4. பவாரணாக்க²ந்த⁴கவண்ணனா

அபா²ஸுகவிஹாரகதா²வண்ணனா

210. ‘‘ஸங்க⁴ம் ஆவுஸோ பவாரேமீ’’தி வுத்தத்தா பச்சா²பி ‘‘வத³து மம் ஸங்கோ⁴’’தி வத்தப்³ப³ம் விய தி³ஸ்ஸதி. அயம் பனேத்த² அதி⁴ப்பாயோ – யஸ்மா அஹம் ஸங்க⁴ம் பவாரேமி, தஸ்மா தத்த² பரியாபன்னா தே²ரா, மஜ்ஜி²மா, நவா வா அவிஸேஸேனாயஸ்மந்தோ ஸப்³பே³பி மம் வத³ந்தூதி.

பவாரணாபே⁴த³வண்ணனா

212. த்³வேமா, பி⁴க்க²வே, பவாரணாதி ஏத்த² தாதி³ஸே கிச்சே ஸதி யத்த² கத்த²சி பவாரேதும் வட்டதி. தேனேவ மஹாவிஹாரே பி⁴க்கூ² சாதுத்³த³ஸியம் பவாரேத்வா பன்னரஸியம் காயஸாமக்³கி³ம் இதா³னிபி தே³ந்தி. சேதியகி³ரி மஹாத³ஸ்ஸனத்த²ம்பி அட்ட²மியம் க³ச்ச²ந்தி, தம்பி சாதுத்³த³ஸியம் பவாரேதுகாமானம்யேவ ஹோதி. ‘‘ஸத்தாஹம் அனாக³தாய பவாரணாய ஸகரணீயோ பக்கமதி, அனாபத்தீதி வசனதோ இத³ம் ஆசிண்ண’’ந்தி லிகி²தம். ‘‘நோ சே அதி⁴ட்ட²ஹேய்ய, ஆபத்தி து³க்கடஸ்ஸா’’தி ஏகஸ்ஸ வுத்தது³க்கடம், தஸ்ஸேவ வுத்தம் புப்³ப³கிச்சஞ்ச ஸங்க⁴க³ணானம்பி நேதப்³ப³ம்.

பவாரணாதா³னானுஜானனகதா²வண்ணனா

213. தேன ச பி⁴க்கு²னாதி பவாரணாதா³யகேன.

அனாபத்திபன்னரஸகாதி³கதா²வண்ணனா

‘‘தஸ்ஸா ச பவாரணாய ஆரோசிதாய ஸங்கே⁴ன ச பவாரிதே ஸப்³பே³ஸம் ஸுப்பவாரிதம் ஹோதீதி வசனதோ கேவலம் பவாரணாய பவாரணாதா³யகோபி பவாரிதோவ ஹோதீ’’தி வத³ந்தீதி.

222. அவுட்டி²தாய பரிஸாயாதி பவாரேத்வா பச்சா² அஞ்ஞமஞ்ஞம் கதே²ந்தியா. ஏகச்சாய வுட்டி²தாயாதி ஏகச்சேஸு யதா²னிஸின்னேஸு ஏகச்சேஸு ஸகஸகட்டா²னம் க³தேஸு. புன பவாரேதப்³ப³ந்தி புனபி ஸப்³பே³ஹி ஸமாக³ந்த்வா பவாரேதப்³ப³ம். ஆக³ச்ச²ந்தி ஸமஸமா, தேஸம் ஸந்திகே பவாரேதப்³ப³ந்தி ‘‘க³தே அனானேத்வா நிஸின்னானம்யேவ ஸந்திகே பவாரேதப்³ப³ம், உபோஸத²க்க²ந்த⁴கேபி ஏஸேவ நயோ’’தி லிகி²தம். ஸப்³பா³ய வுட்டி²தாய பரிஸாய ஆக³ச்ச²ந்தி ஸமஸமா, தேஸம் ஸந்திகே பவாரேதப்³ப³ந்தி ‘‘யதி³ ஸப்³பே³ வுட்ட²ஹித்வா க³தா, ஸன்னிபாதேதுஞ்ச ந ஸக்கா, ஏகச்சே ஸன்னிபாதாபேத்வா பவாரேதும் வட்டதீ’’தி வத³ந்தி. கஸ்மா? ஞத்திம் ட²பேத்வா கத்தப்³ப³ஸங்க⁴கம்மாபா⁴வா வக்³க³ம் ந ஹோதி கிர. ஏத்த² பன ஏகச்சேஸு க³தேஸுபி ஸப்³பே³ஸு க³தேஸுபி ஸப்³பே³ ஸன்னிபாதாபேத்வா ஞத்திம் அட்ட²பேத்வா கேவலம் பவாரேதப்³ப³ம். ஏகச்சே ஸன்னிபாதாபேத்வா பவாரேதும் ந வட்டதி ‘‘ஸங்க⁴ம், ப⁴ந்தே, பவாரேமீ’’தி வசனதோ. ஸப்³பே³பி ஹி ஸன்னிபதிதா பச்சா² தி³ட்ட²ம் வா ஸுதம் வா பரிஸங்கிதம் வா வத்தாரோ ஹோந்தி. அனாக³தானம் அத்தி²பா⁴வம் ஞத்வாபி ஏகச்சானம் ஸந்திகே பவாரணாவசனம் விய ஹோதி. ஸம்முகீ²பூ⁴தே சத்தாரோ ஸன்னிபாதாபேத்வா நிஸ்ஸக்³கி³யம் ஆபன்னசீவராதி³னிஸ்ஸஜ்ஜனம் விய பவாரணா ந ஹோதி ஸப்³பா³யத்தத்தா. ‘‘ஸமக்³கா³னம் பவாரணா பஞ்ஞத்தா’’தி வசனஞ்சேத்த² ஸாத⁴கம். ‘‘இதோ அஞ்ஞதா² ந வட்டதி அட்ட²கதா²யம் அனனுஞ்ஞாதத்தா’’தி உபதிஸ்ஸத்தே²ரோ வத³தி. ‘‘தோ²கதரேஹி தேஸம் ஸந்திகே பவாரேதப்³ப³ம் ஞத்திம் அட்ட²பேத்வாவா’’தி வுத்தம். ஆக³ந்துகா நாம நவமிதோ பட்டா²யாக³தா வா வஜஸத்த²னாவாஸு வுத்த²வஸ்ஸா வா ஹோந்தி.

237. ‘‘த³ஸவத்து²கா மிச்சா²தி³ட்டி² ஹோதி ததா²க³தோதிஆதீ³’’தி லிகி²தம். ‘‘நத்தி² தி³ன்னந்திஆதீ³’’தி வுத்தம்.

239. ‘‘உபபரிக்கி²த்வா ஜானிஸ்ஸாமாதி தேன ஸஹ பவாரேதப்³ப³’’ந்தி லிகி²தம்.

பவாரணாக்க²ந்த⁴கவண்ணனா நிட்டி²தா.