பாசித்தியவண்ணனா

5. பாசித்தியகண்டோ³

1. முஸாவாத³வக்³கோ³

1. முஸாவாத³ஸிக்கா²பத³வண்ணனா

1. வாத³க்கி²த்தோதி ஏத்த² அவிஸேஸேன வாத³ஜப்பவிதண்ட³ஸங்கா²தோ திவிதோ⁴பி கதா²மக்³கோ³ ‘‘வாதோ³’’ இச்சேவ வுத்தோதி வேதி³தப்³போ³. தேஸு ‘‘தித்தி²யேஹி ஸத்³தி⁴’’ந்தி வசனதோ ட²பேத்வா வாத³ம் ‘‘ஸேஸா’’தி வத³ந்தி. ச²லஜாதினிக்³க³ஹட்டா²னகுஸலதாய கதா³சி கத்த²சி அவஜானித்வா படிஜானாதி, ததா² புப்³பே³ கிஞ்சி வசனம் படிஜானித்வா பச்சா² அவஜானாதி. ஏவம் வா அஞ்ஞதா² வா அஞ்ஞேனஞ்ஞம் படிசரதி. ஏவம் பவத்தோ ஸம்பஜானமுஸா பா⁴ஸம் படிஸ்ஸுணித்வா அஸச்சாயந்தோ ஸங்கேதம் கத்வா விஸம்வாதே³ந்தோ ஏவம் ஸோ வாத³க்கி²த்தோ ஸமானோ பாசித்தியவத்து²ஞ்ச பரிபூரேந்தோ விசரதீதி ஏவமதி⁴ப்பாயோ வேதி³தப்³போ³. அத்தனோ வாதே³தி ஏத்த² ‘‘ஸப்³பே³ த⁴ம்மா அனத்தா’’தி (த⁴. ப. 279; சூளனி. அஜிதமாணவபுச்சா²னித்³தே³ஸ 7; நேத்தி. 5; மஹானி. 27) பட²மமாரத்³தே⁴ அத்தனோ வாதே³. ‘‘யம் து³க்க²ம் தத³னத்தா’’தி (ஸம். நி. 3.15) நோ ஸமயோ. ‘‘ஸப்³பே³ த⁴ம்மா’’தி வுத்தே நிப்³பா³னம்பி ஸங்க³ஹம் க³ச்ச²தி. ‘‘நிப்³பா³னம் பரமம் ஸுக²’’ந்தி (த⁴. ப. 203-204; ம. நி. 2.215) வுத்தத்தா பன தம் ந து³க்க²ம். நோ டா²னமேதம் விஜ்ஜதி. அயம் பரவாதீ³ ‘‘யம் து³க்க²ம் தத³னத்தா’’தி ஸுத்தம் த³ஸ்ஸேத்வா ஸித்³த⁴ந்தம் ஸம்ப⁴மேத்வா ‘‘விரோதி⁴ விருத்³தோ⁴’’தி வுத்தம் தோ³ஸம் ஆரோபேஸ்ஸதீதி தஸ்மிம் பட²மவாதே³ கஞ்சி தோ³ஸம் ஸல்லக்கே²ந்தோ ஆரோபிதே வா தோ³ஸே அனாரோபிதே வா ‘‘நாயம் மம வாதோ³’’தி தம் அவஜானித்வா ‘‘நிப்³பா³னந்த்வேவ ஸஸ்ஸத’’ந்தி, ‘‘அனத்தா இதி நிச்ச²யா’’தி ச ஸுத்தம் தி³ஸ்வா தஸ்ஸ பட²மவாத³ஸ்ஸ நித்³தோ³ஸதம் ஸல்லக்கே²த்வா ‘‘மமேவ அயம் வாதோ³’’தி தமேவ பச்சா² படிஜானாதி. ஏவம் தத்த² யதா²வுத்தமானிஸம்ஸம் ஸல்லக்கே²ந்தோ தம் படிஜானித்வா யதி³ அனத்தா ஸப்³பே³ த⁴ம்மா, த⁴ம்மா ஏவ ந தே ப⁴வந்தி. ஸபா⁴வம் தா⁴ரேந்தீதி ஹி ‘‘த⁴ம்மா’’தி வுச்சந்தி.

அயஞ்ச அத்த-ஸத்³தோ³ ஸபா⁴வவாசீதி ஏவம் ஆரோபிதே வா தோ³ஸே அனாரோபிதே வா தோ³ஸோதி ஸல்லக்கே²த்வா ‘‘நாயம் மம வாதோ³’’தி தமேவ பட²மவாத³ம் பச்சா² அவஜானாதி. அத² ஸோ பரவாதீ³ ஸபக்க²ம் படிஸேதே⁴ படிஜானனத்தாபனயனம். படிஜானாதி பத்யாஸ்ஸ இதி வசனதோ ‘‘படிஞ்ஞா அஞ்ஞா ஸோ நாம தே நிக்³க³ஹோ’’தி வுத்தோ. ஸபா⁴வாதிரித்தம் அத்த²ம் படிஸேதா⁴தி⁴ப்பாயதோ ஸபா⁴வதோ அதிரித்தம் பா³லபரிகப்பிதமத்தானம் ஸந்தா⁴ய ‘‘அனத்தா ஸப்³பே³ த⁴ம்மா’’தி மே படிஞ்ஞாதகதா², ஸா ச தத³வத்தா²யேவாதி ந மே தம் படிஞ்ஞாதத்தாபனயனம் அத்தி², ‘‘நாயம் மம வாதோ³’’தி அவஜானனம் பன ஸபா⁴வஸங்கா²தம் அத்தானம் ஸந்தா⁴ய ‘‘அனத்தா ஸப்³பே³ த⁴ம்மா’’தி ந வதா³மீதி அதி⁴ப்பாயேன கதந்தி இமினா அஞ்ஞேன காரணேன தம் புப்³பே³ படிஞ்ஞாதத்தாபனயனம் காரணம் படிச்சா²தே³தி. ‘‘அனத்தா ஸப்³பே³வ த⁴ம்மா’’தி ந வத்தப்³ப³ம் ‘‘அத்த-ஸத்³த³ஸ்ஸ ஸபா⁴வவாசித்தா’’தி இத³ம் காரணம் படிச்ச தேன புப்³பே³ படிஞ்ஞாதத்தாபனயனம் கதம். தமஞ்ஞகாரணம் பச்சா² த³ஸ்ஸிதேன அஞ்ஞேன காரணேன படிச்சா²தே³தீதி அதி⁴ப்பாயோ.

யஸ்மா ந கேவலம் யதா²த³ஸ்ஸிதனயேன ஸோ அத்த²மேவ அவஜானாதி, படிஜானாதி ச, கிந்து வசனம்பி, தஸ்மா அட்ட²கதா²யம் (பாசி. அட்ட². 1) ‘‘ஜானிதப்³ப³தோ’’தி பட²மம் காரணம் வத்வா பரவாதி³னா ‘‘யதி³ ஜானிதப்³ப³தோ அனிச்சம், நிப்³பா³னம் தே அனிச்சம் ஸியா’’தி வுத்தே ‘‘ந மயா ‘ஜானிதப்³ப³தோ’தி காரணம் வுத்தம், ‘ஜாதித⁴ம்மதோ’தி மயா வுத்தம், தம் தயா ப³தி⁴ரதாய அஞ்ஞேன ஸல்லக்கி²தந்திஆதீ³னி வத³தீதி அதி⁴ப்பாயோ. ‘ஜானிதப்³ப³தோ’தி வத்வா புன ‘ஜாதித⁴ம்மதோ’திஆதீ³னி வத³தீ’’தி வுத்தம். ‘‘அவஜானித்வா புன படிஜானந்தோ தம் அவஜானனம் இமினா படிச்சா²தே³தி நாமா’’தி லிகி²தம்.

2. ஜானித்வா ஜானந்தஸ்ஸ சாதி ஜானித்வா வா ஜானந்தஸ்ஸ வாதி அத்த²த்³வயம் தீ³பேதீதி.

3. அபிச மிச்சா²வாசாபரியாபன்னாதி சதுப்³பி³த⁴மிச்சா²வாசாபரியாபன்னா. ஸீஹளாதி³னாமபே⁴த³க³தாதி கேசி, தஸ்மா ஏவம் வத³தோ வசனம், தம்ஸமுட்டா²பிகா சேதனாதி உப⁴யம் வுத்தந்தி மாதிகாயம் உபி⁴ன்னம் ஸங்க³ஹிதத்தா. விப⁴ங்கே³ தம் வசனம் யஸ்மா வினா விஞ்ஞத்தியா நத்தி², தஸ்மா ‘‘வாசஸிகா விஞ்ஞத்தீ’’தி விஞ்ஞத்தி ச த³ஸ்ஸிதா. ‘‘ஏவம் வத³தோ வசன’’ந்தி லோகவோஹாரேன வத்வா பரமத்த²தோ த³ஸ்ஸேந்தோ ‘‘தம்ஸமுட்டா²பிகா வா சேதனாதி வுத்த’’ந்தி ச வத³தி. ஓளாரிகேனேவாதி சேதனாஸமுட்டா²னவாசானம் ஸுகு²மத்தா விஸயவஸேனேவ கதாதி.

9. தி³ட்ட²ஸ்ஸ ஹோதீதி தி³ட்டோ² அஸ்ஸ, அனேன வா உபசாரஜ்ஜா²னவஸேன ந மயா அப்³யாவடோ மதோ, ‘‘ந மயா பவந்தோ படோ தி³ட்டோ²’’திஆதி³ம் ப⁴ணந்தஸ்ஸ ச பரமத்த²ஸுஞ்ஞதம் உபாதா³ய ஏவ ‘‘இத்தி²ம் ந பஸ்ஸாமி, ந ச புரிஸ’’ந்தி ப⁴ணந்தஸ்ஸ ச ந முஸாவாதோ³.

11. ஆபத்திம் ஆபஜ்ஜதியேவாதி ஏத்த² ‘‘து³ப்³பா⁴ஸிதாபத்தீ’’தி வத³ந்தி. கஸ்மா? ‘‘கேளிம் குருமானோ’’தி வுத்தத்தா. ‘‘வாசா கி³ரா…பே… வாசஸிகா விஞ்ஞத்தீ’’தி உஜுகம் ஸந்தா⁴ய, காயோ ந உஜுகோ.

முஸாவாத³ஸிக்கா²பத³வண்ணனா நிட்டி²தா.

2. ஓமஸவாத³ஸிக்கா²பத³வண்ணனா

13. ‘‘புன அரே பத்தேதி புன தம் டா²னம் பரிவட்டேத்வா ஆக³தே அஞ்ஞஸ்மிம் அரே’’தி லிகி²தம். பதிட்டி²தாரப்பதே³ஸந்தி பூ⁴மிம். புன அரேதி புன தஸ்மிம்யேவ அரே பூ⁴மிம் பத்தேதி அத்தோ²தி கேசி, தம் ந ஸுந்த³ரம் விய. ஜாபிதோதி பராஜிதோ, ‘‘பராஜிதோ’’தி வா பாடோ². பாபேஸீதி அபி⁴ப⁴வஸி. மனாபம் பா⁴ஸமானஸ்ஸ ப்³ராஹ்மணஸ்ஸ க³ரும் பா⁴ரம். உத³ப்³ப³ஹீதி ஆகட்³டீ⁴தி அத்தோ², அனாத³ரத்தே² வா ஸாமிவசனம். த⁴னஞ்ச நம் அலாபே⁴ஸீதி யதா² ஸோ த⁴னம் அலபி⁴, ததா² அகாஸீதி அதி⁴ப்பாயோ.

15. புப்³பே³தி நிதா³னே. அவகண்ணகந்தி சி²ன்னகண்ணகனாமம். ஜவகண்ணகந்தி வங்ககண்ணகனாமம். த⁴னிட்ட²கம் த⁴னவட்³ட⁴கனாமம், ஸிரிவட்³ட⁴கனாமம் குலவட்³ட⁴கஸ்ஸேவ நாமம். தச்ச²ககம்மந்தி க²ணனகம்மகாரா கோட்ட²கா, பாஸாணகம்மகாராதி கேசி. ‘‘முத்³தா³தி பப்³ப³க³ணனா. க³ணனாதி மஹாக³ணனா’’தி போராணக³ண்டி²பதே³ வுத்தம். ‘‘மது⁴மேஹம் ஓமேஹ’’ந்தி லிகி²தம். தூ²லகாயஸ்ஸ மம்ஸூபசயோதி ஏகே. யப⁴ மேது²னே. வீதராக³தாதீ³ஹி அக்கோஸந்தோபி கிலேஸேஹேவ கிர அக்கோஸதி நாம, ததா² ‘‘ஸோதாபன்னோ’’தி அக்கோஸந்தோ ஆபத்தியா அக்கோஸதி நாமாதி ஏகே. லிங்கா³யத்தத்தா அச்சோதா³தாதி³பி லிங்க³மேவ ஜாதம்.

16. ஸப்³ப³த்த² வதே³தீதி உத்³தே³ஸோ. ப⁴ணதீதி வித்தா²ரோ. வதே³தீதி வா இமினா பரவிஞ்ஞாபனம் தீ³பேதி.

26. அஞ்ஞாபதே³ஸவாரேஸு பன ‘‘ஏவம் வதே³தீ’’தி வுத்தம். கஸ்மா? புப்³பே³ த³ஸ்ஸிதஉத்³தே³ஸக்கமனித³ஸ்ஸனத்த²ம். புப்³பே³பி ‘‘ஹீனேன ஹீனம், ஹீனேன உக்கட்ட²ம், உக்கட்டே²ன ஹீனம், உக்கட்டே²ன உக்கட்ட²’’ந்தி ஜாத்யாதீ³ஸு ஏகேகஸ்மிம் சதுதா⁴ சதுதா⁴ த³ஸ்ஸிதஉத்³தே³ஸக்கமஸ்ஸ நித³ஸ்ஸனம் ‘‘ஏவ’’ந்தி இமினா கரோதி. ‘‘ஹீனேன ஹீனம் வதே³தீ’’தி வுத்தட்டா²னேயேவ ஹி ‘‘ஏவம் வதே³தீ’’தி வுத்தே ஸோ ஆகாரோ நித³ஸ்ஸிதோ ஹோதீதி அதி⁴ப்பாயோ. அஞ்ஞதா² அஞ்ஞாபதே³ஸேன ஸோ ஆகாரோ ந ஸம்ப⁴வதீதி ஆபஜ்ஜதி. ந ஸம்ப⁴வதி ஏவாதி சே? ந, விஸேஸகாரணாபா⁴வா, தத்த² அனாபத்திப்பஸங்க³தோ, அனியமனித்³தே³ஸேன அனியமத்த²ஸம்ப⁴வதோ ச. ‘‘ஸந்தி இதே⁴கச்சே சண்டா³லா’’திஆதி³னா ஹி அனியமனித்³தே³ஸேன சண்டா³லம் வா அசண்டா³லம் வா ஸந்தா⁴ய ப⁴ணந்தஸ்ஸ ஆபத்தீதி அனியமத்தோ² ஸம்ப⁴வதீதி அதி⁴ப்பாயோ. யதி³ ஏவம் ஏத்தகமேவ வத்தப்³ப³ம் தாவதா புப்³பே³ த³ஸ்ஸிதஉத்³தே³ஸக்கமனித³ஸ்ஸனஸித்³தி⁴தோதி? ந, ‘‘வதே³தீ’’தி இமினா அயோஜிதே ‘‘ஏவ’’ந்தி பதே³ இமம் நாம ஆகாரம் த³ஸ்ஸேதீதி அனவபோ³த⁴தோ. அஞ்ஞாபதே³ஸனயேபி பரவிஞ்ஞாபனேயேவ து³க்கடபாசித்தியம் வியாதி நியமனபயோஜனம் வா ‘‘வதே³தீ’’தி பத³ந்தி வேதி³தப்³ப³ம். அத² வா அத்தனோ ஸமீபே ட²த்வா அஞ்ஞம் பி⁴க்கு²ம் ஆணாபேந்தோ ஹீனேன ஹீனம் வதே³தி ப⁴ணதி, ஆபத்தி பாசித்தியஸ்ஸ. ஸசே ஸயம் ஹீனோ ஹீனேன ஹீனம் சண்டா³லம்…பே… புக்குஸம் ‘‘புக்குஸோ’’தி ப⁴ணதி ஆபத்தி வாசாய வாசாய பாசித்தியஸ்ஸ, ஏஸ நயோ அஞ்ஞாபதே³ஸவாரேஸுபீதி யோஜனா வேதி³தப்³பா³. அயமத்தோ² து³ட்ட²தோ³ஸேஸு பரியேஸிதப்³போ³. அஞ்ஞதா² ‘‘வதே³தி ப⁴ணதீ’’தி ஏதேஸம் அஞ்ஞதரம் உப⁴யத்த² அனஞ்ஞாபதே³ஸவாரஅஞ்ஞாபதே³ஸவாரேஸு, விஸேஸேன வா அஞ்ஞாபதே³ஸவாரேஸு நிரத்த²கம் ஆபஜ்ஜதி வினாயேவ தேன வசனஸிலிட்ட²தாஸம்ப⁴வதோ. அத்ததோ பாளியம் அவுத்தத்தா பனேத்த² ‘‘ஸாணத்திக’’ந்தி வுத்தந்தி வேதி³தப்³ப³ம். தத்ராயம் பத³ஸந்தி⁴ வதே³தீதி வத³ இதீதி. அஸம்முகா² வத³ந்தஸ்ஸ து³க்கடம் ‘‘ஸம்முகா² பன ஸத்தஹிபி ஆபத்திக்க²ந்தே⁴ஹி வத³ந்தஸ்ஸ து³க்கட’’ந்தி அந்த⁴கட்ட²கதா²யம் வுத்தத்தா. த³வகம்யதா நாம கேளி, தம் த³ஸ்ஸேதும் ‘‘ஹஸாதி⁴ப்பாயதா’’தி வுத்தம். ‘‘அஸம்முகா²பி த³வகம்யதாய வத³ந்தஸ்ஸ து³ப்³பா⁴ஸிதமேவா’’தி ஆசரியா வத³ந்தி. பாபக³ரஹிதாய குஜ்ஜி²த்வாபி வத³ந்தஸ்ஸ து³க்கடம், அஸம்முகா² அனாபத்தீதி.

ஓமஸவாத³ஸிக்கா²பத³வண்ணனா நிட்டி²தா.

3. பேஸுஞ்ஞஸிக்கா²பத³வண்ணனா

36-7. ‘‘இமஸ்ஸ ஸுத்வா அமுஸ்ஸா’’தி பாடோ². ‘‘இமேஸம் ஸுத்வா’’தி ந ஸுந்த³ரம். பே⁴தா³யபீதி பே⁴தா³ய. திண்ணம்பி பி⁴க்கு²பா⁴வதோயேவ நிபஜ்ஜனதோ ‘‘பி⁴க்கூ²னம் பேஸுஞ்ஞே’’தி ப³ஹுவசனம் கதம்.

38-9. ‘‘இத்த²ன்னாமோ ஆயஸ்மா சண்டா³லோ…பே… புக்குஸோதி ப⁴ணதீ’’தி வத்வா பேஸுஞ்ஞம் உபஸம்ஹரதீதி யோஜனா. அஞ்ஞதா² ‘‘புக்குஸோதி ப⁴ணதீ’’தி வத்தப்³ப³தா ஆபஜ்ஜதி. ஏத்த² அனுபஸம்பன்னவாரோ லப்³ப⁴மானோபி ந உத்³த⁴டோ ஓமஸவாதே³ த³ஸ்ஸிதனயத்தா, ஸங்கே²பதோ அந்தே த³ஸ்ஸேதுகாமதாய வா. ததா² ஹி அந்தே தீணி து³க்கடானி த³ஸ்ஸிதானி. தானி பன த³ஸ்ஸேந்தோ ப⁴க³வா யஸ்மா ‘‘உபஸம்பன்னஸ்ஸ ஸுத்வா உபஸம்பன்னஸ்ஸ பேஸுஞ்ஞம் உபஸம்ஹரதீ’’தி வுத்தானம் த்³வின்னம் பதா³னம் அஞ்ஞதரவிபல்லாஸவஸேன வா உப⁴யவிபல்லாஸவஸேன வா பாசித்தியந்தி கத்வா த்³வேபி தானி ஏகதோ வுத்தானீதி த³ஸ்ஸேதுகாமோ, தஸ்மா ஸப்³ப³பட²மம்யேவ ‘‘உபஸம்பன்னோ உபஸம்பன்னஸ்ஸ ஸுத்வா உபஸம்பன்னஸ்ஸ பேஸுஞ்ஞம் உபஸம்ஹரதி, ஆபத்தி பாசித்தியஸ்ஸா’’தி ஆஹ. ‘‘த்³வீஸு பனேதேஸு யஸ்மா பாராஜிகம் அஜ்ஜா²பன்னோபி உபஸம்பன்னோ தாதி³ஸம்யேவ உபஸம்பன்னம் கு²ம்ஸேதுகாமோ ஓமஸதி, தாதி³ஸஸ்ஸ ஸுத்வா தாதி³ஸஸ்ஸ பேஸுஞ்ஞம் உபஸம்ஹரதி, ஆபத்தி பாசித்தியஸ்ஸ, தஸ்மா ‘உபஸம்பன்னோ’தி இத³ம் ஆதி³பத³ம் ஸப்³ப³த்த² வுத்த’’ந்தி கேசி வத³ந்தி, தம் ந யுத்தம், அனவஸேஸஆபத்திம் ஆபன்னஸ்ஸ புன ஆபத்தியா அஸம்ப⁴வதோ, தஸ்மா கேவலம் மாதிகாயம் பி⁴க்கு²பதா³பா⁴வதோயேவ ‘‘ப⁴ணதி உபஸம்ஹரதீ’’தி பதா³னம் காரகனித்³தே³ஸாபா⁴வே அஸம்ப⁴வதோ ஏவ தம் ஆதி³பத³ம் வுத்தந்தி வேதி³தப்³ப³ம். இத³ம் பாளிலேஸாபா⁴வதோ அனாணத்திகமேவ. ‘‘ந பியகம்யஸ்ஸ, ந பே⁴தா³தி⁴ப்பாயஸ்ஸா’’தி உபஸம்ஹரணாபேக்க²ம் ஸாமிவசனம் துண்ஹீபூ⁴தஸ்ஸ வசனப்பயோஜனாபா⁴வதோ, தேன வுத்தம் ‘‘பாபக³ரஹிதாய ப⁴ணந்தஸ்ஸ அனாபத்தீ’’தி.

பேஸுஞ்ஞஸிக்கா²பத³வண்ணனா நிட்டி²தா.

4. பத³ஸோத⁴ம்மஸிக்கா²பத³வண்ணனா

45-6. ஸப்³ப³மேதம் பத³ஸோ த⁴ம்மோ நாமாதி ஏத்த² த⁴ம்மோ நாம பு³த்³த⁴பா⁴ஸிதோதி ஏவம் ஸம்ப³ந்தோ⁴. அக்க²ரஸமூஹோதி அஸமத்தபதே³. பச்சேகபு³த்³த⁴பா⁴ஸிதம் பு³த்³த⁴பா⁴ஸிதே ஏவ. அனுபாஸகக³ஹட்டே²ஹி பா⁴ஸிதோ இஸிபா⁴ஸிதாதி³ஸங்க³ஹம் க³ச்ச²தீதி வேதி³தப்³ப³ம். கத்த²சி போத்த²கே ‘‘தே³வதாபா⁴ஸிதோ’’தி பத³ம் நத்தி², யத்த² அத்தி², ஸா பாளி. கா³தா²ப³ந்தே⁴பி ச ஏஸ நயோதி ஏகமேவ அக்க²ரம் வத்வா டா²னம் லப்³ப⁴தி ஏவ. ‘‘ஏவம் மே ஸுத’’ந்திஆதி³ஸுத்தம் ப⁴ணாபியமானோ ஏகாரம் வத்வா திட்ட²தி சே, அன்வக்க²ரேன பாசித்தியம், அபரிபுண்ணபத³ம் வத்வா டி²தே அனுப்³யஞ்ஜனேன. பதே³ஸு ஏகம் பட²மபத³ம் விருஜ்ஜ²தி சே, அனுபதே³ன பாசித்தியம். அட்ட²கதா²னிஸ்ஸிதோதி அட்ட²கதா²னிஸ்ஸிதவஸேன டி²தோ. புப்³பே³ பகதிபா⁴ஸாய வுத்தம் அட்ட²கத²ம் ஸந்தா⁴ய. பாளினிஸ்ஸிதோதி பாளியம் ஏவாக³தோ. மக்³க³கதா²தீ³னிபி பகரணானி.

48. உபசாரந்தி த்³வாத³ஸஹத்த²ம். ‘‘ஓபாதேதீதி ஏகதோ ப⁴ணதி ஸமாக³ச்ச²தீ’’தி லிகி²தம். கிஞ்சாபி அபலாலத³மனம்பி ஸீலுபதே³ஸோபி ப⁴க³வதோ காலே உப்பன்னோ, அத² கோ² தேஸு யம் யம் பு³த்³த⁴வசனதோ ஆஹரித்வா வுத்தம், தம் ததே³வ ஆபத்திவத்து² ஹோதீதி விஞ்ஞாபனத்த²ம் மஹாஅட்ட²கதா²யம் ‘‘வத³ந்தீ’’தி வசனேஹி ஸிதி²லம் கதம். பு³த்³த⁴வசனதோ ஆஹரித்வா வுத்தஸ்ஸ ப³ஹுலதாய தப்³ப³ஹுலனயேன தேஸு ஆபத்தி வுத்தா, தஸ்மா மஹாபச்சரியம் தஸ்ஸாதி⁴ப்பாயோ பகாஸிதோதி அத்தோ². ‘‘ஸப்³பே³ஸமேவ வசனந்தி அபரே’’தி வுத்தம். ஸசே ஆசரியோ டி²தோ நிஸின்னானம் பாட²ம் தே³தி, ‘‘ந டி²தோ நிஸின்னஸ்ஸ த⁴ம்மம் தே³ஸேஸ்ஸாமீ’’தி வுத்தாபத்திம் நாபஜ்ஜதீதி ஏகே. தேஸம்பி பாட²தா³னம் த⁴ம்மதே³ஸனதோ ந அஞ்ஞந்தி தம் ந யுத்தம், ச²த்தபாணிகாதீ³னம் பாட²தா³னேன அனாபத்திப்பஸங்க³தோ, ஆபத்திபா⁴வோ ச ஸித்³தோ⁴. வுத்தஞ்ஹேதம் –

‘‘உபோ⁴ அத்த²ம் ந ஜானந்தி, உபோ⁴ த⁴ம்மம் ந பஸ்ஸரே;

யோ சாயம் மந்தம் வாசேதி, யோ சாத⁴ம்மேனதீ⁴யதீ’’தி. (பாசி. 647);

ஏத்த² அதீ⁴யதீதி அத்தோ², தஸ்மா பாட²தா³னம்பி த⁴ம்மதே³ஸனாவ. ஸேகி²யட்ட²கதா²யம் (பாசி. அட்ட². 634) ‘‘த⁴ம்மபரிச்சே²தோ³ பனேத்த² பத³ஸோத⁴ம்மே வுத்தனயேன வேதி³தப்³போ³’’தி வுத்தம், தஸ்மா அயமேவ த⁴ம்மோ ஸப்³ப³த்த² த⁴ம்மபடிஸம்யுத்தஸிக்கா²பதே³ஸு வேதி³தப்³போ³. யதி³ ஏவம் ஸங்கா²ரபா⁴ஸாதி³வஸேன சித்தத⁴ம்மம் தே³ஸேந்தஸ்ஸ ஸேகி²யவஸேன அனாபத்தி ஸியா, ததோ ச²பகஜாதகவிரோதோ⁴. தத்த² மந்தானம் பா³ஹிரக³ந்த²த்தாதி சே? ந, தத³தி⁴ப்பாயாஜானனதோ. அயஞ்ஹி தத்த² அதி⁴ப்பாயோ ‘‘பா³ஹிரகக³ந்த²ஸங்கா²தம்பி மந்தம் உச்சே ஆஸனே நிஸின்னஸ்ஸ வாசேதும் மே பி⁴க்க²வே அமனாபம், பகே³வ த⁴ம்மம் தே³ஸேது’’ந்தி. ‘‘ததா³பி மே, பி⁴க்க²வே, அமனாபம் நீசே ஆஸனே நிஸீதி³த்வா உச்சே ஆஸனே நிஸின்னஸ்ஸ மந்தம் வாசேதும், கிமங்க³ம் பன ஏதரஹி…பே… த⁴ம்மம் தே³ஸேது’’ந்தி (பாசி. 647) ஹி அயம் பாளி யதா²வுத்தமேவ அதி⁴ப்பாயம் தீ³பேதி, ந அஞ்ஞம். தேனேவ ‘‘மந்தம் வாசேதும் த⁴ம்மம் தே³ஸேது’’ந்தி வசனபே⁴தோ³ கதோ. அஞ்ஞதா² உப⁴யத்த² ‘‘த⁴ம்மம் தே³ஸேது’’மிச்சேவ வத்தப்³ப³ந்தி.

மயா ஸத்³தி⁴ம் மா வதா³திஆதி³ம்ஹி பன அனுக³ண்டி²பதே³ ஏவம் வுத்தோ ‘‘ஸசே பி⁴க்கு² ஸாமணேரேன ஸத்³தி⁴ம் வத்துகாமோ, ததா² ஸாமணேரோபி பி⁴க்கு²னா ஸத்³தி⁴ம் வத்துகாமோ ஸஹஸா ஓபாதேதி, ‘யேபு⁴ய்யேன பகு³ணம் க³ந்த²ம் ப⁴ணந்தம் ஓபாதேதீ’’திஆதீ³ஸு விய அனாபத்தி, ந ஹி ஏத்தாவதா பி⁴க்கு² ஸாமணேரஸ்ஸ உத்³தி³ஸதி நாம ஹோதி. யஸ்மா மஹாஅட்ட²கதா²யம் நத்தி², தஸ்மாபி யுத்தமேவேதம். ஸசே தத்த² விசாரேத்வா படிக்கி²த்தம் ஸியா ஆபத்தி, கிரியாகிரியஞ்ச நாபஜ்ஜதி. கஸ்மா? யஸ்மா சித்தேன ஏகதோ வத்துகாமோ, அத² கோ² நம் ‘ஏகதோ மா வதா³’தி படிக்கி²பித்வாபி ஏகதோ வத³ந்தோ ஆபஜ்ஜதி. அவத்துகாமஸ்ஸ ஸஹஸா விரஜ்ஜி²த்வா ஏகதோ வத³ந்தஸ்ஸ அனாபத்தி, தேன வுத்தம் ‘மயா ஸத்³தி⁴ம் மா வதா³தி வுத்தோ யதி³ வத³தி, அனாபத்தீ’தி. ததா²பி ஆசரியானம் மதிமனுவத்தந்தேன ஏவரூபேஸு டா²னேஸு யதா²வுத்தனயேனேவ படிபஜ்ஜிதப்³ப³ம். கஸ்மா? யஸ்மா மஹாஅட்ட²கதா²யம் நத்தி², நத்தி²பா⁴வதோயேவ ஆபத்தி. ஸசே தத்த² அனாபத்திஅவசனம் ந ஸம்ப⁴வதி அயமட்டா²னத்தா’’தி.

தத்ராயம் விசாரணா – ‘‘மயா ஸத்³தி⁴ம் மா வதா³’’தி வுத்தோ யதி³ வத³தி, பி⁴க்கு²னோ அனாபத்தீதி யுத்தமேதம் பி⁴க்கு²னோ வத்துகாமதாயாபா⁴வதோ, பா⁴வேபி ஸஜ்ஜா²யகரணாதீ³ஸு தீஸு அனாபத்திதோ ச. அத² ஸாமணேரேன ப்³யத்ததாய ‘‘மயா ஸத்³தி⁴ம் மா வதா³’’தி வுத்தோ பி⁴க்கு² அப்³யத்ததாய வத³தி, ஆபத்தி ஏவ வத்துகாமதாஸப்³பா⁴வதோ. ஸஹஸா சே வத³தி, அனாபத்தி தத³பா⁴வதோ. ஸசே பி⁴க்கு² ஏவம் ‘‘மயா ஸத்³தி⁴ம் மா வதா³’’தி வத்வா தேன ஸத்³தி⁴ம் ஸயம் வத³தி, ஆபத்தி ஏவ. ந ஹி ஏதம் ஸிக்கா²பத³ம் கிரியாகிரியம். யதி³ ஏதம் ஸிக்கா²பத³ம் கிரியாகிரியம் ப⁴வேய்ய, யுத்தம். தத்த² அனாபத்தீதி அதி⁴ப்பாயோ. மஹாபச்சரியம் இமினாவ அதி⁴ப்பாயேன ‘‘மயா ஸத்³தி⁴ம் மா வதா³’’தி வுத்தம் ஸியா. ந ஹி ஸாமணேரஸ்ஸ கிரியா இத⁴ பமாணந்தி, இமஸ்மிம் பன அதி⁴ப்பாயே வுத்தே அதியுத்தம்வாதி அத்தோ². அக்க²ரத்தோ² ப்³யஞ்ஜனத்தோ². கிஞ்சாபி ‘‘யஞ்ச பத³ம் யஞ்ச அனுபத³ம் யஞ்ச அன்வக்க²ரம் யஞ்ச அனுப்³யஞ்ஜனம், ஸப்³ப³மேதம் பத³ஸோத⁴ம்மோ நாமா’’தி வுத்தம், ததா²பி ‘‘பதே³ன வாசேதி, பதே³ பதே³ ஆபத்தி பாசித்தியஸ்ஸ, அக்க²ராய வாசேதி, அக்க²ரக்க²ராய ஆபத்தி பாசித்தியஸ்ஸா’’தி இத³மேவ த்³வயம் யோஜிதம், தம் கஸ்மாதி சே? பதே³ன அனுபத³அனுப்³யஞ்ஜனானம் ஸங்க³ஹிதத்தா. வுத்தஞ்ஹேதம் ‘‘அனுபத³ந்தி து³தியபாதோ³. அனுப்³யஞ்ஜனந்தி புரிமப்³யஞ்ஜனேன ஸதி³ஸம் பச்சா²ப்³யஞ்ஜன’’ந்தி (பாசி. அட்ட². 45), தஸ்மா அனுபதே³கதே³ஸமத்தமேவ அனுப்³யஞ்ஜனந்தி ஸித்³த⁴ம். ‘‘அக்க²ரானுப்³யஞ்ஜனஸமூஹோ பத³’’ந்தி ச வுத்தத்தா பத³மத்தமேவ வத்தப்³ப³ம் தேன அனுபதா³தி³த்தயக்³க³ஹணதோதி சே? ந வத்தப்³ப³ம் வசனவிஸேஸதோ. பதே³ன வாசேந்தோ ஹி பதே³ வா அனுபதே³ வா அனுப்³யஞ்ஜனே வா ஆபத்திம் ஆபஜ்ஜதி. ந அக்க²ரேன. அக்க²ரேன வாசேந்தோ பன பதா³தீ³ஸு அஞ்ஞதரஸ்மிம் ஆபஜ்ஜதி. ந ஹி ‘‘வரோ வரஞ்ஞூ வரதோ³ வராஹரோ’’திஆதி³ம்ஹி பட²மம் வ-காரம் வாசேந்தோ து³தியாதி³வ-காரே ஓபாதேதி, பட²மம் ரோ-காரம் வாசேந்தோ து³தியரோ-காரே ஓபாதேதி, பட²மம் ர-காரம் வாசேந்தோ து³தியர-காரே ஓபாதேதி, ஆபத்தி பாசித்தியஸ்ஸாதி ஸம்ப⁴வதி. அனுப்³யஞ்ஜனானுலோமதோ ஸம்ப⁴வதி ஏவாதி சே? ந, ‘‘பதே³ பதே³ ஆபத்தி பாசித்தியஸ்ஸா’’தி இமினா விருத்³த⁴த்தா. இத³ஞ்ஹி வசனம் ஏகஸ்மிம் பதே³ ஏகா ஆபத்தீதி தீ³பேதி. ‘‘ரூபம் அனிச்சந்தி வுச்சமானோ ரூதி ஓபாதேதீ’’தி வசனதோ ஸகலம் பாத³ம் வாசேந்தஸ்ஸ பட²மஅக்க²ரமத்தே ஏகதோ வுத்தே ஆபத்தீதி ஸித்³த⁴ந்தி சே? ந, ‘‘அக்க²ரக்க²ராய ஆபத்தி பாசித்தியஸ்ஸா’’தி இமினா விருத்³த⁴த்தா, தஸ்மா ரூதி ஓபாதேதீதி வத்தும் அஸம்ப⁴வதோ ரூ-காரஸ்ஸ யதா²வுத்தத⁴ம்மபரியாபன்னபா⁴வஸித்³தி⁴தோ தம் அவத்வா கேவலம் அக்க²ராய வாசேந்தஸ்ஸ யதா²வுத்தத⁴ம்மபரியாபன்னஅக்க²ரபா⁴வத³ஸ்ஸனத்த²ம் ‘‘ரூபம் அனிச்சந்தி வுச்சமானோ’’தி வுத்தம், வசனஸிலிட்ட²தாவஸேன வா அனுப்³யஞ்ஜனே வேத³னாவசனம் வியாதி வேதி³தப்³ப³ம்.

பத³ஸோத⁴ம்மஸிக்கா²பத³வண்ணனா நிட்டி²தா.

5. பட²மஸஹஸேய்யஸிக்கா²பத³வண்ணனா

50. ‘‘ந ஸஹஸேய்யம் கப்பேதப்³ப³’’ந்தி பா⁴வவஸேன வுத்தம், கேஸுசி ‘‘ந ஸஹஸேய்யா கப்பேதப்³பா³’’தி பாடோ², ந கப்பேதப்³பா³ பி⁴க்கு²னாதி பஞ்ஞத்தந்தி அதி⁴ப்பாயோ. ‘‘அபஸ்ஸேனம் வாதி வாயிமமஞ்சகமேவ ஹோதீ’’தி லிகி²தம். யம் ஏதேஸம் ந கப்பதி, தம் தேஸம்பீதி உபஜ்ஜா²யாதீ³னம் ஸந்திகம் அக³ந்த்வா ஸஹஸேய்யம் கப்பேய்யாதி பாட²ஸேஸோ.

52. ‘‘அனுபஸம்பன்னோ நாம பி⁴க்கு²ம் ட²பேத்வா அவஸேஸோ’தி வுத்தத்தா மாதுகா³மோ அனுபஸம்பன்னோதி சதுத்த²ரத்தியம் மாதுகா³மோ த்³வேபி ஸஹஸேய்யாபத்தியோ ஜனேதீதி அபரே’’தி வுத்தம், ‘‘பி⁴க்கு²ம் ட²பேத்வா…பே… பன்னோதி பாராஜிகவத்து²பூ⁴தோ திரச்சா²னபுரிஸோ அதி⁴ப்பேதோ’’தி ச, உப⁴யம்பி வீமம்ஸிதப்³ப³ம். து³தியஸிக்கா²பதே³ மாதுகா³மோ நாமாதி மனுஸ்ஸித்தி²ம்யேவ க³ஹேத்வா யக்கீ² பேதீ திரச்சா²னக³தா பாராஜிகவத்து²பூ⁴தா ந க³ஹிதா தேஸு து³க்கடத்தா. ‘‘ஸசே பன அத்தனோபி ஸிக்கா²பதே³ து³க்கடம் ப⁴வேய்ய, அத² கஸ்மா பட²மஸிக்கா²பதே³ பாசித்திய’’ந்தி ச வுத்தம். ‘‘அபரிக்கி²த்தே பமுகே² அனாபத்தீ’’தி ஸீஹளட்ட²கதா²வசனம், தஸ்ஸத்த²ம் தீ³பேதும் அந்த⁴கட்ட²கதா²யம் ‘‘பூ⁴மியம் வினா ஜக³தியா பமுக²ம் ஸந்தா⁴ய கதி²த’’ந்தி வுத்தம். புன வஸதீதி சதுத்த²தி³வஸே வஸதி. பி⁴க்கு²னிபன்னேதி பி⁴க்கு²ம்ஹி நிபன்னே. ஸன்னிபதிதமண்ட³பம் நாம மஹாவிஹாரே ஸன்னிபாதட்டா²னம். ‘‘தீணி ச தி³வஸானி து³க்கடகே²த்தே வஸித்வா சதுத்தே² தி³வஸே ஸஹஸேய்யாபத்திபஹோனகே ஸயதி, பாசித்தியேவா’’தி ஏகச்சே வத³ந்தி கிர, தம் ந யுத்தம்.

பட²மஸஹஸேய்யஸிக்கா²பத³வண்ணனா நிட்டி²தா.

6. து³தியஸஹஸேய்யஸிக்கா²பத³வண்ணனா

55. ‘‘அத² கோ² தே மனுஸ்ஸா’’தி ச ‘‘தே அத்³தி⁴கா’’தி ச பாடோ². ‘‘ஏகரத்த’’ந்திபி அத்தி², ஸோ ந ஸுந்த³ரோ. பண்ட³கே பாளியம் து³க்கடஸ்ஸ வுத்தத்தா ‘‘உப⁴தோப்³யஞ்ஜனேஹி மூலாபத்தீதி தி³ஸ்ஸதீ’’தி, ‘‘அனிமித்தாத³யோ இத்தி²யோவா’’தி ச வத³ந்தி உப⁴தோப்³யஞ்ஜனகே வுத்தம் விய. கிஞ்சாபி மதித்தீ² பாராஜிகவத்து² ஹோதி, அனுபாதி³ன்னபக்கே² டி²தத்தா பன இத⁴ ஆபத்திம் ந கரோதி. பாராஜிகாபத்திட்டா²னஞ்சேத்த² ந ஓலோகேதப்³ப³ம்.

து³தியஸஹஸேய்யஸிக்கா²பத³வண்ணனா நிட்டி²தா.

7. த⁴ம்மதே³ஸனாஸிக்கா²பத³வண்ணனா

66. ‘‘விஞ்ஞூ படிப³லா’’தி வசனதோ அவிஞ்ஞூ இத்தி²யாபி தே³ஸேந்தஸ்ஸ அனாபத்தி. இத⁴ யக்கீ²ஆத³யோ மனுஸ்ஸித்தீ² விய அனோளாரிகத்தா து³க்கடவத்து²கா ஜாதா. திரச்சா²னக³தமனுஸ்ஸவிக்³க³ஹித்தி²யா படிப³லதாய வுத்தத்தா இதராபி து³க்கடவத்து²யேவாதி ஏகே. ‘‘மாதுகா³மாயா’’தி லிங்க³விபல்லாஸேன வுத்தம். ‘‘அட்ட²கதா²தி³பாட²ம் ட²பேத்வா த³மிளாதி³னா யதா²ருசி கதே²தும் லப⁴தி கிரா’’தி லிகி²தம், யதா² யக்கீ²ஆத³யோ து³க்கடவத்து²கா ஜாதா, ததா² புரிஸவிக்³க³ஹம் க³ஹேத்வா டி²தேன யக்கா²தி³னா ஸத்³தி⁴ம் டி²தஸ்ஸ மாதுகா³மஸ்ஸ த⁴ம்மம் தே³ஸேந்தோ து³க்கடம் அனாபஜ்ஜித்வா கஸ்மா பாசித்தியமாபஜ்ஜதீதி சே? ஈஸகம்பி து³தியபக்க²ம் அப⁴ஜனதோ. மனுஸ்ஸமாதுகா³மோபி ந து³தியோ, பகே³வ யக்கா²த³யோதி. ந து³தியானியதே தஸ்ஸ து³தியத்தாதி சே? ந தத்த² து³ட்டு²ல்லவாசாபேக்கா² து³தியதா, கிந்து நிஸஜ்ஜாபேக்கா², இத⁴ ச ந நிஸஜ்ஜமத்தம், கிந்து தே³ஸனா இதா⁴தி⁴ப்பேதா. ஸா ச நிபஜ்ஜனதோ ஓளாரிகா, தஸ்மா அஸமத்த²னித³ஸ்ஸனம்.

த⁴ம்மதே³ஸனாஸிக்கா²பத³வண்ணனா நிட்டி²தா.

8. பூ⁴தாரோசனஸிக்கா²பத³வண்ணனா

67. ‘‘சதுத்த²பாராஜிகவத்து² ச இத³ஞ்ச ஏகமேவா’’தி வுத்தம், ந யுத்தம். கஸ்மா? தத்த² ‘‘மோக⁴புரிஸா’’தி வுத்தத்தா. தே அரியமிஸ்ஸகா ந ஹோந்தீதி த்³வேபி ஏகஸதி³ஸானீதி மம தக்கோ. ‘‘அரியாபி படிஜானிம்ஸு, தேஸம்பி அப்³ப⁴ந்தரே விஜ்ஜமானத்தா உத்தரிமனுஸ்ஸத⁴ம்மஸ்ஸா’’தி லிகி²தம். ‘‘ஸப்³பே³பி பூ⁴தம் ப⁴க³வாதி புது²ஜ்ஜனஅரியானம் உத்தரிமனுஸ்ஸத⁴ம்மஸ்ஸ ஆரோசிதத்தா ‘பூ⁴த’ந்தி வுத்தம், ந அத்தனோ உத்தரிமனுஸ்ஸத⁴ம்மம் ஸந்தா⁴யாதி அபரே’’தி வுத்தம்.

77. புப்³பே³ அவுத்தேஹீதி சதுத்த²பாராஜிகே அவுத்தேஹீதி.

பூ⁴தாரோசனஸிக்கா²பத³வண்ணனா நிட்டி²தா.

9. து³ட்டு²ல்லாரோசனஸிக்கா²பத³வண்ணனா

78-80. ‘‘தேனேவ ஹத்தே²ன உபக்கமித்வா அஸுசிம் மோசேஸீ’’தி பாடோ² ஸம்பதிபாடோ² ஸுந்த³ரோ. அபலோகேத்வாவ காதப்³பா³. நோ சே, பாளியம்யேவ வுத்தம் ஸியா. ‘‘ஓத்தப்பேனா’’தி வத்தப்³பே³ ருள்ஹீவஸேன பரேஸு ‘‘ஹிரோத்தப்பேனா’’தி வுத்தம். மஹாஅட்ட²கதா²யம் உத்தானத்தா ந வுத்தம், பாசித்தியாஸம்ப⁴வத³ஸ்ஸனேனேவ ஹி து³க்கடந்தி ஸித்³த⁴ம்.

83. தத்த² ‘‘கம்ம’’ந்தி வுத்தஅஜ்ஜா²சாரேபி பரியாபன்னத்தா தம் தஸ்ஸ த³ண்ட³கம்மவத்து². ‘‘தத்த² கம்மம் ஆபன்னோ’’தி புப்³பே³பி லிகி²தம். மஹாஅட்ட²கதா²யம் ‘‘அத்தகாமம் ஆபன்னோ’’தி பாடோ², ‘‘அயமேவ க³ஹேதப்³போ³’’தி வத³ந்தி, வீமம்ஸிதப்³ப³ம்.

து³ட்டு²ல்லாரோசனஸிக்கா²பத³வண்ணனா நிட்டி²தா.

10. பத²வீக²ணனஸிக்கா²பத³வண்ணனா

86. கடஸக்க²ரா ஸேதமத்திகா விய முது³கா ஸக்க²ரஜாதி. ‘‘அகதபப்³பா⁴ரேதி அவலஞ்ஜிதப்³ப³ட்டா²னத³ஸ்ஸனத்த²ம் வுத்த’’ந்தி லிகி²தம். ‘‘அனோவஸ்ஸகட்டா²னத³ஸ்ஸனத்த²’’ந்தி வத்தப்³ப³ம். மூஸிகுக்குரந்தி மூஸிகாஹி உத்³த⁴டபம்ஸு. ஸுத்³த⁴சித்தாதி கிஞ்சாபி ‘‘ஏவம் பவட்டிதே பத²வீ பி⁴ஜ்ஜிஸ்ஸதீ’’தி ஜானந்தி, நோ பன சே பத²வீபே⁴த³த்தி²கா, ஸுத்³த⁴சித்தா நாம ஹோந்தி. பம்ஸுஆத³யோ த்³வே கோட்டா²ஸா ஆபத்திகரா. கேசி ‘‘ஸப்³ப³ச்ச²ன்னாதீ³ஸு உபட்³டே⁴ து³க்கடஸ்ஸ வுத்தத்தா ஸசே து³க்கடம், யுத்த’’ந்தி வத³ந்தி. தத்த² யுத்தம் தாதி³ஸஸ்ஸ வத்து²னோ ஸம்ப⁴வா, இத⁴ பன ஜாதபத²வீ ச அஜாதபத²வீ சாதி த்³வேயேவ வத்தூ²னி, தஸ்மா த்³வின்னம் ஏகேன ப⁴விதப்³ப³ந்தி ந யுத்தம். ஏத்தா²பி து³க்கடவசனம் அத்தீ²தி சே? தம் பன ஸஞ்ஞாவஸேன, ந வத்து²வஸேனாதி ந யுத்தமேவ.

87. அக்³கி³ம் காதும் வட்டதீதி ஏத்த² ஏத்தாவதா உஸுமம் க³ண்ஹாதி, தஸ்மா வட்டதீதி கேசி. ஏவம் ஸதி பத²வியா அக்³கி³ம்ஹி கதே தூ³ரதோபி பூ⁴மி உண்ஹா ஹோதி, தத்தகம் கோபேதப்³ப³ம் ஸியா, ந ச கப்பதி, தஸ்மா யஸ்மிம் டா²னே பததி, தம் ஸோ அக்³கி³ ட³ஹதி, தஸ்மா வட்டதீதி ஏகே. அட³ஹிதேபி ‘‘அத³ட்³டா⁴ய பத²வியா அக்³கி³ம் ட²பேதும் ந வட்டதீ’’தி வுத்தத்தா அத்தனா பாதனாயேவ தோ³ஸோ பதிதே உபதா³ஹேதி வேதி³தப்³ப³ம்.

பத²வீக²ணனஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன முஸாவாத³வக்³கோ³ பட²மோ.

2. பூ⁴தகா³மவக்³கோ³

1. பூ⁴தகா³மஸிக்கா²பத³வண்ணனா

89. ப²ரஸும் நிக்³க³ஹேதும் அஸக்கோந்தோதி த³ஸ்ஸிதபா⁴வம் ஜானாபேதி. கஸ்மா அயம் ப²ரஸும் உக்³கி³ரீதி சே? மனுஸ்ஸானந்திஆதி³ தஸ்ஸ பரிஹாரோ. ‘‘ஆகோடேஸி சி²ந்தீ³தி ச வசனதோ ருக்க²தே³வதானம் ஹத்தா²னி சி²ஜ்ஜந்தி, ந சாதுமஹாராஜிகாதீ³னம் விய அச்சே²ஜ்ஜானீ’’தி வத³ந்தி.

90-92. ப⁴வந்தி அஹுவுஞ்சாதி த்³விகாலிகோ பூ⁴தஸத்³தோ³. யதி³ பீ³ஜதோ நிப்³ப³த்தேன பீ³ஜம் த³ஸ்ஸிதம், ததே³வ ஸந்தகம் யதி³த³ம். ஸோவ குக்குடோ மம்ஸிமக்கி²தோதி அயமேவ ஹி பரிஹாரோ. அட்ட²கதா²ஸுபி ஹி ‘‘பீ³ஜே பீ³ஜஸஞ்ஞீ’’தி லிகி²தம். யம் பீ³ஜம் பூ⁴தகா³மோ நாம ஹோதி, தஸ்மிம் பீ³ஜே பூ⁴தகா³மபீ³ஜேதி யோஜேத்வா. அமூலகத்தா கிர ஸம்புண்ணபூ⁴தகா³மோ ந ஹோதி, ‘‘ஸமூலபத்தோ ஏவ ஹி பூ⁴தகா³மோ நாமா’’தி காரணம் வத³ந்தி. ‘‘அபூ⁴தகா³மமூலத்தாதி பூ⁴தகா³மதோ அனுப்பன்னத்தா அபூ⁴தகா³மமூலம், பூ⁴தகா³மஸ்ஸ அமூலகத்தா வா. ந ஹி ததோ அஞ்ஞோ பூ⁴தகா³மோ உப்பஜ்ஜதீ’’தி த்³விதா⁴பி லிகி²தம். பியங்கு³ அஸனருக்கோ² வட்³ட⁴னத்தசோ க²ஜ்ஜப²லோ, ‘‘பீதஸாலோ’’திபி வுச்சதி. அமூலகபூ⁴தகா³மே ஸங்க³ஹம் க³ச்ச²தீதி நாளிகேரஸ்ஸேவாயம். க⁴டபிட்டி²ஜாதத்தா, பீ³ஜகா³மானுலோமத்தா ச து³க்கடவத்து². ந வாஸேதப்³ப³ம் ‘‘து³ரூபசிண்ணத்தா’’தி லிகி²தம், ‘‘யேஸம் ருக்கா²னம் ஸாகா² ருஹதீதி வசனதோ யேஸம் ந ருஹதி, தேஸம் ஸாகா²ய கப்பியகரணகிச்சம் நத்தீ²தி ஸித்³த⁴’’ந்தி வுத்தம். முத்³த³திணந்தி தஸ்ஸ நாமம். ‘‘முஞ்ஜதிணந்தி பாடோ²’’தி லிகி²தம்.

ஸமணகப்பேஹீதி ஸமணவோஹாரேஹி, தஸ்மா வத்தப்³ப³ம் பி⁴க்கு²னா ‘‘கப்பியம் கரோஹீ’’தி. தஸ்ஸ ஆணத்தியா கரோந்தேனாபி ஸாமணேராதி³னா ‘‘கப்பிய’’ந்தி வத்வாவ அக்³கி³பரிஜிதம் காதப்³ப³ந்தி ஸித்³த⁴ம். அக்³கி³பரிஜிதாதீ³னி விய கப்பியத்தா அபீ³ஜனிப்³ப³ட்டபீ³ஜானிபி ‘‘பஞ்சஹி ஸமணகப்பேஹீ’’தி (சூளவ. 250) ஏத்த² பவிட்டா²னி, யதா²லாப⁴தோ வா ஸமணகப்பவசனம் க³ஹேதப்³ப³ம். ‘‘கப்பிய’ந்தி வத்துகாமோ ‘கப்ப’ந்தி சே வத³தி, ‘வட்டதீ’தி வத³ந்தீ’’தி வுத்தம். ‘‘கப்பிய’ந்தி வசனம் ஸகஸகபா⁴ஸாயபி வட்டதீ’’தி வத³ந்தி. ‘‘கப்பியந்தி வத்வா’’தி வுத்தத்தா பி⁴க்கு²னா ‘கப்பியம்’இச்சேவ வத்தப்³ப³ம், ‘‘இதரேன பன யாய காயசி பா⁴ஸாயா’’தி வத³ந்தி, வீமம்ஸிதப்³ப³ம். ‘‘உச்சு²ம் கப்பியம் கரிஸ்ஸாமீதி தா³ரும் விஜ்ஜ²தீ’’தி வசனதோ கப்பியம் காதப்³ப³ம் ஸந்தா⁴ய விரத்³தே⁴தி வுத்தம் ஹோதி, ஆசரியா பன ‘‘கப்பியம் காரேதப்³ப³ம் ஸந்தா⁴ய கப்பியந்தி ஸித்தா²தி³ம் காரேதி, வட்டதீ’’தி வத³ந்தி, தஸ்ஸ காரணம் வத³ந்தா காதும் வட்டனபா⁴வேனேவ விரஜ்ஜி²த்வா கதேபி கப்பியம் ஜாதம். யதி³ ந வட்டேய்ய, ஸித்தா²தி³ம்ஹி கதே ந வட்டேய்யாதி, உபபரிக்கி²தப்³ப³ம். உட்டி²தஸேவாலக⁴டம் ஆதபே நிக்கி²பிதும் வட்டதி, விகோபேதுகாமதாய ஸதி து³க்கடம் யுத்தம் விய. ‘‘புப்ப²ரஜ்ஜுபா⁴ஜனக³திகா, தஸ்மா ந வட்டதி. நாளே வா ப³த்³த⁴புப்ப²கலாபே நாளஸ்மிம் கதேபி வட்டதி தஸ்மிம் புப்ப²ஸ்ஸ அத்தி²தாயா’’தி வத³ந்தி. போராணக³ண்டி²பதே³ ‘‘பீ³ஜகா³மேன பூ⁴தகா³மோ த³ஸ்ஸிதோ அனவஸேஸபரியாதா³னத்த²’’ந்தி வுத்தம்.

பூ⁴தகா³மஸிக்கா²பத³வண்ணனா நிட்டி²தா.

2. அஞ்ஞவாத³கஸிக்கா²பத³வண்ணனா

98-9. அஞ்ஞம் வத³தீதி அஞ்ஞவாத³கம், ‘‘வசனம் கரேய்யா’’தி லிகி²தம். ‘‘துண்ஹீபூ⁴தஸ்ஸேதம் நாம’’ந்தி பாடோ². உக்³கா⁴தேதுகாமோதி ஸமோஹனிதுகாமோ, அந்தராயம் கத்துகாமோதி போராணா.

100. ‘‘ஸுதி³ட்டோ² ப⁴ந்தே, ந பனேஸோ கஹாபணோதிஆதீ³ஸு அனாரோபிதே து³க்கடேன முஸாவாத³பாசித்தியம், அரோபிதே பாசித்தியத்³வயம் ஹோதீ’’தி வத³ந்தி, வீமம்ஸிதப்³ப³ம்.

102. அத⁴ம்மேன வா வக்³கே³ன வா ந கம்மாரஹஸ்ஸ வாதி ஏத்த² ‘‘மயி வுத்தே மம் வா அஞ்ஞம் வா ஸங்கோ⁴ அத⁴ம்மேன வா கம்மம், வக்³கே³ன வா கம்மம் கரிஸ்ஸதி, ந கம்மாரஹஸ்ஸ வா மே, அஞ்ஞஸ்ஸ வா கம்மம் கரிஸ்ஸதீ’’தி ந கதே²தீதி யோஜேதப்³ப³ம்.

அஞ்ஞவாத³கஸிக்கா²பத³வண்ணனா நிட்டி²தா.

3. உஜ்ஜா²பனகஸிக்கா²பத³வண்ணனா

103. ‘‘ச²ந்தா³யா’’தி அக்க²ரக்க²ராயாதிஆதி³ விய லிங்க³விபல்லாஸேன வுத்தம், ச²ந்த³த்த²ந்தி வா அத்தோ². யேஸம் ஸேனாஸனானி பஞ்ஞபேதி, தேஸம் அத்தனி ச²ந்த³த்த²ந்தி அதி⁴ப்பாயோ.

106. அனுபஸம்பன்னந்திஆதீ³ஸு கரணத்தோ² க³ஹேதப்³போ³. அஞ்ஞம் அனுபஸம்பன்னந்தி அஞ்ஞேன அனுபஸம்பன்னேன. தஸ்ஸ வாதி அனுபஸம்பன்னஸ்ஸ. ‘‘ஸம்முதிகாலே பஞ்சங்க³விரஹாத³யோ அஸம்மதா நாமா’’தி, ‘‘உபஸம்பன்னேன லத்³த⁴ஸம்முதி ஸிக்கா²பச்சக்கா²னேன வினஸ்ஸதீ’’தி ச வுத்தம். ஸங்கே⁴னாதி ஸப்³பே³ன ஸங்கே⁴ன கம்மவாசாய அஸ்ஸாவேத்வா ‘‘தவேஸோ பா⁴ரோ’’தி கேவலம் ஆரோபிதபா⁴ரோ. கேவல-ஸத்³தோ³ ஹேத்த² கம்மவாசாய அஸ்ஸாவிதபா⁴வமத்தமேவ தீ³பேதி. ஸயமேவாதி இதரேஸம் பி⁴க்கூ²னம் அனுமதியா. அபூ⁴தேன கீ²யனகஸ்ஸ ஆதி³கம்மிகஸ்ஸ கத²ம் அனாபத்தீதி சே? இமினா ஸிக்கா²பதே³ன. முஸாவாதே³ ஆபத்தியேவ த்³வே பாசித்தியோ வுத்தா விய தி³ஸ்ஸந்தி புப்³ப³பயோகே³ ருக்கா²தி³சி²ந்த³னாதீ³ஸு விய, விசாரேதப்³ப³ம்.

உஜ்ஜா²பனகஸிக்கா²பத³வண்ணனா நிட்டி²தா.

4. பட²மஸேனாஸனஸிக்கா²பத³வண்ணனா

110. ‘‘ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதீ’’தி வசனதோ, பரிவாரே ‘‘ஏகா பஞ்ஞத்தி, ஏகா அனுபஞ்ஞத்தீ’’தி (பரி. 226) வசனதோ ச இத⁴ அத்தி² அனுபஞ்ஞத்தீதி ஸித்³த⁴ம். கிஞ்சாபி ஸித்³த⁴ம், ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாதா²’’திஆதி³னா பன பஞ்ஞத்திட்டா²னம் ந பஞ்ஞாயதி, கேவலம் ‘‘அனுஜானாமி, பி⁴க்க²வே, அட்ட²மாஸே…பே… நிக்கி²பிது’’ந்தி ஏத்தகமேவ வுத்தம், தம் கஸ்மாதி சே? பட²மபஞ்ஞத்தியம் வுத்தனயேனேவ வத்தப்³ப³தோ அவிஸேஸத்தா ந வுத்தம். யதி³ ஏவம் கா ஏத்த² அனுபஞ்ஞத்தீதி? அஜ்ஜோ²காஸேதி. அயமனுபஞ்ஞத்தி பஞ்ஞத்தியம்பி அத்தீ²தி சே? அத்தி², தம் பன ஓகாஸமத்ததீ³பனம், து³தியம் சாதுவஸ்ஸிகமாஸஸங்கா²தகாலதீ³பனம். யஸ்மா உப⁴யம்பி ஏகம் காலோகாஸம் ஏகதோ கத்வா ‘‘அஜ்ஜோ²காஸே’’தி வுத்தந்தி தீ³பேந்தோ ப⁴க³வா ‘‘அனுஜானாமி, பி⁴க்க²வே…பே… நிக்கி²பிது’’ந்தி ஆஹாதி வேதி³தப்³ப³ம். தேனேவ மாதிகாட்ட²கதா²யம் (கங்கா². அட்ட². பட²மஸேனாஸனஸிக்கா²பத³வண்ணனா) வுத்தம் ‘‘யத்த² ச யதா³ ச ஸந்த²ரிதும் ந வட்டதி, தம் ஸப்³ப³மித⁴ அஜ்ஜோ²காஸஸங்க்²யமேவ க³தந்தி வேதி³தப்³ப³’’ந்தி. ஹேமந்தகாலஸ்ஸ அனாபத்திஸமயத்தா இத³ம் ஸிக்கா²பத³ம் நிதா³னானபேக்க²ந்தி ஸித்³த⁴ம், ததா² ஹி அஜ்ஜோ²காஸபத³ஸாமத்தி²யேன அயம் விஸேஸோ – வஸ்ஸானகாலே ஓவஸ்ஸகட்டா²னே அஜ்ஜோ²காஸே, மண்ட³பாதி³ம்ஹி ச ந வட்டதி. ஹேமந்தகாலே பகதிஅஜ்ஜோ²காஸே ந வட்டதி, ஸப்³ப³மித⁴ ஓவஸ்ஸகேபி மண்ட³பாதி³ம்ஹி வட்டதி, தஞ்ச கோ² யத்த² ஹிமவஸ்ஸேன ஸேனாஸனம் ந தேமேதி, கி³ம்ஹகாலே பகதிஅஜ்ஜோ²காஸேபி வட்டதி, தஞ்ச கோ² அகாலமேகா⁴த³ஸ்ஸனேயேவாதி அயம் விஸேஸோ ‘‘அட்ட² மாஸே’’தி ச ‘‘அவஸ்ஸிகஸங்கேதே’’தி ச ஏதேஸம் த்³வின்னம் பதா³னம் ஸாமத்தி²யதோபி ஸித்³தோ⁴.

கிஞ்ச பி⁴ய்யோ – அட்ட²கதா²யம் ஸந்த³ஸ்ஸிதவிஸேஸோவ. சம்மாதி³னா ஓனத்³த⁴கோ வா நவவாயிமோ வா ந ஸீக⁴ம் வினஸ்ஸதி. காயானுக³திகத்தாதி காயே யத்த², தத்த² க³தத்தா. ஸங்கி⁴கமஞ்சாதி³ம்ஹி காயம் பு²ஸாபேத்வா விஹரிதும் ந வட்டதீதி த⁴ம்மஸிரித்தே²ரோ. ‘‘ஸங்கி⁴கம் பன ‘அஜ்ஜோ²காஸபரிபோ⁴கே³ன பரிபு⁴ஞ்ஜத², ப⁴ந்தே, யதா²ஸுக²’ந்தி தா³யகா தே³ந்தி ஸேனாஸனம், ஏவரூபே அனாபத்தீ’’தி அந்த⁴கட்ட²கதா²யம் வசனதோ, இத⁴ ச படிக்கே²பாபா⁴வதோ வட்டதி. ‘‘அஞ்ஞஞ்ச ஏவரூபந்தி அபரே’’தி வுத்தம். ‘‘பாத³ட்டா²னாபி⁴முகா²தி நிஸீத³ந்தஸ்ஸ பாத³பதனட்டா²னாபி⁴முகா²’’தி லிகி²தம். ஸம்மஜ்ஜந்தஸ்ஸ பாத³ட்டா²னாபி⁴முக²ந்தி ஆசரியஸ்ஸ தக்கோ.

111. ‘‘பாது³த்³தா⁴ரேனாதி ப³ஹிஉபசாரே டி²தத்தா’’தி லிகி²தம். க³ச்ச²ந்தி, து³க்கடம் த⁴ம்மகதி²கஸ்ஸ விய. கஸ்மா ந பாசித்தியம்? பச்சா² ஆக³தேஹி வுட்³ட⁴தரேஹி உட்டா²பேத்வா க³ஹேதப்³ப³தோ. த⁴ம்மகதி²கஸ்ஸ பன அனுட்ட²பேதப்³ப³த்தா. ‘‘அனாணத்தியா பஞ்ஞத்தியம்பி தஸ்ஸ பா⁴ரோ’’தி வுத்தம்.

112. பரிஹரணேயேவாதி ஏத்த² க³ஹேத்வா விசாரணேதி த⁴ம்மஸிரித்தே²ரோ. அத்தனோ ஸந்தககரணேதி உபதிஸ்ஸத்தே²ரோ. பீ³ஜனீபத்தகம் சதுரஸ்ஸபீ³ஜனீ.

113. ‘‘யோ பி⁴க்கு² வா ஸாமணேரோ வா…பே… லஜ்ஜீ ஹோதீ’தி வுத்தத்தா அலஜ்ஜிம் ஆபுச்சி²த்வா க³ந்தும் ந வட்டதீ’’தி வத³ந்தி. பாடே² ‘‘கேனசி பலிபு³த்³த⁴ம் ஹோதீ’’தி ச அட்ட²கதா²யம் ‘‘பலிபு³த்³த⁴’’ந்தி ச ஸேனாஸனம்யேவ ஸந்தா⁴ய வுத்தம், தஸ்மா ததா²பி அத்தீ²தி க³ஹேதப்³ப³ம். ‘‘அனாபுச்ச²ம் வா’’தி பாடோ².

பட²மஸேனாஸனஸிக்கா²பத³வண்ணனா நிட்டி²தா.

5. து³தியஸேனாஸனஸிக்கா²பத³வண்ணனா

116-7. ஏத்தகமேவ வுத்தமட்ட²கதா²ஸு, ததா²பி பத³ட்டா²த³யோபி லப்³ப⁴ந்தி ஏவ. அனுக³ண்டி²பதே³ ‘‘அஞ்ஞம் அத்த²ரணாதி³ அகப்பியத்தா ந வுத்த’’ந்தி வுத்தம். ‘‘மஞ்சம் வா பீட²ம் வா விஹாரே வா விஹாரூபசாரே வா’தி இமினாபி ஸம்ஸந்த³னத்த²ம் ‘கிஞ்சாபி வுத்தோ, அத² கோ²’திஆதி³ ஆரத்³த⁴’’ந்தி ச வுத்தம். உபசாரமத்தஞ்சேதம் ‘‘ருக்க²மூலே’’தி, தத்த² வத்தப்³ப³ம் நத்தி².

118. அனாபுச்சி²த்வாபி க³ந்தும் வட்டதீதி அஸதியா க³ச்ச²தோபி அனாபத்தி, ஆபுச்ச²னம் பன வத்தம் ஸஞ்சிச்ச அனாபுச்ச²தோ வத்தபே⁴த³து³க்கடத்தா. புக்³க³லிகஸேனாஸனே ஸங்கி⁴கஸேய்யம், ஸங்கி⁴கஸேனாஸனே வா புக்³க³லிகஸேய்யம் அத்த²ரித்வா க³ச்ச²ந்தஸ்ஸ து³க்கடம் யுத்தம் விய. கஸ்மா? ‘‘ஸேய்யாமத்தமேவ நஸ்ஸேய்யா’’தி வுத்தத்தா. இத⁴ பன ‘‘பலிபு³த்³த⁴ம் பலிபு³த்³தோ⁴’’தி து³வித⁴ம்பி அத்தி².

து³தியஸேனாஸனஸிக்கா²பத³வண்ணனா நிட்டி²தா.

6. அனுபக²ஜ்ஜஸிக்கா²பத³வண்ணனா

121. ச²ப்³ப³க்³கி³யேஸுயேவ தே²ரா பி⁴க்கூ²தி கேசி. பாதே³ தோ⁴வித்வாதிஆதி³ம்ஹி பவிஸந்தஸ்ஸ வா பாத³தோ⁴வனபாஸாணதோ யாவ மஞ்சபீட²ம் பஸ்ஸாவத்தா²ய நிக்க²மந்தஸ்ஸ வா யாவ பஸ்ஸாவட்டா²னந்தி யோஜனா காதப்³பா³. ஏவம் ஸந்தே ‘‘பஸ்ஸாவத்தா²ய நிக்க²மந்தஸ்ஸ வா’’தி ந வத்தப்³ப³ம், ‘‘பஸ்ஸாவட்டா²னதோ நிக்க²மந்தஸ்ஸ வா’’தி வத்தப்³ப³ம். பஸ்ஸாவட்டா²னந்தி கத்த²சி போத்த²கே. ததா² ஹி மாதிகாட்ட²கதா²யம் (கங்கா². அட்ட². அனுபக²ஜ்ஜஸிக்கா²பத³வண்ணனா) ‘‘பவிஸந்தஸ்ஸ பாத³தோ⁴வனபாஸாணதோ யாவ மஞ்சபீட²ம் நிக்க²மந்தஸ்ஸ மஞ்சபீட²தோ யாவ பஸ்ஸாவட்டா²னம், தாவ உபசாரோ’’தி வுத்தம், தஸ்மா ‘‘பாதே³ தோ⁴வித்வா பவிஸந்தஸ்ஸ, பஸ்ஸாவத்தா²ய நிக்க²மந்தஸ்ஸ ச த்³வாரே நிக்கி²த்தபாத³தோ⁴வனபாஸாணதோ, பஸ்ஸாவட்டா²னதோ ச மஞ்சபீட²’’ந்தி கத்த²சி போத்த²கே பாடோ², ஸோ அபாடோ². கஸ்மா? மஞ்சபீடா²னம் உபசாரஸ்ஸ வுத்தத்தா. பவிஸந்தஸ்ஸ யாவ மஞ்சபீடா²னம் உபசாரோ, நிக்க²மந்தஸ்ஸ ததோ பட்டா²ய யாவ பஸ்ஸாவட்டா²னம் வச்சகுடிசங்கமட்டா²னந்தி இமினா அத்தே²ன யதா² ஸம்ஸந்த³தி, ததா²விதோ⁴ பாடோ²தி ஆசரியோ.

122. உபசாரம் ட²பேத்வாதி இத⁴ வுத்தஉபசாரம் ட²பேத்வா. ‘‘த³ஸ்ஸனஸவனூபசாரேபி ஸந்த²ரந்தஸ்ஸா’’தி லிகி²தம்.

அனுபக²ஜ்ஜஸிக்கா²பத³வண்ணனா நிட்டி²தா.

7. நிக்கட்³ட⁴னஸிக்கா²பத³வண்ணனா

126-7. ச²ஸத்தகோட்ட²கானி வாதி ஏத்த² த்³வாரகோட்ட²கம் அதி⁴ப்பேதம். ‘‘நிக்க²மா’’தி வசனம் ஸுத்வாபி அத்தனோ ருசியா நிக்க²மதி, அனாபத்தி; இத⁴ அக்³கி³ஸாலாதி³ ஏவ உபசாரோதி.

நிக்கட்³ட⁴னஸிக்கா²பத³வண்ணனா நிட்டி²தா.

8. வேஹாஸகுடிஸிக்கா²பத³வண்ணனா

129. ‘‘பமாணமஜ்ஜி²மஸ்ஸ க³லப்பமாணே தி³ன்னதுலாபி வேஹாஸகுடியேவா’’தி லிகி²தம், ‘‘ந ஸா இத⁴ அதி⁴ப்பேதா’’தி வுத்தம்.

வேஹாஸகுடிஸிக்கா²பத³வண்ணனா நிட்டி²தா.

9. மஹல்லகவிஹாரஸிக்கா²பத³வண்ணனா

135. யாவ த்³வாரகோஸாதி த்³வாரஸமீபா, யாவ பி⁴த்தீதி அத்தோ², தம் ஸுவுத்தம். கவாடவித்தா²ரப்பமாணோதி ஹத்த²பாஸஸ்ஸாதி⁴ப்பேதத்தா, ஸமந்தா கவாடவித்தா²ரப்பமாணஉபசாரஸ்ஸ க³ஹிதத்தா அபரிபூரஉபசாராபி ஹோதி. ஆலோகம் கரோதீதி ஆலோகம் ஸந்தே⁴தி பிதே⁴தீதி ஸந்தி⁴ ஏவ ஆலோகஸந்தி⁴னாமகா ஹோந்தி. வாதபானகவாடலேபகம்மே அப்பஹரிதட்டா²னகிச்சம் நத்தி².

136. இட்ட²காதி ச²த³னகபாலாஸிலாதி³இட்ட²கா. ச²த³னூபரீதி ஏத்த² பட²மம் தாவ ஏகவாரம் அபரிஸேஸம் சா²தே³த்வா புன சா²த³னத³ண்ட³கே ப³ந்தி⁴த்வா து³தியவாரம் ததே²வ சா²தே³தப்³ப³ம். ‘‘ததியவாரசதுத்த²வாரே ஸம்பத்தே த்³வே மக்³கே³ அதி⁴ட்ட²ஹித்வா ததியமக்³க³ம் ஆணாபேத்வா பக்கமிதப்³ப³’’ந்தி வுத்தம், தம் ‘‘புனப்புனம் சா²தா³பேதீ’’தி இமினா யுஜ்ஜதி.

போராணா பன ‘‘பட²மவாரேயேவ தயோ மக்³கே³ அதி⁴ட்டா²தும் வட்டதி, சதுத்த²தோ பட்டா²ய ஆபத்தி பாசித்தியம், சதுத்த²லேபதோ பட்டா²ய ஆபத்தீ’’தி வத³ந்தி. தத்த² ச²த³னே வுத்தவிதி⁴னிதா³னேன ஸமேதி, லேபே வுத்தவிதி⁴திகச்சே²தே³ன ஸமேதி. ததா²பி ஸோ ந யுத்தோவ. நிதா³னே, அட்ட²கதா²யஞ்ச ஸித்³த⁴லேபத்தா ஸப்³ப³ஸோவாபி அச்ச²ன்னே, ச²ன்னேவாபி அனேகஸோ பரியாயஸ்ஸ ததியஸ்ஸேவ அதி⁴ட்டா²னந்தி நோ ஸமேதீதி ஆசரியோ. ‘‘த்³வே மக்³கே³’’தி, ‘‘த்³வே ச²த³னே’’தி ச ‘‘ததியவாரதோ பட்டா²ய ஏவம் சா²தா³பேஹீ’தி ஆணாபேத்வா பக்கமிதப்³ப³’’ந்தி ச உபதிஸ்ஸத்தே²ரோ வத³தி கிர.

மஹல்லகவிஹாரஸிக்கா²பத³வண்ணனா நிட்டி²தா.

10. ஸப்பாணகஸிக்கா²பத³வண்ணனா

140. ஸப்பாணகஸிக்கா²பத³ம் உத்தானத்த²மேவ.

ஸமத்தோ வண்ணனாக்கமேன பூ⁴தகா³மவக்³கோ³ து³தியோ.

3. ஓவாத³வக்³கோ³

1. ஓவாத³ஸிக்கா²பத³வண்ணனா

144. கதா²னுஸாரேனாதி யோ பி⁴க்கு²னோவாத³கத்தி²கோ கிம்ஸீலோ கிம்ஸமாசாரோ கதரகுலா பப்³ப³ஜிதோதிஆதி³ கதா²னுஸாரேனாதி அத்தோ². ஸக்³க³மக்³க³க³மனேபீதி அபி-ஸத்³தே³ன மோக்க²க³மனேபி. ‘‘லக்க²ணப்படிவேத⁴படிஸம்யுத்தோ’’தி அட்ட²க³ருத⁴ம்மானுஸாரேன வத்தப்³ப³ம் த⁴ம்மகத²ம் ஸந்தா⁴ய வுத்தம்.

145-147. நிஸ்ஸீமந்தி விஹாரே ப³த்³த⁴ஸீமதோ அஞ்ஞம் அப³த்³த⁴ஸீமம், கா³மஸீமாதி³ந்தி அத்தோ². ‘‘ஸுபினந்தேனபீ’’தி ந ஸப்³பே³ஸந்தி இத⁴ பா³ஹுல்லனயேன வுத்தம். ச²ப்³ப³க்³கி³யா ஹி கேசி வீஸதிவஸ்ஸாபி அத்தி² அதிரேகவீஸதிவஸ்ஸாபீதி இமினா இமம் மஜ்ஜி²மபோ³தி⁴காலே பஞ்ஞத்தந்தி விஞ்ஞாயதி. ‘‘ஸீலவா ஹோதீ’’தி வத்வா தஸ்ஸ சதுப்³பி³த⁴த்தா இத⁴ அதி⁴ப்பேதஸீலமேவ த³ஸ்ஸேதும் ‘‘பாதிமோக்க²ஸம்வரஸம்வுதோ’’திஆதி³ வுத்தம். க³ண்டா²னுக³ண்டி²பதே³ஸு ‘‘ஸதிஸம்வராத³யோ இத⁴ நாதி⁴ப்பேதா, தேன விப⁴ங்க³பாட²ம் த³ஸ்ஸேதி அட்ட²கதா²சரியோ’’தி வுத்தம். அத்த²தோதி பாளிஅத்த²தோ. காரணதோதி காரணூபபத்திதோ, அட்ட²கதா²தோதி அதி⁴ப்பாயோ. அத² வா காரணதோதி த⁴ம்மதோ, தேன அத்த²தோ த⁴ம்மதோதி வுத்தம் ஹோதி. அத² வா அத்த²தோதி ப²லதோ. ‘‘காரணதோதி ஹேதுதோ. த⁴ம்மபத³ம்பி ஜாதகேன ஸஹா’’தி லிகி²தம். பஞ்ஹம் கதே²துந்தி ‘‘பஞ்ஹம் புட்டோ² கதே²தீ’’தி ஏத்த² பி⁴க்கு²னியா புட்டே²ன ‘‘ந ஜானாமீ’’தி ந ஸக்கா கதே²தும். ‘‘ந கோ² பன தம் ப⁴க³வந்த’’ந்தி பாடோ². ‘‘ந கோ² பனேத’’ந்தி ச லிக²ந்தி, தம் ந ஸுந்த³ரம். ‘‘காஸாயவத்த²வஸனாயா’’தி வசனதோ பாராஜிகாயபி ந வட்டதி. பி⁴க்கு²னியா காயஸம்ஸக்³க³மேவ வுத்தம். மேது²னேன ஹி பி⁴க்கு²னீதூ³ஸகோ ஹோதி.

148-9. பி⁴க்கூ²னம் ஸந்திகே உபஸம்பன்னா நாம பரிவத்தலிங்கா³, பஞ்சஸதா ஸாகியானியோ வா. ‘‘த⁴ம்மதே³ஸனாபத்திமோசனத்த²ம் பனா’’தி வசனதோ மாதுகா³மக்³க³ஹணேன ஸப்³ப³த்த² பி⁴க்கு²னீஸங்க³ஹம் க³ச்ச²தீதி ஸித்³த⁴ம். பி⁴க்கு²னிக்³க³ஹணேன பன மாதுகா³மோ திரியம் தரணஸிக்கா²பதே³ (பாசி. 187-190) ஸங்க³ஹிதோ, ந அஞ்ஞத்த². ‘‘ஓஸாரேதப்³பா³’’தி பாளிபாடோ², பாளி ஓஸாரேதப்³பா³தி அத்தோ². ‘‘ஓஸாரேதப்³ப³’’ந்தி அட்ட²கதா²பாளி. ஏகஸ்மிம் டா²னே வந்தி³தே தோ³ஸாபா⁴வதோ ப³ஹூஸு ஏகாய வந்தி³தே வட்டதீதி சே? பி⁴க்கூ²ஹி கத்தப்³ப³ம் நத்தி², பி⁴க்கு²னியாயேவ கத்தப்³ப³ம், தஸ்மா ந வட்டதி. ‘‘யத்த² கத்த²சி நிஸின்னாயாதி அந்தோத்³வாத³ஸஹத்தே² நிஸின்னாயா’’தி வத³ந்தி. ந நிமந்திதா ஹுத்வா க³ந்துகாமாதி நிமந்திதா ஹுத்வா க³ந்துகாமா பி⁴க்கூ² இத⁴ நாதி⁴ப்பேதா, வஸ்ஸம் உபக³ந்துகாமாவ அதி⁴ப்பேதாதி அத்தோ². யதோ பனாதி பி⁴க்கு²னீவிஹாரதோ. தத்தா²தி பி⁴க்கு²னீவிஹாரே. கிஞ்சாபி ‘‘ஓவாத³தா³யகா பி⁴க்கூ²’’தி வசனதோ ஓவாத³தா³யகேஹேவ ஸபி⁴க்கு²கோ ஆவாஸோ ஹோதி, ந ஸப்³பே³ஹீதி ஆபன்னோ, ததா²பி அஸதி பி⁴க்கு²னோவாத³கே ஓவாத³ஸம்வாஸானம் அத்தா²ய யாசனத்தா²ய அவஸ்ஸம் க³ந்தப்³ப³த்தா அஞ்ஞேஹிபி பி⁴க்கூ²ஹி ஸபி⁴க்கு²கோபி ஸபி⁴க்கு²கோ ஏவாதி வேதி³தப்³போ³. ஸா ரக்கி²தப்³பா³தி வஸ்ஸச்சே²தா³பத்தி ரக்கி²தப்³பா³. கஸ்மா? ஆபதா³ஸு ஹீதிஆதி³. ‘‘அயம் உபோஸதோ² சாதுத்³த³ஸிகோதி புச்சி²தப்³ப³’’ந்தி வுத்தம், தம்பி தேரஸியம்யேவ, ஏதரஹி பன பி⁴க்கு²னியோ சாதுத்³த³ஸியம்யேவ க³ந்த்வா ‘‘கதா³ அய்ய உபோஸதோ²’’தி புச்ச²ந்தி. ‘‘ஜாயாயோ வா ஜாரியோ வா’’தி அதி⁴ப்பாயேன வுத்தம் கிர. ‘‘க³ச்சே²ய்ய சே, ஆபத்தீ’’தி பாடோ². த்³வே திஸ்ஸோதி த்³வீஹி தீஹி. ஏகதோ ஆக³தானம் வஸேன ‘‘தாஹீ’’தி ப³ஹுவசனம் வுத்தந்தி அதி⁴ப்பாயோ. ‘‘ஏகா பி⁴க்கு²னீ வா ப³ஹூ பி⁴க்கு²னீ வா ப³ஹூஹி பி⁴க்கு²னுபஸ்ஸயேஹி ஓவாத³த்தா²ய பேஸிதா’’தி வசனஸ்ஸ வித்தா²ரோ ‘‘பி⁴க்கு²னிஸங்கோ⁴ ச அய்ய பி⁴க்கு²னியோ சா’’திஆதி³னா வுத்தோ. ‘‘பி⁴க்கு²னிஸங்கோ⁴ ச அய்ய பி⁴க்கு²னியோ சா’திஆதி³ நானாஉபஸ்ஸயேஹி பேஸிதாய வசன’’ந்தி ச ‘‘அபரிபுண்ணஸங்க⁴புக்³க³லனானாவாஸது³தியவசனவஸேன பஞ்சக்க²த்தும் உபஸங்கமனம் வுத்த’’ந்தி ச லிகி²தம். யஸ்மிம் ஆவாஸே பாதிமோக்கு²த்³தே³ஸோ ந பவத்ததி, தத்தா²பி யாசனம் ஸம்படிச்சி²த்வா புனதி³வஸே யேன படிக்³க³ஹிதம், தேன ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ’’திஆதி³ வத்தப்³ப³ம். அத்தி² சே ஸம்மதோ, நித்³தி³ஸிதப்³போ³. ‘‘ஸயமேவ சே ஸம்மதோ, அஹ’ந்தி வத்தப்³ப³’’ந்தி வுத்தம். ஸசே ஸம்மதோ வா ஓவாத³படிக்³கா³ஹகோ வா பாதிமோக்க²ம் உத்³தி³ஸதி, அஞ்ஞேன ஆரோசாபேதப்³ப³ந்தி ஏகே, ‘‘அத்தனாபி ஆரோசேதும் வட்டதீ’’தி ச வத³ந்தி. கேஸுசி போத்த²கேஸு ‘‘அய்யானம் பவாரேதீ’’தி லிகி²தம், ஏவம் ஸதி ‘‘அய்யஸ்ஸ பவாரேமீ’’தி வத்தப்³ப³ம், போத்த²கே நத்தி².

ஓவாத³ஸிக்கா²பத³வண்ணனா நிட்டி²தா.

2. அத்த²ங்க³தஸிக்கா²பத³வண்ணனா

153. முனாதீதி ஜானாதி. அந்தரதா⁴யதிபீதி ஏத்த² தது³த்தமம் சே அத்தி², தம் பஸ்ஸாமி, யம் விசித்தம் வா, தத³த்த²ஞ்ச. தக்³க⁴ காரணம். ஸஹ உப்பாத³மனந்தரா கிரியா. யமா ச தே மனஸா கதத்ர நேத்வாதி. யதா² பாதோ ஸியா பாதோ ப⁴வம் பாதோவ உத³கதோ உக்³க³ந்த்வா டி²தம், ததா² விரோசமானம் அங்கீ³ரஸம் பு³த்³த⁴ம் பஸ்ஸ, ந கேவலம் பது³மம் விய, விரோசமானம் தபந்தமாதி³ச்சமிவந்தலிக்கே²தி ஸம்ப³ந்தோ⁴. அத² வா அங்கீ³ரஸம் பு³த்³த⁴ம் பது³மம்வ விரோசமானம் ஸூரியம்வ தபந்தம் பஸ்ஸ பு³த்³த⁴ம். யதா² பாதோ ஸியா பு²ல்லமவீதக³ந்த⁴ம் கோகனுத³ஸங்கா²தம் பது³மம் பஸ்ஸஸி, ததா² விரோசமானம் அங்கீ³ரஸம் பு³த்³த⁴ம் பஸ்ஸ. உப⁴யேனேவ ஹி ப⁴க³வதோ கந்தி தீ³பிதாதி கத்வா தீ³பிதகு³ணஸுப⁴ம் பு³த்³த⁴ம் ஸக்கத்வா தம் கந்திம் பூஜேய்ய. பூஜனேய்யதோபி வீதினாமேய்ய இதி லக்க²யே. ‘‘ஏகதோ உபஸம்பன்னாயா’’தி பாளி.

156. ‘‘ஏகதோ உபஸம்பன்னான’’ந்தி அட்ட²கதா²பாடோ². ‘‘அப⁴ப்³போ³ த்வ’’ந்திஆதி³வசனதோ அனுகம்பாவஸேன ஸத்³தி⁴விஹாரிகாதி³ம் ஸங்கி⁴கா விஹாரா நிக்கட்³டா⁴பேந்தஸ்ஸ அனாபத்தி விய தி³ஸ்ஸதி. அப⁴ப்³போ³ ஹி தே²ரோ ஸஞ்சிச்ச தம் காதும், க³வேஸிதப்³பா³வ ஏத்த² யுத்தீதி கேசி. தே²ரேன ஸிக்கா²பத³பஞ்ஞத்திதோ புப்³பே³ கதந்தி மம தக்கோ.

அத்த²ங்க³தஸிக்கா²பத³வண்ணனா நிட்டி²தா.

3. பி⁴க்கு²னுபஸ்ஸயஸிக்கா²பத³வண்ணனா

162. ‘‘ஏகரத்தம்பி வஸந்தீ’’தி (பாசி. 161) வசனதோ யத்த² ரத்தியம் ந வஸந்தி, தத்த² க³ந்த்வா ஓவதி³தும் வட்டதீதி ஏகே. யதி³ ஏவம் ஸங்கேதட்டா²னம் க³ந்த்வா ஓவதி³தும் வட்டதீதி ஸித்³த⁴ம். ‘‘ததோ அத்³த⁴யோஜனேயேவ ஸபி⁴க்கு²கோ ஆவாஸோ இச்சி²தப்³போ³’’தி ந வத்தப்³ப³ம். பி⁴க்கு²னோவாத³கோ சே அத்³த⁴யோஜனம் க³ந்த்வா ஓவதி³துகாமோ ஹோதி, பி⁴க்கு²னிஸங்கோ⁴ ச அத்³த⁴யோஜனம் க³ந்த்வா ஸோதுகாமோ, ‘‘வட்டதீ’’தி வத்தப்³ப³ம் ஸியா, தஞ்ச ந வுத்தம், தஸ்மா ந வட்டதி. ஹேட்டி²மபரிச்சே²தே³ன பன ‘‘ஏகரத்தம்பீ’’தி வுத்தம். ததோ பட்டா²ய உபஸ்ஸயம் ஹோதி, ந உபஸ்ஸயஸங்கே²பேன கதமத்தேனாதி வுத்தம் ஹோதி. யத்த² வாஸூபக³தா பி⁴க்கு²னியோ, ஸோ உபஸ்ஸயஸங்க்²யம் க³ச்ச²தி, தத்த² ந க³ந்த்வா ஓவாதோ³ தா³தப்³போ³. ஏகாவாஸே தி³வா வட்டதீதி ஏகே, விசாரேத்வா யுத்ததரம் க³ஹேதப்³ப³ம்.

பி⁴க்கு²னுபஸ்ஸயஸிக்கா²பத³வண்ணனா நிட்டி²தா.

4. ஆமிஸஸிக்கா²பத³வண்ணனா

164. ‘‘உபஸம்பன்னம் ஸங்கே⁴ன அஸம்மத’’ந்தி பாளிவசனதோ, ‘‘ஸம்மதேன வா ஸங்கே⁴ன வா பா⁴ரம் கத்வா ட²பிதோ’’தி அட்ட²கதா²வசனதோ ச அட்ட²ஹங்கே³ஹி ஸமன்னாக³தோ ஸம்மதேன வா விப்பவஸிதுகாமேன ‘‘யாவாஹம் ஆக³மிஸ்ஸாமி, தாவ தே பா⁴ரோ ஹோதூ’’தி யாசித்வா ட²பிதோ, தஸ்ஸாபா⁴வதோ ஸங்கே⁴ன வா ததே²வ பா⁴ரம் கத்வா ட²பிதோ அட்ட²ஹி க³ருத⁴ம்மேஹி ஓவதி³தும் லப⁴தி, பகே³வ அஞ்ஞேன த⁴ம்மேனாதி ஸித்³த⁴ம். ‘‘யோ பன பி⁴க்கு² அஸம்மதோ பி⁴க்கு²னியோ ஓவதே³ய்ய, பாசித்திய’’ந்தி பகே³வ பா⁴ரம் கத்வா அட்ட²பிதம் ஸந்தா⁴ய வுத்தந்தி வேதி³தப்³ப³ம். அப⁴யகி³ரிவாஸீனம்பி இத³மேவ மதம், அனுக³ண்டி²பதே³ பன இமம் நயம் படிக்கி²பித்வா ‘‘நத்தி² கோசீ’’திஆதி³னா ‘‘ஏதரஹி ஓவாத³கோ அஸம்மதோ பி⁴க்கு²னோவாத³கோ நாமா’’தி வத்வா ‘‘யம் பன அந்த⁴கட்ட²கதா²யம் வுத்தம் ‘உபஸம்பன்னம் ஸங்கே⁴ன கம்மவாசாய அஸம்மதம், பி⁴க்கு²ஸங்கே⁴ன பன பி⁴க்கு²னிஸங்க⁴ஸ்ஸ அனுக்³க³ஹம் கரோத², பி⁴க்கு²னியோ ஓவத³த², பி⁴க்கு²ஸங்க⁴ஸ்ஸ ச கரோத² பா²ஸுவிஹாரந்தி ஏவம் யாசித்வா ட²பிதோ பி⁴க்கு²ஸங்க⁴ம் ஆபுச்சி²த்வா, ததோ ஸோ தே²ரோ பி⁴க்கு²னியோ ஓவத³தி, ஏவரூபம் பி⁴க்கு²ஸங்கே⁴ன அஸம்மதந்தி, தத்ர வுத்தனயேனேவ அத்தோ² க³ஹேதப்³போ³’’தி வுத்தம். போராணக³ண்டி²பதே³ பன ‘‘அஸம்மதோ கா³மம் ஓவாத³த்தா²ய ஆக³தானம் பி⁴க்கு²னீனம் வசனம் ஸுத்வா படிவசனம் தே³ந்தோ ஸங்கா⁴னுமதியா, ந ஞத்திசதுத்தே²னா’’தி வுத்தம், தம் அனுக³ண்டி²பத³மதேன ஸமேதி, அந்த⁴கட்ட²கதா²யம் வுத்தவசனம் தேன ஸமேதி, தஞ்ச பாளிவசனம், ந ஹி ஓவாத³படிக்³கா³ஹகோ, பாதிமோக்கு²த்³தே³ஸகோ வா ‘‘பாஸாதி³கேன ஸம்பாதே³தூ’’தி வசனமத்தேன பி⁴க்கு²னோவாத³கோ நாம ஹோதி. ஹோதீதி சே, அனுபஸம்பன்னோபி தத்தகேன வசனேன ‘‘பி⁴க்கு²னோவாத³கோ ஹோதூ’’தி வத்தப்³போ³. ஹோதீதி சே, யம் வுத்தம் க³ண்டா²னுக³ண்டி²பதே³ஸு ‘‘அஸம்மதோ நாம அஸம்மதபா⁴வேன ‘ப³ஹுஸ்ஸுதோ த்வம் ஓவதா³ஹீ’தி ஸங்கே⁴ன பா⁴ரம் கத்வா ட²பிதோ’’தி. ஏத்த² பா³ஹுஸச்சேன கிம் பயோஜனம். அனுக³ண்டி²பதே³யேவ ‘‘அப⁴யகி³ரிவாஸீ வத³தீதி ஸுத்வா ஸம்மதேன வா ஆணத்தோ ஓவதி³தும் லப⁴தீதி த⁴ம்மஸிரித்தே²ரோ பச்சா² அனுஜானாதீ’’தி வுத்தம். கிம் ப³ஹுகாய. ‘‘பாஸாதி³கேன ஸம்பாதே³தூ’’தி ஏத்தகமத்தேன பி⁴க்கு²னோவாத³கோ ஹோதி. அட்ட²கதா²யம் ‘‘பா⁴ரம் கத்வா’’தி இமினா கிம் பயோஜனம், தத்தகம்பி வத்தும் அஞ்ஞோ ந லப⁴தி, தேன ச ‘‘அனுஜானாமி, பி⁴க்க²வே, ட²பேத்வா பா³லம் கி³லானம் க³மிகம் அவஸேஸேஹி ஓவாத³ம் க³ஹேது’’ந்தி (சூளவ. 414) அயம் பாளி விருஜ்ஜே²ய்ய. கத²ம்? தஸ்ஸ ஹி ‘‘ந, பி⁴க்க²வே, ஓவாதோ³ ந பச்சாஹரிதப்³போ³’’தி (சூளவ. 415) சனதோ ஸம்மதாஸம்மதபா⁴வேன நத்தி² கோசீதி ‘‘பாஸாதி³கேன ஸம்பாதே³தூ’’தி வத்தப்³ப³ம் ஸியா, வத³ந்தோ ச இத⁴ பட²மேன ஆபத்தியா காரேதப்³போ³ ஹோதீதி. ஹோது அஸம்மதத்தா, அகதபா⁴ரத்தா ச. இமஸ்ஸ ச பி⁴க்கு²னோவாத³கத்தே இமஸ்ஸ கீ²யனேன து³க்கடம் ஸியா, ஸப்³ப³மேதம் அனிட்ட²ம், தஸ்மா அட்ட²கதா²யம் ‘‘அயமேத்த² பி⁴க்கு²னோவாத³கோ நாமா’’தி அவுத்தத்தா ததா² பா⁴ரம் கத்வா ட²பிதோ ஓவதி³தும் லப⁴தியேவ, நாஞ்ஞோதி ஆசரியோ.

ஆமிஸஸிக்கா²பத³வண்ணனா நிட்டி²தா.

5. சீவரதா³னஸிக்கா²பத³வண்ணனா

169. ஸாதி³யிஸ்ஸஸீதி புச்சா².

சீவரதா³னஸிக்கா²பத³வண்ணனா நிட்டி²தா.

6. சீவரஸிப்³ப³னஸிக்கா²பத³வண்ணனா

176. வஞ்சேத்வாதி ‘‘தவ ஞாதிகாயா’’தி அவத்வா ‘‘ஏகிஸ்ஸா பி⁴க்கு²னியா’’தி ஏத்தகமேவ வத்வா, தே ஹி ‘‘ஏகிஸ்ஸா’’தி வசனம் ஸுத்வா அஞ்ஞாதிகாய ஸந்தகஸஞ்ஞினோ ஸிப்³பே³ஸும். இமஸ்மிம் ஸிக்கா²பதே³ ‘‘சீவரம் நாம ச²ன்னம் சீவரானம் அஞ்ஞதரம் சீவர’’ந்தி ஏத்தகமேவ பாளி, தேன வுத்தம் ‘‘சீவரந்தி யம் நிவாஸேதும் வா பாருபிதும் வா’’திஆதி³. ‘‘விகப்பனுபக³ம் பச்சி²ம’’ந்தி ச லிகி²தம், ஸோ பமாத³லேகோ².

சீவரஸிப்³ப³னஸிக்கா²பத³வண்ணனா நிட்டி²தா.

7. ஸம்விதா⁴னஸிக்கா²பத³வண்ணனா

181. தா பி⁴க்கு²னியோ தூ³ஸயிம்ஸூதி விபரிணாமோ காதப்³போ³.

182-4. ஸம்பத³ந்தீதி பத³ஸா க³ச்ச²ந்தி. வுத்தனயேனேவாதி ‘‘ஸம்பதந்தி ஏத்தா²தி ஸம்பாதோ’’திஆதி³னா. பத³க³தே உபசாரோ ந லப்³ப⁴தி, அச்சாஸன்னத்தா மிஸ்ஸம் விய ஹோதீதி. குக்குடவஸ்ஸிதபரிச்சி²ன்னோ மஹாஅட்ட²கதா²யம். ‘‘தம்பி வோஹாரேனா’’தி லிகி²தம். ‘‘யேபு⁴ய்யேன ததா² ஸன்னிவேஸோ ஹோதீதி கத்வா அட்ட²கதா²யம் வுத்தம், தஸ்மா ந பமாத³லேகோ²’’தி ச, ‘‘உக்கட்ட²பரிச்சே²தே³ன வுத்தம் அட்ட²கதா²யம், ததோ உத்³த⁴ம் அத்³த⁴யோஜனலக்க²ணஸம்பத்தம் நாம ஹோதீதி க³ஹேதப்³ப³’’ந்தி ச வுத்தம். ‘‘கப்பியபூ⁴மி கிராயம்…பே… ந வத³ந்தீ’’தி வுத்தம். து³த்³த³ஸஞ்ஹேத்த² காரணம். கதரம் பன தந்தி? ‘‘க³ச்சா²மாதி ஸம்வித³ஹதி, ஆபத்தி து³க்கடஸ்ஸா’’தி வுத்தம். தத்த² ‘‘க³ச்சா²மா’’தி வத்தமானவசனந்தஞ்ச, அமக்³கே³ பி⁴க்கு²னுபஸ்ஸயாதி³ம்ஹி ந ஸம்ப⁴வதியேவ மனுஸ்ஸானம் அந்தரக⁴ராதி³ம்ஹி மக்³க³ஸங்கே²பக³மனதோ, உச்சாஸயனாதி³உப்பத்திட்டா²னத்தா ச. ந தித்தி²யஸேய்யாய வா பப்³ப³ஜிதாவாஸத்தா. த்³வாரேதி ஸமீபத்தே² பு⁴ம்மம், தஸ்மா தம் த³ஸ்ஸேதும் புன ‘‘ரதி²காயா’’தி ஆஹ. ஸேஸஅட்ட²கதா²யம் ‘‘ஏத்த²ந்தரே ஸம்வித³ஹிதேபி பி⁴க்கு²னோ து³க்கட’’ந்தி ஆக³தத்தா ந ஸமேதி. ‘‘கா³மந்தரே’’தி வசனதோ அஞ்ஞகா³மஸ்ஸ உபசாரோக்கமனே ஏவ ஆபத்தி. ‘‘அத்³த⁴யோஜனே’’தி வசனதோ அதிக்கமனேயேவ யுத்தம்.

185. ரட்ட²பே⁴தே³தி விலோபே. போராணக³ண்டி²பதே³ ‘‘தயோபி ஸங்கேதா காலதி³வஸமக்³க³வஸேன, தத்த² பச்சி²மேனேவ ஆபத்தீ’’தி வுத்தம். ‘‘இமினா மக்³கே³னா’’தி விஸ்ஸஜ்ஜேத்வா அஞ்ஞேன க³ச்ச²ந்தி சே, ஆபத்தியேவாதி அத்தோ².

ஸம்விதா⁴னஸிக்கா²பத³வண்ணனா நிட்டி²தா.

8. நாவாபி⁴ருஹனஸிக்கா²பத³வண்ணனா

189. நதி³யா குதோ கா³மந்தரந்தி சே? ‘‘யஸ்ஸா நதி³யா’’திஆதி³மாஹ. கா³மந்தரக³ணனாயாதி யஸ்மிம் கா³மதித்தே² ஆருள்ஹோ, தம் ட²பேத்வா அஞ்ஞகா³மக³ணனாய. ‘‘மாதுகா³மோபி இத⁴ ஸங்க³ஹம் க³ச்ச²தீ’’தி ஆசரியஸ்ஸ தக்கோ, தேனேவ ‘‘உப⁴யத்த² ஏகதோ உபஸம்பன்னாய து³க்கடம், ஸிக்க²மானாய ஸாமணேரியா அனாபத்தீ’’தி ச ந வுத்தம். ஏஸேவ நயோ அஞ்ஞேஸுபி ஏவரூபேஸு.

191. ‘‘லோகஸ்ஸாத³மித்தஸந்த²வவஸேன கேளிபுரேக்கா²ரா ஸம்வித³ஹித்வா’’தி வுத்தத்தா அகுஸலசித்தம் லோகவஜ்ஜந்தி வத்தப்³ப³ந்தி? ந வத்தப்³ப³ம், ‘‘கேளிபுரேக்கா²ரா’’தி வசனம் யேபு⁴ய்யதாய வுத்தம். போராணக³ண்டி²பதே³ ச ‘‘தீணி சித்தானி திஸ்ஸோ வேத³னா’’தி வுத்தம், ஸம்வித³ஹனகாலே வா கேளிபுரேக்கா²ரோ பி⁴க்கு² ஸம்வித³ஹதி, ஆபத்தி பி⁴க்கு²னோ கா³மந்தரோக்கமனே, அத்³த⁴யோஜனாதிக்கமே வா. குஸலசித்தோ வா ஹோதி பச்சவேக்க²ந்தோ, சேதியாதீ³னி வா பஸ்ஸந்தோ, அப்³யாகதசித்தோ வா ஹோதி கிலமத²வஸேன நித்³தா³யந்தோதி திசித்தானி க³ஹிதானீதி வேதி³தப்³பா³.

நாவாபி⁴ருஹனஸிக்கா²பத³வண்ணனா நிட்டி²தா.

9. பரிபாசிதஸிக்கா²பத³வண்ணனா

192. சேடகேதி தா³ரகே. தருணபோதகேதி போராணா. ‘‘பாபபி⁴க்கூ²னம் பக்கு²பச்சே²தா³ய இத³ம் பஞ்ஞத்தம், தஸ்மா பஞ்ச போ⁴ஜனேயேவாபத்தி வுத்தா’’தி லிகி²தம்.

194-7. நிப்பா²தி³தந்தி விஞ்ஞத்தியா ந ஹோதி, கிந்து பரிகதா²தீ³ஹி, தஸ்மா இமினா ஸிக்கா²பதே³ன அனாபத்தி, தம் ஸந்தா⁴ய ‘‘ஸப்³ப³த்த² அனாபத்தீ’’தி வுத்தம். ‘‘கதா²னுஸாரேன தத்த² பஸீதி³த்வா தே³ந்தி, இத³ம் பரிபாசிதம் ந ஹோதி, வட்டந்தீ’’தி பட²மஸிக்கா²பதே³ வுத்தத்தாதி த⁴ம்மஸிரித்தே²ரோ, உபதிஸ்ஸத்தே²ரோ பன ‘‘இதரம்பி வட்டதியேவா’’தி ஆஹ. போராணக³ண்டி²பதே³ பன ‘‘யஸ்மா தே³வத³த்தோ பகதியா தத்த² பி⁴க்கு²னிபரிபாசிதம் பு⁴ஞ்ஜதி, தஸ்மா இமம் அட்டு²ப்பத்திம் நிதா³னம் கத்வா இத³ம் ஸிக்கா²பத³ம் பஞ்ஞத்த’’ந்தி வுத்தம்.

பரிபாசிதஸிக்கா²பத³வண்ணனா நிட்டி²தா.

10. ரஹோனிஸஜ்ஜஸிக்கா²பத³வண்ணனா

198. ‘‘உபனந்த³ஸ்ஸ சதுத்த²ஸிக்கா²பதே³ன சா’’தி பாடோ².

ரஹோனிஸஜ்ஜஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன ஓவாத³வக்³கோ³ ததியோ.

4. போ⁴ஜனவக்³கோ³

1. ஆவஸத²பிண்ட³ஸிக்கா²பத³வண்ணனா

203-4. பூக³ஸ்ஸாதி பூகே³ன. குக்குச்சாயந்தோதி நிஸ்ஸரணேனேத்த² ப⁴விதப்³ப³ம், தம் மயம் ந ஜானாமாதி ஸன்னிட்டா²னஸ்ஸ கரணவஸேன ‘‘குக்குச்சாயந்தோ’’தி வுச்சதி. யதா² ஹி ஆயஸ்மா உபாலி நயக்³கா³ஹேன ‘‘அனாபத்தி ஆவுஸோ ஸுபினந்தேனா’’தி (பாரா. 78) ஆஹ, ததா² தே²ரோபி ‘‘அனாபத்தி கி³லானஸ்ஸா’’தி கஸ்மா ந பரிச்சி²ந்த³தீதி? அனத்தாதி⁴காரத்தா வினயபஞ்ஞத்தியா, ‘‘நாயம் அத்தனோ ஓகாஸோ’’தி படிக்கி²த்தத்தா, ஸிக்கா²பத³ஸ்ஸ அபரிபுண்ணத்தா. பட²மபாராஜிகஸிக்கா²பதே³ பரிபுண்ணம் கத்வா பஞ்ஞத்தேயேவ ஹி ஸோ தே²ரோ ‘‘அனாபத்தி ஸுபினந்தேனா’’தி ஆஹ ‘‘அஞ்ஞத்ர ஸுபினந்தா’’தி வுத்தபதா³னுஸாரேனாதி. யஸ்மா ஓதி³ஸ்ஸ அயாவத³த்தே²வ தா³யகானம் பீளா நத்தி², தஸ்மா ‘‘அனோதி³ஸ்ஸ யாவத³த்தோ²’’தி வுத்தம்.

208. ‘‘அந்தராமக்³கே³ ஏகதி³வஸ’ந்தி ஏகம்யேவ ஸந்தா⁴ய வுத்த’’ந்தி ச ‘‘ஏஸேவ நயோதி வுத்தனயமேவ த³ஸ்ஸேதும் க³ந்த்வா பச்சாக³ச்ச²ந்தோ ஹீதிஆதி³மாஹா’’தி ச ‘‘ஸுத்³த⁴சித்தோ ஹுத்வா பகதிக³மனேவ பு⁴ஞ்ஜிதும் லப⁴தீ’’தி ச ‘‘அகி³லானஸ்ஸ கி³லானஸஞ்ஞினோ காயேன ஸமுட்டா²தீ’’தி ச லிகி²தம்.

ஆவஸத²பிண்ட³ஸிக்கா²பத³வண்ணனா நிட்டி²தா.

2. க³ணபோ⁴ஜனஸிக்கா²பத³வண்ணனா

209-218. கு³ள்ஹபடிச்ச²ன்னோதி அபாகடோவ. ஏகோ புத்தேனாதி ஏகஸ்ஸேகம் ப⁴த்தம் ‘‘அஹம் அஞ்ஞேன நிமந்திதோ’’தி ந வுச்சதி. ‘‘ஸசே ஏகதோ க³ண்ஹந்தி , க³ணபோ⁴ஜனம் ஹோதீ’’தி (பாசி. அட்ட². 217-218) வுத்தத்தா சத்தாரோ உபாஸகா சத்தாரோ பி⁴க்கூ² விஸும் விஸும் நிமந்தேத்வா ஹத்த²பாஸே டி²தானம் சே தே³ந்தி, க³ணபோ⁴ஜனம் ஹோதி ஏவாதி ஏகே, தம் ந யுத்தம் விய. ‘‘விஞ்ஞத்திதோ பஸவனே க³ணஸ்ஸ ஏகதோ க³ஹணே இமினா ஸிக்கா²பதே³ன ஆபத்தி, விஸும் க³ஹணே பணீதபோ⁴ஜனஸூபோத³னவிஞ்ஞத்தீஹீ’’தி லிகி²தம். ‘‘விஞ்ஞத்திதோ பஸவனம் அட்டு²ப்பத்திவஸேன அட்ட²கதா²யம் அனுஞ்ஞாதம். ஸூபோத³னாதி³வஸேன தத்த² ஆபத்தி ஏவா’’தி வுத்தம், தம் ந யுத்தம். கஸ்மா? பரிவாரே (பரி. 168) ஏவ த்³வின்னம் ஆகாரானம் ஆக³தத்தா, தஸ்மா அட்ட²கதா²யம் ‘‘அனுஞ்ஞாத’’ந்தி து³வுத்தம். அட்டு²ப்பத்தியம்யேவ பாகடந்தி ‘‘பத³பா⁴ஜனே ந வுத்த’’ந்தி வத்தப்³ப³ம். ஏகதோ க³ண்ஹந்தீதி க³ஹிதப⁴த்தாபி அஞ்ஞே யாவ க³ண்ஹந்தி, தாவ சே திட்ட²ந்தி, ஏகதோ க³ண்ஹந்தியேவ நாம. ‘‘க³ச்ச²தி சே, அனாபத்தீ’’தி வத³ந்தி.

ஏத்தா²ஹ – ‘‘படிக்³க³ஹணமேவ ஹேத்த² பமாண’’ந்தி வுத்தம், அத² கஸ்மா பாளியம் ‘‘க³ணபோ⁴ஜனம் நாம யத்த² சத்தாரோ…பே… பு⁴ஞ்ஜந்தி, ஏதம் க³ணபோ⁴ஜனம் நாமா’’தி (பாசி. 218) வுத்தந்தி? வுச்சதி – யத்தா²தி உபயோக³த்தே² பு⁴ம்மவசனம். சத்தாரோதி க³ணஸ்ஸ ஹேட்டி²மபரிச்சே²த³னித³ஸ்ஸனம். பஞ்சன்னம் போ⁴ஜனானந்தி ஆபத்திப்பஹோனகபோ⁴ஜனனித³ஸ்ஸனம். அஞ்ஞதரேன போ⁴ஜனேன நிமந்திதாதி அகப்பியனிமந்தனனித³ஸ்ஸனம். நிமந்தனவஸேனேவ பன க³ணபோ⁴ஜனஸ்ஸ வுத்தத்தா ‘‘நிமந்திதா பு⁴ஞ்ஜந்தீதி வுத்த’’ந்தி வுத்தம். ‘‘அஞ்ஞதரம் போ⁴ஜனம் விஞ்ஞாபேத்வா பு⁴ஞ்ஜந்தீ’’தி பன ந வுத்தம் அட்டு²ப்பத்தியம்யேவ பாகடத்தா. யம் பு⁴ஞ்ஜந்தீதி ஏவம் ஸம்ப³ந்தோ⁴ வேதி³தப்³போ³. தத்த² பு⁴ஞ்ஜந்தீதி படிக்³கா³ஹகனியமவசனம். ந ஹி அப்படிக்³க³ஹிதகம் பி⁴க்கூ² பு⁴ஞ்ஜந்தி. இத³ம் வுத்தம் ஹோதி ‘‘க³ணஸ்ஸ யதோ படிக்³க³ஹிதாஹாரபோ⁴ஜனஹேது பாசித்திய’’ந்தி. ஆக³ந்துகபட்டம் மோக⁴ஸுத்தேன ஸிப்³பி³த்வா ட²பேந்தி, தத்த² அனுவாதே யதா² ஏகதலம் ஹோதி, ததா² ஹத்தே²ஹி க⁴ட்டேதி. வலேதீதி ஆவட்டேதி. பரிவத்தனந்தி ஸுத்தம் க³ண்ஹந்தானம் ஸுக²க்³க³ஹணத்த²ம் ஸுத்தபரிவத்தனம் கரோதி, பட்டம் ஸிப்³ப³ந்தானம் ஸுக²ஸிப்³ப³னத்த²ம் பட்டபரிவத்தனஞ்ச. நவசீவரகாரகோ இதா⁴தி⁴ப்பேதோ, ந இதரோதி. ‘‘பி³ம்பி³ஸாரம் ஆபுச்சி²த்வா ஸம்பா⁴ரே கயிரமானேயேவ காலா அதிக்கந்தா, பச்சா² க³ணபோ⁴ஜனஸிக்கா²பதே³ பஞ்ஞத்தே ப⁴க³வந்தம் உபஸங்கமித்வா புச்சீ²’’தி வத³ந்தி, அஞ்ஞதா² அட்ட²கதா²ய விருஜ்ஜ²னதோ.

220. ‘‘த்³வே தயோ ஏகதோதி யேபி அகப்பியனிமந்தனம் ஸாதி³யித்வா’’திஆதி³வசனேன அகப்பியனிமந்தனபச்சயா ஏவ அனாபத்தி, விஞ்ஞத்திதோ ஆபத்தியேவாதி தீ³பேதி. அனிமந்திதோ சதுத்தோ² யஸ்ஸ ததே³தம் அனிமந்திதசதுத்த²ம். ஏஸ நயோ ஸப்³ப³த்த². பவேஸேத்வாதி நிஸீதா³பேத்வா. சீவரதா³னஸமயலத்³த⁴கசதுக்கம் சீவரகாரஸமயலத்³த⁴கசதுக்கந்தி ஏவமாதீ³னி. தானி சாதி யேஹி போ⁴ஜனேஹி விஸங்கேதோ நத்தி², தானி. மஹாதே²ரேதி உபஸம்பன்னே. அட்ட²த்வாதி டி²தேன நிமித்தம் த³ஸ்ஸிதம் ஹோதி. தத்த² தத்த² க³ந்த்வாதி ரதி²காதீ³ஸு பி⁴க்கு²ஸமீபே க³ந்த்வா. இமஸ்மிம் பன ஸிக்கா²பதே³ கத்த²சி போத்த²கே ‘‘அனுஜானாமி, பி⁴க்க²வே, சீவரதா³னஸமயே க³ணபோ⁴ஜனம் பு⁴ஞ்ஜிதும். ஏவஞ்சித³ம் ப⁴க³வதா பி⁴க்கூ²ன’’ந்தி பாடோ² தி³ஸ்ஸதி. கத்த²சி ‘‘பு⁴ஞ்ஜிது’’ந்தி வத்வா ‘‘ஏவஞ்ச பன, பி⁴க்க²வே, இமம் ஸிக்கா²பத³ம் உத்³தி³ஸேய்யாதா²’’தி பாடோ², அயம் ஸோப⁴னோ.

க³ணபோ⁴ஜனஸிக்கா²பத³வண்ணனா நிட்டி²தா.

3. பரம்பரபோ⁴ஜனஸிக்கா²பத³வண்ணனா

221. அதி⁴ட்டி²தாதி நிச்சப்பவத்தா. ப³த³ரசுண்ணஸக்கராதீ³ஹி யோஜிதம் ப³த³ரஸாளவம். கிரகம்மகாரேனாதி கிரஸ்ஸ கம்மகாரேன.

226. ‘‘விகப்பேத்வா க³ண்ஹாஹீ’’தி ஏத்தா²ஹு போராணத்தே²ரா ‘‘ப⁴க³வதோ ஸம்முகா² அவிகப்பேத்வா கே³ஹதோ நிக்க²மித்வா ரதி²காய அஞ்ஞதரஸ்ஸ பி⁴க்கு²னோ ஸந்திகே விகப்பேஸி, விகப்பேந்தேன பன ‘மய்ஹம் ப⁴த்தபச்சாஸம் இத்த²ன்னாமஸ்ஸ த³ம்மீ’தி வத்தப்³ப³ம், இதரேன வத்தப்³ப³ம் ‘தஸ்ஸ ஸந்தகம் பரிபு⁴ஞ்ஜ வா யதா²பச்சயம் வா கரோஹீ’’’தி. பஞ்சஸுஸஹத⁴ம்மிகேஸூதி ஸம்முகா² டி²தஸ்ஸ ஸஹத⁴ம்மிகஸ்ஸ யஸ்ஸ விகப்பேதுகாமோ, தம் ஸஹத⁴ம்மிகம் அதி³ஸ்வா க³ஹட்ட²ஸ்ஸ வா ஸந்திகே, ஸயமேவ வா ‘‘பஞ்சஸு ஸஹத⁴ம்மிகேஸு இத்த²ன்னாமஸ்ஸ விகப்பேமீ’’தி வத்வா பு⁴ஞ்ஜிதப்³ப³ந்தி ஏகே, ஏவம் ஸதி தே²ரோ தஸ்மிம்யேவ நிஸின்னோவ ததா² வாசம் நிச்சா²ரேத்வா படிக்³க³ண்ஹாதீதி தக்கோ தி³ஸ்ஸதி. மஹாபச்சரியாதீ³ஸு பன பரம்முகா² விகப்பனாவ வுத்தா, ஸா ‘‘தேன ஹானந்த³, விகப்பேத்வா க³ண்ஹாஹீ’’தி இமினா ஸமேதி, ததா²பி மாதிகாட்ட²கதா²யம் (கங்கா². அட்ட². பரம்பரபோ⁴ஜனஸிக்கா²பத³வண்ணனா) ‘‘தஸ்மா யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹம் ப⁴த்தபச்சாஸம் துய்ஹம் த³ம்மீ’தி வா ‘விகப்பேமீ’தி வா ஏவம் ஸம்முகா² வா ‘இத்த²ன்னாமஸ்ஸ த³ம்மீ’தி வா ‘விகப்பேமீ’தி வா ஏவம் பரம்முகா² வா’’தி வசனதோ ஸஹத⁴ம்மிகஸ்ஸ ஸந்திகே ஏவ வத்தப்³ப³ம், ந ஸயமேவாதி தி³ஸ்ஸதி. யஸ்மா அயம் பச்சி²மனயோ போராணக³ண்டி²பதே³னபி ஸமேதி, தஸ்மா இத⁴ மாதிகாட்ட²கதா²னுஸாரேன அத்தோ² வேதி³தப்³போ³. ஏத்த² கிஞ்சாபி ‘‘தே மனுஸ்ஸா…பே… போ⁴ஜனமத³ம்ஸூ’’தி வசனதோ அகப்பியனிமந்தனம் பஞ்ஞாயதி, ததா²பி தே²ரஸ்ஸ குக்குச்சுப்பத்திகாரணேன ப⁴த்தேன ஸோ நிமந்திதோதி வேதி³தப்³போ³. அஞ்ஞதா² பரதோ ‘‘த்³வே தயோ நிமந்தனே ஏகதோ பு⁴ஞ்ஜதீ’’தி வசனேன, அனாபத்திவாரேன ச விருஜ்ஜ²தி.