5. சம்மக்க²ந்த⁴கவண்ணனா

ஸோணகோளிவிஸவத்து²கதா²வண்ணனா

242. அஸீதியா …பே… காரேதீதி ‘‘அஸீதி கா³மிகஸஹஸ்ஸானி ஸன்னிபாதாபேத்வா’’தி இமஸ்ஸ காரணவசனம். தத்த² ‘‘கா³மானம் அஸீதியா ஸஹஸ்ஸேஸூ’’தி வத்தப்³பே³ ‘‘அஸீதியா கா³மஸஹஸ்ஸேஸூ’’தி வுத்தம். கா³மப்பமுகா² கா³மிகா, தேஸம் ஸஹஸ்ஸானி. ‘‘கம்மசித்தீகதானீ’’தி உபசாரேன வுத்தம். கம்மபச்சயஉதுஸமுட்டா²னே ஹி தேஸம் அஞ்ஜனவண்ணபா⁴வோ. ‘‘கேனசிதே³வ கரணீயேனா’’தி வத்தப்³பே³ ‘‘கேனசிதே³வா’’தி வுத்தம். ஏத்த² ஏவம்-ஸத்³தோ³ ஓபம்மே பவத்ததி. ஏவமுபமானோபதே³ஸபுச்சா²வதா⁴ரணபடிஞ்ஞாதஓபம்மே. புரதோ பேக்க²மானானந்தி அனாத³ரத்தே² ஸாமிவசனம். ததோ பன ப⁴க³வதோ க³ந்த⁴குடியா கவாடம் ஸுப³த்³த⁴ம் பஸ்ஸித்வா இச்சி²தாகாரகுஸலதாய இத்³தி⁴யா க³ந்த்வா குடிம் பவிஸித்வா ஆரோசேஸி. விஹாரபச்சா²யாயந்தி விஹாரஸ்ஸ வட்³ட⁴மானச்சா²யாயம். ‘‘அஹோ நூனாதி அஹோ மஹந்தோ’’தி லிகி²தம். ப⁴க³வதோ ஸம்ப³ஹுலேஹி ஸத்³தி⁴ம் ஆஹிண்ட³னம் ஆயஸ்மதோ ஸோணஸ்ஸ வீரியாரம்ப⁴னித³ஸ்ஸனேன அனாரத்³த⁴வீரியானம் உத்தேஜனத்த²ம், ஏவம் ஸுகு²மாலானம் பாத³ரக்க²ணத்த²ம் உபாஹனா அனுஞ்ஞாதாதி த³ஸ்ஸனத்த²ஞ்ச.

ஸோணஸ்ஸபப்³ப³ஜ்ஜாகதா²வண்ணனா

243. தத்த² ச நிமித்தம் க³ண்ஹாஹீதி தேஸம் இந்த்³ரியானம் ஆகாரம் உபலக்கே²ஹி.

244. அதி⁴முத்தோ ஹோதீதி படிவிஜ்ஜி²த்வா பச்சக்க²ம் கத்வா டி²தோ ஹோதி. நேக்க²ம்மாதி⁴முத்தோதிஆதீ³ஹி நிப்³பா³னம், அரஹத்தஞ்ச வுத்தம். ‘‘தஞ்ஹி ஸப்³ப³கிலேஸேஹி நிக்க²ந்தத்தா ‘நேக்க²ம்ம’ந்தி ச கே³ஹதோ பவிவித்தத்தா ‘பவிவேகோ’தி ச ப்³யாபஜ்ஜாபா⁴வதோ ‘அப்³யாபஜ்ஜ’ந்தி ச அரஹத்தம் உபாதா³னஸ்ஸ க²யந்தே உப்பன்னத்தா ‘உபாதா³னக்க²யோ’தி ச தண்ஹாய க²யந்தே உப்பன்னத்தா ‘தண்ஹக்க²யோ’தி ச ஸம்மோஹாபா⁴வதோ ‘அஸம்மோஹோ’தி ச வுச்சதீ’’தி வுத்தம். ஸப்³பே³ஹி அரஹத்தம் வுத்தந்தி கேசி. ஸியா கோ² ஏவமஸ்ஸாதி கதா³சி ஏவமஸ்ஸ, அஸ்ஸ வா ஆயஸ்மதோ ஏவம் ஸியா. பச்சாக³ச்ச²ந்தோ ஜானந்தோ. கரணீயமத்தானந்தி அத்தனோ. ஸோ ஏவ வா பாடோ². நேக்க²ம்மாதி⁴முத்தோதி இமஸ்மிம்யேவ அரஹத்தம் கதி²தம். ஸேஸேஸு நிப்³பா³னந்தி கேசி. அஸம்மோஹாதி⁴முத்தோதி ஏத்தே²வ நிப்³பா³னம். ஸேஸேஸு அரஹத்தந்தி கேசி. ‘‘ஸப்³பே³ஸ்வேவேதேஸு உப⁴யம்பீ’’தி வத³ந்தி. பவிவேகஞ்ச சேதஸோ, அதி⁴முத்தஸ்ஸ, உபாதா³னக்க²யஸ்ஸ சாதி உபயோக³த்தே² ஸாமிவசனம். ஆயதனானம் உப்பாத³ஞ்ச வயஞ்ச தி³ஸ்வா.

ஸப்³ப³னீலிகாதி³படிக்கே²பகதா²வண்ணனா

246. ‘‘ரஞ்ஜனசோளகேன புஞ்சி²த்வா’’தி பாடோ². ‘‘க²ல்லகாதீ³னி அபனேத்வா’தி வுத்தத்தா த்³வே தீணி சி²த்³தா³னி கத்வா வளஞ்ஜேதும் வட்டதீ’’தி வத³ந்தானம் வாதோ³ ந க³ஹேதப்³போ³.

யானாதி³படிக்கே²பகதா²வண்ணனா

254. ‘‘சதுரங்கு³லாதி⁴கானீ’’தி வுத்தத்தா சதுரங்கு³லதோ ஹேட்டா² வட்டதீதி ஏகே. உப⁴தோலோஹிதகூபதா⁴னந்தி ஏத்த² ‘‘காஸாவம் பன வட்டதி, குஸும்பா⁴தி³ரத்தமேவ ந வட்டதீ’’தி லிகி²தம்.

ஸப்³ப³சம்மபடிக்கே²பாதி³கதா²வண்ணனா

255. கிஸ்ஸ த்யாயந்தி கிஸ்ஸ தே அயம்.

256. கி³ஹிவிகதந்தி கி³ஹீனம் அத்தா²ய கதம். ‘‘யத்த² கத்த²சி நிஸீதி³தும் அனுஜானாமீதி அத்தோ²’’தி லிகி²தம். கிஞ்சாபி தீ³க⁴னிகாயட்ட²கதா²யம் ‘‘ட²பேத்வா தூலிகம் ஸப்³பா³னேவ கோ³னகாதீ³னி ரதனபரிஸிப்³பி³தானி வட்டந்தீ’’தி வுத்தம், அத² கோ² வினயபரியாயம் பத்வா க³ருகே டா²தப்³ப³தோ இத⁴ வுத்தனயேனேவேத்த² அத்தோ² க³ஹேதப்³போ³. ‘‘தத்த² பன ஸுத்தந்திகதே³ஸனாய க³ஹட்டா²தீ³னம்பி வஸேன வுத்தத்தா தேஸம் ஸங்க³ண்ஹனத்த²ம் ட²பேத்வா ‘தூலிகம்…பே… வட்டந்தீ’தி வுத்தம் விய கா²யதீதி அபரே’’தி வுத்தம்.

259. மிக³மாதுகோதி தஸ்ஸ நாமம். வாதமிகோ³தி ச தஸ்ஸ நாமம். ‘‘காளஸீஹோ காளமுகோ² கபீ’’தி லிகி²தம். சம்மம் ந வட்டதீதி யேன பரியாயேன சம்மம் வட்டிஸ்ஸதி, ஸோ பரதோ ஆவி ப⁴விஸ்ஸதி. ‘‘அத்தனோ புக்³க³லிகவஸேன பரிஹாரோ படிக்கி²த்தோ’’தி வுத்தம். ‘‘ந, பி⁴க்க²வே, கிஞ்சி சம்மம் தா⁴ரேதப்³ப³’’ந்தி ஏத்தாவதா ஸித்³தே⁴ ‘‘ந, பி⁴க்க²வே, கோ³சம்ம’’ந்தி இத³ம் பரதோ ‘‘அனுஜானாமி, பி⁴க்க²வே, ஸப்³ப³பச்சந்திமேஸு ஜனபதே³ஸு சம்மானி அத்த²ரணானீ’’தி ஏத்த² அனுமதிப்பஸங்க³ப⁴யா வுத்தந்தி வேதி³தப்³ப³ம்.

சம்மக்க²ந்த⁴கவண்ணனா நிட்டி²தா.