஸ விபா⁴வனம் யஸ்ஸாதிஆதி³, ஏதேன ஸப்³பே³ன ஏகேகஸ்ஸ வாரோ ந பாபேதப்³போ³தி த³ஸ்ஸிதந்தி வேதி³தப்³ப³ம். பாகவத்தத்தா²யாதி நிச்சம் பசிதப்³ப³யாகு³ப⁴த்தஸங்கா²தவத்தத்தா²ய. ட²பேந்தீதி தா³யகா ட²பேந்தி. தம் க³ஹேத்வாதி தம் ஆராமிகாதீ³ஹி தி³ய்யமானம் பா⁴க³ம் க³ஹேத்வா. ந கா³ஹாபேதப்³போ³தி ஏத்த² அப்³போ⁴காஸிகஸ்ஸாபி அத்தனோ அதி⁴கபரிக்கா²ரோ வா ட²பிதோ அத்தி², சீவராதி³ஸங்கி⁴கபா⁴கே³பி ஆலயோ வா அத்தி², ஸோபி கா³ஹாபேதப்³போ³வ. தி³கு³ணந்தி அஞ்ஞேஹி லப்³ப⁴மானதோ தி³கு³ணம். பக்க²வாரேனாதி அட்³ட⁴மாஸவாரேன.

ஸுங்ககா⁴தகதா²வண்ணனா

113. ஸுங்ககா⁴தகதா²யம் ஸுங்கம் யத்த² ராஜபுரிஸா ஹனந்தி அத³த³ந்தானம் ஸந்தகம் அச்சி²ந்தி³த்வாபி க³ண்ஹந்தி, தம் டா²னம் ஸுங்ககா⁴தந்தி ஏவம்பி அத்தோ² த³ட்ட²ப்³போ³. வுத்தமேவத்த²ம் பாகடம் காதும் தஞ்ஹீதிஆதி³ வுத்தம். து³தியம் பாத³ம் அதிக்காமேதீதி ஏத்த² பட²மபாத³ம் பரிச்சே²த³தோ ப³ஹி ட²பேத்வா து³தியபாதே³ உத்³த⁴டமத்தே பாராஜிகம். உத்³த⁴ரித்வா ப³ஹி அட்ட²பிதேபி ப³ஹி டி²தோ ஏவ நாம ஹோதீதி கத்வா ஏவம் ஸப்³ப³த்த² பத³வாரேஸுபீதி த³ட்ட²ப்³ப³ம். பரிவத்தித்வா அப்³ப⁴ந்தரிமம் ப³ஹி ட²பேதி, பாராஜிகந்தி இத³ம் ஸயம் ப³ஹி ட²த்வா பட²மம் அப்³ப⁴ந்தரிமம் உக்கி²பித்வா வா ஸமகம் உக்கி²பித்வா வா பரிவத்தனம் ஸந்தா⁴ய வுத்தம். ப³ஹி ட²த்வா உக்கி²த்தமத்தே ஹி ஸப்³ப³ம் ப³ஹிக³தமேவ ஹோதீதி. ஸசே பன ஸோ ப³ஹி ட²த்வாபி பா³ஹிரபுடகம் பட²மம் அந்தோ ட²பேத்வா பச்சா² அப்³ப⁴ந்தரிமம் உக்கி²பித்வா ப³ஹி ட²பேதி, ததா³பி ஏகாப³த்³த⁴தாய அவிஜஹிதத்தா அவஹாரோ ந தி³ஸ்ஸதி. கேசி பன ‘‘பூ⁴மியம் பதித்வா வத்தந்தம் புன அந்தோ பவிஸதி, பாராஜிகமேவாதி (பாரா. அட்ட². 1.113) வுத்தத்தா பா³ஹிரபுடகே அந்தோபவிட்டே²பி ப³ஹிக³தபா⁴வதோ ந முச்சதி, அந்தோக³தம் பன புடகம் பட²மம், பச்சா² ஏவ வா ப³ஹி ட²பிதமத்தே வா பாராஜிகமேவா’’தி வத³ந்தி, தம் ந யுத்தம். ப³ஹி பூ⁴மியம் பாதிதஸ்ஸ கேனசி ஸத்³தி⁴ம் ஏகாப³த்³த⁴தாய அபா⁴வேன அந்தோபவிட்டே²பி பாராஜிகமேவாதி வத்தும் யுத்தம், இத³ம் பன ஏகாப³த்³த⁴த்தா தேன ஸத்³தி⁴ம் ந ஸமேதி. தஸ்மா யதா² அந்தோபூ⁴மிக³தேன ஏகாப³த்³த⁴தா ந ஹோதி, ஏவம் உப⁴யஸ்ஸாபி ப³ஹிக³தபா⁴வே ஸாதி⁴தேயேவ அவஹாரோதி விஞ்ஞாயதி, வீமம்ஸித்வா க³ஹேதப்³ப³ம். யே பன பரிவத்தித்வாதி இமஸ்ஸ நிவத்தித்வாதி அத்த²ம் வத³ந்தி, தேஹி பன அப்³ப⁴ந்தரிமம் ப³ஹி ட²பேதீதி அயமத்தோ² க³ஹிதோ ஹோதீதி தத்த² ஸங்காயேவ நத்தி². ஏகாப³த்³த⁴ந்தி காஜகோடியம் ரஜ்ஜுயா ப³ந்த⁴னம் ஸந்தா⁴ய வுத்தம். அப³ந்தி⁴த்வா காஜகோடியம் ட²பிதமத்தமேவ ஹோதி, பாராஜிகந்தி ப³ஹி க³ஹிதகாஜகோடியம் ட²பிதம் யதி³ பாத³ம் அக்³க⁴தி, பாராஜிகமேவ, அந்தோட²பிதேன ஏகாப³த்³த⁴தாய அபா⁴வாதி அதி⁴ப்பாயோ. க³ச்ச²ந்தே யானே வா…பே… ட²பேதீதி ஸுங்ககா⁴தம் பவிஸித்வா அப்பவிஸித்வா வா ட²பேதி. ஸுங்கட்டா²னஸ்ஸ ப³ஹி டி²தந்தி யானாதீ³ஹி நீஹடத்தா ப³ஹி டி²தம். கேசி பன ‘‘ப³ஹி ட²பித’’ந்தி பாட²ம் விகப்பேத்வா ஸுங்கட்டா²னதோ புப்³பே³வ ப³ஹி ட²பிதந்தி அத்த²ம் வத³ந்தி, தம் ந ஸுந்த³ரம்; ஸுங்கட்டா²னே பவிஸித்வா யானே ட²பிதேபி பவத்தித்வா க³தே விய தோ³ஸாபா⁴வதோ. யோ பன ஸுங்கட்டா²னஸ்ஸ அந்தோவ பவிஸித்வா ‘‘ஸுங்கட்டா²ன’’ந்தி ஞத்வா தே²ய்யசித்தேன ஆக³தமக்³கே³ன படினிவத்தித்வா க³ச்ச²தி, தஸ்ஸாபி யதி³ தேன தி³ஸாபா⁴கே³ன க³ச்ச²ந்தானம்பி ஹத்த²தோ ஸுங்கம் க³ண்ஹந்தி, பாராஜிகமேவ. இமஸ்மிம் டா²னேதி யானாதீ³ஹி நீஹரணே. தத்ராதி தஸ்மிம் ஏளகலோமஸிக்கா²பதே³ (பாரா. 571 ஆத³யோ).

பாணகதா²வண்ணனா

114. பாணகதா²யம் ஆட²பிதோதி மாதாபிதூஹி இணம் க³ண்ஹந்தேஹி ‘‘யாவ இணதா³னா அயம் தும்ஹாகம் ஸந்திகே ஹோதூ’’தி இணதா³யகானம் நிய்யாதிதோ. அவஹாரோ நத்தீ²தி மாதாபிதூஹி புத்தஸ்ஸ அபரிச்சத்தத்தா மாதாபிதூனஞ்ச அஸந்தகத்தா அவஹாரோ நத்தி². த⁴னம் பன க³தட்டா²னே வட்³ட⁴தீதி இமினா ஆட²பேத்வா க³ஹிதத⁴னம் வட்³டி⁴யா ஸஹ ஆட²பிதபுத்தஹாரகஸ்ஸ கீ³வாதி த³ஸ்ஸிதந்தி வத³ந்தி. தா³ஸஸ்ஸ ஜாதோதி உக்கட்ட²லக்க²ணம் த³ஸ்ஸேதும் வுத்தம். தா³ஸிகுச்சி²யம் பன அதா³ஸஸ்ஸ ஜாதோபி ஏத்தே²வ ஸங்க³ஹிதோ. பரதே³ஸதோ பஹரித்வாதி பரதே³ஸவிலும்பகேஹி ராஜசோராதீ³ஹி பஹரித்வா. ஸுக²ம் ஜீவாதி வத³தீதி தே²ய்யசித்தேன ஸாமிகானம் ஸந்திகதோ பலாபேதுகாமதாய வத³தி, ததா² பன அசிந்தேத்வா காருஞ்ஞேன ‘‘ஸுக²ம் க³ந்த்வா ஜீவா’’தி வத³ந்தஸ்ஸ நத்தி² அவஹாரோ, கீ³வா பன ஹோதி. து³தியபத³வாரேதி யதி³ து³தியபத³ம் அவஸ்ஸம் உத்³த⁴ரிஸ்ஸதி, பி⁴க்கு²ஸ்ஸ ‘‘பலாயித்வா ஸுக²ம் ஜீவா’’தி வசனக்க²ணேயேவ பாராஜிகம். அனாபத்தி பாராஜிகஸ்ஸாதி தஸ்ஸ வசனேன வேக³வட்³ட⁴னே அகதேபி து³க்கடா ந முச்சதீதி த³ஸ்ஸேதி. ‘‘அதி³ன்னம் தே²ய்யஸங்கா²தம் ஆதி³யேய்யா’’தி (பாரா. 89, 91) ஆதா³னஸ்ஸேவ வுத்தத்தா வுத்தபரியாயேன முச்சதீதி.

சதுப்பத³கதா²வண்ணனா

117. சதுப்பத³கதா²யம் பாளியம் ஆக³தாவஸேஸாதி பாளியம் ஆக³தேஹி ஹத்தி² ஆதீ³ஹி அஞ்ஞே பஸு-ஸத்³த³ஸ்ஸ ஸப்³ப³ஸாதா⁴ரணத்தா. பி⁴ங்கச்சா²பந்தி ‘‘பி⁴ங்கா பி⁴ங்கா’’தி ஸத்³தா³யனதோ ஏவம் லத்³த⁴னாமம் ஹத்தி²போதகம். அந்தோவத்து²ம்ஹீதி பரிக்கி²த்தே. ப³ஹினக³ரே டி²தஸ்ஸாதி பரிக்கி²த்தனக³ரம் ஸந்தா⁴ய வுத்தம், அபரிக்கி²த்தனக³ரே பன அந்தோனக³ரே டி²தஸ்ஸாபி டி²தட்டா²னமேவ டா²னம். க²ண்ட³த்³வாரந்தி அத்தனா க²ண்டி³தத்³வாரம். ஏகோ நிபன்னோதி ஏத்தா²பி ப³ந்தோ⁴தி ஆனேத்வா ஸம்ப³ந்தி⁴தப்³ப³ம், தேனாஹ ‘‘நிபன்னஸ்ஸ த்³வே’’தி. கா⁴தேதீதி ஏத்த² தே²ய்யசித்தேன வினாஸேந்தஸ்ஸ ஸஹபயோக³த்தா து³க்கடமேவாதி வத³ந்தி.

ஓசரககதா²வண்ணனா

118. ஓசரககதா²யம் பரியாயேன ஹி அதி³ன்னாதா³னதோ முச்சதீதி இத³ம் ஆணத்திகபயோக³ம் ஸந்தா⁴ய வுத்தம், ஸயமேவ பன அபி⁴யுஞ்ஜனாதீ³ஸு பரியாயேனபி மோக்கோ² நத்தி².

ஓணிரக்க²கதா²வண்ணனா

ஓணிரக்க²கதா²யம் ஓணிந்தி ஓணீதம், ஆனீதந்தி அத்தோ². ஓணிரக்க²ஸ்ஸ ஸந்திகே ட²பிதப⁴ண்ட³ம் உபனிதி⁴ (பாரா. 112) விய கு³த்தட்டா²னே ட²பேத்வா ஸங்கோ³பனத்தா²ய அனிக்கி²பித்வா யதா²ட²பிதட்டா²னே ஏவ முஹுத்தமத்தம் ஓலோகனத்தா²ய ட²பிதத்தா தஸ்ஸ ப⁴ண்ட³ஸ்ஸ டா²னாசாவனமத்தேன ஓணிரக்க²கஸ்ஸ பாராஜிகம் ஹோதி.

ஸம்விதா³வஹாரகதா²வண்ணனா

ஸம்விதா³வஹாரகதா²யம் ஸம்விதா⁴யாதி ஸம்வித³ஹித்வா. தேன நேஸம் து³க்கடாபத்தியோதி ஆணத்திவஸேன பாராஜிகாபத்தியா அஸம்ப⁴வே ஸதீதி வுத்தம். யதி³ ஹி தேன ஆணத்தா யதா²ணத்திவஸேன ஹரந்தி, ஆணத்திக்க²ணே ஏவ பாராஜிகாபத்திம் ஆபஜ்ஜந்தி. பாளியம் ‘‘ஸம்ப³ஹுலா ஸம்வித³ஹித்வா ஏகோ ப⁴ண்ட³ம் அவஹரதி, ஆபத்தி ஸப்³பே³ஸம் பாராஜிகஸ்ஸா’’தி (பாரா. 118) ஏத்தா²பி ஆணாபகானம் ஆணத்திக்க²ணேயேவ ஆபத்தி, அவஹாரகஸ்ஸ உத்³தா⁴ரேதி க³ஹேதப்³போ³. ஸம்ப³ஹுலா பி⁴க்கூ² ஏகம் ஆணாபேந்தி ‘க³ச்சே²தம் ஆஹரா’தி, தஸ்ஸுத்³தா⁴ரே ஸப்³பே³ஸம் பாராஜிகந்திஆதீ³ஸுபி ஏவமேவ அத்தோ² க³ஹேதப்³போ³. ஸாஹத்தி²கம் வா ஆணத்திகஸ்ஸ ஆணத்திகம் வா ஸாஹத்தி²கஸ்ஸ அங்க³ம் ந ஹோதீதி பி⁴ன்னகாலிகத்தா அஞ்ஞமஞ்ஞஸ்ஸ அங்க³ம் ந ஹோதி. ததா² ஹி ஸஹத்தா² அவஹரந்தஸ்ஸ டா²னாசாவனக்க²ணே ஆபத்தி, ஆணத்தியா பன ஆணத்திக்க²ணேயேவாதி பி⁴ன்னகாலிகத்தா ஆபத்தியோதி.

ஸங்கேதகம்மகதா²வண்ணனா

119. ஸங்கேதகம்மகதா²யம் ஓசரகே வுத்தனயேனேவாதி ஏத்த² அவஸ்ஸம் ஹாரியே ப⁴ண்டே³திஆதி³னா (பாரா. அட்ட². 1.118) வுத்தனயேனேவ. பாளியம் ‘‘தம் ஸங்கேதம் புரே வா பச்சா² வா’’தி தஸ்ஸ ஸங்கேதஸ்ஸ புரே வா பச்சா² வாதி அத்தோ². ‘‘தம் நிமித்தம் புரே வா பச்சா² வா’’தி ஏத்தா²பி ஏஸேவ நயோ.

நிமித்தகம்மகதா²வண்ணனா

120. நிமித்தகம்மகதா²யம் அக்கி²னிக²ணனாதி³னிமித்தகம்மம் பன லஹுகம் இத்தரகாலம், தஸ்மா தங்க²ணேயேவ தம் ப⁴ண்ட³ம் அவஹரிதும் ந ஸக்கா. நிமித்தகம்மானந்தரமேவ க³ண்ஹிதும் ஆரத்³த⁴த்தா தேனேவ நிமித்தேன அவஹரதீதி வுச்சதி. யதி³ ஏவம் புரேப⁴த்தப்பயோகோ³வ ஏஸோதி வாதோ³ பமாணபா⁴வம் ஆபஜ்ஜதீதி? நாபஜ்ஜதி. ந ஹி ஸங்கேதகம்மம் (பாரா. 119) விய நிமித்தகம்மம் காலபரிச்சே²த³யுத்தம். காலவஸேன ஹி ஸங்கேதகம்மம் வுத்தம், கிரியாவஸேன நிமித்தகம்மந்தி அயமேவ தேஸம் விஸேஸோ. ‘‘தம் நிமித்தம் புரே வா பச்சா² வா தம் ப⁴ண்ட³ம் அவஹரதி, மூலட்ட²ஸ்ஸ அனாபத்தீ’’தி இத³ம் பன நிமித்தகரணதோ புரே க³ண்ஹந்தஸ்ஸ சேவ நிமித்தகம்மே ச கதேபி க³ண்ஹிதும் அனாரபி⁴த்வா பச்சா² ஸயமேவ க³ண்ஹந்தஸ்ஸ ச வஸேன வுத்தம்.

ஆணத்திகதா²வண்ணனா

121. ஆணத்திகதா²யம் அஸம்மோஹத்த²ந்தி யஸ்மா ஸங்கேதகம்மனிமித்தகம்மானி கரோந்தோ ந கேவலம் புரேப⁴த்தாதி³காலஸங்கேதகம்மம் அக்கி²னிக²ணனாதி³னிமித்தகம்மமேவ வா கரோதி, அத² கோ² ஏவம்வண்ணஸண்டா²னப⁴ண்ட³ம் க³ண்ஹாதி, ப⁴ண்ட³னியமம்பி கரோதி, த்வம் இத்த²ன்னாமஸ்ஸ பாவத³, ஸோ அஞ்ஞஸ்ஸ பாவத³தூதிஆதி³னா புக்³க³லபடிபாடியா ச ஆணாபேதி, தஸ்மா புப்³ப³ண்ஹாதி³காலவஸேன அக்கி²னிக²ணனாதி³கிரியாவஸேன ப⁴ண்ட³புக்³க³லபடிபாடிவஸேன ச ஆணத்தே ஏதேஸு ஸங்கேதகம்மனிமித்தகம்மேஸு விஸங்கேதா விஸங்கேதபா⁴வே ஸம்மோஹோ ஜாயதி, தத³பக³மேன அஸம்மோஹத்த²ம். யம் ஆணாபகேன நிமித்தஸஞ்ஞம் கத்வா வுத்தந்தி புப்³ப³ண்ஹாதீ³ஸு அக்கி²னிக²ணனாதீ³ஸு வா க³ஹணத்த²ம் ஆணாபேந்தேன ஈதி³ஸவண்ணஸண்டா²னாதி³யுத்தம் க³ண்ஹாதி ஏவம் க³ஹணஸ்ஸ நிமித்தபூ⁴தஸஞ்ஞாணம் கத்வா யம் ப⁴ண்ட³ம் வுத்தம். அயம் யுத்தி ஸப்³ப³த்தா²தி ஹேட்டா² வுத்தேஸு உபரி வக்க²மானேஸு ச ஸப்³ப³த்த² ஆணத்திப்பஸங்கே³ஸு ஆணத்திக்க²ணேயேவ பாராஜிகாதீ³னம் பா⁴வஸங்கா²தா வினயயுத்தி, ஸா ச ஆணத்தஸ்ஸ கிரியானிட்டா²பனக்க²ணே ஆணாபகஸ்ஸ பயோகே³ தே²ய்யசித்தானம் அபா⁴வா ஆணத்திக்க²ணே ஏகா ஏவ ஆபத்தி ஹோதீதி ஏவம் உபபத்தியா பவத்தத்தா யுத்தீதி வுத்தா. ‘‘மூலட்ட²ஸ்ஸ து²ல்லச்சய’’ந்தி வுத்தத்தா ஸங்க⁴ரக்கி²தேன படிக்³க³ஹிதேபி பு³த்³த⁴ரக்கி²தத⁴ம்மரக்கி²தானம் து³க்கடமேவ, கஸ்மா பனேத்த² ஆசரியஸ்ஸ து²ல்லச்சயந்தி ஆஹ ‘‘மஹாஜனோ ஹீ’’திஆதி³. மஹாஜனோதி ச பு³த்³த⁴ரக்கி²தத⁴ம்மரக்கி²தஸங்க⁴ரக்கி²தே ஸந்தா⁴ய வுத்தம். மூலட்ட²ஸ்ஸேவ து³க்கடந்தி பு³த்³த⁴ரக்கி²தஸ்ஸ து³க்கடம். இத³ஞ்ச மூலட்ட²ஸ்ஸ து²ல்லச்சயாபா⁴வத³ஸ்ஸனத்த²ம் பட²மம் ஆணத்திக்க²ணே து³க்கடம் ஸந்தா⁴ய வுத்தம், ந பன ஸங்க⁴ரக்கி²தஸ்ஸ படிக்³க³ஹணபச்சயா புன து³க்கடஸம்ப⁴வம் ஸந்தா⁴ய. ந ஹி ஸோ ஏகபயோகே³ன து³க்கடத்³வயம் ஆபஜ்ஜதி. கேசி பன ‘‘விஸங்கேதத்தா பாளியம் ‘மூலட்ட²ஸ்ஸா’தி அவத்வா ‘படிக்³க³ண்ஹாதி, ஆபத்தி து³க்கடஸ்ஸா’தி ஸாமஞ்ஞேன வுத்தத்தா இத³ம் ஸங்க⁴ரக்கி²தஸ்ஸ து³க்கடம் ஸந்தா⁴ய வுத்த’’ந்தி வத³ந்தி, தம் கிஞ்சாபி அட்ட²கதா²ய ந ஸமேதி, பாளிதோ பன யுத்தம் விய தி³ஸ்ஸதி. ந ஹி தஸ்ஸ படிக்³க³ஹணப்பயோகே³ அனாபத்தி ஹோதீதி. இமினாவ ஹேட்டா² ஆக³தவாரேஸுபி படிக்³க³ண்ஹந்தானம் து³க்கடம் வேதி³தப்³ப³ம். ‘‘பண்ணே வா ஸிலாதீ³ஸு வா ‘சோரியம் காதப்³ப³’ந்தி லிகி²த்வா ட²பிதே பாராஜிகமேவா’’தி கேசி வத³ந்தி, தம் பன ‘‘அஸுகஸ்ஸ கே³ஹே ப⁴ண்ட³’’ந்தி ஏவம் நியமேத்வா லிகி²தே யுஜ்ஜதி, ந அனியமேத்வா லிகி²தேதி வீமம்ஸிதப்³ப³ம். மக்³கா³னந்தரப²லஸதி³ஸாதி இமினா யதா² அரியபுக்³க³லானம் மக்³கா³னந்தரே ப²லே உப்பன்னே கிலேஸபடிப்பஸ்ஸத்³தி⁴பரியோஸானம் பா⁴வனாகிச்சம் நிப்ப²ன்னம் நாம ஹோதி, ஏவமேதிஸ்ஸா அத்த²ஸாத⁴கசேதனாய உப்பன்னாய ஆணத்திகிச்சம் நிப்ப²ன்னமேவாதி த³ஸ்ஸேதி, தேனாஹ ‘‘தஸ்மா அயம் ஆணத்திக்க²ணேயேவ பாராஜிகோ’’தி, ஆணத்திவசீபயோக³ஸமுட்டா²பகசேதனாக்க²ணேயேவ பாராஜிகோ ஹோதீதி அத்தோ².

ஆணத்திகதா²வண்ணனானயோ நிட்டி²தோ.

ஆபத்திபே⁴த³வண்ணனா

122. தத்த² தத்தா²தி பூ⁴மட்ட²த²லட்டா²தீ³ஸு. பாளியம் மனுஸ்ஸபரிக்³க³ஹிதம் ஸந்தா⁴ய ‘‘பரபரிக்³க³ஹித’’ந்தி வுத்தம். ஆமஸதி ப²ந்தா³பேதி டா²னா சாவேதீதி இமேஹி தீஹி பதே³ஹி புப்³ப³பயோக³ஸஹிதம் பஞ்சமம் அவஹாரங்க³ம் வுத்தம், டா²னா சாவேதீதி ச இத³ம் உபலக்க²ணமத்தம். ஆணத்திகாத³யோ ஸப்³பே³பி பயோகா³ து⁴ரனிக்கே²போ ச இத⁴ ஸங்க³ஹேதப்³பா³வாதி த³ட்ட²ப்³ப³ம்.

125. டா²னாசாவனந்தி இத³ம் பாளிஅனுஸாரதோ வுத்தம் து⁴ரனிக்கே²பஸ்ஸாபி ஸங்க³ஹேதப்³ப³தோ. ஏஸ நயோ உபரிபி ஸப்³ப³த்த². தத்த² ஹி ந ச ஸகஸஞ்ஞீதி இமினா பரபரிக்³க³ஹிததா வுத்தா, ந ச விஸ்ஸாஸக்³கா³ஹீ ந ச தாவகாலிகந்தி இமேஹி பரபரிக்³க³ஹிதஸஞ்ஞிதா, தீஹி வா ஏதேஹி பரபரிக்³க³ஹிததா பரபரிக்³க³ஹிதஸஞ்ஞிதா ச வுத்தாதி வேதி³தப்³பா³. அனஜ்ஜா²வுத்த²கந்தி ‘‘மமேத³’’ந்தி பரிக்³க³ஹவஸேன அனஜ்ஜா²வுத்த²கம் அரஞ்ஞே தா³ருதிணபண்ணாதி³. ச²ட்³டி³தந்தி பட²மம் பரிக்³க³ஹேத்வா பச்சா² அனத்தி²கதாய ச²ட்³டி³தம் யம் கிஞ்சி. சி²ன்னமூலகந்தி நட்ட²ம் பரியேஸித்வா ஆலயஸங்கா²தஸ்ஸ மூலஸ்ஸ சி²ன்னத்தா சி²ன்னமூலகம். அஸ்ஸாமிகந்தி அனஜ்ஜா²வுத்த²காதீ³ஹி தீஹி ஆகாரேஹி த³ஸ்ஸிதம் அஸ்ஸாமிகவத்து². உப⁴யம்பீதி அஸ்ஸாமிகம் அத்தனோ ஸந்தகஞ்ச.

அனாபத்திபே⁴த³வண்ணனா

131. தஸ்மிம்யேவ அத்தபா⁴வே நிப்³ப³த்தாதி தஸ்மிம்யேவ மதஸரீரே பேதத்தபா⁴வேன நிப்³ப³த்தா. ருக்கா²தீ³ஸு லக்³கி³தஸாடகே வத்தப்³ப³மேவ நத்தீ²தி மனுஸ்ஸேஹி அகோ³பிதம் ஸந்தா⁴ய வுத்தம், ஸசே பனேதம் தே³வாலயசேதியருக்கா²தீ³ஸு நியுத்தேஹி புரிஸேஹி ரக்கி²தகோ³பிதம் ஹோதி, க³ஹேதும் ந வட்டதி. தோ²கே கா²யிதே…பே… க³ஹேதும் வட்டதீதி இத³ம் அதி³ன்னாதா³னாபா⁴வம் ஸந்தா⁴ய வுத்தம். ஜிக⁴ச்சி²தபாணினா கா²தி³யமானமம்ஸஸ்ஸ அச்சி²ந்தி³த்வா கா²த³னம் நாம காருஞ்ஞஹானிதோ லோலபா⁴வதோ ச அஸாருப்பமேவ. தேனேவ ஹி அரியவம்ஸிகா அத்தனோ பத்தே ப⁴த்தம் கா²த³ந்தம்பி ஸுனகா²தி³ம் தஜ்ஜேத்வா ந வாரேந்தி, திரச்சா²னானம் ஆமிஸதா³னே குஸலம் விய தேஸம் ஆமிஸஸ்ஸ அச்சி²ந்த³னேபி அகுஸலமேவாதி க³ஹேதப்³ப³ம், தேனேவ வக்க²தி ‘‘பரானுத்³த³யதாய ச ந க³ஹேதப்³ப³’’ந்தி (பாரா. அட்ட². 1.140).

பகிண்ணககதா²வண்ணனா

ப³ஹு ஏகதோ தா³ருஆதி³பா⁴ரியஸ்ஸ ஏகஸ்ஸ ப⁴ண்ட³ஸ்ஸ உக்கி²பனகாலே ‘‘க³ண்ஹத² உக்கி²பதா²’’தி வசீபயோகே³ன ஸத்³தி⁴ம் காயபயோக³ஸப்³பா⁴வட்டா²னம் ஸந்தா⁴ய ‘‘ஸாஹத்தி²காணத்திக’’ந்தி வுத்தம். ‘‘த்வம் ஏதம் வத்து²ம் க³ண்ஹ, அஹம் அஞ்ஞ’’ந்தி ஏவம் பவத்தே பன அவஹாரே அத்தனா க³ஹிதம் ஸாஹத்தி²கமேவ, பரேன கா³ஹாபிதம் ஆணத்திகமேவ, தேனேவ தது³ப⁴யக்³கே⁴ன பஞ்சமாஸேபி பாராஜிகம் ந ஹோதி, ஏகேகப⁴ண்ட³க்³க⁴வஸேன து²ல்லச்சயாதி³மேவ ஹோதி. வுத்தஞ்ஹி ‘‘ஸாஹத்தி²கம் வா ஆணத்திகஸ்ஸ அங்க³ம் ந ஹோதீ’’திஆதி³. உபனிக்கி²த்தப⁴ண்ட³ம் ப⁴ண்ட³தே³ய்யஞ்ச அதா³துகாமதாய ‘‘தே³மி த³ம்மீ’’தி விக்கி²பந்தோ துண்ஹீபா⁴வேன விஹேடே²ந்தோபி தேன தேன காயவிகாராதி³கிரியாய பரஸ்ஸ து⁴ரம் நிக்கி²பாபேஸீதி ‘‘கிரியாஸமுட்டா²னஞ்சா’’தி வுத்தம்.

பத³பா⁴ஜனீயவண்ணனானயோ நிட்டி²தோ.

வினீதவத்து²வண்ணனா

135. வினீதவத்தூ²ஸு நிருத்தியேவ தம்தம்அத்த²க்³க³ஹணஸ்ஸ உபாயதாய பதோ²தி நிருத்திபதோ², தேனேவாஹ ‘‘வோஹாரவசனமத்தே’’தி. யதா²கம்மம் க³தோதி ததோ பேதத்தபா⁴வதோ மதபா⁴வம் த³ஸ்ஸேதி. அப்³பு⁴ண்ஹேதி ஆஸன்னமரணதாய ஸரீரஸ்ஸ உண்ஹஸமங்கி³தம் த³ஸ்ஸேதி, தேனேவாஹ ‘‘அல்லஸரீரே’’தி. குணபபா⁴வம் உபக³தம்பி பி⁴ன்னமேவ அல்லபா⁴வதோ பி⁴ன்னத்தா. விஸபா⁴க³ஸரீரேதி இத்தி²ஸரீரே. ஸீஸே வாதிஆதி³ அத⁴க்க²கே உப்³ப⁴ஜாணுமண்ட³லே பதே³ஸே சித்தவிகாரப்பத்திம் ஸந்தா⁴ய வுத்தம், யத்த² கத்த²சி அனாமஸந்தேன கதம் ஸுகதமேவ. மதஸரீரம்பி ஹி யேன கேனசி ஆகாரேன ஸஞ்சிச்ச பு²ஸந்தஸ்ஸ அனாமாஸது³க்கடமேவாதி வத³ந்தி, தம் யுத்தமேவ. ந ஹி அபாராஜிகவத்து²கேபி சித்தாதி³இத்தி²ரூபே ப⁴வந்தம் து³க்கடம் பாராஜிகவத்து²பூ⁴தே மதித்தி²ஸரீரே நிவத்ததி.

குஸஸங்காமனவத்து²கதா²வண்ணனா

138. ப³லஸாதி ப³லேன. ஸாடகோ ப⁴விஸ்ஸதி, க³ண்ஹிஸ்ஸாமீதி அனாக³தவசனம் பஸிப்³ப³கக்³க³ஹணதோ புரேதரம் ஸமுப்பன்னபரிகப்பத³ஸ்ஸனவஸேன வுத்தம். க³ஹணக்க²ணே பன ‘‘ஸாடகோ சே, க³ண்ஹாமீ’’தி பஸிப்³ப³கம் க³ண்ஹாதீதி ஏவமேத்த² அதி⁴ப்பாயோ க³ஹேதப்³போ³, ந பன ப³ஹி நீஹரித்வா ஸாடகபா⁴வம் ஞத்வா க³ஹேஸ்ஸாமீதி, தேனாஹ ‘‘உத்³தா⁴ரேயேவ பாராஜிக’’ந்தி. இதரதா² ‘‘இதா³னி ந க³ண்ஹாமி, பச்சா² அந்த⁴காரே ஜாதே விஜானனகாலே வா க³ண்ஹிஸ்ஸாமி, இதா³னி ஓலோகேந்தோ விய ஹத்த²க³தம் கரோமீ’’தி க³ண்ஹந்தஸ்ஸாபி க³ஹணக்க²ணே அவஹாரோ ப⁴வேய்ய, ந ச தம் யுத்தம் ததா³ க³ஹணே ஸன்னிட்டா²னாபா⁴வா. ஸன்னிட்டா²பகசேதனாய ஏவ ஹி பாணாதிபாதாதி³அகுஸலம் விய. ந ஹி ‘‘பச்சா² வதி⁴ஸ்ஸாமீ’’தி பாணம் க³ண்ஹந்தஸ்ஸ ததே³வ தஸ்மிம் மதேபி பாணாதிபாதோ ஹோதி வத⁴கசேதனாய பயோக³ஸ்ஸ அகதத்தா, ஏவமிதா⁴பி அத்த²ங்க³தே ஸூரியே அவஹரிஸ்ஸாமீதிஆதி³னா காலபரிகப்பனவஸேன டா²னா சாவிதேபி ததா³பி அவஹாரோ ந ஹோதி ஓகாஸபரிகப்பே (பாரா. அட்ட². 1.138) விய, தஸ்மிம் பன யதா²பரிகப்பிதட்டா²னே காலே ஆக³தே ப⁴ண்ட³ம் பூ⁴மியம் அனிக்கி²பித்வாபி தே²ய்யசித்தேன க³ச்ச²தோ பத³வாரேன அவஹாரோதி கா²யதி. தஸ்மா ப⁴ண்ட³பரிகப்போ ஓகாஸபரிகப்போ காலபரிகப்போதி திவிதோ⁴பி பரிகப்போ க³ஹேதப்³போ³. அட்ட²கதா²யம் பன ஓகாஸபரிகப்பே ஸமோதா⁴னேத்வா காலபரிகப்போ விஸும் ந வுத்தோதி அம்ஹாகம் க²ந்தி, வீமம்ஸித்வா க³ஹேதப்³ப³ம். பத³வாரேன காரேதப்³போ³தி பூ⁴மியம் அனிக்கி²பித்வா வீமம்ஸிதத்தா வுத்தம். பரியுட்டி²தோதி அனுப³த்³தோ⁴.

பரிகப்போ தி³ஸ்ஸதீதி க³ஹணக்க²ணே பரிகப்போ தி³ஸ்ஸதி, ந ததா³ தேஸம் மதேன அவஹாரோதி த³ஸ்ஸேதி. தி³ஸ்வா ஹடத்தா பரிகப்பாவஹாரோ ந தி³ஸ்ஸதீதி பச்சா² பன ப³ஹி வீமம்ஸித்வா ஸாடகபா⁴வம் ஞத்வா ததோ பச்சா² தே²ய்யசித்தேன ஹடத்தா புப்³பே³ கதஸ்ஸ பரிகப்பஸ்ஸ அவஹாரானங்க³த்தா ‘‘ஸுத்த’’ந்தி ஞத்வா ஹரணே விய தே²ய்யாவஹாரோ ஏவ ஸியா. தஸ்மா பரிகப்பாவஹாரோ ந தி³ஸ்ஸதி. ஸாடகோ சே ப⁴விஸ்ஸதீதிஆதி³கஸ்ஸ பரிகப்பஸ்ஸ ததா³ அவிஜ்ஜமானத்தா கேவலம் அவஹாரோ ஏவ, ந பரிகப்பாவஹாரோதி அதி⁴ப்பாயோ, தேன ப⁴ண்ட³பரிகப்பாவஹாரஸ்ஸ ‘‘ஸாடகோ சே ப⁴விஸ்ஸதி, க³ஹேஸ்ஸாமீ’’தி ஏவம் ப⁴ண்ட³ஸன்னிட்டா²னாபா⁴வக்க²ணேயேவ பவத்திம் த³ஸ்ஸேதி, தேனாஹ ‘‘யம் பரிகப்பிதம், தம் அதி³ட்ட²ம் பரிகப்பிதபா⁴வே டி²தம்யேவ உத்³த⁴ரந்தஸ்ஸ அவஹாரோ’’தி. யதி³ ஏவம் கஸ்மா ஓகாஸபஅப்பாவஹாரோ ப⁴ண்ட³ம் தி³ஸ்வா அவஹரந்தஸ்ஸ பரிகப்பாவஹாரோ ஸியாதி? நாயம் தோ³ஸோ அப⁴ண்ட³விஸயத்தா தஸ்ஸ பரிகப்பஸ்ஸ, புப்³பே³வ தி³ஸ்வா ஞாதப⁴ண்ட³ஸ்ஸேவ ஹி ஓகாஸபரிகப்போ வுத்தோ. தம் மஞ்ஞமானோ தம் அவஹரீதி இத³ம் ஸுத்தம் கிஞ்சாபி ‘‘தஞ்ஞேவேத’’ந்தி நியமேத்வா க³ண்ஹந்தஸ்ஸ வஸேன வுத்தம், ததா²பி ‘‘தஞ்சே க³ண்ஹிஸ்ஸாமீ’’தி ஏவம் பவத்தே இமஸ்மிம் பரிகப்பேபி ‘‘க³ண்ஹிஸ்ஸாமீ’’தி க³ஹணே நியமஸப்³பா⁴வா அவஹாரத்த²ஸாத⁴கம் ஹோதீதி உத்³த⁴டம், தேனேவ ‘‘ஸமேதீ’’தி வுத்தம்.

கேசீதி மஹாஅட்ட²கதா²யமேவ ஏகச்சே ஆசரியா. மஹாபச்சரியம் பனாதிஆதி³னாபி கேசிவாதோ³ கா³ரய்ஹோ, மஹாஅட்ட²கதா²வாதோ³வ யுத்ததரோதி த³ஸ்ஸேதி.

அலங்காரப⁴ண்ட³ந்தி அங்கு³லிமுத்³தி³காதி³. குஸம் பாதேத்வாதி விலீவமயம் வா தாலபண்ணாதி³மயம் வா கதஸஞ்ஞாணம் பாதேத்வா. பரகோட்டா²ஸதோ குஸே உத்³த⁴டேபி ந தாவ குஸஸ்ஸ பரிவத்தனம் ஜாதந்தி வுத்தம் ‘‘உத்³தா⁴ரே ரக்க²தீ’’தி. ஹத்த²தோ முத்தமத்தே பாராஜிகந்தி இமினா டா²னாசாவனம் து⁴ரனிக்கே²பஞ்ச வினா குஸஸங்காமனம் நாம விஸும் ஏகோயம் அவஹாரோதி த³ஸ்ஸேதி. ஸப்³பே³பி ஹி அவஹாரா ஸாஹத்தி²காணத்திகாதி⁴ப்பாயயோகே³ஹி நிப்பா²தி³யமானா அத்த²தோ டா²னாசாவனது⁴ரனிக்கே²பகுஸஸங்காமனேஸு தீஸு ஸமோஸரந்தீதி த³ட்ட²ப்³ப³ம். இதரோ தஸ்ஸ பா⁴க³ம் உத்³த⁴ரதி, உத்³தா⁴ரே பாராஜிகந்தி புரிமஸ்ஸ அத்தனோ கோட்டா²ஸே ஆலயஸ்ஸ அவிக³தத்தா வுத்தம், ஆலயே பன ஸப்³ப³தா² அஸதி அவஹாரோ ந ஹோதி, தேனாஹ ‘‘விசினிதாவஸேஸம் க³ண்ஹந்தஸ்ஸாபி அவஹாரோ நத்தே²வா’’தி.

நாயம் மமாதி ஜானந்தோபீதி ஏத்த² பி-ஸத்³தே³ன தத்த² வேமதிகோபி ஹுத்வா தே²ய்யசித்தேன க³ண்ஹந்தோபி ஸங்க³ய்ஹதி. ஸிவேய்யகந்தி ஸிவிரட்டே² ஜாதம்.

140-1. கப்பியம் காராபேத்வாதி பசாபேத்வா. தஸ்மிம் பாசித்தியந்தி அதி³ன்னாதா³னபா⁴வேன ஸஹபயோக³ஸ்ஸாபி அபா⁴வா து³க்கடம் ந வுத்தந்தி வேதி³தப்³ப³ம். ஆணத்தேஹீதி ஸம்மதேன ஆணத்தேஹி. ஆணத்தேனாதி ஸாமிகேஹி ஆணத்தேன. ப⁴ண்ட³தே³ய்யந்தி ஸம்மதாதீ³ஹி தி³ன்னத்தா ந பராஜிகம் ஜாதம், அஸந்தம் புக்³க³லம் வத்வா க³ஹிதத்தா பன ப⁴ண்ட³தே³ய்யம் வுத்தம். அஞ்ஞேன தி³ய்யமானந்தி ஸம்மதாதீ³ஹி சதூஹி அஞ்ஞேன தி³ய்யமானம். க³ண்ஹந்தோதி ‘‘அபரஸ்ஸ பா⁴க³ம் தே³ஹீ’’தி வத்வா க³ண்ஹந்தோ. அபரஸ்ஸாதி அஸந்தம் புக்³க³லம் அத³ஸ்ஸேத்வா பன ‘‘அபரம் பா⁴க³ம் தே³ஹீ’’தி வா கூடவஸ்ஸானி க³ணேத்வா வா க³ண்ஹதோ கி³ஹிஸந்தகே ஸாமினா ச ‘‘இமஸ்ஸ தே³ஹீ’’தி ஏவம் ஆணத்தேன ச தி³ன்னே ப⁴ண்ட³தே³ய்யம்பி ந ஹோதி, ஸங்க⁴ஸந்தகே பன ஹோதீதி இமம் விஸேஸம் த³ஸ்ஸேதும் அஸம்மதேன வா அனாணத்தேன வாதிஆதி³ புன வுத்தம். இதரேஹி தி³ய்யமானந்தி ஸம்மதேன ஆணத்தேன வா தி³ய்யமானம். ஏவம் க³ண்ஹதோதி ‘‘அபரம்பி பா⁴க³ம் தே³ஹீ’’தி வத்வா கூடவஸ்ஸானி க³ணேத்வா வா க³ண்ஹதோ. ஸாமிகேன பனாதி ஏத்த² பன-ஸத்³தோ³ விஸேஸத்த²ஜோதகோ, தேன ‘‘அபரம்பி பா⁴க³ம் தே³ஹீ’’தி வா கூடவஸ்ஸானி க³ணேத்வா வா க³ண்ஹந்தே ஸாமிகேன ஸயம் தே³ந்தே வா தா³பேந்தே வா விஸேஸோ அத்தீ²தி வுத்தம் ஹோதி. ஸுதி³ன்னந்தி ப⁴ண்ட³தே³ய்யம் ந ஹோதீதி அதி⁴ப்பாயோ. ஹேட்டா² பன ஸாமிகேன தேன ஆணத்தேன வா தி³ய்யமானம் கி³ஹிஸந்தகம் ‘‘அபரஸ்ஸ பா⁴க³ம் தே³ஹீ’’தி வத்வா க³ண்ஹதோ அபரஸ்ஸ அபா⁴வதோ ஸாமிஸந்தகமேவ ஹோதீதி ப⁴ண்ட³தே³ய்யம் ஜாதம், இத⁴ பன தேஹியேவ தி³ய்யமானம் ‘‘அபரம்பி பா⁴க³ம் தே³ஹீ’’தி வத்வா வா கூடவஸ்ஸானி க³ணேத்வா வா க³ண்ஹதோ ‘‘தே³ஹீ’’தி வுத்தத்தா அஞ்ஞாதகவிஞ்ஞத்திமத்தம் ட²பேத்வா ப⁴ண்ட³தே³ய்யம் ந ஹோதீதி ஸுதி³ன்னமேவாதி வுத்தம். அஸ்ஸாமிகேன பன ஆணத்தேன தி³ன்னம் ப⁴ண்ட³ம் க³ண்ஹதோ ப⁴ண்ட³தே³ய்யமேவாதி வத³ந்தி, பத்தசதுக்கே விய அவஹாரதாவேத்த² யுத்தா, ஸங்க⁴ஸந்தகே பன ‘‘தே³ஹீ’’தி வுத்தேபி ஸாமிகஸ்ஸ கஸ்ஸசி அபா⁴வா ஸம்மதேன தி³ன்னேபி ப⁴ண்ட³தே³ய்யம் வுத்தந்தி க³ஹேதப்³ப³ம்.

146-9. ஆஹராபேந்தேஸு ப⁴ண்ட³தே³ய்யந்தி ‘‘க³ஹிதே அத்தமனோ ஹோதீ’’தி வசனதோ அனத்தமனஸ்ஸ ஸந்தகம் க³ஹிதம்பி புன தா³தப்³ப³மேவாதி வுத்தம். ‘‘ஸம்முகீ²பூ⁴தேஹி பா⁴ஜேதப்³ப³’’ந்தி வசனதோ பா⁴ஜனீயப⁴ண்ட³ம் உபசாரஸீமட்டா²னமேவ பாபுணாதீதி ஆஹ ‘‘அந்தோஉபசாரஸீமாயம் டி²தஸ்ஸேவ க³ஹேதும் வட்டதீ’’தி. ப⁴ண்ட³தே³ய்யந்தி உபி⁴ன்னம் ஸாலயபா⁴வேபி சோரஸ்ஸ அத³த்வா ஸாமிகஸ்ஸேவ தா³தப்³ப³ம் சோரேனாபி ஸாமிகஸ்ஸேவ தா³தப்³ப³தோ. ஏஸேவ நயோதி பம்ஸுகூலஸஞ்ஞாய க³ஹிதே ப⁴ண்ட³தே³ய்யம், தே²ய்யசித்தேன பாராஜிகந்தி அத்தோ².

வுட்ட²ஹந்தேஸூதி கா³மம் ச²ட்³டே³த்வா பலாயந்தேஸு. அவிஸேஸேனாதி ஸஉஸ்ஸாஹதாதி³விஸேஸம் அபராமஸித்வா ஸாமஞ்ஞதோ. ஸஉஸ்ஸாஹமத்தமேவ ஆபத்திபா⁴வஸ்ஸ பமாணம் ஸாமிகானம் பரிச்சி²ன்னபா⁴வதோ. ததோதி க³ணஸந்தகாதி³தோ. குலஸங்க³ஹணத்தா²ய தே³தீதி பம்ஸுகூலவிஸ்ஸாஸிகாதி³ஸஞ்ஞாய க³ஹேத்வா தே³தி, ததா³ குலஸங்க³ஹபச்சயா ச து³க்கடம் ப⁴ண்ட³தே³ய்யஞ்ச, தே²ய்யசித்தே பன ஸதி குலஸங்க³ஹணத்தா²ய க³ண்ஹதோபி பாராஜிகமேவ. ஊனபஞ்சமாஸகாதீ³ஸு குலதூ³ஸகது³க்கடேன ஸத்³தி⁴ம் து²ல்லச்சயது³க்கடானி. ஸேனாஸனத்தா²ய நியமிதந்தி இத³ம் இஸ்ஸரவதாய த³த³தோ து²ல்லச்சயத³ஸ்ஸனத்த²ம் வுத்தம். இதரபச்சயத்தா²ய தி³ன்னம்பி அதே²ய்யசித்தேன இஸ்ஸரவதாய குலஸங்க³ஹணத்தா²ய வா ஞாதகாதீ³னம் வா த³த³தோ து³க்கடம் ப⁴ண்ட³தே³ய்யஞ்ச ஹோதேவ. இஸ்ஸரவதாயாதி ‘‘மயி தே³ந்தே கோ நிவாரேஸ்ஸதி, அஹமேவேத்த² பமாண’’ந்தி ஏவம் அத்தனோ இஸ்ஸரியபா⁴வேன. து²ல்லச்சயந்தி குலஸங்க³ஹணத்தா²ய வா அஞ்ஞதா² வா காரணேன த³த³தோ ஸேனாஸனத்தா²ய நியமிதஸ்ஸ க³ருப⁴ண்ட³தாய து²ல்லச்சயம் ப⁴ண்ட³தே³ய்யஞ்ச. கீ³வாதி ஏத்த² ஸேனாஸனத்தா²ய நியமிதே து²ல்லச்சயேன ஸத்³தி⁴ம் கீ³வா, இதரஸ்மிம் து³க்கடேன ஸத்³தி⁴ந்தி வேதி³தப்³ப³ம். ஸுகா²தி³தமேவாதி அந்தோஉபசாரஸீமாயம் ட²த்வா பா⁴ஜேத்வா அத்தனோ ஸந்தகம் கத்வா கா²தி³தத்தா வுத்தம். ஸங்கி⁴கஞ்ஹி விஹாரபடிப³த்³த⁴ம் வேப⁴ங்கி³யம் ப³ஹிஉபசாரஸீமட்ட²ம் ப⁴ண்ட³ம் அந்தோஉபசாரட்டே²ஹி பி⁴க்கூ²ஹி ஏவ பா⁴ஜேதப்³ப³ம், ந ப³ஹி டி²தேஹி உபசாரஸீமாய பா⁴ஜேதப்³ப³ந்தி.

150. ‘‘வுத்தோ வஜ்ஜேமீ’’தி வுத்தபி⁴க்கு²ஸ்மிம் ‘‘வுத்தோ வஜ்ஜேஹீ’’தி வுத்தஸ்ஸ பச்சா² உப்பஜ்ஜனகபாராஜிகாதி³தோ³ஸாரோபனதோ, க³ஹட்டா²னம் வா ‘‘ப⁴த³ந்தா அபரிச்சே²த³ம் கத்வா வத³ந்தீ’’தி ஏவம் தோ³ஸாரோபனதோ.

153-5. சா²தஜ்ஜ²த்தந்தி தேன சா²தேன ஜிக⁴ச்சா²ய உத³ரக்³கி³னா ஜ²த்தம், த³ட்³ட⁴ம் பீளிதந்தி அத்தோ². த⁴னுகந்தி கு²த்³த³கத⁴னுஸண்டா²னம் லக்³க³னகத³ண்ட³ம். மத்³த³ந்தோ க³ச்ச²தி, ப⁴ண்ட³தே³ய்யந்தி ஏத்த² ஏகஸூகரக்³க⁴னகப⁴ண்ட³ம் தா³தப்³ப³ம் ஏகஸ்மிம் ப³ந்தே⁴ அஞ்ஞேஸம் தத்த² அப³ஜ்ஜ²னதோ. அதூ³ஹலந்தி யந்தபாஸாணோ, யேன அஜ்ஜோ²த்த²டத்தா மிகா³ பலாயிதும் ந ஸக்கோந்தி. பச்சா² க³ச்ச²தீதி தேன கதபயோகே³ன அக³ந்த்வா பச்சா² ஸயமேவ க³ச்ச²தி, ஹேட்டா² வுத்தேஸுபி ஈதி³ஸேஸு டா²னேஸு ஏஸேவ நயோ. ரக்க²ம் யாசித்வாதி ராஜபுரிஸானம் ஸந்திகம் க³ந்த்வா அனுத்³தி³ஸ்ஸ ரக்க²ம் யாசித்வா. குமீனமுக²ந்தி குமீனஸ்ஸ அந்தோ மச்சா²னம் பவிஸனமுக²ம்.

156. தே²ரானந்தி ஆக³ந்துகத்தே²ரானம். தேஸம்பீதி ஆவாஸிகபி⁴க்கூ²னம்பி. பரிபோ⁴க³த்தா²யாதி ஸங்கி⁴கே கத்தப்³ப³விதி⁴ம் கத்வா பரிபு⁴ஞ்ஜனத்தா²ய. க³ஹணேதி பாட²ஸேஸோ த³ட்ட²ப்³போ³. யத்தா²தி யஸ்மிம் ஆவாஸே. அஞ்ஞேஸந்தி அஞ்ஞேஸம் ஆக³ந்துகானம். தேஸுபி ஆக³ந்துகா அனிஸ்ஸராதி ஸேனாஸனே நிரந்தரம் வஸந்தானம் சீவரத்தா²ய தா³யகேஹி பி⁴க்கூ²ஹி வா நியமேத்வா தி³ன்னத்தா பா⁴ஜேத்வா கா²தி³தும் அனிஸ்ஸரா, ஆக³ந்துகேஹிபி இச்ச²ந்தேஹி தஸ்மிம் விஹாரே வஸ்ஸானாதீ³ஸு பவிஸித்வா சீவரத்தா²ய க³ஹேதப்³ப³ம். தேஸம் கதிகாய டா²தப்³ப³ந்தி ஸப்³பா³னி ப²லாப²லானி அபா⁴ஜேத்வா ‘‘ஏத்தகேஸு ருக்கே²ஸு ப²லானி பா⁴ஜேத்வா பரிபு⁴ஞ்ஜிஸ்ஸாம, அஞ்ஞேஸு ப²லாப²லேஹி ஸேனாஸனானி படிஜக்³கி³ஸ்ஸாமா’’தி வா, ‘‘பிண்ட³பாதாதி³பச்சயம் ஸம்பாதே³ஸ்ஸாமா’’தி வா, ‘‘கிஞ்சிபி அபா⁴ஜேத்வா சதுபச்சயத்தா²யேவ உபனேமா’’தி வா ஏவம் ஸம்மா உபனேந்தானம் ஆவாஸிகானம் கதிகாய ஆக³ந்துகேஹி டா²தப்³ப³ம். மஹாஅட்ட²கதா²யம் ‘‘அனிஸ்ஸரா’’தி வசனேன தீ³பிதோ ஏவ அத்தோ², மஹாபச்சரியம் சதுன்னம் பச்சயானந்திஆதி³னா வித்தா²ரேத்வா த³ஸ்ஸிதோ. பரிபோ⁴க³வஸேனேவாதி ஏத்த² ஏவ-ஸத்³தோ³ அட்டா²னப்பயுத்தோ, பரிபோ⁴க³வஸேன தமேவ பா⁴ஜேத்வாதி யோஜேதப்³ப³ம். ஏத்தா²தி ஏதஸ்மிம் விஹாரே, ரட்டே² வா.

ஸேனாஸனபச்சயந்தி ஸேனாஸனஞ்ச தத³த்தா²ய நியமேத்வா ட²பிதஞ்ச. ஏகம் வா த்³வே வா வரஸேனாஸனானி ட²பேத்வாதி வுத்தமேவத்த²ம் புன ப்³யதிரேகமுகே²ன த³ஸ்ஸேதும் ‘‘மூலவத்து²ச்சே²த³ம் பன கத்வா ந உபனேதப்³ப³’’ந்தி வுத்தம், ஸேனாஸனஸங்கா²தவத்து²னோ மூலச்சே²த³ம் கத்வா ஸப்³பா³னி ஸேனாஸனானி ந விஸ்ஸஜ்ஜேதப்³பா³னீதி அத்தோ². கேசி பனேத்த² ‘‘ஏகம் வா த்³வே வா வரஸேனாஸனானி ட²பேத்வா லாமகதோ பட்டா²ய விஸ்ஸஜ்ஜேந்தேஹிபி ஸேனாஸனபூ⁴மியோ ந விஸ்ஸஜ்ஜேதப்³பா³தி அயமத்தோ² வுத்தோ’’தி வத³ந்தி, தம்பி யுத்தமேவ இமஸ்ஸாபி அத்த²ஸ்ஸ அவஸ்ஸம் வத்தப்³ப³தோ, இதரதா² கேசி ஸஹ வத்து²னாபி விஸ்ஸஜ்ஜேதப்³ப³ம் மஞ்ஞேய்யும்.

பண்ணம் ஆரோபேத்வாதி ‘‘ஏத்தகே ருக்கே² ரக்கி²த்வா ததோ ஏத்தகம் க³ஹேதப்³ப³’’ந்தி பண்ணம் ஆரோபேத்வா. நிமித்தஸஞ்ஞம் கத்வாதி ஸங்கேதம் கத்வா. தா³ரகாதி தேஸம் புத்தனத்தாத³யோ யே கேசி கோ³பேந்தி, தே ஸப்³பே³பி இத⁴ ‘‘தா³ரகா’’தி வுத்தா. ததோதி யதா²வுத்ததா³ருஸம்பா⁴ரதோ. ஆபுச்சி²த்வாதி காரகஸங்க⁴ம் ஆபுச்சி²த்வா. தம் ஸப்³ப³ம்பி ஆஹரித்வாதி அனாபுச்சி²த்வாபி தாவகாலிகம் ஆஹரித்வா. அயமேவ பி⁴க்கு² இஸ்ஸரோதிஆதி³தோ பட்டா²ய அத்தனோ ஸந்தகேஹி தா³ருஸம்பா⁴ராதீ³ஹி ச காராபிதத்தா படிஜக்³கி³தத்தா ச ஸங்கி⁴கஸேனாஸனே பா⁴கி³தாய ச அயமேவ இஸ்ஸரோ, ந ச ஸோ ததோ வுட்டா²பேதப்³போ³தி வுத்தம் ஹோதி. உத³கபூஜந்தி சேதியங்க³ணே ஸிஞ்சனாதி³பூஜம். வத்தஸீஸேனாதி கேவலம் ஸத்³தா⁴ய, ந வேதனாதி³அத்தா²ய. ஸவத்து²கந்தி ஸஹ பூ⁴மியா. குட்டந்தி கே³ஹபி⁴த்திம். பாகாரந்தி பரிக்கே²பபாகாரம். ததோதி ச²ட்³டி³தவிஹாரதோ. ததோ ஆஹரித்வா ஸேனாஸனம் கதம் ஹோதீதி ஸாமந்தகா³மவாஸீஹி பி⁴க்கூ²ஹி ச²ட்³டி³தவிஹாரதோ தா³ருஸம்பா⁴ராதி³ம் ஆஹரித்வா ஸேனாஸனம் கதம் ஹோதி.

157. ‘‘புக்³க³லிகபரிபோ⁴கே³ன பரிபு⁴ஞ்ஜதீ’’தி வுத்தமத்த²ம்யேவ பாகடம் காதும் ‘‘ஆக³தாக³தானம் வுட்³ட⁴தரானம் ந தே³தீ’’தி வுத்தம். சதுபா⁴க³உத³கஸம்பி⁴ன்னேதி சதுத்த²பா⁴கே³ன ஸம்பி⁴ன்னே. பாளியம் ‘‘அனாபத்தி, பி⁴க்க²வே, பாராஜிகஸ்ஸா’’தி (பாரா. 157) ஸாமிகேஹி து²ல்லனந்த³ம் உத்³தி³ஸ்ஸ ஏதிஸ்ஸா ஹத்தே² தி³ன்னத்தா, அதே²ய்யசித்தேன பரிபு⁴ஞ்ஜிதத்தா ச வுத்தம். தே²ய்யசித்தேன பரிபு⁴த்தேபி சஸ்ஸா ப⁴ண்ட³தே³ய்யமேவ உபனிக்கி²த்தப⁴ண்ட³ட்டா²னியத்தா. ஓத³னபா⁴ஜனீயவத்து²ஸ்மிந்தி ‘‘அபரஸ்ஸ பா⁴க³ம் தே³ஹீ’’தி ஆக³தவத்து²ஸ்மிம் (பாரா. 141).

159. தஸ்ஸ குலஸ்ஸ அனுகம்பாய பஸாதா³னுரக்க²ணத்தா²யாதிஆதி³னா குலஸங்க³ஹத்த²ம் நாகாஸீதி த³ஸ்ஸேதி. ‘‘யாவ தா³ரகா பாஸாத³ம் ஆரோஹந்தி, தாவ பாஸாதோ³ தேஸம் ஸந்திகே ஹோதூ’’தி புப்³பே³ காலபரிச்சே²த³ம் கத்வா அதி⁴ட்டி²தத்தா ஏவ யதா²காலபரிச்சே²த³மேவ தத்த² திட்ட²தி, ததோ பரம் பாஸாதோ³ ஸயமேவ யதா²டா²னம் க³ச்ச²தி, ததா²க³மனஞ்ச இத்³தி⁴விஸ்ஸஜ்ஜனேன ஸஞ்ஜாதம் விய ஹோதீதி வுத்தம் ‘‘தே²ரோ இத்³தி⁴ம் படிஸம்ஹரீ’’தி. யஸ்மா ஏவம் இத்³தி⁴வித⁴ஞாணேன கரோந்தஸ்ஸ காயவசீபயோகா³ ந ஸந்தி தே²ய்யசித்தஞ்ச நத்தி² பாஸாத³ஸ்ஸேவ விசாரிதத்தா, தஸ்மா ‘‘ஏத்த² அவஹாரோ நத்தீ²’’தி தே²ரோ ஏவமகாஸீதி த³ட்ட²ப்³ப³ம். அத² வா தா³ரகேஸு அனுகம்பாய ஆனயனத்த²மேவ பாஸாதே³ உபனீதே பாஸே ப³த்³த⁴ஸூகராதீ³னம் ஆமிஸம் த³ஸ்ஸேத்வா டா²னாசாவனம் விய கரமரானீதேஸு தா³ரகேஸு பாஸாத³ம் ஆருள்ஹேஸுபி புன படிஸம்ஹரணே ச இத⁴ அவஹாரோ நத்தி² காருஞ்ஞாதி⁴ப்பாயத்தா, ப⁴ண்ட³தே³ய்யம்பி ந ஹோதி காயவசீபயோகா³பா⁴வா. காயவசீபயோகே³ ஸதியேவ ஹி ஆபத்தி ப⁴ண்ட³தே³ய்யம் வா ஹோதி, தேனேவ ப⁴க³வா ‘‘அனாபத்தி, பி⁴க்க²வே, அதே²ய்யசித்தஸ்ஸா’’திஆதி³ம் அவத்வா ‘‘அனாபத்தி, பி⁴க்க²வே, இத்³தி⁴மஸ்ஸ இத்³தி⁴விஸயே’’தி (பாரா. 159) ஏத்தகமேவ அவோச. இத்³தி⁴விஸயேதி சேத்த² பரப⁴ண்டா³தா³யககாயவசீபயோகா³ஸமுட்டா²பகஸ்ஸ கேவலம் மனோத்³வாரிகஸ்ஸ அதே²ய்யசித்தபூ⁴தஸ்ஸ இத்³தி⁴சித்தஸ்ஸ விஸயே ஆபத்தி நாம நத்தீ²தி அதி⁴ப்பாயோ க³ஹேதப்³போ³. கிம் பன படிக்கி²த்தம் இத்³தி⁴பாடிஹாரியம் காதும் வட்டதீதி சோத³னம் ஸந்தா⁴யாஹ ‘‘ஈதி³ஸாய அதி⁴ட்டா²னித்³தி⁴யா அனாபத்தீ’’தி. ‘‘அனாபத்தி, பி⁴க்க²வே, இத்³தி⁴மஸ்ஸ இத்³தி⁴விஸயே’’தி ஹி இமினாயேவ ஸுத்தேன அதி⁴ட்டா²னித்³தி⁴யா அப்படிக்கி²த்தபா⁴வோ ஸிஜ்ஜ²தி. அத்தனோ பகதிவண்ணம் அவிஜஹித்வா ப³ஹித்³தா⁴ ஹத்தி²ஆதி³த³ஸ்ஸனம், ‘‘ஏகோபி ஹுத்வா ப³ஹுதா⁴ ஹோதீ’’தி (தீ³. நி. 1.238, 239; ம. நி. 1.147; படி. ம. 1.102) ஆக³தஞ்ச அதி⁴ட்டா²னவஸேன நிப்ப²ன்னத்தா அதி⁴ட்டா²னித்³தி⁴ நாம, ‘‘ஸோ பகதிவண்ணம் விஜஹித்வா குமாரகவண்ணம் வா த³ஸ்ஸேதி, நாக³வண்ணம்…பே… விவித⁴ம்பி ஸேனாப்³யூஹம் த³ஸ்ஸேதீ’’தி (படி. ம. 3.13) ஏவம் ஆக³தா இத்³தி⁴ பகதிவண்ணவிஜஹனவிகாரவஸேன பவத்தத்தா விகுப்³ப³னித்³தி⁴ நாம. அத்தனோ பன பகதிரூபம் யதா²ஸபா⁴வேன ட²பேத்வாவ ப³ஹி ஹத்தி²ஆதி³த³ஸ்ஸனம் விகுப்³ப³னித்³தி⁴ நாம ந ஹோதி, அத்தனோ ரூபமேவ ஹத்தி²ஆதி³ரூபேன நிம்மானம் விகுப்³ப³னித்³தீ⁴தி வேதி³தப்³ப³ம்.

பராஜிதகிலேஸேனாதி விஜிதகிலேஸேன, நிக்கிலேஸேனாதி அத்தோ². இதா⁴தி இமஸ்மிம் ஸாஸனே, தேன து³தியபாராஜிகஸிக்கா²பதே³ன ஸமம் அஞ்ஞம் அனேகனயவோகிண்ணம் க³ம்பீ⁴ரத்த²வினிச்ச²யம் கிஞ்சி ஸிக்கா²பத³ம் ந விஜ்ஜதீதி யோஜனா. தத்த² அத்தோ² நாம பாளிஅத்தோ², வினிச்ச²யோ பாளிமுத்தகவினிச்ச²யோ, தே க³ம்பீ⁴ரா யஸ்மிம், தம் க³ம்பீ⁴ரத்த²வினிச்ச²யம். வத்து²ம்ஹி ஓதிண்ணேதி சோத³னாவஸேன வா அத்தனாவ அத்தனோ வீதிக்கமாரோசனவஸேன வா ஸங்க⁴மஜ்ஜே² அதி³ன்னாதா³னவத்து²ஸ்மிம் ஓதிண்ணே. ஏத்தா²தி ஓதிண்ணவத்து²ம்ஹி. வினிச்ச²யோதி ஆபத்தானாபத்தினியமனம். கப்பியேபி ச வத்து²ஸ்மிந்தி அத்தனா க³ஹேதும் யுத்தே மாதாபிதாதீ³னம் ஸந்தகேபி.

இதி ஸமந்தபாஸாதி³காய வினயட்ட²கதா²ய விமதிவினோத³னியம்

து³தியபாராஜிகவண்ணனானயோ நிட்டி²தோ.