10. கோஸம்ப³கக்க²ந்த⁴கவண்ணனா

கோஸம்ப³கவிவாத³கதா²வண்ணனா

451. ஸுத்தந்திகோதி ஏத்த² கிஞ்சாபி ‘‘வினயத⁴ரோ மாதிகாத⁴ரோ’’தி வுத்தம், உப⁴தோவிப⁴ங்க³ம் பன ஸந்தா⁴ய வுத்தம், ந க²ந்த⁴கபா⁴ணகோ ஹோதி. ஆவுஸோ ஏத்த² ஆபத்தீதி வசனம் உபாதா³ய ‘‘ஸோ தஸ்ஸா ஆபத்தியா ஆபத்திதி³ட்டி² ஹோதீ’’தி வுச்சதி. பச்சா² வினயத⁴ரோ ‘‘வத்து²ம்ஹி ஸதி பமாணம், ந பஞ்ஞத்திய’’ந்தி ஸதிம் படிலபி⁴த்வா தஸ்ஸா ஆபத்தியா ஆபத்திதி³ட்டி² அஹோஸி, தேன வுத்தம் அந்தே ‘‘அஞ்ஞே பி⁴க்கூ² தஸ்ஸா ஆபத்தியா ஆபத்திதி³ட்டி²னோ ஹோந்தீ’’தி.

455. ‘‘யதா² மயா ஞத்தீ’’தி லிக²ந்தி ‘‘பஞ்ஞத்தா’’தி ஏகவசனத்தா.

தீ³கா⁴வுவத்து²கதா²வண்ணனா

458. ‘‘பூ⁴தபுப்³ப³ம், பி⁴க்க²வே, பா³ராணஸியம் ப்³ரஹ்மத³த்தோ’’தி லிக²ந்தி. புராணபோத்த²கேஸு ‘‘பா³ராணஸிய’’ந்தி நத்தி², ‘‘நத்தி²பா⁴வோவ ஸுந்த³ரோ’’தி வத³ந்தி.

பாலிலேய்யகக³மனகதா²வண்ணனா

467. ரக்கி²தவனஸண்டே³தி ஸங்கீ³தித்தே²ரேஹி ஸுவிஞ்ஞேய்யம் கத்வா வுத்தம். ‘‘பாலிலேய்யோதி கா³மோ, தஸ்ஸ வஸேனா’’திபி வத³ந்தி, தம் த⁴ம்மபத³ட்ட²கதா²ய ந விருஜ்ஜ²தி.

அட்டா²ரஸவத்து²கதா²வண்ணனா

473. ந த்வேவ…பே… படிபா³ஹிதப்³ப³ந்தி வதா³மீதி ஏத்த² ஸேனாஸனாரஹஸ்ஸ யோ ஸேனாஸனம் படிபா³ஹதி, தஸ்ஸேவ ஆபத்தி து³க்கடஸ்ஸ. ‘‘கலஹகாரகாதீ³னமேத்த² ஓகாஸோ நத்தீ²திஆதி³கம் ஸங்க⁴ஸ்ஸ கதிகம் வத்வா தம் ந பஞ்ஞாபேந்தஸ்ஸ வா ‘அஹம் பு³த்³தோ⁴’தி பஸய்ஹ அத்தனா அத்தனோ பஞ்ஞாபேத்வா க³ண்ஹந்தம் ‘யுத்தியா க³ண்ஹதா²’தி வத்வா வாரேந்தஸ்ஸ வா தோ³ஸோ நத்தி². இத⁴ கலஹவூபஸமனத்த²ம் ஆக³தானம் கோஸம்பி³கானம்பி ‘யதா²வுட்³ட⁴’ந்தி அவத்வா ‘விவித்தே அஸதி விவித்தம் கத்வாபி தா³தப்³ப³’ந்தி வுத்தத்தா விவித்தம் கத்வா தே³ந்தம் படிபா³ஹேந்தஸ்ஸேவ ஆபத்தீதி கிர அயமத்தோ² பாரிவாஸிகாதீ³னம் விஹாரபரியந்ததா³பனேன ஸாதி⁴தப்³போ³’’தி லிகி²தம்.

ஸங்க⁴ஸாமக்³கீ³கதா²வண்ணனா

475. ‘‘அத² கோ² தே உக்கி²த்தானுவத்தகா பி⁴க்கூ² தம் உக்கி²த்தகம் பி⁴க்கு²ம் ஓஸாரேத்வா யேன உக்கே²பகா பி⁴க்கூ²…பே… தஸ்ஸ வத்து²ஸ்ஸ வூபஸமாய ஸங்க⁴ஸாமக்³கி³ம் கரோமா’’தி வசனம் து³விஞ்ஞேய்யவினிச்ச²யம் வினயலக்க²ணகுஸலஸ்ஸ. விஜ்ஜமானே ஹி காரகஸங்கே⁴ இதரோ ஸங்கோ⁴ ஓஸாரிதும் ந லப⁴தி. ஓஸாரேந்தோ சே, தே பி⁴க்கூ² காரகஸங்கே⁴ன ஸமானலத்³தி⁴கபா⁴வம் பத்தத்தா தேன ஸமானஸம்வாஸகா ஹோந்தி, ததோ உக்கே²பகானம் ச²ந்த³ம் அக்³க³ஹேத்வா ஓஸாரேந்தானம் கம்மம் குப்பதி, தஸ்மா ‘‘தேன ஹி, பி⁴க்க²வே, தம் பி⁴க்கு²ம் ஓஸாரேதா²’’தி (மஹாவ. 474) ப⁴க³வதோ வசனேன உக்கி²த்தானுவத்தகா ஓஸாரேஸும், உதா³ஹு நிஸ்ஸீமம் க³ந்த்வா, உதா³ஹு இதரேஸம் ச²ந்த³ம் க³ஹேத்வா ஓஸாரேஸும், நனு ஏதேஸமஞ்ஞதரேனேத்த² ப⁴விதப்³ப³ம், ந ச பனேதம் ஸப்³ப³க³ண்டி²பதே³ஸு விசாரிதம். அயம் பனேத்த² தக்கோ –

‘‘யஸ்மிம் வத்து²ஸ்மிம் ஸங்கே⁴ன, கதகம்மஸ்ஸ பி⁴க்கு²னோ;

ஸதி தஸ்மிம் ந அஞ்ஞஸ்ஸ, படிப்பஸ்ஸம்ப⁴னம் க²மம்.

‘‘விரமந்தே ததோ தோ³ஸோ, அபி ஸங்கோ⁴ அகாரகோ;

ஓஸாரேதும் அலம் யஸ்மா, காரகோ அனுலோமிகோ’’தி.

477. ‘‘அட்ட² தூ³தங்கா³னி நாம ஸோதா ச ஹோதி, ஸாவேதா ச உக்³க³ஹேதா ச தா⁴ரேதா ச விஞ்ஞாதா ச விஞ்ஞாபேதா ச குஸலோ ச ஸஹிதாஸஹிதத³ஸ்ஸனோ ச அகலஹகாரகோ சாதி ஏதானீ’’தி வுத்தம்.

கோஸம்ப³கக்க²ந்த⁴கவண்ணனா நிட்டி²தா.

மஹாவக்³க³ஸ்ஸ லீனத்த²பகாஸனா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ