8. ஸஹத⁴ம்மிகவக்³கோ³

1. ஸஹத⁴ம்மிகஸிக்கா²பத³வண்ணனா

434. ஸஹத⁴ம்மிகஸிக்கா²பத³ம் உத்தானத்த²மேவ.

2. விலேக²னஸிக்கா²பத³வண்ணனா

438. ஆபத்திஞ்ச ஸதிஸம்மோஸாயாதி ஏத்த² ச-ஸத்³தோ³ கத்தப்³ப³ஞ்ச ந கரோதீதி தீ³பேதி, ந சத்தாரி ஏவாதி வுத்தம் ஹோதி. ரட்டே²கதே³ஸோ ஜனபதோ³. பு³த்³த⁴காலே அரிட்ட²கண்டகா ஸாஸனபச்சத்தி²கா. ‘‘நாலம் அந்தராயாயா’’தி வசனேன ஹி தே ப⁴க³வதோ அஸப்³ப³ஞ்ஞுதம் தீ³பேந்தி. பரினிப்³பு³தே ப⁴க³வதி த³ஸவத்து²தீ³பகா வஜ்ஜிபுத்தகா. தே ஹி வினயஸாஸனபச்சத்தி²கா. பரூபஹாராதி³வாதா³ பன ஸுத்தந்தாபி⁴த⁴ம்மப்பச்சத்தி²கா. கே பன தே? ஏகச்சே மஹாஸங்கி⁴காத³யோ, ந ஸப்³பே³தி தீ³பனத்த²ம் ‘‘பரூபஹாரா…பே… வாதா³’’தி விஸேஸனவசனமாஹ. தத்த² யே குஹகா பாபிச்ச²கா அபூ⁴தம் உல்லபித்வா படிலத்³த⁴வரபோ⁴ஜனானி பு⁴ஞ்ஜித்வா முட்ட²ஸ்ஸதீ நித்³த³ம் ஓக்கமித்வா ஸுக்கவிஸ்ஸட்டி²ம் பத்தா, அஞ்ஞேஹி தம் தி³ஸ்வா ‘‘அத்தி² அரஹதோ ஸுக்கவிஸ்ஸட்டீ²’’தி வுத்தே ‘‘மாரகாயிகா உபஸம்ஹரந்தீ’’தி வத்வா ஜனம் வஞ்சேந்தி. யே ச ஸம்மாபடிபன்னா அகுஹகா, தேபி தம் வசனம் ஸுத்வா கேசி தம்தி³ட்டி²கா ஹோந்தி அதி⁴மானினோ ச. அத்தனோ ஸுக்கவிஸ்ஸட்டி²ம் பஸ்ஸித்வாபி நாதி⁴முச்சந்தி, அனதி⁴க³தே அதி⁴கதஸஞ்ஞினோவ ஹோந்தி. ததா² அத்தி² அரஹதோ அஞ்ஞாணகங்கா²விதரணா நாமகோ³த்தாதீ³ஸு விய ஸச்சேஸு பரவிதரணா பரேஹி பஞ்ஞத்தா நாமானீதி அதி⁴ப்பாயோ யதா²ஸம்ப⁴வம் யோஜேதப்³போ³. தத்த² வினயத⁴ரோ ‘‘அட்டா²னமேதம், பி⁴க்க²வே, அனவகாஸோ, யம் அரஹதோ அஸுசி முச்சேய்ய (கதா². 313; மஹாவ. 353). தி³ட்ட²த⁴ம்மா…பே… அபரப்பச்சயா ஸத்து²ஸாஸனே’’திஆதீ³னி (மஹாவ. 30) ஸுத்தபதா³னி த³ஸ்ஸேத்வா தே ஸாஸனபச்சத்தி²கேஸு நிக்³க³ஹிதம் நிக்³க³ண்ஹாதீதி அதி⁴ப்பாயோ. இதரே ‘‘பரியத்தி மூல’’ந்தி வாதி³னோ. ‘‘பாதிமோக்கே² உத்³தி³ஸ்ஸமானே’’தி நிதா³னவஸேன வுத்தம். ததா²க³தஸ்ஸ விப⁴ங்க³பதா³னி ஸித்³தா⁴னி. ஸித்³தே⁴யேவ கிம் இமஸ்ஸ அங்கா³னி? க³ரஹிதுகாமதா உபஸம்பன்னஸ்ஸ ஸந்திகே ஸிக்கா²பத³விவண்ணனஞ்சாதி.

விலேக²னஸிக்கா²பத³வண்ணனா நிட்டி²தா.

3. மோஹனஸிக்கா²பத³வண்ணனா

444. மோஹனஸிக்கா²பத³ம் உத்தானத்த²மேவ.

4. பஹாரஸிக்கா²பத³வண்ணனா

452. ரத்தசித்தோதி காயஸம்ஸக்³க³ராகே³ன. விஹேடே²துகாமம் பன தி³ஸ்வா ‘‘ஸசே அஹம் இமம் மாரேமி, நத்தி² மே மோக்கோ²’’தி சிந்தேத்வா குபிதோ ஸத்தஸஞ்ஞம் புரேக்க²த்வா பஹாரம் தே³தி, தஸ்ஸ யதா²வத்து²கமேவ.

பஹாரஸிக்கா²பத³வண்ணனா நிட்டி²தா.

5. தலஸத்திகஸிக்கா²பத³வண்ணனா

456. ‘‘காயம் வா காயபடிப³த்³த⁴ம் வா’’தி (பாசி. 456) வசனதோ காயாதீ³ஸு யம் உச்சாரேதி, தம் தலம் நாம. தலமேவ தலஸத்திகம். போத²னஸமத்த²ட்டே²ன ஸத்திகந்தி ஏகே. தம் ‘‘உப்பலபத்தம்பீ’’தி இமினா நியமேதி. ஏவம் குபிதா ஹி கோபவஸேன போத²னாஸமத்த²தம் அவிசாரேத்வா யம் கிஞ்சி ஹத்த²க³தம் படிக்கி²பந்தி, ஸுக²ஸம்ப²ஸ்ஸம்பி ஹோது, பாசித்தியமேவ. யஸ்மா பஹரிதுகாமதாய பஹடே புரிமேன பாசித்தியம். கேவலம் உச்சாரேதுகாமதாய உக்³கி³ரணமத்தே கதே இமினா பாசித்தியம். இமினா பன விரஜ்ஜி²த்வா பஹாரோ தி³ன்னோ, தஸ்மா ந பஹரிதுகாமதாய தி³ன்னத்தா து³க்கடம். கிமித³ம் து³க்கடம் பஹாரபச்சயா, உதா³ஹு உக்³கி³ரணபச்சயாதி? பஹாரபச்சயா ஏவ து³க்கடம். புரிமம் உக்³கி³ரணபச்சயா பாசித்தியந்தி ஸது³க்கடம் பாசித்தியம் யுஜ்ஜதி. புரிமஞ்ஹி உக்³கி³ரணம், பச்சா² பஹாரோ. ந ச பச்சி²மபஹாரம் நிஸ்ஸாய புரிமம் உக்³கி³ரணம் அனாபத்திவத்து²கம் ப⁴விதுமரஹதீதி நோ தக்கோதி ஆசரியோ. ‘‘தேன பஹாரேன ஹத்தா²தீ³ஸு யம் கிஞ்சி பி⁴ஜ்ஜதி, து³க்கடமேவா’’தி இமினாபி பஹாரபச்சயா து³க்கடம். உக்³கி³ரணம் யதா²வத்து²கமேவாதி ஸித்³த⁴ம், ஸுட்டு² வீமம்ஸிதப்³ப³ம். ‘‘திரச்சா²னாதீ³னம் அஸுசிகரணாதீ³னி தி³ஸ்வா குஜ்ஜி²த்வாபி உக்³கி³ரந்தஸ்ஸ மோக்கா²தி⁴ப்பாயோ ஏவா’’தி வத³ந்தி.

தலஸத்திகஸிக்கா²பத³வண்ணனா நிட்டி²தா.

6. அமூலகஸிக்கா²பத³வண்ணனா

462. உபஸம்பன்னே அனுபஸம்பன்னஸஞ்ஞீ அமூலகேன ஸங்கா⁴தி³ஸேஸேனாதி ஸுக்கவிஸ்ஸட்டி²காயஸம்ஸக்³கா³தி³னா ஸங்கா⁴தி³ஸேஸாபத்தியா வத்து²னாதி வேதி³தப்³ப³ம். ந ஹி அனுபஸம்பன்னஸ்ஸ ஸங்கா⁴தி³ஸேஸாபத்தி நாம அத்தி².

அமூலகஸிக்கா²பத³வண்ணனா நிட்டி²தா.

7. ஸஞ்சிச்சஸிக்கா²பத³வண்ணனா

468. ஊனவீஸதிவஸ்ஸோ மஞ்ஞேதி ஏத்த² ஸயம் ஸஞ்ஞாய ததா² அமஞ்ஞந்தோ குக்குச்சுப்பாத³னத்த²ம் ‘‘மஞ்ஞே’’தி வத³ந்தோ கிம் முஸாவாதே³ன காரேதப்³போ³தி? ந ஸியா அங்க³ஸம்பத்தியா, ந ச கேவலம் ‘‘மஞ்ஞே’’தி இமினா நியமதோ அங்க³ஸம்பத்தி ஹோதி. பரமத்த²விஹிதம் கத்த²சி ஹோதி. ‘‘உத³கம் மஞ்ஞே ஆதி³த்த’’ந்திஆதி³ம்ஹி பரோ குக்குச்சம் உப்பாதே³து வா, மா வா, தம் அப்பமாணந்தி மாதிகாட்ட²கதா²யம் (கங்கா². அட்ட². ஸஞ்சிச்சஸிக்கா²பத³வண்ணனா) ‘‘குக்குச்சுப்பாத³ன’’ந்தி தஸ்ஸ அதி⁴ப்பாயவஸேன வுத்தந்தி.

ஸஞ்சிச்சஸிக்கா²பத³வண்ணனா நிட்டி²தா.

8. உபஸ்ஸுதிஸிக்கா²பத³வண்ணனா

473. இமேஸம் ஸுத்வாதி ஏத்த² ‘‘வசன’’ந்தி பாட²ஸேஸோ. ஏகபரிச்சே²தா³னீதி ஸியா கிரியா ஸியா அகிரியாதி இமினா நயேன ஏகபரிச்சே²தா³னி. ஏத்த² கிஞ்சாபி அஞ்ஞவாத³கபச்சயாபத்தி கிரியா ச விஹேஸகபச்சயாபத்தி அகிரியா ச, தது³ப⁴யம் பன ஏகஸிக்கா²பத³ந்தி கத்வா தம் அஞ்ஞவாத³கஸங்கா²தம் ஸிக்கா²பத³ம் ஸியா கிரியா பட²மஸ்ஸ வஸேன, ஸியா அகிரியா து³தியஸ்ஸ வஸேனாதி ஏவமத்தோ² த³ட்ட²ப்³போ³.

உபஸ்ஸுதிஸிக்கா²பத³வண்ணனா நிட்டி²தா.

9. கம்மபடிபா³ஹனஸிக்கா²பத³வண்ணனா

474. ‘‘த⁴ம்மிகானம் கம்மான’’ந்தி (பாசி. 475) வசனதோ ஏகச்சே பி⁴க்கூ² த⁴ம்மிகானம் கம்மானம் ‘‘ச²ந்த³ம் த³ம்மீ’’தி ச²ந்த³ம் தே³ந்தி, தம் தேஸம் மதிமத்தமேவ, ந படிபத்தி. அத⁴ம்மம் நிஸ்ஸாய கி²ய்யதி, தம் வா உக்கோடேதி, அனாபத்தி நேவ ஹோதீதி? ந, ததா² ச²ந்த³தா³னகாலே அகத்வா பச்சா² அத⁴ம்மகம்மகி²ய்யனாதி³பச்சயா அனாபத்திவாரே வுத்தத்தா. அத⁴ம்மேன வா வக்³கே³ன வா ந கம்மாரஹஸ்ஸ வா கம்மகரணபச்சயா ஆபத்திமோக்க²கரணதோ அவிஸேஸமேவ ததா²வசனந்தி சே? ந, ச²ந்த³தா³னகாலே அத⁴ம்மகம்மகரணானுமதியா அபா⁴வதோ, காரகஸ்ஸேவ வஜ்ஜப்பஸங்க³தோ ச. க³ணஸ்ஸ து³க்கடந்தி சே? பாரிஸுத்³தி⁴ச²ந்த³தா³யகாவ தே, ந க³ணோ அகம்மப்பத்தத்தா, பரிவாரேபி (பரி. 482 ஆத³யோ) கம்மவக்³கே³ கம்மப்பத்தச²ந்த³தா³யகா விஸும் வுத்தா. ததா²பி அத⁴ம்மகம்மஸ்ஸ ச²ந்தோ³ ந தா³தப்³போ³ தே³ந்தே அகப்பியானுமதிது³க்கடதோ. தத்த² ஹி யோஜனது³க்கடதோ ந முச்சந்தீதி நோ தக்கோதி ஆசரியோ.

கம்மபடிபா³ஹனஸிக்கா²பத³வண்ணனா நிட்டி²தா.

10. ச²ந்த³ம்அத³த்வாக³மனஸிக்கா²பத³வண்ணனா

481. ஸன்னிபாதம் அனாக³ந்த்வா சே ச²ந்த³ம் ந தே³தி, அனாபத்தீதி ஏகே. து³க்கடந்தி ஏகே த⁴ம்மகம்மந்தராயகரணாதி⁴ப்பாயத்தா. ஸங்க⁴மஜ்ஜே² ச²ந்த³ம் தா³தும் லப⁴தீதி கேசி. தி³ன்னச²ந்தே³ ஸங்க⁴மஜ்ஜ²ம் பவிஸித்வா புன க³தேபி ச²ந்தோ³ ந படிப்பஸ்ஸம்பே⁴ய்யாதி சே? படிப்பஸ்ஸம்ப⁴தி. கஸ்மா? ‘‘அஹத்த²பாஸோ ச²ந்தா³ரஹோ’’திஆதீ³ஹி விருஜ்ஜ²னதோ. பாளியம் பன தா³துகாமதாய ஹத்த²பாஸம் அதிக்கமந்தம் ஸந்தா⁴ய வுத்தந்தி கேசி.

ச²ந்த³ம்அத³த்வாக³மனஸிக்கா²பத³வண்ணனா நிட்டி²தா.

11. து³ப்³ப³லஸிக்கா²பத³வண்ணனா

484-5. அதா³ஸீதி அபலோகேத்வா அதா³ஸி. பி⁴க்கூ²தி ஏத்த² தே ச²ப்³ப³க்³கி³யா அத்தானம் பரிவஜ்ஜயித்வா ‘‘ஸங்கோ⁴’’தி அவத்வா ‘‘பி⁴க்கூ²’’தி ஆஹம்ஸு. பரிணாமேந்தீதி நேந்தி. தத்த² லாபோ⁴தி பது³த்³தா⁴ரகரணம் இத⁴ அனதி⁴ப்பேதஸ்ஸபி யஸ்ஸ கஸ்ஸசி அத்து²த்³தா⁴ரவஸேன லாப⁴தீ³பனத்த²ம். சீவரமேவ ஹி இதா⁴தி⁴ப்பேதம், தேனேவ ‘‘அஞ்ஞம் பரிக்கா²ரம் தி³ன்னம் கீ²யதி, ஆபத்தி து³க்கடஸ்ஸா’’தி வுத்தம். தி³ன்னந்தி ச பரிக்கா²ரந்தி ச பு⁴ம்மத்தே² உபயோக³வசனம்.

து³ப்³ப³லஸிக்கா²பத³வண்ணனா நிட்டி²தா.

12. பரிணாமனஸிக்கா²பத³வண்ணனா

491. ஞாதகம்பி பரஸ்ஸ தா³துகாமம் அஞ்ஞஸ்ஸ தா³பேதி, ஆபத்தி ஏவ. ஸப்³ப³த்த² ஆபுச்சி²த்வா தா³துகாமம் யதா²ஸுக²ம் விசாரேதும் லப⁴தி.

பரிணாமனஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன ஸஹத⁴ம்மிகவக்³கோ³ அட்ட²மோ.