7. ஸப்பாணகவக்³கோ³

1. ஸஞ்சிச்சபாணஸிக்கா²பத³வண்ணனா

382. ஸஞ்சிச்சபாணஸிக்கா²பத³ம் உத்தானத்த²மேவ.

2. ஸப்பாணகஸிக்கா²பத³வண்ணனா

387. ‘‘பாணோ அத்தீ²’’தி ஜானந்தோபி ‘‘மரிஸ்ஸந்தீ’’தி அவிசாரேத்வா பிவதிசே, அனாபத்தி.

ஜலே பக்கி²பனம் புப்ப²ம், ஜலப்பவேஸனம் இத³ம்;

ஏவம் உபி⁴ன்னம் நானத்தம், ஞேய்யம் ஞாணவதா ஸதா³தி.

ஸப்பாணகஸிக்கா²பத³வண்ணனா நிட்டி²தா.

3. உக்கோடனஸிக்கா²பத³வண்ணனா

392. ததியே த்³வாத³ஸ உக்கோடா வேதி³தப்³பா³. தத்த² அகதம் கம்மம், து³க்கடம் கம்மம், புன காதப்³ப³ம் கம்மந்தி அனுவாதா³தி⁴கரணே லப்³ப⁴ந்தி. அனிஹடம், து³ன்னிஹடம், ந புன ஹரிதப்³ப³ந்தி விவாதா³தி⁴கரணே லப்³ப⁴ந்தி, அவினிச்சி²தம், து³வினிச்சி²தம், புன வினிச்சி²தப்³ப³ந்தி ஆபத்தாதி⁴கரணே லப்³ப⁴ந்தி. அவூபஸந்தம், து³வூபஸந்தம், புன வூபஸமேதப்³ப³ந்தி கிச்சாதி⁴கரணே லப்³ப⁴ந்தீதி அட்ட²கதா²னயோ, பாளியம் பனேத்த² முக²மத்தமேவ த³ஸ்ஸிதம்.

உக்கோடனஸிக்கா²பத³வண்ணனா நிட்டி²தா.

4. து³ட்டு²ல்லஸிக்கா²பத³வண்ணனா

399. ‘‘பாராஜிகானீதி அத்து²த்³தா⁴ரவஸேன த³ஸ்ஸிதானீ’’தி கத²ம் விஞ்ஞாயதீதி சே? பரிவாரபாளிதோ. வுத்தஞ்ஹி தத்த² ‘‘ஆபத்தாதி⁴கரணபச்சயா கதி ஆபத்தியோ ஆபஜ்ஜதி. ஆபத்தாதி⁴கரணபச்சயா சதஸ்ஸோ ஆபத்தியோ ஆபஜ்ஜதி. பி⁴க்கு²னீ ஜானம் பாராஜிகம் த⁴ம்மம் படிச்சா²தே³தி, ஆபத்தி பாராஜிகஸ்ஸ. வேமதிகா படிச்சா²தே³தி, ஆபத்தி து²ல்லச்சயஸ்ஸ. பி⁴க்கு² ஸங்கா⁴தி³ஸேஸம் படிச்சா²தே³தி, ஆபத்தி பாசித்தியஸ்ஸ. ஆசாரவிபத்திம் படிச்சா²தே³தி, ஆபத்தி து³க்கடஸ்ஸா’’தி (பரி. 290). பாராஜிகம் படிச்சா²தே³ந்தோ பி⁴க்கு² அனாபத்தி, நோ ஆபத்திம் ஆபஜ்ஜதி அவுத்தத்தாதி சே? ந, ஸம்கிலிட்டே²ன சித்தேன படிச்சா²த³னே வினா ஆபத்தியா அஸம்ப⁴வதோ. து³க்கடவாரே வத்தப்³பா³பி பாராஜிகாபத்தியோ பட²மம் அத்து²த்³தா⁴ரவஸேன ஸங்கா⁴தி³ஸேஸேஹி ஸஹ வுத்தத்தா ந ஸக்கா புன வத்துந்தி ந வுத்தாதி வேதி³தப்³பா³.

யாவ கோடி ந சி²ஜ்ஜதீதி சேத்த² யோ அந்தமஸோ படிச்சா²த³னத்த²ம் அஞ்ஞஸ்ஸ ஆரோசேது வா, மா வா, படிச்சா²த³னசித்தேனேவ ஆபத்திம் ஆபன்னோ. தஸ்ஸ புன அஞ்ஞஸ்ஸ படிச்சா²த³னத்த²ம் அனாரோசனேனேவ ந கோடி சி²ன்னா ஹோதி, கிம் புன படினிவத்தித்வா வசனேன பயோஜனந்தி ந அந்திமஸ்ஸ அனாரோசனேன சி²ன்னா ஹோதி, அப்படிச்சா²த³னேன ஏவ சி²ன்னா ஹோதி, ததோ அப்படிச்சா²த³னத்த²ம் அபுப்³ப³ஸ்ஸ ஆரோசேதப்³ப³ம், ததோ பட்டா²ய கோடி சி²ன்னா ஹோதி, தத³பா⁴வோ படினிவத்தித்வா அப்படிச்சா²த³னத்த²ம் ஆரோசேதப்³ப³ம், ஏவம்பி கோடி சி²ன்னா ஹோதீதி ஏவம் நோ படிபா⁴தீதி ஆசரியோ. ததியேன து³தியஸ்ஸாதி ஏத்த² ‘‘து³தியோ நாம பட²மோ’’தி வத³ந்தானம் ‘‘வத்து² புக்³க³லோ ந வத்தப்³போ³’’தி வாரிதத்தா ந ஸுந்த³ரம். அஞ்ஞஸ்ஸ சதுத்த²ஸ்ஸ ஆரோசனேபி ந ஸுந்த³ரம். கஸ்மா? புப்³பே³வ ஸுத்வா அஞ்ஞஸ்ஸ அனாரோசிதத்தா. ‘‘ஸுதேன அஞ்ஞஸ்ஸ ஆரோசேதப்³ப³ம் ஸியா’’தி வத³ந்தி.

து³ட்டு²ல்லஸிக்கா²பத³வண்ணனா நிட்டி²தா.

5. ஊனவீஸதிவஸ்ஸஸிக்கா²பத³வண்ணனா

404. புனப்புனம் உப்பஜ்ஜனதோ ப³ஹுதா⁴. ஹாயனவட்³ட⁴னந்தி மாதுகுச்சி²ஸ்மிம் சே த்³வாத³ஸன்னம் மாஸானம் ஊனதாய ஹாயனம் கதம். பஸூதஸ்ஸ வட்³ட⁴னம் காதப்³ப³ம். மாதுகுச்சி²ஸ்மிம் சே வட்³ட⁴னம் கதம். பஸூதஸ்ஸ ஹாயனம் காதப்³ப³ம். நிக்க²மனீயபுண்ணமாஸீ நாம ஸாவணமாஸஸ்ஸ புண்ணமாஸீ. ‘‘பாடிபத³தி³வஸேதி து³தியே உபக³ச்ச²தி தி³வஸே’’தி லிகி²தம். ஸோ ஹி பஸூததி³வஸதோ பட்டா²ய பரிபுண்ணவீஸதிவஸ்ஸோ ஹோதி. அவஸேஸானம் த்³வின்னம் வஸ்ஸானம் அதி⁴கதி³வஸானி ஹோந்தேவ, தஸ்மா நிக்கங்கா² ஹுத்வா உபஸம்பாதே³ந்தி. தம் ஸந்தா⁴யாதி க³ப்³ப⁴வஸ்ஸஞ்ச பவாரேத்வா லத்³த⁴வஸ்ஸஞ்ச அக³ணேத்வா ஜாததி³வஸதோ பட்டா²ய க³ணேத்வா ஏகூனவீஸதிவஸ்ஸம். ஏகூனவீஸதிவஸ்ஸோதி ‘‘க³ப்³ப⁴வஸ்ஸம் ஏவ பஹாயா’’தி லிகி²தம், தம் து³ல்லிகி²தம்.

406. அஞ்ஞம் உபஸம்பாதே³தீதி உபஜ்ஜா²யோ வா ஆசரியோ வா ஹுத்வா உபஸம்பாதே³தி. ‘‘ஓபபாதிகஸ்ஸ ஸோளஸவஸ்ஸுத்³தே³ஸிகபா⁴வதோ புன சத்தாரோ வஸ்ஸே அதிக்கமித்வா உபஸம்பதா³ காதப்³பா³’’தி ஆசரியா வத³ந்தீதி கேசி.

ஊனவீஸதிவஸ்ஸஸிக்கா²பத³வண்ணனா நிட்டி²தா.

6. தே²ய்யஸத்த²ஸிக்கா²பத³வண்ணனா

409. தே²ய்யஸத்தோ² சே ஸுத்³த⁴மாதுகா³மோ த்³வே ஆபத்தியோ. அத² பி⁴க்கு²னியோ, ஸமயோ ரக்க²தி. தே²ய்யஸத்த²பா⁴வஸ்ஸ டா²னம் கத்வா ரக்க²ணீயத்தா ஸஹத⁴ம்மிகானம் ரக்க²தியேவாதி ஏகே. தே²ய்யபா⁴வே ந ஸஹத⁴ம்மிகதா, தஸ்மா ந ரக்க²தி ஏவாதி ஏகே. அபாராஜிகதே²ய்யபா⁴வே ஸதி ஸஹத⁴ம்மிகபா⁴வோதி சே? இதரஸ்மிம் இதரந்தி ஸமயோ அனிஸ்ஸடோ ஆபஜ்ஜதி. பி⁴க்கு² தே²ய்யஸத்தோ² சே, யதா²வத்து²கமேவ. தே²ய்யஸத்தே² தே²ய்யஸத்த²ஸஞ்ஞீ ஸத்³தி⁴ம் ஸம்விதா⁴யாதி ச. ‘‘ஸத்³தி⁴’’ந்தி பத³ம் கேஸுசி நத்தி², தம் அனனுரூபம். ததா² து³தியேபி.

தே²ய்யஸத்த²ஸிக்கா²பத³வண்ணனா நிட்டி²தா.

7. ஸம்விதா⁴னஸிக்கா²பத³வண்ணனா

412. ‘‘தேன கோ² பன ஸமயேன அஞ்ஞதரா இத்தீ²’’தி ச பாடோ² அத்தி², கேஸுசி நத்தி². நத்தி²பா⁴வோ ஸுந்த³ரோ ‘‘தேன கோ² ஸமயேனா’’தி அதி⁴காரத்தாதி கேசி. இத⁴ ஏகதோஉபஸம்பன்னா, ஸிக்க²மானா, ஸாமணேரீதி இமாபி திஸ்ஸோ ஸங்க³ஹம் க³ச்ச²ந்தி. இமாஸம் பன ஸமயோ ரக்க²தி, அயமிமாஸம், மாதுகா³மஸ்ஸ ச விஸேஸோ.

414. அபிசேத்த² ‘‘விஞ்ஞூ படிப³லா’’தி வசனதோ அப்படிப³லா அனாபத்திவத்து²காதி ஏகே, தம் ந யுத்தம் து³க்கடவத்து²கத்தா. ‘‘பி⁴க்கு² ஸம்வித³ஹதி, மாதுகா³மோ ந ஸம்வித³ஹதி, ஆபத்தி து³க்கடஸ்ஸா’’தி ஹி வுத்தம். ததா² ஹி உபபரிக்கி²தப்³ப³ம்.

ஸம்விதா⁴னஸிக்கா²பத³வண்ணனா நிட்டி²தா.

8. அரிட்ட²ஸிக்கா²பத³வண்ணனா

417. க³ஹட்ட²ஸ்ஸாபி பி⁴க்கு²னீதூ³ஸககம்மம் மோக்க²ந்தராயிகமேவ, தஸ்மா தஸ்ஸ பப்³ப³ஜ்ஜாபி படிக்கி²த்தா. விபாகந்தராயிகா அஹேதுகத்தா. புப்³பே³ ஸஞ்சிச்ச ஆபன்னா ஸம்முட்டா² ஸுத்³த⁴ஸஞ்ஞினோ அந்தராயிகா ஏவ. ஸேஸாதி ஜாதிகா. ரஸேனாதி பா⁴வேன. அதி⁴குட்டனட்டே²னாதி அதி⁴கரணம் கத்வா குட்டனட்டே²ன சி²ந்த³னட்டே²ன. அஸிஸூனூபமா குஸலத⁴ம்மச்சே²த³னட்டே²ன. ஸத்திஸூலூபமா சித்தவிதுத³னட்டே²னாதி போராணா. அனாபத்திபாளியம் ‘‘ஆதி³கம்மிகஸ்ஸா’’தி முகா²ருள்ஹவஸேன லிகி²தம்.

அரிட்ட²ஸிக்கா²பத³வண்ணனா நிட்டி²தா.

9. உக்கி²த்தஸம்போ⁴க³ஸிக்கா²பத³வண்ணனா

425. ‘‘தம் தி³ட்டி²ம் அப்படினிஸ்ஸட்டே²னாதி இமினா லத்³தி⁴னானாஸம்வாஸகதம் தீ³பேதீ’’தி வுத்தம். திசித்தந்தி ஏத்த² விபாகாப்³யாகதசித்தேன ஸஹவாஸேய்யம் கப்பேய்யாதி ஏவமத்தோ² த³ட்ட²ப்³போ³. அஞ்ஞதா² ஸசித்தகத்தா ஸிக்கா²பத³ஸ்ஸ கிரியாப்³யாகதம் ஸந்தா⁴ய ந யுஜ்ஜதி.

உக்கி²த்தஸம்போ⁴க³ஸிக்கா²பத³வண்ணனா நிட்டி²தா.

10. கண்டகஸிக்கா²பத³வண்ணனா

428. யத்த² தே ந பஸ்ஸாமாதி தேதி தம். அத² வா தவ ரூபாதி³ம் ந பஸ்ஸாம. அயம் ஸமணுத்³தே³ஸோ பாராஜிகோ ஹோதி. ‘‘ஸசே தம் தி³ட்டி²ம் படினிஸ்ஸஜ்ஜதி, ஸங்க⁴ஸ்ஸ ஆரோசேத்வா ஸங்கா⁴னுமதியா பப்³பா³ஜேதப்³போ³’’தி போராணக³ண்டி²பதே³ வுத்தம், தம் ந யுத்தம், த³ண்ட³கம்மனாஸனா ஹி இதா⁴தி⁴ப்பேதா. யதி³ ஸோ பாராஜிகோ, லிங்க³னாஸனா நாம ஸியா. தே படிஸேவதோ நாலம் அந்தராயாயாதி ச தி³ட்டி² ஸத்த²ரி அஸத்தா²தி³தி³ட்டி² ந ஹோதி. ஸசே ஸா யஸ்ஸ உப்பஜ்ஜதி, ஸோ பாராஜிகோ ஹோதி, தஸ்மிம்பி ஏவமேவ படிபஜ்ஜிதப்³ப³ம் ஸம்வரே அதிட்ட²ந்தோ லிங்க³னாஸனாயேவ நாஸேதப்³போ³தி ஆசரியஸ்ஸ தக்கோ.

கண்டகஸிக்கா²பத³வண்ணனா நிட்டி²தா.

ஸமத்தோ வண்ணனாக்கமேன ஸப்பாணகவக்³கோ³ ஸத்தமோ.