8. சீவரக்க²ந்த⁴கவண்ணனா

ஜீவகவத்து²கதா²வண்ணனா

326. ராஜக³ஹகோதி ராஜக³ஹவாஸீ.

328. அமோஹஜாதிகத்தா ந சிரஸ்ஸேவ விஞ்ஞுதம் பாபுணி. அஹம் தே பிதா, கேனட்டே²ன? யஸ்மா த்வம் மயா போஸாபிதோ.

329. ‘‘ஸக்கே விஸ்ஸட்ட²மத்தே’’தி பாடோ², அட்ட²மஸிக்கா²பதே³ விஸ்ஸட்ட²மத்தோவ.

பஜ்ஜோதராஜவத்து²கதா²வண்ணனா

334. பு⁴ஞ்ஜிதும் நிஸின்னஸ்ஸாதி ஏத்த² ‘‘த⁴ம்மபதே³ ‘ப³ஹினக³ரே தி³ஸ்வா’தி வுத்தம், தஸ்மா த்³வீஸு தி³வஸேஸு தி³ன்னம் தேன தேஸு ஏகேகம் க³ஹேத்வா த்³வீஸு அட்ட²கதா²ஸு வுத்தந்தி யுஜ்ஜதீ’’தி வத³ந்தி.

ஸமத்திம்ஸவிரேசனகதா²வண்ணனா

336. கப³ளே கப³ளேதி ஏத்த² கிஞ்சாபி கு³ளாதீ³ஸு பக்கி²த்தம், தம் பன ப⁴க³வாவ பரிபு⁴ஞ்ஜி, தஸ்மா நத்தி² தோ³ஸோ.

வரயாசனகதா²வண்ணனா

337. மஹாபிட்டி²யகோஜவம் நாம அதிரேகசதுரங்கு³லபுப்ப²ம் கிர.

கம்ப³லானுஜானனாதி³கதா²வண்ணனா

340. உபசாரேதி ஸுஸானஸ்ஸ உபசாரே. ப³ஹிபி வட்டதீதி ஏகே. கதிககரணம் த³ஸ்ஸேத்வா ‘‘மய்ஹம் ஸந்தகம் தவ ச மம ச ஹோதூதி வத்வா இதரேன ச ததா²வுத்தே வட்டதீ’’தி ஸமானபரிக்கா²ரவிதி⁴ம் வத³ந்தி.

342. ‘‘க²ண்ட³ஸீமாயபி ஸம்மன்னிதும் வட்டதீதி வுத்தத்தா ஸேஸகம்மானிபி தத்த² நிஸீதி³த்வா காதும் வட்டதீ’’தி வுத்தம். ‘‘ஏவம் ஸந்தே சோரிகாய கதஸதி³ஸம் ஹோதி, தஸ்மா ந வட்டதீ’’தி தீ³பவாஸினோ வத³ந்தி கிர. ‘‘சோரிகாய க³ஹிதத்தா ந பாபுணாதீதி ஸேனாஸனக்க²ந்த⁴கே ஆக³தஸுத்தஞ்ச ஸாத⁴க’’ந்தி வத³ந்தி, தஸ்மா தேஸம் மதேன இத³ம் ஆவேணிகலக்க²ணந்தி வேதி³தப்³ப³ம்.

ப⁴ண்டா³கா³ரஸம்முதிஆதி³கதா²வண்ணனா

343. ‘‘இத³ம் பன ப⁴ண்டா³கா³ரந்தி ஆவேணிகலக்க²ண’’ந்தி வுத்தம்.

சீவரரஜனகதா²வண்ணனா

344. கோ³மயே ஆபத்தி நத்தி², விரூபத்தாவாரிதம். ‘‘குங்குமபுப்ப²ம் ந வட்டதீ’’தி வத³ந்தி. ‘‘அல்லிகாயா’’திபி பாடோ² அத்தி².

நிஸீத³னாதி³அனுஜானனகதா²வண்ணனா

353. அட்டா²னமேதந்தி ஏத்த² ரூபகண்டே³ ‘‘சதுஸமுட்டா²னிக’’ந்தி வுத்தத்தா கம்மஸமுட்டா²னம் ராக³சித்தாபா⁴வா ந முச்சதீதி வா ராக³பச்சயே ஸதி கம்மஸமுட்டா²னம் ஹோதீதி வா விசாரேத்வா க³ஹேதப்³ப³ம் கதா²வத்து²னா ச.

362. அக்³க³ளகு³த்தியேவ பமாணந்தி இமேஹி சதூஹி நிக்கே²பகாரணேஹி ட²பேந்தேன அக்³க³ளகு³த்திவிஹாரேயேவ ட²பேதும் வட்டதீதி அதி⁴ப்பாயோ.

ஸங்கி⁴கசீவருப்பாத³கதா²வண்ணனா

363. நோ சே அத்த²தம் ஹோதி ‘‘ஏகம் சீவரமாஸ’’ந்தி ந வத்தப்³ப³ம். கஸ்மா? ‘‘அனுஜானாமி, பி⁴க்க²வே, தஸ்ஸேவ தானி சீவரானி யாவ சீவரமாஸா’’தி வசனஸ்ஸ அபா⁴வதோ, தஸ்மா அனத்த²தகதி²னஸ்ஸ அனனுஞ்ஞாதந்தி சே? ந, ஹேட்டா² அனுஞ்ஞாதத்தா, ததோ லீனத்த²தீ³பனத்த²மித⁴ ததா² வுத்தத்தா ச. ஹேட்டா² ஹி ‘‘அகாலசீவரம் நாம அனத்த²தே கதி²னே ஏகாத³ஸமாஸே உப்பன்னம், அத்த²தே கதி²னே ஸத்தமாஸே உப்பன்னம், காலேபி ஆதி³ஸ்ஸ தி³ன்னம், ஏதம் அகாலசீவரம் நாமா’’தி (பாரா. 500) வசனதோ அனத்த²தகதி²னானம் ஏகசீவரமாஸே உப்பன்னம், தேஸம்யேவ ஹோதீதி ஸித்³த⁴ம், தஸ்மா இத⁴ தம் அவத்வா ஏகோபி தயோ க³ணபூரகே லபி⁴த்வா கதி²னம் அத்த²ரிதும் லப⁴தீதி இமம் லீனத்த²ம் பகாஸேதும் ‘‘யாவ கதி²னஸ்ஸ உப்³பா⁴ராயா’’தி வுத்தம். இதரதா² அயமத்தோ² ந ஞாயதி. ‘‘ஜானிதப்³போ³ ச வினயத⁴ரேஹீதி ததா² வுத்தோதி அபரே’’தி வுத்தம். அத்த²தம் ஹோதி, பஞ்ச மாஸே ஸப்³ப³ம் தஸ்ஸேவ பி⁴க்கு²னோ ஹோதீதி ஸம்ப³ந்தோ⁴. அச்சந்தஸம்யோக³வஸேன உபயோக³வசனம். ‘‘இத⁴ வஸ்ஸம்வுத்த²ஸங்க⁴ஸ்ஸா’’தி நியமிதத்தா ‘‘வஸ்ஸாவாஸிகம் தே³மா’’தி ஏத்த² ச ‘‘இதா⁴’’தி அதி⁴காரத்தா தஸ்மிம் வுத்தே லப⁴தி. ‘‘பிட்டி²ஸமயே உப்பன்னத்தாதி சீவரகாலஸ்ஸாஸன்னத்தா ச அனத்த²தகதி²னானம்பி வுத்த²வஸ்ஸானஞ்ச அனுஞ்ஞாதட்டா²னத்தா ஏவ வுத்த’’ந்தி அஞ்ஞதரஸ்மிம் க³ண்டி²பதே³ லிகி²தம். கேசி பன ‘‘யம் பன இத³ம் ‘இத⁴ வஸ்ஸம்வுத்த²ஸங்க⁴ஸ்ஸா’திஆதி³ம் கத்வா யாவ ‘அனாக³தவஸ்ஸே’தி பத³ம், தாவ புச்சி²த்வா ‘கஸ்மா? பிட்டி²ஸமயே உப்பன்னத்தா’தி இத³ம் பரதோ ‘தத்ர ஸம்முகீ²பூ⁴தானம் ஸப்³பே³ஸம் பாபுணாதீ’தி இமஸ்ஸ பரியோஸானே ‘கஸ்மா? பிட்டி²ஸமயே உப்பன்னத்தா’தி லிகி²தப்³ப³ம். கஸ்மாதி சே? பரதோ ‘சீவரமாஸதோ பட்டா²ய யாவ ஹேமந்தஸ்ஸா’தி வுத்தேன நிப்³பி³ஸேஸத்தா, தஸ்மா ஏவ ஏகச்சேஸு பண்டி³தந்தி வத³ந்தீ’’தி வத³ந்தி. இத⁴ பன இத⁴-ஸத்³தே³ன விஸேஸிதம், தத்த² நத்தி², தஸ்மா அஞ்ஞமஞ்ஞவிரோதோ⁴ நத்தீ²தி க³ஹேதப்³ப³ம். ‘‘மய்ஹிமானி சீவரானி பாபுணந்தீ’’தி வசனமேவாதி⁴ட்டா²னம், இத³மேத்த² உக்கட்ட²வஸேன வுத்தம். ‘‘மய்ஹிமானி சீவரானீ’தி வுத்தேபி அதி⁴ட்டி²தமேவ ஹோதீ’’தி வுத்தம். ‘‘மய்ஹிமானீ’தி வுத்தே தஸ்ஸ சீவரானி நாம நத்தி², தஸ்மா ‘சீவரானி பாபுணந்தீ’தி வத்தப்³ப³மேவா’’தி வத³ந்தி. து³க்³க³ஹிதானீதி ஸங்கி⁴கானேவ ஹோந்தி. ‘‘க³ஹிதமேவ நாமா’தி இமஸ்ஸ இத³ம் பத்தந்தி கிஞ்சாபி ந விதி³தம், தே பன பா⁴கா³ தேஸம் அத்த²தோ பத்தாயேவாதி அதி⁴ப்பாயோ’’தி லிகி²தம். ‘‘ஏகஸ்மிம் அபதிதே புன ஆக³தா லப⁴ந்தீ’’தி வுத்தம்.

உபனந்த³ஸக்யபுத்தவத்து²கதா²வண்ணனா

364. ‘‘ந, பி⁴க்க²வே, அஞ்ஞத்ர வஸ்ஸம்வுத்தே²னா’’தி சீவரஸமயம் உபாதா³ய படிக்கே²போ கதோ.ஏகஸ்மிம் விஹாரே ‘‘ராஜவிஹாரே விய நானாபரிவேணேஸு வா இத⁴ வா வுத்தா² லப⁴தூ’’தி வத்வா தி³ன்னம். ‘‘ஸத்தாஹவாரேன அருணமேவ உட்டா²பேதீதி ஏதம் வசனமத்தமேவ ஏகவிஹாரே ஸத்தாஹகிச்சாபா⁴வா’’தி ச லிகி²தம்.

மதஸந்தககதா²வண்ணனா

369. பி⁴க்கு²ஸ்ஸாதி பி⁴க்கு²ஸ்மிம் காலம்கதே. தத்த² ‘‘பத்தசீவரே’’தி பதா⁴னபரிக்கா²ரத³ஸ்ஸனமுகே²ன ஸப்³ப³பரிக்கா²ரனித³ஸ்ஸனந்தி வேதி³தப்³ப³ம். அத⁴ம்மேன உப்பன்னஞ்சேதம் ஹோதி, ஸங்க⁴ஸ்ஸ கப்பியமேவ மதத்தாதி ஏகே. நோதி தக்கோ பத்தசதுக்கே ஸப்³ப³தா² அகப்பியபத்தனயவிரோத⁴தோ. அத⁴ம்மேன உப்பன்னஸேனாஸனே ச வஸதோ அனாபத்தி. அஞ்ஞதரஸ்மிம் ஆவாஸே த்³வே பி⁴க்கூ² வஸந்தி, தத்த² சேகோ காலம்கதோ, இதரோ தஸ்ஸ பரிக்கா²ரம் அபாபேத்வா தம் தே²ய்யசித்தேன க³ண்ஹாதி, ஸங்க⁴ஸந்தகம் க³ஹிதம் ஹோதி, ப⁴ண்ட³க்³கே⁴ன காரேதப்³போ³. அனாவாஸே க³ண்ஹாதி, ந காரேதப்³போ³ அஸ்ஸாமிகஸ்ஸ க³ஹிதத்தா. மரணஸமயே வத்தும் அஸஹந்தோ சே சித்தேனேவ தே³தி, புஞ்ஞம் பஸவதி, ஸங்கோ⁴வ தஸ்ஸ ஸாமீ. பரோ வா அவிஸ்ஸாஸிகோ ஸயமேவ க³ண்ஹாதி, க³ஹணம் ந ருஹதி, தே²ய்யசித்தேன சே, ப⁴ண்ட³க்³கே⁴ன காரேதப்³போ³. தஸ்ஸ ச ஆவாஸக³தஸ்ஸ கோ ஸாமீ. ‘‘ஸங்கோ⁴ ஸாமீ’’தி வசனதோ ஸங்கே⁴ன ப³லக்காரேன ஸோ வாரேதப்³போ³தி ஏகே. ஜீவமானகாலே க³ஹிதத்தா ந ஸங்கோ⁴ ஸாமீதி ஏகே. ஸாமிகோ சே ஸயம் பஸ்ஸித்வா அச்சி²ந்தி³தும் லப⁴தி, ஸங்கோ⁴பி லப⁴தி ஸாமிடா²னே டி²தத்தாதி இதரே, விசாரேத்வா க³ஹேதப்³ப³ம்.

மதகஸ்ஸ ஹிரஞ்ஞாதி³அகப்பியப⁴ண்ட³ம் ஹோதி. உக்³க³ஹிதஞ்சேதம் ஹோதி, உக்³க³ஹிதே வுத்தனயேன படிபஜ்ஜிதப்³ப³ம். த⁴ம்மேன உப்பன்னம் சே, கப்பியகாரகோ ஆசிக்கி²தப்³போ³. தா³ஸோ சே க³ஹிதோ ஹோதி, ந ஸங்கோ⁴ ஸாமீ, ஆராமிகோ சே, ஸங்கோ⁴ ஸாமீ. கா³வீமஹிம்ஸீஆத³யோ ஹோந்தி, ஆவாஸக³தானம் ஸங்கோ⁴ ஸாமீ, அனாவாஸக³தானம் ந ஸங்கோ⁴ ஸாமீ. ஸங்கோ⁴ சே ஆவாஸம் ஆனேத்வா அத்தனோ ஸந்தகம் கத்வா பச்சா² ஸமீபே ப³ஹிஸீமாய ட²பேதி, காரகஸங்கோ⁴ ஸாமீ, ததா² ஆராமிகே. மதகஸ்ஸ பரிக்கா²ரோ நிக்கே²பவஸேன ட²பிதோ ஹோதி, ஏஸோவ ஸாமீ. மஹக்³கோ⁴ சே ஹோதி, ஸேஸஸ்ஸ ஸங்கோ⁴ ஸாமீ. ‘‘கேனசி கி³லானுபட்டா²கேனா’’தி வத்தப்³ப³க்கமோ ஏதேன த³ஸ்ஸிதோ. புன உபட்டா²கானம் ப³ஹுபா⁴வே ஸதி ஸப்³பே³ஸம் தா³தப்³ப³கம்மம் த³ஸ்ஸேந்தேன ப⁴க³வதா கம்மவாசாயம் ‘‘கி³லானுபட்டா²கான’’ந்தி வுத்தம். ஸாமணேரவாரே ‘‘சீவர’’ந்தி பாடோ². ‘‘இமம் துய்ஹம் தே³மி த³தா³மி த³ஜ்ஜாமி ஓணோஜேமி பரிச்சஜாமி விஸ்ஸஜ்ஜாமி நிஸ்ஸஜ்ஜாமீ’தி வா ‘இத்த²ன்னாமஸ்ஸ தே³மி…பே… நிஸ்ஸஜ்ஜாமீ’தி வா வத³தி, ‘ஸம்முகா² வா பரம்முகா² வா வுத்தே தி³ன்னம்யேவ ஹோதீ’தி தா³னலக்க²ணஸ்ஸ ச ‘துய்ஹம் க³ண்ஹாஹீ’தி வுத்தே ‘மய்ஹம் க³ண்ஹாமீ’தி வத³தி, ‘ஸுதி³ன்னம் ஸுக்³க³ஹிதஞ்சா’தி (பாரா. அட்ட². 2.469) க³ஹணலக்க²ணஸ்ஸ ச வுத்தத்தா ‘மம ஸந்தகம் தவ ச மம ச ஹோதூ’தி ஏவமாதி³வசனேன ஸமானபரிக்கா²ரம் காதும் வட்டதீதி ஆசரியா’’தி லிகி²தம்.

அனுக³ண்டி²பதே³ பன அதீவ பபஞ்சம் கத்வா புன ‘‘இத³மேத்த² ஆசரியானம் ஸன்னிட்டா²னம் – ஸசேஸம்ப³ஹுலா, த்³வே வா ஸமானபரிக்கா²ரம் கத்துகாமா ஹோந்தி, தே ஸப்³பே³ அத்தனோ ஸந்தகம் வத்தமானம் உப்பஜ்ஜனகேன ஸத்³தி⁴ம் பேஸலஸ்ஸ ஏகஸ்ஸ பரிச்சஜந்தி, ஸோ புன தேஸமேவ பரிச்சஜதி, ஏத்தாவதா தே ஸமானபரிக்கா²ரிகா ஹோந்தீதி. இத³ம் ஸமானபரிக்கா²ரலக்க²ணம் பாளிஆதீ³ஸு வுத்தலக்க²ணேயேவ பதனதோ அசலப்பத்தம் ஹோதி, ததா²பி போராணவிதி⁴ம் அஜ்ஜோ²த்த²ரித்வா வத்தனதோ படிஸேதே⁴தப்³போ³, ஆசரியானம் மதானுஸாரேன காதப்³ப³ம் காதுகாமேனாதி அபரே’’தி வுத்தம், ‘‘வஸ்ஸம்வுத்த²ஸாமணேரோ பஞ்சஸு ஸிக்கா²பதே³ஸு ஏகம் அதிக்கமித்வா புன க³ஹிதோ லாப⁴ம் ந லப⁴தி, அந்திமவத்து²ம் அஜ்ஜா²பன்னோ நாம ஹோதீ’’தி வத³ந்தி.

வஸ்ஸம்வுத்தா²னம்அனுப்பன்னசீவரகதா²வண்ணனா

375. உப்பன்னே சீவரே அபா⁴ஜிதே பக்கமதீதி ஏத்த² ‘‘ஸங்கே⁴ன தத்ருப்பாத³தோ ஏகேகஸ்ஸ பி⁴க்கு²னோ ஏத்தகம் வஸ்ஸாவாஸிகம் தா³தும் ஸங்க⁴ஸ்ஸ ருச்சதீ’’தி ஸாவிதேபி விப்³ப⁴மதி, ததோ ந லப⁴தி, புன பப்³ப³ஜித்வா உபஸம்பஜ்ஜித்வா சீவரபா⁴ஜனம் ஸம்பா⁴வேந்தோபி ந லப⁴தியேவ புப்³ப³பகதிதோ ப⁴ட்ட²த்தா. அத² பாபிதே விப்³ப⁴மதி, லப⁴தீ’’தி ச வுத்தம்.

ஸங்கே⁴பி⁴ன்னேசீவருப்பாத³கதா²வண்ணனா

376. பரஸமுத்³தே³தி ஜம்பு³தீ³பே.

அட்ட²சீவரமாதிகாகதா²வண்ணனா

379. யஸ்மா அபரிக்கி²த்தஸ்ஸ பரிக்கே²பாரஹட்டா²னம் து³ப்³பி³ஜானம், தஸ்மா ‘‘அபிசா’’திஆதி³ வுத்தம். தத்த² து⁴வஸன்னிபாதட்டா²னம்பி பரியந்தக³தமேவ க³ஹேதப்³ப³ம். ‘‘மஹாபச்சரியம் பன பி⁴க்கூ²ஸுபி…பே… பாபுணாதீதி ‘உபசாரஸீமாய தே³மா’தி ஏவம் தி³ன்னமேவ ஸந்தா⁴யா’’தி லிகி²தம். ‘‘ஸமானஸம்வாஸகஸீமாயா’’தி வுத்தே க²ண்ட³ஸீமாதீ³ஸு டி²தானம் ந பாபுணாதி தாஸம் விஸும் ஸமானஸம்வாஸகஸீமத்தா. ஸமானஸம்வாஸகஅவிப்பவாஸஸீமானம் இத³ம் நானத்தம் – ‘‘அவிப்பவாஸஸீமாய த³ம்மீ’’தி தி³ன்னம் கா³மட்டா²னம் ந பாபுணாதி. கஸ்மா? ‘‘ட²பேத்வா கா³மஞ்ச கா³மூபசாரஞ்சா’’தி வுத்தத்தா. ‘‘ஸமானஸம்வாஸகஸீமாயா’’தி தி³ன்னம் பன யஸ்மிம் டா²னே அவிப்பவாஸஸீமா அத்தி², தத்த² டி²தானம், இதரத்ர டி²தானஞ்ச பாபுணாதி. ‘‘க²ண்ட³ஸீமாயம் ட²த்வா ‘ஸீமட்ட²கஸங்க⁴ஸ்ஸ த³ம்மீ’தி வுத்தே உபசாரஸீமாய ஏவ பரிச்சி²ந்தி³த்வா தா³தப்³ப³’’ந்தி வுத்தம். ‘‘அவிப்பவாஸஸீமாய தே³மா’’தி க²ண்ட³ஸீமாயம் ட²த்வா தி³ன்னே தத்தே²வ பாபுணாதீதி கேசி. யோஜனஸதம்பி பூரேத்வா நிஸீத³ந்தீதி ஏத்த² விஹாரூபசாரே ஹத்த²பாஸேன, ப³ஹிகா³மாதீ³ஸு த்³வாத³ஸஹத்தே²ன உபசாரோதி ஏகே. ‘‘இமஸ்மிம் விஹாரே ஸங்க⁴ஸ்ஸா’’தி வுத்தே ஏகாப³த்³தா⁴ ஹுத்வாபி பரிக்கே²பபரிக்கே²பாரஹட்டா²னம் அதிக்கமித்வா டி²தானம் ந பாபுணாதீதி ஏகே. ‘‘பி⁴க்கு²னிவிஹாரதோ ப³ஹி யத்த² கத்த²சி ட²த்வா ‘ஸங்க⁴ஸ்ஸா’தி வுத்தே பி⁴க்கு²ஸங்கோ⁴வ ஸாமீ’’தி வத³ந்தி. ஏகோபி க³ந்த்வாதி ஏத்த² ஸப்³பே³ஸம் வா பாபேத்வா க³ந்தப்³ப³ம், ஆனேத்வா வா பாபேதப்³ப³ம், இதரதா² க³தஸ்ஸ ந பாபுணாதி. ஸமானலாப⁴கதிகா மூலாவாஸே ஸதி ஸியா, மூலாவாஸவினாஸேன கதிகாபி வினஸ்ஸதி. ஸமானலாப⁴வசனம் ஸதி த்³வீஸு, ப³ஹூஸு வா யுஜ்ஜதி. தேனேவ ஏகஸ்மிம் அவஸிட்டே² யுஜ்ஜதீதி நோ மதி.

‘‘தாவகாலிககாலேன, மூலச்சே²த³வஸேன வா;

அஞ்ஞேஸம் கம்மம் அஞ்ஞஸ்ஸ, ஸியா நாவாஸஸங்க³மோ’’தி. –

ஆசரியோ.

ஸப்³ப³த்த² தி³ன்னமேவாதி ‘‘ஸமானபா⁴கோ³வ ஹோதீ’’தி வத³ந்தி. ‘‘ஏகமேகம் அம்ஹாகம் பாபுணாதீதி சே வத³தி, வட்டதீ’’தி வத³ந்தி விபா⁴க³ஸ்ஸ கதத்தா. ‘‘பி⁴க்கு²ஸங்க⁴ஸ்ஸ சீவரே தி³ன்னே பம்ஸுகூலிகானம் ந வட்டதீ’’தி வத³ந்தி. ‘‘உப⁴தோஸங்க⁴ஸ்ஸா’’தி வுத்தே ‘‘பி⁴க்கு²ஸங்க⁴ஸ்ஸா’’தி அவுத்தத்தா பி⁴க்கு²னிஸங்கே⁴ன மிஸ்ஸிதத்தா, தத்த² அபரியாபன்னத்தா ச புக்³க³லோ விஸும் லப⁴தி. ஏவம் ஸந்தே ‘‘பி⁴க்கு²ஸங்க⁴ஸ்ஸ ச பி⁴க்கு²னிஸங்க⁴ஸ்ஸ ச த³ம்மீ’’தி வுத்தேபி ‘‘உப⁴தோஸங்க⁴ஸ்ஸ தி³ன்னமேவ ஹோதீ’’தி இமினா விருஜ்ஜ²தீதி சே? ந விருஜ்ஜ²தி, தம் த்³வின்னம் ஸங்கா⁴னம் தி³ன்னபா⁴வமேவ தீ³பேதி, ந உப⁴தோஸங்க⁴பஞ்ஞத்திம், தஸ்மா ஏவ ‘‘பி⁴க்கு²ஸங்க⁴ஸ்ஸ ச பி⁴க்கு²னிஸங்க⁴ஸ்ஸ ச துய்ஹஞ்சா’’தி வாரோ ந வுத்தோ. அத² வா அட்ட²கதா²வசனமேவ பமாணம், ந விசாரணாதி ஏகே. யஸ்மா ஏகோ அத்³தா⁴னாதி³யகோ விய து³விதோ⁴ ந ஹோதி, தஸ்மா உப⁴தோஸங்க⁴க்³க³ஹணேன ஏகோ பி⁴க்கு² ந க³ஹிதோதி. ‘‘ஸப்³பா³வாஸஸ்ஸ ச சேதியஸ்ஸ ச த⁴ம்மஸ்ஸ சா’தி வுத்தே ஸப்³ப³விஹாரேஸு சேதியத⁴ம்மானம் ஏகேகஸ்ஸ பி⁴க்கு²னோ பா⁴கோ³ தா³தப்³போ³’’தி வத³ந்தி. ‘‘பி⁴க்கு²ஸங்க⁴ஸ்ஸ ச சேதியஸ்ஸ சா’’தி வுத்தே ந விருஜ்ஜ²தீதி சே? ந, தத்த² ‘‘பி⁴க்கு²ஸங்க⁴ஸ்ஸா’’தி வுத்தத்தா, இத⁴ விஹாரேன க⁴டிதத்தா ச தம்ஹி தம்ஹி விஹாரே ஏகபா⁴க³ம் லபி⁴தப்³ப³மேவாதி பரிஹரந்தி. அத்தனோ பாபேத்வாதி விகாலே அபரிபோ⁴க³த்தா ஸகலோபி வட்டேய்யாதி சே? ‘‘பி⁴க்கு²ஸங்க⁴ஸ்ஸ ஹரா’’தி வுத்தத்தா, தேன ‘‘ஹராமீ’’தி க³ஹிதத்தா ச ந வட்டதி. பச்சி²மவஸ்ஸம்வுத்தா²னம்பீதி ஏத்த² அபி-ஸத்³தோ³ அவதா⁴ரணத்தோ², பச்சி²மவஸ்ஸம்வுத்தா²னமேவாதி அத்தோ², இதரதா² ஸமுச்சயத்தே² க³ஹிதே ‘‘லக்க²ணஞ்ஞூ வத³ந்தீ’’தி வசனம் நிரத்த²கம் ஸியா. கஸ்மாதி ஆரபி⁴த்வா பபஞ்சம் கரோந்தி. கிம் தேன, பரதோ ‘‘சீவரமாஸதோ பட்டா²ய…பே… அதீதவஸ்ஸம்வுத்தா²னமேவ பாபுணாதீ’’தி இமினா ஸித்³த⁴த்தா ந விசாரிதம், தேன வுத்தம் ‘‘லக்க²ணஞ்ஞூ’’தி அசலவஸேன. ஸசே பன ப³ஹிஉபசாரஸீமாய டி²தோ…பே… ஸம்பத்தானம் ஸப்³பே³ஸம் பாபுணாதீதி யத்த² கத்த²சி வுத்த²வஸ்ஸானந்தி அதி⁴ப்பாயோ ‘‘யத்த² கத்த²சி வுத்த²வஸ்ஸானம் ஸப்³பே³ஸம் ஸம்பத்தானம் பாபுணாதீ’’தி (கங்கா². அட்ட². அகாலசீவரஸிக்கா²பத³வண்ணனா) கங்கா²விதரணியம் வுத்தத்தா. கி³ம்ஹானம் பட²மதி³வஸதோ பட்டா²ய வுத்தே பன யஸ்மா அனந்தராதீதம் ஹேமந்தம் ஏவ வுத்தா² நாம ஹோந்தி, ந வஸ்ஸம், தஸ்மா ‘‘மாதிகா ஆரோபேதப்³பா³’’தி வுத்தம். யே வா தே²ரேஹி பேஸிதா, தேஸம் பாபுணாதீதி கிர அத்தோ².

சீவரக்க²ந்த⁴கவண்ணனா நிட்டி²தா.