3. வஸ்ஸூபனாயிகக்க²ந்த⁴கவண்ணனா

வஸ்ஸூபனாயிகானுஜானனகதா²வண்ணனா

184. மஹாஅட்ட²கதா²யம்பி ‘‘ஸங்காஸயிஸ்ஸந்தீ’’தி பாடோ², தீ³பவாஸினோ ‘‘ஸங்காபயிஸ்ஸந்தீ’’தி பட²ந்தி கிர. ‘‘கதி நு கோ² வஸ்ஸூபனாயிகா’’தி சிந்தாயம் ‘‘கிம் நிமித்த’’ந்தி வுத்தே ‘‘அனுஜானாமி, பி⁴க்க²வே, வஸ்ஸம் உபக³ந்து’’ந்தி யம் வஸ்ஸூபக³மனம் வுத்தம், தம் ‘‘இமம் தேமாஸம் வஸ்ஸம் உபேமீ’’தி வத்வா உபக³ந்தப்³ப³ம். வஸ்ஸானமாஸா ச சத்தாரோ. தத்த² பட²மம் தேமாஸம், பச்சி²மம் தேமாஸந்தி து³வித⁴ம் தேமாஸம். தேனாயம் தேஸம் பி⁴க்கூ²னம் சிந்தா அஹோஸி.

வஸ்ஸானேசாரிகாபடிக்கே²பாதி³கதா²வண்ணனா

185. அனபேக்க²க³மனேன வா அஞ்ஞத்த² அருணம் உட்டா²பனேன வா ஆபத்தி வேதி³தப்³பா³தி ஏத்த² பட²மம் தாவ ஸோ ஸத்தாஹம் அனாக³தாய பவாரணாய ஸகரணீயோ பக்கமதி. ‘‘ஆக³ச்சே²ய்ய வா ஸோ, பி⁴க்க²வே, பி⁴க்கு² தம் ஆவாஸம் ந வா ஆக³ச்சே²ய்ய, தஸ்ஸ, பி⁴க்க²வே, பி⁴க்கு²னோ புரிமிகா ச பஞ்ஞாயதி, படிஸ்ஸவே ச அனாபத்தீ’’தி வசனதோ ஓரம் ஸந்தா⁴ய வுத்தந்தி வேதி³தப்³ப³ம். ததா² ஹி ‘‘ஸோ தத³ஹேவ அகரணீயோ பக்கமதி, ஸகரணீயோ பக்கமதி, தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸா’’தி (மஹாவ. 207) வுத்தம்.

ஸத்தாஹகரணீயானுஜானனகதா²வண்ணனா

187-8. து³தியம் பன ‘‘ஸோ தம் ஸத்தாஹம் ப³ஹித்³தா⁴ வீதினாமேதி, தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸா’’தி வசனதோ ஸத்தாஹதோ பரம் வேதி³தப்³ப³ம். ததா² ஹி ‘‘ஸோ தம் ஸத்தாஹம் அந்தோ ஸன்னிவத்தம் கரோதி, தஸ்ஸ, பி⁴க்க²வே, பி⁴க்கு²னோ புரிமிகா ச பஞ்ஞாயதி, படிஸ்ஸவே ச அனாபத்தீ’’தி (மஹாவ. 207) வுத்தம். ஸதிபி காரணத்³வயே வஸ்ஸச்சே²த³காரணாபா⁴வே ஆபத்தி வேதி³தப்³பா³, தஸ்மா தீணிபி ஏதானி வசனானி யதா²ஸம்ப⁴வம் யோஜிதானி விக்³க³ஹானி ஹோந்தி. தீணி பரிஹீனானீதி தாஸம் நத்தி²தாய.

பஹிதேயேவஅனுஜானனகதா²வண்ணனா

199. ‘‘அனுஜானாமி பி⁴க்க²வே, ஸங்க⁴கரணீயேன க³ந்தும், ஸத்தாஹம் ஸன்னிவத்தோ காதப்³போ³’’தி வசனதோ அந்தோவஸ்ஸே ஸம்ஹாரிகபா⁴வேன க³ந்தும் வட்டதி. தத்த² த⁴ம்மச²ந்த³வஸேனபி ஆக³தே ஸங்க⁴ஸ்ஸ ஆயமுக²ம் வினஸ்ஸதி. ததோ ‘‘ஸேனாஸனானி கத்வா’’தி ச வுத்தம். ஆக³தந்தி ஆக³மனம். பா⁴வேத்த² தபச்சயோயம். ஸங்க⁴கரணீயேன க³ந்துந்தி ஏத்த² ‘‘ஸேனாஸனபடிஸம்யுத்தேஸு ஏவ ஸங்க⁴கரணீயேஸு, ந அஞ்ஞேஸூ’’தி த⁴ம்மஸிரித்தே²ரோ வத³தி கிர. அட்ட²கதா²யம்பி தம் பத³ம் உத்³த⁴ரித்வா ‘‘யம் கிஞ்சி உபோஸதா²கா³ராதீ³ஸு ஸேனாஸனேஸூ’’திஆதி³னா ஸேனாஸனமேவ த³ஸ்ஸிதம், தஸ்மா உபபரிக்கி²தப்³ப³ம்.

அனிமந்திதேன க³ந்தும் ந வட்டதீதி தஸ்ஸ ரத்திச்சே²தோ³ ச து³க்கடாபத்தி ச ஹோதி, தம் ‘‘வஸ்ஸச்சே²தோ³’’தி ச வத³ந்தி. நிமந்திதோயேவ நாம ஹோதீதி ஏத்த² உபாஸகேஹி ‘‘இமஸ்மிம் நாம தி³வஸே தா³னாதீ³னி கரோம, ஸப்³பே³ ஸன்னிபதந்தூ’’தி கதாயபி கதிகாய க³ந்தும் வட்டதி. பவாரணாய நவமிதோ பட்டா²ய பம்ஸுகூலிகசீவரம் பரியேஸிதும் காவீரபட்டனே விய ஸப்³பே³ஸம் க³ந்தும் வட்டதி அனுஸம்வச்ச²ரம் நியமதோ உபாஸகேஹி ஸஜ்ஜித்வா ட²பனதோ. வுத்தம்பி சேதம் அந்த⁴கட்ட²கதா²யம் ‘‘பி⁴க்கு²ஸங்கே⁴ன வா கதிகா கதா ‘ஸமந்தா பி⁴க்கூ² க³ச்ச²ந்தூ’தி, கோ⁴ஸனம் வா கதம் உபாஸகேஹி, தத்த² க³ச்ச²ந்தஸ்ஸ ரத்திச்சே²தோ³ நத்தீ²தி ததா² ‘அனுஸம்வச்ச²ரம் ஆக³ச்ச²ந்தூ’தி ஸகிம் நிமந்திதேபி வட்டதீ’’தி ச ‘‘சீவரகாலதோ பட்டா²ய நியமம் கத்வா ஸமந்ததோ ஆக³தானம் ஸஜ்ஜேத்வா தா³னதோ காவீரபட்டனே கோ⁴ஸேத்வா கரணாகாரோ பஞ்ஞாயதீதி அபரே’’தி ச. ஆசரியா பன ஏவம் ந வத³ந்தி.

அந்தராயேஅனாபத்திவஸ்ஸச்சே²த³கதா²வண்ணனா

201. ‘‘ஸசே தூ³ரம் க³தோ ஹோதி, ஸத்தாஹவாரேன அருணோ உட்டா²பேதப்³போ³’’தி வசனதோ ‘யஸ்மிம் அந்தராயே ஸதி வஸ்ஸச்சே²த³ம் காதும் வட்டதி, தஸ்மிம் அந்தராயேவ வஸ்ஸச்சே²த³மகத்வா ஸத்தாஹகரணீயேன வீதினாமேதும் வட்டதீதி தீ³பிதந்தி அபரே’’தி வுத்தம். வினயத⁴ரா பன ந இச்ச²ந்தி, தஸ்மா ‘‘ஸத்தாஹவாரேன அருணோ உட்டா²பேதப்³போ³’’தி இத³ம் தத்ருப்பாதா³தி³னிமித்தம் வுத்தந்தி வேதி³தப்³ப³ம். தம் ஸந்தா⁴ய ‘‘ஆசரியா பன ஏவம் ந வத³ந்தீ’’தி வுத்தம். கா³வும் வாதி ப³லிப³த்³த⁴ம் வா. ப³ஹிஸீமாய டி²தானந்தி தேஹி க²ண்ட³ஸீமாய டி²தேஹிபீதி உபதிஸ்ஸத்தே²ரோ. வஸ்ஸச்சே²தே³ அஸ்ஸ வஸ்ஸச்சே²த³ஸ்ஸ. விஹாரா அஞ்ஞத்த² வுட்டா²பேந்தேஹி தத்தே²வ ஸன்னிபதித்வா ‘‘இமினா ச இமினா ச காரணேன இமஸ்மிம் நாம பதே³ஸே இமம் விஹாரம் நேத்வா வுட்டா²பேமா’’தி அனுஸ்ஸாவேத்வாவ காதப்³ப³ந்தி.

வஜாதீ³ஸுவஸ்ஸூபக³மனகதா²வண்ணனா

203. வஜேன ஸத்³தி⁴ம் க³தஸ்ஸ வஸ்ஸச்சே²தே³ அனாபத்தீதி வஸ்ஸச்சே²தோ³ ந ஹோதீதி கிர அதி⁴ப்பாயோ. ஸத்த²ஸ்ஸ அவிஹாரத்தா ‘‘இமஸ்மிம் விஹாரே’’தி அவத்வா ‘‘இத⁴ வஸ்ஸம் உபேமீ’’தி ஏத்தகம் வத்தப்³ப³ம். ‘‘ஸத்தே² பன வஸ்ஸம் உபக³ந்தும் ந வட்டதீதி ‘இமஸ்மிம் விஹாரே இமம் தேமாஸ’ந்தி வா ‘இத⁴ வஸ்ஸம் உபேமீ’தி வா ந வட்டதி, ஆலயகரணமத்தேனேவ வட்டதீதி அதி⁴ப்பாயோ’’தி லிகி²தம். தம் பன அட்ட²கதா²ய விருஜ்ஜ²தி. ‘‘இத⁴ வஸ்ஸம் உபேமீதி திக்க²த்தும் வத்தப்³ப³’’ந்தி ஹி வுத்தம். அட்ட²கதா²வசனம்பி புப்³பா³பரம் விருஜ்ஜ²தீதி சே? ந, அதி⁴ப்பாயாஜானனதோ. ஸத்தோ² து³விதோ⁴ டி²தோ, ஸஞ்சாரோதி. தத்த² டி²தே குடிகாய ‘‘இத⁴ வஸ்ஸம் உபேமீ’’தி வத்வா வஸிதப்³ப³ம். இத³ஞ்ஹி ஸந்தா⁴ய ‘‘அனுஜானாமி, பி⁴க்க²வே, ஸத்தே² வஸ்ஸம் உபக³ந்து’’ந்தி வுத்தம், ஸஞ்சாரிம்ஹி பன ஸத்தே² குடிகாய அபா⁴வதோ வஸ்ஸம் உபக³ந்தும் ந வட்டதி. ஸதி ஸிவிகாய வா ஸகடகுடிகாய வா வட்டதி, ததா² வஜேபி. தீஸு டா²னேஸு பி⁴க்கு²னோ நத்தி² வஸ்ஸச்சே²தே³ ஆபத்தி.

பவாரேதுஞ்ச லப⁴தீதி ஏத்தா²யம் விசாரணா – ‘‘அனுஜானாமி, பி⁴க்க²வே, யேன வஜோ, தேன க³ந்து’’ந்தி இத³ம் கிம் வஸ்ஸரக்க²ணத்த²ம் வுத்தம், உதா³ஹு வஸ்ஸச்சே²தா³பத்திரக்க²ணத்த²ந்தி? கிஞ்சேத்த² யதி³ வஸ்ஸரக்க²ணத்த²ம், ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³’’ந்தி இத³ம் விருஜ்ஜ²தி. அத² வஸ்ஸச்சே²தா³பத்திரக்க²ணத்த²ம் வுத்தந்தி ஸித்³த⁴ம் ந ஸோ பவாரேதும் லப⁴தீதி, கா பனேத்த² யுத்தி? யதோ அயமேவ திவிதோ⁴ பவாரேதும் லப⁴தி, நேதரோ. வாளேஹி உப்³பா³ள்ஹாதி³கோ ஹி உபக³தட்டா²னாபரிச்சாகா³ லப⁴தி. பரிச்சாகா³ ந லப⁴தீதி அயமேத்த² யுத்தி. யேன கா³மோ, தத்த² க³தோபி பவாரேதும் லப⁴தீதி ஏகேனாதி ஆசரியோ. யோ ஹி புப்³பே³ ‘‘இத⁴ வஸ்ஸம் உபேமீ’’தி ந உபக³தோ, ‘‘இமஸ்மிம் விஹாரே’’தி உபக³தோ, ஸோ ச பரிச்சத்தோ. அஞ்ஞதா² வினா விஹாரேன கேவலம் கா³மம் ஸந்தா⁴ய ‘‘இத⁴ வஸ்ஸம் உபேமீ’’தி உபக³ந்தும் வட்டதீதி. ஆபஜ்ஜதூதி சே? ந, ‘‘அனுஜானாமி, பி⁴க்க²வே, வஜே ஸத்தே² நாவாய வஸ்ஸம் உபக³ந்து’’ந்தி வசனம் விய ‘‘கா³மே உபக³ந்து’’ந்தி வசனாபா⁴வதோ. யஸ்மா ‘‘தீஸு டா²னேஸு பி⁴க்கு²னோ நத்தி² வஸ்ஸச்சே²தே³ ஆபத்தீ’’தி வசனம் தத்த² வஸ்ஸூபக³மனம் அத்தீ²தி தீ³பேதி தத³பா⁴வே சே²தா³பா⁴வா, தஸ்மா ‘‘ஸத்தே² பன வஸ்ஸம் உபக³ந்தும் ந வட்டதீ’’தி குடியா அபா⁴வகாலம் ஸந்தா⁴ய வுத்தந்தி ஸித்³த⁴ம். தீஸு டா²னேஸு பி⁴க்கு²னோ நத்தி² வஸ்ஸச்சே²தே³ ஆபத்தீதி ‘‘தேஹி ஸத்³தி⁴ம் க³ச்ச²ந்தஸ்ஸேவ நத்தி², விருஜ்ஜி²த்வா க³மனே ஆபத்தி ச, பவாரேதுஞ்ச ந லப⁴தீ’’தி லிகி²தம், தஸ்மா யம் வுத்தம் அட்ட²கதா²யம் ‘‘அத² ஸத்தோ² அந்தோவஸ்ஸேயேவ பி⁴க்கு²னா பத்தி²தட்டா²னம் பத்வா அதிக்கமதி…பே… அந்தரா ஏகஸ்மிம் கா³மே திட்ட²தி வா விப்பகிரதி வா’’திஆதி³, தம் ஏத்தாவதா விருஜ்ஜி²த்வா க³தானம்பி விருஜ்ஜி²த்வா க³மனம் ந ஹோதி, தஸ்மா பவாரேதப்³ப³ந்தி த³ஸ்ஸனத்த²ந்தி வேதி³தப்³ப³ம்.

தத்த² ‘‘பத³ரச்ச²த³னம் குடிம் கத்வா உபக³ந்தப்³ப³’’ந்தி வசனதோ ஸேனாஸனத்தா²ய ருக்க²ம் ஆருஹிதும் வட்டதீதி ஸித்³த⁴ம் ஹோதி, ந பாளிவிரோத⁴தோதி சே? ந, தப்படிக்கே²பேனேவ ஸித்³த⁴த்தா, இமஸ்ஸ இத⁴ புனபி படிக்கே²பனதோ. ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³’’ந்தி இமினா படிக்கே²பேன ஸித்³தே⁴ ‘‘ந, பி⁴க்க²வே, அஜ்ஜோ²காஸே வஸ்ஸம் உபக³ந்தப்³ப³’’ந்தி படிக்கே²போ விய ஸியாதி சே? ந, அஜ்ஜோ²காஸஸ்ஸ அஸேனாஸனபா⁴வானுமதிப்பஸங்க³தோ. அஜ்ஜோ²காஸோ ஹி ‘‘அஜ்ஜோ²காஸே பலாலபுஞ்ஜே’’தி வசனதோ ஸேனாஸனந்தி ஸித்³த⁴ம். சதுஸாலஅஜ்ஜோ²காஸே வஸந்தோபி ‘‘சதுஸாலாய வஸதீ’’தி வுச்சதி, தஸ்மா தத்த² வட்டதீதி ஆபஜ்ஜதி, தஸ்மா இத⁴ அஸேனாஸனிகோ நாம அத்தனா வா பரேன வா அத்தனோ நிப³த்³த⁴வாஸத்த²ம் அபாபிதஸேனாஸனிகோதி வேதி³தப்³ப³ம். அஞ்ஞதா² த்³வின்னம் படிக்கே²பானம் அஞ்ஞதராதிரேகதா ச ருக்க²மூலேபி நிப்³ப³கோஸேபி வஸ்ஸம் உபக³ந்தும் வட்டதீதி ச, அபாபிதஸேனாஸனிகேனாபி க³ப்³பே⁴ வஸிதும் வட்டதீதி ச ஆபஜ்ஜதி, ஸத்³வாரப³ந்த⁴மேவ ஸேனாஸனம் இத⁴ அதி⁴ப்பேதந்தி கத²ம் பஞ்ஞாயதீதி சே? நிதா³னதோ. அயஞ்ஹி அஸேனாஸனிகவஸ்ஸூபக³மனாபத்தி ‘‘தேன கோ² பன ஸமயேன பி⁴க்கூ² அஸேனாஸனிகா வஸ்ஸம் உபக³ச்ச²ந்தி, ஸீதேனபி உண்ஹேனபி கிலமந்தீ’’தி இமஸ்மிம் நிதா³னே பஞ்ஞத்தா, தஸ்மா ஸீதாதி³படிக்கே²பமேவ இத⁴ ஸேனாஸனந்தி அதி⁴ப்பேதப்³ப³ந்தி ஸித்³த⁴ம். ஏவம் ஸந்தே ஸித்³த⁴ம் புப்³ப³பக்க²னித³ஸ்ஸனந்தி சே? ந, புப்³பே³ அபரத்த²பவத்திஸூசனதோ. து³தியஜ்ஜா²னனித்³தே³ஸே ‘‘விதக்கவிசாரானம் வூபஸமா அவிதக்கம் அவிசார’’ந்தி (தீ³. நி. 1.228; ம. நி. 1.271) வசனானி நித³ஸ்ஸனம். அஜ்ஜோ²காஸபடிக்கே²பனிதா³னேன ப³ஹிஅஜ்ஜோ²காஸோவ படிக்கி²த்தோ, ந சதுஸாலாதி³மஜ்ஜ²க³தோ அஜ்ஜோ²காஸோதி ஆபஜ்ஜதி, தஸ்மா ந நிதா³னம் பமாணந்தி சே? ந, நியமதோ. கிஞ்சி ஹி ஸிக்கா²பத³ம் நிதா³னாபேக்க²ம் ஹோதீதி ஸாதி⁴தமேதம். இத³ம் ஸாபேக்க²ம், இத³ம் அனபேக்க²ந்தி கத²ம் பஞ்ஞாயதி, ந ஹி ஏத்த² உப⁴தோவிப⁴ங்கே³ விய ஸிக்கா²பதா³னம் பத³பா⁴ஜனம், அனாபத்திவாரோ வா அத்தீ²தி? இதா⁴பி தே³ஸனாவிதா⁴னதோ பஞ்ஞாயதி. ‘‘தே³வே வஸ்ஸந்தே ருக்க²மூலம்பி நிப்³ப³கோஸம்பி உபதா⁴வந்தீ’’தி ஹி இமேஹி த்³வீஹி நிதா³னவசனேஹி ப³ஹி வா அந்தோ வா ஸப்³ப³ம் ஓவஸ்ஸகட்டா²னம் இத⁴ அஜ்ஜோ²காஸோ நாம. அனோவஸ்ஸகட்டா²னம்பி அனிப்³ப³கோஸமேவ இத⁴ இச்சி²தப்³ப³ந்தி ஸித்³த⁴ம் ஹோதி. தேன ந உபக³ந்தப்³ப³ந்தி ந ஆலயகரணபடிக்கே²போ, ‘‘இத⁴ வஸ்ஸம் உபேமீ’’தி வசனபடிக்கே²போ. ச²வஸரீரம் த³ஹித்வா சா²ரிகாய, அட்டி²கானஞ்ச அத்தா²ய குடிகா கரீயதீதி அந்த⁴கட்ட²கதா²வசனம். ‘‘டங்கிதமஞ்சோதி கஸிகுடிகாபாஸாணக⁴ர’’ந்தி லிகி²தம். ‘‘அகவாடப³த்³த⁴ஸேனாஸனே அத்தனோ பாபிதே ஸபா⁴க³ட்டா²னே ஸகவாடப³த்³தே⁴ வஸதி சே, வட்டதீ’’தி வுத்தம். பயோகோ³பி அத்தி², ‘‘அஸேனாஸனிகேன வஸ்ஸம் ந உபக³ந்தப்³ப³’’ந்தி பாளி ச அட்ட²கதா² ச, தஸ்மா உபபரிக்கி²தப்³ப³ம்.

அத⁴ம்மிககதிகாதி³கதா²வண்ணனா

205. மஹாவிப⁴ங்கே³ வுத்தந்தி ஏத்த² அயம் அந்த⁴கட்ட²கதா²வசனம் ஊனபன்னரஸவஸ்ஸேன ஸாமணேரேன இத⁴ விஹாரே ந வத்த²ப்³பா³, ந பம்ஸுகூலம் ஆஹிண்டி³தப்³ப³ம், ந சோளபி⁴க்கா² க³ஹேதப்³பா³, ந அஞ்ஞவிஹாரே பு⁴ஞ்ஜிதப்³ப³ம், ந அஞ்ஞஸ்ஸ பி⁴க்கு²ஸ்ஸ வா பி⁴க்கு²னியா வா ஸந்தகம் பு⁴ஞ்ஜிதப்³ப³ம், அஞ்ஞமஞ்ஞம் நேவ ஆலபேய்யாம ந ஸல்லபேய்யாம, ந ஸஜ்ஜா²யிதப்³ப³ம், மத்திகாபத்தேன வட்டதி, ந அபரிபுண்ணபரிக்கா²ரஸ்ஸ வாஸோதி.

206. முஸாவாதோ³தி விஸம்வாதோ³ அதி⁴ப்பேதோ. கேசி ‘‘விஸம்வாத³னவஸேன படிஸ்ஸுணித்வாதி வுத்த’’ந்தி ச, ‘‘ரஞ்ஞோ வுத்தவசனானுரூபதோ முஸாவாதோ³தி க³ஹட்டா² க³ண்ஹந்தீதி வுத்த’’ந்தி ச வத³ந்தி.

207. ‘‘புரிமிகா ச ந பஞ்ஞாயதி. கஸ்மா? ‘து³தியே வஸாமீ’தி சித்தே உப்பன்னே பட²மஸேனாஸனக்³கா³ஹோ படிப்பஸ்ஸம்ப⁴தி. புன ‘பட²மே ஏவ வஸாமீ’தி சித்தே உப்பன்னே து³தியோ படிப்பஸ்ஸம்ப⁴தி. உப⁴யாவாஸே விதா⁴னம் நத்தீ²’’தி லிகி²தம். போராணக³ண்டி²பதே³ பன ‘‘பட²மம் க³ஹிதட்டா²னே அவஸித்வா அஞ்ஞஸ்மிம் விஹாரே ஸேனாஸனம் க³ஹேத்வா த்³வீஹதீஹம் வஸதி, ததோ பட²மக்³கா³ஹோ படிப்பஸ்ஸம்ப⁴தீதி புரிமிகா ச ந பஞ்ஞாயதி. பச்சி²மக்³கா³ஹோ ந படிப்பஸ்ஸம்ப⁴தி. இத³ஞ்ஹி தி³வஸவஸேன படிப்பஸ்ஸம்ப⁴னம் நாம ஹோதி. அத² பச்சி²மம் தேமாஸம் அஞ்ஞஸ்மிம் வஸதி, புரிமிகா ச ந பஞ்ஞாயதி, இத³ம் ஸேனாஸனக்³கா³ஹானம் வஸேன படிப்பஸ்ஸம்ப⁴னம் நாமா’’தி வுத்தம். உபோ⁴பேதே அத்த²விகப்பா இத⁴ நாதி⁴ப்பேதா. யத்தா²யம் படிஸ்ஸுதோ, தத்த² புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸ. கத்த² பன புரிமிகா பஞ்ஞாயதீதி? அந்தராமக்³கே³ த்³வீஸு ஆவாஸேஸு யத்த² தத³ஹேவ பச்சி²மக்³கா³ஹோ, தத்த² பட²மம் க³ஹிதட்டா²னே ஸத்தாஹகரணீயேன க³ச்ச²தோ ந வஸ்ஸச்சே²தோ³, ஸோ தத³ஹேவ அகரணீயோ பக்கமதீதிஆதி³ம்ஹி ‘‘கரணீயம் நாம ஸத்தாஹகரணீய’’ந்தி லிகி²தம்.

பாளிமுத்தகரத்திச்சே²த³வினிச்ச²யே ‘‘த⁴ம்மஸ்ஸவனாதீ³’’தி வுத்தம். ஆதி³ம்ஹி சதூஸு வாரேஸு நிரபேக்க²பக்கமனஸ்ஸாதி⁴ப்பேதத்தா ‘‘ஸத்தாஹகரணீயேனா’’தி ந வுத்தம் தஸ்மிம் ஸதி நிரபேக்க²க³மனாபா⁴வதோ. தத்த² புரிமா த்³வே வாரா வஸ்ஸம் அனுபக³தஸ்ஸ வஸேன வுத்தா, தஸ்மா உபக³தஸ்ஸ தத³ஹேவ ஸத்தாஹகரணீயேன க³ந்த்வா அந்தோஸத்தாஹம் ஆக³ச்ச²தோ ந வஸ்ஸச்சே²தோ³தி ஸித்³த⁴ம். பச்சி²மா த்³வே வாரா உபக³தஸ்ஸ நிரபேக்க²க³மனவஸேன வுத்தா, ‘‘ஸத்தாஹம் அனாக³தாய பவாரணாய ஸகரணீயோ பக்கமதீ’’தி ததோ ப³ஹித்³தா⁴ ஸத்தாஹம் வீதினாமேந்தஸ்ஸ வஸ்ஸச்சே²தோ³தி த³ஸ்ஸனத்த²ம் வுத்தம். தத்த² ‘‘அகரணீயோ பக்கமதீ’’தி வசனாபா⁴வா வினா ரத்திச்சே²த³காரணேன க³ந்தும் ந வட்டதீதி ஸித்³த⁴ம். பவாரேத்வா பன க³ந்தும் வட்டதி பவாரணாய தம்தி³வஸஸன்னிஸ்ஸிதத்தா. தத்த² ந வா ஆக³ச்சே²ய்யாதி அந்தராயேன. ஆசரியோ பன ‘‘ந புன இதா⁴க³ச்சா²மீ’தி நிரபேக்கோ²பி ஸகரணீயோவ க³ந்தும் லப⁴தீதி த³ஸ்ஸனத்த²ம் அகரணீயோ’தி ந வுத்த’’ந்தி வத³தி. ‘‘ஸீஹளதீ³பே கிர சூளபவாரணா நாம அத்தி², தம் பவாரணம் கத்வா யதா²ஸுக²ம் ஸகரணீயா க³ச்ச²ந்தி, பயோக³ஞ்ச த³ஸ்ஸேந்தீ’’தி வுத்தம். ‘‘தத்த² ச² அருணா அந்தோவஸ்ஸே ஹோந்தி, ஏகோ ப³ஹி, தஸ்மா ஸோ தேமாஸம் வுத்தோ² ஹோதீதி அபரே’’தி ச, ‘‘ஆசரியோ ஏவம் ந வத³தீ’’தி ச வுத்தம். ஸப்³ப³த்த² விஹாரம் உபேதீதி அத்தனோ வஸ்ஸக்³கே³ன பத்தக³ப்³ப⁴ம் உபேதீதி போராணா. அஸதியா பன வஸ்ஸம் ந உபேதீதி ஏத்த² ‘‘இமஸ்மிம் விஹாரே இமம் தேமாஸ’’ந்தி அவசனேன. ‘‘அட்ட²கதா²யம் வுத்தரத்திச்சே²த³காரணம் வினா திரோவிஹாரே வஸித்வா ஆக³ச்சி²ஸ்ஸாமீதி க³ச்ச²தோபி வஸ்ஸச்சே²த³’’ந்தி லிகி²தம்.

208. படிஸ்ஸுதோ ஹோதி பச்சி²மிகாயாதி அந்தரா பப்³ப³ஜிதபி⁴க்கு²னா, சி²ன்னவஸ்ஸேன வா படிஸ்ஸுதோ, அஞ்ஞேன பன புரிமம் அனுபக³ந்த்வா பச்சி²மிகாயம் படிஸ்ஸவோ ந காதப்³போ³. ரத்திச்சே²தே³ ஸப்³ப³த்த² வஸ்ஸச்சே²தோ³தி ஸன்னிட்டா²னம் கத்வா வத³ந்தி. கேசி பன ந இச்ச²ந்தி. தம் ஸாதே⁴தும் அனேகதா⁴ பபஞ்சேந்தி. கிம் தேன.

வஸ்ஸூபனாயிகக்க²ந்த⁴கவண்ணனா நிட்டி²தா.