6. பே⁴ஸஜ்ஜக்க²ந்த⁴கவண்ணனா

பஞ்சபே⁴ஸஜ்ஜாதி³கதா²வண்ணனா

260. ‘‘யம் பே⁴ஸஜ்ஜஞ்சேவ அஸ்ஸா’’தி பரதோ ‘‘தது³ப⁴யேன பி⁴ய்யோஸோ மத்தாய கிஸ்ஸா ஹோந்தீ’’திஆதி³னா விரோத⁴த³ஸ்ஸனதோ நிதா³னானபேக்க²ம் யதா²லாப⁴வஸேன வுத்தந்தி வேதி³தப்³ப³ம். யதா²னிதா³னம் கஸ்மா ந வுத்தந்தி சே? தத³ஞ்ஞாபேக்கா²தி⁴ப்பாயதோ. ஸப்³ப³பு³த்³த⁴காலேபி ஹி ஸப்பிஆதீ³னம் ஸத்தாஹகாலிகபா⁴வாபேக்கா²தி ததா² வசனேன ப⁴க³வதோ அதி⁴ப்பாயோ, தேனேவ ‘‘ஆஹாரத்த²ஞ்ச ப²ரேய்ய, ந ச ஓளாரிகோ ஆஹாரோ பஞ்ஞாயேய்யா’’தி வுத்தம். ததா² ஹி காலே படிக்³க³ஹேத்வா காலே பரிபு⁴ஞ்ஜிதுந்தி ஏத்த² ச காலபரிச்சே²தோ³ ந கதோ. குதோயேவ பன லப்³பா⁴ தத³ஞ்ஞாபேக்கா²தி⁴ப்பாயோ ப⁴க³வதோ மூலபே⁴ஸஜ்ஜாதீ³னி தானி படிக்³க³ஹேத்வா யாவஜீவந்தி காலபரிச்சே²தோ³. யம் பன ‘‘அனுஜானாமி, பி⁴க்க²வே, தானி பஞ்ச பே⁴ஸஜ்ஜானி காலே படிக்³க³ஹேத்வா காலே பரிபு⁴ஞ்ஜிது’’ந்தி வசனம், தம் ‘‘ஸன்னிதி⁴ம் கத்வா அபராபரஸ்மிம் தி³வஸே காலே ஏவ பரிபு⁴ஞ்ஜிதும் அனுஜானாமீ’’தி அதி⁴ப்பாயதோ வுத்தந்தி வேதி³தப்³ப³ம். அஞ்ஞதா² அதிஸயத்தாபா⁴வதோ ‘‘யம் பே⁴ஸஜ்ஜஞ்சேவ அஸ்ஸா’’திஆதி³ விதக்குப்பாதோ³ ந ஸம்ப⁴வதி. பணீதபோ⁴ஜனானுமதியா பஸித்³த⁴த்தா ஆபா³தா⁴னுரூபஸப்பாயாபேக்கா²ய வுத்தானீதி சே? தஞ்ச ந, பி⁴ய்யோஸோ மத்தாய கிஸாதி³பா⁴வாபத்தித³ஸ்ஸனதோ. யதா² ‘‘உச்சு²ரஸம் உபாதா³ய பா²ணித’’ந்தி வுத்தம், ததா² ‘‘நவனீதம் உபாதா³ய ஸப்பி’’ந்தி வத்தப்³ப³தோ நவனீதம் விஸும் ந வத்தப்³ப³ந்தி சே? ந, விஸேஸத³ஸ்ஸனாதி⁴ப்பாயதோ. யதா² பா²ணிதக்³க³ஹணேன ஸித்³தே⁴பி பரதோ உச்சு²ரஸோ விஸும் அனுஞ்ஞாதோ உச்சு²ஸாமஞ்ஞதோ கு³ளோத³கட்டா²னே ட²பனாதி⁴ப்பாயதோ. ததா² நவனீதே விஸேஸவிதி⁴த³ஸ்ஸனாதி⁴ப்பாயதோ நவனீதம் விஸும் அனுஞ்ஞாதந்தி வேதி³தப்³ப³ம். விஸேஸவிதி⁴ பனஸ்ஸ பே⁴ஸஜ்ஜஸிக்கா²பத³ட்ட²கதா²வஸேன வேதி³தப்³ப³ம். வுத்தஞ்ஹி தத்த² ‘‘பசித்வா ஸப்பிம் கத்வா பரிபு⁴ஞ்ஜிதுகாமேன அதோ⁴தம்பி பசிதும் வட்டதீ’’தி (பாரா. அட்ட². 2.622). தத்த² ஸப்பி பக்காவ ஹோதி, நாபக்கா. ததா² பா²ணிதம்பி. நவனீதம் அபக்கமேவ.

ஏத்தா²ஹ – நவனீதம் விய உச்சு²ரஸோபி ஸத்தாஹகாலிகபாளியம் ஏவ வத்தப்³போ³தி? ந வத்தப்³போ³. கஸ்மா? ஸத்தாஹகாலிகபாளியம் வுத்தே உச்சு²ரஸோ கு³ளாபதே³ஸேன யதா² அகி³லானஸ்ஸ பா²ணிதம் படிஸித்³த⁴ம், ததா² உச்சு²ரஸோபீதி ஆபஜ்ஜதி, அவுத்தே பன கு³ளம் விய ஸோ பா²ணிதஸங்க்²யம் ந க³ச்ச²தி. இத⁴ அவத்வா பச்சா² வசனேன கு³ளோத³கட்டா²னேவ ட²பிதோ ஹோதி. தத³த்த²மேவ பச்சா²ப⁴த்தம் வட்டனகபானகாதி⁴காரே வுத்தோ, தஸ்மா ஏவ யாமகாலிகோதி சே? ந, அட்ட²கதா²விரோத⁴தோ. ந உபாதா³யத்த²ஸ்ஸ நிஸ்ஸயத்த²த்தாதி சே? கிம் வுத்தம் ஹோதி – ‘‘உச்சு²ரஸம் உபாதா³ய உச்சு²விகதி பா²ணிதந்தி வேதி³தப்³பா³’’தி (பாரா. அட்ட². 2.623) யதே³தம் நிஸ்ஸக்³கி³யட்ட²கதா²வசனம், தத்த² ‘‘உபாதா³யா’’தி இமஸ்ஸ நிஸ்ஸாய பச்சயம் கத்வாதி அத்தோ²தி. ந, பரதோ அபரகிரியாய அத³ஸ்ஸனதோ. யதா² ‘‘சக்கு²ஞ்ச படிச்ச ரூபே சா’’திஆதீ³ஸு (ம. நி. 1.204, 400; 3.421, 425; ஸம். நி. 2.43) ‘‘படிச்சா’’தி இமஸ்ஸ உஸ்ஸுக்கவசனஸ்ஸ ‘‘உப்பஜ்ஜதீ’’தி அபரகிரியா தி³ஸ்ஸதி, ந ததா² ‘‘உச்சு²ரஸம் உபாதா³யா’’தி ஏத்த² அபரகிரியா தி³ஸ்ஸதீதி. அயுத்தமேதம் தத்த² தத³பா⁴வேபி ஸித்³த⁴த்தா. யதா² ‘‘சத்தாரோ ச மஹாபூ⁴தா சதுன்னஞ்ச மஹாபூ⁴தானம் உபாதா³ய ரூப’’ந்தி (த⁴. ஸ. 584) ஏத்த² அபரகிரியாய அபா⁴வேபி உஸ்ஸுக்கவசனம் ஸித்³த⁴ம், ததா² ஏத்தா²பி ஸியாதி? ந, தத்த² பாட²ஸேஸாபேக்க²த்தா. யதா² சத்தாரோ மஹாபூ⁴தா உபாதா³ய வுத்தம், பவத்தகம் வா ரூபந்தி இமம் பாட²ஸேஸம் ஸா பாளி அபேக்க²தி, ந ததா² இத³ம் அட்ட²கதா²வசனம் கஞ்சி பாட²ம் அபேக்க²தி. பரிபுண்ணவாதி³னோ ஹி அட்ட²கதா²சரியா. ஸஞ்ஞாகரணமத்தம் வா தஸ்ஸ ரூபஸ்ஸ. ‘‘அத்தி² ரூபம் உபாதா³யா’’திஆதீ³ஸு (த⁴. ஸ. 584) ஹி ஸஞ்ஞாகரணமத்தம், ஏவமிதா⁴பீதி வேதி³தப்³ப³ம். இத⁴ பன ‘‘உச்சு²ரஸம் உபாதா³யா’’தி உச்சு²ரஸம் ஆதி³ம் கத்வா, ததோ பட்டா²யாதி அத்தோ², தஸ்மா ‘‘உச்சு²ரஸேன ஸம்ஸட்ட²ம் ப⁴த்தம் அகி³லானோ பி⁴க்கு² விஞ்ஞாபேத்வா பு⁴ஞ்ஜந்தோ பணீதபோ⁴ஜனஸிக்கா²பதே³ன காரேதப்³போ³, பி⁴க்கு²னீ பாடிதே³ஸனியேனா’’தி வுத்தம், தம் அயுத்தந்தி ஏகே. தே விஸேஸஹேதுனோ அபா⁴வம் த³ஸ்ஸேத்வா பஞ்ஞாபேதப்³பா³.

ஏத்தாவதா ‘‘உச்சு²ரஸம் உபாதா³யாதி உச்சு²ரஸம் ஆதி³ம் கத்வா’’திஆதீ³னம் பதா³னம் அத்த²ம் மிச்சா² க³ஹேத்வா யதி³ ‘‘உச்சு²ரஸம் உபாதா³யா’’தி வசனேன உச்சு²ரஸோ பா²ணிதம் ஸியா, ‘‘அபக்கா வா’’தி வசனம் நிரத்த²கம் அபக்கவசனேன உச்சு²ரஸஸ்ஸ க³ஹிதத்தா. அத² ‘‘பக்கா வா’’தி வசனேன உச்சு²ரஸோ பா²ணிதந்தி ஸித்³த⁴ம், ‘‘உச்சு²ரஸம் உபாதா³யா’’தி வசனம் நிரத்த²கந்தி உத்தரம் வுத்தம், தம் அனுத்தரந்தி ஸாதி⁴தம் ஹோதி. ஸோ சேதேஹி அபக்கா வாதி ஸாமம் பி⁴க்கு²னா அபக்கா வா. அவத்து²கபக்கா வாதி பி⁴க்கு²னாவ ஸாமம் வினா வத்து²னா பக்கா வாதி அத்தோ². தஸ்மா அஞ்ஞதா² ‘‘ஸவத்து²கபக்கா வா’’தி ச வத்தப்³ப³ந்தி அத்தோ² த³ஸ்ஸிதோ, ஸோ து³ட்டு² த³ஸ்ஸிதோ. கஸ்மா? மஹாஅட்ட²கதா²யம் ‘‘ஜா²மஉச்சு²பா²ணிதம் வா கோட்டிதஉச்சு²பா²ணிதம் வா புரேப⁴த்தமேவ வட்டதீ’’தி வுத்தத்தா, ‘‘ஸவத்து²கபக்கா வா’’தி வசனஸ்ஸ ச லத்³தி⁴விரோத⁴தோ அவுத்தத்தா. ‘‘மஹாபச்சரியம் பன ‘ஏதம் ஸவத்து²கபக்கம் வட்டதி நோ வட்டதீ’தி புச்ச²ம் கத்வா ‘உச்சு²பா²ணிதம் பச்சா²ப⁴த்தம் நோ வட்டனகம் நாம நத்தீ²’தி வுத்தம், தம் யுத்த’’ந்தி (பாரா. அட்ட². 2.623) வுத்தத்தா ச ஸவத்து²கபக்கா வாதி அத்தோ² ச வுத்தோயேவ ஹோதி, தஸ்மா து³த்³த³ஸ்ஸிதோதி ஸித்³த⁴ம். ஆஹாரத்த²ந்தி ஆஹாரபயோஜனம். ஆஹாரகிச்சம் யாபனந்தி அத்தோ²தி ச.

262. தேலபரிபோ⁴கே³னாதி ஸத்தாஹகாலிகபரிபோ⁴கே³ன.

263. ஸதி பச்சயேதி ஏத்த² ஸதிபச்சயதா கி³லானாகி³லானவஸேன த்³விதா⁴ வேதி³தப்³பா³. விகாலபோ⁴ஜனஸிக்கா²பத³ஸ்ஸ ஹி அனாபத்திவாரே யாமகாலிகாதீ³னம் திண்ணம்பி அவிஸேஸேன ஸதிபச்சயதா வுத்தா. இமஸ்மிம் க²ந்த⁴கே ‘‘அனுஜானாமி, பி⁴க்க²வே, கி³லானஸ்ஸ கு³ளம், அகி³லானஸ்ஸ கு³ளோத³கம், அனுஜானாமி, பி⁴க்க²வே, கி³லானஸ்ஸ லோணஸோவீரகம், அகி³லானஸ்ஸ உத³கஸம்பி⁴ன்ன’’ந்தி வுத்தம். தஸ்மா ஸித்³த⁴ம் ஸதிபச்சயதா கி³லானாகி³லானவஸேன து³விதா⁴தி. அஞ்ஞதா² அஸதி பச்சயே கு³ளோத³காதீ³ஸு ஆபஜ்ஜதி. ததோ ச பாளிவிரோதோ⁴.

பிட்டே²ஹீதி பிஸிததேலேஹி. கோட்ட²ப²லந்தி கோட்ட²ருக்க²ஸ்ஸ ப²லம். ‘‘மத³னப²லம் வா’’தி ச லிகி²தம். ஹிங்கு³ஜது நாம ஹிங்கு³ருக்க²ஸ்ஸ த³ண்ட³பல்லவபவாளபாகனிப்ப²ன்னா. ஹிங்கு³ஸிபாடிகா நாம தஸ்ஸ மூலஸாக²பாகனிப்ப²ன்னா. தகம் நாம தஸ்ஸ ருக்க²ஸ்ஸ தசபாகோத³கம். தகபத்தீதி தஸ்ஸ பத்தபாகோத³கம். தகபண்ணீதி தஸ்ஸ ப²லபாகோத³கம். அத² வா ‘‘தகம் நாம லாகா². தகபத்தீதி கித்திமலோமலாகா². தகபண்ணீதி பக்கலாகா²’’தி லிகி²தம். உப்³பி⁴த³ம் நாம ஊஸபம்ஸுமயம்.

264. ச²கணம் கோ³மயம். பாகதிகசுண்ணம் நாம அபக்ககஸாவசுண்ணம், தேன ‘‘ட²பேத்வா க³ந்த⁴சுண்ணம் ஸப்³ப³ம் வட்டதீ’’தி வத³ந்தி. சாலிதேஹீதி பரிஸ்ஸாவிதேஹி.

265. நானாஸம்பா⁴ரேஹி கதந்தி நானோஸதே⁴ஹி.

கு³ளாதி³அனுஜானனகதா²வண்ணனா

274. ஸாமம் பக்கம் ஸமபக்கந்தி து³வித⁴ம் விய தீ³பேதி, தஸ்மா கீ²ராதீ³ஸு உண்ஹமத்தமேவ பாகோ. தேன உத்தண்டு³லாதி³ஸமானா ஹோந்தி.

276-8. ‘‘பு³த்³த⁴ப்பமுக²’ந்தி ஆக³தட்டா²னே ‘பி⁴க்கு²ஸங்கோ⁴’தி அவத்வா ‘ஸங்கோ⁴’தி வுச்சதி ப⁴க³வந்தம்பி ஸங்க³ஹேது’’ந்தி வத³ந்தி. நாகோ³தி ஹத்தீ².

279. ஸம்பா³தே⁴தி வச்சமக்³கே³ பி⁴க்கு²ஸ்ஸ பி⁴க்கு²னியா ச பஸ்ஸாவமக்³கே³பி அனுலோமதோ. த³ஹனம் படிக்கே²பாபா⁴வா வட்டதி. ஸத்த²வத்திகம்மானுலோமதோ ந வட்டதீதி சே? ந, படிக்கி²த்தபடிக்கே²பா, படிக்கி²பிதப்³ப³ஸ்ஸ தப்பரமதாதீ³பனதோ, கிம் வுத்தம் ஹோதி? புப்³பே³ படிக்கி²த்தம்பி ஸத்த²கம்மம் ஸம்பிண்டே³த்வா பச்சா² ‘‘ந, பி⁴க்க²வே…பே… து²ல்லச்சயஸ்ஸா’’தி த்³விக்க²த்தும் ஸத்த²கம்மஸ்ஸ படிக்கே²போ கதோ. தேன ஸம்பா³த⁴ஸ்ஸ ஸாமந்தா த்³வங்கு³லம் படிக்கி²பிதப்³ப³ம் நாம. ஸத்த²வத்திகம்மதோ உத்³த⁴ம் நத்தீ²தி தீ³பேதி. கிஞ்ச பி⁴ய்யோ புப்³பே³ ஸம்பா³தே⁴யேவ ஸத்த²கம்மம் படிக்கி²த்தம், பச்சா² ஸம்பா³த⁴ஸ்ஸ ஸாமந்தா த்³வங்கு³லம்பி படிக்கி²த்தம், தஸ்மா தஸ்ஸேவ படிக்கே²போ, நேதரஸ்ஸாதி ஸித்³த⁴ம். ஏத்த² ‘‘ஸத்த²ம் நாம ஸத்த²ஹாரகம் வாஸ்ஸ பரியேஸேய்யா’’திஆதீ³ஸு விய யேன சி²ந்த³தி, தம் ஸப்³ப³ம். தேன வுத்தம் ‘‘கண்டகேன வா’’திஆதி³. கா²ரதா³னம் பனேத்த² பி⁴க்கு²னிவிப⁴ங்கே³ பஸாகே² லேபமுகே²ன அனுஞ்ஞாதந்தி வேதி³தப்³ப³ம். ஏகே பன ‘‘ஸத்த²கம்மம் வா’’தி பாட²ம் விகப்பேத்வா வத்தி²கம்மம் கரோந்தி. ‘‘வத்தீ²’’தி கிர அக்³கி⁴கா வுச்சதி. தாய சி²ந்த³னம் வத்தி²கம்மம் நாமாதி ச அத்த²ம் வண்ணயந்தி, தே ‘‘ஸத்த²ஹாரகம் வாஸ்ஸ பரியேஸேய்யா’’தி இமஸ்ஸ பத³பா⁴ஜனீயம் த³ஸ்ஸேத்வா படிக்கி²பிதப்³பா³. அண்ட³வுட்³டீ⁴தி வாதண்ட³கோ. ஆதா³னவத்தீதி ஆனஹவத்தி.

மனுஸ்ஸமம்ஸபடிக்கே²பகதா²வண்ணனா

280. ‘‘ந, பி⁴க்க²வே, மனுஸ்ஸமம்ஸம்…பே… து²ல்லச்சயஸ்ஸா’’தி வுத்தத்தா, ‘‘ந ச, பி⁴க்க²வே, அப்படி…பே… து³க்கடஸ்ஸா’’தி ச வுத்தத்தா அப்படிவேக்க²ணது³க்கடஞ்ச து²ல்லச்சயஞ்சாதி த்³வே ஆபஜ்ஜதி, தஸ்மா கப்பியமம்ஸேபி அப்படிவேக்க²ணபச்சயா து³க்கடமேவ. கேசி ‘‘மம்ஸபா⁴வம் ஜானந்தோவ ஆபஜ்ஜதி. பூவாதீ³ஸு அஜானந்தஸ்ஸ கா பச்சவேக்க²ணா’’தி வத³ந்தி. அஜானந்தோபி ஆபஜ்ஜதி ஸாமஞ்ஞேன வுத்தத்தாதி கேசி.

ஹத்தி²மம்ஸாதி³படிக்கே²பகதா²வண்ணனா

281. இமேஸம் …பே… ஸப்³ப³ம் ந வட்டதீதி இத³ம் த³ஸன்னம்பி மனுஸ்ஸமம்ஸாதீ³னம் அகப்பியபா⁴வமத்தபரிதீ³பனவசனம், நாபத்திவிபா⁴க³த³ஸ்ஸனவசனம். யம் கிஞ்சி ஞத்வா வா அஞத்வா வா கா²த³ந்தஸ்ஸ ஆபத்தியேவாதி இத³ம்பி அனியமிதவசனமேவ ‘‘அயம் நாம ஆபத்தீ’’தி அவுத்தத்தா. தது³ப⁴யம்பி ஹேட்டா² மனுஸ்ஸாதீ³னம் மம்ஸாதீ³ஸு து²ல்லச்சயது³க்கடாபத்தியோ ஹோந்தீதி க³ஹிதனயேஹி அதி⁴ப்பாயோ ஜானிதும் ஸக்காதி ஏவம் வுத்தம். தத்ராயம் அதி⁴ப்பாயோ – யஸ்மா ஏதேஸம் மனுஸ்ஸாதீ³னம் மம்ஸாதீ³னி அகப்பியானி, தஸ்மா மனுஸ்ஸானம் மம்ஸாதீ³ஸு து²ல்லச்சயாபத்தி. ஸேஸானம் ஸப்³ப³த்த² து³க்கடாபத்தீதி. பாடே²யேவ ஹி லோஹிதாதி³ம் மம்ஸக³திகம் கத்வா ‘‘ந, பி⁴க்க²வே, மனுஸ்ஸமம்ஸம்…பே… து²ல்லச்சயஸ்ஸா’’தி வுத்தம். தத்தே²வ ஹத்தா²தீ³னம் மம்ஸாதீ³ஸுபி து³க்கடாபத்தி பஞ்ஞத்தா. தேன வுத்தம் ஸீஹளட்ட²கதா²யம் ‘‘மனுஸ்ஸமம்ஸே வா கேஸே வா நகே² வா அட்டி²ம்ஹி வா லோஹிதே வா து²ல்லச்சயமேவா’’தி வுத்தம். இமினா ஏவ –

‘‘அட்டி²பி லோஹிதம் சம்மம், லோமமேஸம் ந கப்பதீ’’தி. –

கு²த்³த³ஸிக்கா²கா³தா²பத³ஸ்ஸ அத்தோ² ச அதி⁴ப்பாயோ ச ஸுவிஞ்ஞேய்யோதி. படிக்³க³ஹணேதி ஏத்த² அனாத³ரியது³க்கடம் வுத்தம். ‘‘உத³கமனுஸ்ஸாதி³மம்ஸம்பி ந வட்டதீ’’தி வத³ந்தி. நாக³ராஜேன வுத்தாதீ³னவே ஸதிபி உஜ்ஜா²யனாதி⁴காரமேவ க³ஹேத்வா ‘‘படிகூலதாயா’’தி வுத்தம்.

யாகு³மது⁴கோ³ளகாதி³கதா²வண்ணனா

283. யதா²த⁴ம்மோ காரேதப்³போ³தி இத³ம் ஸங்கீ³திகாரகவசனம். ந ஹி ப⁴க³வா தமேவ ஸிக்கா²பத³ம் த்³விக்க²த்தும் பஞ்ஞபேஸி, ஏவம் ஏவரூபேஸூதி ஏகே. பட²மபஞ்ஞத்தமேவ ஸந்தா⁴ய வுத்தம், ததா²பி ந ச தே பி⁴க்கூ² ஸாபத்திகா ஜாதா. கத²ம்? பரம்பரபோ⁴ஜனஸிக்கா²பத³ஸ்ஸ அட்டு²ப்பத்தியா. ‘‘அபிச மயம் காலஸ்ஸேவ பிண்டா³ய சரித்வா பு⁴ஞ்ஜிம்ஹா’’தி வுத்தம். மாதிகாவிப⁴ங்கே³ (பாசி. 227) ச ‘‘பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ, தம் ட²பேத்வா அஞ்ஞம் பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாமா’’தி வுத்தம், தஸ்மா அஞ்ஞம் போ⁴ஜனம் நாம நிமந்தனதோ லத்³த⁴ம் யம் கிஞ்சீதி ஸித்³த⁴ம். யஸ்மா ந போ⁴ஜ்ஜயாகு³னிமந்தனதோ லத்³த⁴போ⁴ஜனம், தஸ்மா ‘‘ஏத்த² அனாபத்தீ’’தி தே பி⁴க்கூ² பரிபு⁴ஞ்ஜிம்ஸூதி. ஏத்த² ‘‘யதா²த⁴ம்மோ காரேதப்³போ³’’தி வுத்தத்தா பன அஞ்ஞனிமந்தனதோ லத்³த⁴போ⁴ஜனமேவ பு⁴ஞ்ஜந்தஸ்ஸ ஆபத்தி, நேதரந்தி அனுஞ்ஞாதம். ததோ பட்டா²ய தஸ்ஸ அனாபத்திவாரே ‘‘நிச்சப⁴த்தே ஸலாகப⁴த்தே பக்கி²கே உபோஸதி²கே பாடிபதி³கே’’தி வுத்தம். புப்³பே³ வேஸாலியா பஞ்ஞத்தகாலே நத்தி², யதி³ அத்தி², அட்டு²ப்பத்திமாதிகாவிப⁴ங்க³விரோதோ⁴, தஸ்மா ‘‘அபிச மயம் காலஸ்ஸேவ பிண்டா³ய சரித்வா பு⁴ஞ்ஜிம்ஹா’’தி அட்டு²ப்பத்தியம் வுத்தத்தா, பத³பா⁴ஜனேபி ‘‘அஞ்ஞம் பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதீ’’தி அவிஸேஸேன வுத்தத்தா ச பட²மம் வா பச்சா² வா நிமந்திதம் போ⁴ஜனம் ட²பேத்வா அனிமந்திதமேவ பு⁴ஞ்ஜந்தஸ்ஸ ஆபத்தி, நேதரந்தி கிஞ்சாபி ஆபன்னம், ‘‘ந, பி⁴க்க²வே, அஞ்ஞத்ர நிமந்திதேன அஞ்ஞஸ்ஸ போ⁴ஜ்ஜயாகு³ பரிபு⁴ஞ்ஜிதப்³பா³’’தி வுத்தத்தா பன பட²மனிமந்திதபோ⁴ஜனதோ அஞ்ஞம் பச்சா² லத்³த⁴ம் நிமந்திதபோ⁴ஜனம், நிச்சப⁴த்தாதீ³னி ச பு⁴ஞ்ஜந்தஸ்ஸ ஆபத்தீதி ஆபஜ்ஜமானம் விய ஜாதந்தி அனுபஞ்ஞத்திப்பஸங்க³னிவாரணம், அனிமந்தனபோ⁴ஜனே ஆபத்திப்பஸங்க³னிவாரணஞ்ச கரோந்தோ, பட²மபஞ்ஞத்திஸிக்கா²பத³மேவ இமினா அத்தே²ன பரிணாமேந்தோ ச ‘‘யதா²த⁴ம்மோ காரேதப்³போ³’’தி ப⁴க³வா ஆஹ, தஸ்மா ததோ பட்டா²ய பச்சா² நிமந்தனபோ⁴ஜனம் பு⁴ஞ்ஜந்தஸ்ஸேவ ஆபத்தி. தேஸு ந நிச்சப⁴த்தாதீ³னீதி ஆபன்னம். தேனேவாயஸ்மா உபாலித்தே²ரோ தஸ்ஸ அனாபத்திவாரே ‘‘நிச்சப⁴த்தே’’திஆதீ³னி பஞ்ச பதா³னி பக்கி²பித்வா ஸங்கா³யி. அதி⁴ப்பாயஞ்ஞூ ஹி தே மஹானாகா³, தஸ்மா பட²மமேவ யம் ப⁴க³வதா வுத்தம் ‘‘பஞ்ச போ⁴ஜனானி ட²பேத்வா ஸப்³ப³த்த² அனாபத்தீ’’தி வசனம், பச்சா²பி தம் அனுரக்க²ந்தேன அபோ⁴ஜனம் மது⁴கோ³ளகம் அபராமஸித்வா போ⁴ஜ்ஜயாகு³ ஏவ வுத்தாதி ஏவம் ஆசரியோ.

ஏத்தா²ஹ – யதா² பச்சா²லத்³த⁴லேஸேன தே²ரேன நிச்சப⁴த்தாதி³பக்கே²போ கதோ, ஏவம் கதி²னக்க²ந்த⁴கே பரம்பரபோ⁴ஜனம் பக்கி²பித்வா ‘‘அத்த²தகதி²னானம் வோ, பி⁴க்க²வே, ச² கப்பிஸ்ஸந்தீ’’தி கிமத்த²ம் ந வுச்சந்தி? வுச்சதே – யதா²வுத்தலேஸனித³ஸ்ஸனத்த²ம். அஞ்ஞதா² இத³ம் ஸிக்கா²பத³ம் வேஸாலியம், அந்த⁴கவிந்தே³ சாதி உப⁴யத்த² உபட்³டு⁴பட்³டே⁴ன பஞ்ஞத்தம் ஸியா. நோ சே, ஸாபத்திகா பி⁴க்கூ² ஸியும், ந ச தே ஸாபத்திகா அப்படிக்கி²த்தேபி தேஸம் குக்குச்சத³ஸ்ஸனதோ. ‘‘தேன ஹி, ப்³ராஹ்மண, பி⁴க்கூ²னம் தே³ஹீதி. பி⁴க்கூ² குக்குச்சாயந்தா ந படிக்³க³ண்ஹந்தீ’’தி ஹி வுத்தம். தேஸஞ்ஹி ‘‘பரிபு⁴ஞ்ஜதா²’’தி ப⁴க³வதோ ஆணத்தியா பரிபு⁴த்தானம்பி ‘‘ஓதி³ஸ்ஸகம் நு கோ² இத³ம் அம்ஹாக’’ந்தி விமதிப்பத்தானம் விமதிவினோத³னத்த²ம் ‘‘அனுஜானாமி, பி⁴க்க²வே, யாகு³ஞ்ச மது⁴கோ³ளகஞ்சா’’தி வுத்தம். ஏவமிதா⁴பேதே பஞ்ஞத்தம் பரம்பரபோ⁴ஜனஸிக்கா²பத³ம் ஓமத்³தி³த்வா பரம்பரபோ⁴ஜனம் கத²ம் பு⁴ஞ்ஜிஸ்ஸந்தீதி. ஏத்தா²ஹு கேசி ஆசரியா பரம்பரபோ⁴ஜனஸிக்கா²பதே³னேவ ‘‘அஞ்ஞஸ்ஸ போ⁴ஜனம் ந கப்பதீ’’தி ஜானந்தாபி ‘‘அனுஜானாமி, பி⁴க்க²வே, யாகு³ஞ்சா’’தி விஸும் அனுஞ்ஞாதத்தா ‘‘படக்³கி³தா³னமஹாவிகடாதி³ விய கப்பதீ’’தி ஸஞ்ஞாய பு⁴ஞ்ஜிம்ஸு. தேன வுத்தம் ‘‘அபிச மயம் காலஸ்ஸேவ போ⁴ஜ்ஜயாகு³யா தா⁴தா’’திஆதி³, தம் அயுத்தம் தத்த² அட்டு²ப்பத்திமாதிகாவிப⁴ங்க³விரோதே⁴ன அனாபத்திவாரே நிச்சப⁴த்தாதீ³னம் அஸம்ப⁴வப்பஸங்க³தோ, பி⁴க்கூ²னம் ஸாபத்திகபா⁴வானதிக்கமனதோ, மிச்சா²கா³ஹஹேதுப்பஸங்கே³ன ப⁴க³வதா அனுஞ்ஞாதப்பஸங்க³தோ ச. தே ஹி பி⁴க்கூ² யஸ்மா ப⁴க³வா கத்த²சி வினயவஸேன கப்பியம்பி ‘‘கா³தா²பி⁴கீ³தம் மே அபோ⁴ஜனேய்ய’’ந்தி (ஸம். நி. 1.194; ஸு. நி. 81; மி. ப. 4.5.9) படிக்கி²பதி, தஸ்மா ப⁴க³வதோ அதி⁴ப்பாயம் பதி ‘‘குக்குச்சாயந்தா ந படிக்³க³ண்ஹந்தீ’’தி வுத்தம், ஸிக்கா²பத³ம் பதி ப⁴க³வாபி அத்தனோ அதி⁴ப்பாயப்பகாஸனத்த²மேவ ‘‘அனுஜானாமி, பி⁴க்க²வே, யாகு³ஞ்சா’’தி ஆஹ. து³ரவக்³கா³ஹோ ஹி ப⁴க³வதோ அதி⁴ப்பாயோ. ததா² ஹி பா⁴ரத்³வாஜஸ்ஸ பாயாஸம் அபோ⁴ஜனேய்யந்தி அகதவிஞ்ஞத்திப்பஸங்க³தோ படிக்கி²பி. ஆனந்த³த்தே²ரேன விஞ்ஞாபேத்வா ஸஜ்ஜிதம் தேகடுலயாகு³ம் பன ‘‘யத³பி, ஆனந்த³, விஞ்ஞத்தம், தத³பி அகப்பிய’’ந்தி அவத்வா ‘‘யத³பி, ஆனந்த³, அந்தோவுத்த²’’ந்திஆதி³மேவாஹ. தேன நோ சே தம் அந்தோவுத்த²ம் கப்பதீதி அதி⁴ப்பாயத³ஸ்ஸனேன பணீதபோ⁴ஜனஸூபோத³னவிஞ்ஞத்திஸிக்கா²பதா³னி உபத்த²ம்பே⁴தி ப⁴க³வதோபி கப்பதி, பகே³வ அம்ஹாகந்தி.

284. கி³லானஸ்ஸேவ ப⁴க³வதா கு³ளோ அனுஞ்ஞாதோதி ‘‘யானி கோ² பன தானி கி³லானானம் பி⁴க்கூ²னம் படிஸாயனீயானீ’’தி (பாரா. 622) வசனவஸேன வுத்தம், தேனேவ தே இத⁴ படிக்³க³ஹணே குக்குச்சாயிம்ஸு. இத⁴ பன ‘‘அனுஜானாமி, பி⁴க்க²வே, கி³லானஸ்ஸ கு³ளோத³க’’ந்தி வத்தப்³பே³ கு³ளாதி⁴காரத்தா புப்³பே³ அனுஞ்ஞாதஞ்ச வத்வா அகி³லானஸ்ஸ கு³ளோத³கம் அனுஞ்ஞாதம், தேன கி³லானேன ஸதி பச்சயே கு³ளோ பரிபு⁴ஞ்ஜிதப்³போ³, கு³ளோத³கம் அஸதி பச்சயேபி வட்டதீதி இமம் விஸேஸம் தீ³பேதி. தத்த² ‘‘கு³ளோத³கம் காலிகேஸு ஸத்தாஹகாலிகம், ப⁴க³வதா ஓதி³ஸ்ஸானுஞ்ஞாதத்தா ஸத்தாஹாதிக்கமேன து³க்கட’’ந்தி வத³ந்தி, தம் ந யுத்தம், உத³கஸம்பி⁴ன்னத்தா ஸத்தாஹகாலிகபா⁴வம் ஜஹதி. ‘‘யதா² அம்பா³தி³ உத³கஸம்பி⁴ன்னம் யாமகாலிகம் ஜாதம், ததா² ஸத்தாஹகாலிகம் ஜஹித்வா தத³னந்தரே யாவஜீவிகே டி²த’’ந்தி வத³ந்தி, தம் யுத்தம், தஞ்ச ப⁴க³வதா ஓதி³ஸ்ஸானுஞ்ஞாதத்தா பச்சவேக்க²ணாபா⁴வே தோ³ஸோ நத்தி². ‘‘கு³ளோத³க’ந்தி வுத்தத்தா உத³கக³திக’’ந்தி வத³ந்தி. யதி³ உத³கமிஸ்ஸம் உத³கக³திகம் ஹோதி, மது⁴பி ஸியா தம் ததா² அனுஞ்ஞாதத்தா. மா ஹோது, அப்படிக்³க³ஹேத்வா பரிபு⁴ஞ்ஜிதப்³ப³ம் ஸியா உத³கக³திகத்தா, தஞ்ச ந ஹோதி, ‘‘ஸப்³ப³த்தா²பி உபபரிக்கி²த்வா க³ஹேதப்³ப³’’ந்தி அஞ்ஞதரஸ்மிம் க³ண்டி²பதே³ வுத்தம்.

285. ஸுஞ்ஞாகா³ரந்தி சதுத்த²ஜ்ஜா²னம்.

கப்பியபூ⁴மிஅனுஜானனகதா²வண்ணனா

295. ஓரவஸத்³த³ந்தி மஹாஸத்³த³ம். ப³ஹூஹி ஸம்பரிவாரேத்வாதி ஏத்த² ஏகேனாபி வட்டதி. ‘‘ப³ஹூஸு ஏகஸ்ஸபி வசனேன ஸஹ ஸியாதி வுத்த’’ந்தி வத³ந்தி. ‘‘ஆமஸித்வா’’தி வுத்தத்தா அனாமஸிதே ந வட்டதி. ‘‘தோ³ஸோ நத்தீ²’’தி வசனேன ஸேஸாபி அனுஞ்ஞாதா. ‘‘பி⁴த்திஞ்சே உபஸந்தே பச்சா² தம் பூரேந்தி, தத்த² காதும் ந வட்டதி, பகதிபூ⁴மியம்யேவ காதும் வட்டதீ’’தி வத³ந்தி. தம் உபரி அட்ட²கதா²யம் ‘‘இட்ட²காதீ³ஹி கதாசயஸ்ஸா’’திஆதி³னா விருஜ்ஜ²தி விய. மத்திகாபிண்ட³ம் வாதி ஏத்த² ‘‘அஸதியா அனதி⁴ட்டி²தாய ஸரிதட்டா²னதோ பட்டா²ய சே உபரி அதி⁴ட்டி²தா, ஹேட்டா² டி²தம் ப⁴ண்ட³ம் அகப்பியம், உபரிட்டி²தமேவ கப்பியம், அயமேத்த² விஸேஸோ’’தி வுத்தம். ஏத்த² கப்பியகுடி லத்³து⁴ம் வட்டதீதி ஏவம்விதே⁴ புன காதப்³பா³தி அத்தோ². கப்பியகுடிம் காதும் தே³மாதி ஏத்த² கப்பியகுடிகிச்சம் காதுந்தி அதி⁴ப்பாயோ. போ⁴ஜனஸாலா பன ஸேனாஸனமேவ, தஸ்மா தத்த² காதப்³ப³ந்தி அபரே. ‘‘அகதேபி வட்டதீ’’தி வுத்தம்.

‘‘முக²ஸன்னிதி⁴ நாம போ⁴ஜனகாலே ஸன்னிதீ⁴’’தி லிகி²தம். முக²ஸன்னிதீ⁴தி தஸ்ஸ நாமம். ‘‘யதி³ ஸன்னிதி⁴ ஹோதி, பாசித்தியம் ப⁴வேய்ய, முக²ஸன்னிதி⁴ பன து³க்கடம், தஸ்மா ஸன்னிதி⁴ அனதி⁴ப்பேதா’’தி வுத்தம். ‘‘தஸ்ஸ ஸந்தகம் கத்வா’’தி வுத்தத்தா அனபேக்க²விஸ்ஸஜ்ஜனம் நாதி⁴ப்பேதம். சீவரவிகப்பனே விய கப்பியமத்தம் ஞாதப்³ப³ந்தி கேசி.

கேணியஜடிலவத்து²கதா²வண்ணனா

300. ‘‘அத்தனா படிக்³க³ஹிதம் புரேப⁴த்தமேவ பரிச்சஜித்வா ஸாமணேராதீ³ஹி பானகம் கத்வா தி³ன்னே புரேப⁴த்தமேவ வட்டதி, ந பச்சா²ப⁴த்தம் ஸவத்து²கபடிக்³க³ஹிதத்தா’’தி வத³ந்தி, தத்த² புன படிக்³க³ஹணே நித்³தோ³ஸத்தா, புரேப⁴த்தமேவ படிக்³க³ஹணஸ்ஸ நிஸ்ஸட்ட²த்தா, அத்தனா ச அக்³க³ஹிதத்தா தோ³ஸோ ந தி³ஸ்ஸதி, உபபரிக்கி²த்வா க³ஹேதப்³ப³ம். ஸாலூகா நாம கந்தா³, ‘‘இதோ கிஞ்சிதக’’ந்தி வோஹரந்தி. ‘‘பா²ருஸகந்தி கோ³ளவிஸயே ஏகோ ருக்கோ²’’தி ச லிகி²தம். ‘‘பக்கடா³கரஸ’’ந்தி விஸேஸிதத்தா ‘‘அபக்கம் வட்டதீ’’தி வுத்தம். குருந்தி³வசனேனபி ஸித்³த⁴மேவ. தண்டு³லதோ⁴வனோத³கம்பி த⁴ஞ்ஞரஸோ ஏவ. ‘‘நிக்கஸடோ உச்சு²ரஸோ ஸத்தாஹகாலிகோ’’தி லிகி²தம். ஸாவித்தீதி கா³யத்தி. ச²ந்த³ஸோதி வேத³ஸ்ஸ. ‘‘ந, பி⁴க்க²வே, பப்³ப³ஜிதேன அகப்பியே ஸமாத³பேதப்³ப³’ந்தி வுத்தத்தா அனுபஸம்பன்னஸ்ஸாபி ந கேவலம் த³ஸஸு ஏவ ஸிக்கா²பதே³ஸு, அத² கோ² யம் பி⁴க்கு²ஸ்ஸ ந கப்பதி, தஸ்மிம்பீதி அதி⁴ப்பாயோ’’தி வுத்தம்.

305. த்³வே படா தே³ஸனாமேனேவாதி சீனபட்டஸோமாரபட்டானி. தீணீதி பத்துண்ணேன ஸஹ தீணி. இத்³தி⁴மயிகம் ஏஹிபி⁴க்கூ²னம் நிப்³ப³த்தம். தே³வத³த்தியம் அனுருத்³த⁴த்தே²ரேன லத்³த⁴ம். ‘‘யாமாதிக்கமே ஸன்னிதி⁴வஸேன ஸத்தாஹாதிக்கமே பே⁴ஸஜ்ஜஸிக்கா²பத³வஸேனா’’தி லிகி²தம்.

பே⁴ஸஜ்ஜக்க²ந்த⁴கவண்ணனா நிட்டி²தா.