7. கதி²னக்க²ந்த⁴கவண்ணனா

கதி²னானுஜானனகதா²வண்ணனா

306. ‘‘கதி²னந்தி பஞ்சானிஸம்ஸே அந்தோகரணஸமத்த²தாய தி²ரந்தி அத்தோ²’’தி லிகி²தம். ‘‘பஞ்ச கப்பந்தீ’’தி அவத்வா ‘‘கப்பிஸ்ஸந்தீ’’தி அனாக³தவசனம் ‘‘வோ’’தி இமஸ்ஸ ஸாமிவசனபக்கே² யுஜ்ஜதி தேஸம் தஸ்மிம் க²ணே அனத்த²தகதி²னத்தா. த்³வீஸு பனேதேஸு அத்த²விகப்பேஸு பச்சி²மோ யுத்தோ ஸப்³பே³ஸம்பி தேஸம் பாவேய்யகானம் ஸப்³ப³து⁴தங்க³த⁴ரத்தா. நிமந்தனம் ஸாதி³யந்தஸ்ஸேவ ஹி அனாமந்தசாரோ பஞ்ஞத்தோ, ததா² க³ணபோ⁴ஜனம். அஸமாதா³னசாரோ அனதி⁴ட்டி²ததிசீவரஸ்ஸ நத்தி² அதேசீவரிகஸ்ஸ யாவத³த்த²சீவரசதுத்தா²தி³சீவரக்³க³ஹணஸம்ப⁴வதோ. இதரஸ்ஸாபி அனதி⁴ட்டா²னமுகே²ன லப்³ப⁴தி. சீவருப்பாதோ³ அபம்ஸுகூலிகஸ்ஸேவ. ‘‘கதி²னத்த²தஸீமாய’’ந்தி உபசாரஸீமம் ஸந்தா⁴ய வுத்தம். உபசாரஸீமட்ட²ஸ்ஸ மதகசீவராதி³பா⁴கி³யதாய ப³த்³த⁴ஸீமாய தத்ருப்பாதா³பா⁴வதோ விஞ்ஞேய்யமேதம் உபசாரஸீமாவேத்த² அதி⁴ப்பேதாதி. கதி²னத்தா²ரம் கே லப⁴ந்தீதி கே ஸாதே⁴ந்தீதி அத்தோ². பஞ்ச ஜனா ஸாதே⁴ந்தி. கதி²னது³ஸ்ஸஸ்ஸ ஹி தா³யகா பச்சி²மகோடியா சத்தாரோ ஹோந்தி. ஏகோ படிக்³கா³ஹகோதி. ‘‘தத்ர சே, பி⁴க்க²வே, ய்வாயம் சதுவக்³கோ³ பி⁴க்கு²ஸங்கோ⁴ ட²பேத்வா தீணி கம்மானி உபஸம்பத³ம் பவாரணம் அப்³பா⁴ன’’ந்தி (மஹாவ. 388) சம்பேய்யக்க²ந்த⁴கே வுத்தத்தா ‘‘ந பஞ்சவக்³க³கரணீய’’ந்தி க³ஹேதப்³ப³ம். ‘‘யஸ்ஸ ஸங்கோ⁴ கதி²னது³ஸ்ஸம் தே³தி, தம் ஹத்த²பாஸே அகத்வாபி ப³ஹிஸீமாய டி²தஸ்ஸபி தா³தும் வட்டதீ’’தி வத³ந்தி, தம் ஹத்த²பாஸே கத்வா ஏவ தா³தப்³ப³ம். கஸ்மா? ‘‘தஸ்ஸ கம்மப்பத்தத்தா’’தி வுத்தம். ‘‘தத்ருப்பாதே³ன தண்டு³லாதி³னா வத்தே²ஸு சேதாபிதேஸு அத்த²தகதி²னானமேவ தானி வத்தா²னி பாபுணந்தி. வத்தே²ஹி பன தண்டு³லாதீ³ஸு சேதாபிதேஸு ஸப்³பே³ஸம் தானி பாபுணந்தீ’’தி வுத்தம். பட²மபவாரணாய பவாரிதா லப⁴ந்தீதி இத³ம் உக்கட்ட²கோடியா வுத்தம். அந்தராயேன அப்பவாரிதானம்பி வுத்த²வஸ்ஸானம் கதி²னத்தா²ரஸம்ப⁴வதோ இதரே க³ணபூரகே கத்வா கதி²னம் அத்த²ரிதப்³ப³ந்தி கத²ம் பஞ்ஞாயதீதி சே? ‘‘த்³வின்னம் புக்³க³லானம் அத்த²தம் ஹோதி கதி²னம் அத்தா²ரகஸ்ஸ ச அனுமோத³கஸ்ஸ சா’’தி (பரி. 403) பரிவாரே ஏகவசனகரணதோ, தத்தே²வ ‘‘ஸங்க⁴ஸ்ஸ அத்த²தம் ஹோதி கதி²னம், க³ணஸ்ஸ புக்³க³லஸ்ஸ அத்த²தம் ஹோதி கதி²ன’’ந்தி (பரி. 414) வசனதோ ச.

அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி இத³ம் கிம் ஏகஸீமஸ்மிம், உதா³ஹு நானாஸீமஸ்மிந்தி? கிஞ்சேத்த² – யதி³ தாவ ஏகஸீமஸ்மிம், பரதோ ‘‘ஸசே பன ஏகஸீமாய ப³ஹூ விஹாரா ஹோந்தி, ஸப்³பே³ பி⁴க்கூ² ஸன்னிபாதேத்வா ஏகத்த² கதி²னம் அத்த²ரிதப்³ப³ம், விஸும் விஸும் அத்த²ரிதும் ந வட்டதீ’’தி இமினா அட்ட²கதா²வசனேன விருஜ்ஜ²தி. இத³ஞ்ஹி வசனம் ஸப்³பே³ஸம்யேவ ஏகோ கதி²னத்தா²ரோதி தீ³பேதி. அத² நானாஸீமஸ்மிம், உபனந்த³ஸ்ஸ ஏகாதி⁴ப்பாயதா³னானுமதியா விருஜ்ஜ²தி. வுத்தஞ்ஹேதம் ‘‘தே³த², பி⁴க்க²வே, மோக⁴புரிஸஸ்ஸ ஏகாதி⁴ப்பாய’’ந்தி (மஹாவ. 364). இத³ஞ்ஹி வசனம் த்³வீஸுபி ஆவாஸேஸு தஸ்ஸ கதி²னத்தா²ரஸித்³தி⁴ம் தீ³பேதீதி. அவிரோதோ⁴வ இச்சி²தப்³போ³ அப்படிஸித்³த⁴த்தா, தஸ்மா ஏகஸீமஸ்மிம் வா நானாஸீமஸ்மிம் வா நானூபசாரே அஞ்ஞஸ்மிம் விஹாரே வுத்த²வஸ்ஸாபி ந லப⁴ந்தீதி அதி⁴ப்பாயோ வேதி³தப்³போ³. ‘‘பச்சி²மிகாய உபஸம்பன்னோ பட²மபவாரணாய பவாரேதும்பி லப⁴தி, வஸ்ஸிகோ ச ஹோதி ஆனிஸம்ஸஞ்ச லப⁴தீதி ஸாமணேரானம் வஸ்ஸூபக³மனம் அனுஞ்ஞாதம் ஹோதி, ஸாமணேரா கதி²னானிஸம்ஸம் லப⁴ந்தீ’’தி வத³ந்தி.

திண்ணம் சீவரானம் அஞ்ஞதரப்பஹோனகந்தி இத³ம் ‘‘ந அஞ்ஞத்ர ஸங்கா⁴டியா உத்தராஸங்கே³ன அந்தரவாஸகேன அத்த²தம் ஹோதி கதி²ன’’ந்தி இமாய பாளியா விருஜ்ஜ²னம் விய தி³ஸ்ஸதி. அயஞ்ஹி பாளி திண்ணம் சீவரானம் அஞ்ஞதரவிரஹேனாபி ந அத்த²தம் ஹோதி கதி²னந்தி தீ³பேதீதி சே? ந, தத³த்த²ஜானனதோ, ந திண்ணம் சீவரானம் அஞ்ஞதரவிரஹேன ந அத்த²தம் ஹோதி கதி²னந்தி ஹி தீ³பேதுகாமோ ப⁴க³வா தம் பாளிமாஹ. யதி³ ஏவம் ‘‘அஞ்ஞத்ர ஸங்கா⁴டியா உத்தராஸங்கே³ன அந்தரவாஸகேனா’’தி ந வத்தப்³பா³ ஸியாதி சே? ந, அதி⁴ப்பாயஜானனதோவ. யோ ஸங்கா⁴டியா அத்த²ரிதுகாமோ, தஸ்ஸ அஞ்ஞத்ர ஸங்கா⁴டியா ந அத்த²தம் ஹோதி. ஏஸ நயோ இதரத்தா²பீதி அயமேத்த² அதி⁴ப்பாயோ. தேனேவ ஸுக்கபக்கே² ‘‘ஸங்கா⁴டியா அத்த²தம் ஹோதீ’’திஆதி³னா நயேன ஏகமேவ சீவரம் வுத்தம், ஏவம் ஸந்தே ‘‘சதுவீஸதியா ஆகாரேஹி அனத்த²தம் ஹோதி கதி²னம், ஸத்தரஸஹி ஆகாரேஹி அத்த²தம் ஹோதி கதி²ன’’ந்தி யதா²ரஹம் உக்கட்ட²கோடியா வுத்தந்தி வேதி³தப்³ப³ம், தஸ்மா கண்ஹபக்கே² உல்லிகி²த…பே… நிஸ்ஸீமட்டா²னுமோத³னானம் சதுவீஸதியா ஆகாரானம் ஸம்ப⁴வந்தானம் ஸப்³பே³ன ஸப்³ப³ம் அபா⁴வேனபி நிமித்தகதாதீ³னம் அஸம்ப⁴வந்தானம் அஞ்ஞதரபா⁴வேனபி ந அத்த²தம் ஹோதி கதி²னந்தி ஏவமதி⁴ப்பாயோ வேதி³தப்³போ³. ஸுக்கபக்கே²பி அஹதாஹதகப்ப…பே… ஸீமட்டா²னுமோத³னானம் ஸத்தரஸன்னம் ஆகாரானம் ஸம்ப⁴வந்தானம் அஞ்ஞதரபா⁴வேனபி இதரேஸம் ஸப்³பே³ன ஸப்³ப³ம் அபா⁴வேனபி அத்த²தம் ஹோதி கதி²னந்தி ஏவமதி⁴ப்பாயோ வேதி³தப்³போ³. அஞ்ஞதா² அஞ்ஞமஞ்ஞவிரோதோ⁴, யதா²ஸம்ப⁴வம் யோஜேத்வா வேதி³தப்³போ³.

தத்ரித³ம் முக²மத்தனித³ஸ்ஸனம் – கண்ஹபக்கே² ‘‘உத்தராஸங்கே³ன அத்த²தே கதி²னே ந அஞ்ஞத்ர ஸங்கா⁴டியா ந அஞ்ஞத்ர அந்தரவாஸகேன அத்த²தம் ஹோதி கதி²ன’’ந்தி வசனப்பமாணதோ தம் கதி²னம் அனத்த²தம் ஸியா. ஸுக்கபக்கே² ச ‘‘அனிமித்தகதேன அத்த²தம் ஹோதி கதி²ன’’ந்தி வசனப்பமாணதோ அனிமித்தகதேன கதி²னே அத்த²தே தஞ்சே பரிகதா² கதம், ததா²பி அத்த²தமேவ கதி²னம் ஹோதீதி அயம் து³விதோ⁴பி விரோதோ⁴. யதா²வுத்தனயேன அதி⁴ப்பாயே க³ஹிதே பரிஹாரோ ஹோதீதி வேதி³தப்³ப³ம்.

யோ ஆனிஸம்ஸம் ப³ஹும் தே³தீதி இமினா பச்சயலோலபா⁴வம் விய தீ³பேதி, ததா²பி ப⁴க³வதா யாவத³த்த²சீவரபரியேஸனபஞ்ஞாபனமுகே²ன த்³வாரம் தி³ன்னந்தி கத்வா ஸங்கா⁴னுக்³க³ஹத்த²ம் ஹோதி. ‘‘அகாதும் ந ஹோதீதி அனாத³ரியேன அகரோந்தஸ்ஸ து³க்கட’’ந்தி லிகி²தம். அனுமோதா³மாதி ஏத்த² ஸப்³ப³ஸங்கா³ஹிகவஸேன ஏவம் வுத்தம். ‘‘அனுமோதா³மீ’’தி ஏககேன வத்தப்³ப³ம், இதரதா² ‘‘ந வட்டதீ’’தி மஹாஅட்ட²கதா²யம் கிர வுத்தம். கதி²னசீவரம் அதி⁴ட்ட²ஹித்வா ‘‘இமாய ஸங்கா⁴டியா கதி²னம் அத்த²ராமீ’’தி வாசாய பி⁴ன்னமத்தாய புக்³க³லஸ்ஸ அத்த²தம் ஹோதி. ‘‘கம்மவாசா பன ஏகாயேவ வட்டதீதி கதி²னது³ஸ்ஸஸ்ஸ ஏவ கம்மவாசா, ஸேஸசீவரதா³னே அபலோகனமேவாதி அத்தோ²’’தி லிகி²தம். ஏகஸீமாயாதி ஏகஉபசாரஸீமாயாதி அத்தோ² யுஜ்ஜதி. கேசி பன ‘‘ப³த்³த⁴ஸீமா அதி⁴ப்பேதா ஏகஸீமாய ஏகட்டா²னே அத்த²ரிதே ஸப்³ப³த்த² அத்த²ரிதம் ஹோதி ‘ஸப்³பே³ பி⁴க்கூ² ஸன்னிபதித்வா’தி வுத்தத்தா, தேஹிபி அனுமோத³ந்தேஹி அத்த²ரிதமேவ ஹோதி, உபசாரபரிச்சி²ன்னே தத்த² தத்த² லத்³த⁴ம் தேஹி தேஹி லத்³த⁴ப்³ப³ம் ஹோதி. தத்த² பவிட்டே²ஹிபி லபி⁴தப்³ப³ம் ஸப்³பே³ஹிபி அத்த²ரிதத்தா, அயம் விஸேஸோ. மஹாஅட்ட²கதா²யம்பி ஏவமேவ வுத்த’’ந்தி வத³ந்தி, வீமம்ஸிதப்³ப³ம்.

308. சதுவீஸதி ஆகாரவந்ததாய மஹாபூ⁴மிகம். ‘‘தீ³க⁴ஸிப்³பி³தந்தி பச்சா²கதஸிப்³ப³னம், ஓவட்டித்வா ஸிப்³ப³னம் வா’’தி லிகி²தம். கண்டு³ஸம் நாம புப்³ப³ப³ந்த⁴னம். பட²மசிமிலிகா க⁴டேத்வா ட²பிதா ஹோதீதி கதி²னது³ஸ்ஸம் து³ப்³ப³லம் தி³ஸ்வா தம் ப³லவதா அத்தனோ பகதிது³ஸ்ஸேன ஸத்³தி⁴ம் க⁴டேத்வா து³பட்டம் கத்வா ஸிப்³பி³துகாமேஹி கதி²னது³ஸ்ஸதோ பகதிது³ஸ்ஸஸ்ஸ மஹந்ததாய பட²மம் தப்பமாணானுரூபம் ப³ந்த⁴கண்டு³ஸே க⁴டேத்வா ரஜ்ஜுகேஹி ப³ந்தி⁴த்வா கதம் ஹோதீதி அதி⁴ப்பாயோ. கதி²னசீவரஸ்ஸ அப்பதாய பட²மம் ப³த்³த⁴து³ஸ்ஸம் குச்சி²சிமிலிகா ஹோதி, மஹாபச்சரியம், குருந்தி³யஞ்ச வுத்தவசனனித³ஸ்ஸனம், ப்³யஞ்ஜனே ஏவ பே⁴தோ³, அத்தே² நத்தீ²தி த³ஸ்ஸனத்த²ம் கதந்தி வேதி³தப்³ப³ம். ‘‘இமினா கிம் தீ³பேதீதி சே? ததா²கதம் து³பட்டசீவரம் பகதிசீவரஸ்ஸ மஹந்ததாய பகதிசீவரஸங்க்²யமேவ க³ச்ச²தி, ந கதி²னசீவரஸங்க்²யந்தி கஸ்ஸசி ஸியா, நேவம் த³ட்ட²ப்³ப³ம். ஏவம் குச்சி²சிமிலிகபா⁴வேன டி²தம்பி கதி²னசீவரம். மஹந்தம்பி தம் பகதிசீவரம் அத்தனோ கதி²னசீவரமேவாதி. ஹேட்டி²மகோடியா பஞ்சகஸ்ஸ இச்சி²தப்³ப³த்தா கதி²னது³ஸ்ஸம் க²ண்டா³க²ண்ட³ம் ப³ஹுதா⁴ சி²ந்தி³த்வா ஸிப்³பி³துகாமோ கதி²னசீவரதோ பட்டம் க³ஹேத்வா அஞ்ஞஸ்மிம் அகதி²னசீவரே பட்டமாரோபேதீ’’தி லிகி²தம். அத² வா ப³ஹூனி கதி²னது³ஸ்ஸானி பம்ஸுகூலானி கு²த்³த³ககு²த்³த³கானி ஏகசீவரத்தா²ய, மஹந்தானி ச ஊனத்தா²ய தி³ன்னானி ஹோந்தி. கதி²னசீவரதோதி பி⁴க்கு² ஏகச்சதோ கதி²னசீவரதோ பட்டம் க³ஹேத்வா அஞ்ஞஸ்மிம் ஆரோபேதி. ஏத்தா²ஹ – கிம் பம்ஸுகூலானி கதி²னது³ஸ்ஸானி விகப்பனுபக³பச்சி²மானி தா³தப்³பா³னி, உதா³ஹு கு²த்³த³கானிபீதி? ஏத்த² அசீவரஸங்க்²யத்தா கு²த்³த³கானி தா³தும் ந வட்டதி. கம்மவாசா தத்த² ந ருஹதீதி ஏகே. ‘‘பம்ஸுகூலேன அத்த²தம் ஹோதீ’’தி பாளியம் நயதா³னதோ குச்சி²சிமிலிகபா⁴வேன டி²தஸ்ஸ கதி²னது³ஸ்ஸஸ்ஸ அத்தனோ ஸபா⁴வேன அனதி⁴ட்டா²னுபக³ஸ்ஸ புராணசீவரபா⁴வேனேவ அதி⁴ட்டா²னாரஹஸ்ஸபி கதி²னசீவரபா⁴வானுமதிமுகே²ன அட்ட²கதா²யம் பதா³னதோ ச கு²த்³த³கானிபி தா³தும் வட்டதி. தஞ்ஹி கதி²னத்தா²ரகோ க⁴டேத்வா கதி²னசீவரம் கரிஸ்ஸதீதி கத்வா கப்பதீதி ஏகே, யுத்ததரம் க³ஹேதப்³ப³ம்.

நிசயஸன்னிதி⁴ ஸங்கா⁴யத்தா ஸங்கே⁴ன கதத்தா. ரத்தாதிக்கந்தம் நிஸ்ஸஜ்ஜிதப்³ப³த்தா ‘‘நிஸ்ஸக்³கி³ய’’ந்தி வுச்சதி. பஞ்ச க²ண்டா³னி பட்டானி பமாணம் அஸ்ஸாதி பஞ்சகம். தேன வா அதிரித்தேன வாதி அத்தோ². தத³ஹேவ ஸஞ்சி²ன்னேனாதி ஸங்கே⁴ன கதி²னத்தா²ரகஸ்ஸ கம்மவாசம் வத்வா தி³ன்னேனேவ தத³ஹேவ ஸஞ்சி²ன்னேன ஸமண்ட³லிகதேன ப⁴விதப்³ப³ம். ஏவம் தி³ன்னம்யேவ ஹி பரிவாரே ‘‘புப்³ப³கரணம் ஸத்தஹி த⁴ம்மேஹி ஸங்க³ஹித’’ந்தி வுத்தம், ந தா³யகேன தி³ய்யமானம், தஸ்மா பரினிட்டி²தபுப்³ப³கரணமேவ சே தா³யகோ ஸங்க⁴ஸ்ஸ தே³தி, ஸம்படிச்சி²த்வா கம்மவாசாய தா³தப்³ப³ம். தேன ச தஸ்மிம்யேவ ஸீமாமண்ட³லே அதி⁴ட்ட²ஹித்வா அத்த²ரித்வா ஸங்கோ⁴ அனுமோதா³பேதப்³போ³ கதபுப்³ப³கரணஸ்ஸ புன கத்தப்³பா³பா⁴வதோ. அத்தா²ரகஸ்ஸ ஹத்த²க³தமேவ ஹி ஸந்தா⁴ய ‘‘ந உல்லிகி²தமத்தேனா’’திஆதி³ வுத்தம். பரினிட்டி²தபுப்³ப³கரணம்பி புன தோ⁴வித்வா விஸிப்³பி³த்வா காதப்³ப³மேவ வசனபமாணதோதி சே? ந, சி²ன்னஸ்ஸ புன சே²தா³ஸம்ப⁴வதோ. அஞ்ஞஸ்மிம் டா²னே சி²ந்தி³தப்³ப³மேவாதி சே? ந, பப்³ப³ஜ்ஜாதி⁴காரே ‘‘கேஸமஸ்ஸும் ஓஹாராபேத்வா’’தி வசனப்பமாணதோ முண்டி³கஸ்ஸ சி²ன்னேபி கேஸே பரியேஸித்வா ஸிரஸ்மிம் ட²பேத்வா புன ஓஹாராபேத்வா பப்³பா³ஜேதப்³ப³ப்பஸங்க³தோ, ந இத⁴ ந-காரேன படிஸித்³த⁴த்தாதி சே? ந, ‘‘ந அஞ்ஞத்ர ஸங்கா⁴டியா’’தி ந-காரேன படிஸித்³த⁴த்தா உத்தராஸங்கே³ன அத்த²தே அனத்த²தம் ஹோதீதி அனிட்ட²ப்பஸங்க³தோ, தஸ்மா அபி⁴னிவேஸோ ந காதப்³போ³. ‘‘ப³ஹிஉபசாரஸீமாய டி²தோ’’தி வுத்தத்தாபி புப்³பே³ வுத்தவினிச்ச²யோவ க³ஹேதப்³போ³.

309. அஸன்னிதி⁴கதேன அத்த²தம் ஹோதி கதி²னந்தி ஏத்த² கிம் கதி²னத்தா²ரமாஸேயேவ து³விதோ⁴பி ஸன்னிதி⁴ அதி⁴ப்பேதோ, உதா³ஹு ததோ புப்³பே³பி, தா³யகேன வா கதா³ தா³தப்³ப³ம், கிம் கதி²னத்தா²ரமாஸேயேவ, உதா³ஹு ததோ புப்³பே³பி, கதி²னத்தா²ரமாஸேபி அஸுகஸ்மிம் தி³வஸேயேவ அத்தா²ரத்தா²ய த³ம்மீதி தா³தும் வட்டதி ந வட்டதீதி இத³ம் விசாரேதப்³ப³ம். கதி²னத்தா²ரமாஸே ஏவ து³விதோ⁴பி ஸன்னிதி⁴. தா³யகேனாபி வஸ்ஸாவாஸிகம் விய கதி²னசீவரம் உத்³தி³ஸ்ஸ தி³ன்னம் ந வட்டதி. கஸ்மா? ‘‘கதி²னதா³யகஸ்ஸ வத்தம் அத்தீ²’’திஆதி³னா (மஹாவ. அட்ட². 306) நயேன அட்ட²கதா²யம் வுத்தத்தா. உக்கட்ட²மத்தமேதந்தி சே? ந, ‘‘கதி²னம் நாம அதிஉக்கட்ட²ம் வட்டதீ’’தி (மஹாவ. அட்ட². 308) வுத்தத்தா. ந ஆக³மனம் ஸந்தா⁴ய வுத்தந்தி சே? ந, இத³ம்பி ஆக³மனமேவ ஸந்தா⁴ய வுத்தம், புப்³பே³ தி³ன்னம் ந வட்டதீதி.

310. கதி²னஸ்ஸாதி கதி²னத்தா²ரஸ்ஸ. உப்³பா⁴ராயாதி வூபஸமாய, அப்பவத்தியாதி அத்தோ². கிமத்தி²யம் உப்³பா⁴ரனித³ஸ்ஸனந்தி சே? பஞ்சஹி அனாபத்திகாலபரியந்தத³ஸ்ஸனேன தேஸு ஸம்வருப்பாத³னத்த²ம். அஞ்ஞதா² ‘‘சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ, அத்த²தே கதி²னே பஞ்ச மாஸா’’தி (பாரா. 649) விப⁴ங்கே³ வுத்தத்தா அந்தராபக்கமனந்திகாதி³உப்³பா⁴ராபா⁴வேபி பஞ்சஹி பஞ்சஸு மாஸேஸு அனாபத்தியேவாதி மிச்சா²கா³ஹோ ஸியா. ததோ ஆபத்திகே²த்தே அனாபத்திகே²த்தஸஞ்ஞாய தம் தம் ஆபத்திம் ஆபஜ்ஜதி, இதரேஸஞ்ச பி⁴க்கூ²னம் லாப⁴ந்தராயம் கரோதீதி வேதி³தப்³ப³ம்.

ஆதா³யஸத்தககதா²வண்ணனா

311. ஸன்னிட்டா²னந்திகே த்³வேபி பலிபோ³தா⁴ ஏகதோ சி²ஜ்ஜந்தீதி இத⁴, பரிவாரட்ட²கதா²யஞ்ச வுத்தம் இமிஸ்ஸா க²ந்த⁴கபாளியா ஸமேதி ஏகதோ உபி⁴ன்னம்பி து⁴ரனிக்கே²பஸ்ஸ கதத்தா. ‘‘இத³ம் ப³ஹிஸீமாயமேவ வுத்தம் ஸன்னிட்டா²னந்திகம் ஸந்தா⁴ய வுத்தம். யம் பன வுத்தம் பரிவாரே ‘சத்தாரோ கதி²னுத்³தா⁴ரா ஸியா அந்தோஸீமாய உத்³த⁴ரிய்யந்தி, ஸியா ப³ஹிஸீமாய உத்³த⁴ரிய்யந்தி, நிட்டா²னந்திகோ ஸன்னிட்டா²னந்திகோ நாஸனந்திகோ ஆஸாவச்சே²தி³கோ’தி (பரி. 416). தத்த² ப³ஹிஸீமாய ஸன்னிட்டா²னந்திகோ உத்³த⁴ரிய்யதீதி இத⁴ த³ஸ்ஸிதனயோவ. கத²ம் அந்தோஸீமாய ஸன்னிட்டா²னந்திகோ? அகதசீவரமாதா³ய ‘ந பச்சேஸ்ஸ’ந்தி க³தோ, க³தக³தட்டா²னே பா²ஸுவிஹாரம் அலப⁴ந்தோ தமேவ விஹாரம் ஆக³ச்ச²தி, தஸ்ஸ சீவரபலிபோ³தோ⁴ டி²தோ. ஸோ ச ‘நேவிமம் சீவரம் காரேஸ்ஸ’ந்தி சித்தே உப்பன்னமத்தே சி²ஜ்ஜதி, தஸ்மா அந்தோஸீமாய உத்³த⁴ரிய்யதி, தஸ்மா து³விதோ⁴ ஸன்னிட்டா²னந்திகோ’’தி போராணக³ண்டி²பதே³ லிகி²தம், தம் யுத்தம், அஞ்ஞதா² அந்தோஸீமாய ‘‘நேவிமம் சீவரம் காரேஸ்ஸ’’ந்தி பவத்தஉப்³பா⁴ரோ இதரேஸு ஸமோதா⁴னம் ந க³ச்ச²தீதி அதிரித்தோ ஸியா. ஸீமாதிக்கந்திகோதி சீவரகாலஸீமாதிக்கந்திகோ. ஸஉப்³பா⁴ரே சீவரபலிபோ³தோ⁴ பட²மம் சி²ஜ்ஜந்தோ விய கா²யதி, அத² கோ² ஸாபேக்க²தாய சீவரகரணே ஸஉஸ்ஸாஹோவ ஹோதீதி லேஸம் ஸந்தா⁴ய பரிவாரவஸேன ‘‘த்³வே பலிபோ³தா⁴ அபுப்³ப³ம் அசரிமம் சி²ஜ்ஜந்தீ’’தி (மஹாவ. அட்ட². 311) வுத்தம். ‘‘கதசீவரோ’’தி வுத்தத்தா இத⁴ ந ஸம்ப⁴வதி.

316. ஸப்³ப³ம் அத்தனோ பரிக்கா²ரம் அனவஸேஸேத்வா பக்கமந்தோ ‘‘ஸமாதா³ய பக்கமதீ’’தி வுச்சதி. ‘‘கதி²னுத்³தா⁴ரே விஸேஸோ நத்தி². புக்³க³லாதி⁴ப்பாயவிஸேஸேன கேவலம் வாரத³ஸ்ஸனத்த²ம் ஸமாதா³யவாரா வுத்தா’’தி ஸப்³பே³ஸு க³ண்டி²பதே³ஸு லிகி²தம். இத⁴ பன புக்³க³லாதி⁴ப்பாயேன பயோஜனம் வீமம்ஸிதப்³ப³ம். பக்கமனந்திகஸ்ஸ அபா⁴வா ‘‘யதா²ஸம்ப⁴வ’’ந்தி வுத்தம். விப்பகதேபி து⁴ரனிக்கே²பவஸேன பக்கமனந்திகதா ஸம்ப⁴வதி, தஸ்மா பக்கமனந்திகவாரோபி வத்தப்³போ³தி சே? ந, ஸன்னிட்டா²னந்திகலக்க²ணப்பஸங்க³தோ. அகதசீவரஸ்ஸ ந ஸவனந்திகதா ச.

தத்ராயம் ஆதி³தோ பட்டா²ய வாரவிபா⁴வனா – ஆதா³யவாரா ஸத்த, ததா² ஸமாதா³யவாராதி த்³வே ஸத்தகவாரா. ததோ பக்கமனந்திகம் வஜ்ஜேத்வா விப்பகதசீவரஸ்ஸ ஆதா³யவாரா, ஸமாதா³யவாரா சாதி த்³வே ச²க்கவாரா. ததோ பரம் நிட்டா²னஸன்னிட்டா²னனாஸனந்திகானம் வஸேன தீணி திகானி த³ஸ்ஸிதானி, தத்த² பட²மத்திகம் அந்தோஸீமாய ‘‘ந பச்சேஸ்ஸ’’ந்தி இமம் விதி⁴ம் அனாமஸித்வா ப³ஹிஸீமாயம் ஏவ ‘‘ந பச்சேஸ்ஸ’’ந்தி பவத்தம், தஸ்மா பக்கமனந்திகஸீமாதிக்கந்திகஸஉப்³பா⁴ரா தத்த² ந யுஜ்ஜந்தி. ‘‘ஆஸாவச்சே²தி³கோ ஸம்ப⁴வந்தோபி யதா²வுத்தகாரணேன ந வுத்தோ. து³தியத்திகம் அந்தோஸீமாய ‘ந பச்சேஸ்ஸ’ந்தி பவத்தம், ஏத்த² கிஞ்சாபி பக்கமனந்திகோ ஸம்ப⁴வதி, ததா²பி யேஹி சீவரபலிபோ³தோ⁴ சி²ஜ்ஜதி, தேஸம்யேவாதி⁴ப்பேதத்தா ந வுத்தோ’’தி போராணக³ண்டி²பதே³ வுத்தம். ஸப்³ப³ஸ்மிம்பி பன்னரஸகே விப்பகதசீவரஸ்ஸேவாதி⁴ப்பேதத்தாதி தக்கோ. அதி⁴ட்டா²னுபகே³ ச விப்பகதே ஸதி ந நிட்டா²னந்திகோ. நிட்டா²னாவஸேஸே ஸதி ந நாஸனந்திகோதி போராணா. ததியத்திகம் அனதி⁴ட்டி²த-பதே³ன விஸேஸேத்வா பவத்தம், அத்த²தோ பட²மத்திகேன ஸமேதி. தஸ்ஸ அத்த²த³ஸ்ஸனபயோஜனம் கிர தம். யஸ்மா இமே தயோ அத்த²விகப்பா இமேஹி ஏவ தீஹி கதி²னுத்³தா⁴ரேஹி ஸக்கா த³ஸ்ஸேதும், தஸ்மா இமேவ யோஜிதா ஏகஸம்ப³ந்த⁴வஸேன, அஞ்ஞதா² பட²மத்திகம் ச²க்கம் ப⁴வேய்ய இமஸ்ஸ பன்னரஸகஸ்ஸ அந்தே ச²க்கம் விய. ததியத்திகானந்தரம் சதுத்த²த்திகம் ஸம்ப⁴வந்தம் ‘‘அந்தோஸீமாயம் ‘பச்சேஸ்ஸ’’ந்தி வசனவிஸேஸேன ஸம்ப⁴வதி. ததா² ச யோஜியமானம் இதரேஹி ஸவனந்திகாதீ³ஹி அவிருத்³த⁴க்கமம் ஹோதி, தஸ்மா சதுத்த²த்திகம் அஹுத்வா ச²க்கம் ஜாதந்தி வேதி³தப்³ப³ம். ஏவம் தீணி திகானி ஏகம் ச²க்கஞ்சாதி பட²மம் பன்னரஸகம் வேதி³தப்³ப³ம். இதா³னி இத³மேவ பன்னரஸகம் உபஸக்³க³விஸேஸேன து³தியம் ஸமாதா³யபன்னரஸகம் நாம கதம். புன விப்பகதசீவரம் ஆதா³யாதி ததியம் பன்னரஸகம், ஸமாதா³யாதி சதுத்த²ம் பன்னரஸகம் த³ஸ்ஸிதம். ஏவம் சத்தாரி பன்னரஸகானி வேதி³தப்³பா³னி. தத்த² பட²மது³தியேஸு பன்னரஸகேஸு ஸப்³பே³ன ஸப்³ப³ம் அகதசீவரம் அதி⁴ப்பேதம், இதரேஸு த்³வீஸு விப்பகதந்தி யோஜேதப்³ப³ம். ‘‘புப்³பே³ நிப³த்³த⁴ட்டா²னே சீவராஸாய க³ஹேதப்³ப³ம், அஞ்ஞத்த² ந வட்டதி. உபச்சி²ன்னாய சே சீவராஸாய சீவரம் உப்பன்னம், ந தம் சீவரபலிபோ³த⁴ம் கரோதீ’’தி போராணக³ண்டி²பதே³ வுத்தம். நிஸ்ஸக்³கி³யேஸு ததியகதி²னே ஆக³தசீவரபச்சாஸா இத⁴ சீவராஸாதி தக்கோ. யத்த² சீவராஸா, தம் டா²னம் அதி⁴கரணூபசாரேன ‘‘சீவராஸா’’த்வேவ வுச்சதீதி கத்வா ‘‘தம் சீவராஸம் பயிருபாஸதீ’’திஆதி³ வுத்தம், தஸ்மா அனாஸாய லப⁴தீதி அனாஸாயிதட்டா²னே லப⁴தீதிஆதி³னா அத்தோ² க³ஹேதப்³போ³. ஏத்த² நிட்டா²னஸன்னிட்டா²னனாஸனஆஸாவச்சே²தி³கவஸேன ஏகோ வாரோதி இத³மேகம் சதுக்கம் ஜாதம், தஸ்மா புப்³பே³ வுத்தானி தீணி திகானி ஆஸாவச்சே²தி³காதி⁴கானி தீணி சதுக்கானீதி ஏகம் அனாஸாயத்³வாத³ஸகந்தி வேதி³தப்³ப³ம். தத³னந்தரே ஆஸாயத்³வாத³ஸகே கிஞ்சாபி பட²மத்³வாத³ஸக்கமோ லப்³ப⁴தி, ததா²பி தம் நிப்³பி³ஸேஸந்தி தமேகம் த்³வாத³ஸகம் அவுத்தஸித்³த⁴ம் கத்வா விஸேஸதோ த³ஸ்ஸேதும் ஆதி³தோ பட்டா²ய ‘‘அந்தோஸீமாய பச்சேஸ்ஸ’’ந்தி வுத்தம், தம் து³தியசதுக்கே ‘‘ஸோ ப³ஹிஸீமக³தோ ஸுணாதீ’’திஆதி³வசனஸ்ஸ ததியசதுக்கே ஸவனந்திகாதீ³னஞ்ச ஓகாஸகரணத்த²ந்தி வேதி³தப்³ப³ம். இத³ம் பன த்³வாத³ஸகம் அனாஸாய வஸேன லப்³ப⁴மானம்பி இமினா அவுத்தஸித்³த⁴ம் கத்வா ந த³ஸ்ஸிதந்தி வேதி³தப்³ப³ம். ஏவமேத்த² த்³வே த்³வாத³ஸகானி உத்³த⁴ரிதானி. கரணீயத்³வாத³ஸகேபி யதா²த³ஸ்ஸிதஅனாஸாயத்³வாத³ஸகம், அவுத்தஸித்³த⁴ம் ஆஸாயத்³வாத³ஸகஞ்சாதி த்³வே த்³வாத³ஸகானி உத்³த⁴ரிதப்³பா³னி. இதா³னி தி³ஸம்க³மிகனவகம் ஹோதி. தத்த² யஸ்மா ‘‘தி³ஸம்க³மிகோ பக்கமதீ’’தி வசனேனேவ ‘‘ந பச்சேஸ்ஸ’’ந்தி இத³ம் அவுத்தஸித்³த⁴மேவ, தஸ்மா தம் ந வுத்தம். ஏத்தாவதா ஆவாஸபலிபோ³தா⁴பா⁴வோ த³ஸ்ஸிதோ.

321. ‘‘சீவரபடிவீஸம் அபவிலாயமானோ’’தி இமினா சீவரபலிபோ³த⁴ஸமங்கி³தமஸ்ஸ த³ஸ்ஸேதி. படிவீஸோதி அத்தனோ பத்தப்³போ³ சீவரபா⁴கோ³. அபவிலாயமானோதி ஆகங்க²மானோ. தஸ்ஸ சீவரலாபே⁴ ஸதி வஸ்ஸம்வுத்தா²வாஸே நிட்டா²னஸன்னிட்டா²னனாஸனந்திகானம் வஸேன ஏகம் திகம், தேஸம்யேவ வஸேன அந்தராமக்³கே³ ஏகம், க³தட்டா²னே ஏகந்தி திண்ணம் திகானம் வஸேன ஏகம் நவகம் வேதி³தப்³ப³ம். ததோ பரம் நிட்டா²னஸன்னிட்டா²னனாஸனந்தி கஸீமாதிக்கந்திகஸஉப்³பா⁴ரானம் வஸேன பா²ஸுவிஹாரபஞ்சகம் வுத்தம். உப⁴யத்த² ஸேஸகதி²னுத்³தா⁴ராஸம்ப⁴வோ பாகடோவ. அயம் பனேத்த² பஞ்சகே விஸேஸோ – ஸமாதா³யவாரோ ந ஸம்ப⁴வதி ‘‘பச்சேஸ்ஸ’’ந்தி பச்சாக³மனாதி⁴ப்பாயதோ.

325. த்³வேமே பி⁴க்க²வே கதி²னஸ்ஸ பலிபோ³தா⁴தி கதி²னத்தா²ரஸ்ஸ அனுபப³ந்த⁴னபச்சயாதி.

கதி²னக்க²ந்த⁴கவண்ணனா நிட்டி²தா.