3. பரம்பரபோ⁴ஜனஸிக்கா²பத³வண்ணனா

221. அதி⁴ட்டி²தாதி நிச்சப்பவத்தா. ப³த³ரசுண்ணஸக்கராதீ³ஹி யோஜிதம் ப³த³ரஸாளவம். கிரகம்மகாரேனாதி கிரஸ்ஸ கம்மகாரேன.

226. ‘‘விகப்பேத்வா க³ண்ஹாஹீ’’தி ஏத்தா²ஹு போராணத்தே²ரா ‘‘ப⁴க³வதோ ஸம்முகா² அவிகப்பேத்வா கே³ஹதோ நிக்க²மித்வா ரதி²காய அஞ்ஞதரஸ்ஸ பி⁴க்கு²னோ ஸந்திகே விகப்பேஸி, விகப்பேந்தேன பன ‘மய்ஹம் ப⁴த்தபச்சாஸம் இத்த²ன்னாமஸ்ஸ த³ம்மீ’தி வத்தப்³ப³ம், இதரேன வத்தப்³ப³ம் ‘தஸ்ஸ ஸந்தகம் பரிபு⁴ஞ்ஜ வா யதா²பச்சயம் வா கரோஹீ’’’தி. பஞ்சஸுஸஹத⁴ம்மிகேஸூதி ஸம்முகா² டி²தஸ்ஸ ஸஹத⁴ம்மிகஸ்ஸ யஸ்ஸ விகப்பேதுகாமோ, தம் ஸஹத⁴ம்மிகம் அதி³ஸ்வா க³ஹட்ட²ஸ்ஸ வா ஸந்திகே, ஸயமேவ வா ‘‘பஞ்சஸு ஸஹத⁴ம்மிகேஸு இத்த²ன்னாமஸ்ஸ விகப்பேமீ’’தி வத்வா பு⁴ஞ்ஜிதப்³ப³ந்தி ஏகே, ஏவம் ஸதி தே²ரோ தஸ்மிம்யேவ நிஸின்னோவ ததா² வாசம் நிச்சா²ரேத்வா படிக்³க³ண்ஹாதீதி தக்கோ தி³ஸ்ஸதி. மஹாபச்சரியாதீ³ஸு பன பரம்முகா² விகப்பனாவ வுத்தா, ஸா ‘‘தேன ஹானந்த³, விகப்பேத்வா க³ண்ஹாஹீ’’தி இமினா ஸமேதி, ததா²பி மாதிகாட்ட²கதா²யம் (கங்கா². அட்ட². பரம்பரபோ⁴ஜனஸிக்கா²பத³வண்ணனா) ‘‘தஸ்மா யோ பி⁴க்கு² பஞ்சஸு ஸஹத⁴ம்மிகேஸு அஞ்ஞதரஸ்ஸ ‘மய்ஹம் ப⁴த்தபச்சாஸம் துய்ஹம் த³ம்மீ’தி வா ‘விகப்பேமீ’தி வா ஏவம் ஸம்முகா² வா ‘இத்த²ன்னாமஸ்ஸ த³ம்மீ’தி வா ‘விகப்பேமீ’தி வா ஏவம் பரம்முகா² வா’’தி வசனதோ ஸஹத⁴ம்மிகஸ்ஸ ஸந்திகே ஏவ வத்தப்³ப³ம், ந ஸயமேவாதி தி³ஸ்ஸதி. யஸ்மா அயம் பச்சி²மனயோ போராணக³ண்டி²பதே³னபி ஸமேதி, தஸ்மா இத⁴ மாதிகாட்ட²கதா²னுஸாரேன அத்தோ² வேதி³தப்³போ³. ஏத்த² கிஞ்சாபி ‘‘தே மனுஸ்ஸா…பே… போ⁴ஜனமத³ம்ஸூ’’தி வசனதோ அகப்பியனிமந்தனம் பஞ்ஞாயதி, ததா²பி தே²ரஸ்ஸ குக்குச்சுப்பத்திகாரணேன ப⁴த்தேன ஸோ நிமந்திதோதி வேதி³தப்³போ³. அஞ்ஞதா² பரதோ ‘‘த்³வே தயோ நிமந்தனே ஏகதோ பு⁴ஞ்ஜதீ’’தி வசனேன, அனாபத்திவாரேன ச விருஜ்ஜ²தி.

229. ஏத்தா²யம் விசாரணா – ‘‘அஞ்ஞோ மனுஸ்ஸோ பத்தம் க³ண்ஹாதி, ந தா³தப்³ப³’’ந்தி வசனதோ அபரபா⁴கே³ அகப்பியனிமந்தனேன நத்தி² பயோஜனம், புப்³ப³பா⁴கே³யேவ அகப்பியனிமந்தனேன பயோஜனந்தி ஸ்வேபி ப⁴ந்தே ஆக³ச்சே²ய்யாதா²தி ஏத்த² கதரம் அகப்பியனிமந்தனம், தஸ்மா அதி⁴ப்பாயோ சேத்த² பமாணந்தி. ந, ‘‘பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தீ’’தி வசனதோதி. தத்த² ‘‘ஸ்வேபி ப⁴ந்தே’’தி ஏத்த² யதா² வசனமத்தம் அக்³க³ஹேத்வா அகப்பியனிமந்தனக்கமேன அத்தோ² க³ஹிதோ, ததா² ‘‘பிண்டா³ய சரித்வா’’தி ஏத்தா²பி அந்தரா அகப்பியனிமந்தனேன லத்³த⁴ப⁴த்தம் ஸந்தா⁴ய வுத்தந்தி அத்தோ² க³ஹேதப்³போ³. பிண்டா³ய ஹி சரந்தம் தி³ஸ்வா ‘‘ஏத்த², ப⁴ந்தே, ப⁴த்தம் க³ண்ஹதா²’’தி தி³ன்னம்பி அகப்பியனிமந்தனேன லத்³த⁴ம் நாம ஹோதி. வோஹாரேன பன ‘‘பிண்டா³ய சரித்வா லத்³த⁴ப⁴த்த’’ந்தி வுச்சதி, ஏவம்ஸம்பத³மித³ம் த³ட்ட²ப்³ப³ம். அஞ்ஞதா² மாதிகாட்ட²கதா²யம் ‘‘க³ணபோ⁴ஜனே வுத்தனயேனேவ பஞ்சஹி போ⁴ஜனேஹி நிமந்திதஸ்ஸ…பே… பரஸ்ஸ பரஸ்ஸ போ⁴ஜனே’’தி வுத்தவசனவிரோதோ⁴. இத³ஞ்ஹி வசனம் யேன பட²மம் நிமந்திதோ, ததோ பட²மனிமந்திதம் ஆதா³ய க³தோ பரஸ்ஸ பரஸ்ஸ நிமந்தனகதா³யகஸ்ஸ போ⁴ஜனேதி அத்த²பரிதீ³பனதோ நிமந்தனதோ லத்³த⁴ப⁴த்தஸ்ஸ போ⁴ஜனேயேவ ஆபத்தீதி தீ³பேதி. ‘‘த்³வே தயோ நிமந்தனே ஏகதோ’’தி வசனேனபி ஸமேதி, அஞ்ஞதா² ‘‘யேன நிமந்திதோ, தஸ்ஸ போ⁴ஜனதோ பரஸ்ஸ போ⁴ஜனே’’தி ஏத்தகம் வத்தப்³ப³ம் ஸியா, பாளியம் வா ‘‘நிமந்தனேன ஏகதோபு⁴ஞ்ஜதீ’’தி ஏத்தகம் வத்தப்³ப³ம் ஸியா. து³தியனிமந்தனஸ்ஸ பட²மபோ⁴ஜனே ஆபத்திப்பஸங்க³னிவாரணத்த²ம் ‘‘யேன யேனா’’திஆதி³ வுத்தம். நிமந்தனபடிபாடியா பு⁴ஞ்ஜதீதி பாளீதி சே? ந, ‘‘அனாபத்தி நிச்சப⁴த்தே’’திஆதி³பாளிவிரோத⁴தோ.

க³ண்டி²பதே³ பன ‘‘பிண்டா³ய சரித்வா லத்³த⁴ப⁴த்தம் கஸ்மா பு⁴ஞ்ஜிதும் ந லப⁴தீதி சே? ‘பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ, தம் ட²பேத்வா பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாமா’தி வுத்தத்தா’’தி லிகி²தம். யதி³ ஏவம் நிச்சப⁴த்தாதி³கம்பி ந வட்டதீதி ஆபஜ்ஜதீதி நிச்சப⁴த்தாதி³ ஓதி³ஸ்ஸகந்தி சே? தம் ந, தத³ஞ்ஞஸ்ஸ அத்தனோ த⁴னேன நிப்ப²ன்னஸ்ஸ, ஸங்க⁴தோ லத்³த⁴ஸ்ஸ வா பாதோ பசனகயாகு³ சே க⁴னா ஹோதி, தஸ்ஸாபி, ஏககுடிகம் கா³மம் உபனிஸ்ஸாய விஹரதோ பி⁴க்கா²சரியவஸேன லபி⁴தப்³ப³னிச்சப⁴த்தஸ்ஸ ச அகப்பியபா⁴வப்பஸங்க³தோ. தத்த² பி⁴க்கா²சரியவஸேன லத்³த⁴ம் ந கப்பதி நிமந்தனகானம் அப்பஸாதா³வஹனதோதி சே? ந, ‘‘பஞ்ச போ⁴ஜனானி ட²பேத்வா ஸப்³ப³த்த² அனாபத்தீ’’தி வசனவிரோத⁴தோ. கா²த³னீயம்பி ஹி பரஸ்ஸ கா²தி³த்வா பு⁴த்தத்தா நிமந்தனபோ⁴ஜனம் அபு⁴ஞ்ஜந்தோ அப்பஸாத³ம் கரோதி ஏவ, தஸ்மா அப்பஸாதா³வஹம் அப்பமாணம், தஸ்மா நிச்சப⁴த்தாதி³ ஓதி³ஸ்ஸகம் ந ஸம்ப⁴வதி. அபிச ஹேட்டா² வுத்தனயேன ஸத்³தி⁴ம் இத⁴ வுத்தனயேன ஸம்ஸந்தி³த்வா யம் யம் க²மதி, தம் தம் க³ஹேதப்³ப³ந்தி ஸப்³போ³பி கேஸஞ்சி ஆசரியானம் வினிச்ச²யோ. ஆசரியஸ்ஸ பன வினிச்ச²யோ அந்தே ஆவி ப⁴விஸ்ஸதி. ‘‘கீ²ரம் வா ரஸம் வா பிவதோ அமிஸ்ஸம்பீதி அதி⁴ப்பாயோ’’தி வுத்தம். க³ண்டி²பதே³ ‘‘ஹேட்டா² ஓத³னேனாமிஸ்ஸேத்வா உபரி திட்ட²தீ’’தி லிகி²தம்.

மஹாஉபாஸகோதி கே³ஹஸாமிகோ. மஹாஅட்ட²கதா²யம் ‘‘ஆபத்தீ’’தி வசனேன குருந்தி³யம் ‘‘வட்டதீ’’தி வசனம் விருத்³த⁴ம் விய தி³ஸ்ஸதி. ‘‘த்³வின்னம்பி அதி⁴ப்பாயோ மஹாபச்சரியம் விசாரிதோ’’தி லிகி²தம். ‘‘சாரித்ததோதி ‘ஸந்தம் பி⁴க்கு²ம் அனாபுச்சா²’தி பரதோ வத்தப்³ப³தோ’’தி வுத்தம். வசீகம்மம் அவிகப்பனம். ஏத்த² ‘‘மஹாஉபாஸகோ பி⁴க்கூ² நிமந்தேதி…பே… பச்சா² லத்³த⁴ம் ப⁴த்தம் பு⁴ஞ்ஜந்தஸ்ஸ ஆபத்தி. பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தீ’’தி அட்ட²கதா²யம் வசனதோ, ‘‘காலஸ்ஸேவ பிண்டா³ய சரித்வா பு⁴ஞ்ஜிம்ஹா’’தி பாளிதோ, க²ந்த⁴கே ‘‘ந ச, பி⁴க்க²வே, அஞ்ஞத்ர நிமந்தனே அஞ்ஞஸ்ஸ போ⁴ஜ்ஜயாகு³ பரிபு⁴ஞ்ஜிதப்³பா³, யோ பரிபு⁴ஞ்ஜேய்ய, யதா²த⁴ம்மோ காரேதப்³போ³’’தி (மஹாவ. 283) வசனதோ ச நிமந்தேத்வா வா பவேதே³து அனிமந்தேத்வா வா, பட²மக³ஹிதனிமந்தனஸ்ஸ பி⁴க்கு²னோ பட²மனிமந்தனபோ⁴ஜனதோ அஞ்ஞம் யம் கிஞ்சி பரஸந்தகம் போ⁴ஜனம் பரம்பரபோ⁴ஜனாபத்திம் கரோதி. அத்தனோ ஸந்தகம், ஸங்க⁴க³ணதோ லத்³த⁴ம் வா அக³ஹட்ட²ஸந்தகம் வட்டதி, நிமந்தனதோ பட²மம் நிப³த்³த⁴த்தா பன நிச்சப⁴த்தாதி³ பரஸந்தகம்பி வட்டதி. க²ந்த⁴கே ‘‘ந ச, பி⁴க்க²வே…பே… யதா²த⁴ம்மோ காரேதப்³போ³’’தி (மஹாவ. 283) வசனம் பரஸந்தகபோ⁴ஜனவுத்தனியமனம். ததோ ஹத்த²கோவ நோ தக்கோதி ஆசரியோ.

பரம்பரபோ⁴ஜனஸிக்கா²பத³வண்ணனா நிட்டி²தா.