9. ரதனவக்³கோ³

1. அந்தேபுரஸிக்கா²பத³வண்ணனா

494-7. யதா² ப⁴க³வந்தம் பயிருபாஸதி, ஏவமாகாரேன நாரஹதாயம் புரிஸோ பாபோ ஹோதும், ந ஹோதி பாபோதி அத்தோ², காரணத்த²ம் வா. தந்தி நிபாதமத்தம், யதோதி வா அத்தோ². ஹத்தி²ஸம்மத்³த³ந்தி ஸங்கா⁴டஸம்மத்³தோ³, அக்கமனம் சுண்ணதாதி அத்தோ².

498. ரதனம் நாம அக்³க³மஹேஸீ, ததா²பி இத⁴ அஞ்ஞாபி தே³விகோ³த்தா ந ரக்க²தி, அனாபத்திவாரே ‘‘ந மஹேஸீ ஹோதீ’’தி வசனாபா⁴வதோ. ஸசே க²த்தியோவ ஹோதி, நாபி⁴ஸித்தோ. அபி⁴ஸித்தோயேவ ஹோதி, ந க²த்தியோ ரக்க²தீதி ஆசரியோ. அனாபத்திவாரே மாதிகாட்ட²கதா²யம் அங்க³பா⁴வேன ச வுத்தத்தா அபி⁴ஸித்தபா⁴வோவபமாணம். ஸேஸம் உக்கட்ட²பரிச்சே²தோ³தி ஏகே.

500-501. ‘‘ந ஸயனிக⁴ரே ஸயனிக⁴ரஸஞ்ஞீ’’தி திகச்சே²தோ³பி ஏத்த² லப்³ப⁴தி. ந ஸயனிக⁴ரம் நாம அபரிக்கி²த்தருக்க²மூலாதி³.

அந்தேபுரஸிக்கா²பத³வண்ணனா நிட்டி²தா.

2. ரதனஸிக்கா²பத³வண்ணனா

504. ‘‘அதி⁴வாஸேந்து க³ஹபதினோ ப⁴த்த’’ந்தி ச ‘‘மே க³ஹபதினோ’’தி ச அத்தி².

506. குருந்தி³வசனேன க⁴ரேபி யதி³ பி⁴க்கூ² ஆஸங்கந்தி, தத்த² ட²த்வா ஆசிக்கி²தப்³ப³ந்தி வுத்தம் ஹோதி. பதிரூபாதி ‘‘ரதனஸம்மதே பம்ஸுகூலக்³க³ஹணம் வா ரதனே நிருஸ்ஸுக்கக³மனம் வா’’தி லிகி²தம். ‘‘தாவகாலிகவஸேனபி அனாமாஸம் படிக்³க³ண்ஹிதும் ந லப⁴தீ’’தி வத³ந்தி. ஸமாத³பேத்வாதி யாசித்வா ‘‘உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி (ஜா. 1.7.59) வுத்தனயேன.

ரதனஸிக்கா²பத³வண்ணனா நிட்டி²தா.

3. விகாலகா³மப்பவிஸனஸிக்கா²பத³வண்ணனா

511-2. அஹினா ட³ட்ட²வத்து²ம்ஹி ஸோ பி⁴க்கு² ஸந்தம் பி⁴க்கு²ம் அனாபுச்சா² க³தோ, தஸ்ஸ குக்குச்சம் உத³பாதி³. அதி³ன்னாதா³னே வுத்தனயேனாதி கா³மோ கா³மூபசாரோதி இத³ம் ஸந்தா⁴ய வுத்தம்.

விகாலகா³மப்பவிஸனஸிக்கா²பத³வண்ணனா நிட்டி²தா.

4. ஸூசிக⁴ரஸிக்கா²பத³வண்ணனா

517. தந்தி பே⁴த³னகம். அஸ்ஸாதி பாசித்தியஸ்ஸ பட²மம் பே⁴த³னகம் கத்வா பச்சா² தே³ஸேதப்³ப³த்தா. ஏஸ நயோ இதரேஸுபி.

520. வாஸிஜடேதி வாஸித³ண்ட³கே.

ஸூசிக⁴ரஸிக்கா²பத³வண்ணனா நிட்டி²தா.

5. மஞ்சஸிக்கா²பத³வண்ணனா

521-2. ‘‘உச்சே மஞ்சே’’தி ச ‘‘உச்சா மஞ்சே’’தி ச கத்த²சி. ஆயதோதி வித்த²தோ. அட்ட²ங்கு³லபாத³கந்தி பா⁴வனபும்ஸகம், அட்ட²ங்கு³லப்பமாணம் பாத³கம் வா.

மஞ்சஸிக்கா²பத³வண்ணனா நிட்டி²தா.

6. தூலோனத்³த⁴ஸிக்கா²பத³வண்ணனா

528. போடகிதூலந்தி யம் கிஞ்சி திணதூலம். படிலாபே⁴ன உத்³தா³லேத்வா பாசித்தியம் தே³ஸேதப்³ப³ந்தி ஏத்த² கிஞ்சாபி படிலாப⁴மத்தேனேவ பாசித்தியந்தி விய தி³ஸ்ஸதி, பரிபோ⁴கே³யேவ பன ஆபத்தி த³ட்ட²ப்³பா³, ‘‘அஞ்ஞேன கதம் படிலபி⁴த்வா பரிபு⁴ஞ்ஜதி, ஆபத்தி து³க்கடஸ்ஸா’’தி வசனம் ஏத்த² ஸாத⁴கம்.

தூலோனத்³த⁴ஸிக்கா²பத³வண்ணனா நிட்டி²தா.

7. நிஸீத³னஸிக்கா²பத³வண்ணனா

531. கிஞ்சாபி நிஸீத³னஸ்ஸ ஜாதி ந தி³ஸ்ஸதி ஏத்த², ததா²பி சீவரக்க²ந்த⁴கே அனுஞ்ஞாதத்தா, ‘‘நவ சீவரானி அதி⁴ட்டா²தப்³பா³னீ’’தி ஏத்த² ச பரியாபன்னத்தா சீவரஜாதியேவஸ்ஸ ஜாதீதி வேதி³தப்³பா³. ‘‘ஸந்த²தஸதி³ஸம் ஸந்த²ரித்வாதி ஸத³ஸ’’ந்தி புப்³பே³ வுத்தனிஸீத³னஸந்த²தத்தா உபமேதி. லாபே⁴ ஸத³ஸம், அலாபே⁴ அத³ஸம்பி வட்டதீதி ஏகே, தம் ந யுத்தம். ‘‘நிஸீத³னம் நாம ஸத³ஸம் வுச்சதீ’’தி தஸ்ஸ ஸண்டா²னனியமனதோ.

நிஸீத³னஸிக்கா²பத³வண்ணனா நிட்டி²தா.

8. கண்டு³படிச்சா²தி³ஸிக்கா²பத³வண்ணனா

539. யதி³ கண்டு³படிச்சா²தி³ நாம அதோ⁴னாபி⁴ உப்³ப⁴ஜாணுமண்ட³லா உப்பன்னகண்டு³பீளகாதி³படிச்சா²தி³கா அதி⁴ப்பேதா, தஸ்ஸ ஸுக³தஸ்ஸ ஸுக³தவித³த்தி²யா தீ³க⁴ஸோ சதஸ்ஸோ வித³த்தி²யோ திரியம் த்³வேதி இத³ம்பி அதிமஹந்தம் பமாணம் தி³ஸ்ஸதி. ஸப்³போ³ ஹி புரிஸோ அத்தனோ அத்தனோ வித³த்தி²யா ஸத்தவித³த்தி²கோ ஹோதி, ஸுக³தஸ்ஸ ச ஏகாவித³த்தி² மஜ்ஜி²மஸ்ஸ புரிஸஸ்ஸ திஸ்ஸோ வித³த்தி²யோ ஹோந்தி, தஸ்மா கண்டு³படிச்சா²தி³ பகதிபுரிஸஸ்ஸ பமாணம் ஆபஜ்ஜதி திரியம், தீ³க⁴ஸோ பன தி³கு³ணம் ஆபஜ்ஜதீதி. ஆபஜ்ஜது, உக்கட்ட²பரிச்சே²தோ³ தஸ்ஸா, சே இச்ச²தி, ஸப்³ப³ம்பி ஸரீரம் படிச்சா²தே³ஸ்ஸதி, ஸப்³ப³ஸரீரக³தஸங்கா⁴டி விய ப³ஹுகு³ணம் கத்வா நிவாஸேதுகாமோ நிவாஸேஸ்ஸதீதி அயம் ப⁴க³வதோ அதி⁴ப்பாயோ ஸியா.

கண்டு³படிச்சா²தி³ஸிக்கா²பத³வண்ணனா நிட்டி²தா.

9. வஸ்ஸிகஸாடிகஸிக்கா²பத³வண்ணனா

542. வஸ்ஸிகஸாடிகாபி உக்கட்ட²படிச்சே²த³வஸேன அனுஞ்ஞாதா. வஸ்ஸகாலே கேசி ஸங்கா⁴டிபரிபோ⁴கே³னேவ பரிபு⁴ஞ்ஜிஸ்ஸந்தீதி அயம் ப⁴க³வதோ அதி⁴ப்பாயோ ஸியா. கிஞ்சாபி இமினா தக்கேன அனுஞ்ஞாதா, ‘‘அப்பமாணிகாயோ கண்டு³படிச்சா²தி³யோ தா⁴ரேந்தி, வஸ்ஸிகஸாடிகாயோ தா⁴ரேந்தீ’’தி இமஸ்மிம் வத்து²ஸ்மிம் பஞ்ஞத்தத்தா பன அஞ்ஞதா² புண்ணபரிச்சே²த³தோ அதி⁴கப்பமாணாயோ தே பி⁴க்கூ² தா⁴ரேஸுந்தி கத்வா ஏதபரமதா தாஸம் அனுஞ்ஞாதாதி வேதி³தப்³பா³. ஏஸேவ நயோ த³ஸமேபி.

வஸ்ஸிகஸாடிகஸிக்கா²பத³வண்ணனா நிட்டி²தா.

10. நந்த³த்தே²ரஸிக்கா²பத³வண்ணனா

551. தத்த² பி⁴ஸிம் வா பி³ப்³போ³ஹனம் வா கரோதீதி தீ³க⁴ஸோ ப³ஹூனம் பி⁴க்கூ²னம் ஸாதா⁴ரணத்த²ம் கரோதீதி யுஜ்ஜதி.

நந்த³த்தே²ரஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன ரதனவக்³கோ³ நவமோ.

பாசித்தியகண்ட³வண்ணனா நிட்டி²தா.

6. பாடிதே³ஸனீயகண்டோ³

1. பட²மபாடிதே³ஸனீயஸிக்கா²பத³வண்ணனா

553-5. ‘‘படிதே³ஸேதப்³பா³காரத³ஸ்ஸன’’ந்தி அட்ட²கதா²யம் வுத்தத்தா பாளியம் ஆக³தவஸேனேவ ஆபத்தி தே³ஸேதப்³பா³, ந அஞ்ஞதா². ‘‘அந்தரக⁴ரே அந்தரக⁴ரஸஞ்ஞீ’’திஆதி³னா ச ‘‘கா²த³னீயபோ⁴ஜனீயே அகா²த³னீயஅபோ⁴ஜனீயஸஞ்ஞீ’’திஆதி³னா ச ‘‘பி⁴க்கு²னியா அபி⁴க்கு²னிஸஞ்ஞீ’’திஆதி³னா ச நயேன அபரேபி தயோ திகச்சே²தா³ யோஜேத்வா த³ஸ்ஸேதப்³பா³.

பட²மபாடிதே³ஸனீயஸிக்கா²பத³வண்ணனா நிட்டி²தா.

2. து³தியபாடிதே³ஸனீயஸிக்கா²பத³வண்ணனா

559. ‘‘நிமந்திதா பு⁴ஞ்ஜந்தீதி பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதா பு⁴ஞ்ஜந்தீ’’தி கிஞ்சாபி வுத்தம், அத² கோ² அகப்பியனிமந்தனேன நிமந்திததா ஏத்த² ந அங்க³ம், மாதிகாட்ட²கதா²யம் வா இத⁴ வா அனாபத்திவாரே லேஸாபா⁴வதோ, தஸ்மா ‘‘நிமந்திதா’’தி பத³ஸ்ஸ அத்தோ² புப்³பே³ ஆசிண்ணவஸேனேவ வுத்தோ. அபரேபி தயோ திகச்சே²தா³ யோஜேத்வா த³ஸ்ஸேதப்³பா³ பத³பா⁴ஜனே வுத்தத்தாதி வேதி³தப்³ப³ம். யதா² ததா² ஹி பு⁴ஞ்ஜந்தானம் தாதி³ஸம் பி⁴க்கு²னிம் அவாரேந்தானம் பாடிதே³ஸனீயமேவ. ‘‘ஏஸா வோஸாஸதி நாம, வோஸாஸந்தீ’’தி ச து³விதோ⁴ பாடோ². ‘‘அஜ்ஜோ²ஹாரே அஜ்ஜோ²ஹாரே’’தி வசனேன புன ‘‘கா³ரய்ஹம் ஆவுஸோ த⁴ம்ம’’ந்தி ஏகவசனம் விருத்³த⁴ந்தி. பட²மம் அஜ்ஜோ²ஹாரேயேவ ஆபன்னம் ஸந்தா⁴ய வுத்தம், ததா² அஞ்ஞத்ராபி ஆக³ச்ச²தி ‘‘ஆபஜ்ஜிம்ஹா’’தி வசனதோ. ஏகேன ப³ஹூனம்பி வட்டதீதி கேசி, தம் ந ஸுந்த³ரம். ‘‘தேஹி பி⁴க்கூ²ஹீ’’திஆதி³னா பாடே² வுத்தத்தாதி மம தக்கோ. ஏகேன ஸஹேவ ‘‘அஹம் ஆபஜ்ஜி’’ந்திபி வத்தப்³ப³ந்தி ஏகேன த்³வீஹி தீஹி தே³ஸேதப்³ப³தோ, ஸப்³பே³ஹி ஏவம் வத்தும் வட்டதி. ‘‘ஆபஜ்ஜிம்ஹாதி ஸஹேவா’’தி வத³ந்தி. ஏகேன சே அவாரிதோ, ‘‘அஹம், ஆவுஸோ, கா³ரய்ஹம் த⁴ம்மம் ஆபஜ்ஜி’’ந்திபி வத்தப்³ப³ம்.

து³தியபாடிதே³ஸனீயஸிக்கா²பத³வண்ணனா நிட்டி²தா.

562-570. ததியசதுத்த²ஸிக்கா²பதா³னி உத்தானத்தா²னியேவ.

பாடிதே³ஸனீயகண்ட³வண்ணனா நிட்டி²தா.

7. ஸேகி²யகண்டோ³

1. பரிமண்ட³லவக்³க³வண்ணனா

576. ‘‘ஸிக்கி²தஸிக்கே²னாதி சதூஹி மக்³கே³ஹீ’’தி வுத்தம். யஸ்மா அட்ட²ங்கு³லமத்தம் ஓதாரேத்வா நிவத்த²மேவ நிஸின்னஸ்ஸ சதுரங்கு³லமத்தம் ஹோதி, தஸ்மா உபோ⁴பேதே அட்ட²கதா²வாதா³ ஏகபரிச்சே²தா³, ‘‘அட்³ட⁴தேய்யஹத்த²’’ந்தி ஸுகு²மம், ஏகபத்தம் வா ஸந்தா⁴ய வுத்தம். தஞ்ஹி யதா²டா²னேன திட்ட²தி. து³பட்டம் ஸந்தா⁴ய ‘‘த்³விஹத்த²ப்பமாணம்பீ’’தி வுத்தந்தி உபதிஸ்ஸத்தே²ரோ. ஏகபட்டம், த்³விபட்டம் வா ஹேட்டி²மபரிச்சே²தே³ன ‘‘த்³விஹத்த²ப்பமாண’’ந்தி வுத்தந்தி வேதி³தப்³ப³ம். வுத்தஞ்ஹி நிஸ்ஸக்³கி³யஅட்ட²கதா²யம் ‘‘திரியம் த்³விஹத்தோ²பி வட்டதீ’’தி, தஞ்ச கோ² அலாபே⁴ ஏவ ‘‘அலாபே⁴ திரியம் த்³விஹத்த²ப்பமாணம்பி வட்டதீ’’தி வுத்தத்தா. இத³ம் ஸப்³ப³ம் அதி⁴ட்டா²னுபக³ம் ஸந்தா⁴ய வுத்தம். விருத்³த⁴ம் தி³ஸ்வா ஸஜ்ஜேதப்³ப³ம். நோ சே ஸஜ்ஜேதி, து³க்கடம். ஸசித்தகம் பண்ணத்திவிஜானனசித்தேனேவ ‘‘அனாத³ரியம் படிச்சா’’தி வுத்தத்தா, ந வத்து²விஜானனசித்தேன ‘‘இத³மேவம் கத’’ந்தி ஜானதோபி ஆபத்தியா அபா⁴வதோ. பு²ஸ்ஸதே³வத்தே²ரவாதோ³பி ஏகேன பரியாயேன யுஜ்ஜதி. ததா² உபதிஸ்ஸத்தே²ரவாதோ³பி. பஞ்ஞத்தேபி ஸிக்கா²பதே³ அபஞ்ஞத்தேபி யம் பகதியா வஜ்ஜம், தம் லோகவஜ்ஜம். இத³ம் பன பஞ்ஞத்தேயேவ வஜ்ஜம், நாபஞ்ஞத்தே, தஸ்மா இதரலோகவஜ்ஜேன அஸதி³ஸத்தா ந லோகவஜ்ஜம். பண்ணத்திதோ பட்டா²ய வஜ்ஜதோ பண்ணத்திவஜ்ஜம். அனாத³ரியசித்தேனேவ ஆபஜ்ஜிதப்³ப³த்தா ஸசித்தகம், தஸ்ஸ சித்தஸ்ஸ திவேத³னத்தா திவேத³னம். யஸ்மா அனாத³ரியசித்ததா நாம கேவலம் அகுஸலமேவ, தஞ்ச பகதியா வஜ்ஜம், தஸ்மா இத³ம் லோகவஜ்ஜம். ஸஞ்சிச்ச வீதிக்கமனம் நாம தோ³மனஸ்ஸிகஸ்ஸேவ ஹோதீதி து³க்க²வேத³னம். க³ண்டி²பதே³ பன ‘‘பாணாதிபாதாதி³ விய நிவாஸனாதி³தோ³ஸோ லோகக³ரஹிதோ ந ஹோதீதி பண்ணத்திவஜ்ஜந்தி பு²ஸ்ஸதே³வத்தே²ரோ’’தி லிகி²தம்.

577. விஹாரேபீதி பு³த்³து⁴பட்டா²னாதி³காலே, தஸ்மா ‘‘பாருபிதப்³ப³’’ந்தி உத்தராஸங்க³கிச்சவஸேன வுத்தம். பட²மது³தியஸிக்கா²பதே³ஸு பரிளாஹாதி³பச்சயா கப்பதி, ந அந்தரக⁴ரபடிஸம்யுத்தேஸு.

582. ‘‘ஏகஸ்மிம் பன டா²னே ட²த்வா’’தி ஏத்த² ‘‘க³ச்ச²ந்தோபி பரிஸ்ஸயாபா⁴வம் ஓலோகேதும் லப⁴தியேவ. ததா² கா³மே பூஜ’’ந்தி லிகி²தம், தம் பன ‘‘ஏகஸ்மிம் டா²னே ட²த்வா’’தி வுத்தத்தா தாதி³ஸம் அந்தராயம் ஸந்தா⁴ய வுத்தந்தி வேதி³தப்³ப³ம்.

பரிமண்ட³லவக்³க³வண்ணனா நிட்டி²தா.

2. உஜ்ஜக்³கி⁴கவக்³க³வண்ணனா

586. ஹஸனீயஸ்மிந்தி ஹேத்வத்தே² பு⁴ம்மம், ஹஸிதப்³ப³வத்து²காரணாதி அத்தோ². அந்தரக⁴ரே உச்சாஸத்³தே³ன அனுமோத³னாதி³ம் கரோந்தஸ்ஸ அனாபத்தி கிர. ததா² ஹி மஹிந்த³த்தே²ரோபி ஹத்தி²ஸாலாதீ³ஸு மஹாஜனஸ்ஸ கதே²ஸி.

591. கேசி பி⁴க்கூ² ‘‘பரிக்கா²ரட்ட²பனமத்தேன வாஸூபக³தோ ஹோதீ’’தி வத³ந்தி, தம் தேஸம் மதிமத்தமேவ. பி⁴க்கு²னியோ சே வாஸூபகா³ ஹோந்தி, பி⁴க்கு²னுபஸ்ஸயோவ கப்பியபூ⁴மி. ‘‘யத்த² பி⁴க்கு²னியோ ஏகரத்தம்பி வஸந்தி, அயம் பி⁴க்கு²னுபஸ்ஸயோ’’தி (பாசி. 161) வசனதோ தாஸம் ஸமீபம் வா தாஹி க³ஹிதவாஸாகா³ரம் வா ‘‘க³ச்சா²மீ’’தி க³ச்ச²தோ யதா²ஸுக²ம் க³ந்தும் வட்டதி. ந ஹி தாவதா தம் க⁴ரம் அந்தரக⁴ரஸங்க்²யம் க³ச்ச²தீதி நோ தக்கோதி ஆசரியோ.

உஜ்ஜக்³கி⁴கவக்³க³வண்ணனா நிட்டி²தா.

3. க²ம்ப⁴கதவக்³க³வண்ணனா

604. ஸூபோ பத்தப்பமாணவண்ணனாயம் வுத்தாகாரோ. ஓலோணீ வுச்சதி குதி⁴தம், கோ³ரஸதோ பூரா தூ²பிதோதி அத்தோ².

605. ஹேட்டா² ஓரோஹதீதி ஏத்த² ‘‘ஓரோஹனப்பமாணே ஸதி ஏகதே³ஸே தூ²பீகதேபி அனாபத்தீ’’தி வத³ந்தி. ‘‘பத்தஸ்ஸ பன ஹேட்டா² ச உபரி ச பது³மினிபண்ணாதீ³ஹி படிச்சா²தே³த்வா ஓத³ஹந்தியா லத்³த⁴ம் நாம வட்டதீ’’தி ச வத³ந்தி. ஏத்த² ‘‘யஸ்மா ‘ஸமதித்திகோ பிண்ட³பாதோ படிக்³க³ஹேதப்³போ³’தி வசனம் பிண்ட³பாதோ ஸமபுண்ணோ படிக்³க³ஹேதப்³போ³தி தீ³பேதி, தஸ்மா அத்தனோ ஹத்த²க³தே பத்தே பிண்ட³பாதோ தி³ய்யமானோ தூ²பீகதோபி சே ஹோதி, வட்டதீதி தீ³பேதி. ‘தூ²பீகதம் பிண்ட³பாதம் படிக்³க³ண்ஹாதி, ஆபத்தி து³க்கடஸ்ஸா’தி ஹி வசனம் பட²மம் தூ²பீகதம் பிண்ட³பாதம் பச்சா² படிக்³க³ண்ஹதோ, ஆபத்தீதி தீ³பேதி. பத்தேன படிக்³க³ண்ஹதோ சேபி தூ²பீகதம் ஹோதி, வட்டதி அதூ²பீகதஸ்ஸ படிக்³க³ஹிதத்தா. பயோகோ³ பன நத்தி² அஞ்ஞத்ர புப்³ப³தே³ஸா’’தி ச ‘‘ஸமதித்திகந்தி வா பா⁴வனபும்ஸக’’ந்தி ச வத³ந்தி, தஸ்மா விசாரேத்வா க³ஹேதப்³ப³ம்.

க²ம்ப⁴கதவக்³க³வண்ணனா நிட்டி²தா.

4. ஸக்கச்சவக்³க³வண்ணனா

609. ஸூபோத³னவிஞ்ஞத்திஸிக்கா²பதே³ ‘‘ஸூபோ நாம த்³வே ஸூபா’’தி ந வுத்தம் ஸூபக்³க³ஹணேன பணீதபோ⁴ஜனேஹி அவஸேஸானம் ஸப்³ப³போ⁴ஜனானம் ஸங்க³ண்ஹனத்த²ம். அனாபத்திவாரே சஸ்ஸ ‘‘ஞாதகானம் பவாரிதானம் அஞ்ஞஸ்ஸத்தா²ய அத்தனோ த⁴னேனா’’தி இத³ம் அதி⁴கம். கத்த²சி போத்த²கே ‘‘அனாபத்தி அஸஞ்சிச்ச அஸதியா அஜானந்தஸ்ஸ கி³லானஸ்ஸ ஆபதா³ஸூ’’தி ஏத்தகமேவ வுத்தம், தம் ந, ‘‘ஸமஸூபகம் பிண்ட³பாதம் பு⁴ஞ்ஜிஸ்ஸாமீ’’தி இமஸ்ஸ அனாபத்திவாரே ‘‘அஞ்ஞஸ்ஸத்தா²யா’’தி கத்த²சி லிகி²தம், தஞ்ச பமாத³வஸேன லிகி²தம். ‘‘முகே² பக்கி²பித்வா புன விப்படிஸாரீ ஹுத்வா ஓகி³லிதுகாமஸ்ஸபி ஸஹஸா சே பவிஸதி, ஏத்த² ‘அஸஞ்சிச்சா’தி வுச்சதி. விஞ்ஞத்தம்பி அவிஞ்ஞத்தம்பி ஏகஸ்மிம் டா²னே டி²தம் ஸஹஸா அனுபதா⁴ரேத்வா க³ஹேத்வா பு⁴ஞ்ஜந்தோ ‘அஸதியா’தி வுச்சதீ’’தி லிகி²தம், அனாபத்திவாரே ஏகச்சேஸு போத்த²கேஸு ‘‘ரஸரஸேதி லிகி²தம், தம் க³ஹேதப்³ப³’’ந்தி வுத்தம்.

ஸக்கச்சவக்³க³வண்ணனா நிட்டி²தா.

5. கப³ளவக்³க³வண்ணனா

618. ‘‘ஸப்³ப³ம் ஹத்த²’’ந்தி வசனதோ ஏகதே³ஸம் முகே² பக்கி²பந்தஸ்ஸ அனாபத்தீதி ஏகச்சே. ‘‘ஸப்³ப³ந்தி வசனதோ ஏகதே³ஸம்பி ந வட்டதீ’’தி வத³ந்தி, தம் யுத்தம் அனாபத்திவாரே அவிஸேஸிதத்தா.

624. ஸித்தா²வகாரகே ‘‘கசவரம் ச²ட்³டே³ந்தம் ஸித்த²ம் ச²ட்³டி³ய்யதீ’’தி ச ‘‘கசவரம் ச²ட்³டே³ந்தோ’’தி ச பாடோ².

கப³ளவக்³க³வண்ணனா நிட்டி²தா.

6. ஸுருஸுருவக்³க³வண்ணனா

627. ‘‘ஸுருஸுரு’’ந்தி ச ‘‘ஸுரோஸுரோ’’தி ச பாடோ². ஸீதீகதோதி ஸீதங்கோ. ‘‘ஸிலகபு³த்³தோ⁴தி அரியானம் பரிஹாஸவசனமேவேத’’ந்தி லிகி²தம்.

631. படிக்கூலவஸேனாதி ஏத்த² யதி³ படிக்கூலவஸேன படிக்கி²த்தம், ‘‘ஸேய்யதா²பி காமபோ⁴கி³னோ’’தி ந வத்தப்³ப³ம். ந ஹி தே படிக்கூலம் கரோந்தீதி சே? ந, இஸ்ஸரியலிங்க³வஸேன க³ஹணஸம்ப⁴வதோ. தே ஹி அனாத³ரா ஹோந்தி. பத்ததோ⁴வனந்தி பத்ததோ⁴வனோத³கம் போ⁴ஜனபடிஸம்யுத்தம்.

634. ‘‘ச²த்தபாது³காய’’ந்தி ச ‘‘ச²த்தபாதே³’’தி ச பாடோ².

637. சாபோதி ஸத்தகா²த³னவதோ⁴. ‘‘ஸேஸா ஸப்³பா³ த⁴னுவிகதி கோத³ண்டே³ பவிட்டா²’’தி ச லிகி²தம், படிமுக்கந்தி பவேஸிதம், லக்³கி³தம் ஹோதீதி அத்தோ².

ஸுருஸுருவக்³க³வண்ணனா நிட்டி²தா.

7. பாது³கவக்³க³வண்ணனா

640. ஸயம் யானக³தோ ஹுத்வா, யதா² யானக³தஸ்ஸ வே.

அலம் வத்தும் ததா² நாலம், ஸச²த்தோ ச²த்தபாணினோ.

யதா² ஏத்த², ஏவம் அஞ்ஞத்ராபி.

647. ச²பகவத்து²ஸ்மிம் ‘‘ஸசாஹம் ந லபி⁴ஸ்ஸாமீ’’தி பாடோ², ‘‘த³ஸ சே ந லபி⁴ஸ்ஸாமீ’’தி ச அத்தி², ‘‘வத்து²ஸ்மிம் அகி³லானஸ்ஸா’’தி ச ஆக³ச்ச²தி, தம் ந ஸுந்த³ரம், ஸிக்கா²பதே³யேவ ஸுந்த³ரம். தோ²மிதோதி அஹம்பி ஜானாமீதி ஸம்ப³ந்தோ⁴. யா த⁴னயஸலாப⁴ஸங்கா²தா வுத்தி வினிபாதேன ஹோதி ஸம்பராயே அபாயேஸு வினிபாதஹேது ஹுத்வா பவத்ததி. அத² வா வினிபாதேனாதி ஹேத்வத்தே² கரணவசனம், வினிபாதனாய பவத்ததீதி அதி⁴ப்பாயோ. அத⁴ம்மசரணேன அத⁴ம்மசரணாய. ‘‘அஸ்மா கும்பி⁴மிவா’’தி ச பட²ந்தி.

பாது³கவக்³க³வண்ணனா நிட்டி²தா.

பகிண்ணகவண்ணனா

காயவாசாசித்ததோ ஸமுட்ட²ஹந்தீதி கத்வா ‘‘ஸமனுபா⁴ஸனஸமுட்டா²னானீ’’தி வுத்தானி. ஸமனுபா⁴ஸனம் கிரியம். இமானி கிரியானி. த⁴ம்மதே³ஸனஸமுட்டா²னானி வாசாசித்ததோதி ஏத்த² காயவசீவிஞ்ஞத்திபா⁴வதோ உஜ்ஜக்³கி⁴கஉச்சாஸத்³தா³தீ³ஸு விய ‘‘காயவாசாசித்ததோ’’தி வத்தப்³பா³னீதி சே? ந வத்தப்³பா³னி. நிஸீத³னக³மனாஹாரபக்கி²பனாதி³காயவிஞ்ஞத்தியா ஸப்³பா⁴வா தத்த² யுத்தம், ந த⁴ம்மதே³ஸனே தாதி³ஸஸ்ஸாபா⁴வா.

பகிண்ணகவண்ணனா நிட்டி²தா.

ஸேகி²யகண்ட³வண்ணனா நிட்டி²தா.

8. ஸத்தாதி⁴கரணஸமத²வண்ணனா

‘‘யேபு⁴ய்யஸிகா காதப்³பா³…பே… திணவத்தா²ரகோ காதப்³போ³, ஸோ புக்³க³லோ’’தி ச லிகி²தம்.

ஸத்தாதி⁴கரணஸமத²வண்ணனா நிட்டி²தா.

பி⁴க்கு²விப⁴ங்கோ³ நிட்டி²தோ.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ